1. Kutina Yehova nikimanyisa ki, kandi shi ahabw’enki kiri kwetengesa ahari abo abari kumukunda?

ABAKRISTO nibakunda Ruhanga kandi nibamutina. Ahari bamwe, eco nibakikwata nk’endagano. Konka kutina Yehova tikiri kumanyisa kumweshereka ngu atatukora kubi. Twaza kushwijuma oburyo bw’omutano bw’okutina. Abantu abine oko kutina niborobera Ruhanga kandi bamuhisa ekitinisa. Nibaba batari kwenda kugomera Ishe w’omu iguru ahakuba tibari kwenda kushisha obunywani bwabo na we.—Zab 111:10; Enf 8:13.

2. Tukuratize ebigambo bya Daudi ebiri omuri Zaaburi ya 86:11, ni biha bintu bibiri ebi twaza kushwijuma?

² Shoma omuri Zaaburi ya 86:11. Ku ori kushoma ebyo bigambo, noshoborocerwa ku Omugabe Daudi yabire ari kumanya omugasho g’okutina Yehova. Reka tushwijume oku turi kubasa kuta omu bikorwa ebi Daudi yagambire omu shara yeye. Ecokubanza: Twaza kureba enshonga ahabw’enki tushemerire kutina izina rya Ruhanga. Eca kabiri: Twaza kushwijuma oku turi kubasa kwereka ku nitutina izina rya Ruhanga omu mbera zitu za burijo.

3. Ni enki ecabire ahari Musa kikatuma yaguma kuhisa izina rya Ruhanga ekitinisa?

³ Tekateka oku Musa yayehurire obu babire bateranire aha rukiri akareba ekitinisa ca Yehova omu korekwa. Ekitabo kitu ekiri kushoborora Bibuli nikigira ngu : “Eco ni ekintu  ekiri kutangaza ecabire aha muntu Yesu atakizire omu nsi.” Musa akahurira ebigambo ebi marayika yagambire biri kugira ngu: ‘[Yehova ,Yehova], Ruhanga ow’okusasira n’embabazi, otarahuka kugira ekiniga, oyijwire embabazi n’amazima, ogirira embabazi abantu enkumi n’enkumi, osasira okutahikirira n’okushisha n’ekibi.’ (Kur 33:17-23; 34:5-7) Musa ku yabire nakoresa izina Yehova ebyo bintu bikaba nibimugaruka omu bwenge. Obwe rero tikiri kutangaza kuba bwanyima Musa yahabwire Abaisraeli ngu: ‘Mutine eri zina ery’ekitinisa kandi eriri kutinisa.’—Bir 28:58.

4. Ni enki ekiri kutukwasa kukizaho kuha Yehova ekitinisa?

⁴ Ku turi kutekateka aha izina Yehova, nikituma twatoreza abo abari kuritina. Tushemerire kutura nitutekateka aha mitwarize yeye, otwariremu amani geye, obwenge bweye, oburinganiza bweye, na rukundo yeye. Kutekateka ahari eyo mitwarize n’aha yindi nikituma twakizaho kumuha ekitinisa.—Zab 77:11-15.

5-6. (a) Izina rya Ruhanga nirimanyisa ki? (b) Tukuratize ebiri omu Kuruga 3:13, 14 n’omuri Isaaya 64:8, ni mu buha buryo obu Yehova ari kuhikirizamu ebi ari kwenda?

⁵ Ni enki eki turi kumanya aha bikwatirine n’eki izina rya Ruhanga riri kumanyisa? Abanyabwenge bingi nibikiriza ku izina Yehova riri kumanyisa ngu: “Natuma byabaho.” Eki eryo zina riri kumanyisa nikitwijusya ku hatariho ekiri kubasa kwemereza Yehova kukora eki ari kwenda. Bata shi?

⁶ Yehova naba cona ekiri kwetengwa ngu ahikirize ekigendererwa ceye. (Shoma omu Kuruga 3:13, 14.) Ku turi kutekateka aha mitwarize ya Ruhanga eri kutangaza nikitugaruramu amani. Nambwenu Yehova nakoresa abahereza beye abatahikirire aba ekiri kwetengwa, kugira ngu bamuhereze kandi bahikirize ekigendererwa ceye. (Shoma omuri Isaaya 64:8.) Omuri obwo buryo Yehova natuma ebi ari kwenda byahikirira. Tihariho ekintu na kimwe ekiri kubasa kumuzibira kuhikiriza ekigendererwa ceye.—Isa 46:10, 11.

7. Ni bata oku turi kubasa kwereka ku nitusima Tata witu ow’omu iguru?

 ⁷ Nitwereka ku nitusima Tata witu ow’omu iguru turi kutekateka aha bi yakozire n’ebi ari kutuma twahikaho. Ecokureberaho: Ku turi kutekateka aha byahangirwe nikituma twashemerererwa byona ebi Yehova yakozire. (Zab 8:3, 4) Kandi ku turi kutekateka aha ki Yehova ari kutuma twaba co ngu ahikirize ebi ari kwenda, nitukizaho kumuhisa ekitinisa. Buzima izina Yehova ka niritangaza! Kumanya izina Yehova nikitwariramu kumanya owu Yehova ari we, ebi yakozire, n’ebi arikora.—Zab 89:7, 8.

8. Tukuratize ebiri omu Ky’ebiragiro 32:2, 3 ni enki eki Yehova ari kwenda ngu abahereza beye bakore?

⁸ Abaisraeli batakatahire omu nsi eyaraganisibwe Yehova akegesa Musa ebigambo by’eceshongoro. (Bir 31:19) Musa na we, akacegesa Abaisraeli. (Shoma omu Ky’Ebiragiro 32:2, 3.) Twatekateka aha runyiriri rwa 2 n’orwa 3, nitureba ku Yehova atari kwenda ngu bashereke izina ryeye. Nayenda ngu abantu bona bamanye izina ryeye. Mbehi ti omugisha aha Baisraeli kuhurira Musa ari kubegesa ebikwatirine na Yehova n’izina ryeye! Nk’oku enjura eri kutuma ekihingwa cakura ge, ebi Musa yayegesize Abaisraeli bikagumya okwikiriza kwabo kandi bikabagaruramu amani. Mbehi nitumanya tuta ku oku turi kwegesa ari nk’oku Musa yabire ari kwegesa?

9. Ni bata oku turi kukwasa abandi kweza izina rya Yehova?

⁹ Twaba turi kuburira aha nju n’enju ninga omu misho ga bona, nitukoresa Bibuli turi kwereka abantu izina bwite rya Ruhanga, Yehova. Nitubasa kubaha ebitabo byitu birungi, tubereka vidiyo eziri kushemeza kandi tubereka n’enkuru ziri aha rubuga rwitu eziri kuhisa Yehova ekitinisa. Twaba turi aha murimo, aha ishomero, ninga aha rugendo nitubasa kutunga oburyo bw’okugambira abantu ebiri kukwata ahari Ruhanga n’emitwarize yeye. Ku turi kugambira abu turi kubugana ebikwatirine n’ekigendererwa ca Yehova eki ayinire ensi n’abantu, nikituma bamanya oku Yehova ari kutukunda. Kandi ku turi kubagambira amazima agari kukwata ahari Tata witu ow’omu iguru nituba twayekwatanisa omu kweza izina rya Ruhanga. Nitukwasa abantu bingi kushoborocerwa ku ebi bayegesibwe ahari Yehova ari ebishuba. Enyegesa za Bibuli ezi turi kwegesa abantu nizituma bahumurizibwa kandi bagarurwamu amani.—Isa 65:13, 14.

10. Twaba turi kwegesa abantu Bibuli ahabw’enki tushemerire kukora ekirengire kubegesa emisinge ya Ruhanga ehikirire?

¹⁰ Twaba turi kwegesa omwegi wa Bibuli, nituba turi kwenda kumukwasa ngu amanye izina rya Yehova kandi arikorese. Kandi nituba turi kwenda kubakwasa ngu bamanye Yehova omu bwijwire. Eco nitukihikaho turi kugendera aha misinge ya Yehova eri kwera. Omwegi murungi wa Bibuli nakuratiza ebiragiro bya Ruhanga. Mbehi kuba omwegi ari kukunda Yehova ni co kiri kutuma yamworobera? Oyijuke ku Eva yabire ari kumanya ebiragiro bya Ruhanga, konka we na Adamu bakaba batari kumukunda by’amazima. (Kut 3:1-6) Obwe rero tushemerire kukora ekiri kukira aha kwegesa abantu emisinge ya Ruhanga ehikirire.

11. Twaba turi kwegesa abegi bitu ebikwatirine n’ebiragiro bya Ruhanga, ni bata oku turi kubakwasa kumukunda?

¹¹ Emisinge ya Yehova netura eri mirungi ahari itwe. (Zab 119:97, 111, 112) Konka abegi bitu baba batashoborokirwe ku Yehova yatireho ebiragiro ahabw’okutukunda, nikituma batakikiriza. Obwe rero tushemerire kubabuza ngu: “Notekateka ngu ni ahabw’enki Ruhanga ari kushaba abahereza beye kutwaza bati ninga shi ari kubazibira  kutwaza bati? Eco nikitukwataho kita?” Ku turi kukwasa abegi bitu kutekateka aha biri kukwata ahari Yehova n’okuhisa izina ryeye ekitinisa, nikituma twakizaho kubahika aha mutima. Eco nikituma abegi bitu batakunda ebiragiro bya Yehova kusha ahobwe nibanamukunda. (Zab 119:68) Baryakizaho kugira okwikiriza kuhamire kandi kibakwase kwehanganira ebigezo ebi baribugana.—1 Kor 3:12-15.

12. Ni bata oku Daudi yaremirwe kugira omutima ogweterine, kandi shi ni enki ecarugiremu?

¹² Hariho ebigambo by’omugasho ebiri omuri Zaaburi ya 86:11 ebiri kugira ngu: ‘Teranira hamwe ebiri omu mutima gwange.’ Omugabe Daudi akakoresibwa omwika oguri kwera yahandika ebyo bigambo. Omu kubaho kweye akerebera ku kiri kuba corobi kugira omutima ogwebaganisizemu. Izoba rimwe, akaba ari aha kishenge c’enju yeye rero yareba omukazi w’abandi ari kunaba. Konka shi obwo bwire omutima gwa Daudi gukijamu emitakatekere mirungi ninga mibi? Akaba namanya omusinge gwa Yehova oguri kugira ngu: ‘Otariyetenga muka mutahi wawe.’ (Kur 20:17) Konka, akagumizamu kumwetegereza. Omutima gweye gukebaganisamu ebyetengo bibiri; ni okugamba okwetenga omukazi w’abandi Batisheba, n’ecetengo c’okuhimbisa Yehova. N’obu Daudi yabire ari kukunda Yehova kandi ari kumutina, akakora ebiri kubugana n’ecetengo ceye kibi c’okwekunda. Eco cetengo kikatuma Daudi yakora ekibi c’amani. Akajumisa izina rya Yehova. Nambwenu Daudi akaretera ebizibu abandi otwariremu ab’omu ka yeye.—2 Sam 11:1-5, 14-17; 12:7-12.

13. Nitumanya tuta ku omutima gwa Daudi gwagarukire kuba ogweterine?

¹³ Yehova akamuhana rero yagaruka kugira obunywani na we. (2 Sam 12:13; Zab 51:2-4, 17) Daudi akaba nayijuka ebizibu ebyamuhikireho ahabw’okwikiriza ngu omutima gweye gwebaganisemu. Ebigambo byeye ebiri omuri Zaaburi ya 86:11 nambwenu nibimanyisa ngu: “Mpa omutina ogweterine.” Mbehi Yehova akakwasa Daudi kugira omutima ogweterine ninga ogutari kwebaganisamu? Yego; ahakuba bwanyima Bibuli ekagamba ahari Daudi ku ni omushija oyine omutima oguhikirire ahari Yehova Ruhanga.—1 Bag 11:4; 15:3.

14. Ni enki eki tushemerire kwebuza kandi ahabw’enki?

¹⁴ Ecokureberaho ca Daudi nikitugaruramu amani kandi nikiturabura. Kuba yagwire omu kibi c’amani, oko ni okurabura aha bahereza ba Ruhanga omuri obu bwire. N’obu twakuba tumazire obwire buce ninga  emyaka myingi turi kuhereza Yehova, tushemerire kwebuza ngu: ‘Mbehi ninyerinda ngu ebigezo ebiri kuruga ahari Sitaane bitabaganisamu omutima gwange?’

15. Ni bata oku kutina Yehova kiri kuturinda kureba ebishushani ninga vidiyo eziri kutuma twagira ecetengo c’obushambani?

¹⁵ Ecokureberaho: Mbehi wabugana ebishushani ahari tivi ninga ahari intaneti ebiri kubasa kutuma wagira ecetengo c’obushambani, nohika ori kukora ki ahonaho? Nobasa kutekateka ngu ebyo bishushani ninga vidiyo eyi wareba ti porunogarafiya. Konka eco nicoreka ku Sitaane ari kubasa kubaganisamu omutima gwawe? (2 Kor 2:11) Eco kishushani nikibasa kuba kiri nk’akakoreso kace k’ecoma aku omuntu ari kubasa kukoresa omu kushatura ekiti. Nakata aha kiti ateraho, rero kihika kiri kushatuka. Mbehi ebishushani ebi turi kureba ahari intaneti tibiri kubasa kuba nk’ako koma? Eco kishushani nikibasa kurebeka nk’ahu kari akantu kace akatine nshonga konka nikabasa kutuma omuntu yakora ebibi ebiri kubaganisamu omutima gweye kandi bishisha obwesigwa bweye. Obwe rero tushemerire kwerinda ekintu cona ekiri kutuma omu mutima gwitu hatahamu ebintu bibi! Rinda omutima gwawe kugira ngu otine izina rya Yehova!

16. Twaba turi omu bigezo ni biha bibuzo ebi tushemerire kwebuza?

¹⁶ Oyihireho ebyo Sitaane nakoresa obundi buryo kugira ngu atume twakora ebibi. Mbwenu shi tukabyerinda tuta? Nitubasa kutekateka ngu ti bibi munonga. Ecokureberaho: Nitubasa kutekateka ngu: ‘Eco tikiri kubasa kutuma nabingwa omu kibina, obwe rero tikine nshonga.’ Eyo mitekatekere ni mibi munonga. Kugira ngu tugire emitekatecere mirungi tushemerire kwebuza ngu: ‘Mbehi Sitaane nagezaho kungeza ari kukoresa ogu muringo kugira ngu abibe ebitekateko bibi omu mutima gwange? Mbehi ku ndi kugira ebyetengo bibi omu mutima,  nikinyanguhira kuhisa izina rya Yehova ekitinisa? Mbehi ebi bikorwa nibituma nahika hihi Ruhanga, ninga nibituma namuza hare?’ Tekateka ahari ebyo bibuzo. Shaba Yehova akuhe obwenge kugira ngu obigarukemu ge. (Yak 1:5) Eco ku orakikore nikija kukurinda. Kandi nikibasa kukukwasa kwetantara okugezibwa, nk’oku Yesu yakikozire ari kugamba ngu: “Rugaho, Sitaane.”—Mat 4:10.

17. Ahabw’enki kitari kuba kirungi omutima gwawe gwayebaganisamu? Shoborora.

¹⁷ Omutima ku guri kwebaganisamu nikiba kibi munonga. Tekateka etimu y’omupira erimu abazani abatari kukorengana. Abamwe nibeyendera ekitinisa, abandi tibari kwenda kukuratiza ebiragiro by’omuzano, abandi bo tibari kuha ekitinisa omwebembezi wabo. Eyo timu teri kubasa kusingura omuzano. Ekiri kutana n’eco, etimu eyine obumwe buzima nesingura. N’iwe omutima gwawe nigubasa kuba nk’eyo timu eri kusingura, yaba emitekatekere yawe, ebyetengo byawe, n’enyehurira zawe byegamire aha kuhereza Yehova. Oyijuke ku Sitaane ari kwenda kubaganisamu omutima gwawe. Nayenda ngu ebitekateko byawe, ebyetengo byawe n’enyehurira zawe bibe bitari kubugana n’emisinge ya Yehova. Obwe rero oshemerire kukora cona ekiri kubasika kugira ngu omu mutima gwawe obe oyetegwire kuhereza Yehova. (Mat 22:36-38) Nyabura we otarikiriza ngu Sitaane abibe ebitekateko bibi omu mutima gwawe!

18. Tukuratize ebiri kugambwa omuri Miika 4:5, ni enki eki twamaririra kukora?

¹⁸ Nk’oku Daudi yakikozire, shaba Yehova, ‘ateranire hamwe ebiri omu mutima gwawe, gubone kutina izina ryeye.’ Kora cona eki ori kubasa ngu obeho ori kubuganisa n’eyo shara. Burizoba, guma ori kutekateka aha nsharamu zawe, orebe yaba ziri kuhisa izina rya Yehova eriri kwera ekitinisa. Nk’Omuhamya wa Yehova, ku orakikore basyoya, nikija kutuma wabaho ori kubuganisa n’eryo izina. (Enf 27:11) Kandi twena nitwija kuba twetegwire kugamba nk’omuhanuzi Miika owagambire ngu: ‘Turyaguma nitugendera omu izina rya [Yehova] Ruhanga witu okuhisya’ ebiro n’ebiro.—Mik 4:5.