1. Hwm Vajtswv yog li cas tiag?

COV KHIXATIA uas hlub Vajtswv yuav hwm nws. Hwm Vajtswv yog li cas tiag? Cov uas hwm Vajtswv muab nws saib hlob thiab paub ntshai tsam nws tu siab. Lawv tsis xav ua ib yam dabtsi uas yuav rhuav lawv txojkev sib raug zoo nrog nws.​—Phau Ntawv Nkauj 111:10; Pajlug 8:13.

2. Raws li Vajntxwv Daviv cov lus thov hauv Phau Ntawv Nkauj 86:11, peb yuav tham txog 2 lo lus nug twg?

² Nyeem Phau Ntawv Nkauj 86:11. Vajntxwv Daviv paub tias nws yuav tsum muab Vajtswv saib hlob thiab hwm nws. Daviv cov lus thov pab tau peb li cas? Peb yuav tham seb (1) vim li cas peb yuav tsum hwm Vajtswv lub npe thiab (2) yog peb hwm Vajtswv lub npe ces peb yuav ua li cas?

3. Mauxes pom dabtsi thiaj ua rau nws hwm Vajtswv lub npe?

³ Sim xav seb Mauxes xav li cas thaum nws nkaum hauv kis pob zeb thiab pom Yehauvas lub hwjchim los dhau ntawm nws mus lawm. Yeej yog ib qho uas phim hwj kawg nkaus uas tsis tau muaj neeg pom dua li. Mauxes hnov ib tug tubtxib saum ntuj lub suab hais tias: “Kuv yog tus TSWV [“Yehauvas,” NWT], Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees. Kuv txojkev hlub yuav nyob nrog ntau txhiab tiam neeg, thiab zam txim rau tej neeg ua phem thiab muaj txim.” (Khiav Dim 33:17-23; 34:5-7) Ntshe thaum  twg Mauxes siv Yehauvas lub npe nws yuav xav txog lub sijhawm no. Mauxes thiaj ceeb toom kom Vajtswv haivneeg Yixalayees ‘hwm tus tswv Yehauvas uas yog lawv tus Vajtswv lub npe.’​—2 Kevcai 28:58.

4. Peb yuav tsum ua li cas peb thiaj yuav hajyam hwm Yehauvas?

⁴ Thaum peb xav txog Yehauvas lub npe peb yuav tsum xav seb nws zoo li cas xws li nws lub hwjchim, nws lub tswvyim, nws txojkev ncaj ncees, thiab nws txojkev hlub. Thaum peb xav txog tej no peb yuav hajyam hwm nws.​—Phau Ntawv Nkauj 77:11-15.

5, 6. (1) Vajtswv lub npe txhais li cas? (2) Raws li Khiav Dim 3:13, 14 thiab Yaxayas 64:8, Yehauvas ua tau tiav raws li nws lub siab xav li cas?

⁵ Vajtswv lub npe txhais li cas? Cov tub txawj ntse coob tus hais tias Yehauvas lub npe txhais li no: “Nws Ua Kom Muaj Tshwm Sim.” Qhov no qhia tias tsis muaj ib yam dabtsi yuav txwv kom Yehauvas ua tsis tau raws li nws lub siab xav.

⁶ Yehauvas ua tau ib puas tsav yam kom muaj tiav raws li nws lub ntsiab. (Nyeem Khiav Dim 3:13, 14, thiab cov lus hauv qab taw qhia.) Lo lus “Kuv Yeej Yog” hauv Khiav Dim 3:14 kuj txhais tau tias “Kuv Ua Tau Txhua Yam Raws Li Kuv Pom Zoo.” Peb tej ntaub ntawv keev txhawb peb txog qhov no. Yehauvas kuj siv tau tibneeg los ua kom nws lub ntsiab muaj tiav thiab. (Nyeem Yaxayas 64:8.) Twb yog li no Yehauvas thiaj ua tau txhua yam kom tiav raws li nws lub siab xav. Nws npaj siab li cas lawd, nws yeej yuav ua kom muaj tiav li ntawd.​—Yaxayas 46:10, 11.

7. Peb yuav tsum ua li cas peb thiaj qhuas thiab hwm peb Leej Txiv ntau zuj zus?

⁷ Thaum peb xav txog tej uas peb Leej Txiv ua los lawm thiab tej uas nws pab peb ua tau, yuav ua rau peb qhuas thiab hwm nws. Xws li peb qhuas Yehauvas thaum peb xav txog txhua yam uas nws tsim. (Phau Ntawv Nkauj 8:3, 4) Thiab peb hwm nws thaum peb xav txog txhua yam nws ua los pab peb ua tau nws tes haujlwm. Yeej tsim nyog peb hwm Yehauvas lub npe rau qhov nws lub npe qhia tias  nws zoo li cas thiab qhia txog tej nws twb ua los lawm thiab tseem yuav ua.​—Phau Ntawv Nkauj 89:7, 8.

8. Raws li 2 Kevcai 32:2, 3, Yehauvas puas xav kom peb siv nws lub npe?

⁸ Ua ntej cov Yixalayees mus rau hauv tebchaws Kana-as, Yehauvas hais kom Mauxes sau ib zaj nkauj thiab muab qhia rau lawv. (2 Kevcai 31:19; nyeem 2 Kevcai 32:2, 3.) Thaum peb xav txog 2 Kevcai 32:2, 3, peb pom tias Yehauvas xav kom sawvdaws paub nws lub npe. Nws tsis xav kom luag muab nws lub npe zais lossis xav tias nws lub npe tseem ceeb heev tsis tsim nyog muab hais tawm li. Yeej zoo kawg li uas Mauxes qhia cov Yixalayees txog Yehauvas thiab nws lub npe uas dawb huv! Ib yam li kob nag tshauv ua rau tej qoob loo thiab nroj tsuag loj hlob, Mauxes cov lus txhawb tau cov Yixalayees txojkev ntseeg ruaj khov. Peb yuav ua li cas tej uas peb qhia thiaj pab tau lwm tus ib yam li ntawd?

9. Peb yuav pab kom luag hwm Yehauvas lub npe li cas?

⁹ Thaum peb mus tshaj tawm peb siv phau Vajlugkub los qhia tias Vajtswv lub npe hu ua Yehauvas. Peb muab peb tej ntaub ntawv rau lawv nyeem, tso tej yeeb yaj kiab rau lawv saib, thiab qhia peb lub vej xaij rau lawv los tau. Tej no puavleej qhuas Yehauvas lub npe. Thaum peb mus ua haujlwm, mus kawm ntawv, lossis mus ncig teb ncig chaw los peb yeej nrog tau lwm tus tham txog peb tus Vajtswv uas peb hlub tias nws zoo li cas. Thaum lawv hnov tej yam zoo uas Yehauvas yuav pub rau peb yav tom hauv ntej, lawv yuav pom tias Yehauvas hlub lawv npaum li cas. Thaum peb qhia qhov tseeb txog peb Leej Txiv Yehauvas, peb pab kom lawv hwm Yehauvas lub npe thiab pab daws tej lus dag uas lawv hnov txog Yehauvas. Tej uas peb qhia hauv phau Vajlugkub yeej yog ib yam uas raug sawvdaws siab kawg li.​—Yaxayas 65:13, 14.

10. Puas yog peb tsuas qhia cov kawm Vajlugkub txog Vajtswv tej kevcai xwb?

¹⁰ Thaum peb qhia Vajlugkub rau lwm tus, peb xav kom lawv paub thiab siv Yehauvas lub npe. Tsis tas li ntawd xwb peb xav kom lawv paub seb Yehauvas zoo li cas. Yog peb tsuas qhia lawv txog Vajtswv tej kevcai xwb, koj xav lawv puas yuav los paub Yehauvas? Tej zaum tus kawm Vajlugkub yuav paub thiab hwm Yehauvas tej kevcai tiamsis puas yog nws mloog Yehauvas lus vim nws hlub Yehauvas? Nco ntsoov tias Evas yeej paub Vajtswv tej kevcai tiamsis nws tsis hlub Vajtswv kawg siab kawg ntsws, Adas los ib yam nkaus thiab. (Chivkeeb 3:1-6) Yog li ntawd tsis yog peb qhia kom lawv paub Vajtswv tej kevcai thiab tej lus sam hwm xwb tiamsis peb yuav tsum ua ntau tshaj ntawd.

11. Thaum peb qhia Vajtswv tej kevcai thiab lus sam hwm rau tus kawm Vajlugkub, peb yuav pab nws los hlub Vajtswv li cas?

¹¹ Yehauvas tej kevcai thiab tej lus sam hwm yeej zoo rau peb. (Phau Ntawv Nkauj 119:97, 111, 112) Tiamsis tus peb qhia Vajlugkub rau yuav tsis xav li ntawd yog nws tsis paub tias Yehauvas muab tej kevcai ntawd rau peb vim nws hlub peb. Peb yuav tau nug tus kawm Vajlugkub tias: ‘Vim li cas Vajtswv ho hais kom nws cov neeg ua li no?’ lossis ‘Vim li cas Vajtswv ho tsis pub nws cov neeg ua li no?’ ‘Qhov no qhia koj li cas txog Yehauvas?’ Yog peb pab tus peb qhia Vajlugkub rau kom nws xav txog Yehauvas thiab hwm nws lub npe ces tej peb qhia yuav raug nws siab dua. Tus kawm Vajlugkub yuav tsis yog hwm thiab nyiam Vajtswv tej kevcai xwb tiamsis nws yuav los hlub thiab hwm Vajtswv Yehauvas. (Phau Ntawv Nkauj 119:68) Nws txojkev ntseeg yuav loj  hlob thiab nws yuav thev taus kev sim siab uas yuav los raug nws.​—1 Kauleethaus 3:12-15.

12. Daviv yeej ib txwm npuab siab rau Yehauvas, tiamsis muaj ib zaug nws ua li cas?

¹² Cov lus uas Vajntxwv Daviv sau hauv Phau Ntawv Nkauj 86:11 tseem ceeb kawg li. Nws hais tias: “Thov pub kom kuv muaj lub siab dawb paug pehawm koj.” Thaum nws ua neej nyob nws pom tias yoojyim rau peb lub siab xav mus ua lwm yam es tsis npuab Vajtswv. Muaj ib zaug, Daviv nyob saum ru tsev thiab pom ib tug pojniam uas twb muaj txiv lawd da dej. Tus pojniam ntawd hu ua Npasenpas. Thaum ntawd, Daviv lub siab puas npuab Vajtswv? Nws paub tias Yehauvas yeej sam hwm kom “tsis txhob ntshaw luag pojniam.” (Khiav Dim 20:17) Tiamsis Daviv pheej ntsia Npasenpas tsis tseg ces nws lub siab txawm ntshaw Npasenpas tshaj qhov uas ua haum Yehauvas siab. Daviv yeej ib txwm hlub thiab hwm Yehauvas tiamsis zaum no nws qaug rau nws lub siab ntshaw thiab mus ua txhaum lawm. Nws ua rau Yehauvas puas npe thiab tsim teeb meem rau nws tsev neeg thiab luag lwm tus uas twb tsis tau ua txhaum dabtsi li.​—2 Xamuyees 11:1-5, 14-17; 12:7-12.

13. Daviv lub siab puas rov npuab Yehauvas lawm?

¹³ Yehauvas qhuab ntuas Daviv thiab Daviv rov muaj kev sib raug zoo nrog Yehauvas. (2 Xamuyees 12:13; Phau Ntawv Nkauj 51:2-4, 17) Daviv nco ntsoov tej teeb meem thiab kev nyuaj siab uas nws raug thaum nws tsis npuab siab rau Yehauvas. Nws cov lus hauv Phau Ntawv Nkauj 86:11 kuj txhais tau tias: “Thov koj pab kuv muab siab npuab koj xwb.” Yehauvas puas pab Daviv kom Daviv muab lub siab npuab nws? Yehauvas yeej pab. Peb paub li ntawd rau qhov tom qab no Vajtswv Txojlus hais tias Daviv yog ib tug neeg uas “muab lub siab npuab Yehauvas.”​—1 Vajntxwv 11:4; 15:3.

14. Peb yuav tsum nug peb tus kheej li cas thiab yog vim li cas?

¹⁴ Daviv tus qauv no yeej txhawb tau peb thiab ceeb toom peb. Daviv txojkev txhaum ceeb toom Vajtswv cov tub qhe niaj hnub nimno tias txawm peb nyuam qhuav pe hawm Yehauvas lossis twb pe hawm nws tau ntev lawm, peb yuav tsum nug peb tus kheej tias: ‘Kuv puas tawm tsam Xatas thaum nws haub ntxias kom kuv tsis txhob npuab siab rau Yehauvas?’

15. Yog peb hwm Vajtswv ces yuav tiv thaiv tau peb li cas ntawm tej duab uas tsis dawb huv?

¹⁵ Piv xam tias koj pom ib yam hauv this vis  (TV) lossis hauv Is Taws Nej uas tsis dawb huv, koj yuav ua li cas xwb? Tej zaum koj yuav xav tias daim duab no lossis zaj yeeb yaj kiab no twb tsis muaj duab liab qab, tsis phem ua luaj twg. Tiamsis puas yog Xatas siv qhov no los rub koj lub siab mus ua txhaum? (2 Kauleethaus 2:11) Qhov peb pom ntawd zoo ib yam li ib tug neeg uas siv tus tsuas phua ntoo. Thaum xub thawj nws siv tus hniav tsuas los ua kom yav ntoo tawg pleb me me ces nws mam npuj tus tsuas kom tob zuj zus ua rau yav ntoo tawg ob sab. Cov duab tsis dawb huv zoo ib yam li tus hniav tsuas uas ua kom tawg pleb me me xwb. Yog yus pheej saib cov duab ntawd ces tsis ntev yus lub siab yuav coj yus mus ua txhaum. Yog li ntawd peb yuav tsum tsis txhob pub muaj ib yam dabtsi tsis dawb huv nyob hauv peb lub siab peb thiaj yuav npuab siab rau Yehauvas thiab hwm nws lub npe.

16. Thaum peb lub siab yuav coj peb mus ua ib yam tsis zoo peb yuav tsum xav txog cov lus nug twg?

¹⁶ Xatas tsis yog muab cov duab tsis dawb huv los haub ntxias peb xwb tiamsis nws tseem muaj ntau yam los sim peb thiab. Yog li ntawd peb yuav ua li cas xwb? Yoojyim rau peb xav tias tej ntawd tsis phem ua luaj twg. Tej zaum peb yuav hais tias: ‘Yog kuv ua los kuv yeej tsis raug rho tawm.’ Yog peb xav li no ces peb xav tsis yog lawm. Tiag tiag peb yuav tsum xav li no: ‘Puas yog Xatas los haub ntxias kom kuv lub siab tsis npuab Vajtswv? Yog kuv mus ua txhaum lawm kuv puas yuav ua rau Yehauvas puas npe? Qhov kuv ua no puas yuav ua rau kuv txav deb lossis txav ze ntawm Yehauvas?’ Peb yuav tau ua tib zoo xav txog cov lus nug no ua ntej peb ua ib yam dabtsi thiab thov Vajtswv pab peb muaj lub laj lim tswvyim zoo kom peb tsis txhob rov dag peb tus kheej. (Yakaunpaus 1:5) Yog peb  ua li no ces peb yuav tiv thaiv tau peb tus kheej thiab yuav tsis mloog Xatas tej lus haub ntxias. Peb yuav hais tau ib yam li Yexus tias: “Xatas, cia li khiav mus!”​—Mathais 4:10.

17. Piav seb vim li cas thiaj tsis zoo rau peb muaj ob lub siab.

¹⁷ Tsis zoo rau peb muaj ob lub siab. Muab piv txwv li no. Muaj ib pab tub ncaws pob uas tsis sib haum. Ib txhia tsuas xav kom lawv yog tus nrov xwb. Muaj tus puav tsuas ua li lawv lub siab nyiam xwb. Thiab ib co tsis kam ua li tus qhia lawv hais. Ib pab tub ncaws pob zoo li no yeej yuav ncaws tsis yeej luag li. Tiamsis yog lawv koom siab koom ntsws ces lawv ua dabtsi los lawv yeej ua tau. Yog koj lub siab lub ntsws thiab txojkev xav npuab rau Yehauvas ces koj yuav zoo ib yam li pab tub ncaws pob uas koom siab koom ntsws. Nco ntsoov tias Xatas xav kom peb muaj ob lub siab, ib lub siab xav ua li peb lub siab ntshaw ho ib lub siab xav ua kom haum Vajtswv. Tiamsis koj lub siab yuav tsum npuab Yehauvas nkaus xwb koj thiaj teev tiam tau nws. (Mathais 22:36-38) Tsis txhob cia Xatas ua kom koj muaj ob lub siab!

18. Koj yuav ua li Mikhas 4:5 hais li cas?

¹⁸ Thov Yehauvas kom nws pab koj “muaj lub siab dawb paug pehawm” nws thiab nco ntsoov ua raws li koj tau thov Yehauvas lawm. Tej uas koj ua txhua txhua hnub tsis hais loj los me, yuav tsum qhia tias koj hwm Yehauvas lub npe uas dawb huv. Yog koj ua li no koj yuav ua rau Yehauvas tau lub koob lub npe zoo. (Pajlug 27:11) Thiab peb txhua tus uas yog Yehauvas Cov Timkhawv yuav hais tau li Mikhas hais no: “Peb yuav pe thiab mloog tus TSWV [“Yehauvas,” NWT] uas yog peb tus Vajtswv lus mus ibtxhis tsis kawg.”​—Mikhas 4:5.