1. O vumina Nzambi, aweyi disongele? Ekuma awana bezolanga Yave bafwete kumvumina?

AKRISTU bezolanga Nzambi, kansi bekumvuminanga mpe. Mu longi diadi, tuvovela o mfunu wa vumina Nzambi. Kansi, o vumina Nzambi, aweyi disongele? Ana bevuminanga Nzambi, bafwete toma kunzitisanga. Ediadi dikutukakidilanga mu vanga konso diambu dilenda kendeleka e Se dieto dia zulu yo fwasa e ngwizani eto yo yandi.—Nku. 111:10; Nga. 8:13.

2. Mun’owu wa mvovo mia Davidi wa Ntinu miasonama muna Nkunga 86:11, nkia mambu mole tuvovela?

² Tanga Nkunga 86:11. Ekolo tubadika e sono kiaki, tubakula vo Davidi wa Ntinu wazaya o mfunu wa vumina Nzambi. Owau, yambula twafimpa una tulenda sadila mana Davidi kavova muna sambu kiandi. Diantete, tuvovela e kuma tufwete vuminanga e nkumbu a Nzambi. Diazole, tuvovela una tulenda songela o vumi wa Nzambi muna zingu kieto kia lumbu ke lumbu.

3. Nkia diambu diasadisa Mose mu kwamanana vumina e nkumbu a Nzambi?

³ Yindula una Mose kamona vava kakala muna mpasuk’a tadi yo mona e mona-meso kia nkembo a Yave vava kavioka vana ntwal’andi. E diambu diadi sivi diampwena kikilu dina ke disidi vangama ko vitila Yesu Kristu keza ova ntoto. I bosi, Mose wawá e ndinga, nanga nding’a mbasi ina yayova vo: “Yave, Yave, Nzambi a nkenda ye ngemba, ke funganga makasi mu nzaki ko, ozele yo walakazi ye ludi, osonganga walakazi  kwa mafunda ma mbandu, ololokanga e mbi yo makuzuka ye sumu.” (Luv. 33:17-23; 34:5-7) Vava Mose kasadilanga e nkumbu Yave, nanga wasungamenanga e sivi diadi. Ekiaki i kuma kakasakesela Aneyisaele vo ‘bavumina e nkumbu yayi yankembo ye imwesanga wonga.’—Nsi. 28:58.

4. Nki kilenda kutusadisa mu vumina Yave?

⁴ Vava tuyindulanga e nkumbu Yave, diambote mpe twayindulanga e mpila muntu kena o Yave. Tufwete yindulanga e fu yandi nze nkuma, ngangu, unsongi ye zola. O yindula e fu yayi ye yankaka dikutusadisa mu kumvumina.—Nku. 77:11-15.

5-6. (a) Ayeyi i nsas’a nkumbu a Nzambi? (b) Mun’owu wa sono kia Luvaiku 3:13, 14 ye Yesaya 64:8, mu nkia mpila o Yave kelungisilanga e kani diandi?

⁵ Ayeyi i nsas’a nkumbu a Nzambi? Akwa ngangu ayingi betambulwilanga vo e nkumbu Yave nanga ina ye nsasa vo: “Oyandi Okadisanga.” E nsasa yayi ikutusungamesanga vo ke vena diambu ko dilenda kakidila o luzolo lwa Yave. Avo diambu kazolele vanga, ovanganga dio kikilu. Mu nkia mpila?

⁶ Yave okitukanga konso una kazolele kimana kalungisa e kani diandi. (Tanga Luvaiku 3:13, 14.) Nkumbu miayingi, e nkanda mieto mikutukasakesanga mu yindula e nsas’a nkumbu a Nzambi. Yave olenda mpe sadila wantu alembi lunga mu kituka konso una kazolele muna kunsadila yo lungisa e kani diandi. (Tanga Yesaya 64:8.) Muna mpila zole zazi, Yave ovanganga mawonso kimana o luzolo lwandi lwalungana. Ke vena diambu ko dilenda kunkakidila.—Yes. 46:10, 11.

7. Aweyi tulenda wokesela luyangalalu lweto muna Se dieto dia zulu?

⁷ Tulenda wokesa luyangalalu lweto muna Se dieto dia zulu muna yindulanga mana kevanganga ye mana kekutusadisanga mu vanga. Kasikil’owu, vava tuyindulanga e lekwa yawonso kasema, tusivikanga kikilu una Yave kavangila e lekwa yayi yawonso. (Nku. 8:3, 4) Vava tuyindulanga mpe una Yave katusadisila mu vanga diambu muna lungisa e kani diandi, o vumi weto muna yandi kuwokelanga. Kieleka, e nkumbu Yave wonga imwesanga. E  nkumbu Yave ikutusadisanga mu zaya mawonso mu kuma kia Se dieto, i sia vo, mawonso kavangidi kala ye mawonso kevanga kuna sentu.—Nku. 89:7, 8.

8. Landila e sono kia Nsiku 32:2, 3, adieyi Yave kazolele vo selo yandi bavanga mu kuma kia nkumbu andi?

⁸ Vitila Aneyisaele bakota muna Nsi a Nsilu, Yave walonga nkunga mosi kwa Mose. (Nsi. 31:19) Yave walomba kwa Mose vo kalonga nkunga wau kwa nkangu. (Tanga Nsiku 32:2, 3.) Ekolo tubadika e tini kia 2 ye 3, tubakula vo Yave kazolele ko vo nkumbu andi yaswekama yovo wantu bayindula vo isundidi vauka muna yo sadila. Yave ozolele vo awonso bazaya e nkumbu andi. Yindula e lau Aneyisaele bakala diau vava Mose kabalonga mu kuma kia Yave ye nkumbu andi anene. Nze una mawanga ma mvula mekudisilanga e titi, mana Mose kabalonga mu kuma kia Yave makumika lukwikilu lwau yo kubakasakesa. Adieyi tulenda vanga kimana mpil’eto yalongela yakala nze mawanga ma mvula?

9. Aweyi tulenda sadisila muna luveleleso lwa nkumbu a Yave?

⁹ Vava tusilanga umbangi mu nzo ke nzo yovo vana fulu kia ndonga, tulenda sadila Bibila muna songa kwa wantu e nkumbu a Nzambi, i sia vo, Yave. Toma sola e nkanda okaya, video osonga ye malongi mena muna nzil’eto ya internete mevovelanga nkumbu a Yave. Kiakala kuna salu, kuna sikola yovo vava tukangalanga, tulenda vava sadila konso lau muna vovela oma ma Nzambi eto anzolwa ye mpila muntu kena. Tulenda kubazayisa e mambu mambote kevanga o Yave mu kuma kia wantu ye ntoto. Muna wo vanga, tusadisa o wantu babakula vo Yave otoma kutuzolanga. Vava tuzayisanga kwa akaka e ludi mu kuma kia Se dieto dianzodi, tusadisanga muna velelesa e nkumbu a Nzambi. Tusadisa mpe wantu babakula vo mambu mayingi maluvunu balongwa mu kuma kia Yave. Ke vena ye malongi mankaka ko malenda kumika o lukwikilu lwau avo ke malongi mama ko.—Yes. 65:13, 14.

10. Ekolo tufilanga e longi dia Bibila kwa alongoki eto, ekuma ke tufwete kubalongela kaka ko e nsiku ye nkanikinu mia Nzambi?

¹⁰ Ekolo tufilanga e longi dia Bibila kwa alongoki eto, tulenda vanga ngolo za kubasadisa mu zaya Yave yo sadila e nkumbu andi. Vana ntandu, tuzolele kubasadisa bazaya nkia mpila muntu kena o Yave. Muna lungisa e kani diadi, nga divavanga vo twabalonga kaka tuludiku, nkanikinu ye nsiku mia Nzambi? O nlongoki olenda zaya e nsiku mia Nzambi yo yangalela mio. Kansi, avo kalongokele ko una kalenda zolela Yave, diampasi dikala mu lemvokela e nsiku miandi. Sungamena dio vo Eva wazaya o nsiku wa Nzambi, kansi katoma zolanga ko Ndiona wavana o nsiku wau. Adami mpe diau dimosi. (Tuku 3:1-6) Muna kuma kiaki, mayingi tufwete vanga ke longa kaka ko e nsiku ye nkanikinu mia Nzambi.

11. Vava tulonganga e nsiku ye nkanikinu mia Nzambi kwa alongoki eto, aweyi tulenda kubasadisila bazola Ona wavana e nsiku miami?

¹¹ E nsiku ye nkanikinu mia Yave miamfunu ye miambote kwa yeto. (Nku. 119:97, 111, 112) Kansi, o nlongoki eto okwikila kaka muna diambu diadi, avo obakwidi vo Yave wasikidisa e nsiku miami kadi zola kekutuzolanga. Muna kuma kiaki, tulenda kunyuvula: “Muna ngindu zaku, ekuma Nzambi kelombelanga kwa selo yandi vo bavanga e diambu diadi yovo lembi dio vanga? Ediadi adieyi ditulongele mu kuma kia kiwuntu kiandi?” E yuvu nze yayi ilenda simba o ntim’a nlongoki eto yo kumfila mu yindula mu kuma kia Yave yo yima o zola muna nkumbu andi. Muna mpila yayi, o nlongoki eto ke zola kaka nsiku ko, kansi ozola mpe Ona wavana mio. (Nku. 119:68) O lukwikilu lwandi  lukumama, wakubama kekala muna zizidila konso ntonta zilenda kumbwila.—1 Kor. 3:12-15.

12. Nkia ntangwa Davidi kakala ye ntima miole? Nkia mfwilu diantwasila?

¹² Muna Nkunga 86:11 Davidi wa Ntinu wavova vo: “Sikidisa ntim’ame.” E mvovo miami mfunu kikilu mina. Muna zingu kiandi, Davidi wamona una dilenda kadila diasazu mu kala ye ntima miole. Lumbu kimosi, vava Davidi kakala kuna nludi a nzo wamona nkento angani ona wayowelanga. Muna kolo kiokio, aweyi Davidi kamona muna ntima? Ntima mosi yovo miole kakala miau? Wazaya e nsiku a Yave uvovanga vo: “Kulokokela nkento a nkwaku ko.” (Luv. 20:17) Kansi, wakwamanana tala o nkento wayowelanga. Muna ntima umosi, wakala ye luzolo lwabonga o nkento ndiona, i sia vo, Bate-seba. Muna ntima wankaka, wakala ye luzolo lwasadila Yave. Kana una vo Davidi wazolanga Yave yo kumvumina, wayambula vo e zolela yambi yansunda, ediadi diamfila mu vola masumu mampwena. Davidi watwasa mpe luvezo muna nkumbu a Yave yo twasa e mpasi kwa minkondwa-kuma kumosi ye esi nzo andi.—2 Sam. 11:1-5, 14-17; 12:7-12.

13. Aweyi tuzayidi wo Davidi wavutukila o ntim’asikila?

¹³ Yave watumba Davidi, kuna kwalanda Davidi wavutulwisa e ngwizani andi yo Yave. (2 Sam. 12:13; Nku. 51:2-4, 17) Davidi wasungamena mambu mawonso mampasi ye mfwilu kabaka vava kakala ye ntima miole. E mvovo miandi miasonama muna Nkunga 86:11, milenda sekolwa mpe vo: “Umpana ntima mosi.” Nga Yave wasadisa Davidi mu kala diaka yo ntima wasikila yovo ntima mosi? Elo, kadi e Diambu dia Yave divovanga vo ‘ntim’a Davidi wasikila muna Yave wa Nzambi andi.’—1 Nti. 11:4; 15:3.

14. Nkia kiuvu tulenda kukiyuvula? Ekuma?

¹⁴ E nona kia Davidi kina se lukasakeso kwa yeto, kansi kikutulukisanga mpe. E masumu mampwena kavola mena se lulukisu kwa selo ya Nzambi o unu. Kana nkutu vo se mvu miayingi tusadilanga Yave yovo ve, diamfunu twakiyuvulanga: ‘Nga yakubama ngina mu zizidila e ntonta kimana o Satana kalembi kumfila mu kala ye ntima miole?’

15. O vumi wa Nzambi aweyi kulenda kututanina avo tumwene foto diansoni?

¹⁵ Kasikil’owu, adieyi ovanga avo omwene foto diansoni muna televizau yovo muna internete? Akaka balenda yindula vo: ‘Ah, e foto diadi ke vangu dia zumba ko.’ Kansi, nga Satana kena sadila foto diadi ko yovo filme yayi muna kumfila yakala ye ntima miole?  (2 Kor. 2:11) E foto diadi dilenda tezaneswa ye sengele kina muntu kesadilanga muna pasula e vindi dia nti. Vava keyantikanga pasula e vindi, o meno ma sengele mekotanga muna vindi malembe-malembe. I bosi, avo meno ma sengele makotele kikilu muna kati, e vindi dipasukanga. E mafoto mansoni mesongwanga muna televizau yovo muna internete i diau mpe mevanganga muna ntima mieto. O tala e mafoto mama dilenda moneka vo ke diavonza kwandi ko, kansi malembe-malembe malenda yivisa o ntim’a muntu yo kumfila mu sumukina Yave. Muna kuma kiaki, kuyambula ko vo konso zolela yambi yakota muna ntim’aku. Sia e ngolo zakala yo ntima mosi kimana wavumina nkumbu a Yave.

16. Vava tutontwanga mu vanga diambu diambi, nkia yuvu tufwete kukiyuvulanga?

¹⁶ Katula mafoto mansoni, Satana osadilanga mambu mankaka muna kututonta. Adieyi tuvanga avo tutontelo? Akaka balenda yindula vo: ‘Avo mvangidi e diambu diadi kivaikiswa kwame ko muna nkutakani, muna kuma kiaki dina ivanga ke sumu diampwena ko.’ Kansi, ngindu zazi zambi kikilu. Ozevo, diambote twakiyuvulanga: ‘Nga Satana una sadila e ntonta zazi muna kumfila yakala ye ntima miole? Adieyi divangama avo ikivene muna zolela yambi? Nga nkumbu a Yave iyivisa? Nga mavangu mame mekumfinamesa yo Nzambi yovo ve?’ Diambote twabadikanga e yuvu yayi. Diamfunu mu sambanga yo lomba ngangu muna vana e mvutu za yuvu yayi kuna ziku kiawonso. (Yak. 1:5) O vanga wo, dilenda kutanina. Ediadi dikusadisa mu sunda e ntonta yo vova dina Yesu kavova: “Katuka, e Satana!”—Mat. 4:10.

17. Ekuma ke dinina diambote ko mu kala ye ntima miole? Yika e nona.

¹⁷ Ke diambote ko mu kala ye ntima miole. Yindula vo wantu bena muna buka kia tá e somba, kansi ke bewizananga ko. Akaka  muna yau bazolele vo nkembo wawonso wavewa kaka kwa yau. Vo i akaka ke bazolele lemvokela e nsiku mia tela e somba ko. Akaka nkutu ke bazolele zitisa o nlongi au ko. Nga obenze vo e buka kiaki sunda kisunda? Muna sunda, divavanga vo e buka kiakala ye ngwizani. I diau mpe dilenda vangama muna ntim’aku avo e ngindu, zolela ye makani maku ngwizani mena muna sadila Yave. Sungamena dio vo Satana ozolele vo wakala ye ntima miole. Satana ozolele mpe vo e ngindu, zolela ye makani maku malembi kala e ngwizani ye nkanikinu mia Yave. Kansi, muna sadila Yave, ofwete vana o ntim’aku wawonso kwa yandi. (Mat. 22:36-38) Muna kuma kiaki, kuyambula ko vo Satana kafila mu kala ye ntima miole.

18. Mun’owu wa sono kia Mika 4:5, nkia kani tufwete kala diau?

¹⁸ Tulenda lomba kwa Yave dina Davidi kalomba vo: “Sikidisa ntim’ame kimana yavumina e nkumbu aku.” Vanga mawonso olenda muna zingila e ngwizani ye sambu kiaki. Muna nzengo obakanga konso lumbu, kiakala zakete yovo zampwena, songa vo nkumbu avauk’a Yave otoma vuminanga. Muna vanga wo, osonga vo u Mbangi a Yave ona otwasanga nkembo muna nkumbu yayi. (Nga. 27:11) Ozevo, tulenda yikama e mvovo mia Mika wa ngunza, ona wavova vo: “Vo i yeto, tukangalela muna nkumbu a Yave wa Nzambi eto yakwele mvu.”—Mika 4:5.