1. Uno kwivwa woma Kalunga chalumbununa ika, kaha mwomwo ika vaze vazanga Yehova vatela kupwila nawoma kana?

VAKA-KULISHITU vazanga Kalunga, kaha nawa veji kumwivwanga woma. Vamwe vanahase kushinganyeka ngwavo katweshi kuhasa kuzanga mutu oku nawa tuli nakumwivwa womako. Oloze katweshi nakuhanjika hawoma uze weji kutuzuzwisangako. Muchihande chino natushimutwila hawoma wakulipwila. Vatu vaze vatwama nawoma kanou veji kuvumbikanga Kalunga namichima yavo yosena. Vatu kana veji kufwilanga kwivwisa Sevo wamwilu kuwaha mwomwo kavasaka kujiha usepa wavo naikiyeko.—Samu 111:10; Vishi. 8:13.

2. Kweseka namazu aNdavichi vasoneka hali Samu 86:11, vyuma muka vivali vize natushimutwila?

² Tangenu Samu 86:11. Nge namushinganyeka hamazu kana, munahase kutachikiza ngwenu Mwangana Ndavichi ejivile kanawa ovyo chapwila chachilemu kwivwa Kalunga woma. Tushimutwilenu jino omwo tunahase kuzachishilamo awa mazu vahwima ahanjikile Ndavichi. Chatete, natukekesa havyuma vyatela kutulingisa tuvumbike lijina lyaKalunga. Chamuchivali, natushimutwila hajijila tunahase kusolwelamo ngwetu twavumbika lijina lyaKalunga muvyuma tweji kulinganga hakumbi hakumbi.

3. Chuma muka amwene Mose chize chamukafwile atwaleho lika kuvumbika lijina lyaKalunga?

³ Achishinganyekenu omwo evwile Mose hakumona upahu waYehova uli nakuhita. Chuma kana chapwile chakukomwesa chikuma  havyuma vyakukomwesa vyosena vize vamwenenga vatu shimbu kanda Yesu ezenga hano hamavu. Pamo Mose evwile mazu aze ahanjikile kangelo ngwenyi: “Yehova, Yehova, Kalunga wakeke nakutetela, wakushipwokela kukwata utenu, wazangi yakwilila, wamuchano, apwa muka-kusolola zangi yakwilila kuvatu vavavulu, muka-kukonekela vatu milonga, navaka-kuzombwojoka jishimbi, navaka-shili.” (Kulo. 33:17-23; 34:5-7) Twafwelela ngwetu omu Mose azachishilenga lijina lyaYehova, anukilenga vyuma kanevi vyakukomwesa. Echi chikiko chalingishile Mose omu hahichile lwola alweze vatu jaKalunga vaIsalele ngwenyi, ‘ivwenunga woma lijina lyaKalunga, lyaupahu, lyakwivwisa woma.’—Lushi. 28:58.

4. Vilinga muka vize twatela kushinganyekaho mangana tuvumbikenga Yehova?

⁴ Omu natushinganyekanga halijina lyaYehova, twatela kushinganyekanga nawa omwo apwa. Twatela kwanukanga vilinga vyenyi vyakufwana nge ngolo, namangana, nachiyulo nazangi. Kachi nge natushinganyekanga havilinga kanevi nahavilinga vyeka nawa, kaha nachitulingisa tumuvumbikenga.—Samu 77:11-15.

5-6. (a) Uno lijina lyaKalunga lyalumbununa ika? (b) Kweseka naKulovoka 3:13, 14 naIsaya 64:8, uno Yehova eji kulingisanga ngachilihi vyuma kupwako?

⁵ Vyuma muka twatachikiza kutalisa kuulumbunwiso walijina lyaKalunga? Vatu valinangula chikuma vavavulu vetavila ngwavo lijina lyaYehova lyalumbununa ngwavo, “Eji Kulingisanga Vyuma Kupwako.” Ulumbunwiso kana wasolola nge kakweshi chuma nachihonesa Yehova kulinga vyuma najinyiko. Mujila muka?

⁶ Yehova eji kulingisanga vyuma kupwako hakulilingisa ivene apwenga mweshomwo nasake kupwa mangana atesemo vyuma najinyi. (Tangenu Kulovoka 3:13, 14.) Mikanda yetu yinatukolezezanga tushinganyekenga chikuma haulumbunwiso kanou wakulipwila walijina lyaKalunga. Yehova nawa nahase kulingisa vangamba jenyi vakuhona kukupuka vapwenga mweshomwo nasake mangana vamuzachile nakutesamo kujina chenyi. (Tangenu Isaya 64:8.) Eji jikiko jijila eji kuzachisanga Yehova mangana atesemo kujina chenyi. Kakweshi chuma chinahase kumuhonesa kutesamo vyuma ajinako.—Isa. 46:10, 11.

7. Twatela kulinganga ika mangana tusakwilile Setu wamwilu?

 ⁷ Kachi nge natushinganyekanga havyuma vize nalingi Setu wamwilu navize ali nakutukafwa mangana tulinge, nachitukafwa tumusakwilile chikuma. Chakutalilaho, nge natushinganyekanga havyuma atenga, kaha natwivwa kuwaha chikuma hakumona vyuma vyosena vize natesamo. (Samu 8:3, 4) Kaha nawa nge natushinganyeka hajila natukafwilamo mangana tutesemo kujina chenyi, nachitulingisa tumuvumbike chikuma. Chikupu vene, lijina lyaYehova lyapwa lyakukomwesa. Lijina kana lyasolola omwo apwa, navyuma vyosena nalingi navize mwakalinga kulutwe.—Samu 89:7, 8.

8. Mukanda waLushimbi lwamuchivali 32:2, 3 wasolola ngwawo Yehova asaka vatu jenyi valinge vyuma muka kutalisa kulijina lyenyi?

⁸ Shimbu kanda vaIsalele vengile muLifuchi lyaLushiko, Yehova anangwile Mose mwaso. (Lushi. 31:19) Kufumaho, Mose vamulwezele anangule vatu vosena mwaso kana. (Tangenu Lushimbi lwamuchivali 32:2, 3.) Kachi nge natushinganyeka hamazu ali muvesi 2 na 3, kaha natumona hatoma ngwetu Yehova kasaka kusweka lijina lyenyi chipwe kulingisa vatu valimone kupwa lyajila chikuma lize kavatela kuvulukako. Oloze asaka lijina lyenyi valitachikize kuli vosena. VaIsalele vawahililile chikuma omu Mose avanangwile vyaYehova nahalijina lyenyi lyaupahu. Vyuma avanangwile Mose vyavakafwile nakuvahizumuna ngana mwavula yakazevezeve hamwila wachimbete. Uno vyuma muka twatela kulinga mangana vyuma vize natunangula vatu vivakafwe nakuvahizumuna?

9. Natukafwa ngachilihi vatu vahase kujilika lijina lyaYehova?

⁹ Nge tuli nakwambulwila kuzuvo hizuvo chipwe kuvihela vyasanga, twatela kuzachisa Mbimbiliya nakukafwa vatu vatachikize lijina lyaYehova. Twatela kuvahana mikanda, nakuvatalisa jivindiyo jamwaza nakuvalweza vihande vyahakeyala yetu vize vyavumbika Yehova. Kachi nge tuli kumilimo, chipwe kushikola chipwe hakutambuka ungeji, twatela kuwanangako lwola lwakulwezako vatu vatachikize Kalunga ketu wazangi navilinga vyenyi. Nge natunangula vatu vyuma ajina Yehova kukalingila vatu, navize mwakalinga hano hamavu, kaha navevwa vyuma vyavihya vize kanda vevwengangaho lyehi. Nge natuvanangula muchano waSetu uze apwa wazangi, kaha natulingisa lijina lyenyi kupwa lyajila. Natuvakafwa nawa vatachikize ngwavo vyuma veji kuvanangulanga vyapwa vyamakuli. Kakweshi vyuma vinahase kunganyalisa vatu nakuvasuulwisa kuhambakana vize tweji kuvanangulanga muMbimbiliyako.—Isa. 65:13, 14.

10. Mwomwo ika katwatela kukumina kaha hakunangula vatu vyuma asaka Kalunga najindongi jenyiko?

¹⁰ Nge tuli nakunangula vatu Mbimbiliya, twatela kuvakafwa vatachikize lijina lyaYehova nakulizachisanga. Kaha twatela kuvakafwa nawa vatachikize mwalumbunukila lijina lyenyi. Kutala tunahase kuvaheta hamichima nge natukumina kaha hakuvalweza jishimbi najindongi jize vatela kukavangiza tahi? Vatu vamwe vaze vazanga kulinangula, vanahase kufwila kuzanga jishimbi jaKalunga jize vali nakulinangula. Oloze vatela nawa kumwononoka mwomwo yakumuzanga. Anukenu ngwenu, Alama naEve vatachikijile lushimbi lwaKalunga, oloze kavazangile uze avahanyine lushimbi kanako. (Kupu. 3:1-6) Shikaho katwatela kaha kukumina hakuvanangula vyuma asaka Kalunga ngwenyi valingengako.

11. Natuhasa kukafwa ngachilihi vatu tweji kunangulanga Mbimbiliya vazange Kalunga najishimbi jenyi?

¹¹ Jishimbi jaYehova japwa jamwaza chikuma. (Samu 119:97, 111, 112) Oloze vatu vaze tweji kunangulanga Mbimbiliya kaveshi kuhasa kutachikiza ngwavo jishimbi jaYehova jasolola nge atwama nazangiko. Shikaho twatela kuvahulisanga ngwetu: “Mwomwo ika Yehova atulwezela kulinga vyuma vimwe chipwe kutukanyisa kulinga  vyuma vikwavo? Uno vyuma kana vyatukafwa tutachikize ika hali ikiye?” Kachi nge natukafwanga vatu tweji kunangulanga Mbimbiliya vashinganyekenga chikuma hali Yehova nakuzanga nawa lijina lyenyi nachitukafwa tuvahete hamichima. Kulinga ngocho nachivakafwa vazange chikuma Kalunga najishimbi jenyi. (Samu 119:68) Lufwelelo lwavo naluzama nakupwa nawa vakumika hakuhita muvyeseko.—Koli. 1, 3:12-15.

12. Ndavichi ahonene ngachilihi kupwa namuchima umwe, kaha chuma muka chafuminemo?

¹² Mazu amalemu chikuma ahali Samu 86:11 shina aze akwamba ngwavo, “ngukafwe ngupwenga namuchima umwe.” Mwangana Ndavichi vamuhwiminyinyine asoneke mazu kana. Ndavichi atachikijile ngwenyi chapwa chachashi chikuma kupwa namichima yivali. Likumbi limwe omu apwile hamulungu wazuvo yenyi amwene pwevo lyamukwavo ali nakusana. Uno halwola kanelu Ndavichi apwile namuchima umwe nyi apwile namichima yivali? Atachikijile lushimbi lwaYehova lwakwamba ngwenyi: ‘Kanda mukevwila lwiso pwevo lyamukwenuko.’ (Kulo. 20:17) Chipwe ngocho, atwalileho lika kutala uze pwevo lyambala. Ngocho apwile jino namichima yivali mwomwo apwile nakushinganyeka hali Mbate-sheva oku nawa apwile nakushinganyeka hakwivwisa Yehova kuwaha. Numba tuhu Ndavichi azangile Yehova nakumwivwa woma halwola lwalusuku, oloze echelelele vishinganyeka vyenyi vimuhungumwise. Echi chamulingishile alinge chuma chachipi chikuma. Anehele katombo halijina lyaYehova. Alingishile nawa vatu vakuzeneka mulonga vapwenga muukalu kuhakilako vene navatanga jenyi.—Samwe. 2, 11:1-5, 14-17; 12:7-12.

13. Twejiva ngachilihi ngwetu Ndavichi apwile cheka namuchima umwe?

¹³ Yehova azangamishile Ndavichi, kufumaho apwile cheka nausoko wamwaza naikiye. (Samwe. 2, 12:13; Samu 51:2-4, 17) Ndavichi anukilenga ukalu ahichilemo mwomwo yakupwa namichima yivali. Kaha mazu ahali Samu 86:11 vanahase nawa kuwalumuna ngwavo: “Ngukafwe nguhone kupwa namichima yivali.” Kutala Yehova akafwile Ndavichi apwenga cheka namuchima umwe tahi? Eyo, mwomwo Mazu aYehova asolole nge Ndavichi jino “azachililile Yehova Kalunga kenyi namuchima wenyi wosena.”—Vamya. 1, 11:4; 15:3.

14. Chihula muka twatela kulihulisa, kaha mwomwo ika?

¹⁴ Chakutalilaho chaNdavichi cheji kutukolezezanga nakutuhuhumuna nawa. Chuma chasolokele kuli Ndavichi chakulinga shili yayinene chatela kulingisa vangamba jaKalunga makumbi ano vapwenga vakuvanguluka. Numba nge tunaputuka kalinwomu kuzachila Yehova chipwe nge tunamuzachila hamyaka yayivulu,  tuvosena twatela kulihulisa ngwetu, ‘Kutala nguli nakuhasa kufungulula vyeseko tahi?’

15. Uno kwivwa Kalunga woma nachitukafwa ngachilihi tulihende kumivwimbimbi yauvumbi?

¹⁵ Uno nge munamono ha TV chipwe haInternet haneza mivwimbimbi yize yinahase kumilingisa mupwenga napeha yakulisavala, mweji kulinganga ngachilihi? Uno mweji kushinganyekanga ngwenu mivwimbimbi kana kayeshi yauvumbiko, kaha kayeshi kuhasa kumitangulako tahi? Tachikizenu ngwenu yinahase kupwa jila yize Satana eji kuzachisanga mangana atulingise tupwenga namichima yivali. (Koli. 2, 2:11) Mivwimbimbi kana yinahase kupwa nge ngimbu yize mwazachisa mutu hakupakula mutondo. Hakuputuka, chimango cheji kupwanga chachindende, kaha kutwala muze chimango cheji kutohwanga nakulingisa jino uze mutondo uholoke. Shikaho mivwimbimbi yauvumbi yinahase kupwa ngana mwayize ngimbu. Mivwimbimbi kana yinahase kusoloka nge kayeshi kuneha ukaluko, oloze kutwala muze yinahase kulingisa mutu apwenga namichima yivali, nakulinga jino shili nakuhokola kulonga chenyi. Shikaho, kanda kwechelela vyuma vyavipi vingile mumuchima wenuko. Fwilenunga kupwa namuchima umwe mangana mwivwenga lijina lyaYehova woma.

16. Vihula muka twatela kulihulisa nge tuli mucheseko?

¹⁶ Satana eji kuzachisanga nawa vyuma vyeka vyavivulu mangana atulingise tulinge shili. Uno vyuma muka tweji kulinganga nge natweseka? Tunahase kushinganyeka ngwetu vyuma kana kavyapihile chikumako. Chakutalilaho, tunahase kushinganyeka ngwetu: ‘Kacheshi chachipi kulinga chuma kanako, mwomwo kaveshi kungufumisa muchikungulwiloko.’ Vishinganyeka kana vyavipi sulumunu. Twatela kulihulisa ngwetu: ‘Kutala Satana ali nakusaka kuzachisa chuma kana mangana atangule muchima wami tahi? Nge nangulinga chumechi, kutala kangweshi kuneha katombo halijina lyaYehovako tahi? Uno kulinga chuma kana nachingupandamisa  kuli Kalunga kami tahi, nyi nachingusosolola kuli ikiye?’ Shikaho shinganyekenu havihula kanevi. Lombenu kuli Yehova amikafwe muhanjike muchano hakukumbulula vihula kana nakuhona kulitangisa. (Yako. 1:5) Echi nachimikinga, mwomwo nachimikafwa mumike hakufungulula vyeseko ngana muze alingile Yesu hakwamba ngwenyi: “Fumaha, ove Satana!”—Mateu 4:10.

17. Mwomwo ika chapwila chachipi kupwa namichima yivali? Hanenu chakutalilaho.

¹⁷ Chapwa chachipi kupwa namichima yivali. Achishinganyekenu vatu vamulizavu limwe lyavaka-kwasa ngunja kaveshi nakulivwasanako. Vamwe vali nakufwila ulemu, veka kaveshi nakusaka kukavangiza jishimbi jakuhema kanako. Kaha veka nawa kavavumbika muka-kuvanangula mwakuhemenako. Nachipwa chachikalu kuli vaka-kuhema kana kutapa vakwavo. Oloze lizavu lyavaka-kuhema lize nalizachila hamwe, linahase kutapa vakwavo. Namuchima wenu unahase kupwa ngana mwalizavu kana kachi nge vishinganyeka vyenu navyuma mwafwila kulinga vyazama kaha hakusaka kuzachila Yehova. Anukenu ngwenu, Satana asaka mupwenga namichima yivali. Asaka mushinganyekenga nakulinga vyuma vize vyalimbalaka najishimbi jaYehova. Oloze hakusaka muzachile Yehova, mwatela kupwa namuchima umwe kaha. (Mateu 22:36-38) Shikaho kanda kwechelela Satana amihonese kupwa namuchima umweko.

18. Kweseka naMika 4:5, chuma muka namufwila kulinga?

¹⁸ Lombenunga kuli Yehova ngana mwaNdavichi ngwenu: “Ngukafwe ngupwenga namuchima umwe mangana ngwivwenga lijina lyove woma.” Mwatela kufwila kulinganga vyuma vize namumulomba Yehova. Shikaho, vyuma namusakula kulinga hakumbi hakumbi vyatela kusolola nge mwavumbika lijina lyaYehova. Echi nachimilingisa muhone kuneha katombo halijina kana, mwomwo mwapwa muVinjiho jaYehova. (Vishi. 27:11) Kaha tuvosena natukahanjika ngana muze ahanjikile kapolofweto Mika ngwenyi: “Etu natukatambukanga mulijina lyaKalunga ketu Yehova haya myaka namyaka.”—Mika 4:5.