1. Tera ae nanonaki ni maakakin te Atua, ao e aera bwa e kakawaki irouia naake a tangira Iehova?

A TANGIRA te Atua Kristian, ao a maakua naba. E taraa ni kauntaba anne irouia tabeman. Ma ti aki taekina ikai te aeka ni maaku are ko maakunrang iai. Ti na maroroakina te aeka ni maaku ae okoro. Naake iai irouia te aeka ni maaku aei, a boni karinea te Atua mai nanoia ni koaua. A aki tangiria bwa e na un irouia Tamaia are i karawa, ibukina bwa a aki kan urua aia iraorao ma ngaia.​—TaiAre. 111:10; TaeRab. 8:13.

2. Ni kaineti ma ana taeka te Uea ae Tawita n Taian Areru 86:​11, baikara baika uoua aika ti na maroroakin?

² Wareka Taian Areru 86:11. Ngkana ko iangoi taeka akanne, ko kona iai n noria bwa e ataa kakawakini maakakin te Atua te Uea ae Tawita are kakaonimaki. Ti na nora ngkai arora ni maiuakin ana taeka Tawita akana kairaki koreaia n te taamnei akanne. Te moan, ti na neneri bukina tabeua ngkai ti riai ni karinea aran te Atua. Te kauoua, ti na maroroakina arora ni kaota karinean aran te Atua ni maiura ni katoabong.

3. Tera te bwai ae riki are tao e buoka Mote bwa e na teimatoa ni karinea aran te Atua?

³ Iangoa ana namakini Mote ngke e kauangi n te nangananga ao e nora mimitongin Iehova n rimatana n te miitara.  Tao aei bon te bwai ae moan te kamimi ae e rinanona temanna imwain rokon Iesu Kristo. Imwina ao e a ongo taeka aikai Mote, ae n taraana a taekinaki iroun te anera: “Iehova, Iehova, ae te Atua ae nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua. E kaota te tangira ae koaua nakoia rooro aika nga ma nga, e kabwarai kairua ma buure.” (TeOti. 33:​17-23; 34:​5-7) E bae n ururinga te bwai ane riki anne Mote ngkana e kamanena te ara ae Iehova. Maroaka are e kauringia ana aomata te Atua aika tibun Iteraera imwina riki, bwa a na “maaka te ara ae mimitong ma ni kamimi ao ni kakamaaku aei”!​—TuaKau. 28:58.

4. Tera ae kona ni buokira bwa ti na karinea riki Iehova?

⁴ Ngkana ti iangoa te ara ae Iehova, ti wanawana ngkana ti kananoa ara iango i aon teuare arana anne. Ti riai n ururingi aroarona n aron te mwaaka, te wanawana, te kaetitaeka ae riai, ao te tangira. Iaiangoan aroaro akanne ao tabeua riki, e kona ni kairira bwa ti na karinea riki.​—TaiAre. 77:​11-15.

5-6. (a) Tera nanon aran te Atua? (b) Ni kaineti ma Te Otinako 3:​13, 14 ao Itaia 64:​8, n aaro raa ake e karaoi iai bwaai Iehova?

⁵ Tera ae ti ataia ibukin nanon aran te Atua? A bati taan rabakau aika kakoauaa bwa nanon te ara ae Iehova, “E Karaoia Bwa E na Riki.” Ti kauringaki n anne bwa e aki kona n totokoaki ana kantaninga Iehova ao e kona ni karaoi bwaai nako. N te aro raa?

⁶ E karaoi bwaai nako Iehova man arona n riki bwa te bwai ae e kainnanoaki ibukini kakororaoan ana kantaninga. (Wareka Te Otinako 3:​13, 14.) Ti okioki ni kaungaaki bwa ti na iaiangoa aroaron te Atua anne. E kona naba Iehova ni karaoiia ana toro aika aomata bwa a na riki bwa baika kainnanoaki bwa a aonga n toro irouna, ao ni kakororaoa ana kantaninga. (Wareka Itaia 64:8.) N aanga aikai, e a kakororaoa iai nanona Iehova. Akea te bwai teuana ae  kona n tukia mani kakororaoan ana kantaninga.​—Ita. 46:​10, 11.

7. Ti na kangaa ni karikirakea karinean Tamara are i karawa?

⁷ Ti kona ni karikirakea karinean Tamara are i karawa ngkana ti kananoi ara iango i aoni baike e a tia ni karaoi, ao ake e buokira bwa ti na kona ni karaoi. N te katoto, ngkana ti kananoi ara iango i aoni kamimin te karikibwai, a na bon rotaki nanora n te karinerine ibukini baike e a tia ni karaoi Iehova. (TaiAre. 8:​3, 4) Ao ngkana ti kananoi ara iango i aon aron Iehova ni buokira ni kakororaoa ana kantaninga, e na bon rikirake karineana iroura. E bon riai ni karineaki te ara ae Iehova! E irekereke ma aron Tamara ni kabane, bwaai nako ake e a tia ni karaoi, ao baike e na karaoi.​—TaiAre. 89:​7, 8.

8. Tera ae kaotaki n Te Tua-Kaua 32:​2, 3 ibukin aron Iehova n iangoa arana?

⁸ Imwain raoi rinia tibun Iteraera n te Aba ni Berita ao Iehova e a reireina Mote te anene teuana. (TuaKau. 31:19) E riai Mote ni manga reireinia aomata. (Wareka Te Tua-Kaua 32:​2, 3.) Ngkana ti iangoa raoi kibuna 2 ao 3, e oti iai bwa e aki tangiria Iehova bwa e na karabaaki arana ao n iangoaki bwa e a rangi n tabu n te aro are e a aki kona n tataekinaki. E tangiria bwa e na ataaki arana irouia aomata nako! Ai kakabwaiaakira tibun Iteraera n ongongora irouni Mote ngke e reireinia taekan Iehova ao arana ae mimitong! N aron te maatim ni karau ae bwaka i aon aroka, a kakorakoraaki naba ao ni kabebeteaki ni baike e reireinia Mote. Ti na kangaa n angareirei n aron naba anne?

9. Ti na kangaa ni buoka katabuan aran Iehova?

⁹ Ngkana ti uarongorongo man te auti teuana ma teuana ke n ana tabo te botannaomata, ti kona ni kamanena te Baibara ni kaota iai aran te Atua ae Iehova nakoia aomata. Ti kona n angania booki, taamnei aika tamaroa, ke baike a toka n ara atureti n te intanete, ake e karineaki iai Iehova. E kona n reke angara ni maroroakina taekan Atuara ae tangiraki ma aroarona, n te tabo ni mwakuri, n te tabo n reirei, ke n ara tai ni mwamwananga. Ti kona n taekin nakoia baika tamaroa ake e na karaoi Iehova ibukira ma te aonnaba. Ao ngkana a ongo, tao a a tibwa ataia ae e rangi n tangiriia Iehova. Ngkana ti taekina nakoia aomata te koaua ibukin Tamara ae tatangira, ti buoka naba iai katabuan aran te Atua. Ti kaitiaka iai taekan Iehova mani keewe ao uarao ake a reireinaki iai aomata. Ti bon angania aomata reirei aika rangi ni kabebetenano.​—Ita. 65:​13, 14.

10. Ngkana ti kairi reirei n te Baibara, e aera bwa ti riai ni karaoa ae bati riki nakon tii reireinakia ana kaetieti ao ana tua te Atua?

¹⁰ Ngkana ti kairi reirei n te Baibara, ti kani buokiia naake ti reirei ma ngaiia bwa a na ataa aran Iehova ao ni kamanena. Irarikina, ti kani buokiia naba bwa a na kinaa raoi Iehova. E na reke anne ngkana ti a tii reireinia naba ana tua te Atua, ana kairiri, ao kaetieti ibukin te aroaro ni maiu? E kona te aomata ae reirei n te Baibara n reiakin ana tua te Atua ao n anaaki nanona iai. Ma e na ongeaba iroun Iehova ibukin tangirana? Uringnga are e atai naba ana tua te Atua Ewa, ma e aki tangira raoi te tia Karaotua, ao ai aron naba Atam. (KBwaai 3:​1-6) Ngaia are e bati riki ae ti riai ni karaoia nakon tii reireinaia aomata ana kaetieti ao ana tua te Atua aika raraoi.

11. Ngkana ti reireinia aomata ana tua te Atua ma ana kaetieti, ti na kangaa ni buokiia bwa a na tangira te tia Karaotua?

¹¹ A rangi n tamaroa ao n anainano ana  kaetieti ao ana tua Iehova. (TaiAre. 119:​97, 111, 112) Ma a kona n aki iangoa anne ara reirei n te Baibara ngkana a aki ota ae a boto tuua akanne i aon ana tangira Iehova. Ngaia are ti kona n titirakinia ni kangai: “E aera te Atua ngkai e tuangia ana toro bwa a na karaoa aei ke n rawa nakoni karaoan aei? Tera reireiara n anne ibukin Iehova?” Ngkana ti buokiia ara reirei n te Baibara bwa a na iaiangoa Iehova ao ni karikirakea tangiran raoi arana ae mimitong, ti na kai rotii riki nanoia. Ane a nang aki tii tangiri ana tua, ma a na tangira naba te tia Karaotua. (TaiAre. 119:68) E na rikirake iai aia onimaki ao a na buokaki naba iai n nanomwaaka i aani kataaki aika kakaiaki.​—1Kor. 3:​12-15.

12. E kangaa Tawita ni kabwaka ni katiteuanaa nanona n te tai teuana, ao tera mwina?

¹² E kangai te kibuntaeka ae kakawaki n Taian Areru 86:11: “Katiteuanaa nanou.” E kairaki n te taamnei te Uea ae Tawita bwa e na korei taeka akanne. I nanoni maiuna, e noria ae e rangi ni kai bwenaua te nano. N te tai teuana ngke e mena i taubukin ana auti, e a nora te aine ae buun te mwaane temanna n tebotebo. E katiteuanaaki nanon Tawita n te tai anne ke e a bwenaua? E ataa ana kaetieti Iehova aei: “Ko na tai mataaiakina buun raom.” (TeOti. 20:17) Ma n taraana, e bon teimatoa n tataraa neiei. E a bwenaua nanona i marenan ana kaibwabwaru ibukin te aine ae Batateba, ao kani kakukureian Iehova. E ngae ngke e a maan Tawita n tangira Iehova ao ni maakua, ma e iraanako kaibwabwarun nanona. N te tai anne, e a toua te kawai ae rangi ni buakaka Tawita. E karekea kabuakakaan aran Iehova. E boni karokoa naba Tawita te kabuanibwai i aoia aomata aika akea aia bure ao ana utu.​—2Tam. 11:​1-5, 14-17; 12:​7-12.

13. Ti kangaa n ataia bwa e a manga katiteuanaaki nanon Tawita?

¹³ E reireinaki ni kaetaki Tawita iroun Iehova, ao e a manga oki ana iraorao ma Iehova. (2Tam. 12:13; TaiAre. 51:​2-4, 17) E ururinga Tawita te kangaanga ao te rawawata are reke imwin are e kariaia bwa e na bwenaua nanona. E kona naba n rairaki ana taeka are n Taian Areru 86:11 ni kangai: “Anganai te nano ae aki nanououa.” E buoka Tawita Iehova ni katiteuanaa nanona bwa e na tabwanin raoi? Eng, bwa e taekinaki imwina n ana Taeka Iehova bwa Tawita bon te mwaane ae “tabwanin raoi nanona nakon Iehova ae Atuana.”​—1Uea 11:4; 15:3.

14. Tera ae ti riai n titirakinira iai, ao bukin tera?

 ¹⁴ E kaunganano ana katoto Tawita ao bon te reirei naba ni kauring. Karaoan te bure ae kakaiaki irouna bon te reirei ni kauring nakoia ana toro te Atua ni boong aikai. E ngae ngke ti a tibwa beku iroun Iehova ke ti a maan, ma ti riai n titirakinira ni kangai, ‘I totokoi ana anga Tatan ni kani bwenauaa nanou?’

15. E na kangaa maakakin te Atua ni kamanoira ngkana ti nori taamnei aika bwaitingako?

¹⁵ N te katoto, ngkana ko nora te taamnei n te TV ke n te intanete ae kona ni karioa te iangobuaka, tera arom iai? Ko kona ni waekoa n iangoia bwa bon tiaki raoi taamnein te bwaitingako. Ke tao bon ana bwai ni kamwane Tatan bwa e aonga ni bwenaua nanom? (2Kor. 2:11) E kona te taamnei anne ni kabotauaki ma te tanai ae e kabongana te mwaane temanna ni bwenaa iai te kai ae bubura. N te moantai ao e rin win te tanai anne teutana n te kai. Ma ngke e a ororeia, e a nano riki win te tanai n rin, ao e a bwenaua te kai anne. E kona te taamnei ae buakaka n riki bwa kaanga te tanai are e a tibwa rin wina teutana? Matakuakinani baika taraa n aki karuanikai e kona ni kaira te aomata teutana imwin teutana bwa e na bure nakon Iehova. Ngaia are rarawa ni karina te bwai teuana ae buakaka i nanom! Teimatoa ni katiteuanaa nanom bwa e na maaka aran Iehova!

16. Ngkana ti kaaitara ma te kariri, baikara titiraki aika ti na titirakinira iai?

¹⁶ Irarikin taamnei aika bubuaka, e kamanenai naba Tatan kariri aika bati riki bwa ti aonga ni karaoa ae bure. Tera arora iai? E bebete iangoan ae a aki rangi ni buakaka baikai. N te katoto, ti kona ni kangai: ‘I aki kona ni kabaneaki man te ekaretia ni karaoan aei, bon tiaki te bure ae kakaiaki.’ E rangi ni kairua te iango anne. Ti wanawana  riki ngkana ti titirakinira ni kangai: ‘E kataia Tatan ni kamanena te kariri aei bwa e aonga ni bwenaua nanou? Ngkana I iraanako nanou ni kaibwabwaru, e na kabuakakaaki iai aran Iehova? E na kaaniai riki ma Atuau karaoan aei, ke e na kararoaai riki?’ Kananoa am iango i aon titiraki akanne. Tataroa te wanawana bwa ko aonga ni kaekai raoi ao n aki mwamwanaiko i bon iroum. (Iak. 1:5) Karaoan anne e kona n riki bwa kamanoam. E kona ni buokiko n rarawa nakon te kariri, n aron are e karaoia Iesu ngke e kangai: “An naako Tatan!”​—Mat. 4:10.

17. E aera bwa e aki raoiroi ngkana e bwenaua nanora? Kabwarabwaraa.

¹⁷ E bon aki riai ni bwenaua nanora. Iangoiia kaain te tiim n takaakaro ae e aki nakoraoi reitakia. Tabeman a kani kamoamoaaki n tii ngaiia, ake tabeman a aki kan ira tuan te takaakaro, ao iai naba aika aki karinea te tia reireinia ni kataneiaia. E na bae n aki tokanikai te tiim anne. Ma te tiim ae a katiteuanaaki kaaina e na kai reke riki tokanikaina. E kona n riki nanom bwa kaanga te tiim ane nakoraoi anne ngkana a katiteuanaaki nakon te beku ibukin Iehova am iango, baika ko tangiri, ao am namakin. Uringnga are e kani bwenauaa nanom Tatan. E tangiria bwa a na kaaitara ao ni kauntaba ma ana kaetieti Iehova, am iango, baika ko tangiri, ao am namakin. Ma e bon riai n tabwanin raoi nanom bwa ko aonga ni beku ibukin Iehova. (Mat. 22:​36-38) Tai kariaia Tatan bwa e na bwenauaa nanom!

18. Ni kaineti ma Mika 4:​5, tera ae ko kamatoaa nanom bwa ko na karaoia?

¹⁸ Tataro nakon Iehova ni kangai, n aron Tawita: “Katiteuanaa nanou bwa e na maaka aram.” Katea tiam bwa ko na maiuakina am tataro anne. Kamatoaa nanom ni katoabong bwa ko na kaotia ae ko rangi ni karinea aran Iehova ae tabu, n am motinnano aika aki rangi ni kakawaki ao aika kakawaki naba. Ni karaoan anne, ko na boni karekea kamoamoaan te ara anne ngkai Ana Tia Kakoaua Iehova ngkoe. (TaeRab. 27:11) Ao ti na boni kona ngaira ni kabane n taekina ae kangai ma te burabeti are Mika: “Ti na nakonako ngaira n aran Iehova ae Atuara n aki totoki.”​—Mika 4:5.