1. Aha do artini mangkabiari Naibata, janah mase halak na mangkaholongi Jahowa maningon mangkabiari-Si?

TONTU holong do uhurta hubani Naibata janah sihol mangkabiari-Si. Bani artikel on, iulas hita ma mase maningon ihabiari hita Naibata. Tapi, aha do artini mangkabiari Naibata? Halak na mangkabiari Naibata ai ma halak na hormat hu Bani humbani borsih ni uhurni. Lang ra sidea mambahen borit uhurni halani ai boi pasedahon parhasomanan ni sidea pakon Jahowa.​—Ps. 111:10; Pod. 8:13.

2. Domu bani tonggo ni Raja Daud na isurat bani Psalmen 86:11, aha ma na laho iulas hita?

² Basa Psalmen 86:11. Anggo irimangi hita ayat ai, gabe iarusi hita ma ponting tumang do iahap Raja Daud pasangapkon goran ni Jahowa atap pe hormat hu Bani. Holi iulas hita ma aha na ihatahon si Daud bani tonggoni ai. Jadi ulas hita ma lobei mase ponting tumang hita pasangapkon goran ni Jahowa. Dob ai ulas hita ma sonaha hita patuduhkon anggo hita mangkabiari goran-Ni.

3. Panonggoran aha do na ididah si Musa na mangurupi ia laho pasangapkon goran ni Naibata?

³ Bayangkon ma sonaha pangahap ni si Musa sanggah ia jongjong i dolog batu, janah ididah ia montas hamuliaon ni Jahowa. Tontu sada halongangan do ai. Dob ai, itangar si Musa ma dong sora na mangkatahon, “Jahowa, Jahowa do Naibata pardear layak anjaha paridop ni uhur, nanget marringis, anjaha gok holong ni uhur-Ni pakon habonaran-Ni, na pahotkon holong ni uhur-Ni hubani halak marribu-ribu,  anjaha na manasap hajahaton, panlanggaron pakon dousa.” Ra, malekat do na mangkatahon ai. (2 Mus. 33:17-23; 34:5-7) Ra do pangalaman ai na idingat si Musa sanggah ia manggunahon goran ni Jahowa. Halani ai ma ipasingat si Musa halak Israel ‘marhabiaran bani goran na marmulia’ anjaha na sangap ai.​—5 Mus. 28:58.

4. Aha do na boi mangurupi hita ase lambin hormat bani Jahowa?

⁴ Anggo irimangi hita goran ni Jahowa, maningon irimangi hita do homa Naibata na sonaha do Ia ai. Maningon idingat hita ma paruhuran-Ni songon hagogohan, hapentaran, hapintoron, ampa holong-Ni. Anggo irimangi hita ganupan ai, on ma na mangurupi hita ase lambin hormat hu Bani.​—Ps. 77:12-16.

5-6. (a) Aha do artini goran ni Naibata? (b) Domu bani 2 Musa 3:13, 14 pakon Jesaya 64:8, sonaha Jahowa pasaudkon sura-sura-Ni?

⁵ Aha do artini goran ni Naibata ai? Bahat do pakar Alkitab na setuju anggo arti ni Goran ni Jahowa ai ma “Ia na Mambahen Adong”. Hunjai gabe iarusi hita ma lang dong na boi manlanglangi Jahowa laho pasaudkon sura-sura-Ni. Anjaha aha pe boi do bahenon-Ni. Sonaha carani?

⁶ Aha pe boi do bahenon ni Jahowa laho pasaudkon sura-sura-Ni. (Basa 2 Musa 3:13, 14.) * Tontu longang do uhurta mardingat ai. Halani ai ma gati do bani publikasi iojur hita ase mardingat paruhuran-Ni ai. Leganni ai, boi do homa ibahen Jahowa juakjuak-Ni pasaudkon sura-sura-Ni hassi pe lang sempurna sidea. (Basa Jesaya 64:8.) Jadi boi do pasaudon ni Jahowa sura-sura-Ni, janah lang dong na boi manlanglangi Ia.​—Jes. 46:10, 11.

7. Sonaha ase hita lambin mamuji janah lambin mangkargai goran ni Bapanta in?

⁷ Lambin ihargai hita do Jahowa,  Bapanta in, anggo irimangi hita aha na dob ihorjahon ampa ibahen Ia hubanta. Umpamani, gabe longang do uhurta anggo irimangi hita pasal tompaon-Ni. Anjaha anggo irimangi hita sonaha Jahowa mangurupi hita laho mangkorjahon harosuh-Ni, lambin hormat ma hita hu Bani. (Ps. 8:4, 5) Tongon sada halongangan do artini goran ni Jahowa! Ganupan ai patuduhkon ise do sasintongni Bapanta in, janah aha do na domma ihorjahon ampa na laho bahenon-Ni holi.​—Ps. 89:8, 9.

8. Domu bani 5 Musa 32:2, 3, aha do na iharosuhkon Jahowa?

⁸ Paima das halak Israel hu Tanoh Parpadanan, iajarhon Jahowa ma sada doding bani si Musa. (5 Mus. 31:19) Dob ai, iajarhon si Musa ma use doding ai hubani halak Israel. (Basa 5 Musa 32:2, 3.) Anggo irimangi hita ayat 2 pakon 3, tangkas ma ibotoh hita lang marosuh Jahowa anggo iponopkon goran-Ni. Atap, iahap pansing tumang gabe lang idilo. Marosuh do Ia ase ganup halak mambotoh goran-Ni. Tontu malas tumang uhur ni halak Israel manangar pangajarion ni si Musa pasal hamuliaon ni Naibata. Usih songon namur bani suan-suanon do ai. Sonaha ase pangajarionta boi pasonangkon uhur songon na ibahen si Musa?

9. Sonaha hita dihut papansingkon goran ni Jahowa?

⁹ Sanggah hita marbarita hun rumah hu rumah atap i ianan na mabuei, gunahon ma Bibel laho patuduhkon Jahowa do goran ni Naibata. Boi do ibere hita publikasi, iputarhon hita video, atap pe ipatuduh hita hun situs web pasal goran ni Jahowa. Legan ni ai, sanggah i parhorjaan, i sikolah, atap pe sanggah mardalani, marusaha ma hita patugahkon pasal Naibata ampa na iharosuhkon-Si. Sanggah ipatugah hita bani sidea pasal harosuh ni Naibata pakon sura-sura-Ni bani manisia ampa tanoh on, gabe ibotoh sidea ma holong tumang do hape Jahowa hubani sidea. Sanggah isaritahon hita hasintongan pasal Naibata hubani halak, dihut ma hita papansingkon goran-Ni. Tontu pamalaskon uhur do pangajarion na sisonai. Janah iurupi hita do homa halak mambotoh ladung do hape sadokah on na iajarhon halak pasal Jahowa.​—Jes. 65:13, 14.

10. Mase lang sungkup pitah mangajarhon parentah ni Naibata hubani parlajar Bibelta?

¹⁰ Sanggah hita mangurupi halak marlajar Bibel, sihol do hita mangurupi sidea ase mambotoh goran ni Jahowa janah manggunahon ai. Leganni ai, sihol do homa hita mangurupi sidea ase mananda paruhuran-Ni. Tapi, lang boi itanda sidea sonaha paruhuran ni Jahowa anggo pitah ipatugah hita aha parentah ni Naibata. Ra, porsaya do ia dear do ganup parentah ni Naibata ai. Tapi ai ra do ia unduk bani Jahowa halani mangkaholongi-Si? Dingat ma, ibotoh si Hawa do titah ni Naibata, tapi lang tongon-tongon ia mangkaholongi Naibata, sonai homa si Adam. (1 Mus. 3:1-6) Halani ai ma lang sungkup pitah mangajarhon parentah ni Naibata.

11. Sanggah mangajarhon pasal parentah ni Naibata, sonaha hita mangurupi parlajar Bibel mangkaholongi-Si?

¹¹ Sasintongni, bahen hadearonta do ganup parentah ni Jahowa ai. (Ps. 119: 97, 111, 112) Tapi, ra do lang sonai pangahap ni parlajar Bibelta anggo lang iarusi sidea halani holong do ibere Jahowa parentah ai. Halani ai sanggah marlajar sungkun ma hu bani, “Mase ma isuruh Jahowa juakjuak-Ni mangkorjahon on, atap pe ilarang mangkorjahon ai? Aha ma na ibotoh hita pasal Naibata humbani parentah-Ni ai?” Anggo iurupi hita parlajar Bibelta mananda paruhuran ni Jahowa janah mangkaholongi goran-Ni, on ma na mangojur ia ase mangkaholongi-Si, sonai homa titah-Ni. (Ps. 119:68) Gabe lambin tambah ma haporsayaonni. Janah gabe martahan ma ia sanggah dong parlajouan.​—1 Kor. 3:12-15.

12. Aha do na mambahen si Daud gabe mardua uhur, janah sonaha ma ujungni?

¹² Ponting tumang do na ihatahon si Daud on, “Sai pabulat Ham ma uhurhu.” Isurat do ai bani Psalmen 86:11. Humbani pangalamanni, ibotoh si Daud ma hassi pe humbani gok ni uhurni sihol mangkabiari goran ni Jahowa, tapi boi do ujungni gabe mardua uhur ia. Sanggah ai, ididah ia ma hun loteng ni rumahni dong istri ni halak, na margoran si Batseba na maridi. Ijia, ai totap ope bulat uhurni? Ibotoh ia do titah ni Naibata na mangkatahon, “Lang malo uhur-uhuranmu [istri] ni hasomanmu.” (2 Mus. 20:17) Tapi, tong do ididah ia naboru ai. Jadi, hassi pe sihol uhurni mangkabiari Jahowa, tapi talu do ai halani domma tubuh hisap-hisap ni dagingni hubani si Batseba. Halani ai gabe sambor ma pambahenanni janah gabe butak ma goran ni Jahowa ibahen ia. Ujungni, parohkon mara do homa ai hubani halak na lang mardousa, tarmasuk hubani kaluargani.​—2 Sam. 11:1-5, 14-17; 12:7-12.

13. Hunja ibotoh hita anggo si Daud lang be mardua uhur?

¹³ Dobkonsi ipinsang Jahowa si Daud, ujungni mardear ma use ia pakon Jahowa. (2 Sam. 12:13; Ps. 51:4-6, 19) Tontu idingat si Daud ma sambor tumang do ujungni halani ipaturut ia manlembang uhurni. Ai iurupi Jahowa do si Daud ase lang be mardua uhur? Eak, halani bani Bibel ihatahon Jahowa do anggo si Daud sahalak na ‘gok dear uhurni bani Jahowa Naibatani’.​—1 Raj. 11:4; 15:3.

14. Aha do na porlu isungkun hita bani dirinta, janah mase?

¹⁴ Dong do na boi iparlajari hita  humbani hasalahan ni si Daud ai. Janah gabe sipasingat do homa ai hubanta. Tontu lang ra hita mangkorjahon na sarupa. Jadi, lang soal baru ope hita mangidangi Jahowa atap pe domma na martahun-tahun, porlu do isungkun hita dirinta, ‘Ai hulawan do harosuh ni Sibolis na sihol mambahen ahu manlembang?’

15. Sonaha biar bani Naibata mangurupi hita manjaga uhur sanggah dong gambar-gambar na lang suman?

¹⁵ Umpamani, aha do bahenonmu sanggah ididah ham dong gambar na lang suman i TV, atap pe i internet? Ra do ninuhurmu lang pornografi ai. Tapi ai boi do ai igunahon Setan laho mambahen ham ase mardua uhur? (2 Kor. 2:11) Gambar sisonai boi ipausih songon mata ni hapak na igunahon sasahalak laho mambolah sada hayu na banggal. Sanggah parlobei sahali ihapak hayu ai, pitah otik dassa na matopik. Tapi dokah-dokah lambin bagas ma masuk mata ni hapak ai hu hayu ai. Ujungni, gabe mabolah ma hayu ai. Jadi, usih songon mata ni hapak ai ma gambar na lang suman. Aha na iahap sasahalak lang marbahaya hinan, ujungni boi do ai mambahen ia gabe mardousa hubani Jahowa. Halani ai, padaoh ma aha pe na boi mambahen hita mardua uhur. Maningon tongtong ma hita mangkabiari goran ni Jahowa!

16. Sungkun-sungkun aha ma na porlu irimangi hita sanggah sihol hita mangkorjahon na lepak?

¹⁶ Sobali gambar-gambar sisonai, bahat do cara na ibahen Sibolis ase ihorjahon hita na lepak. Jadi aha ma bahenonta? Ra do ninuhurta lang sai sambor ai. Umpamani, ra do ninuhurta, ‘Lang mintor ipecat ahu anggo huhorjahon ai.’ Lang dear pingkiran sisonai. Rahanan ma isungkun hita dirinta, ‘Ai on do cara na igunahon  Sibolis laho mambahen ase ahu mardua uhur? Gabe butak do holi goran ni Jahowa anggo huhorjahon ai? Ai boi do on mambahen ahu lambin orot bani Naibata, atap mambahen ahu lambin daoh?’ Martonggo ma mangindo hauhuron ase jujur ham mambalosi sungkun-sungkun ai. (Jak. 1:5) Anggo ibahen hita sonai, gabe boi ma ijaga hita uhurta. Anjaha gabe boi ma itiru hita Jesus na mangkatahon, “Laho ma ho bolis!”​—Mat. 4:10.

17. Mase lang dear anggo hita mardua uhur? Bahen ma limbaga.

¹⁷ Lang dear anggo hita mardua uhur. Bayangkon ma dong sada tim olahraga, tapi lang marsada sidea ganupan. Dong na sihol pasangapkon dirini. Dong na lang ra mangihutkon aturan. Janah dong homa na lang ra manangihon pelatihni. Tontu lang boi monang tim sisonai. Tapi anggo marsada sidea, tontu boi do sidea monang. Usih sonai ma homa uhurmu. Maningon sadalan do pingkiran, harosuh, ampa pangahapmu laho mangidangi Jahowa. Dingat ma, marusaha do Sibolis mambahen ase ham mardua uhur. Ibotoh ia do anggo harosuhmu sihol pamalaskon uhur ni Jahowa. Tapi marusaha do ia mambahen ase ihorjahon ham hisap-hisap ni dagingmu. Hassi pe sonai, maningon marusaha ma ham mangidangi Jahowa humbani gok ni uhurmu. (Mat. 22:36-38) Ulang paturut Sibolis mambahen ham mardua uhur!

18. Domu bani Mika 4:5, aha do na sihol bahenonta?

¹⁸ Tiru hita ma si Daud na martonggo sonon, “Sai pabulat Ham ma uhurhu laho mangkabiari goran-Mu.” Dob ai, horjahon ma domu bani na itonggohon hita. Bai ganup ari bahen hita ma haputusan na boi mambahen goran ni Jahowa lambin pansing. Anggo ibahen hita sonai, sosok ma hita isobut sahalak Saksi Jahowa. (Pod. 27:11) Tontu sauhur ma hita pakon nabi Mika na mangkatahon, “Anggo hita ibagas goran ni Jahowa Naibatanta do mardalan ronsi sadokah ni dokahni.”​—Mi. 4:5.