1. Anto so takot ed Dios, tan akin ya importante itan no inaro tayoy Jehova?

INAR-ARO tayoy Dios tan walay takot tayod sikato. Singa mankontraan awa? Balet say tutukoyen tayon takot et aliwan samay naliliknam no mankebbiew ka. Pantongtongan tayo so espisyal ya klase na takot​—say takot ed Dios. No say sakey ya too et walay takot to ed Dios, rerespetoen to tan igagalang ton maong si Aman Jehova. Agto labay ya nasakitan pian agnaderal so pankakaaro da.​—Sal. 111:10; Pro. 8:13.

2. Anto ray pantongtongan tayo ed sayan artikulo ya akabase ed samay pikakasi nen Arin David diad Salmo 86:11?

² Basaen so Salmo 86:11. Nanengneng tayo ed sayan pikakasi nen Arin David ya natatalosan to no akin ya importante so itakot ed Dios. Pantongtongan tayo no panon tayon niyaplika iyan imbaga nen David. Unona, aralen tayo so pigaran rason akin et nepeg tayon respetoen so ngaran na Dios. Komadua, pantongtongan tayo no anto ray nepeg tayon gawaen pian nipanengneng tayod kabibilay tayo ya rerespetoen tayo so ngaran na Dios.

3. Antoy agawa ed bilay nen Moises ya lapud satan et balbaleg so respeto to ed ngaran nen Jehova?

³ Isip mo pay alikna nen Moises nen sikatoy sinmeksek ed letak na angkakabaleg a bato tan anengneng to ya dinmalan ed arapan to so gloria nen Jehova. Makapadinayew itan ya naeksperiensya nen Moises! Arengel ton mismo irayan salita ya nayarin imbaga na sakey ya anghel: “Jehova, Jehova, a Dios a mapangasi tan maabagey, matantan a manpasnok tan abalbaleg ed  matoor a panangaro tan katuaan, a mangipapatnag na matoor a panangaro ed saray nilibo, mameperdona na impakalingo, impakasumlang, tan kasalanan.” (Exo. 33:17-23; 34:5-7) Seguradon nanonotan nen Moises iyan agawad bilay to kada no bitlaen to so ngaran nen Jehova. Kampegan anggano linmabas lay dakel ya taon et binagaan to ray Israelita ya nepeg dan “takotan iyan magloria tan makapadinayew a ngaran.”​—Deu. 28:58.

4. Antoy gawaen tayo pian mas respetoen tayoy Jehova?

⁴ Kada no naisip tayo so ngaran ya Jehova, maabig no dalepdepen tayo so personalidad na samay akan-ngaran ed satan. Nonoten tayo no panon ton ipapanengneng so pakayari, karunongan, hustisya, tan panangaro to. No lanang tayon iisipen iratan pati saray arum nin balibalin ugali to, mas respetoen tayo.​—Sal. 77:11-15.

5-6. (a) Antoy kabaliksan na ngaran na Dios? (b) Base ed Exodo 3:13, 14 tan Isaias 64:8, antoy gagawaen nen Jehova pian nasumpal so gagala to?

⁵ Antoy kabaliksan na ngaran na Dios? Ibabaga na dakel ya scholar ya say ngaran ya Jehova et mankabaliksan na “Pagmamaliwen To.” Labay ton ibaga, sarag nen Jehova ya gawaen so amin ya labay ton gawaen. Akin?

⁶ Nagawaan nen Jehova so amin ya labay to ta sarag toy magmaliw ed antokaman ya nakaukolan pian nasumpal so gagala to. (Basaen so Exodo 3:13, 14.) Lanang itayon nabibilin ya dalepdepen tayo itan ya makapabilib ya abilidad na Dios. Tan anggan saray agperpekton lingkor to et sarag ton pagmaliwen ed antokaman ya nakaukolan pian makapanlingkor irad sikato tan nasumpal so gagala to. (Basaen so Isaias 64:8.) Lapud sayan abilidad nen Jehova, nasusumpal so amin ya panlabayan to, tan anggapoy makapanpatunda ed sikato.​—Isa. 46:10, 11.

7. Antoy gawaen tayo pian lalo tayon napabli tan narespeto si Aman Jehova?

⁷ Lalo tayon napabli tan narespeto si Aman Jehova no dalepdepen tayoy amin ya ginawa to tan no panon to itayon tutulongan. Singa bilang, no dalepdepen tayo iray makapakelkelaw ya pinalsa to, talagan panbiliban tayoy Jehova ed karakel na ginawa to. (Sal.  8:3, 4) Tan seguradon onaralem so respeto tayod si Jehova no dalepdepen tayo no panon to tayon tutulongan pian tuloytuloy tayon makapanlingkor ed sikato. Talagan makapadinayew so ngaran nen Jehova! Napatnagan ed satan no anton klase na Ama si Jehova, no anto ray ginawa to, tan no anto ni ray gawaen to.​—Sal. 89:7, 8.

8. Base ed Deuteronomio 32:2, 3, antoy labay nen Jehova ya gawaen na saray lingkor to?

⁸ Antis ya onloob iray Israelita ed Insipan a Dalin, impaisulat nen Jehova ed si Moises so liriko na sakey a kansion. (Deu. 31:19) Tan ingganggan nen Jehova si Moises ya ibangat to itan ed saray totoo. (Basaen so Deuteronomio 32:2, 3.) No dalepdepen tayo so bersikulo 2 tan 3, mapatpatnag ya aglabay nen Jehova ya isekreto so ngaran to, ya singa samay ibabaga na arum ya agnayari kunon ibalikas itan ta sagrado. Labalabay nen Jehova ya naamtaan na amin so ngaran to! Pribilehyo na saray Israelita ya naamtaan iray katuaan nipaakar ed si Jehova tan ed maglorian ngaran to diad sayan kansion ya imbangat nen Moises ed sikara. Binmiskeg so pananisia ra ed saratan ya katuaan, singa iratan uran ya manasalog ed tanaman. Antoy gawaen tayo pian say panagbangat tayo et mamabiskeg met ed pananisia na arum?

9. Antoy gawaen tayo pian makatulong tayo ed pamasanto ed ngaran nen Jehova?

⁹ No manpupulong tayo ed kaabungan odino diad publiko iran lugar, usaren tayoy Biblia pian ipanengneng tayod saray totoo ya say ngaran na Dios et Jehova. Ipanengneng tayo met ed sikara iray balibalin publikasyon, video, tan artikulo ed website tayo pian nakabat day Jehova. Diad trabaho, eskuelaan, odino legan tayon manbiabiahe, manggawa tayoy paraan pian nitongtong tayod arum so nipaakar ed maar-aron Dios tayo tan saray balibalin ugali to. Ibaga tayod sikara iray gawaen nen Jehova parad saray totoo tan say ipaparaan ton Paraison dalin. Ompan first time dan narengel itan, tan lapud satan et natalosan da ya maar-aro so Dios. No ontan so gawaen tayo, makakatulong tayo pian napasanto so ngaran nen Jehova. Napapaneknekan tayo ya tila tan panagderal labat so ibabangat na arum nipaakar ed sikato. No naamtaan na totoo irayan katuaan, ombiskeg so pananisia ra tan magmaliw iran maliket.​—Isa. 65:13, 14.

10. No mangiyaaral tayoy Biblia, akin et kulang so basta labat pangibangat ed saray ganggan na Dios?

¹⁰ Importante ya tulongan tayo ray iyaaralan tayo ya kabaten day Jehova tan usaren day ngaran to. Labay tayon natalo-talosan da so personalidad nen Jehova. Agtayo itan nagawaan no basta tayo labat ibangat ed sikara iray bilin to, ganggan to, tan no anto ray duga tan aliwa ed pakanengneng to. No marunong so iyaaralan tayo, nayarin nakabisado to iray ganggan na Dios tan ompan pambiliban to ni ingen iratan. Balet kasin unoren toy Jehova lapud inar-aro to? Tandaan, kabisado nen Eva imay ganggan na Dios balet agto inunor so Dios ta agton talaga inaro. Ontan met nen Adan. (Gen. 3:1-6) Kanian kulang so basta pangibangat labat ed saray ganggan tan estandarte na Dios.

11. Sano ibabangat tayo iray ganggan tan estandarte na Dios, panon tayon natulongan iray iyaaralan tayo ya aroen day Dios?

¹¹ Saray ganggan tan estandarte nen Jehova et parad pankaabigan tayo lanlamang. (Sal. 119:97, 111, 112) Balet ompan ag-itan naisip na saray iyaaralan tayo no agda natatalosan ya inter nen Jehova iratan ya ganggan lapud inar-aro to tayo. Kanian no iyaaralan tayo so sakey, maabig no tepetan tayo: “Parad sika, akin kasi et oniay ipapagawa na Dios ed saray lingkor to?  Akin kasi et ibabawal to iya? Antoy naaralan mod satan nipaakar ed si Jehova?” No tulongan tayo ray iyaaralan tayo ya isipen day Jehova diad amin ya gagawaen da tan ar-aroen day ngaran to, seguradon nasabi tayoy puso ra. Agda labat aroen imay mismon ganggan noagta aroen da imay angiter na ganggan. (Sal. 119:68) Seguradon ombiskeg so pananisia ra tan nasarag da so anggan anton subok.​—1 Cor. 3:12-15.

12. Akin et naapag so puso nen David, tan antoy resulta?

¹² Imanoen tayo iyan importantin kabiangan na pikakasi nen Arin David ya impaisulat nen Jehova diad Salmo 86:11: “Iyapasakey mo pay pusok.” Apaneknekan ya mismo nen David ya matmainomay ya naapag so puso. Aminsan, nen sikatoy walad atep na abung to, anengneng ton manaames si Bat-sheba ya asawa nen Urias. Anto kasi gawaen nen David? Kasin niyapasakey so puso to? Amta to imay ganggan na Dios ya: “Agmo pampipilalekan so asawa na kaparam a too.” (Exo. 20:17) Balet anggano amta to itan, agto tinundaan ya ninengneng si Bat-sheba. Naapag so puso to. Anggano labay ton paliketey Jehova, pinilalek to nin siansia si Bat-sheba. Tua, dakel a taon ya inar-aro tan tatakotan nen David si Jehova. Balet diad saman et mas inyuna toy pamaliket ed sarili to. Kanian akagaway seryoson kasalanan tan angiter na kabalawan ed ngaran nen Jehova. Adamay met iray inosentin totoo, pati say mismon pamilya to.​—2 Sam. 11:1-5, 14-17; 12:7-12.

13. Antoy paneknek ya nagmaliw lamet a kompleto so puso nen David?

¹³ Dinisiplina nen Jehova si David, tan apapawil toy maapit ya relasyon tod si Jehova. (2 Sam. 12:13; Sal. 51:2-4, 17) Naaralan nen David ya no abuloyan ton naapag so puso to, manresulta itan ed problema. Amay pikakasi to diad Salmo 86:11 et nayari met ya ipatalos ya: “Ikdan mo ak pay agnaapag a puso.” Kasin tinulongan nen Jehova si David pian magmaliw ya agnaapag odino kompleto so puso to? On, ta diad kalabas na dakel a taon et adeskribe si David ya “matoor so puso to ed si Jehova a Dios to.”​—1 Ara. 11:4; 15:3.

14. Antoy itepet tayod sarili tayo, tan akin?

¹⁴ Diad sayan agawa ed bilay nen David, naaralan tayo ya tutulongan nen Jehova iray lingkor to pian magmaliw ya kompleto so puso ra. Balet pasakbay met iya ed saray lingkor na Dios natan​—ya anggan siopa et nayarin natukson manggaway seryoson kasalanan. Kanian anggano abayag tayo lan manlilingkor ed si Jehova odino balo tayo nid katuaan, tepetan  tayoy sarili tayo, ‘Kasin gagawaen koy anggaay nayarian ko pian anggan antoy gawaen nen Satanas et agnaapag so pusok?’

15. Panon ya makatulong so takot ed Jehova pian agtayo natukson onnengneng ed saray bastos ya litrato odino eksena?

¹⁵ Panon to no walay nanengneng mon eksena ed TV odino litrato ed Internet ya pannonoten to kay imoral, antoy gawaen mo? Ompan irason mo ya aliwa met ya mauges ta aliwan masyadon bastos. Balet nayarin usaren itan nen Satanas pian naapag odino napaldua so pusom. (2 Cor. 2:11) Satan ya eksena odino litrato et singa wasay. Di ba no manbelang so sakey ya too, diad unaan et isali to nin ikena may tarem na wasay diman ed kiew. Insan to la pasyaen so pangibasig to ed samay wasay ya anggad napaldua imay kiew. Ontan met ed saray malaswan litrato odino eksena. Ompan isipen na sakey ya aliwa met itan ya masyadon bastos, balet ompan atan so usaren nen Satanas pian naapag so puso to, ya anggad makagawa lay seryoson kasalanan. Kanian agka ompapayag ya walay anggan melag ya mauges ya onloob ed pusom! Gawam so anggaay nayarian mon takotan si Jehova ed interon pusom!

16. No natutukso tayon manggaway mauges, anto ray nepeg tayon itepet ed sarili tayo?

¹⁶ Aliwa labat ya malaswa iran litrato tan eksena so uusaren nen Satanas. Dakdakel ni uusaren to pian natukso tayon manggaway mauges. Tan ompan irason tayo: ‘Ayos labat ta agak met nadispelo ed saya.’ Delikado no ontan so irason tayo. Mas duga no oniay isipen tayo: ‘Agkasi uusaren iya nen Satanas pian naapag so pusok? No manpatukso ak, di nabalaw so ngaran nen Jehova? No gawaen ko iya, kasin onapit ak ed Dios odino onarawi ed sikato?’ Dalepdep mo iratan ya tepet. Ipikasim ed si Jehova ya ikdan to kay karunongan pian agka manbaraan tan agmo lokoey  sarilim. (Sant. 1:5) No ontan so gawaen mo, agka bastabasta natukso nen Satanas. Sarasarag mon ipulisay iray tukso ya singa ginawa nen Jesus nen imbaga ton: “Arawi ka, Satanas!”​—Mat. 4:10.

17. Akin et aliway pansumpalan tayo no naapag so puso tayo? Mangiter na alimbawa.

¹⁷ Aliway pansumpalan tayo no naapag so puso tayo. Isip mo pa so sakey ya sports team ya saray membro to et anggapoy pankakasakey da. Say arum ed sikara et pasikat. Say arum et agda labay ya unoren so rules. Tan say arum et balaw-balawen day coach da. No ontan so sakey ya team, seguradon ag-ira manalo. Balet no saray kaibad team et walay pankakasakey da, manalo ira. Say pusom et singa satan ya team no say iisipen, pipilaleken, tan naliliknam et niyapasakey ed panaglingkor ed si Jehova. Tandaan, labalabay nen Satanas ya palduaen so pusom. Labay to ya saray iisipen, pipilaleken, tan naliliknam et kontra ed panlabayan nen Jehova. Balet nonot mo ya say aawaten labat nen Jehova et interon puso ya panaglingkor. (Mat. 22:36-38) Agka sirin ompapayag ya palduaen nen Satanas so pusom!

18. Base ed Miqueas 4:5, antoy determinadom ya gawaen?

¹⁸ Kanian alig moy David. Ipikasim met ed si Jehova: “Iyapasakey mo pay pusok ya ontakot ed ngaran mo.” Komon ta diad inagew-agew et ipanengneng mo ya tatakotan moy Jehova ed interon pusom. Diad saray desisyon mo, melag man itan odino baleg, ipanengneng mo ya talagan rerespetoen moy masanton ngaran to. No ontan so gawaen mo, bilang sakey ya Tasi nen Jehova et makakatulong ka pian napasanto so ngaran to. (Pro. 27:11) Tan nibagam met imay imbaga nen propetan Miqueas: “Manakar itayo ed ngaran nen Jehova a Dios tayo ed anggad angga.”​—Miq. 4:5.