1. Kumutiya Nzambi woma kwatalisha mudihi, nawa kwalemenadi kudi antu amukeña Yehova?

AKWAKRISTU amukeña Nzambi nawa amwakamaña. Kudi antu amakwawu chinateli kutiyakana neyi hichuma chambukaku. Ilaña, hitunakutena woma wakufwa mutentuku. Tukuhanjeka hawoma wambukaku. Antu akweti iwu woma amwakamaña Nzambi nawa amulemesha chikupu. Hiyakeñaña kumuneñesha Tata yawu wamwiwuluku muloña akeñaña wanyi kuluwañesha wubwambu wawu nayena.—Mas. 111:10; Yish. 8:13.

2. Kwesekeja namazu aMwanta Davidi adi haMasamu 86:11, tukushinshika hayumanyi yiyedi?

² Tañenu Masamu 86:11. Neyi mutoñojoka hanawa mazu, mukuwana nenu iwu Mwanta washinshika Davidi welukili chichalemena kumutiya Nzambi woma. Tushinshikenu chitunateli kuzatisha mazu ahosheliyi Davidi mukulomba kwindi. Chatachi, tukushinshika yuma yikuletesha tulemeshi chikupu ijina daNzambi. Chamuchiyedi tukuhanjeka chitunateli kumwekesha netu twalemesha chikupu ijina daNzambi muchihandilu chetu.

3. Chumanyi chatela chamukwashili Mosi kulemesha chikupu ijina daYehova?

³ Toñojokenu chatiyili Mosi hampinji yemeniyi kwilola nawa yamoni kulema kwaYehova muchimwenu kunakuhita. Mukanda waInsight on the Scriptures wahosha nawu, “Chadiña chuma chakuhayamisha chikupu chabulahu dehi kumona muntu wudi wejima henohu Yesu Kristu kanda yenzi heseki.”  Mosi watiyili awa mazu, ahosheliwu kudi kañelu nindi: “Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.” (Kwidika 33:17-23; 34:5-7) Hadaha Mosi neyi nakuzatisha ijina daYehova wanukileña chuma chamwekeni. Nawa hamwaha dichaletesheli yayisoñamishi antu jaNzambi aIsarela nindi “ijinidi dalema dazaalañawu woma.  . . wakaditiyi woma.”—Kuhit. 28:58.

4. Chumanyi chinateli kutukwasha kumulemesha chikupu Yehova?

⁴ Neyi tunakutoñojoka hejina daYehova, twatela cheñi nikutoñojoka chekalayi mwini idi ijina. Twatela kwanukaña yilwilu yikwetiyi, chidi neyi ñovu yindi, maanindi, nikukeña. Kutoñojoka haniyi yilwilu niyikwawu yikwetiyi kunateli kutusañumuna kumwakama chikupu Yehova.—Mas. 77:11-15.

5-6. (a) Ijina daNzambi datalisha mudihi? (b) Kwesekeja naKwidika 3:13, 14 niIsaya 64:8, Yehova wakojejaña ñahi yuma kuzatika?

⁵ Twelukadi kwesekeja namwatalisha ijina daNzambi? Antu adiza chikupu etejaña nawu Ijina daYehova hadaha datalisha mukwila nawu “Wakojejaña yuma kwikalaku.” Chumichi chatwanukishaña nawu kwosi chuma chinateli kumukañesha Yehova kwila chuma chinakufwilayi, nawa nateli kwila yuma kulonda yizatiki. Munjilanyi?

⁶ Yehova welishaña yuma kuzatika nakwilisha yuma yinakukeñeka kulonda yeli nkeñelu yindi. (Tañenu Kwidika 3:13, 14.) Kakavulu atukoleshaña kutoñojokaña chikupu hayilwilu yaNzambi yayiwahi. Yehova nateli kwilisha antu indi abula kuwanina kwikala chuma chinakukeñayi kumukalakela nikwila nkeñelu yindi. (Tañenu Isaya 64:8.) Muyumiyi, Yehova wakojejaña nkeñelu yindi kuzatika. Kwosi chuma chinateli kumukañesha kushikija nkeñelu yindiku.—Isa. 46:10, 11.

7. Tunateli kumusakilila ñahi Tata yetu wamwiwulu?

 ⁷ Tunateli kumusakilila Tata yetu wamwiwulu kuhitila mukutoñojoka chikupu hayuma yineliyi niyinatukwashiyi kwila. Chakutalilahu, neyi tutoñojoka chikupu hayuma yaleñayi Yehova, twatiyaña kuwaha nankashi hayuma yejima yaleñayi. (Mas. 8:3, 4) Nawa neyi tutoñojoka chinatukwashiyi Yehova hakwila nawu twili nkeñelu yindi, twamulemeshaña chikupu. Twatela kulemesha chikupu ijina dakwila nawu Yehova. Dinabombelimu chekalayi Tata yetu, yuma yejima yineliyi, niyuma yamba kelayi.—Mas. 89:7, 8.

8. Kwesekeja naKuhituluka 32:2, 3, chumanyi chakeñañayi Yehova hejina dindi?

⁸ Hiyadiña aIsarela kwakwihi nakwiñila mwituña dachikaninu, Yehova wamudizishili Mosi mazu akamina. (Kuhit. 31:19) Mosi niyena amulejeli kudizisha antu aka kamina. (Tañenu Kuhituluka 32:2, 3.) Neyi tutoñojoka chikupu hamavasi 2 ni 3, anakumwekesha nawu Yehova hakeñaña ijina dindi kudisweka, kudimonaña neyi dasweja kujila chakwila hidatelela kuditenaku. Nakukeña ijina dindi adiluki kudi antu ejima! Chawahili nankashi kudi aIsarela hakutiya Mosi nakuyidizisha kumwiluka Yehova niijina Dindi dasweja Kulema! Yuma yayidizishiliwu kudi Mosi yayikolesheli nikuyizañalesha, neyi nvula chiyakwashaña nyitondu kukula. Tunateli kwimbujola ñahi chumichi muntañishilu yetu?

9. Tunateli kukwasha ñahi kujilika ijina daYehova?

⁹ Neyi tunakushimwina kwitala nikwitala hela kudi antu amavulu, twatela kuzatisha Bayibolu kulonda tulejeña antu ijina daNzambi, daYehova. Tunateli kuyinka nyikanda, kuyitalisha mavidiyo niyuma yikwawu yidi hawebusayiti yetu yamulemeshaña Yehova. Kumudimu, kushikola, hela neyi tudi halwendu, tunateli kuyishimwina hadi Nzambi yetu nichekalayi. Neyi tuleja antu nkeñelu yaYehova kumuchidi wamuntu niheseki, tukuyileja nsañu yikuletesha eluki katachi nawu Yehova wayikeña. Neyi tuleja antu chalala hadi Tata yetu wukweti kukeña, dikwila nawu tunakukwashaku kujilika ijina daNzambi. Tunakufumisha makudi nikasawuntu kanamwiliwu Yehova kudi antu amakwawu muntañishilu yawu. Yuma yitwayitañishaña antu yayikoleshaña nikuyikundeja.—Isa. 65:13, 14.

10. Muloñadi chitwatela kubulila kukumina hohu dakuyidizisha atudizi aBayibolu nshimbi jaNzambi?

¹⁰ Neyi tunakulombola atudizi aBayibolu, tuyikwasheña kulonda eluki ijina daYehova nikudizatisha. Kubombelahu, tunakufwila kuyikwasha kwiluka mwatalisha ijina daYehova. Komana tunateli kwila yumiyi neyi tukumina hohu dakuyidizisha, kuyileja nshimbi jaNzambi ninshimbi yahoshaña hakwikala nayilwilu yayiwahi? Kadizi nateli kwiluka nshimbi jaNzambi nikujikeña nankashi. Komana kadizi wukumwovwahilaña Yehova muloña wakumukeña? Anukenu nenu, Evu welukili nshimbi jaNzambi, ilaña hamukeñeli chikupu Mukwakuhana nshimbiku; kushilahu tuhu niAdama. (Kutach. 3:1-6) Dichi twatela kuyidizisha atudizi yuma yayivulu kubombela hayuma yakeñañayi Nzambi ninshimbi jindi.

11. Neyi tunakudisha atudizi nshimbi jaNzambi, tunateli kuyikwasha ñahi kumukeña mwini iyi Nshimbi?

¹¹ Yuma yakeñañayi Yehova ninshimbi jindi jajiwahi nawa jatukwashaña. (Mas. 119:97, 111, 112) Ilaña atudizi etu aBayibolu hiyanateli kwiluka chumichiku sampu anamoni yuma yayiwahi yafumaña munshimbi. Dichi  tunateli kuyihula atudizi etu aBayibolu netu: “Muloñadi Yehova chalejelañayi ambuñindi kwilichi hela kubula kwilichi? Chumichi chinakutuleja nawu hiMuntu wamuchidinyi?” Neyi tukwasha atudizi etu aBayibolu kutoñojoka hadi Yehova nikukeña chikupu ijina dindi dabadika, tukuyishika hamuchima. Atudizi etu akumukeña Nzambi ninshimbi jindi. (Mas. 119:68) Chikuhwelelu chawu chikakola nawa chikayikwasha kuumika kweseka.—1 Kor. 3:12-15.

12. Davidi wakañenyi ñahi kwikala namuchima wumu, nawa yumanyi yafuminimu?

¹² Awa mazu asonekeliyi Mwanta Davidi haMasamu 86:11 akwila nawu “bayi niikala nanyichima yiyeduku, chiña wunyinka wumu hohu” alema. Muchihandilu chindi, wamweni chichekalila chaswayi kwikala nanyichima yiyedi. Ifuku dimu henohu wudi mukapeka kindi kahewulu, wamweni ñodambala nakuwela. Komana haniyi mpinji Davidi wadiña namuchima wumu tahindi yiyedi? Wadiña weluka lushimbi lwaYehova lwakwila nawu: “Chinjila; kwikala nalwisu lwañodamukwenu.” (Kwid. 20:17) Ilaña yena watwalekelihu kumutala. Wekalili nanyichima yiyedi, wakumufwila Batisheba niwakumuzañalesha Yehova. Hela chakwila Davidi wamukeñeli nikumwakama Yehova hampinji yayilehi, wetejeli kufwila kwatama. Haniyi mpinji, Davidi wavulumwini. Waleteli kasawuntu hejina daYehova. Waleteli cheñi kukala hadi antu akadi muloña, kushilahu tuhu niamwitala dindi.—2 Sam. 11:1-5, 14-17; 12:7-12.

13. Tuneluki ñahi netu Davidi wekalili cheñi namuchima wumu?

¹³ Yehova wamubabesheli Davidi nawa wekalili cheñi nawubwambu wawuwahi naYehova. (2 Sam. 12:13; Mas. 51:2-4, 17) Davidi wanukili yihuñu yafuminimu muloña wakwikala nanyichima yiyedi. Komana Yehova wamukwashili Davidi kwikala namuchima wumu hohu? Eña, muloña izu daNzambi damutenaña Davidi nawu ‘muchima windi hiwukuya chikupu kudi Yehova Nzambi.’—1 Anya. 11:4; 15:3.

14. Twatela kudihula netudi, nawa muloñadi?

¹⁴ Chakutalilahu chaDavidi chinakutwikolesha nikutwisoñamisha. Ambuña aNzambi makonu atela kudizilaku kunshidi yakoñeliyi David. Hela chakwila tunamukalakeli Yehova hadi yaaka yayivulu hela yantesha, twatela kudihula netu; ‘Komana inakushinda kweseka kwaSatana kukunletesha kwikala nanyichima yiyedi?’

15. Kumwakama Nzambi kunateli kutukiña ñahi neyi tumona nyevulu yabula kutelela?

 ¹⁵ Chakutalilahu, neyi mumona mwevulu wanzekesi haTV hela haintaneti mwelaña ñahi? Chinateli kwikala chaswayi kutoñojoka nawu ona mwevulu hela muvwimbimbi himwevulu wanzekesiku. Komana hichinateli kwikala chuma chazatishañayi Satana kulonda mwikali nanyichima yiyediku? (2 Kor. 2:11) Iwu mwevulu tukuwesekeja kukachikuñu katwa kazatishañayi muntu kubalula nachu mutondu. Chatachi weñijaña wumwemu wanichi chikuñu mumutondu. Nkumininaku neyi yachipopa nankashi mumutondu, mutondu wukwambuka hakachi. Iwu mwevulu wudi neyi wumwemu wanichi chikuñu. Chuma chinateli kumwekana neyi chanyanya nawa chabula kufwana chinateli kukojeja muntu kukoña nshidi yinateli kwambula muchima windi nikufumpa kashinshi kindi. Dichi bayi mwiteja chuma chatama kwiñila mumuchima wenuku. Ikalenu namuchima wumu hohu wakwakama ijina daYehova.

16. Malwihwinyi itwatela kudihula neyi tudi mukweseka?

¹⁶ Kubombela hanyevulu yatama, Satana watwesekaña nayuma yayivulu kulonda tukoñi nshidi. Twelaña ñahi? Chinateli kwikala chaswayi kutoñojoka netu iyi yuma yatama wanyi. Chakutalilahu, tunateli kutoñojoka netu: ‘Kwila anhaña muchipompelu muloña wachumichi nehi, hichuma chatama wanyi.’ Yitoñojoka yamuchidiwu yaluwa. Twatela kudihula netu: ‘Komana Satana nakuzatisha iku kweseka kulonda nikali nanyichima yiyedi? Neyi niteja iku kufwila kwatama, nukuleta kasawuntu hejina daYehova? Yilwilu yamuchidiwu yinateli kunkojeja kuswina kwakwihi naNzambi tahindi nehi?’ Toñojokenuña chikupu hanawa malwihu. Lombenu maana kulonda mutweshi kwakula  awa malwihu chakadi kutwamba. (Yak. 1:5) Kwila mwenimu kunateli kuyikiña. Chinateli kuyikwashaku kukaana kweseka, neyi cheliliyi Yesu hahosheliyi nindi: “Fumaku aha, eyi Satana!”—Mat. 4:10.

17. Muloñadi chichatamina kwikala nanyichima yiyedi? Lumbululenu.

¹⁷ Chatama kwikala nanyichima yiyedi. Fwikijenu hadi izanvu dayisela didi nawanhemi anakubula kutiyañana mulwawu. Amakwawu anakukeña kutumbakana, amakwawu anakulondela wanyi nshimbi nawa amavulu amutiyililaña wanyi mukwakuyidizisha yisela. Izanvu damuchidiwu hidinateli kutabwila isomuku. Kwambukaku, izanvu danuñañana dinateli kutambwila masomu. Muchima wenu wunateli kwikala neyi idi izanvu danuñañana neyi yitoñojoka yenu, yuma yimwafwilaña nichimwaditiyaña yanuñañana mukumukalakela Yehova. Anukenu nenu Satana nakukeña mwikali nanyichima yiyedi. Nakukeña yitoñojoka yenu, yuma yimwafwilaña nichimwaditiyaña jambukiku nanshimbi jaYehova. Hela chochu, mwatela kwikala namuchima wumu hohu hakwila nawu mumukalakeli Yehova. (Mat. 22:36-38) Bayi mumwiteja Satana yayileteshi kwikala nanyichima yiyediku.

18. Kwesekeja naMika 4:5, munakufwila kwiladi?

¹⁸ Mulombenu Yehova neyi chalombeliyi Davidi nindi: “Bayi niikala nanyichima yiyeduku, chiña wunyinka wumu hohu.” Ilenuña mumunakulomba. Muyuma yejima yimwafuukulaña ifuku niifuku chili yanyanya hela yamaneni, fwilenuña kumwekesha nenu mwalemesha ijina daYehova. Hamu neyi aYinsahu jaYehova, neyi mwila mwenimu mukujilikaña idi ijina. (Yish. 27:11) Nawa wejima wetu tukahosha neyi chahosheliyi kaprofwetu Mika nindi: “Twakendaña mwiijina daYehova Nzambi yetu chahaya nyaka nanyaka.”—Mik. 4:5.