STUDY ARTICLE 24
“Mekem Full Heart blo Mi for Fraet lo Nem blo Iu”
“Mekem full heart blo mi for fraet lo nem blo iu. Mi praisem iu, God blo mi Jehovah, lo full heart blo mi.”—PS. 86:11, 12, NW.
SONG 7 Jehovah Nao Strong Bilong Iumi
WANEM IUMI BAE STORYIM *
1. Wanem nao hem minim for fraet lo God, and why nao hem important for olketa wea lovem Jehovah for fraet lo hem?
OLKETA Christian lovem God, bat olketa fraet lo hem tu. Samfala tingse datwan no here stret bikos tufala samting hia no savve go tugeta. Bat disfala wei for fraet lo God hem barava difren from kaen feeling for barava fraet tumas. Diswan hem wanfala spesol kaen wei for fraet. Pipol wea garem diskaen wei for fraet, olketa tinghae lo God and barava respectim hem. Olketa no laek for mekem Dadi blo olketa lo heven for feel nogud bikos olketa no laek for spoelem wei wea olketa fren witim hem.—Sams 111:10; Provebs 8:13.
2. For fitim wanem King David talem lo Psalms 86:11, wanem tufala samting nao iumi bae storyim?
2 Readim Psalm 86:11 lo footnote. * Taem iu ting raonem olketa toktok hia, hem isi for luksavve faithful King David hem minim hao hem barava important for fraet lo God. Bae iumi storyim hao iumi savve followim wanem David talem lo prea blo hem. Firstaem bae iumi storyim samfala reason why iumi shud barava respectim nem blo God. Then iumi bae storyim hao for iumi showimaot respect for datfala nem evriday.
WHY NAO IUMI SHUD BARAVA RESPECTIM NEM BLO JEHOVAH?
3. Wanem nao Moses experiencem wea maet helpem hem for gohed barava respectim nem blo God?
3 Tingim feeling blo Moses taem hem haed insaed wanfala smol cave midolwan olketa rock, and hem lukim taem vision blo glory blo Jehovah hem go pasim hem. Lo Insight on the Scriptures hem storyim hao “luk olsem disfala samting wea happen hem winim eni nara samting wea eni man experiencem bifor Jesus Christ kam lo earth.” Moses herem olketa toktok hia, wea maet wanfala angel nao talem: “Mi [Jehovah] nao mi God. Oltaem mi save sore long pipol, an mi kaen tumas long olketa. Mi no save kros kuiktaem, an oltaem mi gohed fo lavem pipol blong mi an tinghevi tumas long olketa. Mi gohed fo barava lavem olowe olketa pipol blong mi, wetem olketa hu bae i bon kam bihaen long olketa go-go kasem plande taosen yia. Mi save fogivim olketa sapos olketa duim olketa ravis samting, o agensim mi, o mekem enikaen sin.” (Eksodas 33:17-23; 34:5-7) Bihaen datfala taem, maet evritaem wea Moses iusim datfala nem, Jehovah, hem savve ting go bak lo datfala samting wea happen. Dastawe, Moses warnim pipol blo God for fraetem and respectim datfala nambawan nem.—Diutronomi 28:58.
4. Wanem nao savve helpem iumi for barava respectim Jehovah?
4 Taem iumi ting abaotem datfala nem Jehovah, hem gud for ting raonem tu wanem kaen man nao hem. Iumi shud tingim olketa wei blo hem, olsem paoa, wisdom, justice, and love. Taem iumi ting raonem olketa samting hia and olketa nara wei blo hem, datwan bae muvim iumi for barava respectim hem.—Sams 77:11-15.
5-6. (a) Wanem nao mining blo nem blo God? (b) Olsem Exodus 3:13, 14 and Aesaea 64:8, lo olketa wanem wei nao Jehovah mekem olketa samting for happen?
5 Wanem nao mining blo nem blo God? Staka savveman agree hao luk olsem datfala nem Jehovah hem minim “Hem Savve Duim Eni Samting.” Datfala mining remindim iumi hao no eni samting savve stopem Jehovah for duim wanem hem laekem, and hem savve mekem olketa samting for happen. Why nao olsem?
6 Jehovah savve duim eni samting for mekem plan blo hem for kamap tru. (Readim Exodus 3:13, 14 lo footnote. *) Staka taem iumi kasem encouragement for ting raonem datfala barava spesol wei blo God. Jehovah savve mekem olketa servant blo hem wea no perfect tu for duim eni samting wea hem laekem, mekem olketa savve gohed servem hem and fulfillim plan blo hem. (Readim Aesaea 64:8.) Thru lo olketa wei hia, Jehovah savve mekem wanem hem laekem for kamap. No eni samting savve stopem hem for mekem plan blo hem for fulfill.—Aesaea 46:10, 11.
7. Wanem nao iumi savve duim for strongim wei wea iumi tinghae lo Dadi blo iumi lo heven?
7 Taem iumi ting raonem wanem hem duim, and wanem hem helpem iumi for duim, datwan savve helpem iumi for tinghae go moa lo Dadi blo iumi lo heven. Olsem example, taem iumi ting raonem olketa nambawan samting wea God wakem, datwan bae mekem iumi for barava tinghae lo evri samting wea Jehovah duim. (Sams 8:3, 4) And taem iumi ting raonem hao Jehovah hem bin helpem iumi for duim samting wea hem laekem, iumi bae barava respectim hem go moa. Datfala nem Jehovah fit for kasem big respect! Datfala nem hem showimaot olketa wei blo Dadi blo iumi, olketa samting wea hem duim finis, and evri samting wea hem bae duim lo future.—Sams 89:7, 8.
MI BAE TALEMAOT NEM BLO JEHOVAH
Olketa samting wea Moses teachim hem strongim man. Hem mekhae lo nem blo Jehovah and wanem kaen man nao hem (Paragraf 8 storyim diswan) *
8. Olsem Diutronomi 32:2, 3 storyim, hao nao Jehovah ting lo nem blo hem?
8 No longtaem bifor olketa Israelite go insaed Promis Land, Jehovah teachim Moses wanfala song. (Diutronomi 31:19) And Moses mas teachim datfala song lo olketa pipol. (Readim Diutronomi 32:2, 3.) Sapos iumi ting raonem verse 2 and 3, hem barava klia dat Jehovah no laekem nem blo hem for haed, or for pipol ting lo hem olsem hem tambu for talem. Hem laekem evriwan for savve lo nem blo hem! Hem wanfala nambawan privilege for pipol herem wanem Moses teachim abaotem Jehovah and nambawan nem blo hem! Samting wea Moses teachim lo olketa hem strongim and encouragem olketa, olsem rain wea helpem olketa plant for grow gud. Hao nao iumi savve mek sure hao iumi teach hem olsem tu?
9. Hao nao iumi savve help for mekem nem blo Jehovah kamap holy?
9 Taem iumi preach from haos tu haos or lo pablik witnessing, iumi savve iusim Bible for showim lo pipol hao nem blo God, hem Jehovah. Iumi givimaot olketa literature, video, and information lo website blo iumi wea mekhae lo Jehovah. Lo waka ples, skul, or taem iumi travel, iumi savve lukaotem chance for story abaotem God wea iumi lovem and abaotem olketa wei blo hem. Taem iumi story lo pipol abaotem nambawan plan blo Jehovah for olketa man and disfala earth, datwan maet firstaem for olketa savve dat Jehovah barava lovem iumi. Taem iumi talem truth abaotem Dadi blo iumi lo olketa narawan, iumi help for mekem nem blo hem kamap holy. Iumi aotem samfala lo olketa laea wea nara pipol teachim abaotem Jehovah. Iumi teachim pipol samting wea savve strongim and encouragem olketa.—Aesaea 65:13, 14.
10. Taem iumi conductim Bible study, why nao iumi no just teachim nomoa olketa raeteous mark blo God and olketa standard blo hem?
10 Taem iumi conductim Bible study, iumi laek helpem olketa for savve lo nem blo Jehovah and for iusim. And tu, iumi laek for helpem olketa for savve gud lo Jehovah. Waswe, bae iumi savve duim datwan sapos iumi just teachim nomoa olketa instruction, standard, and olketa law blo hem? Wanfala gudfala student maet lane abaotem law blo God and barava laekem datwan. Bat waswe, datfala student bae obeyim Jehovah bikos hem lovem hem? Tingim, Eve hem savve lo olketa law blo God, bat hem no lovem Man wea givim olketa law hia, and Adam tu olsem. (Jenesis 3:1-6) So iumi mas duim moa samting winim wei for just teachim pipol abaotem raeteous mark blo God and olketa standard blo hem.
11. Taem iumi teachim olketa law and standard blo God, hao nao bae iumi helpem student blo iumi for lovem Man wea givim olketa law?
11 Olketa law and standard blo Jehovah barava nambawan. (Sams 119:97, 111, 112) Bat Bible student blo iumi maet no luksavve lo datwan sapos olketa no minim hao love nao muvim Jehovah for givim olketa law hia. So iumi savve askem olketa student olsem: “Iu tingse why nao God askem olketa servant blo hem for duim wanfala samting or for stap klia from nara samting? Wanem nao datwan hem showimaot abaotem hem?” Sapos iumi helpem olketa student blo iumi for ting abaotem Jehovah and for barava lovem nem blo hem, iumi bae kasem heart blo olketa. Olketa student bae no lovem nomoa olketa law bat bae lovem tu Man wea givim law. (Sams 119:68) Olketa bae garem strong faith and savve gohed strong nomata olketa kasem test.—1 Cor. 3:12-15.
GOHED FOR WORSHIPIM HEM AND OBEYIM HEM
Wantaem David letem heart blo hem for divaed (Paragraf 12 storyim diswan)
12. Hao nao wantaem David letem heart blo hem for divaed, and wanem nao kamaot from datwan?
12 Disfala toktok, “mekem full heart blo mi,” wea stap lo Psalm 86:11 hem wanfala important toktok. God muvim King David for raetem olketa toktok hia. David hem luksavve hem isi tumas for man letem heart blo hem for divaed. Wantaem, hem lo ruf lo haos and hem lukim waef blo nara man hem gohed for swim. Lo datfala taem, waswe, heart blo David hem complete or hem divaed? Hem savve lo standard blo Jehovah wea sei: “Yufala mas no kavetem waef blong [nara man].” (Eksodas 20:17) Bat, luk olsem hem gohed nomoa for lukluk. Heart blo hem divaed, hem laekem datfala woman Bath-sheba, bat lo semtaem hem laek for mekem Jehovah hapi tu. Nomata David lovem Jehovah and fraet lo hem for longtaem finis, hem disaed for followim selfish feeling blo hem. Lo datfala taem, David hem duim barava nogud samting. Hem barava spoelem nem blo Jehovah. David spoelem tu olketa innocent pipol, and famili blo hemseleva tu.—Mektu Samuel 11:1-5, 14-17; 12:7-12.
13. Hao nao iumi savve dat gogo David garem moa heart wea complete?
13 Jehovah disciplinem David, and gogo hem fren gud moa witim Jehovah. (Mektu Samuel 12:13; Sams 51:2-4, 17) David rememberim olketa hard taem and sorre wea hem kasem from wei wea hem letem heart blo hem for divaed. Datfala toktok blo hem lo Psalm 86:11 hem savve minim tu: “Givim mi wanfala heart wea no divaed.” Waswe, Jehovah helpem David for garem heart wea complete, or wea no divaed? Yes, bikos bihaen Bible sei David hem wanfala man wea heart blo hem complete for Jehovah, God blo hem.—Fas Kings 11:4; 15:3.
14. Wat nao iumi need for askem iumiseleva, and why nao olsem?
14 Example blo David encouragem iumi and hem wanfala warning tu. Wei wea hem foldaon lo datfala serious sin hem warning for olketa servant blo God distaem. Nomata sapos iumi just start for servem Jehovah or iumi servem hem for staka year finis, iumi need for askem iumiseleva, ‘Waswe, mi gohed againstim olketa samting wea Satan duim for mekem heart blo mi divaed?’
Satan bae traem eni wei for divaedem heart blo iu. No letem hem! (Paragraf 15-16 storyim diswan) *
15. Hao nao wei for fraet lo God savve protectim iumi sapos iumi lukim olketa piksa wea maet mekem iumi garem rong tingting?
15 Olsem example, sapos iu lukim wanfala piksa lo TV or Internet wea maet mekem iu for garem rong tingting, wanem nao bae iu duim? Hem maet isi for sei datfala piksa or movie hem no really pornography. Bat waswe, datwan hem no wanfala samting wea Satan iusim for divaedem heart blo iu? (2 Cor. 2:11) Datfala piksa hem olsem wanfala smol haf iron wea wanfala man iusim for splitim wanfala log. Firstaem, hem bae hamarem go datfala thin sharp part blo iron lo datfala log. Then taem hem gohed hamarem go deep datfala iron, log hia bae split nao. Waswe, olketa piksa lo TV or Internet hem no olsem datfala thin part lo datfala pis iron? Firstaem maet man tingse hem smol samting nomoa, and hard for spoelem hem, bat kwiktaem nomoa hem savve kosim hem for duim sin wea bae divaedem heart and spoelem wei wea hem faithful lo Jehovah. So no letem eni nogud samting for go insaed heart blo iu! Keepim full heart blo iu for fraet lo nem blo Jehovah!
16. Taem iumi kasem olketa temptation, olketa wanem kwestin nao iumi savve askem iumiseleva?
16 Satan iusim olketa nara temptation tu for mekem iumi duim rong samting. Wanem nao bae iumi duim? Hem isi for iumi mek excuse. Olsem example, maet iumi ting olsem: ‘Bae mi no disfellowship sapos mi duim diswan, so hem no barava serious.’ Kaen tingting olsem hem no stret. Hem gud for askem iumiseleva olketa kwestin hia: ‘Waswe, Satan iusim disfala temptation for divaedem heart blo mi? Sapos mi letem datfala rong feeling for winim mi, waswe, bae diswan spoelem nem blo Jehovah? Waswe, wanem mi duim bae mekem mi fren klos witim God blo mi, or maet hem mekem mi for go farawe from hem?’ Ting raonem olketa kwestin hia. Prea for wisdom mekem iu savve honest for ansarem, and no laea lo iuseleva. (Jas. 1:5) Datwan bae barava protectim iu. Hem bae helpem iu for stand strong againstim olketa temptation, olsem Jesus duim taem hem sei: “Go nao Satan!”—Matt. 4:10.
17. Why nao iumi bae no kasem eni gud samting sapos heart blo iumi hem divaed? Storyim example.
17 Sapos iumi garem heart wea divaed bae iumi no kasem eni gud samting. Tingim wanfala sports team wea no wan mind. Samfala lo team maet laekem pipol for mekhae lo olketa nomoa, narawan no laek plei followim rul, and samfala no respectim coach. Wanfala team olsem bae hard for winim eni game. Bat lo narasaed, team wea wan mind bae win. Heart blo iu savve olsem team wea win sapos tingting, wanem iu laekem, and feeling blo iu hem waka tugeta for servem Jehovah. Tingim, Satan laekem tumas for mekem heart blo iu divaed. Hem laekem tingting, wanem iu laekem, and feeling blo iu for go difren and againstim olketa standard blo Jehovah. Bat, for iu servem Jehovah, heart blo iu mas no divaed. (Matt. 22:36-38) No letem Satan for divaedem heart blo iu!
18. Olsem wanem Maeka 4:5 talem, wanem nao iu disaed for duim?
18 Prea lo Jehovah olsem David duim: “Mekem full heart blo mi for fraet lo nem blo iu.” Then followim wanem iu prea abaotem. Each day, mek sure wanem iu disaedem, nomata hem big or smol, hem showimaot iu barava respectim holy nem blo Jehovah. From iu wanfala Jehovah’s Witness, wei for duim datwan bae mekem pipol for respectim datfala nem. (Provebs 27:11) And bae iumi evriwan fit for talem sem toktok olsem profet Micah wea sei: “Bae yumi gohed fo wosipim hem an obeim hem olowe.”—Maeka 4:5.
SONG 41 Plis Herem Prea Bilong Mi
^ par. 5 Lo disfala study article, main samting wea iumi bae storyim, hem samfala toktok lo prea blo King David wea stap lo Psalm 86:11, 12. Wanem nao hem minim for fraet lo nem blo Jehovah? Why nao iumi shud barava respectim datfala nambawan nem? And hao nao wei for fraet lo God savve protectim iumi for no foldaon lo temptation?
^ par. 2 Psalm 86:11, NW: “Plis Jehovah, teachim mi abaotem wei blo iu. Bae mi wakabaot followim truth blo iu. Mekem full heart blo mi for fraet lo nem blo iu.”
^ par. 6 Exodus 3:13, 14, NW: “Bat Moses sei olsem lo tru God: “Sapos mi go lo olketa Israelite and sei olsem lo olketa, ‘God blo olketa laen dadi blo iufala hem sendem mi kam lo iufala,’ and olketa sei lo mi, ‘Hu nao nem blo hem?’ Wanem nao bae mi talem lo olketa?” 14 So God sei lo Moses: “Mi Bae Duim Eni Samting wea Mi Laek for Duim.” And hem sei moa: “Iu mas talem lo olketa Israelite, ‘Mi Bae Duim Eni Samting hem nao sendem mi kam lo iufala.’”
