1. Ki savedir annan en gran respe pour Bondye e akoz sa i enportan pour bann ki kontan Zeova?

BANN Kretyen i kontan Bondye e zot annan en gran respe pour li. Dan sa lartik, nou pou vwar akoz i enportan pour annan en gran respe pour Bondye. Me ki savedir annan en gran respe pour Bondye? Annan en gran respe pour Bondye pa vedir ki nou per li. Bann dimoun ki annan respe pour Bondye pa anvi fer okenn keksoz ki pa fer plezir nou Papa ki dan lesyel akoz zot pa anvi gat zot lanmitye avek li.​—Ps. 111:10, NWT; Prov. 8:13.

2. Dapre Psonm 86:11, ki sa de keksoz ki nou pou diskite?

² Lir Psonm 86:11, NWT. * Anmezir ki ou reflesir lo sa bann parol, ou kapab vwar ki Lerwa David ti konnen ki degre i enportan pour annan en gran respe pour Zeova. Aprezan, nou pou diskit lo ki mannyer nou kapab aplik sa ki David ti dir dan son lapriyer. Premyerman, nou pou diskit lo serten rezon akoz nou devret annan en gran respe pour non Bondye. Apre, nou pou diskit lo ki mannyer nou kapab montre ki nou annan gran respe pour non Bondye dan nou lavi toulezour.

3. Ki leksperyans ki petet ti ed Moiz pour annan en gran respe pour non Bondye?

³ Mazin lo ki mannyer Moiz ti santi ler i ti dan en trou ros e ti vwar en vizyon laglwar Zeova pe pase. Insight on the  Scriptures i dir ki “i tre probab ki avan Zezi i vin lo later, sa ti sa leksperyans pli ekstraordiner ki okenn imen in deza pas ladan.” Moiz ti tann sa bann parol swivan e i tre probab ki sa ti ganny dir par en lanz: “Zeova, Zeova, en Bondye ki annan pitye ek konpasyon, ki pa ankoler vitman e ki annan en kantite lanmour fidel e ki toultan koz laverite. I pe demontre lanmour fidel pour plizyer milye, pardonn fot, lofans ek pese.” (Egz. 33:17-23; 34:5-7, NWT) I kapab ki Moiz ti mazin lo sa leksperyans ler i ti servi non Zeova. Alor, nou pa sirprann ki pli tar Moiz ti averti bann Izraelit pour annan en “gran respe pour non glorye e merveye Zeova, ou Bondye.”​—Det. 28:58, NWT.

4. Kwa ki kapab ed nou pour annan plis respe pour Zeova?

⁴ Ler nou mazin lo sa non Zeova, nou devret osi mazin lo ki mannyer Zeova i vreman ete. Nou devret reflesir lo son bann kalite, tel parey son pwisans, lasazes, lazistis ek son lanmour. Ler nou reflesir lo sa bann kalite e lo lezot ankor, sa i kapab pous nou pour annan plis respe pour li.​—Ps. 77:11-15.

5-6. (a) Ki non Bondye i vedir? (b) Dapre Egzod 3:13, 14 ek Izai 64:8, dan ki fason Zeova i fer keksoz arive?

⁵ Ki nou konnen konsernan sinifikasyon non Bondye? Bann spesyalis Labib i dir ki i kapab ki non Zeova i vedir “I fer arive.” Sa i fer nou mazinen ki napa nanryen ki kapab anpes Zeova fer sa ki i anvi fer e i kapab fer keksoz arive. Ki mannyer sa?

⁶ Zeova i fer keksoz arive par vin nenport kwa ki neseser pour akonpli son plan. (Lir Egzod 3:13, 14, NWT.) * Souvan nou ganny ankouraze pour reflesir lo sa laspe vreman enportan dan personnalite Bondye. Zeova i osi kapab fer son  bann serviter enparfe, vin sa ki neseser pour servi li e akonpli son plan. (Lir Izai 64:8.) Dan sa fason, Zeova i fer son lavolonte ganny akonplir e i napa nanryen ki kapab anpes li fer sa.​—Iza. 46:10, 11.

7. Ki mannyer nou kapab devlop lapresyasyon pour nou Papa ki dan lesyel?

⁷ Nou kapab devlop lapresyasyon pour nou Papa ki dan lesyel ler nou medit lo sa ki i’n fer e sa ki i’n ed nou fer. Par egzanp, ler nou medit lo bann mervey dan kreasyon, nou enpresyonnen par tou sa ki Zeova in fer. (Ps. 8:3, 4) Osi, ler nou medit lo sa ki Zeova in ed nou fer pour akonpli son lavolonte, nou devlop en gran respe pour li. Non Zeova i vreman merveye! I enkli tou sa ki nou Papa i ete, tou sa ki i’n fer e tou sa ki i pou fer.​—Ps. 89:7, 8.

8. Dapre Deterononm 32:2, 3, ki Zeova i anvi son bann serviter i fer avek son non?

⁸ Zis avan bann Izraelit ti antre dan Later Promiz, Zeova ti ansenny Moiz bann parol en kantik. (Det. 31:19) An retour, Moiz ti pou bezwen montre sa pep sa kantik. (Lir Deterononm 32:2, 3.) * Anmezir nou reflesir lo verse 2 ek 3, i kler ki Zeova pa anvi ki son non i ganny kasyet, konmsi i tro sakre pour ganny servi. I anvi ki tou dimoun i konn son non! I ti en gran privilez pour sa pep ekout Moiz ler i ti ansenny zot lo Zeova ek Son non glorye. Sa ki Moiz ti ansenny zot ti ranforsi zot lafwa e ankouraz zot, zis parey en pti grenas lapli lo vezetasyon. Ki mannyer nou kapab fer sir ki nou fason ansennyen i parey?

9. Ki mannyer nou kapab ede sanktifye non Zeova?

⁹ Ler nou pe anons sa bon nouvel kazankaz oubyen an piblik, nou kapab servi Labib pour montre dimoun non Bondye, Zeova. Nou kapab montre zot bann piblikasyon, bann zoli video ek lezot keksoz lo nou sit Enternet ki onor Zeova. Ler nou dan travay, kot lekol e pe vwayaze, nou kapab rod bann loportinite pour koz lo nou Bondye e lafason i ete. Nou kapab dir zot konsernan bann keksoz merveye ki Zeova pou fer pour nou e pour later. Ler zot tann sa, sa i kapab fer zot realize pour premye fwa ki kantite Zeova i kontan nou. Ler nou dir lezot laverite lo nou Papa ki kontan nou, nou pe ede sanktifye non Zeova. Nou ed dimoun konpran ki zot in ganny ansennyen bann mansonz lo Bondye. Sa ki nou ansenny dimoun sorti dan Labib i sa pli bon keksoz ki zot kapab aprann parski i soulaz e ankouraz zot.​—Iza. 65:13, 14.

10. Ler nou fer letid Labib, akoz nou bezwen fer plis ki ansenny dimoun bann standar drwat Bondye?

¹⁰ Ler nou etidye Labib avek en dimoun, nou anvi ed sa etidyan pour aprann e servi non Zeova. Nou osi anvi ed zot pour konn Zeova byen. Eski nou pou kapab fer sa, si nou zis ansenny zot konsernan bann lenstriksyon, standar Zeova ek lafason ki Zeova i anvi nou viv? En bon etidyan i kapab aprann pour annan respe e kontan bann lalwa Bondye. Me eski sa etidyan pou obei Zeova akoz i kontan li? Rapel ki Adan ek Ev osi ti konn lalwa Bondye me zot pa ti vreman kontan sa Enn ki’n fer sa bann lalwa. (Zen. 3:1-6) Alor, nou bezwen fer plis ki ansenny dimoun bann standar drwat Bondye.

11. Ler nou pe ansenny en etidyan bann lalwa ek standar Bondye, ki mannyer nou kapab ed sa etidyan pour kontan sa Enn ki’n donn sa bann lalwa?

 ¹¹ Bann standar drwat Zeova i toultan bon pour nou. (Ps. 119:97, 111, 112, NWT) Me i kapab ki sa etidyan pa vwar sa, si zot pa konpran ki Zeova in fer sa bann lalwa akoz i kontan nou. Alor, nou kapab demann sa etidyan: “Dapre ou, akoz Bondye i demann son bann serviter pour fer ouswa pa fer sa keksoz? Ki sa i montre nou lo Zeova?” Si nou ed sa etidyan pour reflesir lo bann kalite ki Zeova i annan e pour devlop en vre lanmour pour son non glorye, i tre probab ki nou pou reisi tous son leker. Nou etidyan pa pou zis kontan bann lalwa me i pou osi kontan sa Enn ki’n donn sa bann lalwa. (Ps. 119:68) Zot lafwa pou ogmante e zot pou kapab fer fas avek bann difikilte a lavenir.​—1 Kor. 3:12-15.

12. Ki mannyer David pa ti reisi reste konsantre lo fer plezir Zeova e ki ti arive apre?

¹² Lerwa David ti ganny enspire pour ekri en keksoz enportan dan Psonm 86:11. I ti dir: “Ed mwan pour annan en gran respe pour ou non avek tou mon leker.” Dan son lavi, David i ti vwar ki mannyer i kapab fasil pour nou pa reste konsantre lo fer sa ki byen. En fwa, i ti lo twa son lakaz e i ti vwar madanm en lot zonm pe bennyen. Dan sa moman, eski David ti pe reste konsantre lo fer plezir Zeova? I ti konn standar Zeova konmkwa: “Ou pa devret anvi madanm ou prosen.” (Egz. 20:17, NWT) Kantmenm sa, i ti kontinyen get sa madanm pe bennyen. David pa ti pe konsantre lo fer plezir Zeova. Dan son leker, i ti anvi fer plezir Zeova me i ti osi anvi Bat-Seba. Menm si David in toultan kontan e annan en gran respe pour Zeova, i ti les son move dezir kontrol li. Sa ti fer li fer serten move keksoz. I ti sali non Zeova. Son aksyon ti fer ki bokou dimoun ti soufer, enkli son prop fanmir.​—2 Sam. 11:1-5, 14-17; 12:7-12.

13. Ki mannyer nou konnen ki David ti rekonmans servi Zeova avek tou son leker?

¹³ Zeova ti disiplin David e David ti reganny son bon lanmitye avek Zeova. (2 Sam. 12:13; Ps. 51:2-4, 17) David ti mazin bann soufrans ek problenm ki son move desizyon ti anmennen. Son parol dan Psonm 86:11, i osi kapab ganny tradwir konman: “Donn mwan en leker ki zis pour ou tousel.” Eski Zeova ti ed David? Wi, parski pli tar Zeova ti dir ki David i en zonm ki “son leker . . . ti antyerman pour [Zeova] son Bondye.”​—1 Rwa. 11:4; 15:3.

14. Ki nou bezwen demann nou lekor e akoz?

 ¹⁴ Legzanp David i ankourazan me i osi en lavertisman pour nou. Lafason ki i ti komet en pese grav, i vin en lavertisman pour bann serviter Zeova ozordi. Ki swa nou fek konmans servi Zeova oubyen nou pe fer li pour plizyer lannen, nou devret demann nou lekor, ‘Eski mon pe les Satan anpes mwan konsantre lo fer plezir Zeova?’

15. Ki mannyer respe pour Bondye i kapab protez nou ler nou vwar bann portre oubyen film ki annan pour fer avek sèks?

¹⁵ Meton ou vwar en portre lo televizyon oubyen lo Enternet ki fer ou annan bann panse imoral, ki ou pou fer? Petet i pou fasil pour ou mazinen ki sa portre oubyen film pa pornografi. Me eski sa i kapab en keksoz ki Satan pe servi pour fer ou pa konsantre lo fer plezir Zeova? (2 Kor. 2:11) Sa portre i kapab parey en lars ki en zonm i servi pour fann en gro dibwa. Premyerman, i anfons lapwent sa lars dan sa dibwa. Anmezir i pous sa lars pli dan fon, sa dibwa i fann an de. Eski sa portre oubyen film ki annan pour fer avek sèks i kapab parey lapwent sa lars? Sa bann keksoz i kapab paret pa danzere, me avek letan i kapab fer en dimoun aret servi Zeova avek tou son leker e i fer pese kont Zeova. Alor pa les nanryen ki pa apropriye antre dan ou leker! Kontinyen servi Zeova avek tou ou leker e annan gran respe pour son non!

16. Ler nou ganny tante pour fer en keksoz mal, ki kestyon nou devret demann nou lekor?

¹⁶ Satan pa zis servi bann portre ki annan pour fer avek sèks pour tant nou me i osi servi lezot keksoz. Ki mannyer nou reazir? I fasil pour mazinen ki napa nanryen mal avek sa bann keksoz. Par egzanp, nou kapab mazinen: ‘Mon pa pou ganny  ekskli si mon fer sa, alor i pa sitan grav.’ I vreman mal pour mazin koumsa. I byen pour demann nou lekor sa bann kestyon swivan: ‘Eski Satan pe esey servi sa keksoz konman en tantasyon pour fer mwan pa servi Zeova avek tou mon leker? Si mon les move dezir kontrol mwan, eski mon pou sali non Zeova? Eski sa pou fer mwan vin pli pros avek Zeova oubyen eski i pou elwanny mwan avek li?’ Reflesir lo sa bann kestyon. Demann Zeova lasazes pour ou kapab reponn sa bann kestyon onnetman. (Zak 1:5) Si ou fer sa, ou pou ganny proteze. I kapab ed ou rezet tantasyon parey Zezi, ler i ti dir: “Sorti la ale Satan!”​—Mat. 4:10.

17. Akoz nou bezwen servi Zeova avek tou nou leker? Donn en legzanp.

¹⁷ Nou bezwen servi Zeova avek tou nou leker. Meton dan en lekip sport, bann zwer pa byen avek kanmarad. Serten zwer i anvi ganny laglwar, i annan ki pa oule zwe dapre lareg e lezot napa respe pour zot lantrener. I tre probab ki sa kalite lekip pa pou ranport laviktwar. De lot kote, i pou pli fasil pour en lekip ki ini fer plis sikse. Ou leker i kapab parey sa lekip ki fer sikse si ou servi Zeova avek tou ou panse, tou ou dezir ek tou ou santiman. Rapel ki Satan pa anvi ki ou servi Zeova avek tou ou leker. I anvi ki ou bann panse, dezir ek santiman pa annakor avek sa ki fer plezir Zeova. Par kont ou, ou bezwen servi Zeova avek tou ou leker. (Mat. 22:36-38) Pa zanmen les Satan anpes ou fer sa!

18. Dapre Mika 4:5, ki ou determinen pour fer?

¹⁸ Parey David, demann Zeova: “Fer mwan annan gran respe pour ou non avek tou mon leker.” Fer tou sa ki ou kapab pour ou viv an armoni avek sa lapriyer. Sak zour, fer sir ki tou ou bann desizyon, ki swa pti oubyen gran, i montre ki ou annan gran respe pour non Zeova ki sen. Konman en Temwen Zeova, ler ou fer sa ou pou anmenn loner lo non Zeova. (Prov. 27:11, NWT) Parey profet Mika, nou tou nou pou kapab dir: “Nou pou mars o non nou Bondye Zeova pour touzour.”​—Mik. 4:5, NWT.