1. Kwivwila Zambi woma yika chinalumbunuka, nawa mumu liaka chili chipema kwivwa woma wacho?

AKWA-KRISTU kakuzanga Zambi ni kumuvwila woma. Atu amwe mahasa kumona ngwe yino yili kalumbanganyishi. Alioze woma uze anambe hano, walisa. Atu waze akwete woma uno, kakuvumbika chinji Zambi. Woma wacho uli upema, mumu wakutukinda kulinga yuma yize muyivwisa Tata yetu wa mu malilu yinyengo ni kupihisa usepa wetu ni iye.—Samu 111:10; Yishi. 8:13.

2. Kulita ni maliji ja Mwanangana Ndawichi ali ha Samu 86:11, yuma yika yaali yize mutulilongesa ha mutwe uno?

² Tanga Samu 86:11. Maliji wano, kanasolola ngwo, Ndawichi kanyingikine ulemu wa kwivwila Zambi woma. Mutwe uno, muutukwasa kunyingika yize mutulilongesa ha maliji a Ndawichi. Chitangu, mutumona mumu liaka chili chilemu kwivwila jina lia Zambi woma. Mba mutumona nawa chize mutuhasa kusolola ngwetu, twakwivwila jina lia Zambi woma matangwa eswe.

3. Kuchi yuma yize Mose amwene yamukwashile kwivwa woma wa jina lia Zambi?

³ Achinyonga ha chize Mose evwile muze te anaswame ku liwe, ni muze amwene uhenya wa Yehova. Mukanda Estudo Perspicaz unambe ngwo: “Yikomokeso yize Mose amwene, te kukushi mutu yoze hanayimono kama ha mashimbu jacho.”  Mose kevwile limwe liji, kota lia mungelo linambe ngwo: “Yehova, mwe Yehova, Zambi mukwa keke, mukwa vumbi, makoke kutenuka, wakulumbama ni utu wa zango ni umwenemwene. Kakufunga utu wa zango hali tununu twa atu, kakukonekena uhenge ni uvulumunyi ni shili.” (Kutuhu. 33:17-23; 34:5-7) Kota Mose kewulukile maliji wano muze apwile ni kuvuluka jina lia Yehova. Kashika Mose alwezele a Izalele hanga evwile “woma jina lino lia ulemu lia kukolesa mwongo.”—Shimbi 28:58.

4. Yika muyitukwasa hanga tuvumbike chinji Yehova?

⁴ Muze mutunyonga ha jina lia Yehova, twatamba nawa kunyonga ha chize iye apwa. Twatamba kwiwuluka yitanga yenyi ngwe, ndundo, mana, ululi ni zango. Kupukuna ha yitanga yeswe yize Yehova ali nayo, muchitukwasa hanga tumuvumbike chinji.—Samu 77:11-15.

5-6. (a) Jina lia Zambi yika linalumbunuka? (b) Kulita ni Kutuhuka 3:13, ni Izaia 64:8, kuchi Yehova akumanununa upale wenyi?

⁵ Jina lia Zambi yika linalumbunuka? Akwa-kuhengwola yisoneko kakutayiza ngwo, jina lia Zambi kota linalumbunuka ngwo, “Iye kakumanununa yize akwamba hanji kulinga yize akwamba.” Yino yinatwiwulula ngwo, kukushi chuma nichimwe chize muchikinda Yehova kumanununa upale wenyi. Nyi mazanga hanga chimwe chuma chilingiwe, chakulingiwa lume. Kuchi akuchilinga?

⁶ Yehova kakulinga yeswe yize mazanga hanga amanunune upale wenyi. (Tanga Kutuhuka 3:13, 14.) Kanji-kanji mikanda yetu yakutukolweza hanga tupukune ha utu wa Yehova wa kumanununa upale wenyi. Yehova mahasa kutuma tuvumbi twenyi hanga alinge yuma yize muyimanununa upale wenyi chipwe ngwe kali yihenge. (Tanga Izaia 64:8.) Hachino, Yehova kakulinga yize akwamba, kukushi nichimwe chuma chize muchimukinda kumanununa upale wenyi.—Iza. 46:10, 11.

7. Kuchi muhasa kulemesa ni kuvumbika chinji Tata yetu wa mu malilu?

⁷ Nunga ni kunyonga ha yuma yize Yehova akutulingila ni ha yize akutukwasa kulinga.  Kulinga chino, muchikukwasa hanga umuvumbike ni kukomoka chinji ha yitanga yenyi. Chakutalilaho, kupukuna ha upeme wa yitangiwa ya Yehova, muchikukwasa hanga umuchichimieke ha yuma yeswe yize atangile. (Samu 8:3, 4) Pukuna nawa ha yuma yeswe yize Yehova akukukwasa kulinga hanga amanunune upale wenyi. Kulinga chino, muchikukwasa hanga umuvumbike chinji. Kwamba umwenemwene, jina Yehova likwete ulemu unji! Jina lino, linatale ha chize Tata yetu apwa, yize hanalingi ni yize makalinga kulutwe lia matangwa.—Samu 89:7, 8.

8. Kulita ni Shimbi Yamuchiali 32:2, 3, yika Yehova akunyonga hakutwala ku jina lienyi?

⁸ Shimbu A-Izalele te kanda achinjila mu chifuchi cha chilakenyo, Yehova kalongesele Mose umwe mwaso. (Shimbi 31:19) Chocho Yehova yatuma Mose hanga alongese mwaso wacho kuli A-Izalele. (Tanga Shimbi Yamuchiali 32:2, 3.) Nyi mutupukuna ha versu 2 ni 3, mutumona ngwetu, Yehova kanazange hanga jina lienyi alinyingike ni kulivulwoka kuli atu eswe. Tunyongenu ha chiseke chize atu evwile muze Mose aalongesele hakutwala kuli Yehova ni jina lienyi lisandu! Yuma yize Mose alongesele A-Izalele, yaakolesele ni kwatakamisa ngwe chize vula akutatwisa yilima-lima. Twatamba kukaula chilweza chino muze tunalongesa akwetu.

9. Kuchi mutuhasa kukwasa kupwisa jina lia Yehova lisandu?

⁹ Muze tunayi ni kwambujola ku zuwo ni zuwo hanji ha mbunga, twatamba kukalakala ni Mbimbiliya hanga tusolole jina lia Zambi kuli atu. Solwela atu mikanda yetu, yinema ni site yetu yize yakulemesa Yehova. Ku mulimo, ku shikola hanji ha mashimbu waze uli mu wenyi, sako tachi hanga uhanjike ni atu hakutwala kuli Zambi yetu wa zango ni chize apwa. Lweza atu yuma yize Yehova malinga kulutwe lia matangwa. Nyi twalinga chino, mutuhasa kukwasa atu anji hanga anyingike kanawa Yehova ni kwakwasa hanga anyingike umwenemwene hakutwala kuli iye. Malongeso a mu Mbimbiliya waze twakulongesa atu, kali alemu chinji, mumu mahasa kwahuzulula ni kwatakamisa.—Iza. 65:13, 14.

10. Muze tunasongwela Mbimbiliya kuli alongi jetu, mumu liaka kutwatambile kwalongesa wika shimbi ja Yehova?

¹⁰ Muze unasongwela longeso lia Mbimbiliya kuli longi ye, mukwase hanga anyingike jina lia Yehova ni kulivuluka. Mukwase hanga anyingike kanawa Zambi yoze ukwete jina lino. Shina nyi twalongesa wika longi shimbi ni yuma yize Zambi keshi kuzanga, muchimukwasa kunyingika kanawa Zambi? Kwamba pundu, longi mahasa kunyingika shimbi ja Zambi ni kujikomoka. Alioze, nyi keshi kuzanga Yehova, muchipwa chikalu kukaula shimbi jacho ni kumwononokena. Twiwulukenu ngwetu, Alama ni Eva, te kananyingika shimbi ja Zambi, alioze kakapwile ni zango lingunu hali Zambi yoze wasele shimbi jacho. (Uputu. 3:1-6) Kashika, kutwatambile kulongesa wika akwetu shimbi ja Yehova, twatamba kwakwasa nawa hanga amunyingike kanawa ni kumuzanga.

11. Muze tunalongesa longi shimbi ja Yehova, kuchi mutuhasa kumukwasa hanga azange chinji Yehova yoze wasele shimbi jacho?

¹¹ Yehova kasele shimbi ni usongwelo hanga yitukwase ku mwono wetu. (Samu 119:97, 111, 112) Longi mahasa kutayiza ngwenyi shimbi ja Zambi jili jipema, nyi manyingika ngwo, Yehova kali Zambi ya zango. Kashika, hula longi ye ngwe: Mumu liaka Yehova asele shimbi jino? Yika shimbi jino jinatulongesa hakutwala ku  utu wa Yehova? Yihula yamutapu au muyihasa kukwata ku mbunge. Yihula yino, yakukwasa longi hanga anyonge chinji hali Yehova ni kuzanga jina lienyi. Hachino, longi kechi kuzanga wika shimbi, alioze, mazanga nawa mutu yoze wasele shimbi jacho. (Samu 119:68) Ufulielo wenyi muukola, mahasa kukumba yeseko yize muyiza kulutwe lia matangwa.—1 Kori. 3:12-15.

12. Ha shimbu lika Ndawichi apwile ni mbunge jaali, nawa yika yalingiwile kuli iye?

¹² Ha Samu 86:11, Mwanangana Ndawichi yamba ngwenyi: “Mbunge yami yipwe yimuwika.” Maliji wano kali alemu chinji. Hamukunda wa yuma yize yalingiwile ku mwono wenyi, Ndawichi yanyingika ngwenyi, kumana chili chashi mutu kupwa ni mbunge jaali. Tangwa limwe, Ndawichi te kanolola molu mu chipatulu cha kwilu, chocho yamona pwo lia mukwo kanasana. Ha shimbu liacho, kuchi mbunge ya Ndawichi yapwile? Yimuwika nyi jaali? Ndawichi kanyingikine shimbi ya Yehova yinambe ngwo: ‘kanda ukavwila chipululu pwo lia mwenyembo we.’ (Kutuhu. 20:17) Chinasoloka ngwe Ndawichi kanungine nikutala pwo wacho. Yapwa ni mbunge jaali, mbunge yimwe yiyizanga kupwa ni pwo liambala, yikwo, yiyizanga kuvwisa Yehova kuwaha. Chipwe ngwe Ndawichi kapwile ni zango hali Yehova ni kumuvwila woma, nihindu yalinga shili yinene. Yapihisa lufuma wa jina lia Yehova ni kuneha lamba linji mu usoko wenyi ni hali atu akwo.—2 Samue. 11:1-5, 14-17; 12:7-12.

13. Kuchi tunanyingika ngwetu, Yehova kakwashile Ndawichi hanga apwe nawa ni mbunge yimuwika?

¹³ Yehova yafumba Ndawichi, hachino, Ndawichi yafuna nawa mu jila yalita. (2 Samue. 12:13; Samu 51:2-4, 17) Hakupalika cha matangwa, Ndawichi yewuluka lamba lieswe lize apwile nalio hakupwa ni mbunge jaali. Kashika echile kuli Yehova mu mukanda wa Samu 86:11, ngwenyi: “Mbunge yami yipwe yimuwika.” Shina Yehova kakwashile cheka Ndawichi hanga apwe ni mbunge yimuwika? Ewa, kamukwashile. Tunachinyingika mumu Mbimbiliya yinambe hali Ndawichi ngwo, lunga yoze wapwile ni ‘mbunge yingunu kumeso ja Yehova, Zambi yenyi.’—1 Mia. 11:4; 15:3.

14. Yika twatamba kulihula, nawa mumu liaka?

¹⁴ Chilweza cha Ndawichi chakututakamisa, kashika, twatamba kulilongesa yuma yinji ha chilweza chenyi. Shili yinene yize Ndawichi alingile yili utowezo unene kuli yetu. Chipwe ngwe tunalingila Yehova ha miaka yiji, nihindu twatamba kulihula ngwetu: ‘Shina  nakwehuka miheto yize Satana akuta hanga ahandunune mbunge yami?’

15. Kuchi kuvwila woma Zambi muchitufunga muze mukusoloka yizulie ya sonyi?

¹⁵ Chakutalilaho, yika wakulinga muze wakumona chizulie cha sonyi ha TV hanji ha Internet? Atu amwe kakwamba ngwo: ‘Yizulie yacho hi pornografia ko.’ Alioze nyingika ngwe, Satana mahasa kukusolwela yizulie yacho hanga ahandune mbunge ye. (2 Kori. 2:11) Tuchinyongenu ha chilweza chino, yizulie ya sonyi muyihasa kupwa ngwe njimbu yize akupula nayo lukunyi. Muze akuyihata ha chisuho chimuwika, lukunyi keshi kupulika. Alioze, muze manunga ni kuhata yisuho yinji, lukunyi kakupulika. Chenacho yizulie ya sonyi yakulinga mu mbunge yetu. Yizulie yacho muyihasa kusoloka ngwe hi yipi ko, alioze, hakehe-hakehe yizulie yacho muyihasa kuhandununa mbunge yetu ni kututwala hanga tulinge shili ni kupihisa usepa wetu ni Yehova. Kashika, twatamba kwehuka usolo upi! Pwako ni mbunge yimuwika hanga uvwile jina lia Yehova woma.

16. Yihula yika twatamba kulihula muze mutupalika mu cheseko?

¹⁶ Satana nawa kakutweseka mu majila anji alisa, hi wika ko ni yizulie ya sonyi. Yika twakunyonga muze twakupalika mu yeseko yacho? Amwe kakwamba ngwo: ‘Nyi nalinga yuma yacho kechi kungusosolola mu chikungulwila, kashika, chatambile kulipikala chinji.’ Alioze hi chipema ko kwamba yuma ya mutapu au. Kashika, chili chilemu kulihula ngwetu: ‘Hi Satana ko unangweseka hanga ahandunune mbunge yami? Kuchi mwono wami muupwa nyi nakaula usolo upi? Shina mungupihisa lufuma wa jina lia Yehova? Yitanga yami muyinguhandununa nyi muyingukundamisa kuli Zambi?’ Pukuna ha yihula yino.  Lemba hanga wite mana mba ukumbulule yihula yino ni kulikehesa cheswe. (Tia. 1:5) Kulinga chino, muchihasa kutufunga ni kupwa ni tachi ja kwehuka yeseko, ngwe chize Yesu alingile, hakwamba ngwenyi: “Katuka Satana!”—Mateu 4:10.

17. Mumu liaka mbunge jaali kujishi ni ulemu? Hana chilweza.

¹⁷ Hi chipema ko kupwa ni mbunge jaali. Achinyonga ha chimwe chizavu cha akwa kwasa konda waze keshi kulivwashana. Amwe a kuli ayo kanazange kupwa ni lufuma ukawo, akwo kanazange kulinga yuma chamulingila, eka keshi kuvumbika kasongo wo. Shina chizavu chacho muchihasa kukumba? Katamba kulivwashana mba akumbe. Ni mbunge yetu neyo che yapwa. Nyi manyonga jetu, usolo wetu ni yize twakuzanga kulinga ku mwono wetu muyilita ni upale wa Yehova, mutuhasa kukumba. Kanda uvulama ngwe: Satana kanazange chinji kuhandununa mbunge yetu. Satana kanazange hanga twehuke shimbi ja Yehova. Alioze, mba tulingile Yehova, twatamba kulihana ni mbunge yeswe. (Mateu 22:36-38) Kashika, kanda wecha hanga Satana ahandune mbunge ye!

18. Kulita ni maliji ali ha Mika 4:5, nyonga lika twatamba kupwa nalio?

¹⁸ Lemba kuli Yehova hanga wite ngwe chize Ndawichi echile ngwenyi: “Mbunge yami yipwe yimuwika yakuvwila woma jina lie.” Sako tachi hanga utwame kulita ni kulemba chino. Ha chiyulo cheswacho mukwata, chinene hanji chikehe, solola ngwe wakuvumbika jina lisandu lia Yehova, hachino, mupwa Chela cha Yehova mungunu, yoze wakuhalisa jina lino. (Yishi. 27:11) Yetu eswe, mutuhasa kwamba ngwe chize ambile profeta Mika ngwenyi: “Yetu mutwenda mu jina lia Yehova Zambi yetu ku miaka yeswe ya mutololo.”— Mika 4:5.