1. Makalelo apama oomova Yehova bavi, ki mwahaya bwaddi ekala yofuneya wa ale enna odhivela nuliye?

MAKIRISTAWU enomova Mulugu ni enomwiwelela oliye. Teto, athu amodha kinamova oliye. Woova nnawogihu vala, kahiyo woova ninga nafwanyiwa ethu yowopiha. Muwari mwa yohudhera ela nnafuna nisuze makalelo mamodha a pama owoova. Ale nna ekalelo ela yowova enowoniha wi enomuriha Mulugu. Makalelo ala oomova Mulugu, bapama mwaha enonikavihera orabela ethu-sithu enamutakalela babihu ni enaniyelelihe wandana wehu nuliye.​—Sal. 111:10; Pro. 8:13.

2. Ninga munawogela Salmos 86:11, dhithu baani bili nnafunihu osuza peeno?

² Omwileri Salmos 86:11. Onubuwela madhu ala ni makalelo baani? Podi wera onubuwela wi mwene Davidi ahinona wi woova ndina na Mulugu ethu yathima. Yohudhera ela enere woniha makalelo oolabihedha madhu ala a mwene Davidi. Vobajha, nnafuna nisuze mwahaya bwaddi egahoweleya oriha vanlubale ndina na Mulugu. Namala, nnere osuza makalelo owoniha wi nnovaha thima ndina na Mulugu mwigumini mwehu kadda labo.

3. Ethu baani yamukavihere Moses odhowave oovaga ndina na Mulugu?

³ Kubuwela makalelo Moses aariye numala woona waara wa Yehova wiviraga oliye nuugwela vamwangoni. Ninga munawogela livuru Estudo Perspicaz das Escrituras, “podi wera yari ethu yotikiniha yamwereyele opitha dhithu dhatedhene dhawereyele athu a malabo yale Yesu Kiristu ahinathi odha elabo yavati.” Podi wera Moses ahiiwa madhu a mungero yeraga: ‘Yehova, Yehova, Mulugu athagaraga ni anthebwa, ohaguvela  onyanyuwa, oojheha, eebaribari, onna odhivela wahinamala naathu matxikwi ni matxikwi, ookurumuwela dhoviriganiha, dhothega ni olupiwa wa malamulo.’ (Êxo. 33:17-23; 34:5-7) Podi wera Moses aalabihedhaga ndina na Yehova, owubuwela yopadduwa ela. Nuvira mudhidhi, kannanganyedha wi Moses ahakongomedha amwaana Ezarayeli ‘woova ndina nna naanthithimiho nnavaha woova.’​—Deut. 28:58.

4. Opendda dhikalelo dha Yehova winere onithukulela werana ethu baani?

⁴ Iyo nubuwela ndina nna Yehova, enohoweleya omubuwela muthu othukunle ndina nna. Enohoweleya wubuwela dhikalelo dhaye: Kopolo, thotho, wogowa, ni odhivela. Opendda dhikalelo dha Yehova, winere onithukulela omuriha oliye.​—Salmos 77:11-15.

5-6. a) Ndina na Mulugu nnatapulela ddi? b) Ninga munawogela Êxodo 3:13, 14 ni Isaías 64:8, Yehova anerana dhithu ni makalelo baani wihina efunelo yaye yereye?

⁵ Ndina na Mulugu nnatapulela ddi? Aliba osuza enorumedha wi ndina nna Yehova enatapulela ‘Oliye onosaddula okala ele anafuniye.’ Madhu ela enonubusedha wi kavo ethu enenya wihina efunelo ya Yehova ehereye. Oliye afuna weeriha ethu-sithu, enowereya ninga munafuneliye. Ni makalelo baani?

⁶ Yehova afuna werana efunelo yaye, oliye onowerana enahoweleya wihina yakwanele. (Omwileri Êxodo 3:13, 14.) Nnakala ootodoleyene nubuwelaga ekalelo ela ya muzimu wa Mulugu. Teto, Yehova onomusaddula muthu oohilogomana wihina amulabele oliye ni akwanelihe efunelo yaye. (Omwileri Isaías 64:8.) Ni makalelo yala, kavo ethu enanvila Yehova ni onowerana enahoweleya wihina efunelo yaye yereye. Kawo ethu enabarela wi efunelo ya Yehova ehereye.​—Isa. 46:10, 11.

7. Nnande addi olibiha makalelo ehu oomutamalela babihu oodhulu?

⁷ Iyo podi olibiha makalelo ehu oomuthithimiha babihu oodhulu, wodhela opendda dhatedhene dhipaddusiliye ni ele oneriliyena wihina yereye efunelo yaye. Motajhiha, opendda dhopaddusa winonikavihera wenjhedha  otikina wehu wodhela dhatedhene erilena oliye ni dhipaddusiwe nuliye. (Sal. 8:3, 4) Ohiya eyeneve, naapenddaga makalelo Yehova ananisadduliye wihina nerena efunelo yaye, nnere wunuwiha makalelo ehu oomuriha oliye. Ndina nna Yehova, mwebaribarene nnovaha woova! Teto, nnowoniha dhikalelo dhaye dhatedhene, nnowoniha dhatedhene dherilena oliye ni dhinafuniye werana osogolo.​—Sal. 89:7, 8.

8. Yolebela ya Deuteronómio 32:2, 3, enanoniha ethu baani wodhela ndina na Yehova?

⁸ Amwana Ezarayeli ehinathi ovolowa elabo aapaganyile Yehova, Moses ahisuzihiwa jhibo ni Yehova. (Deut. 31:19) Nuwindo, Yehova omuruma Moses wihina aasuzihe amwaana Ezarayeli jhibo ela. (Omwileri Deuteronómio 32:2, 3.) Iyo napendda versu 2 ni 3 nnowonelamo pamadhene wi Yehova, anafuna ndina naye nnoniwe. Oliye newene kanafuna ndina nna wooniwa ninga nothabwesesa otaleleya ofiyedha woviwaga oromoliwa. Oliye anafuna dhopaddusiwa dhatedhene dhinna enonelo dhinone ndina naye! Yaali mareeliho manddimuwa athu onvuruwana Moses ahudhihaga wodhela Yehova ni ndina nna nanthithimiho! Ndhe dhahudhiha Moses dhowalibiha vanlubale amwaana Ezarayeli. Aliwa yavuruwanaga dhatedhene dhawoga Moses, yakala oolibeene ninga makupu oonimbinela erubweliwe musongwe apama. Ki iyo, nnande addi ohudhiha ni makalelo oolibiha?

9. Nimakalelo baani nnaakaviherihu otxeniha ndina na Yehova?

⁹ Iyo nakala mmabasani oolaleya nyumba ni nyumba, nimulabihedhege Bibliya wihina natonyihedhe athu ekalelo ya Mulugu ni ndina naye, Yehova. Naalabihedhege pama marevista ehu, vidiyu, ni dhithu dhinafwanyeya mu website wihina nimuthithimihe Yehova. Nadhowa omabasani, oskola, nakala mulenddo ni, iyo podi opatha mudhidhi wi niwoge ele nnarumedhihu wodhela Mulugu ni ndhe dhinamudhivela oliye. Nawogaga wodhela odhivela wa Yehova, efunelo yaye ni elabo ya vati, nnonvaha oliye efunelo yowakwaneliha dhithu dhinafuniye werana. Naawaddelaga athu amodha wodhela nroromelo ninihuna ni babihu, nnokavihera otxeniha ndina na Mulugu. Teto, nnokavihera wakihedha ndina nna Yehova wodhela wakavihera athu ovenyihamo mmuruni mwewa dhowoota ni onyemuliwa wa Yehova esuziliwa mmagerejani. Kawo muthenga onaakurumusa athu murima okwaranya madhu a Yehova.​—Isa. 65:13, 14.

10. Naamuhudhihaga muthu Bibliya yoluba yehu ekalege eevi?

¹⁰ Naamuhudhihaga muthu Bibliya yoluba yehu ekale omukavihera onona ni olabihedha ndina nna Yehova. Nimukavihere omunona Mulugu ori ohela wa ndina nna. Ki nnere wanda werana eyo wodhela ohudhiha baahi makalelo owubuwela a Yehova ni mweddelo waaye? Ebaribari sowi namahudhera apama podi osuza ni otikina malamulo a Mulugu. Mbwenye oliye ahisuza okanna odhivela ni Mulugu enere omurusa wawiwelela malamulo. Kamubuwele Eva. Oliye ahinona nlamulo na Mulugu, mbwenye kaanna odhivela webaribari ni Yehova aanvahile nlamulona. Ni mamuneya Adawu aari ndo. (Gén. 3:1-6) Bumwahaya, ohiya baahi wasuziha athu amodha dhofuna dha Yehova, enahoweleya okwaranyiha.

11. Naahudhihaga malamulo a Mulugu, anamahudhera ehu nnakavihere ni makalelo baani omudhivela maliba avahile malamulo?

¹¹ Malamulo a Yehova ni dhithu dhinanilobiye wi neregena, sapamave. Mbwenye anamahudhera ehu yela kinoonelamo. Enohowelaya  nakavihere woona odhivela wa Yehova ori ohela wa malamulo aaye. Iyo podi omukoha namahudhera ehu: Mowona mwawo, mwahaya bwaddi Mulugu adhe aniwadelihege obe anilobege werana ethu yela? Ki nlamulo nna, nnatonyihedha addi emuthu yaye? Naakavihera anamahudhera ehu okanna mubuwelo mmodhave ninga Yehova, ni wunnuwiha odhivela enniwana ni ndina naye, nnere oddiginya vamlubale murima dhewa. Anamahudhera ehu kinaakanne odhivele baahi ni malamulo, mbwenye enere okanna odhivela ni ole avahile malamuloya. (Sal. 119:68) Aliwa enere wunnuwiha nroromelo newa, teto, yafwanyiwa makathamiho enere owedha owanana.​—1 Cor. 3:12-15.

12. Murima wa Davidi wagawanyeye ni makalelo baani, ki yapadduwe ddi mwaha wa yeyo?

¹² Va Salmos 86:11 nnowafwanyavo madhu enawoga ‘muube murima waga.’ Mwene Davidi ahivetheliwa wihina alebe madhu ala. Mwigumini mwaye, oliye ahona wi murima kunarusa ogaweya. Labo nimodha oliye nuugwela vadhulu va nyumba, ahimona mwihiyana amwinya ahabaga. Ki mudhidhi yole murima wa mwene Davidi, were wubeya obe were ogawanyeya? Oliye ahinona nlamulo na Yehova nnasoriha wi: ‘Kumukalele munigwa mwihiyana a mwanddamani awo.’ (Êxo. 20:17) Mbwenye epadduwile sowi, oliye ahididela omusugwa. Mwaha wa yeyo, murima waaye ogawanyeya ofiyedha omukalela munigwa Bati Seba ni osukuma odhivela waaye ni Yehova. Davidi ahimala mudhidhene amudhivelaga Yehova ni arabelaga ele enamutakalela oliye, vano mahala dduli, oliye ohiya efunelo ya mwiili omugonjhiha. Vasogolova, efunelo ela ya mwiili yahimutotela makathamiho manlubale. Oliye kathithimihe ndina na Yehova. Mwaha wa munigwa waaye, ahifiyedha watotela makathamiho manlubale amudhaaye ni athu yahaanna muladdu.​—2 Sam. 11:1-5, 14-17; 12:7-12.

13. Nnone addi wi murima wa Davidi wahihogolowela okala wampubula?

¹³ Yehova ahimusinyusa Davidi, vasogolova omoobola mmakathamihoni. (2 Sam. 12:13; Sal. 51:2-4, 17) Davidi owubuwela makathamiho yanfwanyile mwaha ogawanyeya wa murima waaye. Eyo yomubusedha madhu enafwanyeya va Salmos 86:11. Ni makalelo mamodha, madhu ala podi woneliwamo ayi: ‘Mugivahe murima wampubula.’ Ki Yehova ahimukavihera Davidi okanna murima wampubula? Ebaribari sowi madhu a Yehova, enomuwoga Davidi ninga muthu anna  ‘murima . . . wamudhivela Yehova Mulugu aye.’​—1 Reis 11:4; 15:3.

14. Kadda muthu ikohege ethu baani?

¹⁴ Dhotajhiha dha Davidi podi onilibiha. Oviriganiha waaye ethu enaaxagiha ale enamulabela Mulugu peeno. Podi akala niromile omulabela Yehova wale obe nili axa, enohoweleya wikoha: Ginogojhiha malango a Saddana analabihedhiye wihina agawanye murima waaga?

15. Mwahaya bwaddi ekala yorusa wibarela nona fotu mu TV obe mwinternetini dhinatota munigwa wabure?

¹⁵ Wonaga TV obe wakala mwinternetini, vano dhikumelela dhithu dhinatota munigwa wabure onere ddi? Eyo podi okala yorusa orabela osugwa, thabwatabwa dhakala fotu dhinawoniha athu maddave. Mbwenye kunoona wi ayo makalelo a Saddana oofuna ogawanya murima wawo? (2 Cor. 2:11) Fotu ndho, podi wuthukulela ononga mubuwelo wawo ni ovunganyedha murendele oniwena. Omaromelo enakalege ninga ethu yapama, mbwenye omagomihedho onere woona wi Saddana ohuseredhe vanigoddoni noxongowa. Vano oliye uwerana ndo, ohuugojhiha. Teto, weya onerege othabwive obwina. Ki vano, ndhe nnonihu mu TV obe mwinternetini dhinakala ninga nigoddo noxongowa? Nihiddiwale wi ndhe dhinakala ninga dhing’ono, obe ndhe nnonihu wi kahiyo dhabure, podi onthukulela mowaguva ogawanya murima wehu ni oyelela nroromelo ninihuna. Okoodde ethu-sithu enathukulele murima wawo okanna munigwa wa bure! Odhowegeve ni murima wampubula ni wowova ndina nna Yehova.

16. Makoho baani enahoweleya wawerana nafwanyiwa dhoweha?

¹⁶ Ohiya fotuve baahi dhaathu egali madave, Saddana ohukanna murako dhowinjhiva analabihedhiye wihina anithukulele werena  dhithu dhabure. Ki murako ndho nnaawanena avi? Yowukulihaya sowi athu amodha enofiyedha wubuwela: ‘Gerana ela kaginatxosiwa, mwaha kithabwile okala yabure.’ Mubuwelo wowi ndo kahiyo wapama. Nafwanyiwa yoweha enohoweleya wikoha: Saddana analabihedha murako ola wi agawanye murima waaga? Gerana ethu yabure, ginootxeniha ndina na Yehova? Ethu ela enere ogaandaniha ni Mulugu, obe enere ogiiddaniha nuuliye? Makalelo apama oopendda biyala. Olobele wi ovahiwe thotho wihina wawakule makoho ala ni ebaribari sowanganyedha. (Tiago 1:5) Eyo enere wubarela. Teto, podi wukavihera okala txithi ofiyedha owoga ninga Yesu awogile egi: ‘Kavenyavo, Saddana we!’​—Mat. 4:10.

17. Mwahaya bwaddi murima wogawanyeya kunatxova? Owogemo nladdaniho.

¹⁷ Murima wogawanyeya kunatxova. Kubuwela nikuru naaliba onvoka bola nihiniwanana mmodha ni mukwaye. Yajogarigi, amodha enafuna evahiwege thima aliweneve baahi, amodha kinafuna ohara malamulo a jogu, teto amodha kinamwiwelela namaxagiha ewa a bola. Nikuru nowi ndala, kaninganyari joguya. Mbwenye nikuru nniwanana nnere oganyari. Murima wawo wamwiwelelaga Yehova ni wamwebedhaga oliye baahi, podi okala ninga nikuru nnaganyari jogu. Kahiyo odduwala wi Saddana anafuna agawanye murima wawo. Oliye anafuna mubuwelo wawo, efunelo yawo, ehiwananege ni malagano a Yehova. Enohoweleya, wilibihera wihina okanne murima wororomeleya ni womulabela Yehova. (Mat. 22:36-38) Kahiyo omwenya Saddana ogawanya murima wawo!

18. Ninga munawogela Miqueias 4:5, yothoma yawo sivi?

¹⁸ Olobele wa Yehova ninga mwene Davidi: ‘Muube murima waaga wihina goovege ndina nenyu.’ Wilibihere wihina olabihedhe nlobelo nna mwigumini mwawo. Malabo matene, dhowera dhawo dhatedhene, dhonihege wi onovaha thima ndina nootxena na Yehova. Werana ndo, ndina nna Namona a Yehova nnere wufwanela. (Pro. 27:11) Iyo aatene podi owoga ninga namavuhulela Mikeya awogiliye ege: ‘Iyo nnere webedha ndina na Yehova, Mulugu ehu, malabo amatene.’​—Miq. 4:5.