1. San a wani taki fu feele Gadu? Saide den sama di lobi Yehofa mu feele en?

KELESTEN lobi Gadu, ma den e feele en tu. San a wani taki fu feele Gadu? Te wan sama e feele Gadu, da dati wani taki ai lesipeki en, a á wani du nawan sani di o meke en anga Gadu poli.​—Ps. 111:10; Odo 8:13.

2. Te u luku san Kownu David taki a Psalm 86:11, da san a den tu sani di wi o luku aini a artikel ya?

² Leisi Psalm 86:11. A tekisi ya e soi kiin taki David be sabi taki a pelensipali fu lesipeki Yehofa. Wi o luku fa u sa wooko anga den sani di David taki aini a begi ya. Ma wi o luku fosi saide u mu lesipeki a nen fu Gadu. Baka dati wi o luku fa u sa soi anga a fasi fa wi e tyai useefi taki wi e lesipeki a nen fu Gadu.

3. San be yeepi Mosesi fu moo lesipeki a nen fu Gadu?

³ Pakisei fa Mosesi be e fii di a be de a Horeb mongo. Di a be de ape a si fa Yehofa gendee di a pasa neen fesi. Kande a sani ya a be a moo foondoo sani di wan libisama be si, fosi Yesesi be kon a goontapu. Baka dati Mosesi yee den wowtu ya: ‘Yehofa, Yehofa, a wan Gadu di abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki. Ai du bun gi dunsudunsu  sama. Ai gi sama paadon te den meke fowtu, efuso te den du ogii’ (Ek. 33:17-23; 34:5-7). A gei enke a wan engel be taki den sani ya. Kande ala yuu te Mosesi be kai a nen Yehofa a be e membee a fisyun ya. Wi e fusutan saide Mosesi be taigi den Islayelisama taki, den mu ’lesipeki a nen fu Yehofa, a Gadu fu den’.​—Deit. 28:58.

4. San o yeepi u fu moo lesipeki Yehofa?

⁴ Te u yee a nen Yehofa, u mu pakisei fa a sama di abi a nen de tuutuu. U mu poti pakisei a den moin manii fi en tu. Yehofa abi tyaipi makiti, a koni, ala yuu ai du sani a wan letifasi, a lobi u. Te wi e pakisei den manii fu Yehofa, anga den sani di a poi du, da a sani ya o meke u moo lesipeki en.​—Ps. 77:11-15.

5-6. (a) San a nen fu Gadu wani taki? (b) Enke fa Ekisodesi 3:13, 14 anga Yesaya 64:8 e soi, da fa Yehofa e du san a abi a pakisei?

⁵ San a nen fu Gadu wani taki? A omen sabiman taki a nen Yehofa wani taki ‘ai meke sani kon de’. A sani ya e soi taki nawan sama á poi tapu Yehofa fu du san a abi a pakisei. Fa Yehofa e du a sani ya?

⁶ Yehofa sa toon iniiwan sani di de fanowdu fu meke san a abi a pakisei kon tuu. (Leisi Ekisodesi 3:13, 14.) A omen leisi den buku fu wi e gi u taanga-sikin fu poti pakisei na a sani ya. Boiti taki Yehofa poi toon iniiwan sani di a wani, a poi meke sondu libisama di e dini en toon iniiwan sani di de fanowdu fu meke a wani fi en pasa tu. (Leisi Yesaya 64:8.) Nawan sani á poi tapu Yehofa fu du san a abi a pakisei.​—Yes. 46:10, 11.

7. San o yeepi u fu moo lobi Yehofa?

⁷ Te wi e teke ten pakisei san Yehofa du, anga den sani di a gi wi a kaakiti fu du, wi o moo lobi en. Te wi e pakisei den moin sani di Yehofa meke, anga fa a yeepi u fu du san a wani, wi o moo  lesipeki en tu (Ps. 8:3, 4). A nen fu Yehofa a wan apaiti nen. Te wi e yee a nen fu Gadu, ai meke u pakisei ala den moin manii fi en, ala den sani di a du kaba, anga den sani di a o du aini a ten di e kon. A sani ya o yeepi u fu moo lobi u Dda di de a hemel.​—Ps. 89:7, 8.

8. Enke fa Deitolonomi 32:2, 3 e soi, da san Yehofa wani den sama di e dini en du?

⁸ Fosi den Islayelisama go aini a Paamisi Kondee, Yehofa taigi Mosesi fu a sikiifi wan singi (Deit. 31:19). Mosesi be mu leli den Islayelisama a singi ya. (Leisi Deitolonomi 32:2, 3.) Te u luku den tu vers ya, da wi e si kiin taki Yehofa wani ala sama sabi a nen fi en. Winsi fa a nen fu Yehofa santa, tokuso a wani sama koboloiki en. A be wan gaan sani gi den Islayelisama taki Mosesi be leli den sani fu Yehofa anga a gaan nen fi en. Den sani di Mosesi be e leli den be e taanga den biibi. Leti enke fa alen bun gi den sani di u paandi, a so den sani di Mosesi be e leli a foluku be e gi den taanga-sikin. Fa u sa waka a Mosesi baka te wi e leli sama?

9. Fa u sa yeepi santa a nen fu Yehofa?

⁹ Te wi e peleiki, u sa soi sama a nen fu Yehofa aini Beibel. U sa gi den buku, u sa soi den felon, efuso taa sani di de na a website fu u. Den sani ya e gi Yehofa gaandi. Te u de a wooko, sikoo, efuso te u de a pasi e go a wan peesi, u sa taki anga sama fu den moin manii fu a Gadu fu u. U sa taigi den san a den moin sani di Yehofa abi a pakisei gi libisama anga a goontapu. Te wi e taigi den fu den sani ya, a o yeepi den fu si taki Yehofa lobi u. Te wi e leli sama fa Yehofa de tuutuu, wi e yeepi santa a nen fi en. Wi e yeepi sama fu si taki omen fu den sani di den be yee fu Yehofa a be lei. Ná pikin taanga-sikin den sani ya e gi sama.​—Yes. 65:13, 14.

10. Saide a á sai fu leli den Beibelsutudi fu u den weiti fu Yehofa namo?

¹⁰ Te wi e sutudeli Beibel anga sama, u wani yeepi den fu sabi a nen fu Yehofa. U wani yeepi den tu fu kai a nen ya. Boiti dati, u wani yeepi den fu sabi fa Yehofa de tuutuu. Efu wi e taigi den namo san Yehofa lobi, anga san a á lobi, u ná o poi yeepi den fu sabi Yehofa tuutuu. Wan sama di e sutudeli Beibel sa sabi den weiti fu Gadu. Kande a lobi den weiti ya tu. Ma a fu di a lobi Yehofa anga en hii ati meke ai du san a taki? Ná feegete taki Efa be sabi den weiti fu Yehofa. Winsi fa Efa be sabi a weiti fu Yehofa, tokuso a á be lobi Yehofa, a sama di be gi den a weiti. Adan seefi á be lobi Yehofa anga en hii ati (Gen. 3:1-6). Neen meke wi á mu leli den Beibelsutudi fu u san a den weiti fu Yehofa namo, ma u mu yeepi den fu lobi Yehofa tu.

11. Fa u sa yeepi den Beibelsutudi fu u fu lobi Yehofa?

¹¹ A soso wini wi e fende te wi e wooko anga den leli fu Yehofa (Ps. 119:97, 111, 112). Ma efu den Beibelsutudi fu wi á fusutan taki a fu di Yehofa lobi u meke a gi u den weiti ya, a o taanga gi den fu holi den weiti ya. Neen meke a bun fu akisi den Beibelsutudi fu u taki:  ‘Saide i si enke Gadu taki wi á mu du a sani ya? San a sani ya e leli i fu Yehofa?’ Efu u yeepi den Beibelsutudi fu u fu sabi Yehofa tuutuu, anga fu lobi a nen fi en, a sani de o yeepi den fu dini Yehofa anga den hii ati. Bika den ná o lobi den weiti namo, ma den o lobi a sama di meke den weiti tu (Ps. 119:68). A biibi fu den o taanga. A sani ya o yeepi den fu pasa den tesi di o miti den.​—1 Kor. 3:12-15.

12. Fa David meke en ati koli en? San a be a bakapisi?

¹² Den wowtu ‘mi hii ati’ di David taki a Psalm 86:11 pelensipali. David be si taki wi ati sa koli u makiliki fu du sani di Yehofa á lobi. Wan leisi di a be de na a daki fi en osu, neen a si fa wan uman fu wan taa man e wasi. San David du? A be sabi taki a weiti fu Yehofa e taki: ‘Wi á mu wani a uman fu wan taa man’, toku a waki a uman fu a man (Ek. 20:17). A be wani du san Yehofa taki, ma a be wani a uman tu. David be lobi Yehofa, a wan hii pisiten a be e dini en kaba, toku a du san a sondu sikin fi en be wani. A sani di a du meke en anga Yehofa poli. A sani ya tyai ogii gi taa sama tu di á be du nawan sani. En osufamii be fii a bakapisi fu a sani di a du tu​—2 Sam. 11:1-5, 14-17; 12:7-12.

13. Fa u du sabi taki David be dini Yehofa anga en hii ati baka?

¹³ Yehofa soi David taki a wan gaan sondu a du. Di Yehofa puu kaasi gi David, a meke moiti fi en anga Yehofa toon mati baka (2 Sam. 12:13; Ps. 51:2-4, 17). David á feegete den ogii di miti en di a be meke en ati koli en fu du sani di á bun. David akisi Yehofa fu a yeepi en fu dini en anga en hii ati baka. Yehofa piki a begi fu David? Eeye. Bika Beibel taki David a wan man di ‘be e dini en Gadu Yehofa anga en hii ati’.​—1 Kow. 11:4; 15:3.

14. San u mu akisi useefi? Saide u mu akisi useefi a sani ya?

¹⁴ A toli fu David e gi u taanga-sikin. Ma ai leli u wan pelensipali sani tu. Ai soi u taki winsi on langa wi e dini Yehofa, a bun fu e akisi useefi taki: ‘Mi e wai pasi gi Saatan fu a á koli mi fu du sani di á bun?’

15. Fa a feele di wi e feele Gadu o yeepi u fu wi á luku sani di e meke u pakisei sani di á bun?

 ¹⁵ Meke u taki yu e luku tv, efuso i de a internet, neen i si wan sani di e meke i pakisei sani di á bun. San yu o du? Kande yu e pakisei taki a ná ogii so, bika den nai soi fa man anga uman e didon anga denseefi. Den nai soi soso sikin fowtow tu. Ma kande na a sani ya Saatan e koboloiki fu poli i denki fi yu á dini Yehofa anga i hii ati moo (2 Kor. 2:11). A sani di i si sa de enke wan akisi di wan man e koboloiki fu piiti wan udu. A man e fasi a akisi a wan pisi fu a udu, da ai naki a akisi go aini a udu te enke a udu piiti. A so a de anga den sani di wi e luku tu. Winsi a gei enke den sani di wi e luku ná ogii, efu den e meke wi e pakisei sani di á bun den o meke u sondu. Neen meke wi á mu luku nawan sani di sa poli a fasi fa wi e denki. A so wi o man dini Yehofa anga u hii ati.

16. San u mu akisi useefi te Saatan wani koli u fu du sani di á bun?

¹⁶ Boiti den sani di wi e si a tv efuso internet, Saatan e koboloiki omen taa sani fu koli u fu du sani di á bun. San wi o du te a sani ya e pasa? Kande wi e denki taki: ‘A sani ya ná ogii bika den ná o puu mi aini a kemeente efu mi du en.’ Efu wi e denki so a koli wi e koli useefi. Neen meke u mu akisi useefi taki: ‘A koli Saatan e suku fu koli mi fu mi á dini Yehofa anga mi hii ati moo? Mi o poli Yehofa nen efu mi du a sani ya? A sani ya o meke mi kon moo koosube a Yehofa, efuso a o meke mi anga en poli?’ Sidon pakisei den akisi ya da i begi Yehofa fu a yeepi i fu piki den. Yu á mu koli iseefi te yu e piki den akisi ya  (Yak. 1:5). A sani ya o yeepi i fi yu á gwe fika Yehofa. Te tesi miti i, leti enke Yesesi yu o man taki: ‘Saatan, gwe komoto ya!’​—Mat. 4:10.

17. Saide sani ná o waka bun gi u efu u nai dini Yehofa anga u hii ati? Gi wan ageisitoli.

¹⁷ Efu u nai dini Yehofa anga u hii ati, sani ná o waka bun gi u. Saide? Meke u taki den man aini wan futubali team nai fusutan denseefi. Kande son wan fu den wani sama poti pakisei a den wawan. Taawan nai wooko anga san a basi taki. Den nai lesipeki en tu. Efu a so den e pee den ná o wini. Ma te den sama aini wan futubali team e wooko makandaa, sani o waka bun gi den. U sa maiki wi ati anga wan futubali team. Efu wi e denki enke fa Yehofa e denki, efu u lobi den sani di Yehofa lobi, da wi o dini en anga u hii ati. Yu á mu feegete taki Saatan wani i du san a sondu sikin wani pe fi yu aliki Yehofa. Ma i mu tan dini Yehofa anga i hii ati (Mat. 22:36-38). Noiti yu á mu meke Saatan kisi i.

18. Te i luku san sikiifi a Mika 4:5, da san i de kabakaba fu du?

¹⁸ Leti enke David u mu begi Yehofa taki: ‘Meke mi lesipeki i nen anga mi hii ati.’ Du ala san i man fu du a sani ya. Den sani di yu e du ala dei mu soi taki yu e lesipeki a nen fu Yehofa. Te yu e du a sani ya, da enke wan Kotoigi fu Yehofa yu e gi a nen fi en gaandi (Odo 27:11). Leti enke polofeiti Mika, ala wi o man taki: ‘Wi dati o tyai a nen fu Yehofa, u Gadu fu alaten. Wi o du san a wani tu. Eeye, fu teego.’​—Mika 4:5.