1. ?Fraet long God i minim wanem, mo from wanem olgeta we oli lavem Jehova oli mas fraet long hem?

OL KRISTIN oli lavem God, mo oli fraet long hem tu. Maet samfala oli ting se tufala tingting ya i agensem tufala. Be yumi no stap tokbaot fraet ya we i mekem man i harem nogud mo i seksek. Yumi tokbaot fraet ya we i mekem man i tinghevi long God mo i gat bigfala respek long hem. Man ya i no wantem mekem Papa blong hem long heven i harem nogud, be i wantem gohed nomo blong fren gud wetem hem.—Sam 111:10, NW; Prov. 8:13, NW.

2. Folem ol tok blong King Deved long Ol Sam 86:11, ?wanem tufala samting we bambae yumi tokbaot?

² Ridim Ol Sam 86:11, NW. * Ol tok ya oli soemaot tingting blong King Deved, se i impoten blong fraet long God. ?Olsem wanem blong folem ol tok ya we Deved i talem long prea blong hem? Fastaem, bambae yumi tokbaot from wanem yumi mas tinghevi long nem blong God. Biaen, bambae yumi tokbaot olsem wanem blong soemaot long laef blong yumi se yumi tinghevi long nem ya.

3. ?Wanem i mekem se Moses i tinghevi long nem blong God?

³ Traem tingbaot filing blong Moses taem hem i stap haed long hol blong ston, nao bigfala laet blong Jehova i pas long fes blong hem. Bifo we Jisas i kam long wol, i no gat wan narafala man we i luk samting olsem. Jehova i yusum wan enjel blong talem long Moses se: ‘Mi mi Jehova. Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi holemstrong promes blong mi. Mi stap lavem ol man blong mi, wetem olgeta we oli stap  kamaot biaen long olgeta.’ (Eks. 33:17-23; 34:5-7) Evri taem we Moses i yusum nem blong Jehova, ating hem i tingbaot taem ya bakegen. Taswe yumi no sapraes se biaen, Moses i talem long ol man Isrel se oli mas ‘fraet long nem blong God we i hae we i hae, onagud long hem, mo tinghevi long hem.’—Dut. 28:58.

4. ?Wanem ol fasin blong Jehova we yumi mas tingting dip long olgeta, blong yumi gat bigfala respek long hem?

⁴ Taem yumi tingbaot nem blong Jehova, i gud yumi tingting dip long ol fasin blong hem tu, olsem paoa, waes, stret fasin, mo lav. Sipos yumi tingbaot ol fasin ya mo sam narawan bakegen, bambae yumi gat bigfala respek long hem.—Sam 77:11-15.

5-6. (1) ?Wanem mining blong nem blong God? (2) Folem Eksodas 3:13, 14 mo Aesea 64:8, ?olsem wanem Jehova i mekem stamba tingting blong hem i kamtru?

⁵ ?Wanem mining blong nem blong God? Plante man we oli stadi dip long Baebol, oli talem se nem ya Jehova i minim “Hem i Mekem i Kamtru.” Hemia i min se oltaem samting we Jehova i wantem bambae i kamtru, i no gat wan samting we i save blokem. ?From wanem?

⁶ Jehova i save kam olsem we hem i wantem blong mekem stamba tingting blong hem i kamtru. (Ridim Eksodas 3:13, 14.) Long olfala Hibru lanwis, tok ya “Mi Stap We Mi Stap” i save minim tu se, “Bambae Mi Soemaot Mi Olsem We Bambae Mi Soemaot Mi.” Yumi sapraes long fasin ya blong Jehova. Ol buk blong yumi tu oli pulum yumi blong tingbaot fasin ya. Jehova i save mekem ol man blong hem tu we oli sinman, oli kam olsem we hem i wantem blong mekem wok blong hem, mo blong mekem stamba tingting blong hem i kamtru. (Ridim Aesea 64:8.) Jehova i yusum ol rod ya blong mekem samting we hem i wantem i kamtru. I no gat wan samting i save blokem hem.—Aes. 46:10, 11.

7. ?Olsem wanem yumi save gat bigfala respek long Papa blong yumi long heven?

⁷ Sipos yumi tingting dip long ol samting  we Papa blong yumi long heven i mekem finis, mo ol samting we yumi mekem long paoa blong hem, bambae yumi lavem hem moa. Taem yumi tingting dip long ol samting we hem i wokem raonabaot long yumi, yumi sapraes long ol wok blong hem. (Sam 8:3, 4) Mo taem yumi tingbaot olsem wanem Jehova i mekem yumi naf blong mekem ol wok we hem i givim, yumi gat bigfala respek long hem. !Tru ya, nem blong Jehova i pulum yumi blong tinghevi long hem! Mining blong nem ya i joen wetem olgeta fasin blong Jehova, olgeta samting we hem i mekem finis, mo olgeta samting we bambae hem i mekem yet.—Sam 89:7, 8.

8. Folem Dutronome 32:2, 3, ?Jehova i wantem se ol man blong hem oli mekem wanem long nem blong hem?

⁸ Bifo we ol man Isrel oli go insaed long Promes Lan, Jehova i givim ol tok blong wan singsing long Moses. (Dut. 31:19) Nao Moses i tijim ol man Isrel long singsing ya. (Ridim Dutronome 32:2, 3.) Vas 2 mo 3 i soemaot klia se Jehova i no wantem we yumi haedem nem blong hem, olsem se nem ya i tabu tumas blong talem. !Hem i wantem se olgeta man oli save nem blong hem! !Ol man Isrel oli harem gud tumas, taem Moses i tijim olgeta long Jehova mo hae nem blong hem! Tijing ya i mekem bilif blong olgeta i strong, mo i leftemap tingting blong olgeta, olsem ol smosmol ren we i mekem garen i gru gud. ?Olsem wanem yumi save tijim ol man long fasin ya?

9. ?Olsem wanem yumi givhan blong mekem nem blong Jehova i tabu?

⁹ Taem yumi prij long ol haos wanwan mo long pablik ples, yumi yusum Baebol blong soemaot long ol man se nem blong God hemia Jehova. Ol buk we yumi givimaot, ol video, mo ol save long websaet tu, oli givim ona long Jehova. Long wok, long skul, o taem yumi stap travel, maet yumi gat janis blong tokbaot God ya we yumi lavem tumas mo ol fasin blong hem. Maet ol man we yumi toktok long olgeta, oli neva harem plan blong Jehova long saed blong ol man mo wol. Taem yumi talemaot trutok long saed blong Papa blong yumi, yumi givhan blong mekem nem blong hem i tabu. Yumi stap karemaot doti we ol man oli sakem long nem blong Jehova, taem oli talem ol giaman toktok blong spolem hem. I no gat wan narafala samting we i save mekem ol man oli harem gud moa, i bitim save blong Baebol we yumi givim long olgeta.—Aes. 65:13, 14.

10. Taem yumi stadi Baebol wetem wan man, ?from wanem i no naf blong tijim hem long ol loa blong God nomo?

¹⁰ Taem yumi stadi Baebol wetem wan man, yumi wantem se hem i save nem blong Jehova mo i yusum. Mo tu, yumi wantem se hem i save gud mining blong nem blong God. ?Bambae hem i save ol samting ya sipos yumi tijim hem nomo long ol loa blong God we hem i mas folem? Wan Baebol stadi i save lanem ol loa blong God, mo laekem olgeta tu. ?Be bambae hem i obei long Jehova from we hem i lavem hem? Iv i save loa blong God, be hem i no lavem God, sem mak long Adam tu. (Jen. 3:1-6) Taswe, i no naf blong tijim ol man long ol loa blong God nomo.

11. Taem yumi tijim ol man long ol loa blong God, ?olsem wanem blong halpem olgeta blong lavem hem tu?

¹¹ Ol loa blong Jehova oli stret gud mo oli mekem yumi harem gud. (Sam 119:97, 111, 112) Be maet Baebol stadi blong yumi  i no tingting olsem. Hem i mas kasem save se Jehova i mekem ol loa ya from we hem i lavem yumi. Taswe i gud yumi askem long hem se: “?Wanem tingting blong yu? ?From wanem God i talem se yumi mas mekem samting ya, o yumi no mas mekem? ?Mo hemia i soemaot wanem fasin blong hem?” Sipos yumi halpem ol Baebol stadi blong oli tingbaot Jehova mo lavem nem blong hem, ol save blong Baebol bambae i tajem hat blong olgeta. Bambae oli laekem ol loa blong God, mo bambae oli lavem God tu. (Sam 119:68) Bilif blong olgeta bambae i kam strong moa, nao bambae oli naf blong stanap strong taem wan samting i traem olgeta.—1 Kor. 3:12-15.

12. ?Olsem wanem Deved i gat tu tingting long hat blong hem, mo wanem frut i kamaot?

¹² Wan impoten haf blong prea blong King Deved long Ol Sam 86:11 (NW), hemia: “Mekem se mi gat wan tingting nomo long hat blong mi.” Tabu spirit i pulum King Deved blong i raetemdaon ol tok ya. Long laef blong hem, hem i luksave se i isi blong gat tu tingting long hat blong hem. Wan taem, hem i stap wokbaot antap long ruf blong haos blong hem, nao hem i luk waef blong narafala man i stap swim. Long taem ya, ?Deved i gat wan tingting nomo long hat blong hem, o i gat tu tingting? Hem i save loa blong Jehova se: ‘Yufala i no mas letem we woman blong narafala man i pulum tingting blong yufala.’ (Eks. 20:17) Be hem i gohed nomo blong lukluk. Hem i gat tu tingting long hat blong hem: hem i wantem woman ya Batseba, be long semtaem hem i wantem mekem Jehova i glad. Nating se longtaem finis Deved i lavem Jehova mo i fraet long hem, be long taem ya hem i tingbaot samting we hem nomo i wantem. From samting ya, Deved i mekem nogud fasin. Hem i sakem doti long nem blong Jehova. Mo hem i spolem sam gudfala man, wetem famle blong hem tu.—2 Saml. 11:1-5, 14-17; 12:7-12.

13. ?Olsem wanem yumi save se biaen Deved i gat wan tingting nomo long hat blong hem?

¹³ Jehova i stretem Deved, nao hem i kamgud mo i fren gud bakegen wetem Jehova. (2 Saml. 12:13; Sam 51:2-4, 17) Biaen Deved i tingbaot trabol mo hadtaem we hem i kasem, taem hem i gat tu tingting long hat blong hem. ?Olsem wanem? ?Jehova i givhan long Deved blong i gat wan tingting nomo long hat blong hem bakegen? Yes. Biaen Baebol i talem se, “tingting blong [Deved] i . . . stap strong” long Jehova God.—1 King 11:4; 15:3.

14. ?Wanem kwestin we yumi mas askem, mo from wanem?

 ¹⁴ Stori blong Deved i leftemap tingting blong yumi, be i givim woning tu. Bigfala sin we Deved i mekem i save tijim ol man blong God tede. Nating se yumi mekem wok blong Jehova longtaem finis o yumi jes stat, i gud yumi askem se: ‘?Mi mi stap agensem Setan taem hem i traehad blong mekem se mi gat tu tingting long hat blong mi?’

15. ?Olsem wanem fraet long God i save protektem yumi long ol pija we oli save pulum yumi?

¹⁵ Traem tingbaot: Sipos yu luk wan pija long TV o Intenet we i save pulum filing blong yu, ?bambae yu mekem wanem? Maet i isi blong ting se pija ya o muvi ya i no soemaot ol doti fasin blong seks stret. ?Be yu ting se Setan i save yusum samting ya blong mekem se yu gat tu tingting long hat blong yu? (2 Kor. 2:11) Traem tingbaot wan akis we man i yusum blong splitim faeawud. Fastaem we hem i kilim wud ya, hem i katem smol nomo, be taem akis i go insaed moa, hem i save splitim wud ya. Ol pija we oli pulum tingting blong yumi, oli olsem fastaem we akis i kilim wud. Maet yumi ting se ol pija ya oli no denja, be sloslo oli save mekem se yumi gat tu tingting long hat blong yumi. Nao yumi save mekem wan bigfala sin agensem Jehova. !Taswe yu no mas letem wan rabis tingting i kam insaed long hat blong yu! !Yu mas gat wan tingting nomo, hemia blong fraet long nem blong Jehova!

16. Taem wan samting i pulum yu, ?wanem ol kwestin we yu mas askem?

¹⁶ I no ol pija nomo we Setan i yusum, be hem i save yusum plante narafala samting tu. ?Bambae yu mekem wanem? I isi blong ting se ol samting ya oli oraet nomo. Maet yu stap tingting se: ‘Kongregesen i no save putumaot mi from samting ya, taswe i  oraet nomo.’ Be tingting ya i no stret nating. I moagud yu askem se: ‘?Setan i stap yusum samting ya blong mekem se mi gat tu tingting long hat blong mi? Sipos mi letem samting ya i pulum mi, ?bambae mi sakem doti long nem blong Jehova? ?Bambae mi kam klosap moa long God, o mi gowe long hem?’ I gud yumi tingting dip long ol kwestin ya. Mo yumi askem long Jehova blong i givim waes long yumi, blong yumi ansa stret long olgeta, yumi no giaman long yumi bakegen. (Jem. 1:5) Hemia i save protektem yumi, mo halpem yumi blong agensem Setan, olsem Jisas we i talem se: “!Setan yu gowe!”—Mat. 4:10.

17. ?From wanem i nogud yumi gat tu tingting long hat blong yumi? Talem wan pijatok.

¹⁷ I nogud yumi gat tu tingting long hat blong yumi. Traem tingbaot sipos ol man we oli plei long wan tim blong spot oli gat ol defdefren tingting. Samfala oli wantem leftemap olgeta, sam narafala oli no wantem folem ol rul, mo samfala bakegen oli tok nogud long man we i trenem olgeta. Ating tim olsem i no save winim wan maj. Be wan tim we evriwan i gat wan tingting mo oli wok gud wanples, i save win. Sipos ol tingting mo filing blong yu oli no stap nomo long wok blong Jehova, hat blong yu i save kam olsem tim ya we i no win. Yu mas tingbaot oltaem se Setan i wantem tumas blong mekem se yu gat tu tingting long hat blong yu. Hem i wantem se ol tingting, filing, mo ol samting we yu yu wantem oli agensem samting we Jehova i wantem. Blong mekem wok blong Jehova, yu mas gat wan tingting nomo long hat blong yu. (Mat. 22:36-38) !Yu no mas letem Setan i win!

18. Folem Maeka 4:5, ?yu gat strong tingting blong mekem wanem?

¹⁸ I gud yu prea long Jehova olsem Deved, we i talem se: “Yu mekem se mi gat wan tingting nomo long hat blong mi, hemia blong fraet long nem blong yu.” Traehad blong folem prea ya long laef blong yu. Evri dei, yu mas gat strong tingting blong mekem ol desisen we oli soemaot se yu fraet long tabu nem blong Jehova, nating se ol desisen ya oli smol o oli bigwan. Sipos yu mekem olsem, bambae yu leftemap nem ya olsem wan Witnes blong Jehova. (Prov. 27:11) Nao yumi evriwan i save talem olsem profet Maeka, se: “Bambae yumi wokbaot long nem blong Jehova, God blong yumi, gogo i no save finis.”—Maeka 4:5, NW.