1. Krenn Bondyé, ka sa vé di, é poukwa si ou enmé-y, fò ou krenn-li ?

SÉ KRÉTYEN-la enmé Bondyé men an menm balan-la yo ka krenn-li. Ni sèwten moun ki ké di kè sé 2 biten ki pa k’ay ansanm ! Men lè ou ka krenn Bondyé, a pa pè ou pè-y ! An réyalité, ou ka krenn-li adan on sans ki vréman èspésyal. Lè ou ka krenn Bondyé sa vé di kè ou ka aprésyé-y onlo é kè ou ka rèspèkté-y onlo osi. Sa vé di osi kè ou vé pa fè ayen ki té’é pé fè Bondyé lapenn pas ou anvi rété bon bon zanmi èvè-y (Sòm 111:10 ; Pwov. 8:13).

2. Dapré sa David di an Sòm 86:11, ka nou ké vwè adan awtik-lasa ?

² (Li Sòm 86:11.) Lè nou ka pran on tan pou réfléchi asi pasaj-lasa, nou ka rann-nou kont kè David té sav byen kè sa enpòwtan dè krenn Bondyé. An-nou vwè ka pou nou fè pou mèt vèwsé-lasa an pratik. Adan on prèmyé tan, nou ké vwè déotwa biten ki ka montré kè fò nou ni on gran rèspé pou non a Bondyé. Apré, nou ké vwè kijan nou pé montré kè nou ka rèspèkté non-lasa adan vi an nou touléjou.

3. Ki évènman Moyiz viv, é poukwa nou pé di kè sé pétèt grasa sa i kontinyé ni on gran rèspé pou non a Bondyé ?

³ On jou, Moyiz té kaché anba on gwo wòch é i vwè glwa a Jéova pasé douvan a-y. Éséyé imajiné sa i rèsanti ! Adan liv Étude perspicace des Écritures, mi sa ki maké : « Moyiz viv on biten èstraòwdinè toubònman. Pétèt kè avan Jézi té vin asi latè, pa ni ponmoun ki viv on évènman kon sila. » Sé pétèt on zanj ki palé ba Moyiz, men antouka mi sa Moyiz tann : « Jéova, Jéova, on Bondyé ki ka aji èvè pityé é ki ka pran penn a moun, ki pa ka fè kòlè vit, ki plen  lanmou, on lanmou ki fidèl, é ki toujou ka di lavérité ; i ka aji èvè plizyè milyé moun èvè on lanmou ki fidèl, i ka padonné lè on moun fè érè, lè on moun pa rèspèkté lwa a-y é lè on moun péché » (Ègz. 33:17-23 ; 34:5-7). Pétèt kè chakfwa i té ka sèvi èvè non a « Jéova » i té ka sonjé sa i té vwè jou-lasa. Sa pa ka étoné-nou si, tibwen plita, i di sé Izraélit-la ‘krenn non-lasa pas i plen glwa é pas sé on non ki mérité yo rèspèkté-y’ (Dét. 28:58).

4. Ka ki pé édé-nou rèspèkté Jéova plis ankò ?

⁴ Lè nou ka itilizé non a « Jéova », fò-nou pran tan réfléchi asi kalité a moun-la ki ka pòté non-lasa. Pa ègzanp, fò-nou pran tan réfléchi asi puisans a-y, sajès a-y, jistis a-y é lanmou a-y. Pi nou ké fè sa é pi nou ké anvi rèspèkté-y (Sòm 77:11-15).

5-6. a) Ka non a Bondyé vé di ? b) Dapré Ègzòd 3:13, 14 é Izayi 64:8, ka Jéova ka fè pou volonté a-y akonpli ?

⁵ Nou sav kè non a Bondyé vé di on biten. Ka i vé di ? Sèwten èspésyalis a Labib dakò pou di kè pétèt kè « Jéova » vé di « I ka fè divini ». Sa ka fè-nou sonjé kè volonté a Bondyé toujou ka fèt é kè ayen pé pa anpéché-y fè sa i vé.

⁶ Ka Jéova ka fè pou fè sa i désidé ? 1) Limenm a-y ka divini tousa ki fo pou pwojé a-y réyalizé (li Ègzòd 3:13, 14). Sé on biten ki vréman èstraòwdinè adan pèwsonalité a Jéova. É souvantfwa, yo ankourajé-nou a réfléchi asi sa. 2) Jéova pé sèvi èvè sèwvitè a-y ki enpawfè : i pé fè-yo divini sa ki fo pou yo sèvi-y é pou yo fè sa i désidé (li Izayi 64:8). Sé konsa Jéova ka aji pou i pé sa fè sa i désidé. Ayen pé pa arété-y (Izayi 46:10, 11).

7. Kijan nou pé ni plis rèkonésans pou Pap’an nou ki an syèl-la ?

⁷ Nou pé ni plis rèkonésans pou Pap’an nou ki an syèl-la si nou ka pran tan réfléchi asi sa i ja fè é asi sa i ka édé-nou fè osi. Pa ègzanp, pi nou ké pran tan réfléchi asi tousa Jéova kréyé, é pi nou ké aprésyé tousa i fè (Sòm 8:3, 4). É si nou ka pran tan réfléchi asi sa i ka édé-nou fè pou nou  pé sa rivé fè volonté a-y, nou ké ni plis rèspé pou-y ankò. Non a Jéova mérité onlo rèspé menm ! Adan non-lasa nou ka touvé tout bèl kalité a Pap’an nou, tousa i ja fè é tousa i ké fè (Sòm 89:7, 8).

8. Dapré Détéwonòm 32:2, 3, kijan Jéova vé kè sèwvitè a-y sèvi èvè non a-y ?

⁸ Tibwen tan avan sé Izraélit-la té rantré an Péyi-la Bondyé té pwomèt-yo la, Jéova aprann Moyiz on chanson. Adan chanson-lasa Moyiz aprann pèp-la onlo biten asi Jéova (Dét. 31:19 ; li Détéwonòm 32:2, 3). Lè nou ka li sé vèwsé 2 é 3 la, on biten ki klè, sé kè Jéova vé pa yo kaché non a-y ; i vé pa ponmoun mèt an tèt a-y kè non a-y two sen pou yo pé sa sèvi èvè-y. I vé toutmoun konnèt non a-y ! Sé Izraélit-la ni lokazyon tann Moyiz palé dè Jéova é dè non a-y ki plen glwa. Mi on bèl lonnè mi ! Sa Moyiz anségné-yo édé-yo ni plis fwa é sa ankourajé-yo : sa aji asi yo menmjan on ti lapli ka fè sé plant-la vin bèl. Ka pou nou fè pou ansègnman an nou aji menmjan-la si sé moun-la ki ka kouté-nou la ?

9. Ka nou pé fè pou non a Bondyé vin sen ?

⁹ Lè nou ka préché, nou pé sèvi èvè Labib pou montré sé moun-la kè non a Bondyé sé Jéova. Nou pé ba-yo piblikasyon ki ka entérésé-yo. Nou pé montré-yo bèl ti vidéo é dòt biten entérésan ki asi sit entèwnèt an nou é ki ka onoré Jéova. Tèlman nou enmé Bondyé, nou ka palé dè-y kèlkèswa la nou yé. Nou ka fè moun konnèt bèl kalité a-y ki sé lékòl nou yé, ki sé travay nou ka travay oben ki sé vwayajé nou ka vwayajé. Lè nou ka fè moun konnèt tout bèl biten Jéova ni lentansyon fè pou yo é pou latè, sé pétèt prèmyé fwa yo ka rann-yo kont kè Jéova enmé-yo fò toubònman. Lè nou ka di-yo lavérité asi Pap’an nou ki plen lanmou, nou ka fè on travay ki ka fè non a-y vin sen. Nou ka édé sé moun-la konprann kè yo aprann-yo onlo mansonj asi Bondyé. É nou ka ba-yo méyè ansègnman ki tini ; sa ka konsolé-yo é sa ka fè-yo vin bon zanmi èvè Bondyé (Iz. 65:13, 14).

10. Lè nou ka fè on étid biblik, poukwa fò pa nou kontanté-nou dè montré étidyan-la yenki lwa a Bondyé ?

¹⁰ Lè nou ka fè on étid biblik, nou ka fè étidyan-la konnèt non a Bondyé é nou ka ankourajé-y sèvi èvè-y. Anplisdisa, nou ka édé-y konprann tousa non-lasa vé di. Ès nou ké pé fè sa si nou ka kontanté-nou dè montré-y ki konduit Bondyé ka aprésyé, sé prensip-la ki an Bib-la é sé lwa-la ki adan-y la ? Sé vré, i ké aprann konnèt lwa a Bondyé, é pétèt kè i ké ni onlo rèspé pou yo. Men ès i ké obéyi pas i enmé Jéova é pas i ka aprésyé kalité a-y ? Sonjé : Èv té konnèt lwa a Bondyé, men i pa té enmé Bondyé. Adan nonplis pa té enmé Bondyé (Jén. 3:1-6). Kifè, nou ka konprann kè fò-nou anségné lwa a Bondyé men a pa yenki sa pou nou fè, fò-nou fè plis ki sa.

11. Lè nou ka aprann on moun prensip a Jéova é lwa a-y, ka nou pé fè pou i pé sa enmé Jéova an menm balan-la ?

¹¹ Prensip a Jéova é sa i ka mandé-nou fè, sé toujou pou byen an nou (Sòm 119:97, 111, 112). Men étidyan an nou pé’é jen vwè sa konsa touttan i po’o konprann kè sé lanmou ki ka pousé Bondyé ban-nou dirèksyon-lasa. Sé pousa fò-nou pozé-y sé kèsyon-lasa : « Sèlon vou, poukwa Jéova ka di-nou fè tèl biten oben pa fè tèl biten ? Ka sa ka aprann-vou asi  Jéova ? » Si nou édé-y vwè kijan dè moun Jéova yé, é si nou édé-y enmé non a Jéova, on non ki plen glwa, nou pi fasil a touché tchè a-y. Non sèlman i ké vin enmé sé lwa-la ki an Bib-la men i ké vin enmé sila ki dèyè do a sé lwa-lasa osi (Sòm 119:68). Sa ké konsolidé fwa a-y é sa ké préparé-y pou i pé sa andiré éprèv kè i ké jwenn plita (1 Kor. 3:12-15).

12. Poukwa, a on sèwten moman, David pa rivé krenn Jéova èvè tout tchè a-y, é ki rézilta sa bay ?

¹² David té anvi sèvi Jéova èvè tout tchè a-y. Sé pousa i di-y : « Fè ansòt pou an krenn non a-w èvè tout tchè an mwen » (Sòm 86:11). Sé pawòl-la David maké la ni onlo enpòwtans toubònman. Adan vi a-y, David ni lokazyon rann-li kont kè si on moun pa’a krenn Jéova èvè tout tchè a-y, i ké anvi fè dé biten ki pa bon menmsi i byen anvi fè Jéova plézi. On jou, David té asi on véranda ki té anho akaz a-y é i vwè on madanm-mayé ki té ka bennyé. Non a madanm-lasa sé té Bètsabé. Lèwvwè David touvé-y an sitiyasyon-lasa, ès i té ka krenn Jéova èvè tout tchè a-y ? Ni on lwa Jéova té ba pèp a-y é kè i té konnèt byen : « Fò pa ou anvi ni madanm a pwochen a-w » (Ègz. 20:17). Men malérèzman, i ka sanm sa i rété ka gadé Bètsabé. I té anvi madanm-la, men anmenmtan i té anvi fè Jéova plézi. Menmsi sa té ja ka fè lontan kè i té enmé Jéova é kè i té ka krenn-li, i lésé mové lanvi-la i té ni la pran lanmen asi-y é i fè onlo péché grav. I sali non a Jéova. É akòz dè-y, ni onlo moun ki pa té ni ayen a vwè adan sa ki soufè onlo toubònman. Jous fanmi a-y pran plon adan sa (2 Sam. 11:1-5, 14-17 ; 12:7-12).

13. Kijan nou fè sav kè David woukoumansé sèvi Jéova èvè tout tchè a-y ?

¹³ Jéova korijé David é David wouvin bon zanmi èvè-y (2 Sam. 12:13 ; Sòm 51:2-4, 17). Men David pa jen oubliyé kijan péché-la i té fè la fè moun soufè é i té sav byen kè i péché pas i pa té ka sèvi Jéova èvè tout tchè a-y. Ni mwayen tradui sa David maké an Sòm 86:11 konsa osi : « Ban-mwen on tchè ki antyè. » Ès Jéova kouté priyè a-y ? Nou pé di wi, piskè tibwen pli lwen an Bib-la, yo ka di kè i sé on nonm, ki té ka ‘sèvi Jéova, Bondyé a-y, èvè tout tchè a-y’ (1 Wa 11:4 ; 15:3).

14. Ki kèsyon fò noutout pozé-nou, é poukwa ?

¹⁴ Ègzanp a David ka ankourajé-nou onlo men i ka fè-nou réfléchi osi. I fè on péché ki grav é sé on avèwtisman pou  toutmoun ki ka sèvi Bondyé jòdijou. Alò, menmsi sa ja ka fè plizyè lanné nou ka sèvi Bondyé oben menmsi nou toufré pran batèm, fò-nou pozé-nou kèsyon-lasa : « Satan ka tanté-mwen, men ès an ka goumé pou i pa anpéché-mwen sèvi Jéova èvè tout tchè an mwen ? »

15. Si nou ka krenn Bondyé, sa ké pwotéjé-nou lè on biten ki pa pwòp ka parèt douvan nou. Kijansa ?

¹⁵ Pa ègzanp, si on imaj an télé-la oben asi Entèwnèt parèt douvan a-w é pé mèt lidé ki pa pwòp an tèt a-w, kijan ou ka réyaji ? Ou pé rivé a di an tchè a-w : « Pa ni danjé adan sa pas a pa on fim pòwno an ka gadé ! » Men, ès a pa on biten Satan ka itilizé pou anpéché-w sèvi Jéova èvè tout tchè a-w ? (2 Kor. 2:11). Pétèt kè on moun pa oblijé ka ba on biten pon enpòwtans men biten-lasa pé rivé a fè-y péché é i pé’é menm vwè a ki lè ! Lè sé konsa, moun-lasa pa fidèl a Jéova ankò i pa’a sèvi-y èvè tout tchè a-y nonplis. Alò souplé, pa lésé ayen ki pa pwòp rantré an tchè a-w ! Kontinyé krenn non a Jéova èvè tout tchè a-w !

16. Lè on biten ka ban-nou anvi fè sa ki mal, ki kèsyon pou nou pozé-nou ?

¹⁶ Satan ka sèvi osi èvè imaj ki ka mèt vyé lidé an tèt an nou pou pousé-nou fè sa ki mal. Lè on biten ka ban-nou anvi fè sa ki mal, kijan nou ka réyaji ? Si nou vréman anvi gadé sé imaj-lasa, nou té’é pé touvé on èskiz fasilman. Pa ègzanp, nou té’é pé di : « Men si an fè sa, yo pé’é èskominyé-mwen ; sa ka montré kè sa pa si grav ki sa. » Men lè on moun ka fè sé kalté réflèksyon-lasa, sa pa bon menm. Pisimé nou pozé-nou dé kèsyon kon sila : « Ès a pa Satan ki ka éséyé tanté-mwen pou anpéché-mwen sèvi Jéova èvè tout tchè an mwen ? Si an kouté lidé an mwen, ès an pé’é sali non a  Bondyé ? Ès an ké vin pibon zanmi èvè Jéova oben sé lèkontrè ki ké fèt ? » Pran tan réfléchi asi sé kèsyon-lasa. Mandé Jéova ba-w sajès pou ou réponn a sé kèsyon-lasa franchman (Jak 1:5). Si ou fè sa, sa ké pwotéjé-w oséryé menm. Ou pé’é lésé pon tantasyon pran lanmen asi-w. Konsa, ou ké imité Jézi lè i di « Sòti-w la Satan ! » (Mat. 4:10).

17. Lè on moun pa’a sèvi Jéova èvè tout tchè a-y, sé on mové biten. Poukwa ? Bay on ègzanp.

¹⁷ Lè on moun pa’a sèvi Jéova èvè tout tchè a-y, sé on mové biten toubònman. An-nou pran ègzanp a on ékip foutbòl. Imajiné kè sé boug-la ki an ékip-la pa’a antann-yo. Ni déotwa adan yo ki anvi kè sé yo yo pòté anlè. Ni dòt ki pa ka rèspèkté réglèman-la é ni dòt ankò ki ka méprizé antrénè-la. Ou ka di yo ké gangné match ? Pawkont, on ékip ki soudé pi fasil gangné on match. Tchè a-w pé touvé-y kon on ékip ki byen soudé si sa ou ka pansé, sa ou anvi é sa ou ka rèsanti k’ay an sans a volonté a Bondyé. Pa oubliyé kè Satan té’é kontan toubònman si ou té ka arété sèvi Jéova èvè tout tchè a-w. Sa i té’é swété sé kè on gwo dézòd fèt andidan a-w pou sa ou ka pansé, sa ou anvi é sa ou ka rèsanti pa annakò yonn èvè lòt é pa annakò èvè prensip a Jéova nonplis. Men pa oubliyé kè pou Jéova aprésyé sa ou ka fè ba-y, fò ou sèvi-y èvè tout tchè a-w (Mat. 22:36-38). Pa jen lésé Satan anpéché-w sèvi Jéova èvè tout tchè a-w !

18. Sèlon Miché 4:5, ka ou byen désidé a fè ?

¹⁸ Priyé Jéova kon David é di-y : « Fè ansòt pou an krenn non a-w èvè tout tchè an mwen. » Fè tousa ou pé pou aji annako èvè priyè-lasa. Fè ansòt pou chak désizyon ou ka pran, ki i piti, ki i gran, montré kè ou ka rèspèkté non a Jéova onlo, on non ki sen toubònman ! Konsa, vou ki Témwen a Jéova, ou ké ba non a-y glwa (Pwov. 27:11). É si sé konsa nou ka aji, noutout ké pé di menm pawòl ki pwofèt Miché : « Nou ké maché an non a Jéova, Bondyé an nou, pou touttan » (Mich. 4:5).