1. ¿Tlen kijtosneki tiktlakaitaskej toTajtsin Dios uan tleka miak ipati ijkon ma tikchiuakan?

TEJUAN tiktlasojtlaj toTajtsin Dios pero noijki tiktlakaitaj. Xamo sekimej kijtoskej ninmej ome tlamantli amo mouikaj. Pero tiktlakaitaskej toTajtsin Dios amo kijtosneki tikmauiliskej. Tejuan ika nochi toyolo tiktlakaitaj. Amo tikyolkokoskej Jehová tla tikpatioitaj iuan timouikaskej (Sal. 111:10; Prov. 8:13).

2. Ijkon ken kijtoua Salmo 86:11, ¿tlen ome tlamantli timomachtiskej?

² (Xiktlajtolti Salmo 86:11). Nin texto techititia tekiua David okajsikamatiaya miak ipati ma tiktlakaitakan toTajtsin Dios. Ma tikitakan ken tikchiuaskej tlen ye okijto. Achto tikitaskej tleka moneki tiktlakaitaskej itoka toTajtsin Dios. Satepan timomachtiskej ken tikteititiskej tiktlakaitaj.

3. ¿Tleka Moisés okitlakaitaya itoka toTajtsin Dios?

³ Ma timokuayejyekokan ken omomachili Moisés ijkuak okatka itlampa se tetl uan Jehová okititi iueyitilis. Amochtli Perspicacia para comprender las Escrituras kijtoua: “Xamo nion se tlakatl ijkon okitaya ijkuak ayamo oualaya Jesucristo”. Moisés okikak  ninmej tlajtolmej uan xamo okinmijto se ángel: “Jehová, Jehová, se Dios tlen teiknomati uan teajsikamati, amo san niman kualani uan tetlasojtla uan kijtoua tlen melauak, ye miakej kintlasojtla, kintlapojpoluia akinmej motlapololtiaj uan ijkuak tlajtlakolchiuaj” (Éx. 33:17-23; 34:5-7). Xamo Moisés okilnamikiaya ijkuak okijtouaya itoka toTajtsin Dios tlen okitak non tonal. Ik non, okinmilui israelitas ma kitlakaitakan itoka toTajtsin Dios “tlen ueyititok uan tetlajtlachialti” (Deut. 28:58).

4. ¿Ken okachi tiktlakaitaskej Jehová?

⁴ Ma timokuayejyekokan ken iyelis Jehová ijkuak tikkakij itoka. Ma tikilnamikikan ye kipia chikaualistli, ixtlamatki, yolmelauak uan techtlasojtla. Okachi tiktlakaitaskej Jehová tla timokuayejyekouaj ken iyelis (Sal. 77:11-15).

5, 6. (1) ¿Tlen kijtosneki itoka toTajtsin Dios? (2) Ijkon ken kijtoua Éxodo 3:13, 14 uan Isaías 64:8, ¿ken kichiua Jehová tlen kineki?

⁵ ¿Tlen kijtosneki itoka toTajtsin Dios? Miakej ixtlamatkej kijtouaj itoka kijtosneki “ye kichiua ma mochiua”. Nin techilnamiktia amitlaj kitsakuilia Jehová ma kichiua tlen kineki uan ye kichiua ma pano tlen kineki. ¿Ken kichiua?

⁶ Ye kichiua nochi tlen moneki para ma mochiua tlen kineki (xiktlajtolti Éxodo 3:13, 14). Toamatlajkuiloluan techpaleuiaj ma timokuayejyekokan ken iyelis Jehová. Noijki Jehová techpaleuia ma tikchiuakan tlen ye kineki maski titlajtlakolejkej (xiktlajtolti Isaías 64:8). Ijkon Jehová kichiua tlen kineki. Amitlaj kitsakuilia tlen ye kineki kichiuas (Is. 46:10, 11).

7. ¿Ken okachi tiktlasojtlaskej toTajtsin Dios?

 ⁷ ¿Ken okachi tiktlasojtlaskej toTajtsin Dios? Ma timokuayejyekokan tlen yokichi uan ken yotechpaleui. Timotlajtlachialtiaj ijkuak tikitaj nochi tlen okichijchi (Sal. 8:3, 4). Noijki okachi tiktlasojtlaj Jehová ijkuak timokuayejyekouaj ken yotechpaleui ma tikchiuakan tlen ye kineki. Itoka toTajtsin Dios melauak tetlajtlachialti uan kijtosneki ken iyelis, tlen yokichi uan nochi tlen kichiuas (Sal. 89:7, 8).

8. Ijkon ken kijtoua Deuteronomio 32:2, 3, ¿ken kineki Jehová ma tiktekitiltikan itoka?

⁸ Jehová okimachti Moisés se tlakuikali ijkuak israelitas yikalakiskiaj itech tlali tlen ye okinmilui kinmakaskia (Deut. 31:19). Okilui omonekiaya kinmachtis israelitas non tlakuikali (xiktlajtolti Deuteronomio 32:2, 3). Ninmej versículos techmachtiaj Jehová kineki ma tiktekitiltikan itoka ken moneki. Kineki nochtin ma kimatikan itoka. Israelitas okipatioitakej ijkuak Moisés okinmatilti akin Jehová uan ken iyelis. Israelitas okachi otlaneltokakej uan omoyolchikajkej ijkon ken ijkuak kiaui okachi tlaselia. ¿Tlen tikchiuaskej para ma ajsi itech inyolo iTlajtol toTajtsin Dios akinmej tikinmachtiaj?

9. ¿Ken tikchipauaj itoka toTajtsin Dios?

⁹ Ma titlamachtikan ika Biblia tlen itoka toTajtsin Dios ijkuak titetlapouiaj tekalijtik noso kanin miakej panouaj. Ma tikinmakakan amatlajkuilolmej, ma tikinmititikan videos noso página tlen tikpiaj itech Internet uan ijkon tikueyichiuaskej Jehová. Ma tikinmiluikan oksekimej ken iyelis Jehová kanin titekipanouaj, kanin timomachtiaj noso ijkuak kanaj tiauij. Ma tiktematiltikan tlen kichiuas nikan tlaltikpak. Ijkon kimatiskej Jehová kintlasojtla. Tejuan tikchipauaj itoka toTajtsin Dios uan tikteititiaj amo melauak tlen kijtouaj akinmej kiteneuaj. Ijkon iTlajtol toTajtsin Dios kinyolseuia akinmej tikintlapouiaj (Is. 65:13, 14).

10. ¿Tleka amo san ma titlamachtikan itlanauatiluan toTajtsin Dios?

¹⁰ Ijkuak titlamachtiaj, tiknekij tikinpaleuiskej oksekimej ma kixmatikan Jehová uan ma kinotsakan ika itoka. Noijki tiknekij ma kimatikan ken iyelis. ¿Tikinpaleuiskej tla san tikinmiluiskej tlen kijtouaj itlanauatiluan toTajtsin Dios? Xamo amo. Xamo akinmej tikinmachtiaj kinmixmatij itlanauatiluan toTajtsin Dios. Pero ¿kitlakamatiskej Jehová porque kitlasojtlaj? Ma tikilnamikikan tlen okipanok Eva. Ye okimatiaya itlanauatil toTajtsin Dios pero amo okitlasojtlaya. Noijki ijkon okichi Adán (Gén. 3:1-6). Ik non, amo san ma titlamachtikan itlanauatiluan toTajtsin Dios.

11. ¿Ken tikinpaleuiskej akinmej tikinmachtiaj ma kitlasojtlakan Jehová?

¹¹ Itlanauatiluan Jehová techpaleuiaj (Sal. 119:97, 111, 112). Akinmej tikinmachtiaj  amo ijkon kitaskej tla amo kajsikamatij Jehová techtlasojtla. Ik non, ma tikintlajtlanikan: “¿Tleka toTajtsin Dios technauatia ijkin ma tikchiuakan? ¿Ken mitspaleuis okachi xikixmati Jehová?”. Ajsis itech inyolo iTlajtol toTajtsin Dios tla tikinpaleuiaj ma kixmatikan uan ma kitlakaitakan itoka. Ijkon kitlasojtlaskej Jehová uan amo san kitlakamatiskej (Sal. 119:68). Kipiaskej chikauak intlaneltokilis uan tlaxikoskej ijkuak kipiaskej ouijkayotl (1 Cor. 3:12-15).

12. ¿Tleka David otlajtlakolchi uan tlen opanok?

¹² Noijki miak ipati tlen satepan okijkuilo David itech Salmo 86:11: “Xikchiua ika nochi noyolo ma niktlakaita motoka”. David okitak oui kitlakamatis Jehová ika nochi iyolo. Se tonal okatka ikuapak ikalijtik uan okitak se siuatl omaltijtoka. Ye omotokayotiaya Bat-Seba uan yokipiaya inamik. ¿Kitlakamatiskia Jehová ika nochi iyolo? David okimatiaya tlen okijto Jehová: “Amo xikixneki isiua mokni” (Éx. 20:17). Pero ye amo oksekan otlachixki uan amo okimalui iyolo. Okinekiaya motekas iuan non siuatl uan noijki okinekiaya kitlakamatis Jehová. Ye otlajtlakolchi maski miak xiuitl okitlakamatki Jehová. Okisokioti itoka toTajtsin Dios uan okintlajyouilti oksekimej tlen amitlaj intlajtlakol uan noijki ifamilia (2 Sam. 11:1-5, 14-17; 12:7-12).

13. ¿Ken tikmatij David omoyolkopki?

¹³ Jehová okiyektlali David uan ye omoyolkopki (2 Sam. 12:13; Sal. 51:2-4, 17). David amo keman okilka ken otlajyoui ijkuak otlajtlakolchi. Okilui Jehová: “Xikchiua ika nochi noyolo ma niktlakaita motoka”. ¿Okinankili Jehová? Kema. Biblia kijtoua satepan David okitekichiuili Jehová ika nochi iyolo (1 Rey. 11:4; 15:3).

14. ¿Tlen moneki ma timotlajtlanikan uan tleka?

¹⁴ Techyolchikaua tlen okipanok David uan noijki techmachtia ma timomaluikan. Maski yimiak xiuitl tiktekichiuiliaj Jehová noso amo, ma  timotlajtlanikan: “¿Nimochijchikaua nikixtopeuas nochi tlen Satanás kineki ma nikchiua?”.

15. ¿Tlen techpaleuis amo ma tikitakan tlen pitsotik?

¹⁵ ¿Tlen tikchiuaskej tla itech televisión noso itech Internet mota itlaj pitsotik? Xamo tikijtoskej amo tikitaj pornografía. Pero Satanás ijkon kineki techkajkayauas (2 Cor. 2:11). Nin yetoskia ken hacha tlen ika tikuajtlapanaj. Hacha yolik kitekti kuauitl pero satepan nochi kitlapana. Tla tikitaj tlen pitsotik, yetoskia ken hacha yolik kitekti kuauitl uan tikijtoskej amitlaj techpanos. Pero titlajtlakolchiuaskej tla amo timomaluiskej uan nin yetoskia ken ijkuak tlapani kuauitl. Ik non, amo ma tikitakan tlen pitsotik. Nochipa ma tiktlakamatikan Jehová uan ma tikchipauakan itoka.

16. ¿Tlen moneki timotlajtlaniskej tla amo tiknekij titlajtlakolchiuaskej?

¹⁶ Satanás techyejyekoua ika okseki tlamantli para ma titlajtlakolchiuakan. ¿Tlen tikchiuaskej? Xamo tikijtoskej: “Amo nechkixtiskej itech tlanechikol porque amo tlajtlakoli”. Amo kuali tla ijkon timokuayejyekouaj. Ik non, ma timotlajtlanikan: “¿Kineki nechkajkayauas Satanás? ¿Niksokiotis itoka toTajtsin Dios tla ijkon nikchiuas? ¿Okachi nimouikas iuan Jehová noso amo?”. Ma tikiluikan Jehová ma techpaleui ma tikinnankilikan ninmej tlajtlanilmej uan amo ma timokajkayauakan  (Sant. 1:5). Techpaleuis tla ijkon tikchiuaskej. Tikixtopeuaskej tlen amo kuali uan tikijtoskej ken Jesús: “¡Xio, satanás!” (Mat. 4:10).

17. Xikijto tleka titlajyouiskej tla amo tiktlakamatij Jehová.

¹⁷ Titlajyouiskej tla amo tiktlakamatiskej Jehová. Ma tikijtokan akinmej mauiltiaj pelota amo kuali mouikaj. Sekimej san kinekij tlatlaniskej uan oksekimej amo mauiltiaj ken moneki uan amo kitlakaitaj akin kinmachtia. Amo tlatlaniskej akinmej ijkon kichiuaj. Pero kuali mauiltiskej tla nochtin kuali mouikaj. Ijkon ken akinmej kuali mauiltiaj, tejuan noijki tiktekichiuiliskej Jehová ika nochi toyolo tla san se tlamantli timokuayejyekouaj uan tikchiuaskej tlen ye kineki. Ma tikilnamiktokan Satanás kineki ma tikkauakan Jehová. Kineki ma titlajtlakolchiuakan maski yitikmatij Jehová amo kipaktia ijkon ma tikchiuakan. Moneki tiktlakamatiskej Jehová ika nochi toyolo tla tiknekij tiktekichiuiliskej (Mat. 22:36-38). Amo ma tikkauilikan Satanás ma techkajkayaua.

18. Ijkon ken kijtoua Miqueas 4:5, ¿tlen tiknekij tikchiuaskej?

¹⁸ Ijkon ken David okichi ma tikiluikan Jehová: “Xikchiua ika nochi noyolo ma niktlakaita motoka”. Ma tikchiuakan tlen tikiluiaj Jehová. Nochipa ma tikteititikan tiktlakaitaj itoka. Ijkon tikteititiskej technamiki ma techtokayotikan tiiTlaixpantijkauan Jehová (Prov. 27:11). Tinochtin uelis tikijtoskej ken okijto profeta Miqueas: “Nochipa tinemiskej itech itoka Jehová toDios” (Miq. 4:5).