1. Ngera omeluu er a Dios, e ngera me ngklou a ultutelel el kirir tirke el betik a rengrir er ngii?

A REKRISTIANO a betik a rengrir er a Dios, e dirrek el meluu er ngii. Ngar tia el suobel, e kede mo mesaod er a klungel a ultutelel a doluu er a Dios. Engdi tiang ngera belkul? A rechad el meluu er a Dios a oba dmolech el omengull el kirel. Ngdiak el sorir el tomellii a rengul a Demerir el ngar er a eanged, e letemellii a klausechelei er tir lobengkel.​—Psa. 111:10; Osi. 8:13.

2. A doltirakl a tekingel a King David el ngar er a Psalm 86:11, NW, e ngera eru el tekoi el bo dosaod?

² Monguiu er a Psalm 86:11, NW. * Sel molatk aika el tekoi e ngsebechem el mesa el kmo a King David a mle medengelii a klungel a ultutelel a omeluu er a Dios. Ka me dosaod a rolel e ngsebeched el oltaut aika el mlukreng el tekingel. A kot, e kede mo merriter a bebil uchul e ngkired el olecholt er a klou el omengull el kirel a ngklel a Dios. E a ongerung, e kede mo mesaod er a rolel a dolecholt a omengull el kirel a ngklel a Dios er a klengar er kid er a bek el sils.

3. Ngera ngilsuir a Moses me lolemolem loba dmolech el omengull el kirel a ngklel a Dios?

³ Ka molatk er a uldesuel a Moses er a lengar er a chelsel a teliud el risois e lesa ues el kirel a klebkellel a Jehovah el engelakl  er ngii. Tiang a locha mle kot el mengasireng el tekoi el mla duubech el mora chad! A Moses a rirengesii a anghel el melekoi el kmo: “Ngak ngii el RUBAK el Dios el mui er a blekokuii ma klechubechub, el diak le mereched el ngmasech a renguk, e olecholt er a blechoel bltikerreng ma blakerreng. Ak ultaut er a telbilek el mor a re betok el telael el chad e ousubes a chelebirukel, ma teluchakl, ma klengit.” (Exo. 33:17-23; 34:5-7) Me nglocha mo lotkii tia el tekoi sel ta el lousbech er a ngakl el Jehovah. Sei a uchul me a uriul e ngulemeklatk er a rechedal a Dios me bo ‘longull er a kebkall e mengasireng el ngklel.’​—Dut. 28:58.

4. Ngera el blekeradel a dolebedebek e ngrullid el moba klou el omengull el mora Jehovah?

⁴ Me sel dolatk er tia el ngakl el Jehovah, e dolebedebek er ngike el oungakl er tia el ngakl. Ngkired el melatk a blekerdelel el ua klisichel, llemesel a rengul, llemeltel me a bltkil a rengul. A dolebedebek aikang me a lmuut el bebil el blekerdelel e ngrullid el moba klou el omengull el mo er ngii.​—Psa. 77:11-15.

5-6. (a) Ngera belkul a ngklel a Dios? (b) A doltirakl er a Exodus 3:13, 14 me a Isaia 64:8, e ngokiu a ngera el rolel e a Jehovah a kutmokl a tekoi?

⁵ Ngera klemedengei er kid er a belkul a ngklel a Dios? A rebetok el chellimosk a kongei el kmo a ngakl el Jehovah a belkul a kmo “Mo Ngii Di el Ngerang.” Tia mekltkid el kmo ngdiak a ngera el sebechel torebengii a moktek er a Jehovah, e ngii a sebechel el lomekdubech a tekoi. El okiu a ngera el rolel?

⁶ A Jehovah a sebechel mo ngii di el ngerang el mo otutii a moktek er ngii. (Monguiu er a Exodus 3:13, 14.) * Kede blechoel el muchelechel el mo melebedebek el kirel tia el mengasireng el blekerdelel a Dios. A Jehovah a dirrek el sebechel rulleterir a rediak lemecherrungel el mesiungel el mo ngii di el ngerang el mo mesiou er ngii e oltaut er a moktek er ngii. (Monguiu er a Isaia 64:8.) Ngoeak aika el rolel, e a Jehovah a oltaut er a moktek er ngii. Ngdiak a ngerang el sebechel  torebengii me lak lotutii a moktek er ngii.​—Isa. 46:10, 11.

7. Ngmekera debekurulii a omereng el saul er kid el mora Demad el ngar er a eanged?

⁷ Ngsebeched el mekurulii a omereng el saul el mora Demad el ngar er a eanged sel dolebedebek aike el tekoi el bla leruul me aike el lebla lerellid el mo meruul. El ua tiang, sel dolebedebek el kirel a blebelel, e ngmeral mo mechas a rengud er aike el rokui el bla lebeob. (Psa. 8:3, 4) E sel dolebedebek aike el bla lerellid el mo meruul me dotutii a moktek er ngii, e ngmekurulii a omengull er kid el mo er ngii. Me a ngakl el Jehovah a mera el mengasireng! Nguldimukl er ngii a rokui el blekerdelel a Demad, me aike el bla leruul, me aike el dirk bo loruul.​—Psa. 89:7, 8.

8. A Duteronomi 32:2, 3, ngera ngochotii el kirel a osengel a Jehovah er a ngklel?

⁸ A uchei er a lsiseb er a Beluu er a Nglat a rechad er a Israel, e a Jehovah a ulsisecheklii a Moses a tekoi er a ta el chelitakl. (Dut. 31:19) E a Moses a ulsisecheklterir a rechad. (Monguiu er a Duteronomi 32:2, 3.) Me sel dolebedebek er a 2 me a 3 el kekerei el bades, e ngbleketakl el kmo a Dios a diak el soal a leblart a ngklel, el ua lsal chedaol me ngdiak el kirel medung. Ngbai soal a rokui el chad a bo lodengelii a ngklel! Ngmera el ileakl el techall el mle sebechir a rechad el mosisechakl er a Moses el kirel a Jehovah me a kebkall el ngklel! Aike el lullisechakl a millisiich er tir, el di ua chull el remuul a dellomel el mo ungil a dbechel. Kede mekera remuul a osisechekled el mo uaisei?

9. Ngmekera dolengeseu el mengedaol er a ngklel a Jehovah?

⁹ Me sel doldingel a obliil me a lechub e kede ousioning er a buai, e ngsebeched el ousbech er a Biblia el olecholt er a ngklel a Dios el Jehovah. Ngsebeched el mesterir a rechad a klebokel el babier, me a kmal ungil video me aike el ngar er a website er kid el mengebkall er a Jehovah. E a dengar er a ureor, skuul, me a lechub a omerael, e nglocha mo er ngii a techelled el mesaod el kirel a betik a rengul Dios er kid me a blekerdelel. Me sel douchais er a moktek er a Jehovah el kired a rechad me tia el chutem, e te mo melechesuar el kmo a Jehovah a betik a rengul er kid. E sel douchais a klemerang el kirel a betik a rengul Demad, e kede olengeseu el mengedaol er a ngklel. Me kede meketakl a bebil el blulak me a otuub el kirel a Jehovah el bla lemosisechakl er ngii a rechad. Aike el dolisechakl er tir er a Biblia a kmal sebechel melisiich e mengelaod er tir.​—Isa. 65:13, 14.

10. Sel dosuub a Biblia lobengterir a rechad, e ngera me ngdiak el sebeched el di osisecheklterir a llechul a Dios e lemerekong?

¹⁰ Sel dosuub a Biblia lobengterir a rechad, e ngsoad el ngosuterir el mo medengelii a ngklel a Jehovah e mo ousbech er ngii. Ngsoad el ngosuterir el kmal mo ungil medengelii a Jehovah. Tiang ngsebechel meketmokl a lsekum te di mo medengei a llechul a Jehovah? A chad a sebechel suub e mo soal a llechul a Dios. Engdi, ngika ngmo olengesenges er a Jehovah e le ngbetik a rengul er Ngii? A Eva a mle medengei llechul a Dios engdi ngdimlak lemera el betik a rengul er Ngii, me a Adam me ngmle uaisei. (Gen. 3:1-6) Me ngdiak el sebeched el di osisecheklterir a melemalt el llechul a Dios e lemerekong.

11. Sel dolisechakl a llechul a Dios el mo er tirke el dosuub lobengterir, e ngmekera dengesuterir el mo betik a rengrir er Ngike el omeskid a llach?

¹¹ A llechul a Jehovah a mo uchul a klungioled. (Psa. 119:97, 111, 112) Engdi tirke el dosuub lobengterir a locha diak lomdasu el uaisei,  e le ngdiak lodengei el kmo a Jehovah a riruul aika el llach e le ngbetik a rengul er kid. Me ngsebeched loker er tir el kmo: “Ngera me a Dios a olengit er a remesiungel el mo meruul er a ta el tekoi e olekebai er tir er a kuk tang? Tiang ngera ngouchais el kirel a Dios er kid?” Sel dengesuterir el mo melatk er a Jehovah e lomekeroul er a mera el bltikerreng el kirel a kebkall el ngklel, e ngmo sebeched el remutech a rengrir. Seikid e ngmo betik a rengrir er aika el llach me Ngike el ulemesterir aika el llach. (Psa. 119:68) Ngmukeroul a klaumerang er tir e mo sebechir el outekangel a meringel el omelsemai.​—1 Ko. 3:12-15.

12. Ngera rirellii a David el mo teloadel a rengul, e ngera mlo rsel?

¹² A klou a ultutelel el tekoi el ngar er a Psalm 86:11, NW, a kmo “mcherrengelii a renguk.” A King David a mlukreng el mo meluches aika el tekoi. Ngar er a klengar er ngii, e ngmilsa el kmo ngkmal beot a bo el teloadel a rengud. A ta el taem e ngmla er a chedoel a blil e milsa bechil a chad el melecholb. Me tiaikid el taem, ngmle cherrungel me a lechub e ngteloadel a rengul? Ngmle medengelii a llechul a Jehovah el kmo: “Lak bo mngibes er a bechil” a chad. (Exo. 20:17) Engdi ngdi millemolem el omes me ngmlo teloadel a rengul. Ngmlo nguibes er a Bathseba e dirrek el mle soal lodeuir a rengul a Jehovah. Me alta ngmle kemanget el taem el lebetik a rengul er a Jehovah e meluu er ngii, engdi ngdi mlo melatk er a ngelbesel a rengul. Seikid e ngmlo remuul a kmal mekngit el tekoi. Ngultubii a ngklel a Jehovah. E dirrek el mlo uchul a kerior el mora rediak a telemellir, el uldimukl er a telungalek er ngii.​—2 Sa. 11:1-5, 14-17; 12:7-12.

13. Kede mekera medengei el kmo a David a liluut el mo cherrungel a rengul?

¹³ A Jehovah a milellach er a David, me ngliluut el mo ungil a deleuill er tir. (2 Sa. 12:13; Psa. 51:2-4, 17) A David a dimlak lobes er a tellemall me a ringel el mlo er ngii e le ngmlo teloadel a rengul. Me a tekingel el ngar er a Psalm 86:11, NW a sebechel moiuid el kmo: “Mrellii a renguk el mo cherrungel.” Me a Jehovah, ngilsuir a David el mo cherrungel a rengul? Nguaisei, e le uriul e a Tekingel el kirel a David a kmo ngchad el mle “cherrungel a rengul el mor a RUBAK el Dios er ngii.”​—1 Ki. 15:3; 11:4.

14. Ngera el ker a kired el di kid loker, e ngera uchul?

¹⁴ A kerebil a David a melisiich e dirrek el omeklatk er kid. A rebetel er a oberaod el klengit a omeklatk er a remesiungel a Dios  er chelecha el taem. Me alta kede dirk mlo mesiou me a lechub e kede mla mesiou er a Jehovah el kemanget el taem, engdi ngkired el di kid loker el kmo, ‘Ngak ak ultngakl aike el lousbech a Satan el meruul er ngak el mo teloadel a renguk?’

15. Ngmekera omeluu er a Dios e omekerreu er kid sel deues a siasing el melisiich a ngibes?

¹⁵ El ua tiang, a lsekum ke mesa siasing er a TV me a lechub a Internet el melisiich a ngibes, e ke mo mekerang? Ngbeot er kau el mo omdasu el kmo tia el siasing me a lechub a mubi a diak el siasing er a remeau. Engdi a Satan, ngsebechel lousbech er ngii el rullau el mo teloadel a rengum? (2 Ko. 2:11) Sel siasing a di ua otilech el lousbech er ngii a chad el omachel a kerrekar. Me a kot e ngousbech er sel kedorm el medal el oltuu er ngii er a kerrekar. E a cherengel a taem el lomachel er a kerrekar e ngmetiud er a belngel. Me a siasing el melisiich a ngibes ngsebechel mo uai sel kedorm el medal a otilech? A domes a mekekerei el tekoi el ua lak a telemellel e ngsebechel rullii a chad el mo meruul a klengit me ngmo teloadel a rengul, e metemall a blakerreng er ngii el mora Jehovah. Me lak mkengei a diak lungil tekoi me lsiseb er a rengum! Mcherrengelii a rengum el mo meluu er a ngklel a Jehovah!

16. Sel bo dechebangel a ongetikaik, e ngera el ker a kired el di kid loker?

¹⁶ A Satan a dirrek el ousbech a lmuut el bebil er a tekoi el mengetikaik er kid el mo meruul a mekngit. Me kede mo mekerang? Ngbeot er kid el mo omdasu el kmo aika diak el mekngit. El ua tiang, kede locha omdasu el kmo: ‘Tia kurruul er ngii e ngdiak bo lemesuld a ngklek, me ngua lak loberaod el tekoi.’ Engdi tia kmal cheleuid el uldasu. Ngbai ungil a di lekid el oker el kmo: ‘A Satan ngmelasem el ousbech er tiang el rullak el mo teloadel a renguk? A lsekum ak mechetikaik, e ak mo otubii a ngklel a Jehovah? Tia el omeruul, ngrullak  el mo kmeed er a Dios me a lechub e ngrullak el mo cheroid er ngii?’ Molebedebek aika el ker. E moluluuch el olengit a llomeserreng me bo mungil longer, e lak di lekau el mengeblad er kau. (Jak. 1:5) A omoruul uaisei, e ngmo omekerreu er kau. Ngmo ngosukau el mo oltngakl a ongetikaik, el di ua Jesus er a ledu el kmo: “Mcheridau e Satan!”​—Mt. 4:10.

17. Ngera uchul me ngdiak lungil a leteloadel a rengud? Momekesiu.

¹⁷ Ngdiak lungil a leteloadel a rengud. Ka molatk er a team el rechad er ngii a diak lungil a delongelir. A rebebil a di sorir a chetengakl, me a rekuk diak el sorir loltirakl a llechul a klekool, me a rediak lolecholt a omengull el mora coach. A chouaisei el team a diak el sebechel el mo mesisiich. Engdi a team el ta rengrir a ulterekokl el mo ungil. A rengum a sebechel el mo uai sel ungil team a lsekum a uldesuem, me a urungulem me aike el tekoi el momelechesiu a dmak el churrengelii a omesiungem el mora Jehovah. Lak mobes el kmo a Satan a soal rullau el mo teloadel a rengum. Ngsoal a uldesuem, me a urungulem, me aike el tekoi el momelechesiu a bo el ketouch ngii me a llechul a Jehovah. Engdi kau a kirel mo cherrungel a rengum el ngar er a omesiungem el mora Jehovah. (Mt. 22:36-38) Me lak becherei a Satan me lerellau el mo teloadel a rengum!

18. A doltirakl er a Mika 4:5, NW, e ngera soam el mo meruul er ngii?

¹⁸ Moluluuch el mora Jehovah el ua David el dilu el kmo: “Mcherrengelii a renguk el mo meluu er a ngklem.” Moruul aike el rokui el sebechem el mo otireklii tia el nglunguuch. A bek el sils, e bo lulterekokl a rengum el kmo a omelilt el moruul, a lemeklou me a lemekekerei, a ochotii a dmolech el omengull er kau el kirel a ngklel a Jehovah. Me sel moruul uaisei, e ke mo odengesii tia el ngakl e le kau el ta er a Sioning er a Jehovah. (Osi. 27:11) Me seikid e ngmo sebeched el rokui el melekoi a tekingel a profet Mika el kmo: “Kid a mo merael el oltirakl er a ngklel a Jehovah el Dios er kid el mo cherechar.”​—Mik. 4:5, NW.