1. Cosa el miedo con Dios y porque este importante para con aquellos quien ta ama con Jehova?

EL MAGA Cristiano ta ama con Dios y tiene tambien miedo con ele. Para con otro, ese dos sentido dol contra na uno y otro. Pero, gendeh kita ta refiri con el clase de miedo que ta causa sobra lingasa. Hay discuti kita con el un especial clase de miedo. El maga gente que tiene este clase de miedo tiene hondo respeto con Dios. No quierre sila hace cosas que gendeh ta hace alegre con el diila Tata na cielo cay no quierre sila perde el diila buen amistad con ele.​—Sal. 111:10; Prov. 8:13.

2. Base na cosa ya habla si Rey David na Salmo 86:11, cosa dos cosas kita hay discuti?

² Le con el Salmo 86:11. Mientras ta pensa tu con este maga palabra, puede tu habla que ya puede gayot entende si Rey David con el importancia del miedo con Dios. Considera kita si paquemodo kita puede aplica con el cosa ya habla si David na de suyu rezo. Una, discuti kita con el cuanto razon si porque kita debe tiene hondo respeto con el nombre del Dios. Ika-dos, discuti kita si paquemodo kita dale mira cada dia que tiene kita hondo respeto na nombre del Dios.

3. Cosa ya experiencia si Moises que posible ya ayuda para esta el de suyu hondo respeto na nombre del Dios?

³ Pensa si cosa ya sinti si Moises cuando hapa le na piedra y ya mira con el un vision del gloria de Jehova. El libro Insight on the Scriptures ya habla que “este posible el de con todo bonito suceso que ya experiencia el un gente antes llega si Jesucristo na tierra.” Ya oi si Moises con este maga palabra que ya habla el un  angel: “Jehova, Jehova, un Dios lastimoso y tiene compasion, gendeh pronto rabia y abundancia de amor leal y verdad, quien ta dale mira amor leal con el miles de maga gente, ta perdona con el kamali, culpa y pecado.” (Ex. 33:17-23; 34:5-7) Posible que pirmi ta acorda si Moises con ese suceso si ta usa le con el nombre Jehova. Poreso, gendeh maka-estraña que si Moises ya dale aviso con el maga Israelita que “tiene miedo con este glorioso nombre que conviene respeta.”​—Deut. 28:58.

4. Cosa puede ayuda kanaton para tiene mas hondo respeto con Jehova?

⁴ Si ta pensa kita acerca na nombre Jehova, debe tambien kita medita con el persona quien ta lleva con ese nombre. Debe kita acorda con el de suyu maga calidad, igual como el de suyu poder, sabeduria, justicia y amor. Si medita kita con este maga calidad y otro pa, puede este ayuda para tiene kita mas hondo respeto con ele.​—Sal. 77:11-15.

5-6. (a) Cosa quierre decir del nombre del Dios? (b) Asegun na Exodo 3:13, 14 y Isaias 64:8, cosa ta hace si Jehova para cumpli de suyu voluntad?

⁵ Cosa kita sabe acerca si cosa quierre decir del nombre del Dios? Manada scholar el tan uyun que el nombre Jehova quierre decir “Ta Causa Le Para Queda.” Ta hace se acorda kanaton que nuay cosa puede sangga con Jehova para hace con el de suyu voluntad y puede le hace maskin cosa. Na cosa manera?

⁶ Si Jehova puede queda maskin cosa que necesita para cumpli con el de suyu proposito. (Le con el Exodo 3:13, 14.) Pirmi kanaton ta anima que medita con este aspeto del personalidad del Dios. Puede tambien causa si Jehova con el de suyu maga imperfecto siervo para queda maskin cosa que necesita para sirvi con ele y cumpli con el de suyu proposito. (Le con el Isaias 64:8.) Na este maga manera, ta puede cumpli si Jehova con el de suyu voluntad. Nuay quien puede sangga con ele para cumpli con el de suyu maga proposito.​—Isa. 46:10, 11.

7. Cosa kita hace para queda mas hondo el diaton apresacion con el diaton Tata na cielo?

⁷ Puede kita hace mas hondo con el diaton apresacion para na diaton Tata na cielo si medita kita con el cosa le ya hace y si cosa le ya causa kanaton para hace. Por ejemplo, si medita  kita con el todo cosas que ya crea le, gendeh gayot kita puede aguanta sino man bilib con el todo cosa ya cumpli si Jehova. (Sal. 8:3, 4) Y si medita kita si paquemodo kanaton ya ayuda si Jehova para puede cumpli con el de suyu voluntad, mas queda hondo el diaton respeto con ele. El nombre Jehova ta inclui si quien gayot el diaton Tata, el todo cosa le ya hace y el todo cosa le hace na futuro. Debe gayot kita tiene hondo respeto na nombre de Jehova!​—Sal. 89:7, 8.

8. Asegun na Deuteronomio 32:2, 3, cosa quierre si Jehova que hace el de suyu maga siervo con el de suyu nombre?

⁸ Antes entra el maga Israelita na tierra que ya promete kanila, ya enseña si Jehova un cancion con Moises. (Deut. 31:19) Despues, necesita enseña si Moises con ese cancion con el maga gente. (Le con el Deuteronomio 32:2, 3.) Si medita kita con el versiculo 2 y 3, puede kita entende que no quierre si Jehova que esconde con el de suyu nombre o gendeh con este menciona cay bien sagrao este. Quierre le que sabe el todo acerca con el de suyu nombre! Un privilegio gayot para con el maga Israelita que enseña kanila si Moises acerca con Jehova y con el De Suyu glorioso nombre. El cosa ya enseña si Moises kanila ya hace fuerte con el diila fe y ya anima kanila, igual si paquemodo el ulan ta ayuda con el siembra. Paquemodo kita puede asigura que ansina tambien el diaton enseñada?

9. Cosa kita puede hace para ayuda santifica con el nombre de Jehova?

⁹ Si ta predica kita na casa en casa o talli na publico, puede kita usa con el diaton Biblia para dale mira con el maga gente que Jehova el personal nombre del Dios. Puede kita man offer kanila maga bonito literatura, bale video y material na diaton website que ta dale honor con Jehova. Na trabajo, na escuela o mientras na viaje kita, puede kita busca oportunidad para man cuento acerca con Jehova y si cosa le clase de Dios. Si habla kita kanila acerca con el amable proposito de Jehova para na maga gente y na tierra, ta dale kita kanila idea acerca con Jehova que posible nuay pa gayot sila puede sabe. Mientras ta habla kita el verdad acerca con el diaton amable Tata, ta ayuda kita santifica con el de suyu nombre. Ta ayuda kita con el maga gente para entende que ya enseña kanila manada imbusterias acerca con Jehova. El cosa kita ta enseña kanila estaba na Biblia puede ayuda kanila.​—Isa. 65:13, 14.

10. Si ta conduci kita maga Bible study, porque gendeh bastante que enseña lang kanila acerca na maga ley y principio del Dios?

¹⁰ Si ta conduci kita estudiada na Biblia, quierre kita ayuda con el diaton maga Bible study para sabe y usa con el nombre de Jehova. Mas pa, quierre kita ayuda kanila para conoce si quien gayot le. Puede ba kita hace con ese si enseña lang kita kanila maga instruccion, principio y ley del Dios? El un Bible study posible aprende maga ley del Dios y aprecia pa gane con ese. Pero, hay obedece ba le con Jehova cay ta ama le con ele? Acorda que sabe si Eva si cosa el ley del Dios, pero nuay le ama con el quien ya dale con ese y ansina tambien si Adan. (Gen. 3:1-6) Poreso, gendeh bastante que enseña lang kita con otro acerca na maga ley y principio del Dios.

11. Si ta enseña kita acerca na maga ley y principio del Dios, cosa kita hace para ayuda con el maga Bible study para ama con Jehova?

¹¹ Bueno para kanaton el maga ley y principio de Jehova. (Sal. 119:97, 111, 112) Pero, posible gendeh ansina el mirada del diaton maga Bible study si gendeh sila entende que ya dale kanaton ley si Jehova cay ta ama le kanaton. Poreso, puede kita pregunta con el diaton Bible  study: “Para contigo, porque gaha se ya manda hace el Dios con el de suyu maga siervo o porque gaha se ele nuay manda hace? Cosa se kanaton ta enseña acerca con ele?” Si ayuda kita con el diaton maga Bible study para pensa con Jehova y tiene deverasan amor para na de suyu glorioso nombre, grande el posibilidad que puede kita alcanza con el diila corazon. Como resulta, gendeh lang sila ama con ese ley sino pati si quien se kanila ya dale. (Sal. 119:68) Hay queda fuerte el diila fe y puede este ayuda kanila para aguanta con el maga dificil probanza.​—1 Cor. 3:12-15.

12. Na cosa manera ya queda dividido el corazon de David y cosa el resulta?

¹² Importante el cosa ya habla si Rey David na Salmo 86:11 que “ayuda conmigo para con todo corazon yo tiene miedo na de tuyu nombre.” Ya puede le mira si paquemodo de facil para con el corazon que queda dividido. Na un ocasion, na techo le y ya puede mira que ta baña el mujer del otro gente. Na ese tiempo, el corazon ba de David entero o dividido? Sabe le con el principio de Jehova: “No desea con el mujer del de tuyu projimo.” (Ex. 20:17) Pero, ya continua le siempre mira. El de suyu corazon ya queda dividido entre na deseo para con el mujer, si Batseba, y con el de suyu deseo que hace alegre con Jehova. Maskin pa si David ya dura ya ta ama y tiene miedo con Jehova, ya sigui le con el de suyu mismo deseo. Por causa con ese, si David ya hace maga grabe kamali. Ya lleva le verguenza na nombre de Jehova. Ya causa tambien le sufrimiento y muerte con el maga inocente gente, incluido ya con el de suyu mismo familia.​—2 Sam. 11:1-5, 14-17; 12:7-12.

13. Porque kita sabe que el corazon de David ya queda otravez entero?

¹³ Ya disciplina si Jehova con David y ya puede bira el de suyu buen relacion con Jehova. (2 Sam. 12:13; Sal. 51:2-4, 17) Ya acorda si David con el problema y dificultad que resulta cuando ya permiti le con el de suyu corazon queda dividido. Puede man translate con el de suyu palabra na Salmo 86:11 como: “Dale conmigo un corazon que gendeh dividido.” Ya ayuda ba si Jehova con David para tiene otravez un corazon que gendeh dividido? Si, cay na uliji el Palabra del Dios ya refiri con David como un gente que el “corazon . . . completo para con Jehova de suyu Dios.”​—1 Rey 11:4; 15:3.

14. Cosa kita necesita pregunta con el diaton mismo cuerpo y porque?

¹⁴ Ta anima kanaton el ejemplo de David. Pero el serioso culpa que ya comete le ta sirvi como aviso para na maga siervo del Dios ahora. Maskin pa nuevo lang kita ya principia sirvi con  Jehova o ya tarda ya, necesita kita pregunta con el diaton mismo cuerpo, ‘Ta resisti ba yo con el maga tentacion de Satanas para dividi con el de mio corazon?’

15. Na cosa manera el miedo con Dios puede protege kanaton si puede kita mira maga letrato que ta manda kanaton pensa maga imoral cosas?

¹⁵ Por ejemplo, si tiene tu cosa ya puede mira na TV o na Internet que posible manda contigo pensa imoral cosas, cosa tu hace? Baka pensa tu que gendeh pornografia aquel letrato o salida. Pero, posible gaha que ta usa se si Satanas para dividi con el de tuyu corazon? (2 Cor. 2:11) Ese letrato puede compara con el diutay filo na hacha que ta usa para curta con el grande palo. Na primero, ese agudo filo hay tupa lang na palo. Pero si pirmi con este hacha, hay parti el grande palo na uliji. Posible gaha que el maga letrato que ta manda kanaton pensa imoral cosas queda igual con ese diutay filo? Na primero, dol diutay lang y gendeh peligroso este maga cosas pero pronto lang se causa con el un persona para comete culpa que ta dividi con el de suyu corazon y quita con el de suyu integridad. Poreso, no permiti que tiene cosa gendeh bueno entra na de tuyu corazon! Hace esfuerzo para continua tu tiene miedo na nombre de Jehova con todo corazon!

16. Si ta enfrenta kita tentacion, cosa kita debe pregunta con el diaton mismo cuerpo?

¹⁶ Puera na maga gendeh bueno letrato, si Satanas ta usa pa maga otro cosas para causa kanaton para hace malo. Cosa kita hace si ta enfrenta kita ese maga tentacion? Facil lang pensa que gendeh este bien malo. Por ejemplo, baka pensa kita: ‘Gendeh man yo man disfellow si hace yo con este, poreso baka gendeh este bien malo.’ Gendeh gayot justo si pensa kita igual ansina. Mas bueno si pregunta kita con el diaton mismo cuerpo: ‘Ta usa ba si Satanas con este tentacion para dividi con el de mio corazon? Si sigui yo con este gendeh justo deseo,  hay lleva ba yo verguenza na nombre de Jehova? Si hace yo con este, hay queda ba yo mas cerca con Dios o queda lejos con ele?’ Medita con este maga pregunta. Pidi con Dios que dale contigo sabeduria para honesto tu contesta con este. (Sant. 1:5) Si hace tu se, queda tu protegido. Puede se ayuda contigo para gendeh cae na tentacion y queda igual con Jesus cuando ya habla le: “Sale . . . aqui, Satanas!”​—Mat. 4:10.

17. Porque gendeh bueno que dividido el diaton corazon? Ilustra.

¹⁷ Gendeh bueno si dividido el diaton corazon. Imagina que el maga miembro del un team gendeh tan uyun na uno y otro. El cuanto quierre que sila lang ricibi con el alabanza. El otro no quierre sigui con el ley del juego, mientras el los demas nuay respeto con el diila coach. Ese clase de team gendeh ganá na juego. Pero si unido el team, grande el posibilidad que ganá sila. El de tuyu corazon puede queda igual con ese team si unido de tuyu pensamiento, deseo y emocion para sirvi con Jehova. Acorda que bien quierre si Satanas que dividi con el de tuyu corazon. Quierre le que el de tuyu pensamiento, deseo y emocion man contra na maga principio de Jehova. Pero, necesita que entero el de tuyu corazon para puede tu sirvi con Jehova. (Mat. 22:36-38) Poreso, nunca permiti con Satanas que dividi con el de tuyu corazon!

18. Harmonia na Miqueas 4:5, cosa el de tuyu determinacion?

¹⁸ Reza con Jehova igual con David: “Ayuda conmigo para con todo corazon yo tiene miedo na de tuyu nombre.” Hace el todo para vivi harmonia con ese rezo. Cada dia, queda determinao que el de tuyu maga decision, diutay man o grande, ta dale mira que tiene tu hondo respeto na sagrao nombre de Jehova. Si hace tu se, como un Testigo de Jehova, gendeh tu lleva verguenza con ese nombre. (Prov. 27:11) Y todo kita puede habla con el cosa ya habla si profeta Miqueas: “Kita hay sigui con Jehova diaton Dios hasta para cuando.”​—Miq. 4:5.