1. Ngano tîna Nzambi ni nti, mpe mu bungu dia nti we mfunu kwe bantu bô bazololo Nzambi?

BAKRISTO Nzambi bazoloko, mpe tîna bamutînaka. Bantu bakaka balendi banza ti ka bulendi’â bwabâ ko. Kâ, ka tuta zonzela tîna peleko bunkuta bwa bubi ko. Bunkunta bu tuzonzela bwa nzitukulu bwena. Bantu bê na bunkuta bwa mpila yo, Nzambi batînaka mpe nkatika buzitu bwe nawu mu bungu dia Yandi. Ka bazololo’â ko bafwemesa Tata’awu dia ku mazulu, mu bungu ti ka bazololo’â mu bebesa tindiku tiawu na Yandi ko.​—Mik. 111:10; Bin. 8:13.

2. Mu mabanza ma mutinu Davide me mu Mikunga 86:11, misamu miole mi tuzonzela ni mie?

² Tanga Mikunga 86:11. Bu dimbitila verse yo, lendi tomo bakula ti Davide weri mutinu wa kwikama, nkatika bakula keri bakulaka mfunu ya tîna Nzambi. Tatala bwe tulendi sarila misamu mia tâ Davide mu lusambulu lwandi. Musamu wa ntete, mbo tutaluzula misamu mita sa ti tabâ na buzitu bwabwingi mu nkumbu ya Nzambi. Wa nzole, mbo tuzonzela mpila yi tulendi songela buzitu bweto mu nkumbu ya Nzambi bilumbu biabiansoni bia luzingu lweto.

3. Ntia musamu wabakisa Mose ngatu katatamana mu zitisa nkumbu ya Nzambi?

³ Banza’eti bwe Mose keri monaka bu keri mu munwa wa tari mpe bu kamona timona-meso tia mukembo wa Yehova weri yôkaka hâna. Wo ni musamu wa nguria wa nzitukulu walembo toko  mona muntu ntete Yezu kizi ha mutoto! Mose wawâ misamu mita landa, kampe mbazi yeri zonzaka: “Yehova Yehova, Nzambi ye na tiari tia lemvokela na tiari tia mutima, ka dasukaka mu ntinu ko mpe luzolo lwa kwikama lwalwingi lwe nandi na butieleka; mbo kasongelaka luzolo lwa kwikama kwe mafunda mpe mbo kalemvokelaka makuba, mbi na masumu.” (Ndu. 33:17-23; 34:5-7) Kampe Mose mbo keri vulu bambukilaka musamu wo, bu keri sarilaka nkumbu ya Yehova. Ka wena wa nzitukulu ko mu zaba ti Mose wayizi lwengesa Israele dieri kanda dia Nzambi “mu tîna nkumbu yo ya nkembo na ya nzitukulu.”​—Lub. 28:58.

4. Ntia bifu tulendi dimbitilaka mu bâ na buzitu bwabwingi mu Yehova?

⁴ Bu tudimbitilaka mu nkumbu ya Yehova, bubote bwena mu dimbitilaka mpe ka ntia mpilla muntu wena. Tufweti bambukaka bifu biandi, ntiana ngolo zandi, ndwenga zandi, buderede bwandi, na luzolo lwandi. Bu tukwe dimbitiri mu bifu bio na biakaka, tulendi kwizi bâ na buzitu bwabwingi mu Yandi.​—Mik. 77:11-15.

5-6. (a) Nkumbu ya Yehova bwe yita zolo tâ? (b) Mu nzonzolo ya Ndukulu 3:13, 14 na ya Izaya 64:8, bwe Yehova kasaka ngatu misamu mialungana?

⁵ Ntia misamu mitariri nsasa ya nkumbu ya Yehova tuzebi? Bantu ba mayela babingi batâka peleko basingasaka ti nkumbu ya Yehova yizololo tâ ti “Lungisa kalungisaka.” Nsasa yo mbo yitubambulaka ti ka kwena musamu ko wulendi kabakasa Yehova mu yirika musamu wu kazololo, mpe lendi sa ti misamu mialungana. Mu bwe?

⁶ Yehova mbo kasaka miamiansoni mifwanakane mu lungisa makani mandi. (Tanga Ndukulu 3:13, 14.) Mu mikanda mieto, mbo bavulu tu tindisaka mu dimbitilaka mu bungu dia bunkuta bu nataka timuntu tia Nzambi. Yehova lendi sarila mpe bantu ba masumu bamusarilaka babâ mio mi kazololo ngatu bamusarila mpe ngatu kalungisa makani mandi. (Tanga Izaya 64:8.) Mu mpila yo, Yehova mbo kalungisaka luzolo lwandi. Ka kwena musamu ko wulendi mu kabakasa mu lungisa makani mandi.​—Iza. 46:10, 11.

7. Bwe tulendi tungila luzolo lweto mu bungu dia Tata’eto die ku mazulu?

 ⁷ Tulendi tunga luzolo lweto mu bungu dia Tata’eto die ku mazulu bu tukwe dimbitiri misamu mi kasa mu bungu dia beto na mu mio mi katubakisa mu yirika. Mu tifwani, bu tudimbitilaka mu bima biabiansoni bi kasala, mbo tutomo yitukuku. (Mik. 8:3, 4) Mpe bu tudimbitilaka mu bima bi talenda mu sa mu ngolo za Yehova, ntiana sarila luzolo lwandi, mbo tubâka na buzitu bwabwingi mu Yandi. Nkumbu ya Yehova nguria bunkuta yinataka! Mbo yitarilaka misamu miamiansoni mitariri Tata’eto, misamu miamiansoni mi kayirika na misamu miamiansoni mi kakwizi yirika mu bilumbu bita kwiza.​—Mik. 89:7, 8.

8. Ngano Lubambu 32:2, 3 bwe yisongelaka mpila yi bongelaka Yehova nkumbu’andi?

⁸ Ntete bala ba Israele bakota ku mutoto wa kani, Yehova walongesa mukunga kwe Mose. (Lub. 31:19) Ha manima, Mose walongesa mukunga kwe kanda dia Israele. (Tanga Lubambu 32:2, 3.) Bu tudimbitila verse 2 na 3, mbo tumona ti Yehova kazololo’â ko ti nkumbu’andi basweka yo, babongelaka yo ntiana nkumbu ye nkatika mulongo mu tâ. Zololo ti bivangu biandi biabiansoni bie na mayela biazaba nkumbu’andi! Bweso bwa bunene bweri kwe bala ba Israele mu wâ Mose weri balongesaka misamu mitariri Yehova na nkumbu’andi ya nkembo! Misamu mieri ba têlaka Mose, timinu tiawu mieri yikaka ngolo mpe tindisa mieri ba tindisaka ntiana mvula ya lembama bu yibolesaka matiti. Ngano bwe tulendi bêla na lukwikulu ti, ndongokolo’eto mbo yidelakanaka na mpila yo?

9. Bwe tulendi sa ngatu nkumbu ya Yehova yabâ ya santu?

⁹ Bu tubâka mu tisalu tia samuna, tulendi sarila Bibila dieto mu songela kwe bantu ti nkumbu ya Nzambi ni Yehova. Tulendi ba hanaka mikanda mia toma, video za mbote, mpe na bima bie mu site’eto bikembesaka Yehova. Ku tisalu, ku lukolo, peleko bu tukwendaka ku nzietolo (voyage), tulendi baka bweso bwa zonzela misamu mitariri Tata’eto dia luzolo na misamu mi kazololo. Bu tuzonzelaka makani ma Yehova mu bungu dia bantu na mutoto kwe bô ba tubwabanaka na bo, mbo tubatêlaka misamu milendi bâ mia nkatika mia nzitukulu kwe bawu, mpe milendi sobesa mpila yi babongelaka Yehova. Bu tuzonzelaka matieleka matariri Tata’eto, mbo tusaka mpe ti nkumbu ya Nzambi yabâ ya santu. Mbo tubakisaka bantu bazaba bungungu bwa tâ bantu bakaka mu Yehova. Misamu mia Bibila mi tulongesaka kwe bantu nkatika tidzunu minataka.​—Iza. 65:13, 14.

10. Bu tulongesaka bantu Bibila, mu bungu dia nti wulembolo fwana mu longesaka kwa ntumunu za Nzambi na mitieno miandi?

¹⁰ Bu tulongesaka bantu Bibila, mbo tuzoloko mu ba bakisa mu zaba na mu sarila nkumbu ya Yehova. Mbo tuzoloko mpe mu ba bakisa mu zaba misamu mitariri Yehova. Ngano mbo tulungisa mio tala ti, misiku, mitieno mia Nzambi, na misamu mitariri ndiatulu kwa tubalongesaka? Muntu wa nsungu wulongokaka, kampe mbo kalongoka mu zaba misiku mia Nzambi, lendi mpe mia zitisa. Kâ, ngano mbo katumamana Yehova mu bungu ti yandi kazoloko? Bambuka’eti, Eva musiku wa Nzambi wa kazaba, kâ ka bâ na luzolo lwa matieleka ko mu Nzambi; Adame mpe ka bâ na lo ko. (Mba. 3:1-6) Wuzololo tâ ti ka wufweni’â ko kwa mu longesaka bantu ntumunu za Nzambi na mitieno miandi.

11. Bu tulongesaka ntumunu za Nzambi na mitieno miandi, bwe tulendi bakisila bantu ba tulongokaka na bo bizi bazolo Yehova Yandi wahana mio?

¹¹ Ntumunu za Yehova na mitieno miandi mia mbote kwa mibâka mu bungu dia beto. (Mik. 119:97, 111, 112) Kâ, bantu batulongokaka na bo ka balendi’â bamwina wo bo ko, tala ti ka babakuri’â ko ti, Yehova watuhana misiku, mu bungu ti beto kazololo. Buna, tulendi yula bantu batulongokaka na bo biyuvu ebi: “Mu mabanza ma  nge, mu bungu dia nti Nzambi kalombelaka bisari biandi biayirikaka musamu ewu peleko balembo yirikaka musamu ewu? Musamu wu nti wuta tu songela mu timuntu tiandi?” Tala ti tubakisi bantu batulongokaka na bo badimbitilaka misamu mitariri Yehova mpe bakurisa luzolo lwa matieleka mu bungu dia nkumbu’andi ya nkembo, mbo tuzolo mu vutu tomo simba mitima miawu. Bantu batulongokaka na bo mbo bakwizi zolo misiku mia Yehova na Yehova Yandi wahana mio. (Mik. 119:68) Timinu tiawu mbo tikula mpe mbo tibabakisa mu tomo korela mpasi bu zitulaka.​—1 Kor. 3:12-15.

12. Mu ntia musamu Davide kalembana mu bâ na mutima wa mukaka, mpe ntia musendo wanata?

¹² Misamu mia tsoneka mutinu Davide mu Mikunga 86:11 mitâka ti “sa ti mutima’ani wabâ wa mukaka” nkatika mfunu miena. Bu keri wa moyo, wamona ti ka wena musamu wa mpasi ko mu sa ti mutima wabâ wa kabana. Lumbu timosi bu keri ku muluri wa nzo, Davide wamona mukento wa muntu wakaka weri yebelaka. Mu ntangu yina, ngano mutima wa Davide wa mukaka weri peleko wa kabana weri? Mutieno wa Yehova wutâka ti: “Kufweti’â wadienokena mukento wa mpwana’aku ko,” wa kazaba. (Ndu. 20:17) Wa matieleka, watatamana mu taririla. Mutima’andi wayizi bâ wa kabana, mu nsatu’andi ya dienokena Bateseba na nsatu’andi ya tâ Yehova nsayi. Ni bu sa ti Davide tuka ntama kabatika mu zolo Nzambi na mu mu tînaka, wasarila mabanza mandi ma bwimi. Mu ntangu yina, Davide walanda nzila ya mbi. Wafwisa nkumbu ya Yehova nsoni. Davide wanata mpe mpasi kwe bantu balembo zaba musamu, na kwe kanda dia yandi beni mpe.​—2 Sam. 11:1-5, 14-17; 12:7-12.

13. Bwe tuzabiri ti mutima wa Davide wayizi vutu bâ wa mukaka?

¹³ Yehova wasemba Davide, ha manima Davide wayizi vutu bâ na tindiku tia mbote na Yehova. (2 Sam. 12:13; Mik. 51:2-4, 17) Davide wabambuka mpasi zatula mu ntangu yi kabika mutima’andi wa kabana. Misamu mi katâ mie mu Mikunga 86:11 balendi vutu mia têla mu mpila eyi: “Kungana mutima wulembolo wa kabana.” Ngano Yehova wabakisa Davide mu bâ na mutima wa mukaka peleko wulembolo wa kabana? Yee. Ha manima, Zu dia Yehova diayizi tâ ti Davide weri muntu weri na mutima wa mukaka kwe Yehova Nzambi’andi.​—1 Mit. 11:4; 15:3.

14. Ntia tiyuvu tufweti tiyula, mpe mu bungu dia nti?

¹⁴ Tifwani tia Davide tindisa tita tu tindisa mpe lwengesa tita tu lwengesa. Disumu diandi dia dinene mbo dilwengesaka bisari bia Nzambi bia ntangu yi. Ni bu sa ti ka ntama ko tabatikiri mu sarila Yehova, ni bu sa ti tuka ntama  tumusarika, tufweti tiyula, ‘Ngano ntontolo za Satana nitelamanaka ngatu ka zikabandi mutima’ ani?’

15. Bwe bunkuta bweto bwa Nzambi bulendi tu kengerela tala ti binsinsia bivumbulaka nsatu za vukasa nitu tumweni?

¹⁵ Mu tifwani, tala ti mweni binsinsia bilendi vumbula nsatu za vukasa nitu mu tele peleko mu internet, ngano bwe sa? Wulendi bâ musamu wa fioti mu banza ti binsinsia bio ka biena nkatika porno ko. Kâ, ngano wulendi bâ musamu wu sikamana Satana mu kaba mutima’aku? (2 Kor. 2:11) Binsinsia bio bilendi bâ ntiana mwa tisengo ti basarilaka mu pasula tibuku tia tinene tia muti. Mu pasula muti wo, muntu wufweti toko tsokota nsongi ya tisengo tio ha tibuku tio tia muti. Bu kakwe diamisi tisengo mu kati dia muti, muti mbo wukwe kabane malembe malembe. Ngano binsinsia bivumbulaka nsatu ya vukasa nitu bilendi bâ ntiana nsongi ya tisengo tio? Tifu tia talaka bima bimonekaka ntiana ka biena bia mbi ko, bilendi sa ti muntu wasumuka. Buna, kubikandi na kani tima tilembolo fwanakana tiakota mu mutima’aku! Tatamana mu lunda mutima’aku wa mukaka ngatu watînaka nkumbu ya Yehova!

16. Bu tulaka ntontolo, ntia biyuvu tufweti tiyulaka?

¹⁶ Satana ka sarilaka kwa binsinsia ko bivumbulaka nsatu za vukasa nitu, bima biakaka mpe kasarilaka ngatu tayirika misamu mia mbi. Ngano bwe tusaka? Ka mpasi’â ko mu banza ti bima biango ka biena bia mbi. Mu tifwani, tulendi banza ti: ‘Eka, ka bakunkatula mu timvuka ko tala ti ndirikiri musamu ewu, ka wena kwa musamu wa wunene ko.’ Mabanza ma mpila yo ma nkatika ma mbi mena. Bubote bwena mu tiyulaka biyuvu ebi: ‘Ngano Satana musamu kata yêla mu sarila ngatu kakaba mutima’ani? Tala ti mbikiri mabanza ma mbi makula mu mutima’ani, ngano ndendi fwisa nkumbu ya Yehova nsoni? Ngano nsalulu yi  mbo yisa ti napusa kwe Nzambi’ani, peleko mbo yikungambasa na Yandi?’ Dimbitila biyuvu bio. Sambila Nzambi kakuhana ndwenga za hanina mvutu mu biyuvu bio na bunsungu bwabwansoni. (Zak. 1:5) Nsalulu za mpila yo zilendi tu kengerela. Nsalulu zo zilendi tu bakisa mu telamana ntontolo tii ku nsuka, ntiana bwa sa Yezu bu katâ: “Katuka, Satana!”​—Mat. 4:10.

17. Mu bungu dia nti mutima’eto wufweti lembo bâ wa kabana? Bangula.

¹⁷ Musamu wa mbi wena tala ti mutima’eto wa kabana wena. Banza’eti ekipe ya sport ye na bantu balembo wisanaka. Bakaka bazololo babaka mukembo wa bawu beni, bakaka ka bazololo’â ko balanda misiku mia tinsamu, mpe bakaka ka bazitisaka coach ko. Ekipe ya mpila yo bweso bwa fioti bwe nawu mu baka. Kâ, ekipe yo ye na tiwisa bweso bwabwingi bwe nawu mu baka. Mutima’aku wulendi bâ ntiana ekipe yilendi baka tala ti mabanza maku na nsatu zaku wisana ziwisanaka mu sarila Yehova. Bambukaka ti, Satana we nandi kakaba mutima’aku. Zololo ti mabanza maku na nsatu zaku ka zikwelanandi na mitieno mia Yehova. Kâ, wufwanakane wabâ na mutima wa mukaka mu sarila Yehova. (Mat. 22:36-38) Kani kabwe kubikandi Satana kakaba mutima’aku!

18. Tintwari na Mika 4:5, ntia nzengolo bonga?

¹⁸ Sambila Yehova ntiana bwa sa Davide bu katâ: “Sa ti mutima’ani wabâ wa mukaka, ngatu natîna nkumbu’aku.” Sa miamiansoni mi lenda mu landa tifwani tio. Bilumbu biabiansoni, mu nzengolo zaku za fioti na za zinene songelaka ti nkumbu ya santu ya Yehova tînaka peleko tomo zitisaka. Bu kwe siri bo, mbo tomo songela ti nge nguria Mbangi ya Yehova yena, tiana mbangi zakaka. (Bin. 27:11) Mpe beto bansoni tintwari na nzonzolo ya Mika, mbo tutâ ti: “Mbo tudiatila mu nkumbu ya Yehova Nzambi’eto ntangu zazansoni.”​—Mika 4:5.