CILONGESA 24
“Njikwase Njikale na Mbunge Imolika Mangana Njizibile Lyoba Lizina Lyobe”
“Njikwase njikale na mbunge imolika mangana njizibile lyoba lizina lyobe. Yehova Njambi yange, njikushangazala na mbunge yange yoshe.”—MYASO 86:11, 12, NWT.
MWASO 7 Jehova, Maata Aluna
BILI MUNO MU CILONGESA *
1. Kuzibila Njambi lyoba kulumbununa bika, co mwafwa bika baje bamuzema banapande kumuzibila lyoba?
BAKA-KILISTU bazema Njambi, co lalo bakamuzibila lyoba. Bamo basa kwihula ngwabo, ‘Twasa kuzema bati munu itukazibila lyoba?’ Eyo basa kwihula ngoco, oloni kutwesi na kwendeka lyoba lya kutewa cuma cije cikamijujwisa embwe. Tusimutwiya ha lyoba lya kulitila. Banu baje bakala neli lyoba bakasingimika manene Njambi. Co lalo bakatewe kulinga byuma bije bitsiya busamba bwabo nendi.—Myaso 111:10; Visi 8:13.
2. Kwesekesa na majwi a Mwene Ndabiti ali ku mukanda wa Myaso 86:11, tusimutwiya ha byuma muka bibali?
2 Tandeni Myaso 86:11. Omwo musinganyekesesa hali awa majwi, munanguka ngweni Mwene Ndabiti wamwene ngwendi kuzibila Njambi lyoba kwapwa kwa seho. Tusimutwiyeni mutwasa kupangesela majwi endekele Ndabiti. Ca kulibanga, tusimutwiya bitunapande kusingimikila manene lizina lya Njambi. Ca mu cibali, tusimutwiya mutwasa kumwesela ngwetu tuli na kusingimika lizina lya Njambi mu kuyoya kwetu.
BIKA BITUNAPANDE KUSINGIMIKILA LIZINA LYA YEHOVA?
3. Bika byamwene Mosesa bije byamukwasele atwaleleleho kusingimika lizina lya Njambi?
3 Simbu imo, Mosesa walishwekele mu limanya. Co wamwene bumpau bwa Yehova mu cimona. Musinganyeka ngweni walizibile bati? Wakasamene manene. Wazibile kangelo endeka ngwendi: ‘Yehova, Yehova, Njambi uje washula na kutetela na mema ku mbunge, uje kesi kulubala bwasi, muka-kulongwa na muka-kumwesa cizemo cije kucesi kutenguluka. Uje akamwesa cizemo cije kucesi kutenguluka ku makulukazi a banu, na kubasambesa ku milonga yabo na kukupenga-penga kwabo, na ku bubi bwabo.’ (Kutu 33:17-23; 34:5-7) Hamo Mosesa wakele na kwanuka awa majwi mwakele na kupangesa lizina lya Yehova. Ngeci, Mosesa wanangwile Baisalele ngwendi ‘basingimike lizina lya Yehova Njambi yabo lya bumpau na kukomokesa.’—Kwitu 28:58.
4. Bika byasa kutukwasa tusingimike Yehova?
4 Omwo tuziba lizina lya Yehova, tunapande kwanuka bifwa byendi. Tunapande kwanuka nzili yendi, mana endi, kusompa mu kusungama kwendi na cizemo cendi. Kusinganyekesesa ha bifwa byabibwa bya Yehova kutukwasa tumusingimike.—Myaso 77:11-15.
5-6. (a) Lizina lya Yehova lilumbununa bika? (b) Kwesekesa na Kutuuka 3:13, 14 na Isaya 64:8, Yehova akashulisilila bati cizango cendi?
5 Lizina lya Yehova lilumbununa bika? Baka-kulilongesa babangi ngwabo lizina lya Yehova lilumbununa ngwalyo “Akalingisa Byuma Bikaleko.” Awa majwi amwesa ngwawo Yehova asa kulinga byoshe byatonda, co wahi asa kumwonowesa kubilinga. Akalingi bati ngoco?
6 Yehova asa kupwa cuma coshe-coshe mangana ashulisilile cizango cendi. (Tandeni Kutuuka 3:13, 14.) Lijwi lya Cihebelu libananungulula ngwabo “Njapwa Munjapwa” basa kulinungulula lalo ngwabo “Njikapwa Mwoshe Munjangula Kupwa.” Mu mabulu etu bali na kutushongangeya ngwabo tusinganyekesese manene ha bulumbunwisi bwa lizina lya Njambi. Yehova asa lalo kukwasa bangamba bendi ba kujeneka kulumbunuka balinge cuma coshe-coshe mangana bashulisilile cizango cendi. (Tandeni Isaya 64:8.) Ebi bikebyo byakalingi Yehova mangana ashulisilile cizango cendi. Nabimo byahi byasa kumwonowesa kushulisilila cizango cendi.—Isaya 46:10, 11.
7. Bika bitukwasa tukandelele Yehova na kumusingimika?
7 Nga tusinganyekesesa ha byuma byanalingi Yehova nomu mwanatukwasela kupanga bipangi bimo, co tumukandelela manene. Co lalo tumusingimika manene nga tusinganyekesesa ha byuma byanatanga. (Myaso 8:3, 4) Tumwana lalo kasingimiko kakama nga tusinganyekesesa mwanatukwasela mangana tulinge cizango cendi. Cili bene, tunapande kusingimika lizina lya Yehova. Lizina lya Tate yetu linambateselela bifwa byendi, byuma byoshe byanalingi nebi byakalinga kulutwe.—Myaso 89:7, 8.
“NJIKASHANGAZALA LIZINA LYA [YEHOVA]”
Bilongesa bya Mosesa byasimpisile bimbunge bya banu, mwafwa wabalongesele bya lizina lya Yehova na bifwa byendi (Taleni palagilafu 8) *
8. Kwesekesa na Kwituluka mu Mashiko 32:2, 3, Yehova atonda ngwendi banu balinge bika ku lizina lyendi?
8 Simbu kanda Baisalele bakobele mu Lifuti lya Cikulaheso, Yehova walongesele Mosesa mwaso. (Kwitu 31:19) Mosesa nendi walongesele banu uje mwaso. (Tandeni Kwituluka mu Mashiko 32:2, 3.) Omwo tusinganyekesesa ha vesi 2 na 3, tunanguka ngwetu Yehova katondo ngwendi banu bashweke lizina lyendi. Co lalo banu kubapandele kulikela kulipangesa mwafwa ya kulimona ngwabo lyajele manene. Yehova atonda ngwendi banu boshe bazibuke lizina lyendi. Baisalele babwahelelele manene omwo Mosesa wabalongesele lizina lya Yehova na bifwa byendi. Byuma byabalongesele Mosesa, byapwile ngwe nyonzi ije ikolesa bimbuto, mwafwa byabashongangeyeye, co lalo byakanyamesele likulahelo lyabo. Bika bitunapande kulinga mangana tulongese bakwetu mu ngila ije ibakanyamesa?
9. Twasa kujelesa bati lizina lya Yehova?
9 Nga twambulwila ku njubo na njubo nambe ku mbunga, tunapande kupangesa Mbimbiliya mangana tukwase banu bazibuke lizina lya Yehova. Twasa kubana mabulu, kubamwesa mavidio na biñanda bili ha webusaiti yetu bije bizumbangeya Yehova. Nga tuli ku bipangi, ku sikola nambe mu bungenzi, tunapande kuwana simbu ya kuleka banu bya Njambi na bifwa byendi. Umona tuleka banu byuma byabibwa byanayongola Yehova kulingila banu hano hasi, co tubakwasa bamone ngwabo Yehova wabazema manene. Omwo tulongesa banu busunga hali Tate yetu wa cizemo, co tujelesa lizina lyendi. Co lalo tukwasa banu bamone ngwabo byuma bibanabalongesa hali Yehova binapu bya makuli. Biñanda bitulongesa banu bije bitunda mu Mbimbiliya, bikebyo byasa kubatakamesa.—Isaya 65:13, 14.
10. Mwafwa bika kutwapandele kulongesa lika banu mashiko a Njambi?
10 Nga tulongesa banu Mbimbiliya, tunapande kubakwasa bazibuke lizina lya Yehova na kulipangesa. Tubakwaseni lalo bazibuke Yehova mwamubwa. Oloni kutwasa kulinga ngoco, nga tubaleka lika mashiko a Njambi. Munu uje acililongesa Mbimbiliya asa kukala na lishungu lya kuzibuka mashiko a Njambi. Oloni kuzibuka lika mashiko a Njambi keti kukekwo kumulingisa azeme Yehova. Anukeni ngweni Adama na Eva bazibukile mashiko a Njambi, oloni kubamuzemene. (Kusha 3:1-6) Kuli byuma byabingi bitunapande kulinga keti kulongesa lika banu mashiko a Njambi.
11. Twasa kukwasa bati banu batuli na kulilongesa nabo Mbimbiliya bazeme Yehova?
11 Mashiko a Yehova apwa amabwa simbu yoshe. (Myaso 119:97, 111, 112) Oloni baje bacililongesa Mbimbiliya kubasa kumona ngwabo Yehova watuzema mukemwo natwana mashiko. Ngeci, twasa kwihula banu batukalongesa Mbimbiliya ngwetu: “Mwafwa bika Njambi nana mashiko ku banu bendi aje abatabesa kulinga byuma bimo na kubabindika kulinga byuma bimo? Co awa mashiko atulongesa bika hali ikeye?” Twasa kweta ku bimbunge bya baje batulilongesa nabo Mbimbiliya nga tubakwasa basinganyekesese ha bifwa bya Yehova na kusingimika lizina lyendi. Nga tulinga ngoco, co tubakwasa bazeme Yehova na kuzema mashiko endi. (Myaso 119:68) Co lalo tubakwasa bakale na likulahelo lya kukanyama mangana bakolese omwo baliwana na byeseko bije binapu ngwe tuhya.—1 Koli 3:12-15.
“TUKENDA MU LIZINA LYA YEHOVA”
Ndabiti watabesele mbunge yendi itanguke (Taleni palagilafu 12)
12. Bika byalingisile Ndabiti onowe kukala na mbunge imolika, co bika byatundilemo?
12 Ku Myaso 86:11, Mwene Ndabiti wasonekele ngwendi: “Njikwase njikale na mbunge imolika.” Byuma byaliwanene nabyo mu kuyoya kwendi byamukwasele amone ngwendi mbunge ya munu yasa kutanguka bwasi. Litangwa limo, Ndabiti wakele ha ciluli ca njubo yendi, co wamwene munakazi wambala oku ali na kujwela. Co wamushungwiiye. Ndabiti wazibukile lishiko lya Yehova lije lyendeka ngwalyo: “Keti [ukashungwiye] munakazi wa mukweni.” (Kutu 20:17) Washakele kuzibisa Yehova kubwaha ku mbunge, nameme ngoco ikeye anga watwaleleleho kutala uje munakazi wa lizina lya Mbateshemba. Co mbunge ya Ndabiti yatangukile omwo washungwiiye uje munakazi. Ndabiti wazemene Yehova, co lalo wamuzibilile lyoba, oloni wonowele kukwata mbunge yendi, co walingile bubi bwakama. Wajwalesele lizina lya Yehova. Co lalo walingisile banu ba kujeneka mulonga bakobele mu bukalu, kwambateselela na naanga yendi.—2 Samwe 11:1-5, 14-17; 12:7-12.
13. Tuzibuka bati ngwetu Ndabiti wakele na mbunge imolika lalo?
13 Yehova wanangwile Ndabiti, co busamba bwabo bwakanyamene lalo. (2 Samwe 12:13 Myaso 51:2-4, 17) Ndabiti kebalele bukalu bwatundile mu kwecelela mbunge yendi itanguke. Kuma Yehova wamukwasele akale na mbunge imolika lalo ndi? Eyo. Mbimbiliya ngwayo Ndabiti wakele na “[mbunge ya] kulongwa kuli Shukulu Kalunga Njambi yendi.”—1 Vimye 11:4; 15:3.
14. Cihula muka citunapande kulihula, co mwafwa bika?
14 Banu ba Njambi ano matangwa, banapande kulilongesa cimo ku byuma byaliwanene nabyo Ndabiti. Tubaboshe tunapande kulihula ngwetu: ‘Kuma njili na kutabesa Satana atangule mbunge yange ndi?’
Satana alinga mwoshe mwasela mangana atangule mbunge yeni. Oloni keti mumutabese (Taleni palagilafu 15-16) *
15. Kuzibila lyoba lizina lya Njambi kutukwasa bati tujeneke kuyongola bikupulo bya bukwizi?
15 Mukalingi bati nga mumona bikupulo ha TV nambe ha Intaneti bije byasa kukatula mashungu a kulilala? Mwasa kusinganyeka ngweni eci cikupulo nambe eyi filimu keti ya bukwizi. Oloni yasa kupwa ngila yali na kupangesa Satana mangana atangule mbunge yeni. (2 Koli 2:11) Nameme kubisholoka kupwa byabibi, oloni kubiyongola kwasa kutangula mbunge yeni na kumishongangeya mulinge bubi bwakama ku mesho a Yehova. Ngeci, keti mutabese cuma cacibi cikobele mu mbunge yeni. Twaleleleniho kukala na mbunge imolika mangana muzibile lyoba lizina lya Yehova.
16. Bihula muka bitunapande kulihula omwo tuliwana na byeseko?
16 Satana akapangesa bikupulo bya bukwizi na byuma byeka mangana atushongangeye kulinga bubi. Twasa kusinganyeka ngwetu kulinga ebi byuma kukwabihile. Cakumwenako, twasa kusinganyeka ngwetu: ‘Ebi byuma keti byabibi manene, mwafwa kubyasa kulingisa munu atunde mu cikungulukilo.’ Ebi binapu biyongola bya kuhenga. Tunapande kulihula ngwetu: ‘Kuma eyi ikeyo ngila yali na kupangesa Satana mangana atangule mbunge yange ndi? Nga njilinga ebi byuma, kuma njijwalesa lizina lya Yehova ndi? Kuma bikanyamesa busamba bwange na Yehova indi bibutsiya?’ Singanyekeseseni mwamubwa hali ebi bihula. Co lombeni Yehova amyane mana mangana mubikumbulule mwamubwa. (Yako 1:5) Nga mulinga ngoco, co mulinyungilila. Co lalo mubyana byeseko bya Satana, ngwe mwabibyanene Yesu uje wendekele ngwendi: “Tunda kuli yange Satana.”—Mateo 4:10.
17. Bika bitwendekela ngwetu tukobela mu bukalu nga kutupangela Yehova na mbunge imolika? Endekeni cakumwenako.
17 Tukobela mu bukalu nga kutupangela Yehova na mbunge imo. Cakumwenako, lingeni ngwe muli na kumona cibunga ca baka-kulaha mbola cije kucesi na likwatasano. Bamo bashaka lika lutsimo, bakwabo kubesi na kukabangeya mashiko a mu mbola, beka kubesi na kusingimika muka-kubalongesa. Kuma musinganyeka ngweni eci cibunga casa kuhyana ndi? Embwe. Oloni cibunga cije cinalikwatasana casa kuhyana. Mbunge yeni yasa kupwa ngwe cibunga cije casa kuhyana nga mupangela Yehova na biyongola byeni byoshe na mana eni oshe. Oloni keti mwibale ngweni Satana ashaka atangule mbunge yeni. Ashaka ngwendi biyongola byeni na mana eni bililwise na mashiko a Yehova. Oloni munapande kukala na mbunge imolika asina mupangela Yehova mwamubwa. (Mateo 22:36-38) Keti mutabese Satana atangule mbunge yeni.
18. Kwesekesa na Mika 4:5, bika bimunalyangwila kulinga?
18 Ngwe mwalingile Ndabiti, neni lombeni Yehova ngweni: “Njikwase njikale na mbunge imolika mangana njizibile lyoba lizina lyobe.” Lingeni mwoshe mumwasela mangana mulinge bimunalombo. Byuma bimulinga ha litangwa na litangwa, ipwe byabindondo nambe byakama, binapande kumwesa ngwabyo muzibila lyoba lizina lya Yehova lya kujela. Nga mulinga ngoco, co mujelesa lizina lya Yehova ha kupwa Bakaleho bendi. (Visi 27:11) Co tubaboshe twasa kwendeka majwi endekele kapolofweto Mika ngwendi: “Yetu tukenda mu lizina lya Yehova Njambi yetu ku myaka yoshe.”—Mika 4:5, NWT.
MWASO 41 Uutwe Tapelo Yaka
^ par. 5 Muno mu cilongesa tusimutwiya ha majwi amo a mu lilombelo lya Mwene Ndabiti aje ali ku Myaso 86:11, 12. Kuzibila lyoba lizina lya Yehova kulumbununa bika? Mwafwa bika tunapande kuzibila lyoba eli lizina? Kuzibila Njambi lyoba kutunyungilila bati tujeneke kulinga bubi?
