1. Pathian ṭihna chu eng nge ni a, engvângin nge Jehova hmangaihtute tân chu chu a pawimawh?

KRISTIANTE chuan Pathian chu an hmangaihin, an ṭih a. Mi ṭhenkhat tân chuan hei hi thu inkalh niin a lang. Mahse, he thuziaka ṭihna emaw, hlauhna emaw hi sakei hlauh anga hlauhna ang chi sawina a ni lo. Hlauhna chi khat chungchâng kan sawi dâwn a ni. Chutiang hlauhna neite chuan Pathian chu an ṭihin, amah zahna thûk tak an nei a. An Pa vâna mi nêna an inlaichînna tihchhiat an duh lo avângin, amah tihlâwm loh chu an duh lo a ni.—Sâm 111:10; Thuf. 8:13.

2. Sâm 86:11-naa chhinchhiah Lal Davida thute ṭanchhanin eng thil pahnih nge kan sawiho vang?

² Sâm 86:11 chhiar rawh. Chûng thute kan ngaihtuah chuan, Lal rinawm tak Davida’n Pathian ṭih a pawimawhzia a hria tih kan sawi thei ang. Thlarauva thâwk khum Lal Davida thute kan nunpui theih dân i lo ngaihtuah ang u. A hmasain, Pathian hming zahna thûk tak kan neih a ngaih chhan ṭhenkhat kan bih chiang ang a. A dawtah, kan nî tin nunah Pathian zahna thûk tak kan nei tih kan lantîr theih dân kan sawiho vang.

3. Eng thiltawnin nge Mosia chu Pathian zahna thûk tak nei reng tûra ṭanpui mai thei?

³ Horeb Tlânga inlârnaa Jehova ropuina a hmuh laia Mosia rilru awm dân tûr chu han ngaihtuah teh. Chu chu leia Isua Krista lo kal hmaa mihring thiltawn azawnga roupi ber a nih a  rinawm. Mosia chuan vântirhkohvin he thu a sawi hi a hria a ni: “LALPA chu, LALPA chu, Pathian lainatnaa khat, mi khawngaih thei tak, thin nel tak, ngilneihna leh thutak ngah, mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualna te ngaidam ṭhîn,” tih hi. (Ex. 33:17-23; 34:5-7) Ani chuan Jehova hming a lam hunah, chu a thiltawn chu a hre chhuak ṭhîn ngei ang. Chuvângin, Mosia’n a hnua Pathian hnam thlan Israel mite hnêna A ‘hming ropui tak leh hlauhawm tak hlau tûra’ a vaukhân chu thil mak a ni lo.—Deut. 28:58.

4. Eng miziate chhût ngunnain nge Jehova zahna thûk tak min neihtîr thei?

⁴ Jehova hming chungchâng kan ngaihtuah hian, chu hming putu chungchâng pawh kan chhût ngun a ngai a. A thiltihtheihna te, a finna te, a rorêl dikna te, leh a hmangaihnate ang chi a miziate chu kan ngaihtuah tûr a ni. Chûngte leh a mize dangte kan entawnna chuan amah zahna thûk tak nei tûrin min chêttîr thei a ni.—Sâm 77:11-15.

5-6. (a) Pathian hming awmzia chu eng nge ni? (b) Exodus 3:13, 14-na leh Isaia 64:8-naa târ lan angin, eng kawngtein nge Jehova’n a duh zâwng apiang a tihhlawhtlin?

⁵ Pathian hming awmzia chungchângah eng nge kan hriat? Bible lama mi thiam tam tak chuan Jehova tih hming awmzia chu “A Nihtîr,” tiin an pawm a. Chu chuan a duh ang apiang ti tûrin Jehova chu engmahin a dang thei lo tih min hriatnawntîr a ni. Engtin nge?

⁶ Jehova chuan a thiltum tihlawhtling tûra a ṭûl ang apiang innihtîrin, thil a thlentîr ṭhîn a. (Exodus 3:13, 14 chhiar rawh.) Chu Pathian mize ropui tak chu ngaihtuah tûra fuih kan ni fo ṭhîn. Chu bâkah, Jehova chuan mihring ṭha famkim lote chu a rawngbâwl tûr leh a thiltum tihlawhtling tûrin a ṭûl ang apiang a nihtîr thei bawk. (Isaia 64:8 chhiar rawh.) Chutiang kawng chuan, a duh zâwng chu a thlen famkimtîr ṭhîn a ni. A thiltum a tihhlawhtlinna tûr chu engmahin a dang thei lo.—Is. 46:10, 11.

7. Engtin nge kan Pa vâna mi chunga kan lâwmzia kan lantîr theih?

⁷ Kan Pa vâna mi chunga kan lâwmzia kan  lantîr theih dân chu, a thiltih tawhte leh thil ti tûra chakna min pêk dânte chhût ngunna hmangin a ni. Entîr nân, a thil siam zawng zawngte kan chhût ngun hian, Jehova thiltihte chuan kan rilru a khawih hle a. (Sâm 8:3, 4) Chu bâkah, Jehova’n a duh zâwng ti thei tûra a ṭûl ang apiang min nihtîr dânte kan chhût ngun hian, amah zahna thûk tak kan nei a ni. Jehova hming chu a va ropui tak êm! Chu hmingah chuan a nihna zawng zawng te, a thiltih tawh zawng zawngte, leh a la tih tûr zawng zawngte a tel vek a ni.—Sâm 89:7, 8.

8. Deuteronomy 32:2, 3-na chuan Jehova’n a hming a thlîr dân engtin nge a târ lan?

⁸ Ram Tiama Israel mite an luh hma lawkin, Jehova’n Mosia chu hla a zirtîr a. (Deut. 31:19) Mosia chuan chu hla chu mipuite a zirtîr chhâwng a ni. (Deuteronomy 32:2, 3 chhiar rawh.) Châng 2 leh 3-na kan chhût ngun chuan Jehova’n a hming chu thup bo leh lam rîk ngam lo khawpa thianghlim anga ngaih chu a duh lo tih a chiang hle. Finna nei a thil siam zawng zawngte’n a hming an hriat chu a duh a ni. Jehova leh a hming ropui tak chungchânga Mosia zirtîrna an dawng chu Israel mite tân chanvo hlu a va ni tak êm! Ruah tla seng sengin thlai chu ṭhang lian tûra a ṭanpui angin, Mosia zirtîrna chuan an rinna chu a tichak a ni. Keini pawhin, chutiang chuan mite kan zirtîr tih engtin nge kan chian theih?

9. Jehova hming tihthianghlimnaah engtin nge kan ṭanpui theih?

⁹ In tina rawngbâwlna, a nih loh leh vântlâng hmuna thu hrilhnaa kan tel hian, mite hnênah Pathian hming bil Jehova chu Bible aṭangin kan hmuh thei a. Jehova chawimawitu kan thu leh hla chhuah ṭha tak te, video ṭha tak te, leh kan website-a thuziakte chu kan pein, kan kawhhmuh thei a ni. Kan hnathawhnaah, kan school-ah, a nih loh leh kan zinnaah, mite hnêna Pathian chungchâng leh a miziate sawi theihna hun remchâng kan nei mai thei. Mihringte leh leilung tâna Jehova thiltum duhawm tak chungchâng mite kan hrilh hian, Jehova chungchângah thlîr dân thar hlak kan neihtîr mai thei a ni. Mite hnêna hmangaihna nei tak kan Pa chungchâng thu dik kan hrilh hian, a hming tihthianghlimnaah kan ṭanpui tihna a ni a. Jehova chungchângah dik lo taka zirtîr an ni tih hre thiam tûrin kan ṭanpui bawk. Bible ṭanchhana kan zirtîrna hi, an dawn theih zirtîrna azawnga hahdamthlâk ber a ni.—Is. 65:13, 14.

10. Bible zirna kan kaihhruai hunah, engvângin nge Pathian thil phût fel takte leh a tehnate zirtîr mai aia tam kan tih a ngaih?

¹⁰ Bible zirna kan kaihhruai hian, kan Bible zirpuite chu Jehova hming hre tûr leh hmang tûra ṭanpui kan duh a. Chu bâkah, a hming awmzia hre thiam tûra ṭanpui chu kan duh bawk. Mahse, a kaihhruaina te, a tehna te, leh nungchang lama a kaihhruainate chu kan hrilh satliah mai a nih chuan, kan hlawhtling ang em? Zirlai ṭha tak chuan Pathian dânte chu a zirin, a ngaina hle pawh a ni thei. Mahse, zirlai chuan Jehova a hmangaih avângin a thu a âwih ang em? Adama leh Evi pawhin Pathian dân chu hre mah se, Dân Petu chu an hmangaih tak tak lo tih hre reng ang che. (Gen. 3:1-6) Chuvângin, mi dangte kan zirtîr hunah, Pathian thil phût fel takte leh a tehnate zirtîr mai aia tam kan tih a ngai a ni.

11. Pathian dânte leh a tehnate kan zirtîr hunah, engtin nge kan zirpuite chu Dân Petu hmangaih tûra kan ṭanpui theih?

¹¹ Jehova thil phûtte leh a tehnate chu englai pawhin kan tân a ṭha a. (Sâm 119:97, 111, 112) Mahse, kan Bible zirpuite’n chûng dân phêna awm Jehova hmangaihna an hriatthiam chauhvin, chu chu an hre thiam thei ang. Chuvângin, kan zirpuite chu heti hian kan zâwt thei a ni: “Engvângin nge Pathianin a chhiahhlawhte  chu thil ṭhenkhat ti tûra a phût laia, thil dangte chu ti lo tûra a khap nia i ngaih? Chu chuan a chungchâng eng nge min zirtîr?” tiin. Jehova chungchâng ngaihtuah tûr leh a hming ropui tak ngaina tûra kan zirtîr chuan, an thinlung kan thlen thei lehzual ngei ang. Chutianga kan tih chuan, kan zirpuite chuan dân chauh ni lovin, Dân Petu pawh an hmangaih ang a. (Sâm 119:68) An rinna chu a ṭhang chho zêl ang a, chu chuan fiahna khirh takte tuar chhuak thei tûrin a ṭanpui ang.—1 Kor. 3:12-15.

12. Engtin nge Davida chuan thinlung sakhat a put loh va, chu chuan eng nge a rah chhuah?

¹² Sâm 86:11-naah hian “thinlung sakhat mi puttîr ang che,” tih thu pawimawh tak kan hmu a. Lal Davida chu chûng thute ziak tûra thlarauva thâwk khum a ni. A dam chhûngin, thinlung sakhat pua Pathian rawngbâwl chu a awlsam lo tih a hria a. Ṭum khat chu, in chung zâwla a awm laiin, mi nupui inbual lai a hmu a ni. Chutih lai tak chuan, Davida chuan thinlung sakhat a pû em? Ani chuan: “I vêngte nupui chu i awt tûr a ni lo,” tih Jehova tehna chu a hria a. (Ex. 20:17) Mahse, a en chhunzawm zêl tih a chiang a ni. Jehova tihlâwm a duhna thinlung chu, Bath-sebi a îtna lamah lâk pênin a awm ta a. Hun rei tak chhûng Jehova hmangaihin, lo ṭih tawh ṭhîn mah se, a tisa châkna chu a do zo ta lo va. Chumi ṭum chuan, thil sual lian tak a ti ta a ni. Chu chuan Jehova hming sawichhiatna a thlen a. A chhûngte pawh tiamin, pawisawi lote chungah chhiatna râpthlâk tak a thlen bawk a ni.—2 Sam. 11:1-5, 14-17; 12:7-12.

13. Davida chuan thinlung sakhat a pu leh tih engtin nge kan hriat?

¹³ Jehova’n a thunun avângin, Davida chuan amah nêna inlaichînna ṭha a nei leh a. (2 Sam. 12:13; Sâm 51:2-4, 17) A hmachhawn buaina leh lungngaihnate chu thinlung sakhat a put loh avânga awm a ni tih a hria a ni. A nih leh, Jehova chuan Davida chu thinlung sakhat pu leh tûrin a ṭanpui em? Ṭanpui e, a hnuah Bible chuan, ‘Pathian lamah a thinlung chu a lo ṭha famkim ta a,’ tiin a sawi a ni.—1 Lal. 11:4; 15:3.

14. Eng nge kan inzawh ang a, engvângin nge?

¹⁴ Davida thiltawn chu kan tân min tichaktu leh min vaukhântu a ni. Thil sual lian tak a tihna chu tûn laia Pathian chhiahhlawhte tâna vaukhânna a ni a. Jehova rawng kan bâwl ṭan chauh emaw, kum tam tak chhûng kan lo bâwl tawh emaw pawh ni se, heti hian kan inzâwt tûr a ni, ‘Thinlung sakhat pu lo tûra Setana thlêmna chu ka do em?’ tiin.

15. Engtin nge Pathian ṭihna chuan châkna ṭha lo chawk tho thei milem laka min vênhim theih?

 ¹⁵ Entîr nân, TV-ah leh Internet-a châkna ṭha lo chawk tho thei milemte a lo lan hian eng nge i tih? Chûng milemte leh film-te chu saruak lem a nih chiah loh avângin chhuanlam siam chu a awlsam mai thei. Mahse, chu chu i thinlung la pêng tûra Setana hmanrua a ni thei ang em? (2 Kor. 2:11) Chu milem chu miin thingtum lian tak phel nâna a hman hêm nên khaikhin theih a ni a. Thingtumah chuan hêm hmâwr hriam tak chu a han vaw lût ṭan a. Hêm a luh thûk telh telh chuan thingtum chu a phel ta a ni. TV emaw, Internet emawa kan hmuh milem chu hêm hmâwr hriam tak ang a ni thei ang em? Hlauhawm lo leh ho lam tak anga lang chûng milemte en ṭanna chuan thinlung sakhat kan putna leh kan rinawmna tichhetu thil sual tihnaah rang takin min hruai thei a ni. Chuvângin, i thinlungah chûng thil ṭha lo rêng rêng chu luhtîr hauh suh! Jehova hming ṭih tûrin thinlung sakhat pu reng ang che!

16. Thlêmna kan hmachhawn hunah eng zawhnate nge kan inzawh ang?

¹⁶ Milem ṭha lote mai bâkah, Setana chuan thil dik lo ti tûrin kawng hrang hrangin min thlêm a. Chûngte chu engtin nge kan chhân lêt? Sual lutuk lo anga ngaih chu awlsam tak a ni. Entîr nân: ‘Hnawh chhuah tawhna khawp a ni lo bawk a, a pawi lutuk lo vang,’ tiin kan ngaihtuah mai thei. Chutiang ngaih dân neih chu a dik lo tak zet a ni. Chuvângin, hêng zawhnate hi kan inzawh a pawimawh a ni: ‘Chûngte chu thinlung sakhat pu lo tûra Setana min thlêmna a ni em? Châkna ṭha lo ka do hneh lo a nih chuan, chu chuan Jehova hming sawichhiatna a thlen ang em? Chûng thilte tihna chuan Pathian min hnaihtîr ang nge, min hlattîr zâwk ang?’ tihte hi. Chûng zawhnate chu chhût ngun ang che. Mahni inbum lo va,  dik taka chhâng thei tûrin, finna dîlin ṭawngṭai ang che. (Jak. 1:5) Chutianga tihna chuan min vênghim thei a. Isua’n, “Setan, kal bo daih rawh!” tia a sawi angin, chu chuan thlêmnate hnâwl ṭhak tûrin a ṭanpui thei che a ni.—Mt. 4:10.

17. Engvângin nge thinlung sakhat pu lova rawngbâwlna chuan hlutna rêng a neih loh? Entîrna pe rawh.

¹⁷ Thinlung sakhat pu lova Pathian rawng kan bâwlna chuan hlutna rêng a nei lo. Inpumkhat thei lo sport team pakhat hi han mitthla teh. A ṭhenin mahni chauh inchawimawi an duh a, mi dangin kaihhruaina mila khelh an duh lo va, a dang lehte chuan an hotu chu zah lo takin an cheibâwl a ni. Chutiang team chuan inkhelhnaah hnehna an chan a rinawm loh. Chumi nêna inkalh takin, team inpumkhat tak chu an hlawhtling tlângpui ṭhîn a ni. I ngaihtuahna te, i châkna te, leh i rilru vei zâwngte chu Jehova rawngbâwl nâna i pêk pumhlûm chuan, i thinlung chu team hlawhtling ang a ni thei ang. Setana chuan thinlung sakhat pu lo tûrin a duh che tih hre reng rawh. Ani chuan i ngaihtuahna te, i châkna te, leh i rilru vei zâwngte chu Jehova tehna kalh zâwnga hmang tûrin a duh che a. Mahse, Jehova rawng chu i thinlung zawng zawnga i bâwl a ngai a ni. (Mt. 22:36-38) I thinlung chu Setana lâk pêntîr ngai suh!

18. Mika 4:5-na nêna inmilin eng tih nge i tum tlat?

¹⁸ Davida angin: “I hming ṭih tûrin thinlung sakhat mi puttir ang che,” tiin Jehova hnênah ṭawngṭai la. I ṭawngṭaina milin nun tum rawh. Nî tinin, thu tlûkna lian emaw, tê emaw i siam hunah, Jehova hming thianghlim zahna thûk tak i neihzia lantîr tum tlat ang che. Jehova Thuhretu pakhat nia chutianga i tih chuan, chu hming chu ṭha takin i târ lang thei ang a. (Thuf. 27:11) Chu bâkah, Zâwlnei Mika angin kan zavai hian: “LALPA kan Pathian chu kumkhuain kan bia ang,” tiin kan sawi thei ang.—Mik. 4:5.