1. Pathian ṭih timi cu zeidah a si, Jehovah a dawmi hna caah mah cu zeicah a herh?

KHRIHFA hna nih Pathian kha an dawt i a ṭih zong an ṭih. Thil cheukhat ahcun mah cu aa ralkahmi a lo men lai. Asinain ṭihphannak aan ngeihtermi ṭihnak phun kha kan chim duhmi a si lo. Mah ṭihnak phun kha kan i ruah cang hna. Cu bantuk ṭihnak phun a ngeimi hna nih Pathian kha an ṭih i an upat tuk. Annih nih Pathian he an i pehtlaihnak rawh ding le vancung an Pa lunglawmhter lo ding kha an duh lo.—Salm 111:10; Ptb. 8:13.

2. Salm 86:11 i Siangpahrang David bia cungah i hngat in zei a kong pahnih dah kan i ruah hna lai?

² Salm 86:11 rel. * Mah bia hi na ruah ahcun zumhfekmi Siangpahrang David nih Pathian ṭih cu a biapi tukmi a si ti a hngalhthiamnak kong kha na hngalh khawh lai. Atu David thlacamnak kha zeitindah kan zulh khawh timi kong i ruah hna hmanh u sih. Pakhatnak ah Pathian min kan ṭih awk a sinak a ruang cheukhat kong kha kan i ruah hna lai. Pahnihnak ah nifatin kan nunnak ah Pathian min kan ṭihnak kan langhter khawh ning kong zong kan i ruah hna lai.

3. Moses kha Pathian min ṭih zungzal awkah zei hmuhtonnak nih dah a bawmh men lai?

³ Lungkua chung a um lio le a hmaika in Jehovah sunparnak a lanhmi a hmuh tikah Moses cu zeitindah a um lai ti kha ruathmanh. “Mah cu Jesuh Khrih vawleicung a rat hlanah zei bantuk minung hmanh nih an ton bal lomi khuaruahhar hmuhtonnak  a rak si men lai” tiah Insight on the Scriptures cauk nih a ti. Vancungmi pakhat nih a chimmi mah bia hi Moses nih a theih: “BAWIPA cu zaangfahnak le velngeihnak in a khatmi Pathian a si, amah cu fawite in a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si. A biakamnak kha mi thong tampi cungah a hmunhter i palhnak le ṭhatlonak le sualnak kha a ngaihthiam hna.” (Ex. 33:17-23; 34:5-7) Moses nih Jehovah min a hman tikah mah hmuhtonnak kong kha a ruah ko lai. Moses nih Pathian miphun a simi Israel mi hna sinah “a lianngan i ṭihnung a simi min” kong he aa tlaiin ralrin a pekmi hna cu khuaruahhar awk a si lo.—Deut. 28:58.

4. Jehovah kha ṭih deuh awkah zeinihdah a kan bawmh khawh?

⁴ Jehovah min kong kan ruah tikah Jehovah cu zei bantuk Pathian dah a si ti zong kha kan ruah a hau. Cun a ṭhawnnak, a fimnak, a dinnak le a dawtnak ti bantuk a sining kong zong kha kan ruah a hau. Mah ziaza hna ruahnak nih Pathian kha ṭih deuh awkah a kan forh khawh.—Salm 77:11-15.

5-6. (a) Pathian min sullam cu zeidah a si? (b) Exodus 3:13, 14 le Isaiah 64:8 ningin Jehovah nih aa tinhnak tlinter awkah zei lam hna dah a hman?

⁵ Pathian min sullam kong he aa tlaiin zeidah kan hngalh? Baibal lei mifim tampi nih Jehovah min cu “A Hung Siter” timi sullam a ngei kho men tiah an ruah. Mah a min sullam nih a duhnak tuah awkah Jehovah cu zei thil hmanh nih a kham kho lo i zei thil paoh a canter khawh ti kha a kan hngalhter. Zeitin in dah?

⁶ Jehovah nih aa tinhnak tlinter awkah zei thil paoh a canternak thawngin cutin a tuah. (Exodus 3:13, 14 rel.) Kan cauk hna nih Pathian i khuaruahhar a simi pumpak a sining kong hna kha ruah ṭhan lengmang awkah a kan forh. Jehovah nih a tling lomi minung kha amah a biami si awk le aa tinhnak tlinter awkah a herh ningin a hung siter khawh hna. (Isaiah 64:8 rel.) Mah lam hna hmangin Jehovah nih a duhnak kha a tlinter. Cucaah Pathian cu aa  tinhnak tlinter awkah zei thil hmanh nih a kham kho lo.—Isa. 46:10, 11.

7. Vancung kan Pa cungah kan i lawmhnak kha zeitindah kan ṭhanter khawh?

⁷ A tuahmi thil le a kan tuahpiakmi thil kong kan ruahnak thawngin vancung kan Pa cungah kan i lawmhnak kha kan ṭhanter khawh. Tahchunhnak ah, a sermi thil vialte kong kha kan ruah ahcun Jehovah nih a tuahmi thil kip cungah kan i lawm chinchin lai. (Salm 8:3, 4) Cun Jehovah nih hlawhtlinnak kan hmuh nakhnga a kan bawmh ning kong kha kan ruah ahcun a duhnak kha kan tuah khawh lai i amah kha kan upat chinchin lai. Cucaah Jehovah min cu kan ṭih taktak awk a si. Mah ah kan Pa cu zei bantuk Pahthian dah a si timi kong le a tuah cangmi thil le a tuah laimi thil kong vialte aa tel.—Salm 89:7, 8.

8. Deuteronomi 32:2, 3 ah Jehovah nih a min kong he aa tlaiin zeidah a chim?

⁸ Israel mi pawl Biakammi Ram an luh hlanah Jehovah nih Moses kha hla fungkhat ṭial dingin a fial. (Deut. 31:19) Cun mi pawl sinah mah hla kha cawnpiak ding zongin a fial. Deuteronomi 32:2, 3 kan ruah tikah Jehovah nih a min thuh a duh lo ti le a min cu kan kaa in chim awkah a thiang tuk tiin ruahter a kan duh lo ti kha fiang tein kan hngalh khawh. [Rel.] Sermi thil vialte nih a min kha hngal hna seh ti a duh. Jehovah kong le a sunglawimi a min kong he aa tlaiin Moses chimmi bia a theimi, Israel mi hna caah mah cu zeitlukin dah tinvo sung a si. Thinghnah cungah a tlami ruah ti bantukin Moses chimmi bia cu zeitlukin dah thazaang petu le hnemtu a si lai. Cu bantuk lam in midang kha zeitindah kan cawnpiak khawh hna?

9. Jehovah min thianter awkah zeitindah kan bawmh khawh?

⁹ Innkhat hnu innkhat asiloah zapi lak phungchimnak kan i tel tikah Pathian i pumpak a min cu Jehovah a si ti kha Baibal hmangin kan hmuhsak khawh hna. Cun Jehovah thang a ṭhattermi a ṭha tukmi kan cauk, video le kan website hna zong kha kan hmuhsak khawh hna. Rianṭuannak, sianginn le khualtlawnnak ah kan dawtmi kan Pathian cu zei bantuk Pathian dah a si timi kong chim awkah caanṭha kan hmu men lai. Jehovah nih kan caah a tuah dingmi le vawlei caah a tuah dingmi a ṭha tukmi thil kong kha kan chimh hna. Mah cu Jehovah nih zeitlukin dah a kan dawt ti an hngalh hmasa bikmi a si men lai. Midang sinah dawtnak a ngeimi kan Pa kong biatak kan chimmi cu Jehovah min a thian nakhnga kan bawmhmi a si. Cun Jehovah kong he aa tlaiin lih in an cawnpiakmi hna kha an hngalhthiam nakhnga mi pawl kha kan bawmh hna. Baibal kong biatak kan cawnpiakmi hna cu an caah hrimhnak petu le a ṭha bikmi a si.—Isa. 65:13, 14.

10. Baibal cawnpiaknak kan tuah tikah Pathian nih a kan halmi le a phunglam kong kha zeicah tam deuh in kan cawnpiak hna awk a si?

¹⁰ Baibal cawnpiaknak kan tuah lioah Baibal kan cawnpiakmi hna nih Jehovah kha hngalh in a min an hman nakhnga bawmh kan duh hna. Mah lengah Jehovah kong tam deuh in an hngalh nakhnga zong bawmh kan duh hna. Pathian lamhruainak, a phunglam le a uk ning kong kha a sawhsawh tein kan cawnpiak hna ahcun hlawhtlinnak kan hmu lai maw? A ṭhangchomi Baibal cawnpiaknak nih cun Pathian nawlbia kong kha a duh lengah a cawn zong a cawn men lai. Asinain Baibal a cawngmi nih Jehovah a dawt caah a nawl a ngaihmi a si maw? Evi nih Pathian nawlbia kha a hngalh ko nain Pathian cu a daw taktak lo ti kha philhhlah. Adam zong cutin a si ve. (Gen. 3:1-6) Cucaah midang sinah Pathian nih a kan halmi le a phunglam kong kha tam deuh in kan cawnpiak hna awk a si.

11. Pathian nawlbia le phunglam kong kan cawnpiak hna tikah Baibal kan cawnpiakmi hna nih nawlbia a kan Petu an dawt deuh nakhnga zeitindah kan bawmh khawh hna lai?

 ¹¹ Jehovah nih a kan halmi le a phunglam cu kan caah a ṭha zungzal. (Salm 119:97, 111, 112) Asinain Jehovah nih a kan dawt caah mah nawlbia hna hi a sermi a si ti kha Baibal kan cawnpiakmi hna nih an hngalthiam men lai lo. Cucaah Baibal kan cawnpiakmi hna kha hitin kan hal khawh hna: “Pathian nih a salle kha cutin tuah awk asiloah tuah lo awk tiin zeicah a hal hna tiah na ruah? Mah nih Pathian kha mi pakhat in a kong zeidah a kan chimh?” Baibal kan cawnpiakmi hna kha Jehovah kong ruah awk le a sunglawimi a min sunsak deuh awkah kan bawmh hna ahcun an lungthin kan lak khawh deuh hna lai. Baibal kan cawnpiakmi hna nih nawlbia lawng si loin nawlbia a kan Petu zong kha an hun dawt lai. (Salm 119:68) Cun a harmi hneksaknak an ton tikah an zumhnak a fek lai i inkhawhnak ngeih awkah a bawmh hna lai.—1 Kor. 3:12-15.

12. David nih zeitindah a lungthin kha a rak funtom lo, a phichuak cu zeidah a si?

¹² Salm 86:11 ah Siangpahrang David nih a ṭialmi “ka lungthin kha ka funtompiak ko” timi bia cu a biapi tukmi a si. A nunchung ah lungthin ṭhencheuter cu zeitlukin dah a fawi ti kha David nih a hngalh. Voikhat cu a inncung in midang nupi ti aa kholh lio kha a hmuh. Mah lioah David nih a lungthin kha a funtom maw asiloah a ṭhencheu dah? David nih ‘na innpa nupi kha na mit thi hlah’ timi Jehovah phunglam kha a hngalh. (Ex. 20:17) Asinain a rak zoh peng. Bath-sheba a duhnak le Jehovah lunglawmhter a duhnak karah a lungthin cu aa ṭhen cheu. David cu caan saupi chung Jehovah a dawmi le a ṭihmi a si ko nain a lung duhnak kha a rak zulh. Cucaah David nih a ṭhalo tukmi thil a rak tuah i Jehovah min kha a rak thangchiat. Cun David nih a chungkharmi i telin sualnak a ngei lomi mi tampi kha harnak a rak tonter hna.—2 Sam. 11:1-5, 14-17; 12:7-12.

13. David lungthin cu aa funtom ṭhan ti kha zeitindah kan hngalh?

¹³ Jehovah nih David kha a rak chimhhrinh caah amah he a ṭhami pehtlaihnak a rak ngei ṭhan. (2 Sam. 12:13; Salm 51:2-4, 17) David nih a lungthin a ṭhencheuter ruangah harnak le ngaihchiatnak a tonmi kha aa cinken ko lai. Salm 86:11 ah David nih ‘aa ṭhencheu lomi lungthin ka pe ko’ tiah a ti. Jehovah nih David kha lungthin dihlak asiloah aa ṭhencheu lomi lungthin ngeih awkah a bawm maw? A rak bawmh. Baibal ah David “a lung cu . . . a dih  umnak in a Pathian BAWIPA sinah khan a hmun” tiah a ti caah a si.—1 Siang. 11:4; 15:3.

14. Kanmah le kanmah zei bia dah kan i hal awk a si, zeicah?

¹⁴ David nunning cu kan caah thazaang petu le ralrin petu a si. Sualnak nganpi a tuahmi cu tuchan Pathian salle caah ralrin petu a si. Jehovah kan biaknak cu caan tawite asiloah caan saupi a si cang hmanhah kanmah le kanmah hitin kan i hal a hau: ‘Satan nih ka lungthin ṭhencheu dingin a ka lemmi kha ka al maw?’

15. Nupa sual duhnak a kan ngeihter khomi hmanthlak kan hmuh tikah Pathian ṭihnak nih zeitindah a kan kilven khawh?

¹⁵ Tahchunhnak ah, TV asiloah Internet ah nupa sual duhnak a ngeihter khomi hmanthlak kan hmuh ahcun zeitindah kan lehrulh awk a si? Mah hmanthlak asiloah video tham cu a thurhnawm taktakmi a si ṭung lo tiah na ruah men lai. Asinain mah cu Satan nih na lungthin ṭhencheuter awkah a hmanmi thil cheukhat a si kho. (2 Kor. 2:11) Mah hmanthlak cu mi nih thingtum cheunak ah an hmanmi khenhfial bantuk a si kho. A hmasa ahcun a fate in a khenh i thing nganpi cu a henh. Cun ngan deuh in a khenh i a henh tikah thing nganpi cu aa cheu. Nupa sual duhnak a ngeihter khomi hmanthlak cu khenhfial bantuk a si kho maw? Zohnak in ṭih a nung lo tiah kan ruahmi thil nih mi pakhat kha Jehovah a ralchanhter khomi sualnak a tuahter khawh. Cucaah na lungthin ah a ṭha lomi ruahnak aan ngeihter khomi thil paoh kha hrial. Cun Jehovah min ṭih awkah na lungthin kha funtom zungzal.

16. Thil ṭhalo tuah dingin lem kan si tikah kanmah le kanmah zei bia dah kan i hal awk a si?

¹⁶ Nupa sual duhnak a ngeihter khomi hmanthlak lengah Satan nih a dang thil hna hmangin thilṭhalo kan tuah nakhnga a kan lem. Zeitindah kan lehrulh awk a si? Mah cu a poi tukmi a si lo tiah ruah cu a fawi tukmi a si. Tahchunhnak ah, hitin kan ruah men lai: ‘Cutin ka  tuah ruangah bu chungin cun chuah ka si lai lo, cucaah mah cu a poi tukmi a si lo.’ Cu bantuk ruahnak cu a ṭha lo tukmi a si. Kanmah le kanmah hitin i hal cu a ṭha deuhmi a si: ‘Satan nih mah lemnak hna kha hmangin ka lungthin ṭhencheu awkah aa zuam maw? A ṭha lomi duhnak ka ngeih ahcun mah nih Jehovah min a thangchiatter lai maw? Mah tuahsernak nih Pathian he a ka naihter maw asiloah a ka hlatter dah?’ Mah bantuk biahalnak hna kha ṭha tein kan ruah a hau. Fimnak ngeih awkah thla kan cam ahcun Pathian nih a kan leh ko lai. (Jeim 1:5) Cutin tuahnak cu kan caah kilvengtu taktak a si kho. Mah nih lemnak al awkah a kan bawmh lai i Jesuh nih “Satan, va kal cang” tiah a ti bantukin kan chim khawh ve lai.—Matt. 4:10.

17. Lungthin ṭhencheu cu zeicah a ṭhat lo? Tahchunhnak pe.

¹⁷ Lungthin ṭhencheu cu a ṭha lomi a si. Zaanglente celhnak phu pakhat ah aa telmi hna cu pakhat le pakhat an lung aa rual lo tiah na mitthlam ah cuanter hmanh. Cheukhat nih anmah min ṭhat lawng kha an duh, mi cheukhat nih cun phunglam ningin lentecelh kha an duh lo i cheukhat nih cun an cawnpiaktu kha an upat lo. Cutin a tuahmi phu pakhat nih cun teinak a hmu lai lo. Mah he i ralkah in phu pakhat nih lungrual tein lente aa celh ahcun hlawhtlinnak a hmu deuh lai. Na ruahnak, na duhnak le na intuarnak hna kha Jehovah rianṭuannak ah na hman dih ahcun na lungthin cu hlawhtlinnak a hmumi mah phu bantukin a si kho lai. Satan nih na lungthin ṭhencheuter a duh ti kha philh hlah. Satan nih na ruahnak, na duhnak le na intuarnak cu Jehovah phunglam he i ralkah sehlaw i do seh ti a duh. Asinain Jehovah rian kha na lungthin dihlak in na ṭuan a hau. (Matt. 22:36-38) Satan kha zeitikhmanh ah na lungthin ṭhencheuter hlah.

18. Mikah 4:5 ningin zei tuah dingin dah biakhiahnak na tuah?

¹⁸ “Na min ṭih awkah ka lungthin kha ka funtompiak ko” tiah thla a cammi David bantukin Jehovah sinah thlacam ve. Na thlacammi ningin na nunnak ah na zul kho dih lai maw? Nifate na biakhiahnak ah a hme in a ngan tiang a thiangmi Jehovah min na upatnak langhter awkah biakhiak. Cutin na tuah ahcun Jehovah Tehte pakhat in a min a thianter khomi na si lai. (Ptb. 27:11) Cun kan dihlak in profet Mikah bantukin “kannih cu BAWIPA kan Pathian min in a zungzal in kan kal lai” tiah kan chim khawh ve lai.—Mik. 4:5.