1. a) ¿Diosta manchanaca imatataj nisha nin? b) ¿Diosta cꞌuyajcunaca imamantataj paita manchashcata ricuchina can?

DIOSTA sirvijcunaca Diostami cꞌuyanchij. Shinallataj paitami manchanchij. Huaquincunaca Diosta cꞌuyashpaca ¿imamantataj manchana can? nincunami. Diosta manchana ima cashcata yachashun. Diosta manchana nishpaca mana shuj jatun manchaimantachu parlacunchij. Ashtahuanpish paita shungumanta respetanamantami parlacunchij. Diosta shungumanta manchajcuna o respetajcunaca paihuan alli apanacuna valishca cashcamantami paita llaquichinata mana munancuna (Salmo 111:10; Proverbios 8:13).

2. Salmo 86:11-mantaca ¿imallatataj yachashun?

² (Salmo 86:11-ta liyipai). Cai versota liyishpami rey Davidpajca Yaya Diosta manchana importante cashcata yachanchij. David Diosman mañashcacunata ñucanchij causaipi ima shina pajtachinatami ricushun. Puntapica Diospaj shutita imamanta respetana cashcatami yachashun. Qꞌuipaca cada punlla Jehová Diosta respetashcata ima shina ricuchinatapishmi yachashun.

3. ¿Moisesca imata yuyarishpataj siempre Diospaj shutita respetashcanga?

³ Moisés rumi chijtarishca ucupi cashpa ima shina sintirishcata yuyashun. Paica Dios jatun achij nicuj cashcahuan pasashcatami ricurca. Jesús cai Allpaman manaraj shamujpica chai layataca Moisés shinaca ni pi mana ricushcachu  canga. Moisesca caitami uyarca: “Jehová, Jehová, llaquij, cꞌuyaj, mana utca pꞌiñarij, mana tucuripaj cꞌuyaita charij, mana llullaj, huaranga huaranga gentecunaman cꞌuyaita ricuchij, pandarishcacunata, llaquichishcacunata, juchacunatapish perdonaj Dios”. Cai shimicunataca shuj angelmi nishcanga (Éxodo 33:17-23; 34:5-7, NWT ). Moisesca Jehovapaj shutita nicushpaca siempremi pai ima ricushcata, ima uyashcata yuyarishcanga. Chaimantami Moisesca israelitacunamanca “Diospaj sumaj manchana shutita” manchana cashcata nirca (Deuteronomio 28:58).

4. ¿⁠Jehová Diosta ashtahuan respetangapajca imapitaj yuyana canchij?

⁴ Diospaj shutipi yuyashpaca pai ima shina cashcapimi yuyana canchij. Paica tucuita ruraj, yachaj, cashcata ruraj, cꞌuyaj cashcapimi yuyana canchij. Pai ima shina cashcapi yuyashpaca paitaca ashtahuanmi respetashun (Salmo 77:11-15).

5, 6. a) ¿Diospaj shutica imatataj nisha nin? b) Éxodo 3:13, 14; Isaías 64:8-pi nishca shinaca ¿Diosca ima shinataj paipaj munaita pajtachin?

⁵ ¿Diospaj shuti imata nisha nishcamantaca imatataj yachanchij? Achca yachaj runacunaca Jehová shutica “tucui pai nishcacunata pajtachij tucushcatami nisha nin” nincunami. Cai shimicunaca Jehová Dios paipaj munaita pajtachichunca pi mana jarcai tucushcatami ricuchin. Imapish pajtarichunca paica tucuitami rurai tucun. ¿Chaitaca ima shinataj ruran?

⁶ Jehová Diosca paipaj munaita pajtachingapajca imatapishmi rurai tucun (Éxodo 3:13, 14-ta liyipai). Ñucanchij publicacioncunapica cai valishca yuyaipi yuyachunmi animan. Ashtahuanpish Jehová Diosca paita sirvijcuna paipaj munaita pajtachichunmi imatapish rurai tucun (Isaías 64:8-ta liyipai). Chashnami Jehová Diosca paipaj munaita pajtachin. Yayitu Dios paipaj munaita pajtachichunca mana pi jarcai tucunchu (Isaías 46:10, 11).

7. ¿⁠Jehová Diosta ashtahuan respetangapajca imallatataj rurana canchij?

 ⁷ Jehová Diosta ashtahuan respetangapajca ¿imatataj rurana canchij? Pai imata rurashcapi, ñucanchijta ayudangapajpish imallata rurashcapimi yuyana canchij. Por ejemplo, pai tucuita rurashcacunapi cutin cutin yuyashpami cushilla sintirinchij (Salmo 8:3, 4). Ñucanchijtapish paipaj munaita pajtachichun ayudashcapi yuyashpami paitaca shungumanta respetashun. Jehová Diospaj shutica sumajmi can. Cai shutica pai ima shina cashcata, imallata rurashcata, imallata ruragrishcatami ricuchin (Salmo 89:7, 8).

8. Deuteronomio 32:2 y 3-pi nishca shinaca ¿Jehová Diosca paita sirvijcuna paipaj shutihuan imata rurachuntaj munan?

⁸ Israelitacuna Dios cusha nishca Allpaman manaraj yaicujpimi, Yaya Diosca Moisesmanca shuj cantota yachachirca (Deuteronomio 31:19). Cutin Moisesca paiman yachachishca cantotaca israelitacunamanmi yachachina carca (Deuteronomio 32:2, 3-ta liyipai). Cai ishqui versocunapi cutin cutin yuyashpaca Jehová Dios paipaj shutita mana pacachun munashcatami yachanchij. Ashtahuanpish tucui gentecuna paipaj shutita rijsichun, parlachun munashcatami intindinchij. Ñutu tamya urmajpimi plantacunaca alli huiñan. Shinallatajmi Jehová ima shina cashcata Moisés yachachijpi, paipaj shutita rijsichijpica israelitacunaca alli sintirircacuna. Chashnami paicunapaj fetapish sinchiyachircacuna. Ñucanchij yachachishcacunapish cai ñutu tamya shina gentecunata ayudachunca ¿imatataj rurana canchij?

9. ¿⁠Jehová Diospaj shutita jatunyachingapajca imatataj rurana canchij?

⁹ Huillacushpaca Jehová Diospaj shutita gentecunaman yachachingapajmi Bibliata utilizana canchij. Shinallatajmi publicacioncunata saqui tucunchij, videocunatapish ricuchi tucunchij. Ashtahuancarin jw.org paginata ricuchunmi animai tucunchij. Chai paginapi tiyaj yuyaicunata ricushpaca Jehová Diosta jatunyachina cashcatami intindingacuna. Trabajopi cashpa, escuelapi cashpa, viajacushpapish Jehová Dios ima shina cashcata huillashunchij. Ñucanchijpajpish cai Allpapajpish pai imallata rurasha nishcata parlashunchij. Caicunata uyashpaca Yayitu Dios paicunata achcata cꞌuyashcatami punta cutin cuentata cungacuna. Jehová Diosmanta alli yachachishpaca paipaj shutitami jatunyachinchij. Ashtahuancarin paicunaman Diosmanta panda yuyaicunata yachachishcata cuentata cuchunmi ayudanchij. Bibliamanta gentecunaman yachachijpica paicunaca cushilla tranquilomi sintiringacuna (Isaías 65:13, 14).

10. ¿Bibliamanta estudiajcunamanca imamantataj Diospaj mandashcacunata yachachishpallaca mana saquirina canchij?

¹⁰ Bibliamanta estudiota cucushpaca yachacujcuna Diospaj shutita rijsichun, paipaj shutita parlachunmi ayudanata munanchij. Ashtahuancarin Dios ima shina cashcata rijsichunmi munanchij. ¿Diospaj mandashcacunata yachachishpa, ima shina causana cashcata yachachishpachu Diosta alli rijsichun ayudashun? Chaita rurashpaca manachari ayudashun. Bibliamanta estudiacujcunaca Jehová Diospaj mandashcacunata yachashpachari paita respetangacuna. Pero ¿Jehová Diostaca cꞌuyashcamantachu cazungacuna? Eva ima tucushcata yuyashun. Evaca Diospaj mandashcacunata rijsircami. Pero paica Diostaca mana shungumanta cꞌuyarcachu. Adanpish chaitami rurarca (Génesis 3:1-6). Chaimanta Diospaj mandashcacunata yachachishpallaca mana saquirinachu canchij.

11. ¿Bibliamanta yachacujcuna Diosta cꞌuyachunca ima shinataj ayudai tucunchij?

 ¹¹ Diospaj mandashcacunaca alajami can. Chaicunami ñucanchij alli causachun ayudan (Salmo 119:97, 111, 112). Bibliamanta yachacujcuna caicunata intindichunca Dios tucuicunata cꞌuyashcamanta mandashcacunata cushcatami intindina can. Yachacujcunataca cashnami tapui tucunchij: “¿Imamantataj Jehová Diosca caita rurangui caitaca ama rurangui nishpa mandan? Caicunaca Jehová Diosmantaca ¿imatataj yachachin?”. Bibliamanta yachacujcunaman Jehová Diospi yuyachun, paipaj shutita cꞌuyachunmi yachachina canchij. Chashnami paicunapaj shunguman chayashun. Chaita rurajpica paicunaca Diospaj mandashcacunata valichishpami Diostaca shungumanta cꞌuyangacuna (Salmo 119:68). Shinallataj paicunapaj femi sinchiyanga. Sinchi llaquicuna ricurijpipish ahuantangacunami (1 Corintios 3:12-15).

12. a) ¿Davidca shuj cutinca imamantataj shungu ishquipi chaupirishca shina carca? b) ¿Davidca Diosta mana cazushcamantaca imataj tucurca?

¹² Salmo 86:11-pi rey David quillcashca shimicunaca valishcami can. Chaipica: “Ñuca shungupi sinchiyachiyari” ninmi. Cai shimicunaca Diosta tucui shunguhuan sirvinamantami parlacun. Rey Davidca Diosta tucui shunguhuan sirvina sinchi cashcatami cuentata curca. Davidca paipaj huasi terrazapi shayacushpaca Betsabé cazada huarmi armacujtami ricurca. Chai ratoca Davidca ¿Diostaca tucui shunguhuanchu manchaj carca? Davidca Jehová Dios shujtajpaj huarmita ama munangui nishcataca allimi yacharca (Éxodo 20:17). Pero paica cai huarmitaca ricushpami saquirirca. Davidca Jehovatapish jatunyachinatami munarca. Betsabehuanpish chayarinatami munarca. Chaimantami paipaj shunguca ishquipi chaupirishca shina carca. Davidca Jehová Diosta achca huatacunata manchashpa, cꞌuyashpa causashpapish paipaj mana alli munaitami pajtachirca. Chaimantami mana allicunata rurarca. Paica Diospaj shutitami pingaipi churarca. Shinallataj mana culpata charijcunata, paipaj familiatapishmi llaquichirca (2 Samuel 11:1-5, 14-17; 12:7-12).

13. ¿David cutin tucui shunguhuan Diosta sirvi callarishcataca ima shinataj yachanchij?

¹³ Jehová Diosca Davidtaca castigarcami. Pero paica cutinmi Jehová Dioshuan alli tucurca (2 Samuel 12:13; Salmo 51:2-4, 17). Paica Diosta tucui shunguhuan mana cazushcamanta llaquicunata charishcataca mana cungarircachu. Salmo 86:11-pi David nishcacunataca: “Ñuca shungu ama ishquipi chaupishca shina cachun ayudahuai” nishpapishmi  traduci tucun. ¿Pai mañashcacunataca Jehová Diosca cutichircachu? Ari. Davidmanta parlashpaca Bibliapica: ‘Paica Diostaca tucui shunguhuanmi cazurca’ ninmi (1 Reyes 11:4; 15:3).

14. a) ¿Imatataj tapurina canchij? b) ¿Imamantataj chashna tapurina canchij?

¹⁴ Davidpaj ejemploca ñucanchijtaca achcatami animan. Shinallataj ñucanchijpish pai laya juchapi ama urmachunmi ayudan. Ñucanchijca achca huatacunata o ashalla huatacunata Diosta sirvicushpapish cashna nishpami tapurina canchij: “Diosta tucui shunguhuan sirvichun Diablo jarcasha nijpipish ¿Jehová Diostaca tucui shunguhuanchu sirvicuni?”.

15. ¿Diosta respetashpaca mana alli fotocuna o peliculacuna ricurijpica imatataj rurashun?

¹⁵ Internetpi o televisionpi shuj fotota, shuj peliculata ricushcamanta mana alli munaicunata chari callarishpaca ¿imatataj rurana canchij? Huaquinpica chaicunaca mana huainayanahuan chagrurishcachu can nishpami yuyai tucunchij. Pero Diosta tucui shunguhuan ama sirvichunca Diabloca chashna yuyachunmi pandachi tucun (2 Corintios 2:11). Cai fotocunaca yantata chaupingapaj shuj hacha shinami can. Callaripica yantata chaupijca hacha puntatachari yantapica asha asha catichin. Hachata ashtahuan ashtahuan yantapi yaicuchijpica yantaca tucuimi chaupirin. Mana alli fotocunaca chai hacha filo shinami can. Puntapica cai fotocunata ricushpaca mana ima tucushachu nishpachari yuyashun. Pero caicunata ashtahuan ashtahuan ricushpaca hacha yantata chaupij shinami ñucanchij shungutaca chaupinga. Caita rurashpaca jatun juchapimi urmashun. Chaimanta tucui mana alli yuyaicuna ñucanchij shunguman yaicuchun ama saquishunchij. Jehová Diospaj shutita tucui shunguhuan respetashpa catishunchij.

16. ¿Diablopaj trampacunapi ama urmangapajca imatataj tapurina canchij?

¹⁶ Diabloca mana alli fotocunahuan o videocunallahuanca mana pandachinchu. Paica  shujtaj trampacunatapishmi churan. Diablo trampacunata churajpica ¿imatataj ruranchij? Tal vez huaquincunaca: “Caita ruranaca mana jatun juchachu, congregacionmantapish mana llujchingachu” ningacunami. Chashnaca mana yuyanachu can. Ashtahuancarin cashna nishpami tapurina canchij: “¿Diabloca Diosta ama tucui shunguhuan sirvichunchu pandachicun? ¿Cashna mana alli munaicunata rurashpaca Diospaj shutitaca pingaipichu churani? ¿Caita rurashpaca Diospajmanchu cꞌuchuyasha o paimantachu caruyasha?”. Cai tapuicunapi cutin cutin yuyarishunchij. Cai tapuicunata shungumanta cutichingapaj Dios yachaita cuchun mañashunchij (Santiago 1:5). Chashnami Satanaspaj trampacunapi mana urmashpa Jesús shina Diablotaca: “Anchui, Satanás” nishun (Mateo 4:10).

17. ¿Diosta mana tucui shunguhuan sirvishpaca imataj tucushun? Shuj ejemplomanta parlai.

¹⁷ Diosta tucui shunguhuan sirvinami minishtirishca can. Caipi yuyashun. Shuj equipo de futbolpi pugllajcunachari paicunapura mana alli apanacuncuna. Shujcunaca paicunata jatunyachichun, cutin shujtajcunaca paicuna munashca shinallami pugllasha nincuna. Maijancunacarin entrenadortapish mana respetasha nincunachu. Paicunapura chashna comportarishpaca shuj partidopica mana ganai tucuncunamanchu. Pero futbolpi pugllajcuna shuj shinalla alli apanacushpaca mishai tucungacunami. Ñucanchij yuyaicuna, munaicunapish shuj shinalla cashpaca Diostami alli sirvi tucushun. Pero Diabloca Diosta tucui shunguhuan sirvichunca mana munanchu. “¿Ñuca munashcatachu rurasha o Dios munashcatachu rurasha?” nishpa dudachunmi Diabloca munan. Pero Diosta sirvisha nishpaca tucui shunguhuanmi sirvina canchij (Mateo 22:36-38). Shungumanta Diosta sirvinata Diablo jarcachunca manataj saquinachu canchij.

18. Miqueas 4:5-pi nishca shinaca ¿canca imatataj rurasha ningui?

¹⁸ Ñucanchijpish David shina Jehová Diosta mañashunchij. Paica: “Ñuca shungupi sinchiyachiyari” nircami. Cai nishcacunata ñucanchij causaipi pajtachingapaj esforzarishunchij. Ima decisionta agllacushpapish Diospaj shutita tucui shunguhuan respetashcatami ricuchina canchij. Caicunata pajtachishpaca testigo de Jehová canatami allipi saquishun (Proverbios 27:11). Ñucanchijpish profeta Miqueas shinami: “Ñucanchijca Jehová Diospaj shutitami punllanta, huiñai huiñaicama jatunyachishun” ni tucunchij (Miqueas 4:5, NWT ).