1. Woma wa Nzambi udi itshi, nu mukunda natshi woma wene udi nu ndando gudi athu ana zumba Yehowa?

AKLISTO ana zumba Nzambi, nu ana gumuvuila nji woma. Athu ako ana kotelesago ndaga yene. Uvi tushigo muzuelela woma muthu gana guvua gula adi mutshigina gumutshita gubola. Tudi muzuelela woma wa luholo luko. Athu ana khala nu woma wa luholo elu, ana gunemesa diago Nzambi nu mutshima wawo wagasue. Ana tshigina ndo guhana Sh’awo wa mu dilu gikenene, handaga ana tuna gubolesa ufuta wawo n’enji.—Ngi. 111:10; Ish. 8:13.

2. Ha gutadila mbimbi jia fumu Davidi jidi mu Ngimbo 86:11, ndaga jitshi mbadi tuza muzuelela?

² Tanga Ngimbo 86:11, NWT. Gula watangiza mbimbi eji, mbawudi mujiya diago egi Davidi wakotelesele egi guvuila Nzambi woma gudi nu ndando. Tutadilenu luholo tuajiya gukadigila mbimbi eji jia Davidi. Thomo, tuza mumona mukunda natshi tudi naye gunemesa jina dia Nzambi. Gungima tuza muzuelela luholo tuajiya gumonesa egi tuana gunemesa jina dia Nzambi mu monyo wetu.

3. Ndaga itshi yakuatesele Moize ha gunemesa muavula jina dia Nzambi?

³ Tangiza luholo Moize gadivile hakhalele muene hehi nu seso tangua gamonele vizio ya lutumbu lua Yehowa mubalega. Mukanda Étude perspicace des écritures udi muzuela egi: “Yakhalele diago ndaga ya gushimana inyi muthu muko khenji gamonelego gutuama egi Yesu aze ha mavu”. Moize wavuile mbimbi eji  jialandula, idi naye gukhala egi muanjelo wajizuelele: ‘Yehowa, Yehowa, Nzambi wazala pha nu khenda, nu gisemo, gana guvua ndo khabu muphushi, wakhala nu guzumba guavula nu giamatshidia, muene wana vuila athu avula khenda, wana totesela athu gushaga guawo, gulumbuga guawo nu gubola guawo.’ (Guz. 33:17-23; 34:5-7) Idi naye gukhala egi Moize wakhalele mutangiza ndaga eji tangua gakhalele muene mutanga jina dia Yehowa. Tuajiyilego gudihula luholo Moize gawambelele enya Isalele gungima dia ivo egi: ‘Nemesenu jina dia lutumbu nu dia woma dia Yehowa.’—Mikh. 28:58.

4. Makalegelo atshi a Yehowa tuajiya gutangigiza ha gumunemesa?

⁴ Gula tuatangiza ndaga jiatadila jina dia Yehowa, tudi naye nji gutangigiza gula Yehowa wakhala Nzambi wa luholo lutshi. Tudi naye gutangigiza makalegelo enji gifua: Ngolo, ndunge, nduedi, nu guzumba. Gutangigiza makalegelo awa nu ako, guajiya gutukuatesa ha gumunemesa muavula.—Ngi. 77:11-15.

5-6. (a) Jina dia Nzambi diakotelesa itshi? (b) Ha gutadila Guzoga 3:13, 14 nu Yeshaya 64:8, mu maluholo atshi Yehowa wana gutshita egi ndaga jikalegewe?

⁵ Ndaga itshi tuana jiya gu ukoteleshi wa jina dia Nzambi? Enya ndunge avula ana tshigina egi jina dia Yehowa diajiya gukotelesa “Wana Gudibuisa.” Ukoteleshi owu udi gutumonesa egi gushigo nga gima gimoshi giajiya gukanga Yehowa njila ha gutagenesa felela dienji, nu wajiya gutshita egi ndaga imoshi ikalegewe. Luholo lutshi?

⁶ Yehowa wana tshita ndaga jiavula tangua gana gudibuisa yagasue gatshigina ha gutagenesa felela dienji. (Tanga Guzoga 3:13, 14.) Mikanda yetu yana gututoga ha gutangigiza muavula makalegelo a gushimana a Nzambi. Yehowa wajiya nji gutshita egi akombeledi enji abue yagasue yatshigina muene, ha gutagenesa felela dienji ngatshima ashigo atagana. (Tanga Yeshaya 64:8.) * Ngenyi, Yehowa wana gutagenesa felela dienji. Gushigo nga gima gimoshi giajiya gumukanga njila ha gutagenesa mafelela enji.—Yesh. 46:10, 11.

7. Luholo lutshi tuajiya gukudisa khadilo dia guhana mersi gudi Sh’etu wa mu dilu?

 ⁷ Tuajiya gukudisa khadilo dietu dia guhana mersi gudi Sh’etu wa mu dilu, gula tudi mutangigiza ndaga jiakalegele gale muene nu luholo gatukuatesele ha gutagenesa inemo yetu. Ha gufezegesa, tuana gushimana diago Yehowa muavula, tangua tuana mona ima yagasue yagushimana yafugile muene. (Ngi. 8:3, 4,NWT) Gula tuatangigiza luholo Yehowa gatukuatesele ha gutagenesa felela dienji, yana gututuma ha gumunemesa diago muavula. Tudi naye diago guvua wona mukunda nu jina dia Yehowa! Ukoteleshi wa jina dienji wana gutumonesa ndaga jiagasue jiatadila Tata wetu, ndaga jiagasue jiakalegele gale muene nu eji mbajikalagala muene mu masugu adi muza.—Ngi. 89:7, 8.

8. Ha gutadila Mikhuala 32:2, 3, itshi Yehowa gana gutshigina egi akombeledi enji atshite mukunda nu jina dienji?

⁸ Gutuama egi enya Isalele angine mu Mavu a Gutendelela, Yehowa walongele Moize mbimbi jia lungimbo. (Mikh. 31:19) Gungima, Moize walongesele enya Isalele lungimbo luene. (Tanga Mikhuala 32:2, 3.) Gula tuatangigiza ndaga jidi mu verse 2 nu 3, idi mumonega egi Yehowa gatshiginyilego egi jina dienji disuegewe, nga gutangiza egi athu ajiyilego guditanga handaga didi dia gijila. Wana tshigina egi athu agasue ajiye jina dienji! Enya Isalele akhalele diago nu luendu luakoma ha guvua Moize mualongesa ndaga jiatadila Yehowa nu jina dienji dia lutumbu! Ndaga jiaawambelele Moize jiakolesele gutshigina guawo gifua luholo meya a mvula ana kuatesa muangu nu mitshi ha gukula. Luholo lutshi tuajiya gujiya gula malongo etu adi gifua meya a mvula?

9. Luholo lutshi tuajiya gutumbuisa jina dia Yehowa?

⁹ Tangua tudi mulongesa inzo nu inzo nga mu mafundo a athu avula, tudi naye gukalegela Biblia ha guawambela egi Nzambi jina dienji Yehowa. Tuajiya guahana mikanda yetu, guatalesa video nu ndaga jiko jidi mu site Internet yetu ha gutumbuisa Yehowa. Gu mudimo, nga gu khalasa nga tangua tudi mu vuayaje, gula tuaheta okazio tudi naye gulongesa ndaga jiatadila Tata wetu wa guzumba nu ndaga jiana tshigina muene. Tuajiya guwambela athu ndaga jiabonga mbajikalagala Yehowa mukunda nu esue nu mukunda nu mavu; tangua adi muvua ndaga jiene, yajiya gukhala egi idi giphungu gia thomo adi gujivua. Guwambela athu giamatshidia giatadila Tata wetu wa guzumba, guana gutukuatesa ha gutumbuisa jina dia Nzambi. Tuana guakuatesa ha gukatula mambo nu mashingo anyi athu ana zuela mukunda nu jina dia Yehowa. Ndaga jia Biblia tuana longesa athu jidi jiabalega ndando, jiana guahana gikhesa.—Yesh. 65:13, 14.

10. Tangua tudi mulongesa athu Biblia, mukunda natshi tudi naye guakuatesa ha guzumba mikhuala ya Nzambi?

¹⁰ Tangua tudi mulonguga nu athu Biblia, tudi naye guakuatesa ha gujiya nu gukalegela jina dia Yehowa. Tudi naye nji guakuatesa ha gujiya Yehowa muabonga diago. Mbatuakuatesa gula tudi phamba gualongesa malongo nu mikhuala ya Yehowa ba? Mulongogi wabonga wa Biblia udi naye gulonguga mikhuala ya Nzambi, nu udi naye gusuanguluga nu mikhuala yene. Uvi mulongogi wa Biblia mbawutumagela Yehowa handaga wakhala nu guzumba gudi muene ba? Jiyenu egi, Eva wakhalele mujiya mukhuala wa Nzambi, uvi gakhalelego muzumba Nzambi; nu muene Adama nji luholo lumoshi. (Gis. 3:1-6) Hene, tushigo naye phamba gulongesa athu mikhuala ya Nzambi, uvi tudi naye nji guakuatesa ha guyizumba.

11. Tangua tudi mulongesa alongogi a Biblia mikhuala ya Nzambi, luholo lutshi tuajiya guakuatesa ha guzumba Nzambi yonu wayihanele?

¹¹ Mikhuala ya Yehowa yakhala diago yabonga mukunda nu esue. (Ngi. 119:97, 111, 112) Uvi  alongogi a Biblia ajiyilego gumona egi mikhuala yene yakhala yabonga, gula akoteleselego egi Yehowa wana gutuhana naye handaga wana gutuzumba. Hene, tuajiya guahula egi: “Udi mutangiza egi mukunda natshi Nzambi gatogele akombeledi enji ha gutshita ndaga eyi, nga gaatunyishile ha gutshita ndaga imoshi ngenyi? Itshi mikhuala yene yana gumonesa mukunda nu Nzambi?” Gula tudi mukuatesa alongogi a Biblia ha gujiya Yehowa nu ha gukudisa guzumba mukunda nu jina dienji dia lutumbu, mbatukuata diago mutshima wawo. Ngenyi, alongogi etu mbashigo muzumba phamba mikhuala uvi mbaazumba nji Nzambi wana guyihana. (Ngi. 119:68) Gutshigina guawo mbagukola nu mbaakhala hehi ha gulua nu malamba anyi mbaabuila mu masugu adi muza.—1 Kol. 3:12-15.

12. Luholo lutshi mutshima wa Davidi wakhaphumugine, nu mbuto itshi yazolele?

¹² Mu Ngimbo 86:11 mudi nu mbimbi imoshi ya ndando idi muzuela egi: ‘Nguhane mutshima umoshi.’ Fumu Davidi wasonegele mbimbi jiene. Mu monyo wenji, wakotelesele egi mutshima wa muthu wajiya gukhaphumuga. Lusugu lumoshi, wakhalele holu dia inzo yenji nu wamonele mukaji’a ngane muzua meya. Mu tangua diene, Davidi wabambele mutshima umoshi, nga wamukhaphumugile? Wakhalele mujiya mukhuala wa Yehowa udi muzuela egi: ‘Ushigo naye guvuila mukaji’a ngane nzala.’ (Guz. 20:17) Uvi, muene walanduile genji gutala. Mutshima wenji wakhaphumugile, handaga wakudishile nzala yabola mukunda nu Bate-sheba, uvi gu khanda iko, wakhalele naye gusuanguluisa Yehowa. Ngatshima Davidi wakhalele muzumba Yehowa nu gumunemesa sendese mualeha, walanduile nzala yenji yabola. Mu tangua diene, Davidi wazudile desizio diabola. Wahanele diago Yehowa musonyi. Wabatele nji malamba gudi athu ako, nu gudi enya fami yenji.—2 Sam. 11:1-5, 14-17; 12:7-12.

13. Luholo lutshi tudi mujiya egi mutshima wa Davidi wavutugile ha fundo dienji?

¹³ Yehowa wahanele Davidi disipline, gungima Davidi wavutudile luko ufuta wakola n’enji. (2 Sam. 12:13; Ngi. 51:2-4, 17) Davidi wawungulugile malamba amubuidile tangua gabembele egi mutshima wenji ukhaphumuge. Tuajiya gubalumuna mbimbi jienji jidi mu Ngimbo 86:11 mu luholo elu: “Nguhane mutshima unu wajiyilego gukhaphumuga.” Yehowa wakuatesele Davidi hagula mutshima wenji ukhaphumugago ba? Ayi, handaga Mbimbi ya Yehowa yana guzuela egi ‘Mutshima wenji . . . wagasue wakhalele gudi Yehowa Nzambi wenji.’—1 Maf. 11:4; 15:3.

14. Muhu utshi tuajiya gudihula, nu mukunda natshi?

 ¹⁴ Gifezegeselo gia Davidi gidi gutuhana gikhesa nu gidi nji gututemesa. Gubola guakalegele muene guajiya gutemesa akombeledi a Nzambi mangino. Ngatshima tuasendesa gukombelela Yehowa mangino, nga tuana gumukombelela gale sendese mualeha, tuajiya gudihula muhu owu: ‘Ngana lenga miheto ya Satana idi mukamba gukhaphumuna mutshima wami ba?’

15. Luholo lutshi guvua woma wa jina dia Nzambi guana gutubamba gula tuamona ifuanesa yabola?

¹⁵ Ha gufezegesa, gula udi mutala TV nga udi mu Internet, wamona ifuanesa inyi yajiya guguhana nzala jiabola, itshi wajiya gukalagala? Wajiya gutangiza egi ifuanesa yene ishigo diago pornografi. Uvi ushigo mumona egi Satana udi guyikalegela ha gukhaphumuna mutshima waye ba? (2 Kol. 2:11) Ifuanesa yene yajiya gukhala gifua giphangu athu ana gubatuila mitshi; giphangu giakhala giazonda uvi giana buisa mitshi yakoma. Ha gubuisa mutshi, muthu wana zangula giphangu, gasendesa gukoka mage-mage, gungima mutshi wana zendelela nu wana gubua. Luholo lutshi gutala ifuanesa yabola mu Internet guajiya gukhala gifua giphangu? Gutala ifuanesa yabola inyi tudi mutangiza egi ishigo diago gingoza, guajiya gutuma muthu ha gukalagala ndaga yabola yajiya gukhaphumuna mutshima wenji nu gubolesa ufuta wenji nu Yehowa. Hene, ubembigo nga gima gimoshi gikhaphumune mutshima waye! Bamba mutshima umoshi ha gunemesa jina dia Yehowa!

16. Tangua tudi mulolewa ha gukalagala ndaga yabola, mihu itshi tuajiya gudihula?

¹⁶ Satana wana kalegela ndaga jiko jiavula jiabola jiajiya gututuma ha gukalagala gubola. Itshi tuajiya gukalagala? Tuajiya gutangiza egi ndaga yene ishigo diago yabola. Matangua ako tuajiya guzuela egi: ‘Gula ngakalagala ndaga eyi, ishigo diago mulonga wabola  handaga mbaashigo gunguzola mu hungu.’ Gutangiza ngenyi gudi diago guabola. Idi ndaga yabonga ha gudihula mihu gifua: ‘Satana udi mukalagala ngenyi ha gukhaphumuna mutshima wami ba? Gula ngalandula nzala jiabola, mbanguhana jina dia Yehowa musonyi ba? Mbangusuena hehi nu Nzambi gula ngudi mukalagala ngenyi nga mbangukhala gualeha n’enji?’ Khala mutangigiza gu mihu eyi. Kalagala gisambu ha guhana mvutu jia giamatshidia gu mihu eyi, uvuigo musonyi. (Yak. 1:5) Gukalagala ngenyi guajiya gugukuatesa diago. Guajiya gugukuatesa ha gutuna ndaga yabola nu mutshima umoshi gifua muatshitshile Yesu tangua gazuelele egi: “Satana, katuga!”—Mat. 4:10.

17. Mukunda natshi mutshima wa gukhaphumuga ushigo nu ndando? Fezegesa.

¹⁷ Ishigo ndaga yabonga ha gukhala nu mutshima wa gukhaphumuga. Tangiza gale egi enya ekipe imoshi ya saga ashigo gudivua muabonga. Ako adi mukamba egi ahete lutumbu luawo hakhawo, ako ashigo mulandula mikhuala ya saga jiene, uvi ako adi muhaga ginaga gudi mutuameji wawo. Ekipe gifua eyi, yajiyilego gubinga nga hazonda. Uvi, Ekipe yana gudivua, nu idi mukalagala ndaga hamoshi, yana binga saga. Luholo lumoshi, mutshima waye wajiya gubinga gula matangi aye, nzala jiaye nu luholo udi gudivua adi muwenda hamoshi ha gukombelela Yehowa. Jiya egi, Satana udi mutshigina gukhaphumuna mutshima waye. Udi mutshigina egi matangi aye, nzala jiaye nu luholo udi gudivua akalagale ndaga jiana tuna Yehowa. Uvi aye, jiya egi udi naye gukhala nu mutshima phamba umoshi ha gukombelela Yehowa. (Mat. 22:36-38) Ubembigo egi Satana akhaphumune mutshima waye!

18. Ha gudivua nu mbimbi jidi mu Mika 4:5, desizio ditshi wazula?

¹⁸ Kombelela Yehowa gifua muazuelele Davidi egi: ‘Nguhane mutshima umoshi ha guvua woma mukunda nu jina diaye.’ Tshita yagasue ha gukalegela gisambu egi mu monyo waye. Zula desizio lusugu nu lusugu, ndaga yagasue udi mutshita ikhale yazonda nga yakoma, monesa egi udi mutumbuisa jina dia Yehowa mu mutshima waye. Gula udi mutshita ngenyi, mbawudi mumonesa egi udi diago Temue wa Yehowa. (Ish. 27:11) Mukut’etu agasue, mbatukhala hehi ha guzuela gifua muazuelele profete Mika egi: ‘Mbatuwenda mu jina dia Yehowa Nzambi wetu ivo nu ivo.’—Mika 4:5.