1. Eryubaha Nyamuhanga niki, kandi busana naki abanzire Yehova batholere ibakolha ekyo?

ABAKRISTAYO banzire Nyamuhanga, kandi bakamubaha. Abandi, banganabulha nga wanganza wuthi oyowukubaha. Aliwe, sithuli kanaya okw’iubaha ery’obuba. Thukayakanaya okw’iubaha ery’embaghane. Abandu abawithe eryubaha ng’eri bakasikaya Nyamuhanga ya kutsibu erilhua okwa muthima. Sibalyanza eriponesya Thatha wabu w’elhubulha kundi sibanzire eritsandya obunywani bwabu nayu.​—Esy. 111:10; Emi. 8:13.

2. Erikwamana n’ebinywe by’Omwami Dawudi ebiri omwa Esyonyimbo 86:11, NW, ni bindu bibiri byahi ebyo thukendi kaniako?

² Soma Esyonyimbo 86:11. * Wukalengekania okwa binywe ebi, wangana lhangira ekyaleka Omwami Dawudi omuthaleghulha inialhangira omughaso w’eryubaha Nyamuhanga. Thulebaye ngoku thwanga ghendera okwa binywe bya Dawudi. Thukendi tsuka erilebya esyonzumwa ndebe esyangaleka ithubaha erina lya Nyamuhanga. Neryo thukendi lebya ngoku thwanga kangania ku thukubaha erina lya Nyamuhanga omwa ngebe yethu.

3. Ni kyahi ekyangabya iky’ekyawathikaya Musa eribya inian’ubahire erina lya Nyamuhanga mughulhu wosi?

³ Thalengekania Musa nga mwayowa athi iniane okwa Kithwe kye Horebu neryo omwa syonzoli amalhangira olhukengerwa  lhwa Yehova lhukalhaba. Ekitabu Insight on the Scriptures kikabugha kithi “eki kyangabya iky’ekyabya kindu ek’itha obuba bunene eribya oko mundu wosi-wosi Yesu athali asa.” Musa mwowa ebinywe bino, ebikalhangirika nga byabughawa n’omumalaika: “Omwami Mukulhu, Omwami Mukulhu Nyamuhanga oyo woswire n’erighanyira n’ow’olhukogho, syanguhire, okw’ihithana, oyo woswire n’obwenge bw’olhwanzo n’omwatsi w’ekwenene; oyukabikira obwenge bw’olhwanzo okwa bandu maelfu, oyukabuyira obubi, n’amalholho, n’ebibi.” (Eri. 33:17-23; 34:5-7) Musa anganabya imwabya akibuka ekyabya ekyo akakolesya erina Yehova. Kyangabya iky’ekyaleka enyuma waho Musa iniabwira abandu ba Nyamuhanga Abaisraeli athi ‘bakenge erina eri ly’olhukengerwa n’ery’eryubahya.’​—Ebi. 28:58.

4. Ni mibere yahi eya thwanga ghaniryako eyangaleka ithubaha Yehova?

⁴ Omughulhu thukalengekanaya okwa lina Yehova, thutholere ithwaghanirya n’oko mwinyeryo. Thutholere ithwalengekania okwa mibere yiwe, ng’obuthoki bwiwe, amenge wiwe, obulingirirania bwiwe, n’olhwanzo lhwiwe. Erilengekania okwa mibere eyo n’eyindi kyangana leka ithwamubaha.​—Esy. 77:11-15.

5-6. (a) Erina lya Nyamuhanga likamanyisayaki? (b) Ngoku kiri omwa Eriluayo 3:13, 14 n’omu Isaya 64:8, Yehova akaleka ebindu ibyabya omu nzira syahi?

⁵ Ni byahi ebya thwasi okwa kya erina lya Nyamuhanga likamanyisaya? Abasomi bangyi bakaligha bathi erina Yehova likabya nga likamanyisaya “Akaleka Ikyabya.” Ekyo kikathwibukaya ngoku sihali ekyangakakirya Yehova erikolha ekyo anzire, kandi anganaleka ebindu ibyabya. Athi?

⁶ Yehova akaleka ebindu ibyabya omw’ibya ekyosi-kyosi ekikayithaghisibawa nuku aberereraye ekighendererwa kiwe. (Soma Eriluayo 3:13, 14.) * Ebitabu byethu byabirithuhira mw’omuhwa w’erighanirya okwa mubere wa Yehova w’eriswekya oyu. Yehova kandi anganaleka abaghombe biwe abathahikene ibabya ekyosi-kyosi ekikayithaghisibawa nuku bamukolere n’eriberererya ekighendererwa  kiwe. (Soma Isaya 64:8.) Omwa mibere eyi, Yehova akaleka erisonda liwe iryakolhwa. Sihali ekyanga mulemesya eriberererya ebighendererwa biwe.​—Isa. 46:10, 11.

7. Thwang’ongera thuthi erisima Thatha wethu w’elhubulha?

⁷ Thwangan’ongera erisima Thatha wethu w’elhubulha omw’ighanirya okwa by’abirikolha n’eby’abirithuthokesya erikolha. Ng’eky’erileberyako, thukabya thukaghanirya okwa bihangikwa, thukakukubalha thukalhangira ebyosi ebya Yehova abirikolha. (Esy. 8:3, 4) Kandi thukabya thukaghanirya okwa ebyo Yehova abirileka ithwabya nuku thuberereraye erisonda liwe, thukongera erimusikya kutsibu. Omo kwenene erina Yehova likathikaya! Erina eryo mwamuli ebyosi ebyo Thatha wethu ali, ebyosi ebyo abirikolha, n’ebyosi ebyo akendi syakolha.​—Esy. 89:7, 8.

8. Eryibuka Ebihano 32:2, 3 hakabisulha hathi amalengekania agho Yehova awithe oko lina liwe?

⁸ Abaisraeli ibakisiya ibingira omwa Kihugho Ekyalhaghanisibawa, Yehova mwakangirirya Musa ebinywe by’olhwimbo. (Ebi. 31:19) Na Musa nayu abya w’erikangirirya abandu olhwimbo olho. (Soma Eryibuka Ebihano 32:2, 3.) Thukabya thukaghanirya okwa mulhondo wa 2 na 3, kikalhua ikyalhangirika ndeke-ndeke ngoku Yehova syanzire erina liwe likabiswa, erithwalhwa nga libuyirire kutsibu indi siryangahulhwa. Anzire ebihangikwa biwe ebyosi eby’amenge ibyaminya erina liwe! Ka mulhwabya lhusunzo lhubuyanga abandu eriowa Musa akabakangirirya oku Yehova n’erina liwe ly’olhukengerwa! Ebya Musa abakangiriraya mubyabaghumya n’eribahumulikania, ng’embulha ey’obunyenye kutse eyihehere eyikawa okwa bithi. Thwangakolhaki erilhangira thuthi erikangirirya lyethu likabya lithya?

9. Thwanga wathikya thuthi eriyira erina lya Yehova mwa libuyirire?

⁹ Thukabya thukathulira nyumba okwa nyumba kutse ahakabya bandu bangyi, thwangana kolesya e Biblia erikangania abandu b’erina lya Nyamuhanga erya Yehova. Thwanganabaha ebitabu byethu, esyovidiyo, n’omwatsi owali okwa muthahulha wethu owakaha Yehova y’olhukengerwa. Okwa mubiiri, okwa sukuru, kutse ithune omwa lhughendo, thwanganabana ehighisa hy’eribwira abandi oku Nyamuhanga wethu mwanze n’emibere yiwe. Thukabya thukabwira abo thukeghaya okwa kighendererwa ky’olhwanzo ekya Yehova busana n’abandu n’ekihugho, thukabya ithwamababwira ekihambire oku Yehova ekyangabya kihyaka okw’ibo. Thukabya thukabwira abandi ekwenene eyihambire oku Thatha wethu w’olhwanzo, thukabya ithwamawathikya eriyira erina lya Nyamuhanga mwa libuyirire. Thukabya ithukawathikaya abandu erilhangira ngoku babirikangiriribwa amabehi mangyi oku Yehova. Sihali wundi mwatsi owakaghumaya n’erihumulikania abandu ng’owathukakangiriraya.​—Isa. 65:13, 14.

10. Thuk’eghesya abigha, busana naki isithwasubulira okw’ibakangirirya ebihano bya Nyamuhanga ebithunganene n’emisingyi yiwe lisa?

¹⁰ Thukabya thuk’eghesya abigha be Biblia, thukanza thubawathikaye baminye n’erikolesya erina Yehova. Kandi, thukanza thubawathikaye eriminya Yehova ya ndeke. Ithunemwendi berererya ekyo thwamakwama ky’eribabwira lisa obusondoli, ebihano bya Nyamuhanga, n’ebilhaghiro by’esyongeso? Omwigha mubuya angan’igha ebihano bya Nyamuhanga nibya n’eribyanza. Aliwe ibbwa omwigha inianemwendiowa Yehova busana n’erimwanza? Wibuke, Eva abya inianasi ekihano kya Nyamuhanga, aliwe mwathanza ndeke Nyamuhanga; na Adamu kuthya. (Enz. 3:1-6) Neryo kwesi isithwasubulira okw’ikangirirya abandi b’ebihano bya Nyamuhanga ebithunganene n’emisingyi yiwe lisa.

11. Thuk’eghesya abigha ebihano bya Nyamuhanga n’emisingyi yiwe, thwanga bawathikya thuthi erianza Mwinyebyo?

 ¹¹ Ebihano bya Yehova n’emisingyi yiwe bikathughasira mughulhu wosi. (Esy. 119:97, 111, 112) Aliwe abigha bethu sibanga bilhangira bathya bamathendi lhangira ngoku Yehova akathuhabyo busana n’erithwanza. Neryo ithwangana bulya abigha bethu: “Wukalengekanaya ni kyahi ekikaleka Yehova iniabwira abaghombe biwe athi bakole eki kandi baleke eki? Eki kikathubwiraki okw’iyo?” Thwamawathikya abigha bethu erilengekania oku Yehova n’erianza ndeke erina liwe ery’olhukengerwa, ithwangana thoka erihika okwa mithima yabu. Abigha bethu ibakend’ianza ebihano na Mwinyebyo. (Esy. 119:68) Ibakendi thunga erikirirya erikendi bawathikya erighumira ebitsibu ebikalire ebyo banga bana.​—1 Kor. 3:12-15.

12. Dawudi mwalemwa athi eribya n’omuthima muyima, kandi mumwalhwiririraki?

¹² Ebinywe bikulhu ebiri omwa Esyonyimbo 86:11, NW ni “yira omuthima waghe mo muyima.” Omwami Dawudi mwasondolibwa erihandika ebinywe ebyo. Omwa ngebe yiwe, mwalhangira ngoku ni kyolho erilighira omuthima erighabana. Kiro kighuma, iniane okwa lhuthwe lhw’enyumba yiwe mwalhangira omukali w’omulhume mulebe inianemwogha. Okwa ndambi eyo, omuthima wa Dawudi anabya muyima kutse abya aghabene? Abya inianasi ekihano kya Yehova kino: “Isiwarumawa oko mukali wa mulikyenyu.” (Eri. 20:17) Nomwabine, mwahandayo ameso. Omuthima wiwe mwaghabana ahakathi-kathi k’engumbu y’omukali, Batiseba, n’engumbu y’erianza eritsemesya Yehova. Nomwakine indi Dawudi abya iniabirighunza buthuku bunene iniananzire Yehova n’erimubaha, mwaghendera okwa syongumbu siwe. Busana n’ekyo, Dawudi mwakolha ekibi. Mwahemulha erina lya Yehova. Kandi Dawudi mwalethera abandu abathe kw’olhubanza b’ekitsibu ekikalire, imwamune n’ab’eka yiwe.​—2 Sam. 11:1-5, 14-17; 12:7-12.

13. Thukaminya thuthi ngoku omuthima wa Dawudi mwathasyabya muyima kandi?

¹³ Yehova mwasuyira Dawudi, neryo amathasyabya bughuma na Yehova. (2 Sam. 12:13; Esy. 51:2-4, 17) Dawudi mwibuka ebitsibu n’obulhumi ebyalhwiririra omw’ilighira omuthima wiwe erighabana. Ebinywe biwe ebiri omwa Esyonyimbo 86:11 byangana thasyahindulhwa mwa: “Nyihe omuthima owathaghabene.” Yehova mwanawathikya Dawudi eribya n’omuthima muyima kutse owathaghabene? Ee, kundi enyuma waho Ekinywe kya Yehova mukyakania  oku Dawudi ng’omulhume ‘w’omuthima owakwamire ndeke Omwami Mukulhu Nyamuhanga.’​—1 Bam. 11:4; 15:3.

14. Thutholere ithwayibulyaki, kandi busana naki?

¹⁴ Eky’erileberyako kya Dawudi kikahimba kandi kiriho erithughusako akasali. Iyo eriwa omwa kibi ekikalire n’ikunga okwa baghombe ba Nyamuhanga munabwire. Mbulha muthwamatsuka erikolera Yehova kutse thwamabirighunza myaka mingyi, thutholere ithwayibulya, ‘Nganemurwanisya ekithegho kya Sitani eky’erianza erighabanisya omuthima waghe?’

15. Eryubaha Nyamuhanga lyanga thutheya lithi thwamalhangira ebisasani ebyanga thulethamu esyongumbu nyibi?

¹⁵ Ng’eky’erileberyako, wamalhangira ekisasani okwa Tivi kutse okwa Intaneti ekyanga kulethamu esyongumbu nyibi, iwukendi kolhaki? Kyangan’olhoba eriyibwira wuthi ekisasani kutse omusathu si ponografe eyonyine-nyine. Aliwe sikyangabya ini kindu ekya Sitani akakolesaya erighaba omuthima wawu? (2 Kor. 2:11) Ekisasani ekyo kiri ng’ekihathiro ekya omundu akahira omwa kithika akakisathya. Akatsuka erihira ahayisongire h’omwa kithika. Neryo iniakongomerera ekihathiro, n’ekithika ikyasathika. Mbwino ekisasani ekyangaletha esyongumbu nyibi esyo sikyanga linganisibwa n’ahasongire ah’ekihathiro ekyo? Ehindu ehikalhangirika nga ni hike-hike kandi nga si hy’akabi hyanganaleka omundu iniakolha ebibi ebyangaghaba omuthima wiwe n’eritsandya obuthaleghulha bwiwe. Neryo isiwalighira ekyosi-kyosi ekithuwene eringira omwa muthima wawu! Lhangira wuthi akabya iniane muyima eryubaha erina lya Yehova!

16. Ni bibulyo byahi ebya thutholere ithwayibulya thukalengwako?

¹⁶ Eryongera okwa bindu ebyanga thulethamu esyongumbu nyibi, Sitani akakolesaya ebindi bithegho bingyi erithulengako. Thwanga kolhaki omwa mibere ng’eyi? Kyolhobire  erilhangira nga sihali butsibu. Ng’eky’erileberyako, ithwangana lengekania thuthi: ‘Sinangahighithwa busana n’erikolha eki, si kibi.’ Amalengekania ng’ayo ni mabi kutsibu. Thutholere ithwayibulya ebibulyo nga bino: ‘Mbwino Sitani ali okw’ikolesya ekithegho eki erianza erighaba omuthima waghe? Namalighira esyongumbu nyibi, inganemwendi tsandya erina lya Yehova? Mbwino ebya ngakolha ebi bikanyithunda hakuhi na Nyamuhanga waghe, kutse bikanyisegheraya haali okw’iyo?’ Ghaniraya okwa bibulyo ng’ebyo. Saba amenge w’eribisubirya omo kwenene. (Yak. 1:5) Erikolha ekyo kyangana kutheya. Kyangana kuwathikya erirwanisya erilengwako iwunasikire, nga Yesu kw’akolha akabugha athi: “Ulhuaho, iwe Sitani!”​—Mt. 4:10.

17. Busana naki sikyuwene eribya n’omuthima owaghabene? Iha eky’erileberyako.

¹⁷ Si kyuwene eribya n’omuthima owaghabene. Lengekanaya okwa timu ey’abasathi b’omupira abathekolongana. Abandi ibabya ibanzire eriyikolera erina, n’abandi isibanzire erighendera okwa bilhaghiro, n’abandi ibaghayire oyukabeghesaya. Etimu ng’eyo siyanga singa. Aliwe etimu eyiri bughuma y’eyangana singa. Omuthima wawu anganabya ng’etimu eyikasinga eyo, amalengekania wawu, esyongumbu, n’eriyowa lyawu byamabya ibine bughuma omw’ikolera Yehova. Wibuke, Sitani anzire erighabanisya omuthima wawu. Anzire amalengekania, esyongumbu, n’eriyowa lyawu ibyahakanisya ebihano bya Yehova. Nomwabine, omuthima wawu atholere iniabya iniane muyima nuku wukolere Yehova. (Mt. 22:36-38) Isiwalighira Sitani erighaba omuthima wawu!

18. Ngoku kiri omu Mika 4:5, erithwamu lyawu ni ryahi?

¹⁸ Nga Dawudi saba Yehova wuthi: “Yira omuthima waghe mo muyima ngathoke eryubaha erina lyawu.” Kolha mwa kilhubirirwa kyawu erilhangira wuthi wukaghendera okwa musabe oyu. Obuli kiro, wukathwamu, mbulha ni kike kutse ni kinene, kanganaya ku wukubaha erina lya Yehova eribuyirire. Wamakolha ekyo, iwe ng’Omwema wa Yehova, iwukendi leka erina eryo iryakanibwako ndeke. (Emi. 27:11) Neryo ithwe bosi ithukendi bughira haghuma n’omuminyereri Mika thuthi: “Thwasyalendera kera na kera omo lina ly’Omwami Mukulhu Nyamuhanga wethu.”​—Mika 4:5.