1. Wẽn-zoeer yaa bõe, la bõe yĩng t’a yaa tɩlɛ ne sẽn nong-b a Zeova wã?

KIRIS-NEBÃ nonga Wẽnnaam, la b zoet-a me. Neb kẽer getame tɩ f pa tõe n nong neda, la f leb n zoet-a ye. La wẽn-zoeer yaa toor ne rabeem. Sõs-kãnga pʋgẽ, d na n goma wẽn-zoeerã yõod yelle. Neb nins sẽn zoɛt Wẽnnaamã waoogd-a-la ne b sũur fãa. B sẽn pa rat tɩ bãmb ne b Ba sẽn be saasẽ wã zoodã sãamã yĩnga, b pa rat n maan bũmb n sãam a sũur ye.—Yɩɩn. 111:10; Yel. 8:13.

2. Sẽn zems ne rĩm a Davɩɩd pʋʋsgã sẽn be Yɩɩn-sõamyã 86:11 pʋgẽ wã, bõe ne bõe yell la d na n gome?

² Karm-y Yɩɩn-sõamyã 86:11. Y sã n tags vɛrse wã goam yelle, y yãta vẽeneg tɩ rĩm a Davɩɩd sẽn da maand sɩd ne Wẽnnaamã, a ra mii wẽn-zoeer yõodo. Sõs-kãngã pʋgẽ, d na n yãa d sẽn tõe n maan to-to n tũ bũmb ning a Davɩɩd sẽn yeel a pʋʋsgã pʋgẽ wã. Pipi, d na n yãa bũmb a wãn sẽn kɩt tɩ d segd n waoog Wẽnnaam yʋʋrã ne d sũur fãa wã. Yiibu, d na n yãa wãn to la d tõe n wilg tɩ d sɩd waoogda Wẽnnaam yʋʋrã daar ne a to fãa.

3. Tõe tɩ yaa bõe la sẽn sõng a Moyiiz t’a ra waoogd Wẽnnaam yʋʋrã ne a sũur fãa wã?

³ Tags-y n ges-y a Moyiiz manesem sẽn yɩ to-to, a sẽn wa n be tãng bokẽ, n wa ne a Zeova ziirã sẽn pɩʋʋgd a taoorã. Étude perspicace des Écritures sebrã yetame tɩ “nand t’a Zeezi wa tẽng zugu, ninsaal zɩ n yã bũmb sẽn sek waoogr la  yɛɛsg wa a Moyiiz sẽn yã wã ye.” A Moyiiz wʋma koɛɛga, la tog n yaa malɛk koɛɛga. Ad koɛɛgã sẽn yeele: “Zeova, Zeova, Wẽnnaam sẽn yaa nimbãan-zoɛta, la sõmblem soaba, sũur sẽn pa yikd tao-tao, la sẽn pid ne maan-neer la sɩda, sẽn wilgd zãmaan tusa a nonglem, la sẽn kõt tudgr ne beegr la yel-wẽnd sugri.” (Yik. 33:17-23; 34:5-7, MN) Tõe t’a Moyiiz sã n da pʋt Wẽnnaam yʋʋrã, a tẽegda a sẽn yã wã. Dẽnd pa lingr la a Moyiiz sẽn wa n yeel Israyɛll nebã sẽn yaa Wẽnnaam nin-buiidã, tɩ b ‘zoe Wẽnnaam yʋʋrã sẽn zems waoogr la zoeesã’ ye.—Tõo. 28:58.

4. Bõe n tõe n sõng-d tɩ d maneg n waoogd a Zeova?

⁴ D sã n tagsd a Zeova yʋʋrã yelle, d segd n bʋgsa a sẽn yaa Wẽnnaam ning buudã zug me. D segd n tagsa a zʋg-sõma wã yelle, wala makre, a pãn-kãsengã, a yamã, a tɩrlmã la a nonglmã. D sã n tagsd a zʋg-sõma kãensã la a taab yelle, na n kɩtame tɩ d maneg n waoogd-a.—Yɩɩn. 77:12-16.

5-6. a) Wẽnnaam yʋʋrã võor yaa bõe? b) Wa Yikr 3:13, 14 ne Ezayi 64:7 wã sẽn yetã, wãn to la a Zeova kɩtd tɩ bũmb yɩ?

⁵ Wẽnnaam yʋʋrã võor yaa bõe? Bãngdb wʋsg sakame tɩ “Zeova” wã rat n yeelame tɩ: “A kɩtdame tɩ yɩ.” Rat n yeelame tɩ bũmb pa tõe n gɩdg a Zeova t’a pa pids a raabo, la t’a kɩtdame t’a sẽn dat fãa yɩ. Wãn to?

⁶ A Zeova lebgda a sẽn dat a soab fãa, n kɩt tɩ bũmb fãa yɩ, a raabã pidsg yĩnga. (Karm-y Yikr 3:13, 14.) D tõe n lebga ebre gom-biis nins b sẽn lebg tɩ “mam yaa m sẽn yaa-a soabã,” n yeel tɩ: “Mam na n lebga mam sẽn dat n lebg a soaba.” Siglgã nong n sagenda tõnd tɩ d tagsd Wẽnnaam zʋg-sõma wã sẽn sek waoogr la yɛɛsgã yelle. A Zeova tõeeme me n kɩt tɩ sẽn tũud-b yẽ wã lebg a sẽn dat a soab fãa, a raabã pidsg yĩnga, baa ne b sẽn pa zems zãngã. (Karm-y Ezayi 64:7) Woto, a Zeova kɩtdame t’a raabã pidsi. Bũmb pa tõe gɩdg-a t’a pa pids a bõn-daab toor-toorã ye.—Eza. 46:10, 11.

7. Wãn to la d tõe n wilg tɩ d sũur nooma ne d Ba sẽn be saasẽ wã?

 ⁷ D sã n bʋgs bũmb nins fãa d Ba sẽn be saasẽ wã sẽn zoe n maane, la a sẽn sõng tõnd me tɩ d tõog n maanã zugu, d sũur na n maneg n yɩɩ noog ne-a. Wala makre, d sã n bʋgs bũmb nins fãa a Zeova sẽn naan tɩ be yamleoogã zugu, na n yɩ-d-la noog hal tɩ d pẽge. (Yɩɩn. 8:4, 5) D sã n bʋgs a Zeova sẽn kɩt tɩ d yɩ a soab n tõog n maan a raabã, na n kɩtame tɩ d maneg n waoogd-a ne d sũur fãa. A Zeova yʋʋrã sɩd seka zoees la waoogre! Yʋʋrã wilgda d Ba wã sẽn yaa a soaba, a sẽn zoe n maane, la a sẽn na n wa maane.—Yɩɩn. 89:8, 9.

8. Tõod 32:2, 3 wilgdame t’a Zeova ratame t’a nin-buiidã manesem yɩ wãn ne a yʋʋrã?

⁸ Sẽn wa n ket bilf tɩ Israyɛll nebã kẽ kãabg tẽngẽ wã, a Zeova zãmsa a Moyiiz yɩɩlle. (Tõo. 31:19) A Moyiiz me ra segd n dɩka yɩɩllã n zãms nin-buiidã. (Karm-y Tõod 32:2, 3.) D sã n bʋgs vɛrse a 2 ne a 3 zugu, d nee vẽeneg t’a Zeova pa rat tɩ b solg a yʋʋrã, wall b pʋd n kɩt tɩ yaa wa a yʋʋrã boolg kisame ye. A pʋd n datame tɩ nebã fãa bãng a yʋʋrã. Ad Israyɛll nebã sẽn paam t’a Moyiiz zãms-b bũmb wʋsg a Zeova la a yʋʋrã sẽn tar ziirã zugã, sɩd yɩɩ zu-zẽkr meng-menga! A Moyiiz sẽn zãms-b bũmb ningã paasa b tẽebã pãng la keng b raoodo, wa sa-koom sẽn manegd tɩɩs to-to wã. Wãn to la tõnd me tõe n maan tɩ d sẽn zãmsd nebã to-to wã naf-b woto?

9. Wãn to la d tõe n sõng tɩ Wẽnnaam yʋʋrã paam waoogre?

⁹ D sã n wa moond koɛɛgã zak-zak wall zãma sʋka, d tõe n talla Biiblã n wilg nebã Wẽnnaam yʋ-peellã sẽn yaa Zeova wã. D tõe n kãab-b-la sɛba, la d wilg-b video-rãmb la bũmb a taab sẽn be tõnd sɩtã pʋgẽ, n gomd a Zeova yelle. D tʋʋmã zĩigẽ bɩ lekollẽ wã, wall d sã n wa togd sore, d tõe n paama segb n gom d Wẽnnaamã d sẽn nongã yelle, n wilg a sẽn sɩd yaa a soaba. D tõe n wilg-b-la bõn-sõma nins a Zeova sẽn na n maan n kõ ãdem-biisã. Rẽ tõe n sõng-b lame tɩ b bãng t’a Zeova sɩd nonga ninsaalbã wʋsgo. D sã n sõngd nebã tɩ b bãngd sɩdã d Ba wã zugu, kɩtdame t’a yʋʋrã paamd waoogr n paasdẽ. D sõngda nebã tɩ b bãng tɩ b zãms-b-la ziri wʋsg Wẽnnaam zugu. Bũmb pa be d sẽn tõe zãms nebã tɩ naf-ba, la keng b raood n ta bũmb nins sẽn be Biiblã pʋgẽ wã ye.—Eza. 65:13, 14.

10. Bõe yĩng tɩ d pa segd bal n zãms Biiblã karen-biisã Wẽnnaam noyã la a saglsã?

¹⁰ D sã n wa zãmsd nebã Biiblã, d sẽn datã yaa d sõng-b tɩ bãng a Zeova yʋʋrã la b pʋt-a me. D rat n sõng-b lame me tɩ b bãng a Zeova mengã sõma. La rẽ yĩnga, yaa d sã n wilgd-b a noyã la a sẽn dat tɩ d zã d mens to-to wã bal la d na n tõog n maan woto bɩ? Biiblã karen-biig sẽn maand modgr tõe n bãnga Wẽnnaam noyã hal t’a sũur noom ne rẽ. La rẽ yĩnga, a na n sakda a Zeova, a sẽn nong-a yĩng bɩ? Tẽeg-y t’a Awa ra mii Wẽnnaam noyã, la a ra pa nong Wẽnnaam ne a sũur fãa ye. A Ãdem me ra pa nong Wẽnnaam ne a sũur fãa ye. (Sɩng. 3:1-6) Dẽnd d pa segd bal n zãms nebã Wẽnnaam noyã sẽn yaa tɩrsã ye. D segd n maana sẽn yɩɩd rẽ.

11. D sã n wa zãmsd d Biibl karen-biisã Wẽnnaam noyã la a saglsã, wãn to la d tõe n sõng-b tɩ b wa nong yẽ mengã?

¹¹ A Zeova noyã la a saglsã nafda tõnd wakat fãa. (Yɩɩn. 119:97, 111, 112) La Biibl karen-biig tõeeme n pa ne rẽ vẽenega, sã n pa a wa n bãngame t’a Zeova sẽn kõt tõnd noyã yaa a sẽn nong-dã yĩng ye. D tõe n mi n soka d Biibl karen-biisã yaa: “Fo  tagsdame tɩ yaa bõe yĩng la Wẽnnaam sẽn yeel tɩ d maan woto, wall tɩ d ra maan woto wã? Bõe la rẽ wilgd tõnd a mengã zugu?” D sã n sõng-b tɩ b tags a Zeova sẽn yaa Wẽnnaam ning buudã yelle, la b wa nong a yʋʋrã sẽn tar ziirã ne b sũur fãa, na n kɩtame tɩ zãmsgã maneg n kẽ b sũyã. Rẽ, d Biibl karen-biisã pa na n wa nong Wẽnnaam noyã bal ye. B na n wa nonga Wẽnnaam me, soab ning sẽn kõt noyã. (Yɩɩn. 119:68) B tẽebã na n bɩɩme, tɩ b tõog me n yals kãn-kãe baa mak-toos pʋsẽ.—1 Kor. 3:12-15.

12. Yel-bʋg pʋgẽ la a Davɩɩd pa tũ a Zeova ne a sũur fãa, la baasa wãna?

¹² Gomd sẽn tar pãng n be Yɩɩn-sõamyã 86:11 wã pʋgẽ. Be, b yeelame yaa: “Kɩt-y tɩ m paam tagsg a yembr bala.” Yaa ne vʋʋsem sõngã maasem la a Davɩɩd togs gom-kãensã. A Davɩɩd vɩɩmã tõre, a yãame tɩ ned tõee nana-nana n wa pa le tũud a Zeova ne a sũur fãa ye. Daar a ye, a wa n bee a roogã zugu, n wa yã ned pag sẽn sood koom. Pagã yʋʋr la a Batseba. A Davɩɩd sẽn yã pagã, a talla tagsg a yembr bɩ, bɩ a yamã sɩnga yuusgu? A ra miime t’a Zeova yeelame yaa: “Da tʋlg f to pag ye.” (Yik. 20:17, Sebr Sõngo) Baasgo, a kell n talla gesgo. A wa n tʋlla pagã, n yaool n da tʋll me n ta a Zeova yam. Baa ne a Davɩɩd sẽn da sɩng n nong a Zeova la a zoet-a wã, a basame t’a tʋls-wẽngã tõog-a. Rẽ n so t’a maan yel-wẽn-kãsemse. A sẽn maan woto wã, a sãama a Zeova yʋʋrã. A leb n waa ne yel-beed a zakã rãmb la neb a taab zugu.—2 Sãm. 11:1-5, 14-17; 12:7-12.

13. Bõe yĩng tɩ d miẽ t’a Davɩɩd wa n le paama “sũur sẽn pa pʋɩ”?

¹³ A Zeova kibla a Davɩɩde, t’a leb n paam zood sõma ne-a. (2 Sãm. 12:13; Yɩɩn. 51:4-6, 19) A Davɩɩd pa yĩm namsg la toog ning a beegrã sẽn wa ne, a sẽn pa tũ a Zeova ne a sũur fãa wã yĩngã ye. D tõe n lebga a gomd ning sẽn be Yɩɩn-sõamyã 86:11 pʋgẽ wã tɩ: “Kõ-y maam sũur sẽn pa pʋɩ.” A Zeova sõnga a Davɩɩd t’a le paam “sũur sẽn pa pʋɩ” bɩ? N-ye. Bala, b wa n yeela Wẽnnaam Gomdã pʋgẽ t’a ‘Davɩɩd yamã rag n loee’ ne a Zeova, rat n yeel t’a tũ-a-la ne a sũur fãa.—1 Rĩm. 11:4; 15:3.

14. Bõe la d segd n sok d menga, la bõe yĩnga?

¹⁴ A Davɩɩd kibarã kengda d raoodo, n leb n yaa keoogr n kõ-do. A sẽn maan yel-wẽn-kãsemsã yaa keoogr n kõ Wẽnnaam nin-buiidã rũndã-rũndã. D nan sɩnga a Zeova tũubu, wall d tũud-a-la na maan yʋʋm wʋsgo, d ned kam fãa segd n soka a  meng yaa: ‘M maoodame n pa rat n bas t’a Sʋɩtãan tõog tɩ m pa kell n tũ a Zeova ne m sũur fãa bɩ?’

15. Wãn to la wẽn-zoeer na n sõng-do, d sã n wa yã imaaz sẽn nekd pag ne rao lageng tʋlsem?

¹⁵ Wala makre, tele wã bɩ ẽntɛrnetã pʋgẽ, y sã n wa yã imaaz sẽn tõe n nek pag ne rao lageng tʋlsem, y maanda wãna? Y sã n pa gũusi, y tõe n wa yeta y meng tɩ filmã bɩ imaazã y sẽn getã pa tolg n yaa pornogarfi ye. La rẽ yĩnga, pa a Sʋɩtãan n dat n tũnug ne rẽ n kɩt tɩ y ra le sak a Zeova ne y sũur fãa sɩda? (2 Kor. 2:11) Imaaz-kãng tõe n yɩɩ wa lar ned sẽn dat n tall n bok raoog sẽn yaa bedre. A na n kɛɛda raoogã ne larã bilf-bilfu. Tarẽ-n-tarẽ, larã wat n kẽe zulunga, n bok raoogã. Rẽ yĩnga, imaaz-rãmb nins sẽn tõe n nek pag ne rao lageng tʋlsmã b sẽn wilgd tele wã bɩ ẽntɛrnetã pʋgẽ wã pa tõe n yɩ wa larã noor sɩda? Baa bõn-kɩdg sẽn wõnd pa tõe n maan ned baa fʋɩ tõe n wa kɩtame t’a maan yel-wẽnd n kɩɩs a Zeova, n pa le tũud-a ne a sũur fãa ye. Woto wã, ra bas-y tɩ tags-yood kẽ y sũurã pʋgẽ ye. Ket-y n zoet-y a Zeova yʋʋrã ne y sũur fãa!

16. D sã n wa be makr pʋgẽ, sogs-bʋs la d segd n sok d menga?

¹⁶ Imaaz-rãmb nins sẽn tõe n nek pag ne rao lageng tʋlsmã sẽn yãk b toogo, a Sʋɩtãan tũnugda ne yɛl wʋsg n makd tõnd n dat tɩ d maan wẽnga. Tõnd manesem yaa wãn to ne rẽ? D tõe n wa tagsdame tɩ bõn-kãens pa tolg n yaa wẽns woto ye. Wala makre, d tõe n yeta d meng yaa: ‘B pa na n yiis-m tigingã pʋgẽ dẽ yĩng ye. Rẽnd pa tolg n yaa wẽng ye.’ La tagsg a woto yaa wẽng menga. Yɩta sõma tɩ d sok d meng yaa: ‘Rẽ yĩnga, a Sʋɩtãan pa makd n na n kɩt tɩ m da le sak a Zeova ne m sũur fãa sɩda? M sã n sak m tʋls-wẽnsã, m pa na n sãam a Zeova yʋʋr sɩda? M sã  n maan bõn-kãnga, na n paasa maam ne a Zeova zoodã bɩ, bɩ na n kɩtame tɩ m zãag ne-a?’ Bʋgs-y sogs-kãensã zug neere. Pʋʋs-y a Zeova, n kos-a t’a kõ-y yam, tɩ y sɩd leok ne pʋ-peelem, n da wa belg y meng ye. (Zak 1:5) D sã n maan woto, sɩd na n kogl-d lame. Na n sõng-d lame tɩ d yals kãn-kãe makr buud fãa pʋgẽ, wa a Zeezi sẽn kɩɩs a Sʋɩtãan n yeel-a wã yaa: “Sʋɩtãana, looge!”—Mat. 4:10.

17. Bõe yĩng tɩ d sã n pa tũud a Zeova ne d sũurã fãa, pa tar yõodo? Rɩk-y makre.

¹⁷ D sã n pa tũud a Zeova ne d sũurã fãa, pa tar yõod ye. D rɩk makr ne ball-tãoodb sẽn na n be ekip-yɛnga, n yaool n pa zemsd taab ye. Kẽer baooda ziir la yʋʋr b mens yĩng bala, tɩ sãnda pa rat n tũ noyã, tɩ kẽer me paoogd ãntɛrneerã. Na n yɩɩ toog tɩ ekip a woto tõog n tão n paame. La ekip neb sã n zemsd taaba, n noom ne taaba, b tõe n tãoome n paame. Yãmb tagsa wã la y tʋlsmã fãa sã n tika a Zeova raabã maanego, y sũurã na n yɩɩ wa ekip sẽn tãood n tõogdẽ. Tẽeg-y t’a Sʋɩtãan na n datame tɩ y ra tũ a Zeova ne y sũurã fãa ye. A ratame tɩ y tagsa wã la y tʋlsmã ra zems ne a Zeova noyã ye. La yãmb yẽ segd n nonga a Zeova ne y sũur fãa n tõog n maan a raabã. (Mat. 22:36-38) Ra tol-y n bas-y-yã a Sʋɩtãan t’a kɩt tɩ y sũurã pʋɩ ye.

18. Sẽn zems ne Miise 4:5 wã, bõe la y yãk yam n na n maane?

¹⁸ Pʋʋs-y a Zeova wa a Davɩɩde. A yeelame: “Kɩt-y tɩ mam zoe yãmb yʋʋrã ne m sũur fãa.” Yãk-y yam n tũ a Davɩɩd sẽn yeelã. Daar fãa, modg-y tɩ y sã n na n yãk yam fãa, yaa yel-bõones tɩ yaa yel-kãsems pʋsẽ, bɩ y wilg tɩ y waoogda a Zeova yʋ-sõngã ne y sũur fãa. Y sẽn yaa a Zeova Kaset soabã, y sã n maand woto, na n kɩtame t’a Zeova yʋʋrã paam waoogre. (Yel. 27:11) Woto, d fãa na n tõog n yeela wa no-rɛɛs a Miise tɩ d ‘na n kẽna ne d Wẽnnaam a Zeova yʋʋr wakat sẽn kõn sa.’—Mii. 4:5, MN.