1. Со значинела те дара таро Девел, хем соске окола со мангена е Јехова мора те даран лестар?

О ХРИСТИЈАЊА мангена е Девле, ама исто аѓаар дарана лестар. Несавенге акава шај нане логично. Ама, акате на керела пе лафи баши дар колатар со тресинаја. Ка кера лафи баши појавер дар која со осетинена окола со хор поштујнена хем искрено ценинена е Девле. Ола дарана те на разочаринен пле небесно Даде адалеске со на мангена те руминен пло паше амалипе леа (Пс. 111:10; Изр. 8:13).

2. Спрема е Давидескере лафија сој пишиме ко Псалм 86:11, кола дуј буќа ка дикха?

² Читин Псалм 86:11. Таро акава стихо јасно дикхела пе кај о верно цари о Давид халило кобор тано важно хор те поштујнел е Девле. Те дикха сар шај амен да те живина спрема о лафија таро акава Псалм. Прво, ка дикха соске ваљани те сикава хор поштовање спрема е Девлескоро анав. Хем дујто, ка дикха сар шај те сикава асавко хор поштовање ко са со кераја ко амаро живото.

3. Која ситуација шај поможинѓа е Мојсееске секогаш хор те поштујнел е Девлескоро анав?

³ Замислин сар осетинела пе сине о Мојсеј кеда сине ки планина Хорив хем кеда дикхља е Јеховаскири слава сар накхља англи лесте. Акава веројатно сине о најчудесно  нешто со доживинѓа несаво мануш англедер те авел о Исус Христос ки Пхув. О Мојсеј шунѓа акала лафија, кола веројатно вакерѓа лен јекх ангели: „Јехова! Јехова! Девел сој милостиво хем сочувствително, на хољанела сигате, пхердо тано шукарипе хем чачипе, сикавела верно мангипе буте милја манушенге, простинела грешке, погрешна постапке хем грево“ (2. Мој. 33:17-23; 34:5-7). О Мојсеј шај мислинела сине ки акаја ситуација кеда ка спомнинел сине е Јеховаскоро анав. Ни хари на чудинела амен адава со покасно предупрединѓа е Израелцон, кола со сине е Девлескоро народо те овел лен дар хем хор поштовање спрема лескоро анав (5. Мој. 28:58).

4. Со ка поможинел амен панда повише те поштујна е Јехова?

⁴ Кеда размислинаја башо анав Јехова, шукар тано исто аѓаар хор те размислина башо адава сави личност тано ов. Адава со ка размислина башо е Девлескере особине, сар сој лескири моќ, мудрост, правда хем мангипе, шај те поттикнинел амен панда повише те поштујна ле (Пс. 77:11-15).

5-6. а) Со значинела е Девлескоро анав? б) Спрема 2. Мојсеева 3:13, 14 хем Исаија 64:8, сар о Јехова керела адава со мангела?

⁵ Со џанаја башо адава со значинела е Девлескоро анав? Бут научникија сложинена пе кај о анав Јехова значинела „ов керела те овел“. Акава сикавела кај ништо нашти те чхинавел е Јехова те исполнинел пли намера, хем кај секогаш керела адава со ов мангела. Сар?

⁶ О Јехова овела са сој потребно те шај те керел пли намера. (Читин 2. Мојсеева 3:13, 14.) Бут пути сием поттикниме те размислина башо акава посебно дело тари е Девлескири личност. Освен адава, о Јехова шај те поможинел пле несовршена слугенге те овен са сој потребно те шај те служинен леске хем те керен лескири намера. (Читин Исаија 64:8.) Аѓаар, о Јехова исполнинела пли волја. Ништо нашти те чхинавел ле те керел адава со мангела (Иса. 46:10, 11).

7. Сар шај те бајрара амаро ценење спрема амаро небесно Дад?

 ⁷ Шај те бајрара амаро ценење спрема амаро небесно Дад аѓаар со ка размислина башо са адава со ов керѓа хем башо адава со поможинела амен те кера. На пример, кеда размислинаја башо буќа со створинѓа, тегани сикаваја побаро поштовање спрема о Јехова (Пс. 8:3, 4). А кеда размислинаја сар ов поможинела амен те ова са сој потребно те шај те кера лескири волја, тегани панда повише поштујнаја ле. О анав Јехова чаче тано достојно хор те поштујнел пе! Ко адава анав тани вклучими цели личност амаре Дадескири, са адава со керѓа џи акана, хем са адава со ка керел ки иднина (Пс. 89:7, 8).

8. Спрема 5. Мојсеева 32:2, 3, со аџикерела о Јехова таро пле слуге поврзимо лескере анавеа?

⁸ Англедер те кхувен о Израелција ки Ветими пхув, о Јехова вакерѓа е Мојсееске те пишинел о лафија тари јекх гили (5. Мој. 31:19). О Мојсеј ваљанѓа те сикавел акаја гили е народо. (Читин 5. Мојсеева 32:2, 3.) Таро 2 хем 3 стихо јасно дикхела пе кај о Јехова на мангела лескоро анав те овел гаравдо хем на мангела о јавера те мислинен кај тано превише свето те шај те спомнинел пе. Ов мангела лескоро анав те џанен сарине! Е Израелцон сине лен бари чест те овен сикавде таро Мојсеј башо Јехова хем башо лескоро баро анав. Адава со вакерѓа ленге о Мојсеј денѓа лен сила хем охрабринѓа лен, исто сар јекх ситно бршим со освежинела и чар. Сар шај амен да те сикава е јаверен ко јекх асавко начин?

9. Сар шај те поможина те славинел пе е Јеховаскоро свето анав?

⁹ Кеда проповединаја таро кхер ко кхер, или сведочинаја ко прометна тхана, шукар тано те користина и Библија те шај сикаваја е манушенге е Девлескоро анав, Јехова. Освен адава, шај те да лен нешто таро амаре публикацие, те сикава ленге бут шуже видеоклипија хем те сикава ленге амари интернет-страница која со фалинела е Јехова. Џикоте сием ки бути, ки школа или џикоте патујнаја, иси амен прилика те кера лафи е јаверенцар башо амаро мангло Дад хем те вакера ленге саво тано ов. Кеда кераја некасаја лафи баши лескири бут шужи намера башо мануша хем и Пхув, поможинаја ленге те дикхен е Јехова јавере јакхенцар. Адалеа со вакераја ленге о чачипе башо амаро шукар Дад, амен учествујнаја ко адава те славинел пе лескоро свето анав. Аѓаар поможинаја ленге те хаљовен кај сине ленге вакерде бут ховајба башо Девел. Адава со вакераја е јаверенге тари Библија шај те дел лен бари сила хем те освежинел лен (Иса. 65:13, 14).

10. Кеда проучинаја и Библија е интересентенцар, соске нане доволно те сикава лен само башо адава со родела о Девел хем башо лескере праведна мерилија?

¹⁰ Кеда проучинаја и Библија е интересентенцар, мангаја те поможина ленге те џанен хем те користинен е Јеховаскоро анав. Освен адава, мангаја те поможина ленге те хаљовен сој тано вклучимо ко адава анав. Дали ка успејна ко акава ако сикаваја лен само башо е Девлескере законија, мерилија хем правилија? Некој шај шукар те пенџарел е Јеховаскере законија, па чак хем бут те ценинел лен. Ама, дали ка шунел е Јехова адалеске со мангела ле? Сетин тут кај и Ева џанела сине е Девлескоро закони, ама на сине ла чачутно мангипе спрема о Девел. Исто случај сине е Адамеа (1. Мој. 3:1-6). Спрема адава, нане доволно те сикава е јаверен само башо адава со родела лендар о Девел хем башо лескере праведна мерилија.

11. Сар шај те поможина е интересентенге те заманген е Јехова џикоте проучинаја лескере законија хем мерилија?

¹¹ Адава со родела амендар о Јехова хем  лескере мерилија тане секогаш башо амаро шукарипе (Пс. 119:97, 111, 112). Ама, ако о интересентија на хаљовена кај о Јехова денѓа о законија хем о мерилија адалеске со мангела амен, шај нане те дикхен аѓаар ки ленде. Адалеске, шај те пуча лен: „Со мислинеа, соске о Девел родела лескере слуге те керен акава? Или, соске вакерела те на керен адава? Со сикавела аменге акава баши лесте?“ Ако поможинаја е интересентенге те размислинен башо Јехова хем те овел лен искрено ценење башо лескоро баро анав, најверојатно о чачипе ка кхувел ленге ко вило. Аѓаар ка заманген на само о законија него е Девле да (Пс. 119:68). Адава ка поможинел ленге те бајровен ки вера хем ка дел лен сила те издржинен о пхаре испитија кола со ка овен лен (1. Кор. 3:12-15).

12. Сар ки јекх прилика о Давид дозволинѓа лескоро вило те овел поделимо, хем саве сине о последице таро адава?

¹² Ко Псалм 86:11, о Давид молинѓа пе: „Поможин манге цело вилеа те дарав таро тло анав!“. Акаја тани бут важно мисла. Ко пло живото, о Давид дикхља кобор локхе о вило шај те овел поделимо. Ки јекх прилика џикоте сине ко крови таро пло кхер, дикхља јекхе прандиме џувља сар нанѓола. Дали ко адава моменти е Давидескоро вило сине цело? Ов џанела сине е Јеховаскоро закони: „Ма манг те овел тли тле пашутнескири ромни“ (2. Мој. 20:17). Ама јасно тано кај ов продолжинѓа те дикхел е Витсавеа. И желба спрема лате ули посилно тари желба те керел и волја е Јеховаскири. Иако бут време мангља е Јехова хем хор поштујнела ле сине, о Давид постапинѓа спрема пли себично желба. Адалеске, ки адаја прилика постапинѓа погрешно хем анѓа лаџ е Јеховаскере анавеске. Освен адава, анѓа баре муке е манушенге со на сине крива, машкар коленде со сине лескири фамилија (2. Сам. 11:1-5, 14-17; 12:7-12).

13. Котар џанаја кај о Давид палем служинела сине е Јеховаске цело вилеа?

¹³ Откеда о Јехова укоринѓа е Давиде, ов каинѓа пе хем палем уло паше амал леа (2. Сам. 12:13; Пс. 51:2-4, 17). О Давид на бистерѓа и дукх хем о неволје кола со сине последица таро адава со дозволинѓа лескоро вило те овел поделимо. Дали о Јехова поможинѓа леске палем те овел ле цело вило? Оја. Покасно ко е Девлескоро лафи сине пишимо кај е Давидескоро вило сине „целосно е Јеховаја, лескере Девлеа“ (1. Цар. 11:4; 15:3).

14. Со ваљани те пуча амен, хем соске?

¹⁴ Е Давидескоро пример шај бут те охрабринел амен. Ама, лескоро пхаро грево тано  исто аѓаар предупредување аменге авдиве. Бизи разлика дали акана сигенде почминѓем те служина е Јеховаске или бершенцар више служинаја леске, ваљани те пуча амен: „Дали боринава ман кеда о Сатана пробинела те поделинел мло вило?“

15. Сар шај и дар таро Девел те аракхел амен ако икљона аменге провокативна слике ки телевизија или ко интернет?

¹⁵ На пример, со ка кере ако ки телевизија или ко интернет икљона слике со шај те керен ки туте неморална мисле? Шај локхе те вакере туке кај адава нане порнографија. Ама, дали шај ко асавко начин о Сатана пробинела те поделинел тло вило? (2. Кор. 2:11). Јекх асавки провокативно слика шај те овел сар јекх оштро товер кова со користинела пе те шај те пхаравел пе јекх баро трупцо каш. Кеда прво пути кхуваја е товереа о трупцо на одвојнела пе одма. Ама, откеда о товер ка кхувел похор ко трупцо ко крајо ов ка одвојнел пе ко дуј делија. Шај ли о слике со дикхаја лен те овен сар адава товер? Адава со ко почеток на дикхјола опасно шај бут сигате те поделинел некаскоро вило, а адава шај те чхивел ле те керел грево хем те чхинавел те овел верно е Девлеске. Адалеске ма дозволин ништо со нане пристојно те кхувел ко тло вило. Трудин тут цело вилеа те дара таро е Јеховаскоро анав!

16. Кола пучиба ваљани те пуча амен кеда ка аракхљова ко искушение?

¹⁶ Освен провокативна слике, о Сатана користинела јавера да буќа те шај те чхивел амен те постапина погрешно. Локхо тано те мислина аменге кај акала буќа нане добором лошна. На пример, шај те мислина: „Па, башо акава нане те овав исклучимо. Значи нане добором страшно“. Асавко размислибе тано бут погрешно. Ка овел пошукар те пуча амен: „Дали о Сатана користинела акава искушение те шај те поделинел мло вило?  Ако постапинава спрема мле погрешна желбе, дали ка анав лаџ е Јеховаскере анавеске? Дали акава ка керел ман попаше мле Девлеа или ка цидел ман подур лестар?“ Размислин башо акала пучиба. Молин тут баши мудрост те шај те одговорине туке искрено, бизо те ховаве тут (Јак. 1:5). Ако кереа акава аѓаар чаче ка заштитине тут. Шај те поможинел туке одлучно те спротивставине тут башо искушение, исто сар о Исус, кеда вакерѓа е Бенгеске: „Циде тут, Сатано!“ (Мат. 4:10).

17. Соске са со кераја башо Јехова тано џабе ако амаро вило тано поделимо? Вакер пример.

¹⁷ Са со кераја башо Јехова тано џабе ако амаро вило тано поделимо. Замислин туке јекх спортско тими коте со о играчија на сложинена пе јекх јекхеа. Несаве мангена и слава само песке, а јавера на кхелена спрема о правилија, а трита нане лен нисаво поштовање спрема о тренери. Пхаро кај јекх асавко тими ка побединел ко несаво натпревар. Тари јавер страна, ако о играчија тане сложна хем цело тими кхелела сар јекх, побаре тане о шансе те побединен. Тло вило шај те овел сар акава успешно тими, јавере лафенцар цело, ако тле мисле, желбе хем чувствија тане ко склад е Јеховаскере мерилонцар. Ма бистре, о Сатана мангела те поделинел тло вило. Ов на мангела тле мисле, желбе хем чувствија те овен спрема е Девлескере мерилија. Ама, те шај о Јехова те прифатинел са адава со кереа баши лесте, мора те служине леске цело вилеа (Мат. 22:36-38). Адалеске, никогаш ма дозволин о Сатана те поделинел тло вило.

18. Спрема о лафија таро Михеј 4:5, со сиан одлучно те кере?

¹⁸ Молин е Јехова исто сар о Давид: „Поможин манге цело вилеа те дарав таро тло анав!“ Трудин тут са те силенцар те живине спрема акала лафија. Секова диве, са тле одлукенцар — бизи разлика дали баре или тикне — ов одлучно те сикаве кај иси тут хор поштовање спрема е Јеховаскоро свето анав. Ако кереа адава, сар е Јеховаскоро сведоко, ка ане фалба адале анавеске (Изр. 27:11). Сарине ка шај те вакера адава со вакерѓа о пророко о Михеј: „Амен ка џа ко анав е Јеховаскоро, амаро Девел, ко са о време, ки цело вечност“ (Мих. 4:5).