1. Met weween niwokkus Kot, me pwata a lamot ngeni chókkewe mi tongei Jiowa?

CHÓN KRAIST ra tongei Kot me ra pwal niwokkusiti. Me ren ekkóch, usun itá ekkena mettóch ra ú fengen. Iwe nge, sise fósun ewe sókkun niwokkus mi eniwa emén. Sipwele pwóróus wóón eú sókkun niwokkus mi kkóló weween. Chókkewe mi eáni ena sókkun niwokkus ra mwaar ren Kot me unusen súféliti. Rese mochen eletipengawa Semer we lón láng, pwe rese mochen atai ar riri ngeni.​—Kölf. 111:10; SalF. 8:13.

2. Ikkefa ekkewe ruu mettóch sipwe pwóróus wóón me ren alon King Tafit lón Kölfel 86:11?

² Álleani Kölfel 86:11. Atun ka ekieki masouen ena wokisin, ka tongeni kúna pwe Tafit a weweiti lamoten niwokkus Kot. Iei sipwe pwóróus wóón ifa usun sia tongeni apwénúetá masouen án Tafit na iótek. Akkomw, sipwe etittina ekkóch popun sipwe unusen súféliti iten Kot. Mwirin, sipwe pwóróus wóón ifa usun sipwe pwári pwe sia unusen súféliti iten Kot we lón manawach iteiten rán.

3. Eli met a álisi Moses an epwe chék unusen súféliti iten Kot?

³ Ekieki meefien Moses atun a pworetiw lón eú pwangen achaw me Jiowa a ékúna ngeni lingan. Ese mwáál a mmen  amwarar kúnaian na! Ikkeei ekkewe kapas Moses a rong, ese mwáál seni emén chónláng: ‘Ngang Jiowa, ngang Jiowa, ngang eman Kot mi eäni ümöümöch me kirikiröch, üa songomang, üa pwal wöün tong me allükülük. Üa eäni tong ngeni ngeröü o amusala föföringau me pupungau me tipis.’ (Eks. 33:17-23; 34:5-7) Neman atun án Moses néúnéú ewe it Jiowa a cheme ngeni kúnaian na. Ina popun iwe Moses a éúréúra néún Kot kewe aramasen Israel mwirin och fansoun pwe repwe ‘meniniti iten ewe Samol mi Lapalap ar we Kot, ewe it mi ling.’​—Tut. 28:58.

4. Met a tongeni álisikich le alapaaló ach súféliti Jiowa?

⁴ Atun sia ekieki usun ewe it Jiowa, itá sipwe pwal ekieki ika I met sókkun Kot. Mi lamot sipwe chemeni napanapan kewe, áwewe chék ren an manaman, tipachem, pwúng, me an tong. Ach ekieki usun ekkena napanap me pwal ekkewe ekkóch, a tongeni amwékútúkich le alapaaló ach súféliti Jiowa.​—Kölf. 77:11-15.

5-6. (a) Met weween iten Kot we? (b) Me ren Ekistos 3:13, 14 me Aisea 64:8, ifa usun Jiowa a kan apwénúetá letipan?

⁵ Met sia silei usun weween iten Kot we? Chómmóng soukáé ra tipeeú ngeni pwe usun itá iten Jiowa a wewe ngeni “A Efisi An Epwe Wiliti.” Weween itan na a áchema ngenikich pwe ese wor met a tongeni eppeti Jiowa le apwénúetá letipan. Ifa usun a féri ena?

⁶ Jiowa a apwénúetá letipan ren an wiliti met chék a lamot pwe epwe apwénúetá minne a tipeni. (Álleani Ekistos 3:13, 14.) Ekkewe kapas “Ngang ngang echök” lón ena wokisin a tongeni afféú ngeni “Ngang Upwe Wiliti Met Ua Filatá.” Fán chómmóng néúch kewe puk ra áchema ngenikich ach sipwe ekilonei napanapen Kot na mi amwarar. Jiowa a pwal tongeni efisi án néún kewe chón angang rese unuséch repwe wiliti met chék a lamot ren ar repwe angang ngeni me apwénúetá letipan. (Álleani Aisea 64:8.) Án Jiowa féri ekkena mettóch, a efisi an epwe pwénútá letipan. Ese wor met a tongeni eppeti seni an  epwe apwénúetá minne a tipeni.​—Ais. 46:10, 11.

7. Ifa usun sia tongeni alapaaló ach aúcheani Semach we lón láng?

⁷ Sia tongeni alapaaló ach aúcheani Semach we lón láng ren ach ekilonei minne a fen féri me met a fen atufichikich le féri. Áwewe chék, atun sia ekilonei amwararen férian kewe, sia fókkun mwaar ren meinisin met Jiowa a fen féri. (Kölf. 8:3, 4) A lapóló ach súféliti atun sia ekilonei ifa usun a álisikich le apwénúetá letipan. Ewe it Jiowa a fókkun amwarar! A kapachelong lón ena it meinisin napanapen Semach we, meinisin met a fen féri, me meinisin met epwe féri.​—Kölf. 89:7, 8.

8. Met Tuteronomi 32:2, 3 a pwári usun án Jiowa ekiek usun itan we?

⁸ Jiowa a áiti ngeni Moses kúkúún eché kél mwen chék án ekkewe chón Israel tolong lón ewe Fénúen Pwon. (Tut. 31:19) Iwe, Moses epwe áiti ekkewe aramas ena kél. (Álleani Tuteronomi 32:2, 3.) Atun sia ekilonei wokisin 2 me 3, a ffat pwe Jiowa a mochen pwe itan we epwe pwápwáló, me ese mochen pwe aramas repwe ekieki pwe a kon pin ar repwe féúni. A mochen pwe meinisin repwe silei itan we! A ifa me ingelóón ekkewe chón Israel lupwen ra rong án Moses áiti ngeniir usun Jiowa me itan we mi amwarar! Minne Moses a áiti ngeniir a apéchékkúla ar lúkú me echimweretá, usun án chimwé ámáári ekkewe irá. Ifa usun epwe pwal ina usun ach asukula aramas?

9. Ifa usun sipwe tongeni álisatá pinilóón iten Kot we?

⁹ Lupwen sia afalafal imw me imw are ikewe aramas ra soun nóm ie, sia tongeni néúnéú néúch we Paipel le áiti ngeni aramas iten Kot we, Jiowa. Sia tongeni anéúnéú ngeniir ekkewe puk mi múrinné, fichi ngeniir ekkewe video mi éch, me áiti ngeniir ekkewe pwóróus wóón ach we website mi elingaaló Jiowa. Sia tongeni kútta atun ach sipwe fós usun ach we Kot mi tong me napanapan kewe lón ach leenien angang, sukul, are atun sia sái. Lupwen sia ereni aramas usun minne Jiowa epwe féri fán iten aramas me ei fénúfan, neman epwe kerán ina ar repwe mirititi úkúkún án Jiowa tongeer. Sia álisatá pinilóón iten Kot we atun sia ereni aramas ewe enlet usun Semach we mi tong. Sia áwena ekkóch ekkewe afalafal mi chofona me kapasen pweni usun Jiowa aramas ra fen lúkú. Minne sia asukula ngeni aramas seni Paipel, ina ewe pwóróus mi kon apéchékkúla letiper seni meinisin.​—Ais. 65:13, 14.

10. Pwata ese chék naf ach sipwe áiti ngeni aramas usun án Kot kewe allúk mi pwúng lupwen sia káé ngeniir ewe Paipel?

¹⁰ Lupwen sia káé ngeni aramas ewe Paipel, sia mochen álisiir le silei Jiowa me néúnéú itan. Pwal och, sia mochen álisiir le silei weween itan we. Itá epwe pwénútá ena ika sia chék asukuler usun án Kot kewe kapasen éúréúr me allúk? Emén chón káé Paipel mi múrinné eli epwe silei usun án Kot kewe allúk me pwal mwo nge aúcheaniir. Nge itá epwe álleasochisi Jiowa pokiten a tongei? Chemeni pwe Efa a silei án Kot allúk, nge ese enletin tongei Kot, a pwal ina usun ren Atam. (Ken. 3:1-6) Ina popun, ese chék naf ach sipwe áiti ngeni aramas usun án Kot kewe allúk mi pwúng.

11. Ifa usun sipwe tongeni álisi néúch kewe chón káé le tongei Kot atun sia asukuler usun an kewe allúk?

¹¹ Án Jiowa kewe allúk ra échitikich fansoun meinisin. (Kölf. 119:97, 111, 112) Nge neman néúch kewe chón káé resap meefi ena ika pwe rese weweiti pwe Jiowa a féri  ekkena allúk pokiten a tongekich. Iwe neman sia tongeni eisiniir: “Met meefiom, pwata Kot a allúkú ngeni néún kewe chón angang ar repwe féri are resap féri och mettóch? Met ena mettóch a pwári ngonuk usun Kot?” Ika sia álisi néúch kewe chón káé le ekieki usun Jiowa me aúcheani itan we mi amwarar, iwe sia tongeni achchúngú letiper. Iwe néúch kewe chón káé resap chék aúcheani án Kot kewe allúk nge repwe pwal tongei I. (Kölf. 119:68) Epwe lapóló ar lúkú me repwe tongeni likiitú fán sóssót mi áweires repwe kúna.​—1 Kor. 3:12-15.

12. Apwóróusa eú atun a tipekinikin letipen Tafit. Me met mwirilóón?

¹² Ra pwal fókkun aúchea ekkeei kapas King Tafit a makkeei lón Kölfel 86:11, mi erá “fang ngeniei eu leluk esap tipekinikin.” Lón ánein manawen Tafit, a kúna mecheresin an mut ngeni letipan an epwe tipekinikin. Lón eú atun, a nóm wóón imwan we me a kúna án emén fefin mi pwúpwúlú tútú. Itá lón ena atun, letipen Tafit a unus are a tipekinikin? A silei án Jiowa ei allúk: “Kosap pwal mochenia ngeni pwülüen chon arum.” (Eks. 20:17) Nge a chék nennengeni. A kinikinfesen letipan pún a mocheniaiti ewe fefin, Patsipa, me a pwal mochen apwapwaai Jiowa. Inaamwo ika Tafit a tongei me niwokkusiti Jiowa ren langattam fansoun, nge a chék achéchééi pwisin i. Pokiten ena, Tafit a féri minne mi ngaw. A eitengawa iten Jiowa. A pwal eselipato watteen feiengaw ngeni chókkewe esap tipisiir, kapachelong pwisin chón an we famili.​—2 Sam. 11:1-5, 14-17; 12:7-12.

13. Ifa usun sia silei pwe a unussefál letipen Tafit?

¹³ Jiowa a apwúngú Tafit, nge mwirin a ririéchsefál ngeni. (2 Sam. 12:13; Kölf. 51:2-4, 17) Tafit a chechchemeni pwúnúngawen an mut ngeni letipan an epwe tipekinikin. Itá Jiowa a álisi Tafit an epwe unussefál letipan, are an esap tipekinikin? Ewer, pún mwirin och fansoun án Kot Kapas a erá pwe Tafit i emén mwán ‘lelukan a . . . unus ngeni Jiowa an we Kot.’​—1 King 11:4; 15:3.

14. Met mi lamot sipwe pwisin eisinikich, me pwata?

¹⁴ Minne a fis ngeni Tafit a eú minen apéchékkúl me minen éúréúr ngenikich. An turutiw lón watteen tipis a eú minen éúréúr ngeni néún Kot kewe chón angang lón ei fansoun. Ese lifilifil ika sia kerán poputá le angang ngeni Jiowa are fen angang ngeni ren fite fite ier, nge mi lamot sipwe pwisin eisinikich, ‘Ua kan úkkú ngeni án Satan sótun etipefeseni letipei?’

15. Ifa usun niwokkus Kot a tongeni túmúnúkich ika sia kúna ekkewe sasing mi amocheniakichetá?

 ¹⁵ Áwewe chék, met kopwe féri ika ka kúna och sasing wóón TV are wóón ewe Internet mi tongeni amocheniaketá? Neman epwe mecheres óm kopwe ekieki pwe saminne ena sasing are kachito wesewesen sasingin me kachitoon kapasingaw. Nge itá ina och mettóch Satan a áeá le etipefeseni letipom? (2 Kor. 2:11) Ena sasing are kachito a usun chék efóch kúkkúnún kouk emén a néúnéú le ásseta efóch oummóngun amúch. Akkomw a koukeetiw mesen néún we kouk mi kken wóón ewe amúch, mwirin a necheetiw néún we kouk tori án ewe amúch a ssátfesen. Itá ekkewe sasing mi pwári sikepwach wóón TV are Internet epwe usun mesen ena kouk mi kken? Án emén nennengeni ekkena mettóch, itá me ren ese kon lien efeiengaw, nge mwirin och fansoun epwe tongeni atolonga lón tipis. Iwe kosap mut ngeni och mettóch mi limengaw an epwe tolong lón letipom! Amwéchú eú letip mi unus mi niwokkusiti iten Jiowa!

16. Ikkefa ekkewe kapas eis sipwe pwisin eisinikich atun sia kúna sóssót?

¹⁶ Satan a pwal áeá chómmóng mettóch le sótunikich le féri minne mi mwáál me lúkún sasing mi limengaw. Met sipwe féri? A mecheres ach sipwe ekieki pwe ekkena mettóch rese kon lien ngaw. Áwewe chék, eli sipwe ekieki: ‘Saminne upwe katowu ren ai féri ei mettóch, iwe ese mwáál ese kon lien ngaw.’ Ese fókkun pwúng ena esin ekiek. Epwe fen éch ika sipwe pwisin eisinikich ekkeei esin kapas eis: ‘Itá Satan a sótun áeá ei sóssót le etipefeseni letipei? Upwe eitengawa Jiowa ika upwe kkuf ren mocheniangaw? Ei féffér epwe eririéchúei ngeni Kot are fen atowauaeiló seni?’ Ekieki ekkena kapas eis. Ióteki tipachem pwe kopwe tongeni pélúweni ekkena  kapas eis fán wenechar. (Jas. 1:5) Óm féri ena epwe wesewesen túmúnuk. A tongeni álisuk le tipeppós le ú ngeni sóssót usun chék Jesus lupwen a apasa: “Kopwe sü seniei Satan!”​—Mat. 4:10.

17. Pwata ese éch ika letipach a tipekinikin? Eáni eú kapas áwewe.

¹⁷ Ese éch ika letipach a tipekinikin. Ekieki usun chón lón eú kúmiin urumwot rese tipeeúfengen. Ekkóch ra chék pwisin mochen ar repwe iteféúló, nge ekkewe ekkóch rese mochen fiti allúkún ewe urumwot, nge pwal ekkewe ekkóch ra ésúfélúngawa ewe kanchi. Ika chón ena kúmi ra ina usun, iwe ese mwáál resap tongeni win. Nge ese mwáál eú kúmi mi tipeeúfengen ra tongeni win. Letipom a tongeni usun ena kúmiin urumwot mi win ika ekiekum, mochenum, me óm kewe memmeef ra tipeeúfengen le angang ngeni Jiowa. Chemeni pwe Satan epwe fókkun mochen etipefeseni letipom. A mochen pwe ekiekum, mochenum, me óm kewe memmeef resap tipeeúfengen me repwe ú ngeni allúkún Jiowa. Iwe nge, ren óm kopwe angang ngeni Jiowa, mi lamot án letipom epwe unus. (Mat. 22:36-38) Kosap fókkun mut ngeni Satan an epwe etipefeseni letipom!

18. Met kopwe tipeppós le féri me ren alon Mika 4:5?

¹⁸ Kopwe eáni án Tafit ei tingor ngeni Jiowa: “Kopwe fang ngeniei eu leluk esap tipekinikin, pwe üpwe niuokusiti itom.” Achocho ren úkúkún óm tufich le apwénúetá ena iótek lón manawom. Iteiten rán, kopwe úppós pwe óm kewe kefil, ese lifilifil ika watte are kúkkún, epwe pwári pwe ka unusen súféliti iten Jiowa we mi pin. Iwe ren óm féri ena, kopwe eitéchú ena it, pokiten en emén Chón Pwáraatá Jiowa. (SalF. 27:11) Iwe kich meinisin sipwe aloni alon ewe soufós Mika ei: “Sipwe fel o aleasochis ngeni ewe Samol mi Lapalap ach we Kot tori feilfeilachök.”​—Mik. 4:5.