1. Modi ki algen ta mostra ma el ten grandi ruspetu pa Deus?

SÉRVUS di Deus ta ama-l i tanbê es ten grandi ruspetu pa el. Na kel studu li nu sta ben odja pamodi ki nu debe ten grandi ruspetu pa Deus. Má, modi ki algen ta mostra ma el ten grandi ruspetu pa Deus? Kes algen ki ten grandi ruspetu pa el, ka ta krê faze nada ki ta mágua ses Pai na Séu i ki pode prujudika ses amizadi ku el. — Sal. 111:10; Pro. 8:13.

2. Di akordu ku palavras di Rei Davidi ki sta na Salmo 86:11, ki dôs kuza nu sta ben odja na kel studu li?

² Lé Salmo 86:11. Óras ki nu ta pensa na kes palavra li, ta fika klaru ma Rei Davidi sabeba pamodi ki éra inportanti ten txeu ruspetu pa Jeová. Kel studu li, sta ben mostra-nu kuzê ki nu pode prende di kes palavra ki Davidi fla na orason. Primeru, nu sta ben odja pamodi ki nu debe ten txeu ruspetu pa nómi di Deus. Sugundu, nu sta ben odja modi ki nu pode mostra ma nu ta ruspeta nómi di Deus na nos dia-dia.

3. Ki spiriénsa talvês djuda Muizés ten txeu ruspetu pa nómi di Deus?

³ Pensa modi ki Muizés xinti kantu el staba sukundidu na un braku na rótxa i el odja glória di Jeová ta pasa. Di sertéza, kel-li é un kuza ki ta poba kalker algen ta fika dimiradu! Muizés obi un vós, ki talvês éra di un anju, ta fla: ‘Jeová, Jeová, Deus di mizerikórdia i konpaxon, ki ten  paxénxa i sta xeiu di amor lial i di verdadi, ki ta mostra amor lial pa milharis óras ki el púrdua éru, fadja i pekadu.’ (Êxo. 33:17-23; 34:5-7) Pode ser ki Muizés ta lenbraba di kel spiriénsa li, óras ki el ta uzaba nómi di Jeová. É pur isu ki dipôs, Muizés insentiva israelitas pa ‘ruspeta es nómi gloriozu i ki ta poi algen ta ten grandi ruspetu pa el’. — Deut. 28:58.

4. Kuzê ki pode djuda-nu ruspeta Jeová kada bês más?

⁴ Óras ki nu ta pensa na nómi di Jeová, tanbê nu debe pensa na tipu di algen ki el é. Nu debe lenbra di se kualidadis, sima se puder, se sabedoria, se justisa i se amor. Pensa na kes kualidadi li i na otus, pode pô-nu ta ruspeta Jeová kada bês más. — Sal. 77:11-15.

5-6. (a) Kal ki é siginifikadu di nómi di Deus? (b) Sima sta na Êxodo 3:13, 14 i Isaías 64:8, di ki maneras Jeová ta faze se vontadi kontise?

⁵ Kuzê ki nu sabe sobri siginifikadu di nómi di Deus? Txeu studiozu ta konkorda ma nómi di Jeová pode siginifika ‘El ta faze kontise’. Kel-li ta lenbra-nu ma ka ten nada ki ta tadja Jeová di faze se vontadi. Si el krê pa un kuza kontise, el ta pô-l kontise. Modi?

⁶ Óras ki Jeová krê faze un kuza, el ta bira kel ki el krê pa el faze se vontadi. (Lé Êxodo 3:13, 14.) Na nos publikason, txeu bês, nu ta lenbradu pa nu pensa na es grandi kapasidadi ki Deus ten. Tanbê, Jeová pode uza se sérvus inperfetu pa bira kuzê ki el krê pa sirbi-l i pa faze sima el disidi. (Lé Isaías 64:8.) Di kes manera li, Jeová ta faze se vontadi kontise i nada ka ta pode tadja-l. — Isa. 46:10, 11.

7. Kuzê ki nu pode faze pa nu dimira i ruspeta nos Pai na Séu kada bês más?

⁷ Pensa sénpri na kuzê ki nos Pai na Séu dja faze i na kes kuza ki el ta djuda-nu faze. Óras ki nu ta faze si, nu ta fika ta dimira-l i ruspeta-l más txeu.  Pur izénplu, óras ki nu ta pensa na kes kuza bunitu ki Jeová kria, nu ta fika dimiradu. (Sal. 8:3, 4) I óras ki nu ta pensa na kuzê ki Jeová dja djuda-nu faze, pa nu pode kunpri se vontadi, nu ta xinti más ruspetu pa el. Na verdadi, nómi di Jeová ta pô-nu ta fika dimiradu! Kel nómi li ta nvolve tudu kel ki nos Pai é, tudu ki dja el faze i tudu kuza ki el ta ben faze. — Sal. 89:7, 8.

8. Sima sta na Deuteronómio 32:2, 3, kuzê ki Jeová krê pa se sérvus faze ku se nómi?

⁸ Poku antis di israelitas entra na kel téra ki Deus prometeba es, Jeová inxina Muizés un kántiku. (Deut. 31:19) Jeová tanbê fla Muizés pa inxina povu kel kántiku. (Lé Deuteronómio 32:2, 3.) Óras ki nu ta pensa na vérsus 2 i 3, ta fika klaru ma Jeová ka krê pa se nómi fika sukundidu, nen pa algen atxa ma se nómi é sagradu dimás pa uzadu. Jeová krê pa tudu algen konxe se nómi! Pensa na kel priviléjiu grandi ki israelitas tevi kantu Muizés inxina-s sobri Jeová i se nómi gloriozu! Kes kuza ki Muizés inxina povu, poi ses fé ta fika más fórti i da-s koraji, sima txuba mansu ta poi planta ta kria. Modi ki nu pode ten sertéza ma nos manera di inxina é sima kel-li?

9. Modi ki nu pode djuda santifika nómi di Jeová?

⁹ Óras ki nu ta prega di kaza en kaza ô da tistimunhu na públiku, nu pode uza Bíblia pa mostra pesoas nómi di Deus, ki é Jeová. Nu pode uza nos publikason, kes bon vídiu i kes matéria ki sta na nos site ki ta da Jeová ónra. Na trabadju, na skóla ô óras ki nu sta viaja, nu pode atxa xansi di pâpia di nos Deus ki nu ta ama i modi ki el é. Nu pode pâpia di kes kuza bunitu ki Jeová krê faze pa nos i pa Téra. Óras ki kes algen ta obi kes kuza li, es ta pasa ta da kónta modi ki Jeová ta ama-nu. Tanbê, nu sta ta djuda santifika nómi di Deus, dismaskara alguns mintira i kalúnia ki es prende sobri Jeová. Kes kuza ki nu ta inxina-s di Bíblia ta anima-s más di ki kalker otu kuza. — Isa. 65:13, 14.

10. Óras ki nu ta faze studus di Bíblia, pamodi ki sô inxina kes lei di Deus ka ta txiga?

¹⁰ Óras ki nu ta faze studus di Bíblia, nu krê djuda nos studantis konxe i uza nómi di Jeová. Tanbê, nu krê djuda-s konxe siginifikadu di se nómi. Má, sô inxina-s leis di Jeová ta txiga? Un bon studanti pode prende leis di Deus i ti dimira-s. Má, si el ka prende ama Jeová, ta fika difísil pa el obi ku el. Lenbra ma Eva konxeba lei di Deus, má el ka ta amaba kel Algen ki da lei. Adon tanbê mostra mésmu kuza. (Gén. 3:1-6) Pur isu, nu ten ki faze más di ki sô inxina otus algen kes lei justu di Jeová i modi ki es debe konporta.

11. Óras ki nu ta inxina kes lei di Jeová, modi ki nu pode djuda nos studantis ama kel Algen ki da kes lei?

¹¹ Leis di Jeová é sénpri bon pa nos. (Sal. 119:97, 111, 112) Má, pa nos studantis pensa si, es meste ntende ma Jeová faze kes lei pamodi el ta ama-nu. Pur isu, nu pode pergunta nos studantis: “Pamodi ki bu ta atxa ma Deus ta pidi-nu pa nu faze ô pa nu ka faze kel kuza li? Kuzê ki kel lei li ta inxina-nu sobri manera di ser di Deus?” Si nu djuda nos studantis pensa sobri Jeová i djuda-s ten un amor fórti pa se nómi, é  más faxi nu toka ses korason. Nos studantis ta pasa ta ama ka sô kes lei, má kel Algen ki da kes lei. (Sal. 119:68) Ses fé ta fika más fórti i kel-li ta djuda-s aguenta firmi óras ki kontise prublémas. — 1 Cor. 3:12-15.

12. Na un situason, modi ki Davidi fadja na mante se korason konplétu, i kuzê ki kontise?

¹² Na Salmo 86:11, Rei Davidi pidi Jeová: ‘Da-m un korason konplétu’. Kes palavra li é txeu inportanti. Duránti se vida, Davidi odja modi ki é faxi pa korason fika divididu. Un bês, el staba na terasu di se kaza i el odja un mudjer di otu ómi ta toma banhu. Na kel momentu, korason di Davidi staba konplétu ô divididu? El konxeba kel lei di Jeová ki ta fla: ‘Ka bu dizeja mudjer di bu prósimu’. (Êxo. 20:17) Má, ta parse ma el fika ta djobe kel mudjer. Se korason fika divididu entri gana di ten kel mudjer, Batiseba, i se vontadi di agrada Jeová. Nbóra Davidi tinha txeu amor i ruspetu pa Jeová, el dexa se dizeju kontrola-l i el faze alguns kuza mariadu. El suja nómi di Jeová. Tanbê, el traze disgrasa pa kes algen ki ka tinha kulpa, ti mésmu pa se própi família. — 2 Sam. 11:1-5, 14-17; 12:7-12.

13. Modi ki nu sabe ma korason di Davidi fika konplétu otu bês?

¹³ Jeová disiplina Davidi i el torna ganha un bon amizadi ku El. (2 Sam. 12:13; Sal. 51:2-4, 17) Dipôs, Davidi lenbra di tudu kes prubléma i sufrimentu ki el pasa pa el, kantu el dexa se korason fika divididu. Se palavras ki sta na Salmo 86:11, tanbê pode traduzidu asi: ‘Ka bu da-m un korason divididu.’ Má, Jeová djuda Davidi otu bês ten un korason konplétu ô ki ka staba divididu? Sin. Nu sabe kel-li, pamodi Bíblia ben fla dipôs ma Davidi éra un ómi ki tinha ‘un korason konplétu pa Jeová, se Deus’. — 1 Reis 11:4; 15:3.

14. Kuzê ki nu meste pergunta nos kabésa, i pamodi?

¹⁴ Izénplu di Davidi ta da-nu koraji, má tanbê el ta pô-nu ta pensa. Kes pekadu gravi ki Davidi faze ta sirbi di avizu pa nos oji. Ka ta nporta si dja nu ten poku ô txeu ténpu ta sirbi Jeová, nu meste pergunta nos kabésa: ‘N sta ta luta kóntra kes tentason ki Satanás ta uza pa dividi nha korason?’

15. Modi ki ten txeu ruspetu pa Deus pode proteje-nu, si parse un imaji ki ta pô-nu ta ten pensamentus mariadu?

 ¹⁵ Pur izénplu, kuzê ki bu ta fazeba si bu odja na tilivizon ô na internet un imaji ki ta poba bo ta ten pensamentus mariadu? É faxi bu pensa ma kel imaji ô filmi é ka pornografia. Má, bu ka ta atxa ma Satanás pode sta ta uza kel kuza li pa dividi bu korason? (2 Cor. 2:11) Pensa na kel izénplu li: Pa un algen konsigi ratxa un tronku grandi, el ta uza un kunha, ki é un feraménta pikinoti di féru ki ten ponta gudu. Dipôs, el ta uza un maréta pa el mete kel kunha na tronku, i kel tronku ta ratxa i el ta abri. É kel-li ki kes imaji ta faze ku nos korason. Na komésu, talvês es ta parse pikinoti i ma es ka ta prujudika-nu, sima pónta di un kunha. Má, é faxi pa kes kuza li dividi nos korason i pô-nu ta faze un pekadu gravi kóntra Jeová. Pur isu, ka bu dexa nada mariadu entra na bu korason! Kontinua ku bu korason konplétu pa Jeová pa bu pode ruspeta se nómi!

16. Óras ki nu ta pasa pa algun tentason, ki perguntas nu debe faze nos kabésa?

¹⁶ Alén di kes imaji ki ta poi algen ta ten pensamentus mariadu, Satanás ta uza otus kuza pa tenta-nu. Kuzê ki nu ta faze? É faxi pensa ma kes kuza li é ka mutu mariadu. Pur izénplu, talvês nu pode pensa: ‘Bon, N ka ta ser dizasosiadu si N faze kel kuza li, pamodi é ka gravi.’ Má, si nu pensa si, nu sta ngana nos kabésa. É bon nu faze kes pergunta li: ‘Satanás sta ta uza kel tentason li pa dividi nha korason? Si N dexa kes dizeju mariadu toma kónta di mi, N ta suja nómi di Jeová? Kes kuza ki N ta faze, ta  pô-m más amigu di Jeová ô ta pô-m ta afasta di el?’ Pensa txeu na kes pergunta li. Pidi Jeová sabedoria pa bu ser onéstu ku bu kabésa, óras ki bu ta responde kes pergunta li. (Tia. 1:5) Faze kel-li pode ser un grandi proteson. El pode djuda-u ten koraji pa nega un tentason, sima Jizus, kantu el fla: ‘Sai di li Satanás!’ — Mat. 4:10.

17. Pamodi ki é ka bon ten un korason divididu? Da un izénplu.

¹⁷ É ka bon ten un korason divididu. Imajina ma un ekipa di futibol, ten djugadoris ki ka ta da ku kunpanheru. Alguns krê ten fama sô pa ses kabésa. Otus ka krê sigi régras di jogu i inda otus ka ta ruspeta trenador. Un ekipa sima kel-li ka ten xansi di ganha jogu. Má, pa un ekipa ganha jogu, el meste sta unidu. Mésmu kuza ta kontise ku bu korason. El pode ser sima un ekipa ki ta ganha si bus pensamentu, dizeju i sentimentu sta unidu na sirbi Jeová. Lenbra sénpri ma Satanás krê dividi bu korason. El krê pa bus pensamentu, dizeju i sentimentu bai kóntra leis di Jeová. Má, pa bu sirbi Jeová bu meste ten un korason konplétu. (Mat. 22:36-38) Pur isu, nunka ka bu dexa Satanás dividi bu korason!

18. Sima sta na Miqueias 4:5, kuzê ki bu sta disididu na faze?

¹⁸ Faze orason pa Jeová i pidi mésmu kuza ki Davidi: ‘Da-m un korason konplétu pa N pode ruspeta bu nómi.’ Faze tudu kel ki bu pode pa bu vive sima kel orason li ta fla. Na tudu disizon ki bu ta toma, ka ta nporta si é grandi ô pikinoti, mostra ma bu ten txeu ruspetu pa nómi santu di Jeová. Di kel manera li, bu ta ser un Tistimunha di Jeová ki ta da ónra pa kel nómi li. (Pro. 27:11) I nos tudu nu pode ben fla djuntu ku proféta Mikeias: ‘Nu ta ben anda na nómi di Jeová, nos Deus, pa tudu ténpu.’ — Miq. 4:5.