1. Ano ang buot silingon sang pagkahadlok sa Dios, kag ngaa dapat may amo sini nga sahi sang kahadlok ang mga nagapalangga kay Jehova?

PALANGGA sang mga Cristiano ang Dios kag nagakahadlok man sila sa iya. Para sa iban, daw indi puede upuron ang pagpalangga kag kahadlok. Pero indi ini parte sa kahadlok nga nagapakulba sa imo, kundi isa ini ka maayo nga kahadlok. Ang mga tawo nga may amo sini nga sahi sang kahadlok nagadayaw sa Dios kag nagatahod gid sa iya. Indi nila gusto nga maakig ang ila Amay sa langit kay indi nila gusto nga maguba ang ila pagpakig-abyan sa iya.—Sal. 111:10; Hulu. 8:13.

2. Base sa ginhambal ni Hari David nga mabasa sa Salmo 86:11, ano ang duha ka butang nga binagbinagon naton?

² Basaha ang Salmo 86:11. Kon pamalandungan mo ang ginhambal sang matutom nga si Hari David, makasiling ka gid nga nahangpan niya kon daw ano kaimportante ang pagkahadlok sa Dios. Binagbinagon naton kon paano naton maaplikar ang ginsiling ni David sa iya pangamuyo. Una, binagbinagon naton kon ngaa dapat kita magkahadlok sa ngalan sang Dios. Ikaduha, binagbinagon naton kon paano naton mapakita sa aton mga ginahimo adlaw-adlaw nga nagakahadlok kita sa ngalan sang Dios.

3. Ano ang naeksperiensiahan ni Moises nga mahimo nakabulig sa iya nga padayon nga kahadlukan ang ngalan sang Dios?

³ Hunahunaa kon ano ang ginbatyag ni Moises sang nagakuob sia sa buho sa igang kag nakita niya nga naglabay ang himaya ni Jehova. Mahimo nga amo ini ang pinakamakahalawhaw nga hitabo  nga naeksperiensiahan sang isa ka tawo antes nagkabuhi si Jesus sa duta. Nabatian ni Moises nga nagsiling ang anghel: “Si Jehova, si Jehova, isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran, nagapakita sing mainunungon nga gugma sa linibo, nagapatawad sing sayop kag paglapas kag sala.” (Ex. 33:17-23; 34:5-7) Mahimo nga ginahunahuna ni Moises ini nga eksperiensia kon ginagamit niya ang ngalan ni Jehova. Gani ginpaandaman sang ulihi ni Moises ang katawhan sang Dios nga Israel nga ‘kahadlukan ining mahimayaon kag makahalawhaw nga ngalan.’—Deut. 28:58.

4. Ano ang makabulig sa aton nga mas kahadlukan pa gid si Jehova?

⁴ Kon ginahunahuna naton ang ngalan ni Jehova, dapat man naton pamalandungan kon ano sia nga sahi sang Dios. Dapat naton hunahunaon ang iya mga kinaiya, pareho sang iya gahom, kaalam, katarungan, kag gugma. Kon pamalandungan naton ini kag ang iban pa niya nga mga kinaiya, magapalig-on ini sa aton nga mas kahadlukan pa gid sia.—Sal. 77:11-15.

5-6. (a) Ano ang kahulugan sang ngalan sang Dios? (b) Suno sa Exodo 3:13, 14 kag Isaias 64:8, sa ano nga mga paagi ginatuman ni Jehova ang iya katuyuan?

⁵ Ano ang kahulugan sang ngalan sang Dios? Madamo nga eksperto sa Biblia ang nagasiling nga ang ngalan ni Jehova posible nga nagakahulugan sing “Ginapahanabo Niya nga Mangin Amo.” Ina nga kahulugan nagapahanumdom sa aton nga wala sing makapugong kay Jehova sa pagtuman niya sang iya katuyuan. Paano?

⁶ Una, ginahimo ni Jehova ang bisan ano nga kinahanglan himuon para matuman ang iya katuyuan. (Basaha ang Exodo 3:13, 14.) Masami kita ginapalig-on nga pamalandungan ining dalayawon nga bahin sang personalidad sang Dios. Ikaduha, ginapaposible ni Jehova nga mahimo sang iya indi perpekto nga mga alagad ang bisan ano nga kinahanglan himuon para maalagad sia kag matuman ang iya katuyuan. (Basaha ang Isaias 64:8.) Sa sini nga mga paagi, ginatuman ni Jehova ang iya kabubut-on. Wala sing makapugong sa iya nga matuman ang iya katuyuan.—Isa. 46:10, 11.

7. Ano ang himuon naton para mas pasalamatan pa gid naton ang aton Amay sa langit?

 ⁷ Kon pamalandungan naton ang mga ginhimo sang aton Amay sa langit kag ang mga ginhimo niya para masarangan naton ang mga ginapahimo niya sa aton, mas pasalamatan pa gid naton sia. Halimbawa, kon pamalandungan naton ang tanan nga gintuga ni Jehova, magadayaw pa gid kita sa tanan niya nga ginhimo. (Sal. 8:3, 4) Kag kon pamalandungan naton kon paano kita ginbuligan ni Jehova para mahimo ang iya kabubut-on, mas tahuron pa gid naton sia. Makahalawhaw gid ang ngalan ni Jehova! Nagarepresentar ini sang tanan parte sa aton Amay, sa tanan niya nga ginhimo, kag sa tanan niya nga pagahimuon.—Sal. 89:7, 8.

8. Suno sa Deuteronomio 32:2, 3, ano ang gusto ni Jehova nga himuon sang iya mga alagad sa iya ngalan?

⁸ Antes magsulod ang mga Israelinhon sa Ginsaad nga Duta, gintudluan ni Jehova si Moises sang isa ka ambahanon. (Deut. 31:19) Dayon gintudluan ni Moises ang katawhan sang sini nga ambahanon. (Basaha ang Deuteronomio 32:2, 3.) Kon pamalandungan naton ang bersikulo 2 kag 3, maathag nga indi gusto ni Jehova nga taguon ang iya ngalan, kag indi niya gusto ang ginahimo sang iban nga indi pagmitlang sini kay para sa ila tuman ini ka balaan. Gusto niya nga mabal-an sang tanan ang iya ngalan. Isa gid ka pribilehiyo para sa mga Israelinhon nga tudluan sila ni Moises parte kay Jehova kag parte sa Iya dalayawon nga ngalan. Ang mga gintudlo sa ila ni Moises nagpabakod gid sang ila pagtuo kag nagpalig-on sa ila, pareho sang hustuhan lang nga ulan para magtubo ang tanom. Ano ang himuon naton para may amo man sini nga epekto ang aton pagtudlo sa iban?

9. Paano kita makabulig sa pagpakabalaan sa ngalan ni Jehova?

⁹ Kon nagapamalaybalay kita ukon nagabantala sa publiko nga mga lugar, gamiton naton ang aton Biblia para isugid sa mga tawo nga Jehova ang ngalan sang Dios. Puede naton sila hatagan sang matahom nga mga publikasyon, patan-awon sang manami nga mga video, kag ipakita sa ila ang mga unod sang aton website nga nagapadungog kay Jehova. Sa ulubrahan, sa eskwelahan, ukon samtang nagabiyahe kita, mahimo may mga kahigayunan nga maistorya naton sa iban ang parte sa aton Dios kag kon ano ang iya mga kinaiya. Kon sugiran naton ang iban parte sa dalayawon nga pagahimuon ni Jehova para sa aton kag sa duta, ginabuligan naton sila nga mabal-an nga palangga gid kita ni Jehova, kag mahimo bag-o ini nga panudlo sa ila. Paagi sa pagsugid sang mga kamatuoran parte sa aton mahigugmaon nga Amay, nagabulig kita sa pagpakabalaan sa ngalan sang Dios. Ginabuligan naton ang mga tawo nga mahangpan nga gintudluan gali sila sang madamo nga kabutigan parte kay Jehova. Makapaumpaw gid sa mga tawo ang mga ginatudlo naton halin sa Biblia.—Isa. 65:13, 14.

10. Ngaa indi bastante nga parte lang sa mga kasuguan sang Dios ang itudlo naton sa mga nagatuon sang Biblia?

¹⁰ Kon nagatudlo kita sang Biblia sa iban, dapat naton ipakilala sa ila ang ngalan ni Jehova kag buligan sila nga gamiton ini. Dapat man naton sila buligan nga makilala sing maayo si Jehova. Mahimo bala naton ini kon parte lang sa mga ginapatuman kag kasuguan sang Dios ang ginatudlo naton sa ila? Matun-an sang nagatuon sang Biblia ang parte sa mga kasuguan sang Dios, kag mahimo magadayaw pa gani sia sa sini. Pero tumanon niya ayhan si Jehova bangod palangga niya sia? Dumduma nga nabal-an ni Eva ang sugo sang Dios, pero indi bug-os ang iya gugma sa Dios; amo man si Adan. (Gen. 3:1-6) Gani may dapat pa kita himuon magluwas sa pagtudlo sa iban parte sa mga ginapatuman kag kasuguan sang Dios.

11. Kon nagatudlo kita sa iban parte sa mga ginapatuman kag kasuguan sang Dios, paano naton sila mabuligan nga higugmaon ang naghatag sini nga mga kasuguan?

 ¹¹ Ang mga ginapatuman kag kasuguan ni Jehova may maayo pirme nga resulta. (Sal. 119:97, 111, 112) Pero indi ini paghunahunaon sang mga nagatuon sang Biblia kon indi nila mahangpan nga ginhimo ini ni Jehova bangod palangga niya kita. Gani mahimo naton sila pamangkuton: “Sa banta mo, ngaa ginapatuman ini sang Dios? Ngaa ginadumilian niya kita sa paghimo sini? Ano ang ginatudlo sini sa aton parte sa iya?” Kon buligan naton sila nga hunahunaon si Jehova kag higugmaon sing bug-os ang iya dalayawon nga ngalan, mahimo nga iaplikar gid nila ang ila mga natun-an. Magluwas nga pabaloran nila ang mga kasuguan, higugmaon pa gid nila ang naghatag sini nga mga kasuguan. (Sal. 119:68) Magabakod ang ila pagtuo kag magabulig ini sa ila nga mabatas ang mabudlay nga mga pagtilaw.—1 Cor. 3:12-15.

12. Paano nangin indi bug-os ang tagipusuon ni David, kag ano ang nangin resulta?

¹² Importante man ang ginsiling ni Hari David nga “bug-usa ang akon tagipusuon” nga mabasa sa Salmo 86:11. Naeksperiensiahan niya kon daw ano kahapos nga mangin indi bug-os ang tagipusuon. Isa ka bes, sang ara sia sa atop sang iya balay, nakita niya nga nagapaligo ang isa ka babayi nga may bana. Sadto nga tion, bug-os bala ang tagipusuon ni David ukon indi? Nabal-an niya ang sugo ni Jehova: “Indi kamo magkaibog sa asawa sang inyo isigkatawo.” (Ex. 20:17) Pero, padayon niya nga gintulok ang babayi nga si Bat-seba. Natunga ang iya tagipusuon kay gusto niya pahamut-an si Jehova pero ginahandum man niya ang babayi. Bisan madugay na nga ginapalangga kag ginakahadlukan ni David si Jehova, nadaug sia sang iya malain nga handum. Bangod sini, nakahimo si David sang mabug-at nga sala. Ang iya ginhimo nagpakahuya sa ngalan ni Jehova. Nahalitan man ang inosente nga mga tawo pati ang iya pamilya.—2 Sam. 11:1-5, 14-17; 12:7-12.

13. Ngaa makasiling kita nga nangin bug-os liwat ang tagipusuon ni David?

¹³ Gindisiplina ni Jehova si David, kag nangin maayo liwat ang iya kaangtanan kay Jehova. (2 Sam. 12:13; Sal. 51:2-4, 17) Nadumduman ni David ang naeksperiensiahan niya nga mga problema kag kasubo sang natunga ang iya tagipusuon. Ang iya ginsiling nga mabasa sa Salmo 86:11 mahimo man i-translate sing subong sini: “Hatagi ako sing wala nabahin [ukon natunga] nga tagipusuon.” Ginbuligan bala ni Jehova si David nga mangin bug-os liwat ang iya tagipusuon? Huo, kay ang Pulong ni Jehova nagsiling nga ‘bug-os ang tagipusuon ni David kay Jehova nga iya Dios.’—1 Hari 11:4; 15:3.

14. Ano ang dapat naton ipamangkot sa aton kaugalingon, kag ngaa?

 ¹⁴ Makapalig-on gid ang halimbawa ni David, pero paandam man ini sa aton. Nakahimo sia sang mabug-at nga sala kag paandam ini sa mga alagad sang Dios subong. Bag-uhan man kita ukon tinuig na nga nagaalagad kay Jehova, dapat naton pamangkuton ang aton kaugalingon, ‘Ginapakigbatuan ko bala ang ginahimo ni Satanas para mangin indi bug-os ang akon tagipusuon?’

15. Paano ang kahadlok sa Dios magaamlig sa aton kon makakita kita sang mga piktyur nga makapahunahuna sa aton sang imoral?

¹⁵ Halimbawa, kon may makita ka sa TV ukon sa Internet nga makapahunahuna sa imo sang imoral, ano ang himuon mo? Basi magrason ka nga ang nakita mo nga piktyur ukon pelikula indi man pornograpiko. Pero indi ayhan nga ginagamit ini ni Satanas para mangin indi bug-os ang imo tagipusuon? (2 Cor. 2:11) Ina nga piktyur ukon pelikula daw pareho sa isa ka wasay nga ginagamit sang isa ka tawo para pihakon ang isa ka daku nga troso ukon kahoy. Indi mapihak ang kahoy sa una pa lang nga pagwasay. Pero sa sigesige nga pagwasay, mapihak gid ang kahoy. Indi bala nga ang mga piktyur nga makapahunahuna sang imoral daw pareho sa wasay? Indi pa hilmunon ang epekto sini sa primero, pero sa ulihi tungaon sini ang imo tagipusuon kag magahimo ka na sang sala. Gani indi pagpasudla sa imo tagipusuon ang bisan ano nga indi maayo. Tinguhai nga mangin bug-os ang imo tagipusuon sa pagkahadlok sa ngalan ni Jehova.

16. Kon ginasulay kita, ano ang dapat naton ipamangkot sa aton kaugalingon?

¹⁶ Magluwas sa mga piktyur nga makapahunahuna sa aton sang imoral, madamo pa sing ginagamit si Satanas para sulayon kita nga maghimo sing malain. Ano ang himuon naton kon ginasulay kita? Basi maghunahuna kita nga indi man gid amo sina kalain ang ginasulay sa aton nga himuon. Halimbawa, basi magpensar kita: ‘Indi man ako ma-disfellowship kon himuon ko ina.’  Sala gid ina nga pangatarungan. Mas maayo kon pamangkuton naton ang aton kaugalingon: ‘Indi ayhan nga ginagamit ini ni Satanas para mangin indi bug-os ang akon tagipusuon? Kon magpadaug ako sa malain nga mga handum, indi ayhan mapakahuy-an ko ang ngalan ni Jehova? Kon himuon ko ini, magapasuod bala ini sa akon sa Dios ukon makaguba ini sang akon kaangtanan sa iya?’ Pamalandungi ini nga mga pamangkot. Mangamuyo sing kaalam para masabat mo ini sing matuodtuod. (Sant. 1:5) Kon himuon mo ini, maamligan ka kag masikway mo ang pagsulay pareho sa ginhimo ni Jesus sang nagsiling sia: “Palayo ka, Satanas!”—Mat. 4:10.

17. Ngaa indi maayo ang indi bug-os nga tagipusuon? Maghatag sing halimbawa.

¹⁷ Indi maayo kon indi bug-os ang aton tagipusuon. Imadyina ang isa ka team nga ang mga miembro wala nagaintiendihanay. Gusto sang iban nga sila lang ang dayawon, ang iban nagadinaya, kag ang iban naman wala nagataha sa ila coach. Labanlaban nga mapierde ini nga team. Pero ang team nga nagabuligay kag wala nagakontrahanay daku ang tsansa nga magdaug. Ang imo tagipusuon mangin pareho sa sini nga team kon ang imo panghunahuna, handum, kag balatyagon nagabuligay kag wala nagakontrahanay sa pag-alagad kay Jehova. Tandai nga gusto ni Satanas nga mangin indi bug-os ang imo tagipusuon. Gusto niya nga mabudlayan ka sa pagdesisyon kon bala tumanon mo si Jehova ukon himuon mo ang imo malain nga handum. Gani dapat mangin bug-os ang imo tagipusuon para maalagad mo si Jehova. (Mat. 22:36-38) Indi pagtuguti nga matunga ni Satanas ang imo tagipusuon!

18. Base sa Miqueas 4:5, ano ang gusto mo nga himuon?

¹⁸ Ipangamuyo kay Jehova ang pareho sa ginpangamuyo ni David: “Bug-usa ang akon tagipusuon sa pagkahadlok sa imo ngalan.” Panikasugi nga mahimo mo ang imo ginapangamuyo. Kada adlaw, ipakita sa tanan mo nga desisyon nga nagakahadlok ka sa balaan nga ngalan ni Jehova. Kon himuon mo ini, makabulig ka nga dayawon ang ngalan ni Jehova bilang iya Saksi. (Hulu. 27:11) Kag masiling man naton tanan ang ginsiling ni manalagna Miqueas: “Magalakat kita sa ngalan ni Jehova nga aton Dios sa wala sing katubtuban.”—Miq. 4:5.