1. ¿Toni kijtosneki se kimoujkatokas Dios, uan keyej akin kitasojtaj Jiova moneki kimoujkatokaskej?

AKIN tikchiuaj kemej Cristo tiktasojtaj Dios, sayoj ke no tikmoujkatokaj. Sekin xa kijtoskej ke nejin amo taixejekol. Sayoj ke amo ika titajtojtokej keman semi se kimouilia teisa, ta nejin moujkayot kijtosneki semi se kipoujkaitas oso se kimouiskaitas Dios. Akin kimoujkatokaj toTajtsin Dios amo kinekij kiyolkokoskej porin semi kipatiuitaj kuali mouikaskej iuan (Sal. 111:10; Prov. 8:13). Maj ika titajtokan nejin moujkayot.

2. ¿Toni ome taman tein moijtoua itech Salmo 86:11 tikitaskej itech nejin tamachtilis?

² (Xikonixtajtolti Salmo 86:11.) Keman titanemiliaj itech nejin tajtolmej, tikitaj ke tekiuaj David kiajsikamatia ke semi moneki se kimoujkatokas Dios. Maj tikitakan keniuj uelis tikchiuaskej tein kijtoj itech nejin netataujtil. Yekinika, ika titajtoskej seki taman tein kinextia keyej moneki semi tikpoujkaitaskej itokay Dios. Uan satepan ika titajtoskej keniuj tiknextiskej nejon poujkaitalis mojmostaj.

3. ¿Toni tein kipanok Moisés xa kipaleuij maj nochipa kipoujkaitani itokay Dios?

³ Maj tiknemilikan keniuj momachilij Moisés keman moajsia itech tepet Horeb uan kiitak iueyiyo Jiova satepan ke panok iixpan. Amatajkuilol Perspicacia para comprender las Escrituras  kijtoua ke nejon tein kipanok “xa yejua tein okachi se kimoujkaita tein kipanok se taltikpaknenkej achto ke Jesús ualaskia nikan taltikpak”. Moisés kikakik nejin tajtolmej, tein xa kijtoj se ángel: “Jiova, Jiova, se Dios teiknelijkej, amo niman kualani uan semi kipia ueyi netasojtalis tein amo tami uan nochipa kijtoua tein melauak, akin kinnextilia miakej ueyi netasojtalis tein amo tami, akin kitapojpoluia akin mopoloua, akin kitapanauilia tanauatil uan akin tajtakoua” (Éx. 33:17-23; 34:5-7). Moisés xa kielnamikia nejon tein kipanok keman kikuia itokay Jiova. Yejua ika satepan kiniluij israelitas, akin katkaj ixolal Dios, maj kimoujkatokanij “nejin tokayit tein kinamiki se kiueyitalis uan se kimoujkaita” (Deut. 28:58).

4. ¿Toni techpaleuis maj okachi tikpoujkaitakan Jiova?

⁴ Keman itech titanemiliaj itokay Jiova, no moneki itech titanemiliskej tein kichiua uan keniuj tanemilia. Moneki tikelnamikiskej ikualneskayouan, kemej chikaualis, tamatilis, melaujkayot uan netasojtalis. Titanemiliskej itech nejin kualneskayomej uan oksekiok kichiuas maj okachi tikpoujkaitakan (Sal. 77:11-15).

5, 6. 1) ¿Toni kijtosneki itokay Dios? 2) Kemej kijtoua Éxodo 3:13, 14 uan Isaías 64:8, ¿keniuj kichiua Jiova tein kiixtalia?

⁵ ¿Tikmatij toni kijtosneki itokay Dios? Miakej momachtianij kijtouaj ke itokay Jiova nesi ke kijtosneki “yejuatsin kichiua maj mochiua”. Nejin techelnamiktia ke nion teyi uelis kitsakuilis Jiova maj kichiua tein kineki uan ke yejuatsin uelis kichiuas maj pano tein kiixtalia. ¿Keniuj kichiua?

⁶ Se taman yejua keman mochiua tein yeski taman uan ijkon uelis kichiuas tein kiixtalia (xikonixtajtolti Éxodo 3:13, 14). Itech toamaixuan, miakpa techiluiaj maj itech titanemilikan nejin tein Dios ueli kichiua tein semi se kimoujkaita. Uan no, Jiova ueli kichiua maj itekitikauan tajtakolejkej mochiuakan tein yeski taman uan ijkon uelis kitekitiliskej uan kichiuaskej tein kiixtalia (xikonixtajtolti Isaías 64:8). Ijkon Jiova kichiua  itanejnekilis. Nion teyi uelis kitsakuilis maj kichiua tein kiixtalia (Is. 46:10, 11).

7. ¿Toni techpaleuis maj okachi tikmoujkaitakan uan tikpoujkaitakan toTajtsin Jiova?

⁷ ¿Toni techpaleuis maj okachi tikmoujkaitakan uan tikpoujkaitakan toTajtsin Jiova? Komo titanemiliaj itech tein kichiuani uan itech tein techpaleuiani maj tikchiuakan. Kemej neskayot, keman itech titanemiliaj nochi tein kichijchiuani semi tikmoujkaitaj (Sal. 8:3, 4). Uan semi tikpoujkaitaj keman itech titanemiliaj keniuj techpaleuiani maj ueli tikchiuakan itanejnekilis. Itokay Jiova yekmelauj se kimoujkaita, uan tein kijtosneki techmatiltia keniuj tanemilia, nochi tein kichiuani uan nochi tein kichiuas (Sal. 89:7, 8).

8. Ijkon kemej kijtoua Deuteronomio 32:2, 3, ¿toni kineki Jiova maj tikchiuakan ika itokay?

⁸ Tepitsin achto ke israelitas kalakiskiaj itech Tal tein Jiova kijtojka kinmakas, yejuatsin kimachtij Moisés se nekuikatil uan kinauatij maj no kinmachtiani israelitas (Deut. 31:19). Keman itech titanemiliaj versículo 2 uan 3, tikitaj ke Jiova amo kineki maj tiktatikan itokay nion maj tiknemilikan ke semi yektik uan yejua ika amo moneki tikijtoskej (xikonixtajtolti Deuteronomio 32:2, 3). Kineki maj nochin kiixmatikan. Se ueyi tatiochiualis maj Moisés kinmachtiani israelitas itokay Jiova, keniuj tanemilia yejuatsin uan tein kichiua. Tein Moisés kinmachtij kinpaleuij maj okachi takuaujtamatinij uan kinyolchikauak, ijkon kemej mixkiouit kipaleuia xiuit maj moskalti uan maj xochioua. ¿Keniuj no uelis titamachtiskej kemej tamachtij Moisés?

9. ¿Keniuj titapaleuiaj maj mochipaua itokay Jiova?

⁹ Keman titanojnotsaskej kajkalpan oso kampa miakej panouaj, maj tikinnextilikan taltikpakneminij itokay Dios itech Biblia. Uelis tikuiskej nepaleuilmej tein kiueyitaliaj Jiova, kemej toamaixuan, kualtsitsin videos uan jw.org kampa timoteixmatiltiaj. Maj tiktemokan nochipa ika titajtoskej toTajtsin Dios kampa titekitij, kampa timomachtiaj oso keman tiyouij kansaika. Maj ika titajtokan keniuj kiixtalijtok maj tinemikan uan tein kichiuas nikan taltikpak. Keman taltikpakneminij kikakiskej nejin, xa kiajsikamatiskej se taman tein amo keman kinemilijtoyaj: ke Jiova semi techtasojta. Nochipa keman titamachtiaj tein melauak ika toTajtsin tetasojtakej, titapaleuiaj maj mochipaua itokay uan maj taltikpakneminij kiajsikamatikan ke kinmachtianij miak takajkayaualis. Tein tikinmachtiaj ika Biblia semi kinpaleuia uan kinyolseuia (Is. 65:13, 14).

10. Keman titamachtiaj ika Biblia, ¿keyej amo sayoj moneki titamachtiskej itanauatiluan Dios uan keniuj kineki maj tinemikan?

¹⁰ Keman tikinmachtiaj taltikpakneminij ika Biblia, tiknekij tikinpaleuiskej maj kiixmatikan itokay Jiova uan maj kikuikan. Sayoj ke no tiknekij maj kuali kiixmatikan yejuatsin. ¿Uelis tikinpaleuiskej maj kiixmatikan komo sayoj tikinmachtiaj itanauatiluan uan keniuj kineki maj tinemikan? Xa amo. Xa se akin momachtijtok Biblia kiixmatis itanauatiluan Dios uan hasta kinmoujkaitas. Sayoj ke ¿kitakamatis Jiova porin kitasojta? Maj tikelnamikikan tein kipanok Eva. Yejua kiixmatia itanauatil Dios, sayoj ke amo yekmelauj kitasojtaya Jiova. Uan no ijkon kipanok Adán (Gén. 3:1-6). Yejua ika, maj amo sayoj tikinmachtikan taltikpakneminij itanauatiluan Dios uan keniuj kineki maj tinemikan.

11. ¿Keniuj uelis tikinpaleuiskej akin tikinmachtiaj ika Biblia maj kitasojtakan Dios uan amo sayoj maj kiixmatikan itanauatiluan?

¹¹ Itanauatiluan Jiova uan kemej kineki maj tinemikan nochipa techpaleuia (Sal. 119:97,  111, 112). Sayoj ke akin momachtijtok Biblia amo ijkon kiitas komo amo kiajsikamati ke Jiova techmakak nejon tanauatilmej porin techtasojta. Yejua ika uelis tiktajtaniskej: “¿Keyej tiknemilia ke Dios techiluia maj tikchiuakan nejin oso maj amo tikchiuakan? ¿Toni mitsmachtia nejin kemej tanemilia yejuatsin?”. Komo tikpaleuiaj maj itech tanemili Jiova uan maj yekmelauj kitasojta itokay, tamachtilis xa okachi kiyololinis. Ijkon amo sayoj kipatiuitas itanauatiluan, ta no kitasojtas yejuatsin (Sal. 119:68). Itakuaujtamatilis mochikauas uan uelis kixikos tein yeski ouijkayot tein kipanos (1 Cor. 3:12-15).

12. 1) ¿Toni kichiuak maj se tonal David amo kimoujkatokani Jiova ika nochi iyolo? 2) ¿Toni panok satepan?

¹² Tajtolmej “ika nochi noyolo” tein tekiuaj David kijkuiloj itech Salmo 86:11 no semi monekij. Ika tein kipanok itech inemilis, kiitak ke kemansa ouij tekisa se kitekitilis Jiova ika nochi se iyolo. Se tonal, keman yetoya ikalkuako kiitak se siuat akin motokaytiaya Bat-Seba akin mopaktoya uan katka inamik okse takat. ¿David kimoujkatokaya Jiova ika nochi iyolo keman panok nejon? Yejua kiixmatia tanauatil tein Jiova kitemakaka: “Amo xiknejneki isiuauj okse takat” (Éx. 20:17). Sayoj ke kisentokak kiitak. Iyolo kemej yeskia moxeloj porin kinekia iuan yetos Bat-Seba uan no kinekia kiyolpaktis Jiova. Maski miak xiujmej kitasojtak uan kimoujkatokak Jiova, ijkuak kitayekanaltij itanejnekilis. Nejon kichiuak maj kichiuani seki taman tein semi amo kuali. Kipitsotilij itokay Jiova uan semi kintajyouiltij akin amo teyi kichiujkaj, hasta ichankauan (2 Sam. 11:1-5, 14-17; 12:7-12).

13. ¿Keniuj tikmatij ke David oksepa kitekitilij Jiova ika nochi iyolo?

¹³ Jiova kimelauak oso kitakakiltij David, uan yejua oksepa kuali mouikak iuan (2 Sam. 12:13; Sal. 51:2-4, 17). David amo keman kielkauak kuejmolmej uan tajyouilis tein kiualkuik keman amo kimoujkatokak Dios ika nochi iyolo. Itajtoluan tein moajsij itech Salmo 86:11 no uelis ijkon moijtos: “Xinechmaka se noyolo tein amo xeliujtos”. ¿Kinankilij Jiova? Kemaj, porin satepan iTajtol kijtoua ke David “kitekitilij Jiova iDios ika nochi iyolo” (1 Rey. 11:4; 15:3).

14. ¿Toni moneki timotajtaniskej, uan keyej?

¹⁴ Tein kipanok David semi techyolchikaua, sayoj ke no technejmachtia. Ueyi tajtakol tein kichiuak moneki techtanemililtis. Maski uejkaujya tiktekitilijtokej Jiova oso yankuixtok, moneki timotajtaniskej: “¿Nimochikaujtok nikixtopeuas tein Satanás ika kitemoua  maj moxelo noyolo oso maj amo niktekitiliok Jiova ika nochi noyolo?”.

15. ¿Keniuj komo tikmoujkatokaj Dios techpaleuis komo tikitaj teisa tein uelis kichiuas maj itech titanemilikan auilnemilis?

¹⁵ Kemej neskayot, ¿toni tikchiuaj komo tikitaj itech televisión oso Internet se taixkopin oso se película tein ueliskia kichiuas maj itech titanemilikan auilnemilis? Xa tiknemiliskej ke nejon amo pornografía oso auilnemilis. Sayoj ke ¿ueliskia Satanás ika kitemojtos maj amo tikmoujkatokakan Jiova ika nochi toyolo? (2 Cor. 2:11.) Nejon taixkopin oso película kemej yeskia se hacha tein se takat ika kitapana kouit. Yekinika xa kiuiteki kouit kemej kalakis hacha uan ijkon kemej okachi kikalakijtiuj, kouit okachi ixtapantiuj. No ijkon, xa tiknemiliskej ke amo teyi techpanos komo tikitaj taixkopimej oso películas tein uelis kichiuaskej maj itech titanemilikan auilnemilis, sayoj ke satepan uelis titajtakoskej. Yejua ika, maj amo tikauakan maj nion teyi tein amo kuali kalaki itech toyolo. Maj tiksentokakan timochikauakan tikmoujkatokaskej Jiova ika nochi toyolo.

16. ¿Toni moneki timotajtaniskej keman tiknejnekiskej tikchiuaskej tein amo kuali?

¹⁶ Satanás no kitemoua maj titajtakokan ika okseki taman. ¿Toni tikchiuaj keman panoua nejon? Xa tiknemiliskej se taman kemej nejin: “Amo se ueyi tajtakol, porin amo ika nechkalankixtiskej itech nechikol”. Amo kuali yetok maj ijkon titanemilikan. Okachi kuali maj timotajtanikan seki taman kemej nejin: “¿Kitemojtok Satanás maj amo nikmoujkatoka Jiova ika nochi noyolo? Komo nikchiua tein amo kuali, ¿nikchiuas maj amo kuali ika tajtokan Jiova? ¿Nechpaleuis nejon maj okachi kuali nimouika iuan noDios, oso kichiuas maj amo kuali nimouikaok iuan?”. Maj itech  titanemilikan nejin netajtanilmej. Maj tiktajtanikan Jiova maj techmaka tamatilis tein techpaleuis maj titanankilikan ika tein melauak (Sant. 1:5). Nejin semi techpaleuis, porin kichiuas maj senkis tikixtopeuakan tein amo kuali, ijkon kemej Jesús kichiuak keman kijtoj: “Xiyo ya, tejua tiamokuali Satanás” (Mat. 4:10).

17. ¿Keyej amo techpaleuia komo toyolo xeliujtok? Xikonijto se neskayot.

¹⁷ Komo toyolo xeliujtok amo techpaleuia. Maj tiknemilikan ke seki siuamej oso takamej akin senmauiltiaj amo kuali mouikaj. Sekin kinekij maj yejuan kinueyitalikan, oksekin amo kinekij mauiltiskej kemej ixyetok uan oksekin amo kipoujkaitaj akin kinnextilia keniuj mauiltiskej. Semi ouij maj tatanikan keman mauiltiskej iniuan oksekin. Okachi uelis tataniskej mauiltianij akin kuali mouikaj. Toyolo yeski kemej nejon mauiltianij akin kuali mouikaj komo tein tiknemiliaj, tein tiknekij uan tein tikmachiliaj mouikaj ika itanauatiluan Jiova. Maj tikelnamikikan ke Satanás semi kiyolpaktiskia kichiuas maj toyolo moxelo, porin kineki maj tiknejnekikan tikchiuaskej tein amo kuali maski tiknekij tikchiuaskej tein Jiova kiyolpaktia. Komo tiknekij tiktekitiliskej Jiova, moneki tikchiuaskej ika nochi toyolo (Mat. 22:36-38). Maj amo keman tikauakan maj Satanás kixelo toyolo.

18. Kemej kijtoua Miqueas 4:5, ¿toni tikonixtalijtok tikonchiuas?

¹⁸ Maj no tiktajtanikan Jiova tein David kitajtanij: “Xikchiua maj nikmoujkatoka motokay ika nochi noyolo”. Maj timochikauakan tikchiuaskej tein kijtoua nejin netataujtil. Tein yeski tein mojmostaj tikixpejpenaskej, maj kinexti ke semi tikpoujkaitaj itokay Dios tein yektik. Komo ijkon tikchiuaj, tiknextiskej ke technamiki maj techixmatikan ika itokay Jiova porin tiitaixpantijkauan (Prov. 27:11). Uan tinochin uelis tikijtoskej tein kijtoj tanauatijkej Miqueas: “Tinentinemiskej itech itokay Jiova toDios nochipaya” (Miq. 4:5).