1. ¿Chuqui jiñi bʌcʼñʌntel Dios, i chucoch ñuc i cʼʌjñibal chaʼan miʼ pʌsob jiñi muʼ bʌ i cʼuxbiñob Jehová?

JIÑI xñoptʼañonbʌla mi laj cʼuxbin Dios, pero cheʼ jaʼel mi lac bʌcʼñan. Tajol an muʼ bʌ i yʌlob chaʼan ili chaʼchajp miʼ jatsʼ i bʌ. Pero maʼañic woli (choncol) la cʌl chaʼan tsiltsiñayonla ti bʌqʼuen. Mi lac bʌcʼñan Dios cheʼ tiʼ sujm mi laj qʼuel ti ñuc. I mach la comic lac mel (chaʼlen) maʼañic bʌ miʼ mulan jiñi lac Tat am bʌ ti panchan come la com chaʼan bej la camigo (Sal. 111:10; Pr. 8:13). Laʼ lac tsajin chaʼan jiñi bʌqʼuen.

2. ¿Chuqui chaʼchajp miʼ taj ti tʼan Salmo 86:11 (TNM) mi caj laj qʼuel ti ili estudio?

² (Pejcan Salmo 86:11, TNM). * Cheʼ mi lac ñaʼtan ili tʼan tac, mi laj qʼuel chaʼan jiñi rey David tsiʼ chʼʌmbe i sujm chucoch ñuc i cʼʌjñibal i bʌcʼñʌntel Dios. Laʼ laj qʼuel bajcheʼ miʼ mejlel lac mel jiñi tsaʼ bʌ i yʌlʌ. Ñaxan, mi caj lac tsʼitaʼ taj tiʼ tʼan chucoch yom mi lac wen qʼuel ti ñuc jiñi i cʼabaʼ Dios. Ti wiʼil, mi caj la cʌl bajcheʼ miʼ mejlel lac pʌs ti laj cuxtʌlel chaʼan mi laj qʼuel ti ñuc.

3. ¿Chuqui tajol tsiʼ colta jiñi Moisés chaʼan ti bele ora miʼ qʼuel ti ñuc i cʼabaʼ Dios?

³ Laʼcu lac ñaʼtan bajcheʼ tsiʼ yubi i bʌ Moisés cheʼ bʌ yaʼan tiʼ jajp xajlel yaʼ ti Horeb i tsiʼ qʼuele cheʼ tsaʼ ñumi jiñi i ñuclel  Jehová tiʼ tʼejl. Jiñi Perspicacia para comprender las Escrituras miʼ tsictesan «chaʼan maʼañic yambʌ wiñic tsaʼ bʌ i qʼuele ñumen ñuc bʌ bajcheʼ jiñi cheʼ bʌ maxto tilemic Jesucristo». Moisés tsiʼ ñʌchʼta ili tʼan tac, tajol tsaʼ bʌ i yʌlʌ juntiquil ángel: «Joñon Yumʌloñʌch, a Yumon, a Dioson, cujil pʼuntaya, utson, jal mic michʼan, cabʌl mic pʼuntañob, xucʼulon» (Éx. 33:17-23; 34:5-7). Tajol Moisés miʼ cʼajtesan jiñi tsaʼ bʌ i qʼuele cheʼ bʌ miʼ cʼʌmben i cʼabaʼ Jehová. Jin chaʼan, tiʼ sube jiñi Israel, jiñi i tejclum Dios, chaʼan yom miʼ bʌcʼñañob «jini ñuc bʌ lac Yum Dios» [o «i cʼabaʼ lac Yum Dios», TNM] (Dt. 28:58).

4. ¿Baqui bʌ i melbal tac Jehová yom mi lac wen ñaʼtan chaʼan mi lac ñumen qʼuel ti ñuc?

⁴ Yom mi lac ñaʼtan bajcheʼ yilal Jehová cheʼ mi lac ñaʼtʌben i cʼabaʼ. Yom mi laj cʼajtesan jiñi i melbal tac, bajcheʼ jiñi i pʼʌtʌlel, i tojel yicʼot i cʼuxbiya. Mi caj lac wen qʼuel ti ñuc jiñi Jehová cheʼ mi lac ñaʼtan jiñi i melbal tac yicʼot yan tac bʌ (Sal. 77:11-15).

5, 6. a) ¿Chuqui yom i yʌl jiñi i cʼabaʼ Dios? b) Cheʼ bajcheʼ miʼ yʌl Éxodo 3:13; 3:14 (TNM) yicʼot Isaías 64:8, ¿bajcheʼ tac miʼ mel Jehová chaʼan miʼ yujtel jiñi ñaʼtʌbil bʌ i chaʼan?

⁵ ¿Chuqui la cujil chaʼan jiñi i cʼabaʼ Dios? Cabʌl wiñicob xʼixicob (quixtañujob) am bʌ i qʼueleyob jun miʼ yʌlob chaʼan jiñi i cʼabaʼ Jehová tajol yom i yʌl «jiñʌch miʼ mel chaʼan cheʼʌch miʼ sujtel». Ili miʼ cʼajtesʌbeñonla chaʼan maʼañic chuqui miʼ mejlel i mʌctan chaʼan miʼ tsʼʌctesan chuqui ñaʼtʌbil i chaʼan Jehová i miʼ mejlel i mel chaʼan cheʼʌch miʼ yujtel. ¿Bajcheʼ miʼ mel?

⁶ Junchajp jiñʌch cheʼ miʼ sujtesan i bʌ ti chuqui jach yom chaʼan miʼ tsʼʌctesan jiñi ñaʼtʌbil bʌ i chaʼan (pejcan Éxodo 3:13; 3:14, TNM). * Ti lac jun tac, ti bele ora mi lac subentel chaʼan yom mi lac ñaʼtan jiñi tiʼ tojlel Dios. Cheʼ jaʼel, Jehová miʼ mejlel i sujtesan ti chuqui jach yom jiñi i wiñicob xmuliloʼ bʌ  chaʼan miʼ melbeñob i yeʼtel (troñel) yicʼot miʼ tsʼʌctesañob jiñi ñaʼtʌbil bʌ i chaʼan (pejcan Isaías 64:8). Cheʼ bajcheʼ tac iliyi, Jehová miʼ mejlel i tsʼʌctesan chuqui yom. Maʼañic chuqui miʼ mejlel i mʌctan chaʼan miʼ yujtel pejtelel ñaʼtʌbil bʌ i chaʼan (Is. 46:10, 11).

7. ¿Chuqui mi caj i coltañonla chaʼan mi lac ñumen qʼuel ti ñuc jiñi lac Tat am bʌ ti panchan?

⁷ ¿Chuqui mi caj i coltañonla chaʼan mi lac ñumen qʼuel ti ñuc jiñi lac Tat am bʌ ti panchan? Jiñʌch cheʼ mi lac wen ñaʼtan chuqui an i mele yicʼot chuqui an i coltayonla lac mel. Jumpʼejl ejemplo, miʼ toj sajtel lac pusicʼal cheʼ mi lac wen ñaʼtan pejtelel chuqui an i mele (pʌtʌ) (Sal. 8:3, 4). I cheʼ mi lac ñaʼtan ti chuqui an i sujtesa i bʌ chaʼan miʼ tsʼʌctesan chuqui ñaʼtʌbil i chaʼan, miʼ cʼotel lac wen qʼuel ti ñuc jiñi Jehová. Wen utsʼatax i cʼabaʼ. Jiñʌch pejtelel bajcheʼ yilal Dios, pejtelel am bʌ i mele yicʼot pejtelel muʼ bʌ caj i mel (Sal. 89:7, 8).

8. Cheʼ bajcheʼ miʼ yʌl Deuteronomio 32:2, 3, ¿chuqui yom Jehová chaʼan mi lac mel yicʼot i cʼabaʼ?

⁸ Cheʼ bʌ lʌcʼʌlix yom chaʼan miʼ yochelob jiñi israelitajob yaʼ ti Lum tsaʼ bʌ wʌn subentiyob, Jehová tsiʼ cʌntesʌbe Moisés jumpʼejl cʼay, i tiʼ sube chaʼan miʼ cʌntesʌbeñob jaʼel jiñi tejclum (Dt. 31:19). Cheʼ mi lac wen ñaʼtan muʼ bʌ i tʼox al jiñi cʼay, tsiquil mi laj qʼuel chaʼan Jehová mach yom chaʼan mi lac mucben i cʼabaʼ yicʼot chaʼan yom mi laj cʼʌn anquese chʼujulʌch (pejcan Deuteronomio 32:2, 3). Yom chaʼan pejtelel quixtañujob miʼ cʌñob. Tiʼ sujm, wen ñuc tsiʼ qʼueleyob jiñi israelitajob cheʼ Moisés tsiʼ cʌntesayob majqui jiñi Jehová yicʼot jiñi i cʼabaʼ. Jiñi tsaʼ bʌ i cʌñʌyob tsiʼ coltayob yicʼot tsiʼ pʼʌtʼesayob lajal bajcheʼ jiñi jaʼal miʼ mul jiñi pimel tac. ¿Bajcheʼ miʼ mejlel lac ñaʼtan chaʼan jiñi laj cʌntesa wolʌch i coltan jiñi yambʌlob?

9. ¿Bajcheʼ mi la cʌcʼ laj coltaya chaʼan miʼ sʌqʼuesʌntel i cʼabaʼ Jehová?

⁹ Cheʼ mi lac chaʼlen subtʼan ti jujumpʼejl otot o yaʼ baqui an cabʌl quixtañujob, laʼ laj cʼʌn jiñi Biblia chaʼan mi laj cʌntesʌbeñob i cʼabaʼ Dios. Miʼ mejlel laj cʼʌn eʼtijibʌl tac muʼ bʌ i yʌqʼuen i ñuclel Jehová, bajcheʼ jiñi lac jun tac ñuc tac bʌ i cʼʌjñibal, wem bʌ video tac yicʼot jiñi lac página chaʼan Internet jw.org^®. Mi añonla ti la queʼtel, ti escuela o an baqui mi lac majlel, laʼ laj qʼuel bajcheʼ miʼ mejlel lac subeñob jiñi lac piʼʌlob chaʼan jiñi cʼuxbibil bʌ lac Tat yicʼot bajcheʼ yilal bʌ Dios. Laʼ lac subeñob chuqui ñaʼtʌbil i chaʼan Dios ti lac tojlel yicʼot chaʼan ili Pañimil. Cheʼ bʌ miʼ ñʌchʼtañob, tajol jiñi quixtañujob mi cajel i ñaʼtañob chaʼan Jehová miʼ wen cʼuxbiñonla. Cheʼ mi lac sub chaʼan jiñi i sujmlel chaʼan lac Tat, mi la cʌcʼ laj coltaya chaʼan miʼ sʌqʼuesʌntel i cʼabaʼ i mi lac pʌs chaʼan lot jach am bʌ i yʌlʌyob tiʼ tojlel. Miʼ wen coltan jiñi quixtañujob cheʼ mi laj cʌntesʌbeñob am bʌ ti Biblia (Is. 65:13, 14).

10. Cheʼ bʌ mi la cʌcʼ estudio, ¿chucoch mach cojach yom mi laj cʌntesan jiñi i mandar tac yicʼot i ticʼojel tac i chaʼan Dios?

¹⁰ Cheʼ bʌ mi la cʌqʼuen estudio jiñi quixtañujob, la com laj coltañob chaʼan miʼ cʌñob yicʼot miʼ cʼʌñob i cʼabaʼ Jehová. Pero cheʼ jaʼel la com laj coltañob chaʼan miʼ cʌñob tiʼ sujm bajcheʼ yilal bʌ Dios. ¿Muʼ ba caj laj coltañob mi mucʼ jach lac cʌntesʌbeñob i mandar tac yicʼot i ticʼojel tac i chaʼan Dios? Maʼañic. Tajol juntiquil muʼ bʌ la cʌqʼuen estudio miʼ cʼotel i cʌn baqui bʌ i mandar tac Dios yicʼot i qʼuel ti ñuc. Pero ¿muʼ ba caj i jacʼben i tʼan Jehová come tsaʼ cʼoti i cʼuxbin? Laʼ laj cʼajtesan tsaʼ bʌ ujti tiʼ tojlel Eva. I cʌñʌyʌch jiñi i mandar Dios, pero maʼañic tsaʼ cʼoti i cʼuxbin Jehová tiʼ sujm. I cheʼʌch miʼ mejlel la cʌl tiʼ tojlel Adán (Gn. 3:1-6). Jin chaʼan, mach cojach yom mi laj cʌntesʌbeñob jiñi  quixtañujob jiñi i mandar tac yicʼot i ticʼojel tac i chaʼan Dios.

11. ¿Bajcheʼ miʼ mejlel laj coltañob jiñi muʼ bʌ la cʌqʼueñob estudio chaʼan miʼ cʼotel i cʼuxbiñob Dios cheʼ mach cojach mi laj cʌntesʌbeñob jiñi i mandar tac yicʼot i ticʼojel tac?

¹¹ Weñʌch yicʼot miʼ coltañonla jiñi i mandar tac yicʼot i ticʼojel tac Dios (Sal. 119:97, 111, 112). Pero mach cheʼic mi caj i qʼuel jiñi muʼ bʌ la cʌqʼuen estudio mi maʼañic miʼ chʼʌmben i sujm chaʼan Jehová tsiʼ yʌqʼueyonla come miʼ cʼuxbiñonla. Jin chaʼan, miʼ mejlel laj cʼajtiben: «¿Chucoch Dios miʼ subeñonla maʼ wʌl chaʼan mi lac mel o chaʼan maʼañic mi lac mel iliyi? ¿Chuqui miʼ cʌntesañonla tiʼ tojlel?». Mi tsaʼ laj colta chaʼan miʼ ñaʼtan Jehová yicʼot chaʼan miʼ cʼuxbin tiʼ sujm jiñi ñuc bʌ i cʼabaʼ, tajol mi caj i cʼotel tiʼ pusicʼal jiñi muʼ bʌ i cʌn. Cheʼ jiñi, mi caj i cʼotel i cʼuxbin Dios i mach cojach jiñi i mandar tac (Sal. 119:68). Mi caj i pʼʌtʼesan i ñopoñel yicʼot mi caj i lʌtʼ tsʌts bʌ wocol tac (1 Co. 3:12-15).

12. a) ¿Chuqui tiʼ caj mach junchajpix tsaʼ ajñi i pusicʼal David ti jumpʼejl bʌ qʼuin? b) ¿Chuqui tsaʼ ujti?

¹² Jiñi tʼan tac tsaʼ bʌ i tsʼijbu jiñi rey David ti Salmo 86:11 (TNM) wen ñucʌch i cʼʌjñibal jaʼel: «Aqʼueñon jumpʼejl c pusicʼal mach bʌ tʼoxolic». Cʼʌlʌl cheʼ cuxul, tsiʼ qʼuele chaʼan miʼ mejlel ti sujtel ti chaʼchajp jax lac pusicʼal. Ti jumpʼejl bʌ qʼuin, cheʼ yaʼan tiʼ pam i yotot tsiʼ qʼuele ti tsʼʌmel juntiquil xʼixic i cʼabaʼ Bat-Seba añix bʌ i ñoxiʼal. ¿Bajcheʼ yilal an i pusicʼal David ti jimbʌ ora? ¿Junchajp jach ba o tʼoxol? Cʌmbil i chaʼan i mandar Jehová muʼ bʌ i yʌl chaʼan mach yom miʼ mulʌben i yijñam i piʼʌl (Éx. 20:17). Pero tsiʼ bej qʼuele jiñi xʼixic. I mach junchajpix tsaʼ ajñi i pusicʼal. Miʼ mulan jiñi xʼixic i yom i mel jaʼel chuqui wen tiʼ wut Jehová. Anquese cabʌl jab tsiʼ cʼuxbi yicʼot tsiʼ bʌcʼña Jehová, tsiʼ jacʼʌ chuqui yom i tsucul i pusicʼal. Jin chaʼan, tsiʼ mele mach tac bʌ weñic. Tsiʼ bibʼesʌbe i cʼabaʼ Jehová i tsiʼ yʌqʼue i yilan wocol quixtañujob yicʼot i familia maʼañobic bʌ i mul (2 S. 11:1-5, 14-17; 12:7-12).

13. ¿Bajcheʼ la cujil chaʼan David tsaʼ chaʼ ajñi ti jumpʼejl i pusicʼal?

¹³ Jehová tsiʼ tiqʼui David, i jiñʌch tsaʼ bʌ i colta (2 S. 12:13; Sal. 51:2-4, 17). Maʼañic tsiʼ wis ñajʌtesa jiñi wocol tsaʼ bʌ i teche tiʼ caj chaʼan mach junchajpix tsaʼ ajñi i pusicʼal. ¿Tsaʼ ba i colta Jehová jiñi David chaʼan mach tʼoxolix miʼ yajñel i pusicʼal? Tsaʼʌch, come jiñi i Tʼan Dios miʼ yʌl chaʼan ti wiʼil David tsiʼ melbe i yeʼtel Jehová «ti jumpʼejl i pusicʼal» (1 R. 11:4; 15:3).

14. ¿Chuqui yom mi laj cʼajtiben lac bʌ, i chucoch?

¹⁴ Jiñi ejemplo i chaʼan David miʼ wen  ñuqʼuesan lac pusicʼal, pero mi lac taj lac ticʼol jaʼel. Yom miʼ yʌcʼonla ti pensar jiñi tsʌts bʌ mulil tsaʼ bʌ i mele. Mach yʌlʌyic mi añix ora o maxto jalic an cajel lac melben i yeʼtel Jehová, yom mi laj cʼajtiben lac bʌ: «¿Woli (yʌquel) ba c chaʼlen wersa chaʼan Satanás maʼañic miʼ tʼox c pusicʼal?».

15. ¿Bajcheʼ miʼ coltañonla i bʌcʼñʌntel Dios mi tsaʼ laj qʼuele foto tac muʼ bʌ i tech lecoj bʌ pensar?

¹⁵ Jumpʼejl ejemplo, ¿chuqui mi lac mel cheʼ mi laj qʼuel yaʼ ti televisión o ti Internet jumpʼejl foto o película muʼ bʌ i mejlel i tech lecoj bʌ pensar? Tajol miʼ mejlel laj coltan lac bʌ i mi lac ñaʼtan chaʼan mach pornografía. Pero ¿jimba woliʼ cʼʌn Satanás chaʼan miʼ tʼox lac pusicʼal? (2 Co. 2:11). Miʼ mejlel ti lajintel bajcheʼ jumpʼejl hacha muʼ bʌ i cʼʌn juntiquil wiñic chaʼan miʼ tsʼij colem teʼ. Miʼ tech i cʼʌn jiñi jay bʌ i yej, i cheʼ miʼ bej chocben, jiñi teʼ miʼ jaw i bʌ majlel. Jiñi foto tac muʼ bʌ i tech lecoj bʌ pensar lajal bajcheʼ i yej jiñi hacha. Tajol ti ñaxan mi laj qʼuel chaʼan maʼañic i wocolel, pero orajach miʼ mejlel i tʼox lac pusicʼal i miʼ yʌcʼonla ti yajlel ti tsʌts bʌ mulil, i mach xucʼulix mi la cajñel. Jin chaʼan, mach la cʌcʼ chaʼan miʼ yochel mach tac bʌ weñic ti lac pusicʼal. Laʼ lac wen qʼuel chaʼan junchajp jach miʼ yajñel lac pusicʼal i chaʼan miʼ bʌcʼñan i cʼabaʼ Jehová.

16. ¿Chuqui ti cʼajtiya tac yom mi lac melben lac bʌ cheʼ bʌ Satanás miʼ ñijcañonla lac mel mach bʌ weñic?

¹⁶ Jiñi Satanás mach cojach miʼ cʼʌn foto tac muʼ bʌ i tech lecoj bʌ pensar, miʼ cʼʌn yan tac bʌ chaʼan miʼ yʌcʼonla ti mulil. ¿Chuqui mi lac mel? Miʼ mejlel lac poj coltan lac bʌ i mi la cʌl: «Weno, maʼañic mi caj c chaʼlentel ti expulsar cheʼ mic mel iliyi, jin chaʼan mach wen añic i wocolel». Ili mach tojic bʌ pensar. Wen cheʼ mi lac melben lac bʌ ili cʼajtiya tac: «¿Woli ba i cʼʌn Satanás iliyi chaʼan miʼ tʼox c pusicʼal? Mi tsaʼ c jacʼʌ mel jiñi yom bʌ jiñi lecoj bʌ c pensar, ¿muʼ ba caj c bibʼesʌben i cʼabaʼ Jehová? ¿Muʼ baʼ caj i ñumen lʌcʼtesañon ti Dios, o  mi caj i ñajtʼesañon?». Laʼ lac wen ñaʼtan jiñi cʼajtiya tac. Laʼ laj cʼajtiben i ñaʼtʌbal Jehová chaʼan ti jumpʼejl lac pusicʼal mi lac jacʼ, i maʼañic mi lac lotin lac bʌ (Stg. 1:5). Iliyi mi caj i wen cʌntañonla. Mi caj i coltañonla chaʼan maʼañic mi lac jacʼ lac mel mach bʌ weñic, mi caj la cʌl cheʼ bajcheʼ tsiʼ yʌlʌ Jesús: ‹Cucux, Satanás› (Mt. 4:10).

17. Tsictesan yicʼot jumpʼejl ejemplo chucoch maʼañic mi lac taj lac wenlel cheʼ chaʼchajp jax lac pusicʼal.

¹⁷ Maʼañic mi lac taj lac wenlel cheʼ chaʼchajp jax lac pusicʼal. Laʼcu lac ñaʼtan chaʼan jiñi xʼalasob ti jumpʼejl equipo mach yom i qʼuelob i bʌ. An yomoʼ bʌ chaʼan miʼ ñumen qʼuejlelob ti ñuc, yambʌlob mach yomob i jacʼob bajcheʼ yom miʼ chaʼleñob alas i yambʌlob maʼañic miʼ qʼuelob ti ñuc jiñi muʼ bʌ i pʌsbeñob alas. Mi cheʼob bajcheʼ jiñi, maʼañic mi caj i mʌlob (jotob) jiñi alas. Pero ñumen wen cheʼ jumpʼejl equipo temel miʼ yajñelob. Jiñi lac pusicʼal mi caj i yajñel bajcheʼ ili chaʼpʼejlel equipo mi jiñi lac pensar, jiñi la com bʌ yicʼot bajcheʼ yubil mi la cubin lac bʌ «temel» miʼ yajñel tiʼ melol i yeʼtel Jehová. Laʼ laj cʼajtesan chaʼan Satanás yom i tʼox jiñi lac pusicʼal. Yom chaʼan chuqui yom bʌ jiñi lac pusicʼal miʼ contrajin jiñi la cujil bʌ chaʼan chuqui yom Jehová mi lac mel. Mi la com lac melben i yeʼtel Jehová, yom mi lac mel ti jumpʼejl lac pusicʼal (Mt. 22:36-38). Mach la cʌcʼ chaʼan Satanás miʼ tʼox lac pusicʼal.

18. Cheʼ bajcheʼ miʼ yʌl Miqueas 4:5, ¿chuqui a wom a mel jatet?

¹⁸ Cheʼ bajcheʼ David, laʼ laj cʼajtiben Jehová iliyi: «Aqʼueñon jumpʼejl c pusicʼal mach bʌ tʼoxolic chaʼan mic bʌcʼñan a cʼabaʼ». Laʼ lac chaʼlen wersa chaʼan mi lac pʌs ti lac melbal ili oración. Tiʼ pejtelel chuqui mi lac ñaʼtan lac mel ti jujumpʼejl qʼuin, yom miʼ pʌs chaʼan mucʼʌch lac wen qʼuel ti ñuc jiñi chʼujul bʌ i cʼabaʼ Dios. Mi mucʼʌch lac mel, mejlʌch lac subentel bajcheʼ i testigojonla Jehová (Pr. 27:11). I ti lac pejtelel mi caj la cʌl bajcheʼ jiñi xʼaltʼan Miqueas, mi caj lac chaʼlen «xʌmbal tiʼ bijlel [o tiʼ «cʼabaʼ», TNM] lac Yum Dios tiʼ pejtelel ora» (Mi. 4:5).