1. Was petayt angst fon Kot hon, un warom tii woo Yeehoowa liipe prauche tas hon?

TI KRISTE tuun Kot liipe un aach angst fon tëm hon. Fer etliche, tas xtimt net. Awer meyer sin net am xpreche fon te sort angst woo uns mit pang lost. Meyer tuun xpreche fon een unerxiitlich sort angst. Ti mënxe woo tiise sort angst hon, tuun sich mit Kot ferwunere un hon tiife respëkt tsu tëm. Tii wole net sayn himlixe Fater traurich lose, wayl wole net sayn froyntxaft mit tëm fersaue. (Sal. 111:10; Pro. 8:13)

2. Noo Tawi sayn wërter, woo in Salmo 86:11 xteet, iwer was fer tswaay tinge tuun mer xpreche?

² Lees Salmo 86:11. * Wëns tuu aan tiise wërter traan tenkst, tuu khanst taytlich siin tas te kheenich Tawi wust wii wichtiches waar tiife respëkt tsu Kot hon. Tiise xtuutyum tuut uns tsayche was khene mer lërne mit sayn wërter. Eyerst, tuun meyer lërne warom sole mer tiife respëkt tsu Kot sayn naame hon. Tsweet, tuun meyer siin wii khene mer tiife respëkt tsu Kot sayn naame in unser leepe tsayche.

3. Was is mit Mooses pasiirt, woo fiilaycht tëm keholef hot wayter tiife respëkt tsu Kot sayn naame hon?

³ Tenk traan aan wii Mooses sich kexpiirt hot wën tee, kepikt in een loch in te fels, hot kesiin Yeehoowa sayn hërlichkheet  torich keen. Sicher, was tat pasiirt is, teet yeete mënxe ferwunere. Mooses hot tiise wërter keheert, woo neekst sicher een engel kesaat hot: “Yeehoowa, Yeehoowa, een Kot woo parmhërtslich un mitlaytich is, ketultich un fol mit leaale liip un woerheet, woo fer tausente, leaale liip tsaycht, woo feeler, transkretsyoon un sint fertsayt.” (Êxo. 33:17-23; 34:5-7) Es is meechlich tas ti erinerung fon was tat pasiirt is, is tsu Mooses sayn khop khom wën eyer te naame Yeehoowa penutst hot. Es is net xweyer ferxteen, tan, warom Mooses noo heyer hot fer Kot sayn folek Israël kesaat, tas tii solte ‘tiife respëkt tsu tiise hërliche naame hon, woo macht ti anere sich ferwunere.’ (Deut. 28:58)

4. Traan tenke aan was fer kwaliteete tuut unser hërts fol mit tiife respëkt tsu Yeehoowa lose?

⁴ Wën mer tenke iwer te naame Yeehoowa, mer sole aach tenke iwer te Persoon woo hinich te naame is. Meyer sole uns fon sayne kwaliteete erinere, soo wii sayn macht, kluucheet, kerechtichkheet un liip. Traan tenke aan tiise un anere kwaliteete tuut unser hërts fol lose mit tiife respëkt tsu tëm. (Sal. 77:11-15)

5-6. (a) Was petayt Kot sayn naame? (b) Soo wii in Êxodo 3:13, 14 un Isaías 64:8 xteet, in was fer aate Yeehoowa macht tas ti tinge pasiire?

⁵ Was wise mer iwer te petaytung fon Kot sayn naame? Fiile leerer xtime in sayn mënung, tas siit aus tas Yeehoowa sayn naame petayt “Eyer Macht Tas Es Wërt”. Ti petaytung tuut uns erinere tas niks khan Yeehoowa sayn wile um hale, un eyer khan mache tas ti tinge pasiire. Wii soo?

⁶ Yeehoowa macht tas ti tinge pasiire wën eyer macht was neetich is fer sayn propoos erfiile. (Lees Êxodo 3:13, 14.) * Unser puplikatsyoone tuun uns eftas uf muute fer traan tenke aan tiise wunere teel fon Kot sayn  persoonlichkheet. Yeehoowa khan aach mache tas sayn imperfëkte tiiner wëre was neetich is, fer tëm tiine un sayn propoos erfiile. (Lees Isaías 64:8.) * In tiise tswaay aate, Yeehoowa macht tas sayn wile sich erfiilt. Niks khan tëm um hale fon mache tas sayn propoos sich erfiilt. (Isa. 46:10, 11)

7. Wii khene mer unser respëkt tsu unser himlixe Fater ferkreesere?

⁷ Yeehoowa hot fiile tinge kemacht, un eyer macht es meechlich tas meyer aach fiile tinge mache khene. Wën mer aan tiise tinge triwer noo tenke, unser respëkt tsu unser himlixe Fater tuut sich ferkreesere. Tsum payxpiil, wën mer traan tenke aan ti wunere fon ti kriatsyoon, meyer tuun uns ferwunere mit was Yeehoowa kemacht hot. (Sal. 8:3, 4) Un wën mer triwer noo tenke aan wii Yeehoowa xon uns keholef hot fer sayn wile mache, unser tiife respëkt tsu tëm tuut sich ferkreesere. Te naame Yeehoowa tuut uns wërklich ferwunere! Tee hot se tuun mit ales was Yeehoowa is, was hot eyer xon kemacht un was tuut eyer noch mache. (Sal. 89:7, 8)

8. Soo wii in Deuteronômio 32:2, 3 xteet, was wil Yeehoowa tas sayn tiiner mit tëm sayn naame mache?

⁸ Klaych foer tas ti israelite sin rin aan tas Ferxprochne Lant kang, Yeehoowa hot Mooses in kelërnt ti wërter fon een liit. (Deut. 31:19) Mooses solt tiise liit fer Kot sayn folek in lërne. (Lees Deuteronômio 32:2, 3.) * Wën mer triwer noo tenke aan ti wersikele 2 un 3, es is taytlich tas Yeehoowa wil net tas sayn naame ferxtekelt wërt, pehantelt wii wën tee weyer tsu haylich fer se xpreche. Yeehoowa wil tas ale layt tëm sayn naame khëne tuun. Was fer priwilëj es waar fer te folek heere Mooses tëne in lërne iwer Yeehoowa un tëm sayn hërliche naame! Was Mooses tëne in kelërnt hot, hot tëne sayn klaape ferxtërkt un tëne uf kemuut, soo wii te suutel heleft ti plantse kuut wakse. Wii khene mer sicher sin tas ti aat wii mer in lërne, tuut tas selwiche mache?

9. Wii khene mer helfe Yeehoowa sayn naame ferhayliche?

⁹ Wën mer in te preetich aarwayt sin, meyer khene unser Piipel penutse fer Kot sayn persoonlich naame, Yeehoowa, fer ti layt tsayche. Meyer khene fiile tinge fer ti layt aan piite woo eere tsu Yeehoowa pringe, wii: ti xeene puplikatsyoone, ti iwer kuute wiiteos un was trin in te jw.org is. In te aarwayt, in te xuul orer wën mer reese, fiilaycht tuun mer keleechenheete fine fer iwer unser liipe Kot un wii tee wërklich is, xpreche. Meyer khene mit te layt xpreche iwer ti wunerliche tinge woo Yeehoowa tuut fer uns un fer ti eyert mache. Wën tii tas heere, tuun se fiilaycht tas eyerste mool mërke wii fiil tuut Yeehoowa uns liipe! Wën mer fer ti anere ti woerheet iwer unser liipliche Fater xpreche, meyer helfe Kot sayn naame ferhayliche. Meyer helfe ti layt ferxteen tas fiile liie iwer Yeehoowa waare fer tëne in kelërnt kep. Es kept khee anere inlërnung woo khan ti layt mee uf muute un sayn klaape ferxtërke. (Isa. 65:13, 14)

10. Wën mer Piipel xtuutyum fiire, warom mise mer mee wii ploos Kot sayn kesetse in lërne?

¹⁰ Wën mer Piipel xtuutyum fiire, meyer wole unser xtutënte helfe Yeehoowa sayn naame khëne un penutse. Mer wole aach tëne helfe Yeehoowa wërklich khëne lërne. Tuun mer tas kemacht kriin wën mer ploos kesetse, kepoote un reekele in lërne? Eene kuute xtutënt  khan Kot sayn kesetse lërne, un soo kaar tëne respëktiire. Awer, tuut te xtutënt Yeehoowa aan heere weeche ti liip tsu tëm? Erinert tich, Ewa wust was fer waar Kot sayn kesets, awer tii hot net wërklich keliipt te Persoon woo tas kesets fer tëne kep hot; un Aatam aach net. (Gên. 3:1-6) Tes weeche, meyer mise mee wii ploos Kot sayn kerechte kesetse fer ti layt in lërne.

11. Wën mer Kot sayn kesetse in lërne, wii khene mer unser xtutënte helfe ti Persoon woo ti kesetse kept, liipe?

¹¹ Yeehoowa sayn kesetse sin imer kuut fer uns. (Sal. 119:97, 111, 112) Awer unser xtutënte tuun tas ploos aan tiise aat siin, wën tii mërke Yeehoowa sayn liip hinich tiise kesetse. Soo, meyer khene fer unser xtutënte frooe: “Warom tenkst tuu tas Yeehoowa ferlangt fer sayn tiiner tas mache, orer net mache? Was tuut tas uns in lërne iwer Yeehoowa sayn kwaliteete?” Wën mer frooche soo wii tiise mache, mer helfe unser xtutënte iwer Yeehoowa tenke, un woere liip tsu sayn hërliche naame ëntwikele; tan, es wërt laychter aan tëne sayn hërts krayfe. Unser xtutënte tuun net ploos ti kesetse liipe, awer aach ti Persoon woo ti kesetse kept. (Sal. 119:68) Tëne sayn klaape tuut wakse un tii wëre keholef fer ti xweyere proope woo noch khome, aus hale. (1 Cor. 3:12-15)

12. Wii hot Tawi kelos sayn hërts een mool keteelt wëre, un was fer waar te resultaat?

¹² Een wichtich teel fon tëm Salmo 86:11 saat: “Fereenich mayn hërts.” Te Kheenich Tawi hot tiise wërter kexrip. Torich sayn leepe, tee hot kesiin wii laycht is es lose sayn hërts keteelt wëre. Een mool, wën tee waar aan te owich teel fon sayn haus, tee hot ti fraa fon een aner man kesiin sich paate. In tiise xtun, waar Tawi sayn hërts keteelt orer eenich? Tee hot Yeehoowa sayn kesets kekhënt: “Tuu thërfst net ti fraa fon tayn neekste winxe.” (Êxo. 20:17) Awer, es siit aus tas eyer hot wayter kekukt. Sayn hërts is keteelt kep tswixich te wunx fer ti fraa hon, un te wunx fer Yeehoowa kefale. Opwool Tawi hat xon lang heyer Yeehoowa keliipt un tiife respëkt tsu tëm kehat, too hiir, hot eyer xweyere sinte kemacht. Tee hot Yeehoowa sayn naame keflekt. Eyer hot aach xrooe xaat fer unxultiche layt keprung, tepay sayn aychne familye. (2 Sam. 11:1-5, 14-17; 12:7-12)

13. Wii wise mer tas Tawi hot noch mool Yeehoowa mit kans hërts ketiint?

¹³ Yeehoowa hot Tawi kextrooft, un tee hot sayn froyntxaft mit Yeehoowa tsurik kriit. (2 Sam. 12:13; Sal. 51:2-4, 17) Tawi hot sich erinert fon ti propleeme un xmërts woo khom  sin, wën tee kelos hot sayn hërts sich teele. Tëm sayn wërter woo in Salmo 86:11 xteen, khene aach soo kexrip wëre: “Kep mich een hërts woo net keteelt is.” Hot Yeehoowa Tawi keholef noch mool soo een hërts hon? Yaa, wayl Kot sayn Wort xpeeter saat, tas Tawi ‘hot Yeehoowa, sayn Kot, mit kans hërts ketiint’. (1 Reis 11:4; 15:3)

14. Was mise mer uns frooe, un warom?

¹⁴ Tawi sayn payxpiil tuut uns uf muute, awer aach xtarke aanreete fer uns kepe. Tawi hot xweyere sinte kemacht, un meyer wole net tas selwiche mache. Is een tuun op mer khorts orer xon lang tsayt Yeehoowa tiine, meyer al mise uns frooe: ‘Sin ich fest keeche Satanaas sayn aanxtrengung fer mayn hërts teele?’

15. Wii tuut te tiife respëkt tsu Kot uns xitse, wën pilter woo sëksuaale winxe uf hetse, foer khome?

¹⁵ Tsum payxpiil, wëns tuu siist een pilt in te TV orer in te internet, woo tuut tayn sëksuaale winxe uf hetse, was machst tuu? Fiilaycht es weyer laycht fer tich selepst saan: ‘Ah, tas is net pornokrafii.’ Awer meecht tas net een aanxtrengung fon Satanaas sin, fer tayn hërts teele? (2 Cor. 2:11) Meyer khene tiise pilt ferklayche mit een ayse khayl, woo eene man penutst fer eene kroose klots rayse. Eyerst, tuut eyer te tiin un xarf sayt fon te khayl rin aan te klots klope. Tan, keet eyer tiifer un tiifer, pis wan te klots sich in xtike teelt. In te selwich aat, wën mer tiise sorte pilter kuke, fiilaycht te resultaat wërt net klaych kesiin. Awer mit te tsayt, tas khan yemant sayn hërts teele, tsum sint nëme un sayn intekriteet ferpreche. Los nii soo sorte tinge in tayn hërts rin keen! Hal tayn hërts eenich fer tiife respëkt tsu Yeehoowa sayn naame hon!

16. Wën ti fersuuchunge khome, was sole mer uns frooe?

¹⁶ Satanaas penutst net ploos pilter woo sëksuaale winxe uf hetse, awer aach fiil anere tinge woo uns fersuuche fer was ferkheert is mache. Was mache mer? Tsum payxpiil, fiilaycht  tuun mer tenke: ‘Ah, weeche tas, wëre ich net ap kesets fon te kemaynt. Soo, tas khan net soo xweyer sin.’ Soo tenke is kans ferkheert. Es weyer peser uns selepst frooe: ‘Is Satanaas am tiise fersuuchung penutse fer mayn hërts teele? Wën ich fer ti ferkheerte winxe uf kepe, tuut tas Yeehoowa sayn naame ferfleke? Tuut tas mich tichter orer wayter fon Kot xafe?’ Tenkt traan aan tiise sorte frooche. Peet fer kluucheet hon fer eerliche antworte fer tëne kepe. (Tia. 1:5) Tas mache khan tich wërklich xitse. Tuu khanst kraft kriin fer fest keeche ti fersuuchunge plaype, soo wii Yeesus wën eyer kesaat hot: “Kee fat, Satanaas!” (Mat. 4:10)

17. Warom hot een keteeltne hërts weenich weyert? Mach een ferklaychung.

¹⁷ Een keteeltne hërts hot weenich weyert. Xtel tich mool foer een fuuspaal tiim, woo sayn xpiiler tuun net sich kuut kepe. Welche wole ti eere ploos fer sich, anere wole net noo ti reekele xpiile un anere tuun net te tëkniko respëktiire. Es weyer xweyer fer tiise tiim een xpiil kewine. Im keeche teel, een tiim woo eenich is, hot kreeser xans fer se kewine. Tayn hërts khan soo wii tiise eenich tiim sin, wën tayn ketanke, tayn winxe un tayn xpiirunge sin eenich fer Yeehoowa tiine. Ferkes net, Satanaas wil tayn hërts teele. Tee wil tas tayn ketanke, winxe un xpiirunge khëmpfe keeche was Yeehoowa saat richtich is. Awer tayn hërts mus eenich sin fer Yeehoowa tiine. (Mat. 22:36-38) Los nii Satanaas tayn hërts teele!

18. Soo wii in Miqueias 4:5 xteet, was wilst tuu imer mache?

¹⁸ Peet tsu Yeehoowa soo wii Tawi: “Fereenich mayn hërts fer tiife respëkt tsu tayn naame hon.” Mach tayn pestes fer tiise kepeet in tayn leepe aan wëne. Yeete taach, mach was tuu khanst, tas tayn ëntxlise, fon te kleenste pis ti kreeste, tsayche tas tuu tiife respëkt tsu Yeehoowa sayn hayliche naame host. In tiise aat, wii eene fon Yeehoowa sayn Tsayer, tuust tuu eere fer tiise naame pringe. (Pro. 27:11) Un meyer al khene tan saan, mitsamer mit tëm profeet Mikëyas: “Meyer keen im naame fon Yeehoowa, unser Kot, fer imer.” (Miq. 4:5)