1. Nji txani kuthava Txizimu? Ngu kutxani eto i di ta lisima ka va va randako Jehovha?

MAKRISTU ma randa Txizimu me tshumela me txi thava. Ka vamwani eto ti pfala ti si na msungo. Phela, ahawa kha hi womba-wombi ngu kule ko thava kudawa. Hi na bhula ngu kuthava aku kuhambanako ni ku ku nga toloveleka. Vathu va thavako ngu nzila yiya, va xonipha ngutu Txizimu ni ku va xamaliswa ngu txona. Vona kha va lavi kuhenyisa Tate wa nzumani nguko kha va lavi kudaya wuxaka wawe ni nene.—Mas. 111:10; Mav. 8:13.

2. Ngu kuya ngu mapswi ya Mkoma Dhavhidha a ya ma ku ka Masalmo 86:11, ngu tihi timhaka timbidi ati hi no bhula ngu tona?

² Lera Masalmo 86:11. U txi alakanyisisa ngu mapswi ya ma ku ka dibhuku diya, u nga ti wona to Dhavhidha a txi pfisisa lisima lo thava Txizimu. He wone to hi nga ma thumisisa kutxani mapswi yawa a mkombelo wa Dhavhidha. Hi na khata ngu kuxolisisa sivangelo si si hi mahako hi xamaliswa ngu ditina da Txizimu. Se hi na gwita hi bhula ngu tinzila to kombisa ti to ha xamaliswa ngu ditina da Txizimu ditshiku ni ditshiku.

3. Ngu txihi tximahakalo atxi txi nga vako txi di vhunile Mosi ku e thava ditina da Txizimu?

³ Alakanyia nzila yi Mosi a nga ti pfa ngu yona mbimo yi a nga wona muwoniso wa wudhumo wa Jehovha wu txi pinda  masoni kwakwe a di txutxulute amu ka txiwindi txa hombe. Dibhuku di di ku: Estudo Perspicaz das Escrituras di womba tiya mayelano ni muwoniso wonewo: “Ti nga maha muwoniso wuwa i di wona wo xamalisa ngutu awu m’thu wo hanya a nga wu wona a si se ta Jesu.” Mosi a pfite mapswi awa a Jehovha ma txi huma ngu kanani ka Jehovha: “MKOMA Txizimu, Txizimu txa wumbilu ni kupfela, wo swela kuhenya kambe wo tala ngu wuha ni ku thembeka! Wo tala ngu lirando la hombe, kala ka magumi a mazana a tiveleko, wo divalela wubihi, kueyisa ni sionho.” (Eks. 33:17-23; 34:5-7) Tximahakalo txiya ti nga maha Mosi a txi txi khumbula mbimo yotshe yi a nga ti thumisa ditina da Jehovha. Ngu toneto Mosi a gete Vaisrayeli ku ve ‘thava ditina diya da wudhumo ni kuthisa, da MKOMA.’—Dhewut. 28:58.

4. Hi nga mahisa kutxani ti to hi m’xonipha ngutu Jehovha?

⁴ Mbimo yi hi alakanyako ngu ditina da Jehovha, ndinene kualakanyisisa ngu ti Jehovha apune a nga zumbisa tona. Hi nga alakanya ngu tifanelo takwe to fana ni mtamo wakwe, wutxhari wakwe, wululami wakwe ni lirando lakwe. Eto ti nga hi maha hi m’xonipha ngutu ta tinene.—Mas. 77:11-15.

5-6. a) Ngu yihi txhamuselo ya ditina da Txizimu? b) Ngu kuya ngu Eksodha 3:13, 14 ni Isaya 64:8 Jehovha a hetisisa kutxani kudhunda kwakwe?

⁵ Ngu tihi ti hi ti zivako ngu ti ditina da Jehovha di wombako tona? Vathu vo tala va kholwa to ditina da Jehovha di womba ku “Ene a maha ku ti maheka.” Eto ti hi khumbutisa ku Jehovha mbwa hombe ni ku kha tandwi ngu txilo. Ti mahekisa kutxani toneto?

⁶ Jehovha a hetisisa kudhunda kwakwe ngu kumaha ati ti lavekako ti to kumaheka kudhunda kwakwe. (Lera Eksodha 3:13, 14.) Ka mabhuku athu ha khumbutiswa ti to hi alakanyisisa ngu wudhumo ni kuxamalisa ka Txizimu. Jehovha a nga tshumela e maha vathu vakwe vo mbi hetiseka ti to ve va ati ene a ti lavako ti to ve mu thumela ni ku hetisisa sikongomelo sakwe. (Lera Isaya 64:8.)  Jehovha a mahisa toneto ti to e hetisisa sikongomelo sakwe. Txiwalo txi nga mu vhalelako ku e hetisisa sikongomelo sakwe.—Isaya 46:10, 11.

7. Hi nga maha txani ti to hi kulisa kubonga kwathu Tate wathu wa nzumani?

⁷ Hi nga kulisa kukombisa kubonga Tate wathu wa nzumani ngu ku alakanyisisa ngu ti a nga maha ni ti a nga hi vhuna ku hi ti kota kumaha. Ngu txikombiso, mbimo yi hi akanyisisako ngu mtumbuluko, hi na xamaliswa ngutu ngu ti Jehovha a nga ti hetisisa, ni so tala asi a nga si vanga. (Mas. 8:3, 4) Ngako hi txi alakanyisisa ngu ti Jehovha a nga hi maha hi va tona ti to hi maha kudhunda kwakwe hi na mu xonipha ngutu. Ditina da Jehovha ngu ditshuri da xamalisa ngutu! Di pata totshe atiya Tate wathu i ku tona, ati a nga maha ni totshe ti a no maha.—Mas. 89:7, 8.

8. Ngu kuya ngu Dhewuteronome 32:2, 3 ngu yahi mawonelo a Jehovha ngu ditina dakwe?

⁸ Mbimo yi Vaisrayeli va nga ti hafuhi ni kuwulela ka ditiko da Txithembiso, Jehovha a gondisile Mosi lindando lo kari. (Dhewut. 31:19) Se Mosi nene a ti fanete e gondisa vathu. (Lera Dhewuteronome 32:2, 3.) Hi txi alakanyisisa ngu tindimana 2 ni 3, ta woneka to Jehovha kha lavi ku ditina dakwe di siswa ku nga do yila. Ene a lava ti to ditina dakwe di ziwa ngu votshe! Ku ve lungelo ya hombe ka Vaisrayeli kugondiswa ngu Mosi mayelano ni Jehovha ni kuxamalisa ka ditina dakwe! Ati Mosi a nga va gondisa ti va vhuni ni ku va humuta, kufana ni mati ya ma pfunisako siyalo. Hi nga maha txani ti to nanathu hi gondisa kufana ni Mosi?

9. Hi nga vhunwa ngu txani ti to hi basisa ditina da Jehovha?

⁹ Hi txi txhumayela ngu m’ti ni m’ti ni ha kubasani, hi nga thumisa Bhiblia ti to hi komba vathu ditina da Txizimu i ku Jehovha. Hi nga va ninga mabhuku athu, mavhidhiyo o tshura ni simwani si ku ka site yathu, sotshe silo siya si dhumisa Jehovha. Hi nga mana tinzila to womba-womba ngu Txizimu txathu txo randeka ngutu hi va gela to txi zumbisile kutxani hi di mthumoni, kutsimbilani mwendo kuendani. Ngako hi txi txhumeyela ava hi va manako mayelano ni sikongomelo sa Jehovha ngu vathu ni mafu, hi va vhuna ve ziva to kari ngu ngene ati ti nga mahako va si khali kutipfa. Mbimo hi va gelako ditshuri mayelano ni Tate wathu wa lirando, hi vhuneta ko basisa ditina da Jehovha. Hi vhuneta ko di basisa ka makuhu aya vathu vamwani va nga vako va txi kholwa ka ona. Hi ninga vathu tigondo ta lisima nguto to kha ku na timwani to pala tona.—Isaya 65:13, 14.

10. Ti lava hi maha txani mbimo yi hi tsimbitisako sigondo? Ngu kutxani?

¹⁰ Mbimo yi hi tsimbitisako sigondo, hi lava ku va vhuna ti to ve ziva ni kuthumisa ditina da Jehovha. Hahanze keto, hi lava kuvhuna vathu ve pfisisa ati ditina dakwe di wombako tona. Kambe, kha hi na kusikota ku va vhuna ngu nzila eyo ngako hi txo gwitela ko va gondisa milayo, sirumo sa Txizimu ni milayo ya mahanyelo dwe. Ngu kutxani? Nguko ti nga koteka ku ve gonda milayo ya Txizimu ve tshumela ve yi tsakela, kambe kha va na mbi sikota kuengisa Jehovha ngu kuva va txo mu randa. Khumbula to hambi Adhamu ni Evha va txi yi ziva milayo ya Txizimu, kambe va si randi awu ene i ku Mningi wa milayo. (Gen. 3:1-6) Se kha ti lavi hi gwitela ko gondisa milayo yo lulalama ya Txizimu dwe.

11. Hi nga va vhunisa kutxani ava hi gondako navo Bhiblia ti to ve randa Jehovha Mningi wa milayo?

¹¹ Milayo ya Jehovha ya hi tsakisa ni ku ya  hi vhuna. (Mas. 119:97, 111, 112) Kambe ava hi gondako navo Bhiblia va nge yi woni yi txi tsakisa ngako va si ti pfisisi to Jehovha a hi ninga milayo yoneyo nguko a hi randako. Ngu toneto, ndinene kuwotisa sigondo sathu ti to: “U alakanya to ngu kutxani Txizimu txi txi gela malanda a txona to va na mahe tiya, va nga mahe tileya? Eto ti womba txani ngu ti Txizimu txi ti alakanyako?” Ngako hi txi vhuna sigondo sathu ti to si alakanya ngu Jehovha ni ku randa ditina dakwe do sawuleka, hi na gwesa timbilu tawe. Vona va na mbi randa milayo dwe, kambe va na randa Awu a ningelako milayo yoneyo. (Mas. 119:68) Vona va na va ni likholo lo tsana, ni ku va na sikota kutsanisela sikarado asi va no manana naso.—1 Vak. 3:12-15.

12. Dhavhidha a abanisile mbilu yakwe ngu nzila yihi? I ve yihi wuyelo?

¹² Ka Masalmo 86:11 hi mana mapswi a lisima ngutu aya Mkoma Dhavhidha a nga ma bhala ngu kuthumiswa ngu Txizimu aya ma ku: “Ni ninge mbilu yimweyo.” Ka wutomi wakwe Dhavhidha a ti woni ti to ta hehula kuva ni timbilu timbidi. Dikhambi dimwani a di txitimwi ka nyumba yakwe, a to wona msikati wa vane a txi samba. Ka mbimo yoneyo ina mbilu ya Dhavhidha i ti nga di yimweyo? Ene a txi wu ziwa kwati mlayo wa Jehovha awu wu ku: “U nga navele msikati wa mwakelani wako.” (Eks. 20:17) Hambiketo ene a to so rwada maso e xalela. Se mbilu yakwe yi to khaka kuabaneka, hafu yimwani yi navela Bate-Sebha msikati wa vane kuveti yimwani yi ti lava kuengisa Jehovha. Dhavhidha a ti thava Jehovha ni ku mu engisa, kambe ene a tumete kuxulwa ngu minavelo ya nzambwa. Ngu toneto a mahile txionho txa hombe ngutu, e tisa txiruko ka ditina da Jehovha. E tshumela e tisela dikhombo da hombe ngutu ka vathu vo mbi na mnando kupata ni va mwayani kwakwe.—2 Sam. 11:1-5, 14-17; 12:7-12.

13. Hi ti zivisa kutxani ti to Dhavhidha a tshumete e va ni wuxaka ni Jehovha?

¹³ Dhavhidha a tsayisilwe ngu Jehovha ni ku a tshumete e wuseta wuxaka wakwe ni nene. (2 Sam. 12:13; Mas. 51:2-4, 17) Dhavhidha kha divala makhombo ya ma nga mu humelela ngu ku va a di tumelete ku mbilu yakwe yi abaniswa. Ina Jehovha a vhuni Dhavhidha kumaha to mbilu yakwe yi tshumela yi va yimweyo? Ina, Bhiblia yi womba to mbilu ya Dhavhidha yi ti ‘hetisekile ka Mkoma, Txizimu txakwe.’—1 Vafu. 11:4; 15:3.

14. Ngu tihi ti hi fanelako ku ti wotisa tona? Ngu kutxani?

 ¹⁴ Ati ti nga humelela Dhavhidha ti nga hi tsanisa ni ku tshumela ti hi txharihisa. Malanda a Jehovha nyamsi ma nga gonda txo kari ka txionho txi Dhavhidha a nga maha. Mwendo hi ngadi kukhata kuthumela Jehovha mwendo nem, hotshethu ti lava hi ti wotisa tiya: ‘Ina na ema ni tserama ka siduko sa Sathani so zama kuabanisa mbilu yangu?’

15. Kuthava Jehovha ti nga hi vhikelisa kutxani hi txi manana ni sithombe sa walo?

¹⁵ Ngu txikombiso, u maha txani ngako u txi manana ni sithombe sa walo ka internet mwendo ka TV asi si no ku wusela minavelo yo maha ta mataho? U nga thuka u ti kanganyisa u txi khawe hi nga sithombe sa simbwiri. Kambe, ti nga maha Sathani a txo ku riyela kasi kuabanisa mbilu yako. (2 Vak. 2:11) Sithombe soneso hi nga si fananisa ni ditxhapu do wila sigodho. Mbimo yi di wilako txigodho di khata ngu kuganga ngu tshoka ya dona. Se kudotho-dotho di bela dotshe di za di tshaputa txigodho. Se, ti nga maha sithombe soneso i di tshokani ka ditxhapu. Silo si si nga wonekako i si nga sa txilo, si nga hi kuzetela kumaha sionho asi si no abanisa mbilu yathu hi leka kuthembeka ka Jehovha. Se u nga leke mbilu yako yi jokotelwa ngu Sathani! Vana ni mbilu yimweyo, thava ditina da Jehovha!

16. Ngako hi txi manana ni txiduko, hi nga tiwotisa txani?

¹⁶ Kuengetela ka sithombe sa walo, Sathani a thumisa tinzila timwani ta tingi kasi ku hi xenga hi maha to biha. Se hi na maha txani? Ta hehuka kualakanya to silo soneso kha sa biha ngutu. Ngu txikombiso, hi nga thuka hi txi khathu: ‘Atiya hi nga ta txilo, kha ni na kuza ni thaviswa dibanzani ngu mhaka ya tona.’ Maalakanyelo onewo ma bihile ngutu. Se ndinene ku tiwotisa tiya: ‘Atiya, ina hi  nga Sathani a zamaku kuabanisa mbilu yangu? Ni txo thuka ni xulwa ngu minavelo yo biha, ina na mbi rukisa ditina da Jehovha? Yona mhaka yiya, ina yi no ni tshuketisa hafu ni Jehovha mwendo yi no ni hambanisa nayo?’ Alakanyisisa ngu siwotiso soneso. Maha mkombelo u kombela wutxhari wo si xamula kwati, u si tikanganyisi. (Jak. 1:5) Eto ti nga kuvhikela. Ti nga kuvhuna kuvayilela siduko u si thavi, nga Jesu mbimo yi a nga khene: “Suka Sathani!”—Mat. 4:10.

17. Ngu kutxani mbilu yi si nga ni lisima yi txi za yi abaniswa? Womba txikombiso.

¹⁷ Mbilu yi txi za yi abaniswa kha yi swi yi di ni lisima. Ngu kutxani? Alakanya ngu mtxawa wa vakhavi va bholwa ava va si pfaniko. Vamwani va zama ku va vona va wonwako, vamwani kha va engisi milayo kasi vamwani va eyisa mthangeli wawe. Ina u alakanya to mtxawa wonewo wu nga ganya? Kambe mtxawa awu wu ku ni wumwewo wu nga ganya. Nanawe mbilu yako yi nga humelela ngako mialakanyo yako, mbilu ni minavelo yako si di patanile ko thumela Jehovha. U nga divali to Sathani o humelwa ngu kulava kuabanisa mbilu yako. Ene a lava ti to mialakanyo ni minavelo yako si lwisana ni milayo ya Jehovha. Kasi awe u lava kuthumela Jehovha ngu mbilu yimweyo. (Mat. 22:36-38) U nga thuki u leka Sathani e abanisa mbilu yako!

18. Ngu kuya ngu Mika 4:5 u tiemisete kumaha txani?

¹⁸ Kufana ni Dhavhidha, khongela ka Jehovha u txi khawe: “Ni ninge mbilu yimweyo ti to ni thava ditina dako.” Tiemisele kuhanya ngu kuyelana ni ti u nga ti kombela. Ditshiku ni ditshiku, tiemisele kukombisa ti to u teka ditina da Jehovha i di do xonipheka ngutu ka sisungo sako, sa hombe ni sa sidotho. U txi maha tiya, u na ti kombisa ti to ngu ditshuri u Fakazi ya Jehovha. (Mav. 27:11) Hotshethu, he wombeni mapswi mamwewo ni a mprofeti Mika a nga khene: “Athu hi na tsimbila ditinani ka MKOMA, Txizimu txathu, yotshe mbimo ngu ha ku si gwitiko.”—Mika 4:5.