1. ¿Imatan Diosta mantsëqa? Y Diosta sirweqkunaqa, ¿imanötan tsëta rikätsikushwan?

DIOSTAQA kuyarmi mantsantsik. Mantsëpaq parlarqa manam Dios mana alli tratakunqanpaqtsu parlëkantsik, sinöqa respëtuwan rikänapaqmi. Teyta Diospa rikëninchö alli këta munaqkunaqa pë munanqannömi kawakuyan (Sal. 111:10; Prov. 8:13). Tsëta maslla yachakurishun.

2. Salmus 86:11 Bibliachö ninqannö, ¿imakunapitatan yachakushun?

² (Leyi Salmus 86:11 *). David ninqanman pensarqa musyashunmi imanir Teyta Diosta respetanapaq. Puntataqa, Diospa jutinta imanir respetanapaqmi yachakushun. Tsëpitanam, imanö kawanqantsikchö Diospa jutin respetashqa kanampaq yachakushun.

3. Diospa jutinta Moises respetanampaqqa, ¿imatan yanaparqan?

³ Moisesqa Horeb jirkachömi rumi jawanchö punuykar Jehoväpa puëdeq këninta rikarqan. Tsëpaqmi Perspicacia para comprender las Escrituras libruqa “tsënö pasakoqtaqa manam pillapis rikashqatsu karqan Jesus  shamushqanyaq” nin. Moisesqa itsa angel kënö ninqanta wiyarqan: “¡Yahweh! ¡Yahweh! Ankupäkuq y perdonakuq Diosmi kä. Imapitapis jukllaqa mana piñakuqmi kä. Alläpa kuyakuqmi kä. Äninqätaqa imëpis cumplïmi. Waranqa waranqa atskaq nunakuna kaptinpis ankupämi. Mana cäsumar jutsata ruraptinpis perdonämi” (Ex. 33:17-23; 34:5-7). Cada Jehoväpaq parlarchi Moisesqa rikanqampaq yarpaq. Tsëchi Israelïtakunataqa “llapanchö poderyuq Teyta Diosta” respetayänampaq nirqan (Deut. 28:58).

4. Jehoväta mas respetanapaqqa, ¿imanö kënintatan yarpänantsik?

⁴ Jehoväpa jutinman pensarqa, pë imanö kanqanmampis pensanantsikmi. Teyta Diosnintsik puëdeq, yachaq y kuyakoq kanqantam yarpänantsik. Tsënö rurarmi Jehovä Diosnintsiktaqa masraq respetashun (Sal. 77:11-15).

5, 6. (1) ¿Ima ninantan Diospa jutinqa? (2) Exodu 3:13, 14 y Isaïas 64:8 ninqannö, ¿imatatan Jehoväqa ruran munëninta cumplinampaq?

⁵ Jehoväpa jutinqa “kikin munanqantam ruran” ninan kanqantam atska yachaq nunakuna niyan. Tsënö Jehovä kaptinmi musyantsik, llapan nimanqantsikkunata cumplimunampaq kaqta. ¿Imanö?

⁶ Jehoväqa llapan munanqanta y änimanqantsiktam cumplita puëdin (leyi Exodu 3:13, 14 *). Tsëmi Teyta Diosnintsikqa, imanö kanqanman pensanapaq imëkata kanan witsan ruratsimun. Y Jehoväqa, jutsata ruraq sirweqninkunawampis munanqanta cumplitsinmi  (leyi Isaïas 64:8 *). Awmi, Jehovä munanqanta cumplinampaqqa manam imapis michantsu (Is. 46:10, 11).

7. Teyta Diosnintsikta maslla respetanapaqqa, ¿imatan yanapamäshun?

⁷ Kamanqanman y imakunachö yanapamanqantsikmanmi yarpänantsik. Llapantsikmi imëka kamanqankunata rikarqa espantakuntsik (Sal. 8:3, 4). Y munënin cumplikänampaq imanö yanapamanqantsikman pensarmi, Jehovätaqa mas respetashun. Awmi, Jehoväpa jutinqa imanö kanqanta, llapan ruranqanta y llapan ruramunampaq kaqtam rikätsikun (Sal. 89:7, 8).

8. Deuteronomiu 32:2, 3 ninqannö, ¿ima ruranatatan Jehovä munan?

⁸ Israelïtakuna Jehovä äninqan Patsaman yëkuyänampaq këkäyaptinmi, cantayänampaq Moisesta Jehovä yachatsirqan (Deut. 31:19). Tsëpitanam Moisesqa llapankunata yachatsinan karqan (leyi Deuteronomiu 32:2, 3 *). Jehoväqa jutimpa qayanata y pï më reqinampaq musyatsikunatam munan. Tsënö Jehoväpaq y jutimpaq Moises yachatsikuptinqa, imanö kushishqaraq israelïtakuna wiyakuyarqan. Tsë llapan yachakuyanqanqa allichi pëkunata yanaparqan. Nunakunata Moisesnö yachatsinapaqqa, ¿imaraq yanapamäshun?

9. Jehoväpa jutin respetashqa kanampaqqa, ¿imanötan yanapakushwan?

⁹ Bibliachö Diospa jutin Jehovä kanqanta y imanö kanqantam wayin wayin y cällikunachö yachatsikunantsik. Tsëtaqa rurantsik trabäjuchö, escuëlachö o mëtapis ëwar librunkuna y revistankuna qararnin, videukunata rikätsir y Internetchö yachakuyänampaq nirmi. Y Patsapaq y noqantsikpaq ima munanqampita parlashun. Nunakuna Jehoväpita wiyarqa kuyakoq kanqantam musyayanqa. Tsënö rurashqallam Teytantsikpa jutinqa alabashqa y respetashqa kanqa. Manam imapis igualantsu nunakunata Jehovä Diospita yachatsinqantsikwanqa (Is. 65:13, 14).

10. Bibliapita yachatsikurqa, ¿imanirtan Dios mandakunqanllata yachatsikunantsiktsu?

¹⁰ Bibliapita yachatsinqantsik nunakunataqa, jutimpa y imanö Jehovä kanqanta reqir respetayänantam munantsik. ¿Imanötan tsëtaqa rurashun? Ëvanö y Adannömi wakin nunakunaqa Dios mandakunqanta alli musyayan. Pëkunaqa tsëta musyëkarpis manam Jehoväta rasumpatsu kuyayaq. Tsëqa, ¿imanirtan Jehoväta cäsukuyanman? Kuyarninmi (Gen. 3:1-6). Tsëmi Jehoväta kuyë mas alli kanqanta yachatsikunantsik.

11. Dios mandakunqanta yachatsirpis, ¿imanötan yanapashwan kuyayänampaq?

¹¹ Teyta Diosnintsik mandakunqanqa allipam yanapamantsik (Sal. 119:97,  111, 112). Tsënö kaptimpis yachatsinqantsik nunakunaqa manam noqantsiknötsu, tsë mandakuykunachö Jehoväpa kuyakuyninta rikäyanqa. Tsëmi kënö tapunantsik: “¿Imanirtan këta ruranapaq Teyta Dios mandamantsik? ¿Imatatan Jehoväpita yachakunki?”. Jehoväta kuyayänampaqqa imanö kanqanta y jutinta respetayänampaqmi yachatsinantsik. Tsënöpam mandakunqankunata kuyarnin cäsukuyanqa (Sal. 119:68). Tsënö kuyakuynin kaptinqa, mana allikunapa pasarpis allim tsarakunqa (1 Cor. 3:12-15).

12. (1) ¿Imanirtan Davidqa Jehoväta cäsukurqantsu? (2) ¿Imatan pasakurqan mana cäsukunqanrëkur?

¹² Salmus 86:11 David kënö qellqarqan: “Llapan shonqüwan qamta mantsakunaqpaq yanapëkallämë”. Tsëqa noqantsiktapis yanapamantsikmi. Davidpa shonqunqa manam Jehovä Diosllapaqnatsu karqan. Tsënöqa Davidta pasarqan juk nunapa warmin bañakuykaqta rikanqanchömi. Tsë höraqa, ¿imanötan Davidpa shonqun këkarqan? ¿Jehovällapaqnaku karqan? Pëqa, “ama munapankitsu [nuna mayikipa] warminta” nir Jehovä mandakunqantaqa musyarqanmi (Ex. 20:17). Davidqa atska tiempupa Jehoväta cäsukushqa karpis, tsë warmita rikaräkurmi mana allita rurar jutsaman ishkirqan. Tsënö ruranqanwanmi Jehoväpa jutinta respetarqantsu y pï mëtam llakitsirqan (2 Sam. 11:1-5, 14-17; 12:7-12).

13. ¿Imanötan musyantsik Davidta Jehovä perdonanqanta?

¹³ Jehoväqa Davidta perdonëkurqanmi (2 Sam. 12:13; Sal. 51:2-4, 17). Rurëninkuna mana alliman chätsikunqantaqa manachi Davidqa imëpis qonqarqantsu. Tsënö kanqantam Salmus 86:11 rikätsikun: “Shonqü mana qonqanampaq yanapëkallämë”. ¿Yanaparqanku Jehovä? Awmi. Diospa Palabranchömi, “TEYTA DIOSTA llapan shonqunwan cäsukurqan” nin Davidpaq (1 Rey. 11:4; 15:3).

14. ¿Imatatan tapukunantsik?

¹⁴ Noqantsikpis mana allikunata mana ruranapaqmi Davidta pasanqanqa yanapamantsik. David jutsata  ruranqanmi yachatsimantsik, ëka tiempupana Jehoväta sirwikarpis kënö tapukunapaq: “¿Imatatan rurëkä jutsaman Diablu mana ishkitsimänampaq?”.

15. Teyta Diosta respëtuwan rikanqantsikqa, ¿imanötan mana allikunata mana rikänapaq yanapamäshun?

¹⁵ Telichö y Internetchö mana alli rurëkunata rikarqa, ¿imatatan ruranantsik? Rikanqantsik allilla kanqantatsuraq, ¿pensar qallëkushwan? Tsënö pensashqaqa Diabluqa rasllam jutsaman ishkiratsimashwan (2 Cor. 2:11). Tsëqa kanman yamtata tseqtanapaq küñaqnömi. Küña yëkunqanmannömi qeruqa qatsakar ëwan. Tsënöllam rikanqantsikqa imatapis munatsimashwan. Tsë rikanqantsik allinö kaptimpis jutsa rurëmanmi chäratsimashwan. Tsëmi Jehoväta cäsukunapaq y jutinta respëtuwan rikänapaq kallpachakunantsik.

16. Mana allikunata mana ruranapaqqa, ¿imakunatatan tapukunantsik?

¹⁶ Diabluqa manam mana allikunallatatsu rikätsimantsik, sinöqa tukuynöpam ishkitsimënintsikta munan. Tsënö pasamashqaqa kënötsuraq pensashwan: “Kë ruranqäqa manachi Jehoväta llakitsinqatsu”. Kënö pensëqa mana allim. Tsëpa rantinqa kënömi tapukunantsik: “¿Jehovä Diospita rakimëtaku Diabluqa munëkan? Munanqällata rurarqa, ¿Jehoväpa jutinta respetëkäku? Ruranqäkunaqa, ¿Teyta Diosta kushitsinqatsuraq o llakitsinqatsuraq?”. Kë tapukuykunaman pensashqaqa Jehovämi yanapamäshun (Sant. 1:5). Tsënö rurashqaqa Jesus ninqannö,  “¡këpita ëwakï Satanas!” ninapaqmi yanapamäshun (Mat. 4:10).

17. Jehovällata sirwinapaqqa, ¿imatatan pelöta pukllaqkunapita yachakuntsik?

¹⁷ Jehoväta mana cäsukuyqa mana allimanmi chätsimäshun. Tsëpaqqa pensarishun pelöta pukllaqkunaman. Wakinqa reqishqa këta munarnin y wakinna mana cäsukushpa pukllayanman, ¿allitsuraq kanman tsënö pukllayaptin? Manam. Ganëta munarqa llapanmi yanapanakuyänan. Jehoväpa voluntäninta ruranapaqqa, llapantsikpam pensënintsik y munënintsik pëllapaq kanan. Tsënö ruranapaqqa kallpachakunantsikmi. ¿Imanir? Diabluqa jutsa ruraq kanqantsikwan y munënintsikwanmi imëkanöpa Jehoväpita rakimäshun. Tsëmi Jehovällata sirwinapaq kallpachakunantsik (Mat. 22:36-38). Ama Diablu ishkitsimänataqa permitishuntsu.

18. Miquëas 4:5 ninqannö, ¿imata ruranëkipaqtan listu këkanki?

¹⁸ Davidnö Jehoväman kënö mañakushun: “Llapan shonqüwan qamta mantsakunaqpaq yanapëkallämë”. Tsënöqa ruranantsik Jehoväpa jutin respetashqa kanampaqmi. Tsëtaqa llapantsikmi imatapis akranqantsikchö rikätsikunantsik, tsënömi Jehoväpa testïgun kanqantsikqa cläru rikakanqa (Prov. 27:11). Tsënö rurarqa Miquëasnömi kënö nishun: “TEYTA DIOSNINTSIKMANMI imëpis markäkushun” (Miq. 4:5).