1. ¿Tlenon kijtosneki tikmojkaitas toTajtsin, niman tleka melak noneki ika akin kitlasojtlaj Jehová ijkon makichiuakan?

AKIN tikchiuaj ken Cristo tiktlasojtlaj toTajtsin, san ika, noijki tikmojkaitaj. Sekimej kinemiliaj ika yejuin xuelis nochiuas pampa kijtouaj ika xuelis tikmojkaitas tlen tiktlasojtla. Ijkuak tikijtouaj ika tikmojkaitaj toTajtsin, xkijtosneki tla melak tikmakajsij, yej kijtosneki ika tejuamej melak tiktlakaitaj. Akin kimojkaitaj toTajtsin xkinekij kiyolkokoskej pampa nochipa kinekij iuan nouikaskej (Sal. 111:10; Prov. 8:13).

2. ¿Tlenon tikitaskej ipan yejuin tlamachtijli?

² (Xpoua Salmo 86:11, TNM). * Ijkuak tikamapouaj yejuin tlajtoltin, tikitaj ika tekiuaj David kimatstoya ika melak noneki tikmojkaitaskej Jehová. Matikitakan kenon uelis tikchiuaskej tlen David okijkuilo. Kachtopa, tikitaskej tleka melak noneki matiktlakaitakan itoka toTajtsin. Sakin, tikitaskej kenon uelis tikteititiskej ipan tonemilis ika tiktlakaitaj itoka toTajtsin.

3. ¿Tlenon okipaleui Moisés nochipa makitlakaita itoka toTajtsin?

³ Matikonnemilikan kenon onomachili Moisés ne ipan tepetl Horeb ijkuak niyantoya ijtik se ueyi tetl tlen tsayanki noso tlapanki katka niman okitak iueyilis Jehová ipan se tlatlachalistli. Ipan Perspicacia para comprender las Escrituras kijtoua ika  tlen ipan onochiuj Moisés melak temojkatlachialti. Moisés okinkak yejuin tlajtoltin tlen kanaj okimijto se iluikaktekitketl: “¡NiJehová! ¡NiJehová! ¡NimoDios yejuan nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua. Miles teuejkakoneuan yejuan tlakatitiuij nikimiknelia, niman nikintlapojpoluilia [...] imintlajtlakoluan” (Éx. 33:17-23; 34:5-7). Kanaj Moisés kilnamikiya yejuin tlen ipan onochiuj ijkuak kitekitiltiaya itoka Jehová. Aman kuajli tikasikamatij tleka Moisés okijli Israel, ikalpan Jehová, ika nonekiya makimojkaitakan “itokatsin toTEKO Dios yejuan sanoyej ueyixtikaj” (Deut. 28:58).

4. ¿Tlenon techpaleuis más matiktlakaitakan Jehová?

⁴ Ijkuak titlanemiliskej itech itoka Jehová, melak kuajli tla titlanemiliaj itech nochi tlen kichiua. Noneki tikilnamikiskej ika yejua melak kojtik, tlamachilise, yolmelajki niman tetlasojtlani. Tla titlanemiliaj itech nochi yejuin niman itech okseki tlen kichiua, techpaleuis más matiktlakaitakan (Sal. 77:11-15).

5, 6. a) ¿Tlenon kijtosneki itoka toTajtsin? b) Ken kijtoua Éxodo 3:13, 14 niman Isaías 64:8, ¿kenon Jehová kichiua itlaj manochiua?

⁵ ¿Tlenon tikmatstokej itech tlen kijtosneki itoka toTajtsin? Miyekej ixtlamatkej kijtouaj ika itoka Jehová kanaj kijtosneki “Yejua Kichiua Manochiua”. Yejuin techilnamiktia ika xitlaj uelis kichiuas ika Jehová maka makichiua tlen kineki niman ika yejua ueli kichiua manochiua itlaj. ¿Kenon ueli kichiua yejuin?

⁶ Matikteneuakan se: yejua nochiua tlen noneki niman ijkon kichiuas tlen yokijto (xpoua Éxodo 3:13, 14). * Ipan toamatlajkuiloluan miyekpa techijliaj ika kuajli tla titlanemiliaj itech tlen Jehová ueli kichiua. Niman xsan yejon, yejua noijki uelis kichiuas ika itekipanojkauan, maski tlajtlakolejkej, manochiuakan tlen noneki niman ijkon makitekichiuilikan niman manochiua tlen yejua kineki (xpoua Isaías 64:8). Ijkon, Jehová kichiua  manochiua tlen yejua kijtoua. Xitlaj uelis kichiuas maka manochiua tlen yejua kineki (Is. 46:10, 11).

7. ¿Tlenon techpaleuis más matikmojkaitakan niman matiktlakaitakan toTajtsin iluikakchane?

⁷ ¿Tlenon techpaleuis más matikmojkaitakan niman matiktlakaitakan toTajtsin iluikakchane? Tla titlanemiliaj itech tlen yokichiuj niman itech tlen yotechpaleui matikchiuakan. Melak timojkatlachiaj ijkuak titlanemiliaj itech tlen yejua yokichijchiuj (Sal. 8:3, 4). Ijkuak titlanemiliaj itech tlen yokichiuj matochiuakan niman ijkon uelis kichiuas tlen yejua kineki, más tiktlakaitaj. Kuajli nesi ika itoka Jehová melak temojkatlachialti. Itokatsin techititia kenon yejua, tlenon yokichiuj niman tlenon kichiuas (Sal. 89:7, 8).

8. Ken kijtoua Deuteronomio 32:2, 3, ¿tlenon kineki Jehová matikchiuakan?

⁸ Ijkuak israelitas kemach kalakiskiaj ipan Tlajli tlen Jehová yokimijlika kinmakas, Jehová okimachti Moisés se tlakuikajli (Deut. 31:19). Niman okinauati Moisés makinmachti israelitas yejuin tlakuikajli (xpoua Deuteronomio 32:2, 3). Ijkuak titlanemiliaj itech yejuin tlaxeloltin, tikitaj ika Jehová xkineki matikiyanakan itoka nion matiknemilikan ika xkinamiki tikteneuaskej pampa melak chipauak. Yejua kineki ika nochimej makixmatikan. Uelis tikijtoskej ika israelitas melak okitlasojkamatkej ijkuak Moisés okinmachti itech Jehová niman itech itoka. Tlen ouelkej yeskia ken atl tlen kichiua kualtsin matlaxoxouixto, kema, yejuin melak okinyolseui niman okinyolchikauj. ¿Kenon uelis tikmatiskej tla ken titemachtiaj noijki teyolseuiya niman teyolchikaua?

9. ¿Kenon titepaleuiyaj manoyekteneua itoka Jehová?

⁹ Ijkuak titenojnotsaskej techajchan noso kampa tojlan, matijkuikan Biblia niman ijkon tikteititiskej ika toTajtsin itoka Jehová. Akin tikinnojnotsaskej uelis tikinmakaskej seki amatlajkuiloltin, uelis tikimititiskej videos niman noijki uelis tikimijliskej makalakikan ipan página tlen tikpiyaj ipan Internet, tlen melak kiueyichiua Jehová. Maski tla tinemiskej kampa titekitij, kampa tomachtiaj noso tla tipaxalojtinemij, nochipa matikitakan akinon uelis tiknojnotsaskej itech toTajtsin, akin melak tiktlasojtlaj. Matikteijlikan tlenon yokijto kichiuas topampa niman ipampa tlaltikpaktli. Miyekej kanaj xkimatij ika Jehová melak techtlasojtla, san ika, uelis kimatiskej tla tejuamej tikinnojnotsaj. Nochipa ijkuak titemachtiaj tlen melauak itech toTajtsin, titepaleuiyaj manoyekteneua itoka niman tikteititiaj ika xmelauak tlen yokijtokej itech. Matikilnamiktokan ika san Biblia uelis kinyolseuis tlaltikpakchanejkej (Is. 65:13, 14).

10. ¿Tleka xsan noneki titemachtiskej itlanauatiluan Jehová?

¹⁰ Ijkuak yakaj tikmachtiaj itech Biblia, tiknekij tikpaleuiskej makixmati itoka toTajtsin niman makitekitilti. San ika, noijki tiknekij melak kuajli makixmati toTajtsin. ¿Uelis kixmatis tla san tikititiaj itlanauatiluan toTajtsin niman nochi tlen yejua kitlajtlani? Kanaj ka. Kanaj akin tikmachtijtokej yokimixmat itlanauatiluan toTajtsin niman hasta yopeuj kintlakaita. San ika ¿kitlakamatis Jehová pampa kitlasojtla? Matikilnamikikan tlen ipan onochiuj Eva. Maski Eva kimatstoya tlen kitlajtlaniya Jehová, yejua xyemelak kitlasojtlaya. Niman Adán noijki xkitlasojtlaya Jehová (Gén. 3:1-6). Yejua ika, xsan noneki titemachtiskej itlanauatiluan Jehová.

11. ¿Kenon uelis tikinpaleuiskej akin tikinmachtiaj Biblia makitlasojtlakan toTajtsin?

¹¹ Itlanauatiluan toTajtsin melak kualtsitsintin niman techpaleuiyaj (Sal. 119:97, 111, 112).  San ika, akin tikmachtiaj xkinpatiojkaitas tla xtikititiaj ika Jehová yotechinmakak itlanauatiluan pampa techtlasojtla. Kuakon, uelis tiktlajtoltiskej: “¿Tejua tlenon tiknemilia? ¿Tleka toTajtsin techijlia tlenon uelis tikchiuaskej niman tlenon ka? ¿Niman tlenon mitsititia yejuin itech Jehová?”. Tla tikpaleuiyaj matlanemili itech Jehová niman makipatiojkaita itokatsin, yejua xsan kintlasojtlas itlanauatiluan, noijki kitlasojtlas toTajtsin (Sal. 119:68). Ijkon, chikauak kipiyas itlaneltokil niman uelis kixikos nochi tlen kixnamikis (1 Cor. 3:12-15).

12. a) ¿Tleka David okichiuj tlen xkinamiki? b) ¿Tlenon opanok pampa ijkon okichiuj?

¹² Melak kuajli tla tikitaj tlen okijkuilo tekiuaj David ipan Salmo 86:11, ompa yejua okijkuilo: “Xsetili noyojlo”. David kuajli okasikamat ika toyojlo uelis nimantsin xeliuis. Se tonajli, nemiya ikuatipan ikal niman okitak se siuatl akin naltijtoya. Yejuin siuatl, akin ikipiaya iueuentsin, itoka katka Bat-Seba. ¿Kenon onkatka iyojlo David? ¿Xeliujtoya noso setitoya? Yejua kixmatiya on tlanauatijli kampa Jehová kijtouaya: “Maka tikeleuis yakaj [...] isiuau” (Éx. 20:17). San ika, David xokikajkauj ika kontlajtlatstoya yejon siuatl. Iyojlo xeliujtoya pampa maski kinekiya kitlakamatis Jehová, noijki kinekiya auilnemis iuan yejon siuatl. Maski David uejkaujtipan yokiteititijka ika kitlasojtlaya niman kitlakaitaya Jehová, okinokauili makiyekana ieleuilis. Ika yejon, okichiuj seki tlemach tlen melak xkuajli. Okichiuj maka kuajli matlajtokan itech Jehová niman miyekej otlajyouijkej, hasta ichanejkauan (2 Sam. 11:1-5, 14-17; 12:7-12).

13. ¿Kenon tikmatij ika David onoyektlali?

¹³ Jehová okimelajkatlali David, niman David oksejpa opeuj kiyolpaktia (2 Sam. 12:13; Sal. 51:2-4, 17). Xkeman okilkauj nochi tlen xkuajli opanok ipampa tlen okichiuj. Tlen okijkuilo David ipan Salmo 86:11 noijki ueliskia ijkin notlajtolkuepas: “Xnechmaka se noyojlo tlen maka maxeliujto”. ¿Okinankili Jehová? Kema. Pampa, sakin, iTlajtol toTajtsin kijtoua ika David okitekichiuili Jehová ika nochi iyojlo (1 Rey. 11:4; 15:3).

14. ¿Tlenon noneki totlajtoltiskej, niman tleka?

¹⁴ Tlen ipan onochiuj David melak techyolchikaua, san ika, noijki techpaleuiya matikasikamatikan ika noneki totlajpiyaskej. Tlajtlakojli tlen okichiuj David noneki techtlanemililtis. Maski tla yotiuejkaujkej noso san kemach yopeuj tiktekichiuiliaj Jehová, noneki matotlajtoltikan: “¿Ninokojtilijtika  niman ijkon xnijkauilis Satanás makixelo noyojlo?”.

15. ¿Kenon uelis techpaleuis tla tikmojkaitaj toTajtsin?

¹⁵ San matikonnemilikan yejuin, ¿tlenon tikchiuaj ijkuak tikitaj ipan televisión noso ipan Internet se tlaixkopinajli noso se película tlen ueliskia kichiuas matiknemilikan tlen xkuajli? Kanaj ueliskia tikijtoskej: “Tlen nikitstika xpornografía”. San ika ¿kanaj Satanás kikuitika yejuin niman ijkon kichiuas matitlajtlakokan? (2 Cor. 2:11). Tlen kitekitiltia Satanás melak teijtlakoua. Yejuin yeskia kentla se hacha tlen se tlakatl ika kitlapana se kojtli. Kachtopa, ika yolik kitsojtsontektiuj yejon kojtli. Niman sakin, yejon kojtli kuajli tlapani. Tlaixkopinaltin tlen kichiuaj matiknemilikan tlen xkuajli, yeskiaj ken se hacha. Kachtopa, kanaj uelis tiknemiliskej ika xtechijtlakoskej, san ika, ika yolik, nochi yejon uelis kixelos toyojlo niman kichiuas matiuetsikan ipan se ueyi tlajtlakojli niman maka matiyolmelajkanemikan. Yejua ika, maka matijkauilikan ika itlaj tsokuiltik makalaki ipan toyojlo. Nochipa matikmojkaitakan itoka Jehová niman maka matijkauilikan maxeliui toyojlo.

16. ¿Tlenon noneki totlajtoltiskej ijkuak tikixnamikiskej se tlatlatalistli?

¹⁶ Satanás xsan kintekitiltia tlaixkopinaltin tlen kichiuaj matiknemilikan tlen xkuajli, yejua noijki kitekitiltia okseki tlemach niman ijkon matitlajtlakokan. ¿Tlenon tikchiuaj ijkuak tikixnamikij se tlatlatalistli? Ueliskia tiknemiliskej ika xueyi tlajtlakojli, kanaj tikijtoskej: “Xnechkixtiskej itech tlanechikojli tla nikchiua yejuin, kuakon, xtlaj tlenon tla nikchiua”. Melak tokajkayaujtoskiaj tla ijkon titlanemiliskiaj. Más kuajli tla totlajtoltiaj: “¿Kikuitika Satanás yejuin tlatlatalistli niman ijkon kichiuas maka ok masetito noyojlo? Tla nikchiua tlen nikileuiya ¿niktsokuilotis itoka Jehová? ¿Nechpaleuis más maniknisiui Jehová, noso kichiuas maniktlalkaui?”. Melak  kuajli tla nochipa titlanemiliaj itech yejuin. Niman ijkuak ijkon tikchiuaskej, matiktlajtlanilikan Jehová matechmaka tlamachilistli niman ijkon maka san no tejuamej tokajkayauaskej (Sant. 1:5). Melak kuajli tonkisaskej tla ijkin tikchiuaj. Ijkuak Satanás kinekis matikchiuakan se tlajtlakojli, uelis tiknankiliskej ijkon ken Jesús okinankili: “¡Xuiya Satanás!” (Mat. 4:10).

17. ¿Tleka tikijtouaj ika xitlaj ika techpaleuis tla xeliujtika toyojlo?

¹⁷ Xitlaj ika techpaleuis tla xeliujtika toyojlo. Matikonnemilikan ika akin nauiltiaj ipan se equipo de futbol xkuajli nouikaj. Sekimej kinekij san yejuamej makinueyiteneuakan, oksekimej xkichiuaj ken kinnauatiaj niman oksekimej xkitlakaitaj akin kinmajmachtia. Tla se equipo ijkin kichiua, kanaj xtetlanis ijkuak nauiltis imiuan oksekimej. San ika, xijkon panos tla akin nemij ipan se equipo kuajli nouikaj. Toyojlo noijki uelis onias ken yejuin equipo. Tla tiknekij ijkin mapano, nochipa noneki titlanemiliskej ipan tlen Jehová kitlajtlani niman san yejon tiknekiskej tikchiuaskej. Matikilnamikikan ika Satanás kuelitaskia maxeliui toyojlo. Yejua kinekiskia matikchiuakan tlen tikileuiyaj niman maka matiktlakamatikan toTajtsin. Tla tiknekij tiktekichiuiliskej Jehová, noneki setitos toyojlo (Mat. 22:36-38). Maka keman matijkauilikan Satanás makixelo toyojlo.

18. Itech tlen kijtoua Miqueas 4:5, ¿tlenon yotikijto tikchiuas?

¹⁸ Ijkon ken David, noijki matikijlikan Jehová: “Xsetili noyojlo niman ijkon makimojkaita motoka”. Matokojtilikan tikchiuaskej tlen kijtoua yejuin teoyotl. Nochipa matiktlapejpenikan tlen kuajli niman ijkon manesi ika tiktlakaitaj itoka toTajtsin, tlen melak chipauak. Tla ijkon tikchiuaj, tikteititiskej ika yemelak tiiteixpantijkauan Jehová (Prov. 27:11). Niman tinochimej uelis tikijtoskej ijkon ken teotlajtoketl Miqueas: “Tejuamej tikistinemiskej nochipa ika itokayo toTajtsin Jehová” (Miq. 4:5, TNM).