1. Karai hpe hkrit hkungga ai ngu ai gaw hpa rai kun? Yehowa hpe tsawra ai ni hta dai zawn myit hpa majaw ra ai kun?

HKRISTAN ni gaw Karai Kasang hpe tsawra nna hkrit hkungga ai. Raitim, masha nkau mi gaw dai zawn n re. Hkrit hkungga ai ngu ai gaw, jahkrit shama ai majaw hkrit ai hpe tsun mayu ai n re. Hkrit hkungga ai lam ngu ai hpe hkaja yu ga. Dai zawn hkrit hkungga ai myit nga ai masha ni gaw, Karai Kasang hpe hkrit nna, shi hpe teng sha hkungga ai. Karai hte hku hkau lam ngang kang mayu ai majaw, shi n ra ai hpe n galaw mayu ai.​—Shk 111:10; Gsh 8:13.

2. Shakawn 86:11 hta lawm ai Hkawhkam Dawi a ga ni hpe madung tawn nna anhte gara lam lahkawng hpe hkaja na kun?

² Shakawn 86:11 hpe hti u. Dai ga ni hpe myit yu ai shaloi, Karai Kasang hpe hkrit hkungga ai a hkyak ai lam hpe sadi dung ai Hkawhkam Dawi chye na ai lam nang chye wa na re. Dawi a akyu hpyi ga ni hpe anhte gara hku hkan sa lu ai lam yu yu ga. Langai, Karai a amying hpe hpa majaw hkrit hkungga ging ai lam, lahkawng, anhte a prat hkrun lam hta, Karai a amying hpe hkrit hkungga ai lam gara hku madun lu ai hpe hkaja yu ga.

3. Karai a amying hpe Mawshe matut nna hkrit hkungga na matu gara mabyin gaw karum ya wa ai kun?

³ Lungpu hku hta Mawshe du nga ai aten, Yehowa a hpung atsam lai mat ai hpe mu ai shaloi, gara hku hkamsha na hpe  myit yu u. Chyum Laika Hpe Dinghkren Mu ngu ai laika buk hta “ndai mabyin gaw shinggyim masha ni a matu, grai mau na zawn re” ngu tsun da ai. Lamu kasa ndai hku tsun ai hpe shi na dat ai: ‘Yehowa, Yehowa, sumnung ai myit hte chyeju hpring ai, myit galu ai hte n-gaw nwai re ai, matsan a dum ai hte sadi sahka hpring ai: masha hkying hkying mun mun hpe matsan dum ai myit madun nna, shut hpyit ai, tara tawt lai ai, yubak mara raw dat kau ya ai.’ (Pru 33:17-23; 34:5-7) Yehowa a amying hpe Mawshe tsun ai shaloi, dai mabyin hpe myit hkrup na re. Dai majaw, Mawshe gaw “hpung shingkang hte hkrit hpa rai nga ai mying ningsang hpe, hkrit kang nga na matu” Israela ni hpe sadi jaw wa ai.​—Trj 28:58.

4. Yehowa hpe grau hkrit hkungga lu na matu hpa gaw karum ya lu ai kun?

⁴ Yehowa a amying hpe myit ai shaloi, gara zawn Karai re ai hpe mung myit ging ai. Shi a hpung atsam, nyan hpaji, tara rap ra ai lam hte tsawra myit hpe mung myit ging ai. Dai zawn atsam ningja ni hpe myit ai gaw shi hpe grau hkrit hkungga na matu anhte hpe shadut ya ai.​—Shk 77:11-15.

5-6. (a) Karai amying a lachyum gaw hpa rai kun? (b) Pru Mat 3:13, 14 hte Esaia 64:8 hku nga yang Yehowa gaw yawng mayawng hpe gara lam hku nna shabyin ai kun?

⁵ Karai amying a lachyum hte seng nna hpa chye lu ai kun? Yehowa a amying gaw “Shi Byin Wa Shangun Ai” ngu lachyum nga ai lam Chyum hpaji du law law myit hkrum ma ai. Dai lachyum gaw Yehowa a myit ra ai lam hpe hpa mung pat shingdang n lu ai lam, yawng mayawng hpe shi galaw lu ai lam bai shadum ya ai. Gara hku nna kun?

⁶ Yehowa gaw shi a yaw shada lam hpring tsup na matu, yawng hpe galaw lu nna, shabyin ya lu ai. (Pru Mat 3:13, 14 hpe hti u.) Shi a atsam ningja ni hpe myit yu na matu, anhte hpe chyahkring hkring n-gun jaw ai. Shi a yaw shada lam hpring tsup na matu, shi hpe nawku daw jau na matu ra ai lam yawng hpe shinggyim masha ni hta shabyin ya lu ai. (Esaia 64:8 hpe hti u.) Dai hku nna shi a myit ra ai lam hpe shabyin ai. Hpa mung pat shingdang n lu ai.​—Esa 46:10, 11.

7. Yehowa hpe chyeju dum myit grau law hkra gara hku galaw na kun?

 ⁷ Yehowa galaw wa ai lam hte shi karum ya ai lam ni hpe myit sawn sumru ai hku nna, grau chyeju dum lu ai. Ga shadawn, hpan da ai lam ni hpe myit sawn sumru ai shaloi, shi galaw da ai lam ni a majaw, shi hpe hkrit hkungga wa na re. (Shk 8:3, 4) Yehowa karum ya wa ai lam ni hpe myit sawn sumru ai shaloi, shi a myit ra ai lam hpe anhte galaw lu nna, shi hpe grau hkungga wa na re. Yehowa a amying gaw mau na zawn re. Dai amying hta, anhte a Kawa gaw gara zawn re ai Kawa, shi galaw ngut kre ai lam yawng hte, shi galaw na lam yawng lawm ai.​—Shk 89:7, 8.

8. Yehowa gaw shi a amying hpe mu mada ai lam hte seng nna Tara Jahprang 32:2, 3 hta hpa tsun da ai kun?

⁸ Ga Sadi Tawn Da Ai Mungdan de Israela ni n shang shi yang, Yehowa gaw Mawshe hpe mahkawn langai sharin ya wa ai. (Trj 31:19) Mawshe gaw masha ni hpe bai sharin ya ai. (Tara Jahprang 32:2, 3 hpe hti u.) Dai Chyum daw hpe myit sawn sumru ai shaloi, Yehowa gaw yawng mayawng hpe shi a amying chye shangun mayu nna, shaga shangun mayu ai lam chye lu ai. Yehowa a lam hte shi a grau htum ai amying hpe Mawshe sharin ya ai shaloi, masha ni madat hkam la lu ai gaw ahkaw ahkang kaba re. Nam law namlap ni a ntsa marang kapya ai zawn, Mawshe sharin ya ai lam gaw n-gun lu shangun nna, shalan shabran ya lu ai. Anhte sharin achyin ya ai lam ni mung, dai zawn byin hkra gara hku galaw ging ai kun?

9. Yehowa a amying san seng hkra anhte gara hku karum ya lu ai kun?

⁹ Anhte hkaw tsun magam sa ai shaloi, Karai a amying gaw Yehowa re ai hpe Chyum Laika kaw nna madun mai ai. Yehowa a amying hpe shagrau da ai laili laika ni hpe garan mai ai. Video ni, website hta lawm ai lam ni hpe madun mai ai. Bungli hta, jawng hta, bu hkawm ai aten ni hta anhte tsawra ai Karai a lam hte gara zawn Karai re ai hpe tsun dan mai ai. Shinggyim masha ni hte ginding aga a matu Yehowa a yaw shada lam hte seng nna anhte hkrum ai masha ni hpe tsun dan ai shaloi, shanhte shawng nnan na ga ai rai na re. Anhte tsawra ai Kawa hte seng nna tengman lam hpe tsun dan ai gaw, shi a amying san seng na matu karum ya ai re. Yehowa hte seng nna masu ga law law sharin hkrum da ai lam shanhte chye na wa hkra anhte karum ya ai re. Chyum Laika kaw nna anhte sharin ya ai lam gaw shanhte sharin la lu ai kaja htum lam ni re.​—Esa 65:13, 14.

10. Chyum Laika sharin ya ai shaloi Karai a tsang madang ni hte hpyi shawn da ai lam ni hpe sharin ya ai hta n-ga hpa majaw galaw ra ai kun?

¹⁰ Anhte Chyum Laika sharin ya ai shaloi, Yehowa a amying chye wa nna akyu jashawn wa hkra shanhte hpe karum ya mayu ai. Yehowa a lam atsawm chye wa hkra mung karum ya mayu ai. Shi a lam matsun ni, tsang madang ni, akyang lailen hte seng ai tara ni hpe atsawm chye hkra sharin ya ai daram hte ngut sai kun? Kaja ai Chyum ga sharin gaw Karai a tara ni hpe sharin la nna, ra sharawng wa chye ai. Raitim, Chyum ga sharin gaw Yehowa hpe tsawra wa ai majaw, madat mara wa na kun? Adam yan Ewa gaw Karai a tara ni hpe chye tim, tara jahkrat ya ai wa hpe n tsawra ai. (Nin 3:1-6) Dai majaw, Karai a dinghpring ai tsang madang ni hte hpyi shawn da ai lam ni hpe sharin achyin ya ai hta n-ga anhte galaw ra ai.

11. Karai a tara ni hte tsang madang ni hpe sharin ya ai shaloi Tara Jaw Ya Ai Wa hpe tsawra wa na matu anhte gara hku karum ya lu ai kun?

¹¹ Yehowa a tsang madang ni hte tara ni  gaw, anhte a matu kaja ai. (Shk 119:97, 111, 112) Raitim, Chyum ga sharin gaw Yehowa a tara ni hta tsawra myit lawm ai hpe chye yang she chye na re. Dai majaw, shanhte hpe ndai hku san ging ai: “Karai Kasang galaw shangun ai lam, n galaw shangun ai lam ni hte seng nna nang gara hku myit ai kun? Dai gaw shi hte seng nna hpa hpe chye shangun ai kun?” Yehowa a lam hpe myit sawn sumru na matu hte tsaw htum ai amying hpe grau tsawra na matu karum ya yang, shanhte a myit masin de du hkra anhte grau nna shadut ya lu na re. Rai yang, Chyum ga sharin ni gaw, tara ni hpe sha n-ga, Tara Jaw Ya Ai Wa hpe mung tsawra wa na re. (Shk 119:68) Makam masham ngang kang wa nna, chyam dinglik ai lam ni hkrum ai shaloi, hkam sharang lu na re.​—1 Ko 3:12-15.

12. Dawi gaw gara hku nna myit bra mat ai kun? Hpa byin wa ai kun?

¹² Shakawn Kungdawn 86:11 hta, “nye a myit shadut ya [myit n bra hkra galaw ya, NW]” ngu ai ga yan gaw grai ahkyak ai. Hkawhkam Dawi gaw dai ga ni hpe ka na matu shadut hkrum ai. Myit bra na matu kade daram loi ai hpe shi chye wa ai. Kalang mi hta, nta magaw kaw nga taw ai shaloi, dinghku num langai hka shin nga ai hpe mu dat ai. Dai aten hta Dawi a myit hpring tsup nga ai kun? Shing nrai bra nga ai kun? “Na htingbu manang wa a madu jan hpe . . . ra marit ai myit hkum rawng et” ngu ai Yehowa a tsang madang hpe shi chye ai. (Pru 20:17) Raitim, shi matut yu nga ai. Batsheba hpe ra marin ai myit hte Yehowa ra sharawng ai lam hpe galaw mayu ai myit a lapran hta shi myit bra nga ai. Dawi gaw Yehowa hpe aten na na tsawra nna hkrit hkungga wa tim, hkum shan ra marin ai myit hpe asum jaw kau ai. N kaja ai lam hpe galaw dat ai. Yehowa a amying hpe jahten kau ai re. Shi a dinghku hte mara n nga ai masha ni hpe shoihpa byin shangun wa ai.​—2 Sa 11:1-5, 14-17; 12:7-12.

13. Dawi a myit masin n bra mat sai hpe gara hku chye lu ai kun?

¹³ Dawi hpe Yehowa sharin shaga ai majaw, wenyi lam bai kaja wa ai. (2 Sa 12:13; Shk 51:2-4, 17) Dawi gaw myit bra mat ai shaloi, manghkang ni hte yawn hpa lam ni byin wa ai hpe bai dum ai. Dai majaw, Shakawn 86:11 hta mu lu ai shi a ga ni hpe, “nye a myit n bra hkra galaw ya rit” ngu nna mung ga gale mai ai. Yehowa gaw Dawi hpe myit n bra hkra karum ya ai kun? Karum ya ai. Chyum Laika hta Dawi hpe “myit masin Yehowa hta hkum tsup” ai wa ngu tsun da ai.​—1 Hk 11:4; 15:3.

14. Tinang hkum tinang gara ga san san ra ai kun? Hpa majaw kun?

 ¹⁴ Dawi a mabyin gaw n-gun jaw ya lu ai zawn, sadi mung jaw ai. Shi mara kaba galaw hkrup ai lam gaw dai ni aten na Karai a mayam ni a matu sadi jaw ai lam re. Yehowa hpe ya she nawku wa ai ni raitim, aten na na nawku nga sai ni raitim, ‘Myit bra hkra Satan shakut nga ai hpe ngai ninghkap nga ai kun?’ ngu nna san ging ai.

15. Hkum shan myit hpe sharawt ya ai sumla ni hpe anhte mu ai shaloi Karai Kasang hpe hkrit ai myit gaw gara hku makawp maga ya na kun?

¹⁵ Ga shadawn, hkum shan ra marin ai myit hpe sharawt ya chye ai sumla ni hpe intanet (sh) TV hta mu ai shaloi, gara hku bai htang ai kun? Dai gaw nse nsa sumla n re ngu aloi sha myit chye ai. Raitim, anhte a myit bra mat hkra Satan galaw ai lam rai chye ai. (2 Ko 2:11) Dai sumla ni gaw hpri sumprat hte bung ai. Hpun tawng hpe ga na matu sumprat hpe lang ai. Shawng nnan kaji nna grai dai ai sumprat hpe hpun tawng kata de adit bang ai. Dai hpang sumprat hpe sung sung kayat bang dat ai shaloi, hpun tawng ga ayai mat ai. Hkum shan myit hpe sharawt ya ai sumla ni gaw sumprat hte bung ai. Shoihpa n nga ai ngu shadu da tim, Yehowa n ra ai mara kaba ni hpe galaw hkrup hkra shadut ya chye ai. Dai majaw, myit masin de n htap htuk ai lam ni shang na ahkang n jaw ga. Yehowa a amying hpe hkrit hkungga na matu matut myit maju jung ga!

16. Gunglau hkrum ai shaloi tinang hkum tinang gara ga san ni san ging ai kun?

¹⁶ Myit lawm hpa sumla ni hpe akyu jashawn nna, shut ai lam galaw hkrup hkra Satan hkalem nga ai. Gara hku bai htang na kun? Nau n sawng ai ngu nna anhte myit chye ai. Ga shadawn, ‘ndai gaw mara kaba n re ai majaw, shapraw hkrum na n re’ ngu myit chye ai. Dai gaw shut ai. ‘Nye a myit bra mat hkra ndai hpe lang nna Satan shakut nga ai kun?  Shut shai ai ra marin ai myit hpe asum jaw kau na nga yang, Yehowa a amying hpe jahpoi asawng ai baw byin mat na kun? Ndai lam galaw yang, Karai Kasang hte ni htep na kun? (sh) tsan mat na kun?’ ngu nna tinang hkum tinang san ra ai. Dai ga san ni hpe myit sawn sumru u. Tinang hkum tinang n masu ai sha, dingman ai hku mahtai jaw lu hkra nyan hpaji hpyi u. (Yak 1:5) Rai yang, makawp maga hkrum na re. ‘Satan, pru mat wa u!’ ngu Yesu tsun wa ai zawn, anhte mung gunglau ai lam ni hpe nyet kau lu na re.​—Mat 4:10.

17. Myit bra ai gaw hpa majaw n kaja ai kun? Ga shadawn tsun dan u.

¹⁷ Myit bra ai gaw n kaja ai. Ginsup hpung langai hta shada da n htuk hkat ai ngu myit yu u. Nkau mi gaw tinang sha mying gumhkawng mayu ai. Nkau mi gaw tara hte maren n kam ginsup ai. Nkau mi chyawm gaw woi awn ai wa hpe n hkungga ai. Dai hpung gaw awng dang na n re. Raitim, kahkyin gumdin ai hpung chyawm gaw awng dang na re. Yehowa hpe nawku daw jau ai shaloi, na a myit mang ai lam ni, ra sharawng ai lam ni, hkamsha ai lam ni gaw myit mang langai sha rai na nga yang, na a myit masin gaw awng dang ai hpung hte bung na re. Satan gaw na a myit bra mat na hpe ra ai. Na a myit mang ai lam, ra sharawng ai lam hte hkamsha ai lam ni hpe Yehowa a tsang madang ni hte nhtan shai shangun mayu ai. Yehowa hpe nawku daw jau na matu, na a myit masin hkum tsup ra ai. (Mat 22:36-38) Myit bra mat na matu Satan hpe ahkang hkum jaw!

18. Mihka 4:5 hta lawm ai ga ni hte maren nang hpa galaw na matu dawdan da ai kun?

¹⁸ ‘Na a amying hpe hkrit hkungga nga n ga, nye a myit shadut ya e’ ngu Dawi hpyi shawn wa ai hte maren, Yehowa kaw akyu hpyi u. Akyu hpyi ga hte maren asak hkrung u. Dawdan lam kaji kaba yawng hta, Yehowa a chyoi pra ai amying hpe hkrit hkungga ai lam madun na matu dawdan da u. Rai yang, Yehowa Sakse langai hku nna, dai amying hpe shagrau lu na re. (Gsh 27:11) “Anhte chyawm gaw anhte a Karai Kasang Yehowa a amying gang let, htani htana prat dingsa hkawm nga” saga ai ngu myihtoi Mihka tsun wa ai hte maren lu tsun na re.​—Mik 4:5.