1. Kusaba Mulimu kutalusañi, mi ki kabakalañi batu babalata Jehova habaswanela kumusaba?

BAKRESTE ba niti balata Mulimu, mi bamusaba. Kono babañwi bakona kuikutwa kuli hakukonahali kusaba Mulimu ni kumulata ka nako yeswana. Kono sabo yetaluswa fa haki ya kungangamiswa ki nto yeñwi. Lukanyakisisa za sabo yeñwi yeluswanela kuba ni yona. Batu babanani sabo yecwalo basaba Mulimu mi bamukuteka hahulu. Hababati kueza nto ifi kamba ifi yasatabeli Ndataa bona wa kwa lihalimu kakuli habalati kusinya silikani sabona ni yena.—Samu 111:10; Liprov. 8:13.

2. Ka kuya ka manzwi anaabulezi Mulena Davida a kwa Samu 86:11, ki lika mañi zepeli zeluka nyakisisa?

² Mubale Samu 86:11. Haiba munahanisisa manzwi ao, mukalemuha kuli Mulena Davida naautwisisa kuli kusaba Mulimu ki kwa butokwa hahulu. Halunyakisiseñi molukona kusebeliseza manzwi anaañozi Davida ka kususumezwa ki moya wa Mulimu. Sapili, lukanyakisisa libaka haluswanela kusaba libizo la Mulimu. Sabubeli, lukanyakisisa molukona kuboniseza kuli lwakuteka libizo la Mulimu mwa bupilo bwaluna.

3. Ki nto mañi yenetusize Mushe kuzwelapili kusaba libizo la Mulimu?

³ Munahane feela mwanaaikutwezi Mushe hanaali mwa lwandala lwa licwe ni kubona kanya ya Jehova inze isweli kufita. Kaniti luli, yeo neli yona nto yemakaza hahulu yakile abona mutu pili Jesu asika taha kale fa lifasi. Hasamulaho, Mushe autwa manzwi alatelela, ili ao mwendi naabulezwi ki lingeloi: “Jehova, Jehova, Mulimu yanani makeke ni mukekecima, yasaakufi  kuhalifa ni yatezi lilato lelisa feli ni niti, yabonisa lilato lelisa feli kwa masika aeza likiti, yaswalela bufosi ni bumaswe ni sibi.” (Exo. 33:17-23; 34:5-7) Kubonahala kuli Mushe naazwezipili kuhupula kezahalo yeo nako kaufela hanaaitusisa libizo la Jehova. Ki lona libaka Mushe hasamulaho naalemusize Maisilaele ‘kusaba libizo le, lelikanya ni lelisabisa.’—Deut. 28:58.

4. Ki lika mañi zeka lutusa kusaba Jehova?

⁴ Halunahana za libizo la Jehova, hape luswanela kunahanisisa mwainezi muñaa libizo leo. Luswanela kunahanisisanga tulemeno twahae totucwale ka maata, butali, katulo yelukile, ni lilato. Haiba lunahanisisa tulemeno to ni tulemeno twahae totuñwi, luka mukuteka hahulu.—Samu 77:11-15.

5-6. (a) Libizo la Mulimu litalusañi? (b) Ka kuya ka liñolo la Exoda 3:13, 14 ni Isaya 64:8, Jehova utahisa cwañi lika kubateñi?

⁵ Libizo la Mulimu litalusañi? Licaziba za Bibele babañata balumela kuli libizo la Jehova litalusa kuli “Utahisa Kubateñi.” Taluso ya libizo leo iluhupulisa kuli hakuna nto yekona kupaleliswa Jehova kupeta tato yahae, mi wakona kutahisa nto ifi kamba ifi kubateñi. Ka mukwa ufi?

⁶ Jehova utahisa lika kubateñi ka kuba saketa kuba sona kaufela kuli ataleleze mulelo wahae. (Mubale Exoda 3:13, 14.) Hañata, mwa lihatiso zaluna, lususuezwanga hahulu kunahanisisa taba ye yemakaza ka za butu bwa Mulimu. Hape Jehova wakona kutahisa kuli batanga bahae babasika petahala babe nto ifi kamba ifi yetokwahala kuli bamusebeleze ni kutaleleza mulelo wahae. (Mubale Isaya 64:8.) Jehova uitusisa linzila zeo kuli tato yahae iezwe. Hakuna nto niyekana yekona kumupaleliswa kupeta mulelo wahae.—Isa. 46:10, 11.

7. Ki lika mañi zeka lutusa kuitebuha hahulu Ndataa luna wa kwa lihalimu ni kumukuteka?

⁷ Haiba lunahanisisa lika kaufela zaezize Jehova ni zalutusize kupeta, lukaitebuha hahulu Ndataa luna wa kwa lihalimu. Ka mutala, halunahanisisa lika zemakaza  zabupile, lukomokiswanga hahulu ki lika kaufela zaezize Jehova zeo. (Samu 8:3, 4) Mi haiba lunahanisisa lika kaufela zalutusize kueza ilikuli lupete tato yahae, luka mukuteka hahulu. Kaniti luli, luswanela kusaba libizo la Jehova! Libizo leo, likopanyeleza tulemeno kaufela twanani tona Ndataa luna, lika kaufela zaezize, ni lika kaufela zakaeza kwapili.—Samu 89:7, 8.

8. Ka kuya ka liñolo la Deuteronoma 32:2, 3, Jehova ubata kuli batu baezeñi ka za libizo lahae?

⁸ Maisilaele basika kena kale mwa Naha ya Sepiso, Jehova naalutile Mushe manzwi a pina. (Deut. 31:19) Mi Mushe ni yena naatokwa kuluta Maisilaele pina yeo. (Mubale Deuteronoma 32:2, 3.) Halunze lunahanisisa kauhanyo 2 ni 3 ya liñolo leo, lukalemuha kuli Jehova ubata kuli libizo lahae lizibahale mi habati kuli liingiwe kuli likenile hahulu kuli mane hakuswaneli nihaiba kulipunda. Ubata kuli batu kaufela bazibe libizo lahae! Kaniti luli, Maisilaele nebanani tohonolo yetuna ya kulutiwa ki Mushe ka za Jehova ni libizo lahae lelikutekeha! Litaba zanaa balutile Mushe nelitiisize tumelo yabona ni kubasusueza, sina feela pula yefafaza haitusanga limela kuhula hande. Lukona kueza cwañi kuli musebezi waluna wa kuluta batu kuba balutiwa utiise tumelo yabona ni kubasusueza?

9. Luswanela kuezañi kuli libizo la Jehova likeniswe?

⁹ Halukutaza fa ndu ni ndu kamba fa nyangela, luswanela kuitusisa Bibele kuli lubonise batu libizo la Mulimu, lona la Jehova. Lwakona kubafa lihatiso zaluna zelukisizwe hande, kubabuhisa mavidio aluna amande, ni kubabonisa litaba zefumaneha fa webusaiti yaluna zelumbeka Jehova. Haluli kwa musebezi, kwa sikolo, kamba mwa musipili, lwakona kubata nzila ya kubulelela babañwi ka za Mulimu waluna yelulata ni kubataluseza mwainezi. Haiba lubulelela babañwi lika zende zaka luezeza Jehova ni mulelo wahae ka za lifasi, luka batusa kulemuha kuli Jehova walulata, mi mwendi ikona kuba lwapili ku bona kuutwa taba yeo. Halutaluseza babañwi niti ka za Ndataa luna yalilato, lutusa kuli libizo la Mulimu likeniswe. Lutusa batu kuziba kuli litaba zemaswe zene balutilwe ka za Jehova ki za buhata. Litaba zeluluta batu kuzwelela mwa Bibele ki zona feela zekona kubaimulula kwa matata ebakopana ni ona.—Isa. 65:13, 14.

10. Haluzamaisa lituto za Bibele, ki kabakalañi hakusika likana kubaluta feela milao ni likuka za Mulimu?

¹⁰ Haluzamaisa lituto za Bibele, lubata kutusa baituti baluna kuziba libizo la Jehova ni kuitusisa lona. Hape, lubata kubatusa kuziba hande Jehova. Kono halukoni kueza cwalo haiba lubaluta feela litaelo za Mulimu, likuka zahae, ni milao yahae yelutusa kuba ni muzamao omunde. Muituti wa Bibele yomunde wakona kuituta litaelo za Mulimu ni kulilata. Kono kana muituti yo ukaipeya kuutwa Jehova bakeñisa kuli wamulata? Muhupule kuli Eva naaziba mulao wa Mulimu, kono naasalati Mulimu, yena yanaatomile mulao wo, mi Adama ni yena naasalati Mulimu. (Gen. 3:1-6) Kacwalo, hakusika likana kuluta feela babañwi milao ni likuka za Mulimu.

11. Haluluta baituti baluna milao ya Mulimu ni likuka zahae, lukona kubatusa cwañi kulata Mulimu, yena yatomile milao yeo?

¹¹ Milao ya Jehova ni likuka zahae ki zende mi zalutusa. (Samu 119:97, 111, 112) Kono mwendi baituti baluna habanahani cwalo, konji hase bautwisisize kuli Jehova naatomile milao yeo bakeñisa kuli walulata. Kacwalo luswanela kubuza baituti baluna ba Bibele kuli: “Mubona cwañi, ki kabakalañi Mulimu habata kuli batanga bahae baeze cwana kamba  haabahanisa kueza cwana? Taba ye, ilulutañi ka za Mulimu?” Haiba lutusa baituti baluna kunahanisisa ka za Jehova ni kulata hahulu libizo lahae lelikutekeha, luka bafita kwa lipilu. Baituti baluna habana kulata feela milao ya Mulimu, kona hape bakalata ni Mulimu, yena yatomile milao yeo. (Samu 119:68) Tumelo yabona ikatiya mi bakakona kutiyela miliko yetaata yebaka kopana ni yona.—1 Makor. 3:12-15.

12. Ki nto mañi yenetahisize kuli Davida apalelwe kuba ni pilu iliñwi, mi ki lika mañi zenezwile mwateñi?

¹² Kwa liñolo la Samu 86:11, kunani manzwi a butokwa hahulu aali: “Unituse kuba ni pilu iliñwi.” Mulena Davida naasusumelizwe kuñola manzwi ao. Mwa bupilo bwahae, naalemuhile kuli kubunolo kuba ni pilu yealuhani. Zazi leliñwi, Davida naainzi fa situwa sa ndu yahae mi abona musalaa mutu inzaa tapa. Ka nako yeo, kana pilu ya Davida neili iliñwi kamba neialuhani? Naaziba sikuka sa Jehova sesili: “Usike walakaza musalaa yomuñwi.” (Exo. 20:17) Kono kubonahala kuli Davida naazwezipili kutalima musali yo. Pilu yahae neialuhani kakuli naalakaza musali yo, Bati-sheba, kono hape ka nako yeswana inze abata kutabisa Jehova. Nihaike kuli Davida naasebelelize Jehova ka lilimo zeñata mi naamulata ni kumusaba, naakomilwe ki takazo yahae. Kabakaleo, Davida aeza lika zemaswe hahulu. Naatahisize kuli libizo la Jehova lisinyehe. Davida hape naatahisize kuli batu babañwi bane basina mulatu banyande, hamohocwalo ni lubasi lwahae.—2 Sam. 11:1-5, 14-17; 12:7-12.

13. Luziba cwañi kuli pilu ya Davida neibile iliñwi hape?

¹³ Jehova naakalimezi Davida mi hasamulaho, Davida aba ni silikani sesinde ni yena hape. (2 Sam. 12:13; Samu 51:2-4, 17) Davida naahupuzi miinelo yetaata ni manyando kaufela anaakopani ni ona kabakala kuli naatuhelezi pilu yahae kualuhana. Manzwi ahae anaabulezi kwa Samu 86:11, hape akona kuñolwa kuli: “Unife pilu yesika aluhana.” Kana Jehova naatusize Davida kuba ni pilu iliñwi, yona pilu yesika aluhana? Eni, kakuli mane hasamulaho, Linzwi la Jehova litalusa kuli Davida ki muuna ‘yanaasebelelize Jehova Mulimu wahae ka pilu yahae kaufela.’—1 Mal. 11:4; 15:3.

14. Ki puzo mañi yeluswanela kuipuza, mi ki kabakalañi?

¹⁴ Mutala wa Davida wasusueza kono hape ki temuso ku luna. Sibi sesituna sanaaezize ki temuso kwa batanga ba Mulimu kacenu. Ibe kuli kona lukala kusebeleza Jehova kamba selu musebelelize ka lilimo zeñata, luswanela  kuipuza kuli: ‘Kana nisweli nahanyeza Satani yabata kuli nibe ni pilu yealuhani?’

15. Kusaba Mulimu kukona kulusileleza cwañi halubona maswaniso akona kutahisa kuli lube ni litakazo za buhule?

¹⁵ Ka mutala, nemuka eza cwañi hane mukabona siswaniso fa TV kamba fa Intaneti sesikona kutahisa kuli mube ni litakazo za buhule? Kukona kumibela bunolo kunahana kuli siswaniso seo kamba filimu yeo haki ya mapunu luli. Satani ukona kuitusisa katwa kao kuli atahise kuli mube ni pilu yealuhani. (2 Makor. 2:11) Maswaniso ao aswana sina capu yaitusisa mutu kuli apazule kota yetuna. Kwa makalelo, ukalanga kulema fahalimwaa kota. Kono cwale hazwelapili kulema cwalo, kota yapazuhanga. Siswaniso sesibuhiswa fa TV kamba fa Intaneti sesikona kutahisa kuli lube ni litakazo zemaswe, siswana sina capu. Mutu ukona kuunga kuli nto yeñwi yasweli kubuha haikoni kutahisa kozi, kono hasamulaho ukona kueza sibi sesikona kualuhanya pilu yahae ni kumupaleliswa kusepahala ku Mulimu. Kacwalo, musike mwalumeleza nto ifi kamba ifi yemaswe kukena mwa pilu yamina! Muzwelepili kuba ni pilu iliñwi kuli musabe libizo la Jehova!

16. Halulikiwa, ki lipuzo mañi zeluswanela kuipuza?

¹⁶ Kwandaa maswaniso akona kutahisa kuli lube ni litakazo za buhule, Satani hape uitusisanga lika zeñwi kuli alulike kueza lika zemaswe. Luswanela kuezañi? Kubunolo hahulu kunahana kuli lika zeo haki zemaswe luli. Ka mutala, lukona kuipulelisa kuli: ‘Hanina kuzwisiwa mwa puteho haiba nieza nto ye, kacwalo kueza cwana hakusika fosahala.’ Kuba ni mubonelo ocwalo hakusika luka. Luswanela kuipuza kuli: ‘Kana Satani uitusisa nto ye kuli aaluhanye pilu yaka? Haiba nikomiwa ki litakazo zaka, kana nikatahisa kuli libizo la Jehova lisinyehe? Kana nto yenibata kueza  ikatahisa kuli silikani saka ni Mulimu sitiye kamba sisinyehe?’ Munahanisisange lipuzo zecwalo. Mukupe Mulimu kuli amife butali kuli mukone kualaba lipuzo zeo ka busepahali. (Jak. 1:5) Kueza cwalo kwakona kumisileleza. Kukona kumitusa kutula muliko ni kulikanyisa Jesu yanaaalabile ka kutiya kuli: “Zwa Satani!”—Mat. 4:10.

17. Ki kabakalañi kuba ni pilu yealuhani hakusa tusi? Mufe mutala.

¹⁷ Pilu yealuhani haitusi. Luungeñi kuli sikwata sa babapali hasiswalisani. Babañwi mwa sikwata seo baipatela libubo, babañwi habatabeli kulatelela milao ya papali, mi babañwi bona habakuteki muluti wabona. Sikwata sesicwalo hasikoni kuwina papali. Kono sikwata sesiswalisani sona sakona kuwina. Pilu yamina ikona kuswana sina sikwata seo sesiwinile papali haiba lika zemunahana, litakazo zamina, ni maikuto amina zalumelelana ni likuka za Jehova. Muhupule kuli Satani ubata kuli mube ni pilu yealuhani. Ubata kuli lika zemunahana, litakazo zamina, ni maikuto amina lilwanisane ni likuka za Jehova. Kono kuli mukone kusebeleza Jehova, mutokwa kuba ni pilu iliñwi. (Mat. 22:36-38) Nikamuta musike mwatuhelela Satani kutahisa kuli mube ni pilu yealuhani!

18. Sina mokuboniselizwe kwa liñolo la Mika 4:5, muikatulezi kuezañi?

¹⁸ Mulapele ku Jehova sina feela Davida yanaalapezi kuli: “Unituse kuba ni pilu iliñwi kuli nisabe libizo lahao.” Mueze momukonela kaufela kueza zebulezwi mwa tapelo yeo. Zazi ni zazi, mubone teñi kuli likatulo zemueza libonisa kuli mwasaba libizo la Jehova lelikenile, ibe kuli likatulo zeo ki zenyinyani kamba ki zetuna. Haiba mueza cwalo, mukabonisa luli kuli ka kuba yomuñwi wa Lipaki za Jehova mwakanyisa libizo leo. (Liprov. 27:11) Mi sina mupolofita Mika, kaufelaa luna lukabulela kuli: “Lukazamaya ka libizo la Jehova Mulimu waluna kamita ni kuya kuile.”—Mika 4:5.