1. Ka mini lubéi inebe lan Bungiu woun ani ka uagu súdini lubéi lun harufuduni ha hínsiñehabubaña lun?

HÍNSIÑETI Bungiu woun wagía le kristiánugu, lau sun lira, wéiriti inebe lan woun. Másiñati hasaminarun amu múaran lan saminaü le. Gama lumoun, mama wayanuhaña luagu aban inebesei le adügübei lun wanufudedun luéi Heowá. Inebesei le uágubei wayanuhan mama aban inebesei le lánina anufudei luéi. Ha asandirubalin inebesei le mabuseruntiña lun hagañidagüdüni Háguchi le siélubei ladüga gebegiti hamadagua luma houn (Sal. 111:10; Ari. 8:13). Akutiha wamá luagu inebesei le.

2. Kaba bián katei waturiaha lidan arütíkulu le según Sálumu 86:11?

² (Aliiha huméi Sálumu 86:11). Dan le wasaminarun luagu dimurei burí le, aba wíchugun fe luagu gunfuranda lani urúei Dawidi súdini lan lun inebewalá Bungiu. Ariha waméi ida luba lan wafalaruni dimurei le lariñagubei lau lubafu Bungiu. Furumiñe, wakutiha saragu katei lun wasandirun aban lanarime inebesei luagu liri Bungiu. Lárigiñe, ábame wayanuha luagu ida luba lan warufuduni lidan wabagari inebe lan liri Bungiu woun.

3. Ka sügǘ másiñati ligía lan adügübei lun inebebei lan liri Bungiu lun Moisesi súnwandan?

³ Samina wamá ida liña lan lasandiragun Moisesi lungua dan le muñugu lubéi lidan luhuyun dübü luagu wübü Orebü ani aba larihini lidan aban arufudúni luéirigun Heowá ásügüra ligibugiñe. Afuranguagüda tumuti Perspicacia para comprender las  Escrituras “másiña lan ligía lan sügǘ le hanarimetimabei asusereduti lun wügüri lubaragiñe liabin Hesukrístu ubouagun”. Aba laganbuni Moisesi dimurei burí le, másiñati liyumulugugiñe lan aban ánheli: “Au [Heowabei!] Au Búngiubei lun súnwandan! Gudemehabutina, gaguráasuntina, wéiritina lidan ínsiñeni luma inarüni! Deregüdaguati nínsiñehabu súnwandan, feruduna numuti wuribani, maganbadi luma figóu” (Afu. 33:17-23; 34:5-7). Chóuruti aritagua lani Moisesi sügǘ ligía sagü layusuruni liri Heowá. Ligía lariñagubei dan lárigiñe houn lumutuniña Bungiu ha ísüraelina lun inebe lan ‘luéirigun liri Wabureme le Habungiute’ houn (2 Lur. 28:58).

4. Ka burí ligaburi Bungiu lunbei wararamagun asaminara luagu lun inebetima lan woun?

⁴ Lau wasaminarun luagu liri Heowá, buiti lun wararamagun asaminara ka lan luwuyeri gürigia ligía. Lunti waritaguni ligaburi kéiburi lubafu, lichú lau, richá lan luma línsiñehabu. Ladügüba wararamagun asaminara luagu ligaburi Bungiu, lúmaya amu ligaburi lun inebetima lan woun (Sal. 77:11-15).

5, 6. a) Ka mini lubéi liri Bungiu? b) Según Áfuriduni 3:13, 14 luma Isaíasi 64:8, ida liña ladügün Heowá lun lasuseredun somu katei?

⁵ Ka wasubudirubei luagu le mini lubéi liri Bungiu? Saragu sásaamu ariñagatiña másiña lan le lan mini lubéi liri Heowá: “Adügati lun lasuseredun”. Haritaguagüda lumutiwa katei le úati lan lunti ladügün lun lararamuni le labusenrunbei Heowá ladügün. Ida liña ladügüni?

⁶ Aban lídangiñe, lau ladügüni sun liyaraati lun lagunfuliruni lisuuni (aliiha huméi Áfuriduni 3:13, 14). * Súnwandan tínchahaniwa wani agumeiraguagüdüni lun wararamagun asaminara luagu lubuidun ligaburi Heowá le. Lanwoun lira, gayaraati layusuruniña Heowá lubúeingu ha charabaña lun hagunfulirun lau le mégeiwabei lun heseriwidun lun luma lun lagunfulirun lisuuni (aliiha huméi Isaíasi 64:8). Ítara liña ladüga Heowá lun lagunfulirun lugundan. Úati ni kata lun ladügün lun magunfulirun lani le labusenrunbei ladügün (Isa. 46:10, 11).

7. Kaba íderaguawa asandira aban lueirin inebesei luagu Wáguchi le siélubei?

 ⁷ Kaba íderaguawa asandira aban lanarime inebesei luagu Wáguchi le siélubei? Lau wasaminarun luagu le ladügübei luma luagu ídemuei le líchugubei woun lun wadügün somu katei. Kéiburi, aba taweiridun wanigi lau wasaminarun luagu ligaburi layusuruniwa lun lagunfulirun sun le labusenrubei (Sal. 8:3, 4). Lau wararamagun asaminara luagu layusuruniwa lun lagunfuliruni lugundan sanditiwa aban lanarime inebesei luagu. Le linarün katei, hanarimeti lubuidun liri Heowá. Arufuda lumuti le mini lubéi iri le sun ligaburi Heowá, sun le adüga láalibei luma sun le lunbei ladügüni (Sal. 89:7, 8).

8. Según 2 Lúrudu 32:2, 3, ka labusenrunbei Heowá lun wadügün luagu liri?

⁸ Lubaragiñe hebelurun ísüraelina lidoun Fulasu Füramasewati, arufudahati Heowá aban uremu lun Moisesi, ani óunaha lumuti arufudahei houn ísüraelina ha lumutuniña Heowá (2 Lur. 31:19). Lau wasaminarun luagu le lariñagubei fánreinti lánina uremu le, ariha wamuti furangu mabusenrun lan Heowá lun waramuduni liri ni lun warihini kamá hamuga le figóu liridún (aliiha huméi 2 Lúrudu 32:2, 3). Busenti lun sun lan gürigia lun hasubudiruni liri. Chóuruti aban lan meha lubuidun chansi houn ísüraelina larufudahan Moisesi houn luagu Heowá luma luagu lubuidun liri. Le hafurendeirubei gániti hawagu ani ruti dǘgüdaguaü houn, kamá láhuyun huya luagu nadü. Ida luba wachoururuni ligiaméme lan gani lan ligaburi warufudahan hawagu amu?

9. Ida liña wídehan lun inebewalá liri Heowá?

⁹ Dan le wapurichihan tidan burí muna o lidan burí guririguaü, yusu wamóun Bíbülia lun warufuduni liri Bungiu houn gürigia. Gayaraati wayusurunu agumeiraguagüdüni to íchuguboun uéiriguni lun Heowá, warufudun aban lubuidun bidéu luma lun wadundehaniña lidoun wani páhina lidan Internet. Meberesenga anhein lídanñadiwa lubéi wadagimanu, leskuelarugu, o waweiyasuhaña lan áluaha wamá chansi lun wayanuhan luma Wáguchi Bungiu luma luagu ligaburi. Ayanuha wamá luagu lubuidun lisuuni woun luma lun Ubóu. Dan le haganbuni gürigia katei le luagu furumiñeti wéiyaasu, másiñati híchugun fe hínsiñe wamá lun Heowá saragu. Sagü warufudahani inarüni luagu Wáguchi Bungiu, wídehaña lun inebewalá liri ani warufuduñein luagu iyeeni lan le arufudahóubei luagu. Úati ni kata buídutimati houn gürigia luéidügü uganu tídangiñeti Bíbülia le wapurichihabei houn (Isa. 65:13, 14).

10. Dan le wíchugun aturiahani tídangiñe Bíbülia, ka uagu moun lumuti lubéi lun marufudahan wamani lilurudun Bungiu luma lugumadin?

¹⁰ Dan le wíchugun aturiahani tídangiñeti Bíbülia, le wabusenrubei, wíderaguniña aturiahatiña asubudirei luma lun hayusuruni liri Heowá. Busentiwa giñe lun hasubudiruni ka lan luwuyeri Bungiu Heowá. Wibihiba san lun hasubudiruni gürigia, láurügü warufudahani ladundehan, lilurudun luma lugumadin luáguti laruma ibagari? Háfuga uá lan. Másiñati lafurendeiruni aban aturiahati ka lan lilurudunbei Bungiu ani weiri tuguya lanigi luagu lúrudu ligía. Gama lumoun, gaganbadibei san lun Heowá ladüga hínsiñe hali lan lun? Aritagua waméi tikesin Ewa. Subudi tumuti meha lilurudun Bungiu, gama lumoun, masanditu aban ínsiñeni le inarüniti luagu. Ani ligiaméme gayaraabei wariñagun luagu Adán (Agu. 3:1-6). Ligía moun lumuti lubéi lun marufudahan wamani lilurudun Bungiu luma lugumadin le richabei.

11. Amu luéi warufudahani lugumadin luma lilurudun Bungiu houn aturiahatiña, ida luba wíderaguniña lun hínsiñe lan Bungiu houn?

¹¹ Buíduburiti lilurudun Bungiu luma lugumadin ani huuti (Sal. 119:97, 111, 112). Lau sun  lira, marihin lubéi aturiahati katei le ítaraguarügü kei warihini, ánheingubeirügü gunfuranda lan Heowá lan íchugubalin ladüga wínsiñe lun. Ligíati gayaraati wálügüdaguni aturiahati: “Ka uagu afiñe bubéi amuriaha lani Bungiu wama lun wadügün o lun madügün wamani ítaga katei? Ka larufudahabei le bun luagu Bungiu?”. Anhein wíderagua lun lasaminarun luagu Heowá luma lun hínsiñe lan lubuidun liri lun, másiñati gayaraabei lan wachülürün tidoun lanigi aturiahati. Ítarati, mámarügübei lilurudun Heowá hínsiñe lun, hínsiñebei giñe Heowá lun (Sal. 119:68). Derebugutimaabei lafiñen ani lawandubei óuchawaguni le hénrenguti (1 Ko. 3:12-15).

12. a) Ka adügübei lun tafanreinragun lanigi Dawidi b) Ani ka asuseredubei lun?

¹² Lidan burí dimurei le labürühabei urúei Dawidi lidan Sálumu 86:11 lau lídehan lani Bungiu sífiri súdinitimati giñe le ñein lubéi lariñaga: “Adügabá lun inebe lan biri tun nanigi”. Lidan sun libagari ariha lumuti ménrengun lan lun tafanreinragun anigi. Aban weyu, tábuluguñei luba aba larihinu lani amu wügüri weiriou to gíriboun Betüsawé ágawa. Ida tiña lanigi Dawidi oura ligía? Buitu san, o mabuiduntu? Subudi lumuti lugumadin Heowá le ariñagubei: “Mawamadatá lúmari” gürigia bíledi bun (Afu. 20:17). Gama lumoun, aban lerederun aríaguoun. Aba tafanreinragun lanigi. Luagu amu oubaü, uámaatu würi tuguya lun. Ani le aban oubaü, mabusenrunti lagañidagüdüni Heowá. Íbini hínsiñe lan Heowá lun ani úaragua ligía lun luagu saragu dan, aba lígiraguagüdün lungua lun layumahan. Le lanügübei katei le lun, aba ladügün aban katei hanarimeti luriban. Aba lawiyeduni liri Heowá ani adügati dañu houn gürigia maduruntiña, íbini houn liduheñu (2 Sam. 11:1-5, 14-17; 12:7-12).

13. Ida liña wasubudiruni aba lan lederegeragun Dawidi lungua sunsuinagubei lun Bungiu?

¹³ Ererehati Heowá lun Dawidi, aba lárügüdagun lungua (2 Sam. 12:13; Sal. 51:2-4, 17). Mabulieidun lumuti turobuli luma súfuri le lanügübei lígirun lun tafanreinragun lanigi. Gayaraati giñe lásügürawagüdün dimurei le lariñagubei lidan Sálumu 86:11: “Ruba aban anigi nun to mafanreinraguntu”. Óunaba lumuti san Heowá? Anha, ariñagatu Lererun Bungiu wabaruaguóunmeme ariñawagúa lan luagu Dawidi deregegua lan lungua lun Heowá Bungiu sunsuinagubei (1 Uru. 11:4; 15:3).

14. Ka lunbei wálügüdagun wougua, ani ka uagu?

¹⁴ Ruti lani Dawidi hénpulu dǘgüdaguaü woun saragu, gama lumoun, huuti giñe woun keisi eweridihani. Lunti ladügün lanarime figóu le ladügübei lun wasaminarun. Íbini lǘhadiwa  lan eseriwida lun Heowá o sun liña lan wagumeserun, lunti wálügüdagun woungua: “Náfaaguña san lun mígiraguagüdün nan nungua lun lafanreinraguagüdünun Satanási nanigi?”.

15. Ida luba líderaguniwa inebe lan liri Heowá woun dan le wadunragun tuma iyawaü wíyetu?

¹⁵ Kei hénpulu, kaba hamuga wadüga ánhawa ariha tidan bigibigitu o lidan Internet iyawaü, pikchá o pelikula to adügütu lun wagumeserun ayumaha magíaguni? Másiñati wasaminarun mariban lan katei burí le ani mama lan katei lánina magíaguni. Lau saminaü le, gayaraati san layusuruñein lan Satanási lun lafanreinraguagüdünun wanigi? (2 Ko. 2:11). Gayaraati lagoubaguagüdüniwa tuma aban harawa to hamanatu to layusuruboun aban gürigia lun labounhan durusu. Eibu anihán lan abouhei durusu eibu lafanreinragun. Gayaraati ítara tan iyawaü wíyetu kei tigibu aban harawa to hamanatu. Genegeti aban lan katei ñǘraütu o mariban tan. Íbini ítara, lau lóufudagun gayaraati tadügün iyawaü wíyetu lun wéiguadun lidoun figóu le afanreinraguagüdübarun wanigi luma lun múaragun wamá lun Heowá. Ligíati, mígira wamá lun lebelurun katei mabuidunti tidoun wanigi. Chouru waméi úaragua tan wanigi ani inebe ligíame liri Heowá woun.

16. Ka álügüdahani lunbei wadügüni wóuniwagua danme le wagagibudagun luma óuchawaguni?

¹⁶ Amu tuéi iyawaü wíyetu, yúsuti giñe Satanási ámuñegueinarügü óuchawaguni lun wafigouhan. Kábati wadüga? Ménrenguti lun wasaminarun mariban lan katei le lau wariñagun: “Mabugunbadina anhein nadüga katei le, mama aban katei le wéiriti luriban”. Wuribati saminaü le. Buídutimati lun wadügün álügüdahani kéiburi: “Layusuruñein san Satanási óuchawaguni le lun lafanreinraguagüdünun nanigi? Ánhana ígiraguagüda nungua lun luriban ayumahani, nawiyeduñein san liri Heowá?”. Ladügüba san katei le lun nayarafadun lun Heowá odi lun nadisedun?”. Ráramagua wamá asaminara  luagu álügüdahani burí le. Amuriaha wamá lichú aau luma Heowá lun wóunabuni álügüdahani le lau sun wanarün (Sant. 1:5). Gayaraati lóunigiruniwa katei le buidu buidu. Gayaraati líderaguniwa amahada lun óuchawaguni sunsuinagubei kei meha ladüga Hesusu dan meha le lariñagubei: “Disebá nuéi, Mafia!” (Mat. 4:10).

17. Afuranguagüda huméi lau aban hénpulu ka lan uéigiñe manügün lubéi fánreinguañu tan wanigi ni kata buiti woun.

¹⁷ Manügünti fánreinguañu tan wanigi ni kata buiti woun. Samina wamá hawagu lílana aban sétanu ha lídanbaña aban huraraü ani manügaguntiña houngua buidu. Fiu hádangiñe busentiña hibihini sun uéiriguni, amu mabuseruntiña hafalaruni lilurudun huraraü, ha híbiri minebenti le arihibei lau huraraü houn. Hénrengubei lun lagañeirubei lan sétanu le huraraü. Luagu le aban oubaü, buídutimabei lidin lun aban sétanu lun lidan hamá aban. Ítara tuba wanigi kei libiaman sétanu le hani áhürerutiña anhein úaragua lubéi wasaminan, wayumahan luma le wabusenrubei wadügün luma weseriwidun lun Heowá. Haritagua waméi hínsiñeti lan hamuga lun Satanási lafanreinraguagüdünun wanigi. Busenti hamuga lun múaran lan luma lugundan Heowá le wasaminarubei, le wayumahabei luma le wabusenrubei. Anhein busén wabéi weseriwidun lun Heowá mosu wadügüni tau sun wanigi (Mat. 22:36-38). Maweiyasun wamá ígira lun lafanreinragunu Satanási wanigi.

18. Kei lariñaguni Mikeasi 4:5, ka banúadirubei lun badügün?

¹⁸ Furíei wamá lun Heowá kei meha ladügüni Dawidi, le ariñagubei: “Adügabá lun inebe lan biri tun nanigi”. Adüga waméi sun wayaraati lun wafalaruni le wamuriahabei lidan furíei. Arufuda waméi sagü weyu lau le wanúadirubei, katei lan yebe ñǘbüriti o wéinamuti, weiri lan lineben liri Bungiu le sándubei woun. Anhein wadüga lira, warufuduñein gadüna wamá wanügüni iri gefentiña luagu Heowá (Ari. 27:11). Ani sun wagía gayaraati wariñaguni dimurei le lariñagubei profeta Mikeasi: “Ánheinti wagía Wabureme le Wabungiute wafalarubei ani gaganbaditiwa lun súnwandan” (Mik. 4:5).