1. Anni i assing ta Dios, anna ngatta importante yatun para ta totolay nga mangaya kani Jehova?

PAREHU nga ayatan anna ikassing na Cristiano ira i Dios. Para ta karuan, gittana makkakontra yatun. Ngem ari tu yaw i klase na assing nga mamippig ka. Gigiammuattam i neruma nga klase na assing. Danuri i egga kunnaw nga klase na assidda ay ikakuada i Dios anna napafutuan i respetoda nisa. Manakida nga mapalussaw i nelangitan nga Yamada megafu ta manakida nga madaral i pakikkofudda nisa.​—Sal. 111:10; Prov. 8:13

2. Segun ta kinagi ni Patul David ta Salmo 86:11, anni i dua nga gannug nga gigiammuattam?

² Bibbigan i Salmo 86:11, NW. Durante nga pannonopammu danatun nga uvovug, makagim nga nalippawa ni Patul David i importansia na paganassing ta Dios. Ikonsidera tam nu kunnasi tam meyaplika i kinagi ni David ta pakimallona. Ollu, ammuattam i karuan nga rason nu ngatta ikakua tam i ngagan na Dios. Mekadua, gigiammuattam nu kunnasi tam nga ipasingan yatun ta inaggaw nga pattoletam.

3. Anni nga ekspiriensa i nakoffun kani Moises tapenu kanayun nga ikakua i ngagan na Dios?

³ Nonopan i natageno ni Moises turi ta egga yayya ta Vukig na Horeb anna nasinganna i pattalebag na gloria ni Jehova. Awayyana nga yatun i pinakakappabbaw nga ekspiriensa na maski sinni nga tolay nige nga minay si Jesus ta davvun. Naginna ni Moises i tumunug ira nga uvovug nga manawag nga kinagi na anghel. “Si Jehova, si Jehova, tadday nga Dios nga minangngikallo anna minangngikabbi, ari insigida nga mapporay anna abundansia ta matalo nga aya anna kinakurug,  mangipasingan tu matalo nga aya ta rinivu, mamakoma ta kamali anna tagaruli anna liwa.” (Ex. 33:17-23; 34:5-7) Posible nga meraddamman ni Moises yatun nga ekspiriensa turi ta niyusana i ngagan nga Jehova. Yatutta inabisowan ni Moises i ili na Israel nga “ikassing yaw nga marayaw anna mekakua nga ngagan.”​—Deut. 28:58.

4. Anni i makoffun nittam nga mas ikakua si Jehova?

⁴ Nu pannonopattam i meyannung ta ngagan ni Jehova, mawag nga nonopattam gapa i personalidadna. Daddammattam i kualidadna ira gitta na pakapangngua, sirib, hustisia, anna aya. Nu nonopattam yatun nga kualidad anna karuan paga, mapaguyu ittam nga mas ikakua si Jehova.​—Sal. 77:11-15.

5-6. (a) Anni i kebalinan na ngagan na Dios? (b) Segun ta Exodo 3:13, 14 anna Isaias 64:8, kunnasi nga pabbalinan tu posible ni Jehova i ganna-gannug?

⁵ Anni i ammu tam meyannung ta kebalinan na ngagan na Dios? Kagian na aru nga iskolar nga i kebalinan na ngagan nga Jehova ay “Mawayyana nga Pabbalinan.” Ipanono nittam natun nga awan tu maski anni nga makefugag kani Jehova ta pangituppalna ta urena anna makuana i ngamin nga gannug. Ngatta makagi tam yatun?

⁶ Pabbalinan ni Jehova nga posible i ngamin nga ganna-gannug gukaban na pamabbalinna ta baggina tu maski anni nga kawagan tapenu ituppal i gakkagna. (Bibbigan i Exodo 3:13, 14.) Kanayun nga mepagaram nittam nga monag nga pannonopan yatun nga aspeto na personalidad na Dios. Awayya gapa nga pabbalinan ni Jehova i imperfekto nga totolay tu maski anni nga kawagan tapenu passerbian yayya anna metuppal i gakkagna. (Bibbigan i Isaias 64:8.) Nu kuan ni Jehova yatun, metuppalna i urena. Awan tu maski anni nga makefugag nisa tapenu metuppal i gakkagna.​—Isa. 46:10, 11.

7. Kunnasi tam nga maappresia i nelangitan nga Yama tam?

⁷ Maappresia tam i nelangitan nga Yama tam nu monag nga pannonopattam i kingnguana ngana ira anna i nabbalinattam megafu ta  uffunna. Angngariganna, nu nonopattam i ngamin nga pinaratuna, kuruga mappabbaw ittam ta ngamin nga kingngua ni Jehova. (Sal. 8:3, 4) Anna nu monag nga pannonopattam i neyuffun ni Jehova tapenu metuppal tam i urena, mapeggan ittam tu pangikakua ta nisa. Kuruga mekakua i ngagan nga Jehova. Irepresenta natun i ngamin nga aspeto na personalidad na Yama tam, i ngamin nga kingnguana, anna i ngamin nga kuanna paga.​—Sal. 89:7, 8.

8. Segun ta Deuteronomio 32:2, 3, anni i ikaya ni Jehova nga kuan na aripanna ta ngaganna?

⁸ Nige nga nattallung i Israelita ira ta Nepromesa nga Davvun, sinudduan ni Jehova si Moises tu tadday nga kansion. (Deut. 31:19) Ituddu gapa ni Moises yatun nga kansion ta totolay. (Bibbigan i Deuteronomio 32:2, 3.) Nu pannonopattam i versikulo 2 anna 3, manawag nga manaki ni Jehova nga metagu i ngaganna, nga gittana sobra i kasagradu natun tapenu mevuya. Ikayana nga makannammuan na ngamin nga pinaratu i ngaganna. Pribilehio para ta totolay nga maginna i tuddu ni Moises meyannung kani Jehova anna ta marayaw nga ngaganna! Kagitta na afafu nga mabbaya ta mulu-mula, namasikan ta pangurugda anna namagaram tannira i nituddu ni Moises. Kunnasi tam masiguradu nga kunnatun i panuddu tam?

9. Kunnasi ittam makoffun ta pamakasanto ta ngagan ni Jehova?

⁹ Nu egga ittam ta ministerio, awayya tam nga usan i Biblia tapenu ipasingan ta totolay i personal nga ngagan na Dios nga Jehova. Awayya tam nga iyusa i makakkasta nga literatura, video ira, anna artikulo ira ta website tam nga mangidayaw kani Jehova. Ta trabahu, ta eskuela, onu durante nga mabbiahe ittam, awayya tam nga apan yatun nga tiansa tapenu ikagi i meyannung ta iddukattam nga Dios anna i personalidadna. Ikagi tam gapa i meyannung ta kappabbaw ira nga kuan noka ni Jehova para nittam anna para ta davvun. Anna nu maginnada yatun, awayyana nga tatun pagalaman i ollollu nga pakannammuda ta kadakal na aya ni Jehova para nittam. Nu ikagi tam ta tanakuan i kinakurug meyannung ta minaggiddu nga Yama tam, makoffun ittam ta pamakasanto ta ngaganna. Moffunattam gapa i totolay nga malippawa nga kinaladdug i netuddu nira meyannung kani Jehova. I naggafu ta Biblia nga ituddu tam ta totolay i pinakamakarefresko nga gannug nga awayyada nga magigiammu.​—Isa. 65:13, 14.

10. Nu mangikondukta ittam tu paggigiammu tu Biblia, ngatta ari nga makalanno i basta panuddu laman ta dorob na Dios?

¹⁰ Nu mangikondukta ittam tu paggigiammu tu Biblia, ikaya tam nga uffunan i Bible study tam nga makannammuan anna iyusa i ngagan ni Jehova. Ikaya tam gapa nga malippawada i kebalinan na ngaganna. Makua tam kari yatun nu basta laman nga ituddu tam i dob, estandarte, anna i mepangngo nga kondukta? Magigiammu na malalaki nga estudiante i meyannung ta dorob na Dios anna posible nga appresianna gapa danatun. Ngem, tuttulanna kari si Jehova megafu ta pangayana nisa? Daddamman nga ammu gapa ni Eva i dob na Dios ngem ari tu napafutuan i pangayana nisa; kunnatun gapa si Adan. (Gen. 3:1-6) Yatutta ari gafu nga makalanno i basta panuddu laman ta tanakuan meyannung ta matunung nga dorob na Dios.

11. Ta panuddu tam meyannung ta dorob na Dios, kunnasi tam nga moffunan i estudiante tam tapenu ayatadda i nangiyawa tatun nga dorob?

¹¹ Kanayun nga pammakapianattam i dorob ni Jehova. (Sal. 119:97, 111, 112) Ngem baka ari nga kunnatun i nonopan na Bible  study tam nu ariadda nga malippawa nga pinadday ni Jehova yatun nga dorob megafu ta pangayana nittam. Yatutta iyavu tam ta nira: “Ngatta tamma ipakua na Dios yaw, onu ngatta igammana yaw? Anni i ituddu natun meyannung kani Jehova bilang Persona?” Nu uffunattam i tuttudduattam ira nga pannonopan i meyannung kani Jehova anna mapeggan ira tu napafutuan nga aya para ta marayaw nga ngaganna, siguradu nga madde tam i futuda. Nu kunnatun, ariadda laman nga ayatan i dorob, nu ari, maski i nangiyawa tatun nga dob. (Sal. 119:68) Dumakal paga i pangurugda anna moffunan ira nga maattamman i mariga ira nga kapurueba nga duttal ta mappange.​—1 Cor. 3:12-15.

12. Ta tadday nga situasion, ngatta ari nga napattalupaddian ni David i napakatadday nga futuna, anna anni i resulta natun?

¹² Importante gapa i nitura ni Patul David ta Salmo 86:11 (NW ) nga “pakataddayammu i futù.” Ta interu nga pattolena, nasinganna nga mabi laman nga magaddua i futu. Mittan, egga yayya ta ato anna nasinganna nga nazzigu i atawa na tanakuan. Tatun nga oras, napakatadday kari i futu ni David onu nagaddua yatun? Ammuna yaw nga dob ni Jehova: “Ariammu nga karagatan i atawa na kasittolem.” (Ex. 20:17) Ngem ginigirona lagapa i babay. Nagaddua i futuna ta pakkaraga tatun nga babay nga si Bat-seba anna ta pakkaraga nga pagayayyatan si Jehova. Maski nu nabayag ngana nga ayatan anna ikassing ni David si Jehova, nappaffu yayya ta makasarili nga pakkaraga. Tatun nga oras, nangngua si David tu marake ira nga gannug. Nepasiranan i ngagan ni Jehova. Naperwisiu gapa ni David i inosente nga totolay maski i sarilina nga familia.​—2 Sam. 11:1-5, 14-17; 12:7-12.

13. Kunnasi nga napakatadday uli i futu ni David?

¹³ Zinuffunan ni Jehova si David nga malippawa i madammo nga nakaliwatanna yatutta netoli i makasta nga relasionna nisa. (2 Sam. 12:13; Sal. 51:2-4, 17) Nanono ni David i resultana nga ziga anna daddam megafu ta pinagurayanna i futuna nga magaddua. Metransleyt gapa i kinagina ta Salmo 86:11 tu kunnaw: “Iddammà tu futu nga ari nagaddua.” Inuffunan kari ni Jehova si David nga mabbalin tu buu onu ari nagaddua i futuna? Wan, gafu ta turi kua, dineskriba na Biblia si David bilang lalaki nga “buu i futuna kani Jehova nga Diosna.”​—1 Pat. 11:4; 15:3.

14. Anni i mawag nga iyavu tam ta baggi tam, anna ngatta?

¹⁴ Parehu nga makapagaram anna tadday nga pamappalan i nesimmu kani David.  Masserbi nga abiso ta aripan ira na Dios ta maddaggun i madammo nga nakaliwatanna. Maski nu bagu ittam pagalaman nga masserbi kani Jehova onu piga ragun ngana, mawag tu iyavu tam ta baggi tam, ‘Laba-labanakku kari i appursigi ni Satanas nga gadduan i futù?’

15. Kunnasi ittam maprotektan na paganassing ta Dios nu makasingan ittam tu imoral nga gannug?

¹⁵ Angngariganna, nu makasingakka ta TV onu Internet tu mamappanono nikaw tu imoral, anni i kuammu? Baka mabi laman nga ikagi nga ari mabba tu pornograpia yatun nga letratu onu pelikula. Ngem posible kari nga yatun i usan ni Satanas tapenu gadduan i futum? (2 Cor. 2:11) Yatun nga letratu onu pelikula ay megitta ta futaw onu watay nga usan na tadday nga tolay tapenu gadduan i dakal anna makaba nga kayu. Ta ollu nga pamabbana ta kayu, ari nga insigida magaddua yatun. Ngem ta mamippiga nga pamabbana tatun, magaddua gabbalaman. Kunnatun gapa, nu makasingan i tadday nga tolay tu imoral nga pagiraw onu letratu, awayyana nga ari insigida nga masingan i efekto natun. Ngem sonu kua, makangngua ngana yayya tu liwa kani Jehova. Yatutta pammanakitammu nga patallungan ta futum i maski anni nga ari mepangngo nga gannug! Pattalupaddianammu nga napakatadday yatun nga maganassing ta ngagan ni Jehova!

16. Nu matenta ittam nga mangngua tu marake, anni ira nakuan i iyavu tam ta baggi tam?

¹⁶ Fuera paga ta imoral ira nga letratu, usu-usan gapa ni Satanas i karuan nga tentasion. Anni nakuan i reaksiottam? Mabi laman nga nonopan nga ari tu marake danaw nga gannug. Angngariganna, baka nonopattam: ‘Ari ngà mabba nga madisfellow nu kuakku yaw, yatutta ari kuruga mabba nga madammo yaw.’ Marake i kunnatun nga parrasa-rason. Makasta nu iyavu tam ta baggi tam yaw, ‘Usu-usan kari ni Satanas yaw nga tentasion tapenu  gadduan i futù? Nu mappaffu ngà ta marake ira nga pakkaraga, mepasiranakku kari i ngagan ni Jehova? Nu kuakku yaw, mas meyaranni ngà kari ta Dios ku, onu mas meyarayyu ngà nisa?’ Pannonopammu tu mapia danatun ira nga pakkiavu. Ipakimallo i sirib tapenu realistiko i panabbag mu tatun ira anna ariammu melogo i baggim. (Sant. 1:5) Nu kuammu yatun, mabbalin yatun tu proteksion nikaw. Moffunan naka nga determinadu nga pammanakitan i tentasion gittana kingngua ni Jesus: “Panawam-mà, Satanas!”​—Mat. 4:10.

17. Ngatta ari tu makasta i gaddua nga futu? Iyilustra.

¹⁷ Ari tu makasta i gaddua nga futu. Nonopan i tadday nga isports team nga ari tu makkarasundu i miembrona ira. Egga i karuan nga kayàda nga ira laman i malalaki, i karuan gapa ay ariadda tuttuttulan i reglamento, onu egga gapa danuri awan tu respetoda ta coach. Magga maffu i kunnatun nga team. Ngem nu nattaradday i team, dakal i tiansada nga mangaffu. Megitta i futum tari ta mangaffu nga team nu mattaradday i nononopan, pakkaraga, anna i emosiommu ta passerbi kani Jehova. Daddamman nga kayà ni Satanas nga gadduan i futum. Kayàna nga mekontra i nononopan, pakkaraga, anna i emosiommu ta estandarte ira ni Jehova. Ngem mawag tu buu i futum tapenu mapasserbiammu si Jehova. (Mat. 22:36-38) Ariammu ipamavulun nga gadduan ni Satanas i futum!

18. Mekunnay ta Mikias 4:5, anni i determinasiommu?

¹⁸ Ipakimallo mu kani Jehova i gittana nipakimallo ni David: “Pakataddayammu i futù nga ikassing i ngagammu.” Kuammu i ngamin nga mawayyam tapenu iyaplika ta pattolem yaw nga pakimallo. Kada aggaw, determinadu ka nakuan nga ipasingan ta desisiommu ira, baraddi man onu darakal, nga kuruga ikakuam i masanto nga ngagan ni Jehova. Nu kuammu yatun, bilang tadday ta Saksi ira ni Jehova, medayaw mu yatun nga ngagan. (Prov. 27:11) Mekagi tam gapa ngamin i gittana nekagi ni profeta Mikias: “Lumakag ittam ta ngagan ni Jehova nga Dios tam ta mannanayun anna awan tu addena.”​—Mik. 4:5.