1. Kuthya Mwari icinyi zve ngenyi kunosisira kwa vaya vanomuthya?

MAKRISTU anoda Mwari zve anomuthya. Vamweni vanozvivona kuva zvakasiyana. Asi, atiripi kubhuya ngo pamusoro po kuthya kunomuthyisijira. Tinozobhuya ngo pamusoro po kuthya kumweni kunosisira maningi. Vandhu vano mushovo wondhowo wo kuthya, vanoda Mwari zve vanomureremeja. Ivona avadi kunyangajisa Baba wavo wo mugore, ngokuti ivona avadi kukhuvaza ushamwari hwavo navo.​—Nduyo 111:10; Mazwi Akangwara 8:13.

2. Mukuzwirana no magama a Mambo Dhavhidhi anowanika pana Nduyo 86:11, ngozvapi zviro zviviri zvatinoda kuvona?

² Verenganyi Nduyo 86:11. Pamunorangarira ngo pamusoro po magama aya, mungavona kuti Dhavhidhi waikuziva kusisira ko kuthya Jehovha. Ngativone kuti tingashandisa kudini magama akananga Dhavhidhi pa mukumbiro wake. Cokutanga, ngativone mathangwe manganani anoitisa kuti tireremeje zina ra Mwari. Cocipiri, tinovonazve kuti tingakhombijisa kudini kuti tinoreremeja zina ra Mwari, mu upenyu hwedu hwo njiku no njiku.

3. Ciitiko capi cakabesera Mosi kuti areremeje zina ra Mwari?

³ Amborangariranyi mazwiro akava na Mosi, paainga akaima panyezuru po buwe. Iyena wakavona goja ra Mwari recikhirira  pamberi pake. Zvingaita kuti apanazve mundhu umweni wakavona cishamaiso cakadari Jesu Kristu acito aviya. Mosi wakazwa magama anotevera, zvinovoneka inga kuti iwona akabhuiwa ngo ngirozi, okuti: “Tenji Mwari! Tenji Mwari. Mwari anounyaxa no usizi, anononoka kuceneka, wakazara ngo rudo no ugondeki, anongwarira rudo hwake ku bziuru bzo mubarihwana, anokungurira uposi, uxaixi no uphambanisi.” (Exodo 33:17-23; 34:5-7) Zviro zvakadari kangaije zvaindoviya mu murangariro wa Mosi, nguva jese jaaishandisa zina ra Jehovha. Atikani-kani kuti Mosi pa kufamba ko nguva wakazongwanja jinja ro Iziraeri kuti “rithye zina iri ro goja no kuthisa.”​—Deuteronòmio 28:58.

4. Zvicinyi zvingatibesera kuti tireremeje maningi Jehovha?

⁴ Patinorangarira ngo pamusoro po zina ro kuti Jehovha, tinodikanavo kurangarira ngo pamusoro po undhu hwa Jehovha. Tinodikana kuceukija mugariro jake, jakadari inga simba rake, uzivi hwake, ururami hwake no rudo hwake. Kurangarijisisa ngo pamusoro po mugariro iji no jimweni, zvingatiita kuti timureremeje maningi.​—Nduyo 77:11-15.

5-6. (a) Ngoyapi revo yo zina ra Jehovha? (b) Mukuzwirana na Exodo 3:13, 14 na Isaia 64:8, Jehovha anoitisa kudini kuti zviro zvikwanirisike?

⁵ Ngozvapi zvatinoziva ngo pamusoro po revo yo zina ra Mwari? Vajiji vamweni vo Bhaibheri, vanotenda kuti zina ra Jehovha rinovoneka inga kuti rino revo yokuti “Iyena Anoitisa Kuti Zviitike.” Izvi zvinoticeukija kuti apana cingakamisa Jehovha kuita zviya zvaanoda. Kuitisa kudini?

⁶ Jehovha anoita kuti zviro zviitike ngo kuva zviri zvese zvinodikana kuti akwanirise cidisiso cake. (Verenganyi Exodo 3:13, 14.) Mu mabhuku edu, tino zviceukijo zvizinji ngo pamusoro po divi iri rinoshamaisa ro undhu hwa Mwari. Jehovha angaitazve kuti vashandiri vake vacizivi kukwana vaite zvaanoda kuti vamushandire no kukwanirisa cidisiso cake. (Verenganyi Isaia 64:8.) Mu njira iji, Jehovha anoita kuti kuda kwake kuitwe. Apana cingaita  kuti cidisiso cake citame kukwanirisika.​—Isaia 46:10, 11.

7. Zvicinyi zvatingaita kuti tiengejere kubongesera Baba wedu vo mugore?

⁷ Tingaengejera kubongesera Baba wedu vo mugore ngo kurangarijisisa zviro zvavanoita no simba ravanotipa kuti tiite kuda kwavo. Inga muezaniso, patinorangarijisisa ngo pamusoro po zviro zvese zvavakasika, tinoguma pa kuvareremeja maningi kamare ngo kuita zviro zvese izvi. (Nduyo 8:4, 5) Cimwenizve, patinorangarijisisa ngo besero raanotipa Jehovha kuti tiite kuda kwake, tinoguma pa kumureremeja maningi. Zina ro kuti Jehovha, zvokadi kamare rinofanera kureremejwa. Zvinobatanija zvese zvaari, zvese zvaakaita no zvese zvaacazoita.​—Nduyo 89:7, 8.

8. Mukuzwirana na Deuteronòmio 32:2, 3, Jehovha anoda kuti vashandiri vake vaitenyi no zina rake?

⁸ Vaiziraeri vacito vanghwina mu Nyika yo Cipikihwa, Jehovha wakavhunja Mosi kuti atare ndumbo. (Deuteronòmio 31:19) Mosi waizodikanavo kuijijisa Vaiziraeri. (Verenganyi Deuteronòmio 32:2, 3.) Kudari tikarangarijisisa vhesi 2 no yo 3, jinojekesa kuti Jehovha aadi kuti zina rake ritame kuzivika, rivoneke inga kuti arivhiri kunangwa ngokuti rakacena. Iyena anoda kuti zina rake rizivike ngo vandhu vese. Cakava cidakajiso kuno vandhu vakazwaya Mosi ecijijisa ngo pamusoro pa Jehovha no zina rake rakakura! Zvavakajijiswari ndi Mosi zvakavangisa rutendo hwavo no kuvatondhoja inga nvura inobesera muti kuti ikure. Tingava kudini no cokwadi co kuti majijisiro edu ari kuva akadari?

9. Tingabeseresa kudini kucenesa zina ra Jehovha?

⁹ Patinonga tecicumaera muzi ngo muzi kana pa ndau yakawanda vandhu, tingashandisa Bhaibheri redu kuti tikhombije vandhu zina ra Mwari, Jehovha. Tingavapa bhuku ravangadakarira, kuvakhombija vhidhiyo no kuvakhombija zviro zvinowanika mu saiti yedu zvinokuja Jehovha. Patinonga tiri ku basa, kucikora kana patinonga teciita hwendo, tingawana mukana wo kubhuya no vandhu ngo pamusoro pa Mwari ano rudo no zviya zvaari. Tingatovavhunja ngo pamusoro po zviro zvinoshamisa zvinoda kuita Jehovha kwatiri no kuno nyika iyi. Pavanosana kupurukira zviro izvi, vanozwisisa pa vhaza yo kutanga kuti Jehovha anotida maningi. Patinovhunja vamweni cokwadi ngo pamusoro pa Baba vano rudo, tinonga tecibesera kucenesa zina ra Mwari. Tinobesera vandhu kuzwisisa kuti ivona vakajijiswa manyepo ngo pamusoro pake. Zvatingajijisa vandhu ngo pamusoro po Bhaibheri i zviro zvinotondhoja zvavangajija.​—Isaia 65:13, 14.

10. Patinonga teciitisa jijo yo Bhaibheri, ngenyi tinodikana kuita zvizinji kusiyapo kujijisa zvinoda Jehovha no ndhungamiro jake?

¹⁰ Patinonga teciitisa jijo yo Bhaibheri, tinoda kubesera vajiji vedu vo Bhaibheri kuti vazive no kushandisa zina ra Jehovha. Mukuengejera, tinoda kuti ivona vakagume pa kunasa kuziva Jehovha. Kunanga kuti, tingazvikwanirisa, kudari tikapa mbhangiro, ndhungamiro jo umwari no ndhungamiro ngo pamusoro po mufambiro here? Mujiji waushoni angajija ngo mutemo ja Mwari no kujidakarira. Kunanga kuti mujiji, anozwira Jehovha kudari acina rudo naye here? Ceujanyi kuti, Evha waiziva mutemo ja Mwari, asi acaaengepi no rudo hwokadi na Mwari; aticanangi hedu ndi Adhamu. (Genesi 3:1-6) Ngo kudaro, tinodikana kuita zvizinji kusiyapo kujijisa vamweni ngo pamusoro po zvinoda Jehovha no ndhungamiro jake.

11. Patinojijisa ngo pamusoro po mutemo ja Mwari no ndhungamiro jake, tingabeseresa kudini vajiji vedu vo Bhaibheri kuti vade wakaparo mutemo?

¹¹ Mutemo ja Jehovha no ndhungamiro jake,  jinokwevera zve nguva jese jakanaka. (Nduyo 119:97, 111, 112) Vajiji vedu vo Bhaibheri avarangariri kudaro, kudari vacikazwisisi kuti Jehovha wakadira mutemo iji ngokuti anotida. Ngo kudaro, zvaizova zvaushoni kuvhunjisa vajiji vedu kudari: “Ngenyi Jehovha anokumbira kuti vashandiri vake vaite zvakati kana kurambisa zvakati? Izvi zvinotijijisenyi ngo pamusoro pake?” Kudari tikabesera vajiji vedu vo Bhaibheri kuti varangarire ngo pamusoro pa Jehovha no kuva no rudo ku zina rake rakakura, tinonga teciita zvese kuti tibaye mwoyo wavo. Ivona vanozoguma pa kuda mutemo no mundhu wakaparo mutemojo. (Nduyo 119:68) Vanozova no rutendo hwakavanga zve zvinozovabesera kuti vacungirire zvineso zvavanozosongana nazvo.​—1 VaKorinto 3:12-15.

12. Dhavhidhi wakaitenyi kuti mwoyo wake ugume pa kupauka zve ngowapi wakava muviyo wakona?

¹² Mambo Dhavhidhi wakafemehwa kuti atare magama anosisira anowanika pana Nduyo 86:11, anoti: “Ndipenyi mwoyo unopurukira.” Pa upenyu hwake hwese, wakavona kuti zvakareruka maningi kuva no mwoyo ucikapurukiri kana kuti, wakapauka. Pa vhaza imweni, iyena wainga pa nyezuru po nyumba yake zve wakavona mwanakaji ecigeza. Pa nguva iyi, mwoyo wa Dhavhidhi waipurukira kana kuti wainga wakapauka? Iyena waiiziva ndhungamiro ya Jehovha, yokuti: “Ucadoemura [mukaji wo] mudoni wako.” (Exodo 20:17) Asi, zvinovoneka inga kuti iyena wakaemura. Mwoyo wake wakaguma pakupauka, pa kuda kwake Bhati-Sheba no kuda kudakajisa Jehovha. Pikija Dhavhidhi waida maningi Jehovha no kumuthya, iyena wakada kugutisa zvido zvake. Ngo ndava yazvo, Dhavhidhi wakaita zviro zvakashata. Iyena wakaita kuti zina ra Jehovha rishohwe. Wakaitazve kuti vandhu vacina ndava vatambujike, kubatanijavo mbhuri yake.​—2 Samueli 11:1-5, 14-17; 12:7-12.

13. Tinozvizivisa kudini kuti Dhavhidhi wakavazve no mwoyo unopurukira?

¹³ Jehovha wakapangira Dhavhidhi zve wakava no ushamwari naye. (2 Samueli 12:13; Nduyo 51:4-6, 19) Dhavhidhi wakaceuja zvineso zvakavepo ngo kuva kwake no mwoyo wakapauka. Izvi zvinovoneka ngo magama ake anowanika pana Nduyo 86:11, paakati: “Ndipenyi mwoyo unopurukira.” Kunanga kuti Jehovha wakakwanisa kubesera Dhavhidhi kuti ave no mwoyo unopurukira here? Hina, Soko ra Mwari rakazonangira Dhavhidhi inga mundhu ‘wakatevera ngo mwoyo wese Tenji Mwari wake.’​—1 Majimambo 11:4; 15:3.

14. Tinodikana kujiita muvhunjo wapi zve ngenyi?

 ¹⁴ Muezaniso wa Dhavhidhi unotivangisa no kutingwaja. Cishaishi cikuru caakaitari i ngwanjo kuno vashandiri va Jehovha nyamasi uno. Pikija tatanga wari kushandira Jehovha kana taano makore akawanda, tinodikana kujivhunjisa kudari: ‘Ndiri kuita kuti muejo ja Sathana jitame kupausa mwoyo wangu here?’

15. Kuthya Mwari kunotingwaririsa kudini kudari tikada kuvona pikica jinomusijira zvo vatano?

¹⁵ Inga muezaniso, pamunonga mecivona pikica mu Terevhizau kana mu Interneti, jinomusijira zvovatano, zvicinyi zvamaizoita? Zvakareruka maningi kurangarira kuti izvi asipi zvoumitu-mitu. Kunanga kuti Sathana anoshandisa zviro izvi kuti apause mwoyo wenyu here? (2 VaKorinto 2:11) Pikica iyi, ingaezaniswa no hoko yo simbi, inoshandiswa kuitira kumwesa zibindikati ro zimiti. Pakutanga anonghwinisa divi rakatetepa ro hoko kuti ribovore paanokhohomera zimiti riya. Paanokhohomera hoko iya, zimiti rinomweka. Pikica jinomusijira zvo vatano jinoezaniswa no divi rakatetepa ro hoko. Kusota zviro izvi zvinovonekari inga azviviisi ngozi, pa kufamba ko nguva zvinozotiisa kuti tishaishire Jehovha. Ngo kudaro, mucatendera kuti ciri cese cicikasisiri cinghwine mu mwoyo mwenyu. Mwoyo wenyu ucadoparajana kuti uthye zina ra Jehovha.

16. Patinosongana no muejo, tinodikana kujiita muvhunjo japi?

¹⁶ Kusiyapo kushandisa pikica jinomusijira zvo vatano, Sathana anoshandisa zviro zvimweni kuti tiite zvakashata. Maizoitenyi? Zvakareruka kurangarira kuti zviro zvondhozvo azvitozivi kushata. Inga muezaniso, tingatorangarira kudari: “Ahhh, nadha! Andizojinghwi ngo kuita izvi, ngokuti azvizivi kutoshata hazvo.” Murangariro wakadari wakashata maningi. Zvaizova zvaushoni kujivhunjisa kudari: ‘Sathana ari kushandisa muejo uu kuti aparajanise mwoyo wangu here? Kudari ndikaita zvakashata, andicaizoita kuti zina ra Jehovha rishohwe here? Zviro izvi zvaizondiita kuti  ndive phedo na Jehovha kana ndive ndhambo naye?’ Rangarijisisanyi ngo pamusoro po muvhunjo iji. Kumbiranyi Jehovha uzivi kuti munase kudavira muvhunjo iji. (Jakobo 1:5) Kuita zvondhozvo zvaizomujivirira. Zvinozomubesera kuti murambe no kuvanga kwese muejo jamungasongana najo, inga zvakaita Jesu paakati: “Ibvai Sathana.”​—Mateu 4:10.

17. Ngenyi asipi zvaushoni kuva no mwoyo wakapauka? Ipanyi muezaniso.

¹⁷ Asipi zvaushoni kuva no mwoyo wakapauka. Amborangariranyi cikwata cicikazwani co vatambi vo bhora. Vamweni vanoda kujikuja pacavo, vashoma avadi kutamba mukuzwirana no mutemo zve vamweni avareremeji mutungamiriri wo cikwata. Cikwata cakadari acizokwanisi kuwina. Mukusiyana, cikwata cinonga cakabatana cinozobudirira ushoni. Ngo kudaro, mwoyo wenyu waizovavo inga cikwata caizobudirira ushoni, kudari murangariro wenyu, zvido no mazwiro zvakabatana pa kushandira Jehovha. Ceujanyi kuti, Sathana anoda maningi kuparajanisa mwoyo wenyu. Iyena anoda kuti murangariro wenyu, zvido no mazwiro enyu, zvitame kuzwana no ndhungamiro ja Jehovha. Asi mwoyo unodikana kuva wakabatana kuti mukwanise kushandira Jehovha. (Mateu 22:36-38) Mucatendera kuti Sathana apause mwoyo wenyu.

18. Mukuzwirana no magama ari pana MIKEYA 4:5, masunga kuitenyi?

¹⁸ Itanyi mukumbiro kuna Jehovha inga zvakaita Dhavhidhi, paakati: “Ndipenyi mwoyo unopurukira, kuti ndithye zina renyu.” Itanyi zvese zvamunokwanisa kuti mushandise mukumbiro uu mu upenyu hwenyu. Njiku jese, temanyi civaringo cokuti zvese zvamunosunga kuvha pa zvidoko kwenda pa zvikuru, zvikhombije kuti munonasa kureremeja zina rakacena ra Jehovha. Kudari mukazviita, inga umwe wo Zvapupu zva Jehvoha, munozofanera kamare kudanwa ngo zina iri. (Mazwi Akangwara 27:11) Zve tese tinozokwanisavo kunanga zvakanangaya muporofita Mikeya, paakati: “Itisu tinozofamba ngo zina ra Tenji Mwari wedu, mbhera narini, kucikaperi.”​—MIKEYA 4:5.