1. Eaa te mataku i te Atua, e eaa i anoanoia ai no te aronga te akaperepere ra ia Iehova?

AKAPEREPERE te au Kerititiano i te Atua, e te mataku katoa ra ratou iaia. Ki tetai pae ka ngata rai teia i te mārama. Inara, kare tatou e uriuri nei no te mataku tei matauia. Ka uriuri tatou i tetai atu tu mataku. Te tangata tei mataku i te Atua e tu akangateitei tona iaia. Kare ratou e inangaro i te akamareka kore i to ratou Metua i te rangi, no te mea kare ratou e inangaro i te takino i to ratou pirianga oa kiaia.—Sala. 111:10; Mase. 8:13.

2. No runga i te au tuatua a te Ariki ko Davida ia Salamo 86:11, eaa nga mea e rua ta tatou ka uriuri?

² E tatau ia Salamo 86:11. Ia koe e akamanako ra i teia irava, ka kite koe e kua mārama te Ariki ko Davida tiratiratu ra, i te puapinga kia mataku i te Atua. Ka uriuri tatou akapeea me taangaanga i te au tuatua akauruia a Davida. Mea mua, ka akara matatio tatou i te au tumu kia akangateitei i te ingoa o te Atua. Te rua, ka uriuri tatou akapeea me akaari e te mataku ra tatou i te ingoa o te Atua.

3. Eaa te tupuanga tei tauturu ia Mose kia akangateitei ua rai i te ingoa o te Atua?

³ Akamanako ana i ta Mose i manako i te pipini anga ki roto i te toka e kua kite i tetai orama, to Iehova kaka. Akakite te Insight on the Scriptures e “ko tetai tupuanga umere roa atu teia ta tetai tangata i kite i mua ake i te aerenga mai o Iesu Karaiti.” Rongo a Mose i teia au tuatua a te angera: “Ko  Iehova, Ko Iehova, e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara.” (Exo. 33:17-23; 34:5-7) Penei kua maara ua ia Mose tei tupu me taiku aia i te ingoa o Iehova. No reira a Mose i muri mai i akamatakite ei i te iti tangata o te Atua ia Iseraela “kia mataku koe i taua ingoa mataku e te kakā ra.”—Deu. 28:58.

4. Akamanako anga i teea au tu te ka akakeu ia tatou kia akangateitei ia Iehova?

⁴ Me akamanako tatou i te ingoa o Iehova, e akamanako tatou e noai teia ingoa. E akamaara tatou i tona au tu, tona mana ririnui, te pakari, te tu tika, e tona aroa. Me akamanako tatou i teia au tu ka akangateitei tatou iaia.—Sala. 77:11-15.

5-6. (a) Eaa te aiteanga i to te Atua ingoa? (e) Ia Exodo 3:13, 14 e Isaia 64:8, akapeea a Iehova me akatupu i tona anoano?

⁵ Eaa ta tatou i kite no te aiteanga o te ingoa o te Atua? Maata te aronga kite te karanga ra, te aiteanga o te ingoa o Iehova “Ka Akatupu Aia.” Te akamaara maira te reira e kare to Iehova anoano e rauka i te araiia, ka akatupu aia i te reira noatu eaa te tu. Akapeea?

⁶ Ka rauka ua ia Iehova i te akatupu i tona anoano e tona akakoroanga i tetai ua atu taime. (E tatau ia Exodo 3:13, 14.) E akamaroiroiia ana tatou kia akamanako i to te Atua tu ngateitei. Ka rauka katoa ia Iehova i te akakeu i tona au tavini apa ua kia rave i tana e anoano ra e te akatupu i tona akakoroanga. (E tatau ia Isaia 64:8.) Na roto i teia, ka rauka ia Iehova i te akatupu i tona anoano. Kare tona anoano e tona akakoroanga e rauka i te tapu.—Isa. 46:10, 11.

7. Akapeea tatou me akaari e te akaperepere ra tatou i to tatou Metua i te rangi?

⁷ Ka akaperepere tatou i to tatou Metua i te rangi na te akamanako anga i tana i rave e tana i akakeu ia tatou kia rave. Ei  akaraanga, me akamanako tatou i te au mea manea tana i anga, e tana au mea i rave, ka akangateitei tatou iaia. (Sala. 8:3, 4) E me akamanako tatou i ta Iehova i akatupu kia rauka ia tatou i te rave i tona anoano, ka akangateitei tatou iaia. Riro to Iehova ingoa ei akauru i te tu ngateitei! Kapiti mai te au mea nona ei Metua no tatou, tana i rave no tatou, e tana ka rave no tatou.—Sala. 89:7, 8.

8. Eaa ta Deuteronomi 32:2, 3 e akakite maira i to Iehova manako no tona ingoa?

⁸ I mua ake ka tomo ei te ngati Iseraela ki roto i te Enua Taputouia, apii a Iehova i tetai imene kia Mose. (Deu. 31:19) E oti, kua apii a Mose i teia imene ki te tangata. (E tatau ia Deuteronomi 32:2, 3.) Ia tatou e akamanako ra i te irava 2 e te 3, taka meitaki kare a Iehova e inangaro i tona ingoa kia uunaia, mei te mea e e tapu roa te reira kia tuatuaia. Inangaro aia kia kite te katoatoa i tona ingoa! Mei teaa atura te akameitakianga no te tangata te rongo ia Mose te apii ia Iehova e Tona ingoa kaka kia ratou! Kua akamaroiroi te reira ia ratou, mei te ua maru rai ki runga i te ngangaere. Akapeea tatou me akaaite i ta tatou apiianga mei te reira?

9. Akapeea tatou me tauturu i te akatapu i to Iehova ingoa?

⁹ Me tutu aere tatou i tera are i tera are e me tutu aere ki te ngai tangata, ka taangaanga tatou i ta tatou Pipiria te akaari i to te Atua ingoa, ko Iehova. Ka oronga tatou i te au puka manea, te au vitio meitaki, e te au atikara i runga i te website ei akangateitei ia Iehova. I te ngai angaanga, i te apii, te teretere aere, ka tuatua ua atu tatou no runga i to tatou Atua akaperepere e tona au tu manea. Me akakite tatou i to Iehova akakoroanga aroa no te tangata e te enua, penei ka kite ratou e te akaperepere ra a Iehova ia ratou. Ia tatou e tutu aere ra i te tuatua mou no runga i to tatou Metua aroa, te akatapu ra tatou i te ingoa o te Atua. Te akakore ra tatou i te au pikikaa e te akakino anga tei apiiia no runga ia Iehova. Ka oronga tatou i te au apiianga akamaroiroi.—Isa. 65:13, 14.

10. Me apii tatou i te Pipiria, eaa te tumu e maata atu ta tatou ka rave i te apii ua i te au apiianga e te au turanga a te Atua?

¹⁰ Me apii tatou i te Pipiria, ka inangaro tatou i te tangata apii kia kite e te taangaanga i to Iehova ingoa. Ka tauturu katoa tatou ia ratou kia kite meitaki ia Iehova. Ka akatupu ainei tatou i teia me ka apii ua tatou i te au apiianga, te au turanga o te Atua, e te au ture rikiriki? Penei ka apii tetai tangata apii i te ture a te Atua, e ka reka i te reira. Inara ka akarongo ainei te reira tangata ia Iehova no tona inangaro Iaia? Akamaara, kua kite a Eva i te ture a te Atua, inara kare aia i akaperepere ana i Tei oronga mai i te ture; e Adamu katoa. (Gene. 3:1-6) No reira e maata atu ta tatou ka rave i te apii ua i te au apiianga e te au turanga tika a te Atua.

11. Me apii i te au apiianga e te au turanga a te Atua, akapeea tatou me tauturu i te aronga e apii ra kia akaperepere i Tei oronga mai i te ture?

¹¹ E meitaki ua ana ta Iehova apiianga e te au turanga. (Sala. 119:97, 111, 112) Inara, penei kare te aronga e apii ra e kite ana i teia, naringa ratou i kite i to Iehova aroa. Penei ka ui tatou ki te aronga e apii ra: “Eaa toou manako i pati ei te Atua i tona au tavini  kia rave i tera e eiaa e rave i tera? Eaa ta te reira e akakite maira no runga Iaia?” Me tauturu tatou i te aronga e apii ra kia akamanako ia Iehova e kia akaperepere i tona ingoa kaka, ka pakia to ratou ngakau. Ka akaperepere te aronga e apii ra i te au ture pera katoa Tei oronga mai i te ture. (Sala. 119:68) Ka tupu katoa to ratou akarongo e ka akakoromaki i te au timata anga ngata.—1 Kori. 3:12-15.

12. Akapeea te ngakau rua i tupu ei kia Davida, e eaa tei tupu?

¹² E tuatua puapinga ta Salamo 86:11 e “tavaitai toku ngakau.” Akauruia te Ariki ko Davida kia tata i teia au tuatua. I tona oraanga, kua kite aia e e māmā ua kia ngakau rua. Iaia i te ngai teitei i tona are, kite atura aia i te vaine a tetai e pai ra. I te reira taime, kua tavaitai ainei me kua ngakau rua a Davida? Kite meitaki aia i te turanga a te Atua: “Auraka katoa koe e morimori i te vaine a to tangata tupu.” (Exo. 20:17) Inara, kua akara ua atu aia. Kua tupu tona ngakau rua, te inangaro i te vaine, ko Bateseba, e te anoano i te akamareka ia Iehova. Noatu kua akaperepere e kua mataku a Davida ia Iehova, kua riro tona anoano tau kore ei timata iaia. I te reira taime, kua rave a Davida i te kino. Kua riro teia ei akakino i to Iehova ingoa. Akatupu katoa a Davida i te kino ki te au tangata memeitaki, kapiti mai tona ngutuare tangata.—2 Samu. 11:1-5, 14-17; 12:7-12.

13. Akapeea tatou e kite ei e kua tavaitai akaou to Davida ngakau?

¹³ Kua ako a Iehova ia Davida, e i muri mai kua mako akaou aia. (2 Samu. 12:13; Sala. 51:2-4, 17) Maara ia Davida te manamanata e te taitaia tei tupu mai no tona ngakau rua. Penei ka uriia a Salamo 86:11: “E oronga mai i te ngakau tavaitai noku.” Tauturu ainei a Iehova ia Davida kia tavaitai tona ngakau? Ae, no te mea akakite te Tuatua a Iehova e e “ngakau [to Davida] i tau ki tona Atua kia Iehova.”—1 Ari. 11:4; 15:3.

14. Eaa ta tatou ka ui kia tatou uaorai, e no teaa ra?

¹⁴ Riro to Davida akaraanga ei akamaroiroi e ei akamatakite ia tatou. Ka riro tana ara kino ei akamatakite i te au tavini o te Atua i teia rā. Noatu kua akamata ua akera tatou i te tavini ia Iehova e kua tavini tatou no tetai tuatau roa, ka ui tatou, ‘Te patoi ainei au i ta Satani tauta anga kia tupu toku ngakau rua?’

15. Akapeea te mataku i te Atua me paruru ia tatou me akara i te au tutu viivii?

 ¹⁵ Ei akaraanga, me kite koe i tetai tutu i runga i te TV e te Initaneti te ka akakeu i te au anoano tau kore, eaa taau ka rave? Penei e māmā ua i te manako kare teia tutu e te teata, i te peu viivii o te ainga. Penei ka akatupu a Satani i te ngakau rua kia koe? (2 Kori. 2:11) Ka aite te reira tutu ki tetai toka tiava tei paoia kia akatakake i te rakau maatamaata. I te akamata anga ka paoia te toka tiava, ngaa atura te rakau. Ka aite te tutu viivii i runga i te media ki te ngai koi o te toka tiava? Penei e meangiti ua te akamata anga, inara ka tupu mai te ara tei akatupu i te ngakau rua e ka takino i te tu tiratiratu o tetai tangata. No reira e arai i tetai ua atu apinga tau kore kia kore e ō ki roto i toou ngakau! E tavaitai i toou ngakau kia mataku i to Iehova ingoa!

16. Me timataia, eaa te uianga ta tatou ka ui?

¹⁶ I te pae i te au tutu viivii, te tuku maira a Satani i te au timata anga tukeke. Eaa ta tatou ka rave? E māmā ua i te akamanako e kare teia e kino ana. Ei akaraanga, penei ka akamanako tatou: ‘Penei paa, kare au e akaateaia ki vao i te putuputuanga me rave au i teia, no te mea kare te reira e kino ana.’ E manako tarevake teia. E meitaki ake tatou i te ui: ‘Te timata maira ainei a Satani iaku kia ngakau rua? Me rave ua au i te anoano tau kore, ka akakino ainei au i te ingoa o Iehova? Ka akavaitata ainei teia iaku ki te Atua, me ka akamamao iaku?’ E akamanako meitaki i teia au uianga. E pure ma te pakari kia rauka te pauanga tika. (Iako. 1:5) Ka paruru teia ia koe. Ka tauturu ia koe kia patoi i te timata anga, mei ta Iesu i rave i tona karanga anga: “E aere ke atu koe e Satani.”—Mata. 4:10.

17. Eaa i puapinga kore ei te ngakau rua? Akamārama mai.

 ¹⁷ Puapinga kore te ngakau rua. Akamanako ana i tetai pupu tipoti kare tona au mema e au ana. Inangaro tetai pae kia rongonui ratou, tetai pae kare e aru ana i te ture, tetai pae kare e akangateitei ana i te tangata tereni. Kare teia pupu e re i ta ratou kanga poro. Inara, me taokotai te pupu, ka re ratou. Ka aite toou ngakau ki te reira pupu meitaki, me taokotai toou manako, anoano, e te manako ngakau no te tavini ia Iehova. Akamaara, ka inangaro a Satani ia koe kia akatupu i te ngakau rua. Ka inangaro aia kia putoto toou manako, anoano, e te manako ngakau e kia taumaro i te au turanga a Iehova. Inara, ka anoanoia toou ngakau kia tavaitai no te tavini ia Iehova. (Mata. 22:36-38) Eiaa e akatika ia Satani kia akatupu i te ngakau rua kia koe!

18. Kia rotai ki te au tuatua a Mika 4:5, eaa taau ka tauta i te rave?

¹⁸ Pure kia Iehova mei ia Davida: “Kia tavaitai toku ngakau i te mataku anga i to ingoa.” E taangaanga i teia pure ki roto i toou oraanga. I te au rā katoa, e tauta kia riro taau iki anga noatu te rikiriki, ei akaari e te akangateitei ra koe i to Iehova ingoa tapu. Me pera koe ei Au Kite no Iehova, ka akamanako meitaki koe i te reira ingoa. (Mase. 27:11) Ka piri tatou ki te peroveta ko Mika i te tuatua: “Ka aaere ra tatou i te ingoa o Iehova, o to tatou Atua, e tuatatau ua atu.”—Mika 4:5.