1. Σο ισί η νταρ κατά Ντεβέλ, ντα σόσκε ισί σημαντική οντουλένγκε σο μανγκένα ι Ιεχωβάς;

Ο ΧΡΙΣΤΙΑΝΟΙ μανγκένα ι Ντεβλές ντα νταρένα λέσταρ. Μερικοί μπορεί τι βακερέν ότι ανταβά να αβέλα-πες. Όμως, να βακεράσα ι νταριάκε σο κερέλα εκχέ τζενές τι ιζράλ κατά νταρ. Κα ντικχάς εκ γιαβέρ νταρ. Ο τζενέ σο τθερένα ανταγιά νταρ σεβάνενα μπουτ ι Ντεβλές. Να μανγκένα τι πφανγκέν ο γκι πουμαρέ Νταντέσκο, ι Ιεχωβάσκο, επειδή να μανγκένα τι χαλαβέν πουμαρί φιλία λέσαρ.​—Ψαλμ. 111:​10· Παρ. 8:13.

2. Καζόμ κα σκεφτίνας οντουλά σο βακερντάς ο βασιλιάς Δαβίδ κο εδάφιος Ψαλμός 86:​11, καλά ντούι πράγματα κα ντικχάς;

² Διαβάνεν Ψαλμός 86:​11. Καζόμ σκεφτίνενα ανταλά λάφια, κα αγαβέν ότι ο πιστός βασιλιάς Δαβίδ τζανέλας καζόμ σημαντική ισί η νταρ κατά Ντεβέλ. Ακανά κα ντικχάς σαρ μπορίνασα τι κεράς οντουλά σο βακερντάς ο Δαβίδ πι προσευχιάτε. Πρώτον, κα ντικχάς σόσκε πρέπει τι τθεράς μπαρό σεβασμός ι Ντεβλέσκε ναβέσκε. Δεύτερον, κα ντικχάς σαρ τι κεράς-λες ανταβά κάθε ντιβές αμαρέ ζωγιάτε.

3. Καγιά εμπειρία μπορεί τι βοηθιντάς ι Μωυσής τι συνεχίνελ τι τθερέλ μπαρό σεβασμός ι Ντεβλέσκε ναβέσκε;

³ Σκεφτίνεν σαρ νιωθίνελας ο Μωυσής κάνα ισινέ κο βες Χωρήβ ντα ντικχλάς εκχέ φαντασιάτε τι νακχέλ ανγκλά-λέσταρ η δόξα ι Ιεχωβάσκι. Η εγκυκλοπαίδεια Ενόραση στις Γραφές βακερέλα ότι μάλλον ανταγιά ισινέ η «πιο εντυπωσιακή εμπειρία σο τθερέλας ποτές τζενό πριν τι αβέλ ο Ιησούς  Χριστός». Ο Μωυσής ασουντάς ακαλά λάφια, μάλλον εκχέ αγγελόσταρ: «Ιεχωβά, Ιεχωβά, Ντεβέλ σο σικαβέλα έλεος ντα τζιτζίνελα ι γιαβερένγκε, σο να χολιάνελα εύκολα, ντα ισί πφερντό αφοσιωμέ αγάπη ντα αλήθεια, σο σικαβέλα αφοσιωμέ αγάπη χιλιάδες τζενένγκε, σο συγχωρίνελα λάθη ντα αμαρτίες». (Έξοδ. 33:​17-23· 34:​5-7) Ο Μωυσής μάλλον ανέλας-λες πι γκοντιάτε ανταβά κάνα βακερέλας ο ναβ Ιεχωβά. Οντουλέσκε, νανέ ιτς περίεργος σο πιο σοράν βακερντάς κι Ντεβλέσκο λαός, κο Ισραήλ, τι “νταρέλ ανταλέ μπαρέ ναβέσταρ σο πρέπει τι σικάντιβελ λέσκε σεβασμός”.​—Δευτ. 28:58.

4. Σο κα βοηθίνελ-αμέν τι σεβάνας ι Ιεχωβάς ατζέ πιο μπουτ;

⁴ Κάνα σκεφτίνασα ο ναβ Ιεχωβά, ισί λατσσό τι σκεφτίνας κον ισί οντουβά σο τθερέλα ανταβά ναβ. Πρέπει τι ντας-αμέν γκοντί ο ιδιότητες σο τθερέλα, σαρ ισί η ζορ, η σοφία, η δικαιοσύνη ντα η αγάπη. Κάνα σκεφτίνασα ανταλά ντα γιαβερά ιδιότητες κα σεβάνας-λες ατζέ πιο μπουτ.​—Ψαλμ. 77:​11-15.

5, 6. (α) Σο μανγκέλα τι βακερέλ ο ναβ ι Ντεβλέσκο; (β) Σαρ κερέλα ο Ιεχωβά σο-ντα μανγκέλα σαρ βακερένα ο εδάφια Έξοδος 3:​13, 14 ντα Ησαΐας 64:8;

⁵ Σο μανγκέλα τι βακερέλ ο ναβ ι Ντεβλέσκο; Μπουτ σπουδαγμέ τζενέ βακερένα βον-ντα ότι ο ναβ Ιεχωβά μανγκέλα τι βακερέλ «βοβ κερέλα τι αβέλ-πες». Ανταβά ανέλα αμαρέ γκοντιάτε ότι τίποτα ναστί τσσιναβέλα ι Ιεχωβάς τι κερέλ οντουβά σο μανγκέλα ντα ότι βοβ μπορίνελα τι κερέλ σο-ντα μανγκέλα. Σαρ αβέλα-πες ανταβά;

⁶ Ο Ιεχωβά για τι κερέλ οντουβά σο μανγκέλα, αβέλα σο-ντα χρειαζίντιβελα. (Διαβάνεν Έξοδος 3:​13, 14) Μπουτ φαρ βακέρντιβελα αμένγκε τι σκεφτίνας ανταβά μπουτ σουκάρ πράγμας σο κερέλα ο Ντεβέλ. Επίσης, ο Ιεχωβά μπορίνελα τι κερέλ πι υπηρετόν σο ισί ατελείς τι αβέν σο-ντα χρειαζίντιβελα για τι υπηρετίνεν-λες ντα τι κερέν οντουβά σο τθερέλα πι γκοντιάτε. (Διαβάνεν Ησαΐας 64:8) Ανταλέ τροπόντζαρ, ο Ιεχωβά κερέλα τι αβέλ οντουβά σο μανγκέλα. Τίποτα ναστί τσσιναβέλα-λες τι κερέλ οντουλά σο τθερέλα πι γκοντιάτε.​—Ησ. 46:​10, 11.

7. Σαρ κα μπαριαράς αμαρί εκτίμηση αμαρέ Νταντέσκε, ι Ιεχωβάσκε;

 ⁷ Κα μπαριαράς αμαρί εκτίμηση αμαρέ Νταντέσκε, ι Ιεχωβάσκε, άμα σκεφτίνασα οντουλά σο κερντάς βοβ ντα οντουλά σο ντινάς-αμέν ι ικανότητα τι κεράς. Για παράδειγμας, κάνα σκεφτίνασα σαρέ οντουλά σο λατσσαρντάς, ατσσάσα πουταρντέ μόσαρ σαρέ οντουλένταρ σο κερντάς ο Ιεχωβά. (Ψαλμ. 8:3, 4) Ντα κάνα σκεφτίνασα οντουλά σο κερντάς τι αβάς αμέν για τι κεράς λέσκο θέλημας, μπαριόλα αμαρό σεβασμός λέσκε. Ο ναβ Ιεχωβά μπαγιά πφερέλα-αμέν εκτίμηση! Τθερέλα τι κερέλ σαρέ οντουλέντζαρ σο ισί αμαρό Ντατ, σαρέ οντουλέντζαρ σο κερντάς ντα σαρέ οντουλέντζαρ σο κα κερέλ.​—Ψαλμ. 89:7, 8.

8. Σο μανγκέλα ο Ιεχωβά πι υπηρετόνταρ τι κερέν λέσκε ναβέσαρ σαρ βακερένα ο εδάφια Δευτερονόμιο 32:2, 3;

⁸ Χάνικ πριν τι τσσουβέν-πες ο Ισραηλίτες κο Υποσχεμέ Τθεμ, ο Ιεχωβά σικλιαρντάς ι Μωυσής εκ ύμνος. (Δευτ. 31:​19) Ντα σοράν ο Μωυσής έπρεπε τι σικλιαρέλ ο ύμνος κο λαός. (Διαβάνεν Δευτερονόμιο 32:2, 3) Καζόμ σκεφτίνασα ο εδάφια 2 ντα 3, ντικχίντιβελα ξεκάθαρα ότι ο Ιεχωβά να μανγκέλα τι γκεραβέν ο τζενέ λέσκο ναβ ούτε τι σακιντίνεν τι βακερέν-λες για μα τι μελιαρέν-λες. Μανγκέλα τι σικλιόν-λες σαρέ! Σο προνόμιος ισινέ ι Ισραηλιτένγκε τι ασουνέν ι Μωυσής τι σικλιαρέλ-λεν ι Ιεχωβάσκε ντα λέσκε μπαρέ ναβέσκε! Οντουλά σο σικλιαρντάς-λεν ο Μωυσής μπαριαρντέ λένγκι πίστη ντα ντινέ-λεν ζορ, σαρ ο σανό μπρισίμ σο περέλα κο φυτά. Σο μπορίνασα τι κεράς αμέν για τι τθερέλ αμαρό σικλιαριπέ-ντα αζόμ λατσσέ αποτελέσματα;

9. Σαρ κα βοηθίνας τι αγιάντιβελ ο ναβ ι Ιεχωβάσκο;

⁹ Κάνα ισινάμ κο έργος, μπορίνασα αντράλ κατά Γραφή τι σικαβάς κο τζενέ ο ναβ ι Ντεβλέσκο, Ιεχωβά. Μπορίνασα τι σικαβάς λένγκε αμαρέ μπουτ σουκάρ έντυπα ντα βίντεα ντα γιαβερά πράγματα κο ιστότοπος σο δοξάνενα ι Ιεχωβάς. Αμαρέ μπουτιάτε, κο σχολείος ή κάνα κεράσα ταξίδι μπορεί τι αρακχάς ευκαιρίες τι κεράς λάφι αμαρέ Ντεβλέσκε σο μανγκάσα-λες μπουτ ντα ι λατσσιματένγκε σο τθερέλα. Κάνα βακεράσα λένγκε ι σουκάρ πραγματένγκε σο κα κερέλ ο Ιεχωβά ι τζενένγκε ντα ι πφουβιάκε, μπορεί τι αγαβέν για πρώτη φαρ καζόμ μπουτ μανγκέλα-αμέν ο Ιεχωβά. Κάνα βακεράσα κο γιαβερά ι αλήθεια αμαρέ λατσσέ Νταντέσκε βοηθίνασα τι αγιάντιβελ λέσκο ναβ. Βοηθίνασα ι τζενέν τι αγαβέν ο ψέματα σο σικλιλέ λέσκε. Σικλιαράσα-λεν πράγματα σο λοκχιαρένα μπουτ λένγκο γκι.​—Ησ. 65:​13, 14.

10. Κάνα κεράσα μελέτες, σόσκε να ερεσέλα τι σικλιαράς ο κανόνες ντα οντουλά σο μανγκέλα ο Ντεβέλ;

¹⁰ Κάνα κεράσα μελέτες, μανγκάσα τι βοηθίνας ι τζενέν τι σικλιόν ο ναβ ι Ιεχωβάσκο ντα τι αρχίνεν τι βακερέν-λες. Επίσης, μανγκάσα τι βοηθίνας-λεν τι αγαβέν σο μανγκέλα τι βακερέλ λέσκο ναβ. Αλλά κα κεράς-λες ανταβά άμα κα σικλιαράς-λεν σάντε οδηγίες, εντολές ι Ντεβλέσκε ντα κανόνες λένγκε ζωγιάκε; Εκ τζενό μπορεί τι σικλιόλ ο νόμοι ι Ντεβλέσκε, ατζέ-ντα τι εκτιμίνελ-λεν. Κα ντελ όμως καν ι Ιεχωβάς επειδή μανγκέλα-λες; Μα μπιστρέν, η Εύα τζανέλας ο νόμος ι Ντεβλέσκο αλλά να μανγκέλας μπαγιά ι Ντεβλές. Ούτε ο Αδάμ μανγκέλας-λες. (Γέν. 3:​1-6) Άρα, να ερεσέλα τι σικλιαράς ι γιαβερέν ο κανόνες ντα οντουλά σο μανγκέλα ο Ντεβέλ.

11. Κάνα σικλιαράσα ο νόμοι ντα ο κανόνες ι Ντεβλέσκε, σαρ μπορίνασα τι βοηθίνας ι τζενέν σο κεράσα-λεν μελέτη τι μανγκέν Οντουλές σο ντέλα ο νόμοι;

¹¹ Οντουλά σο μανγκέλα αμένταρ ο Ιεχωβά ντα ο κανόνες λέσκε ταρτίνενα-αμέν πασέ λέστε ντα βοηθίνενα-αμέν. (Ψαλμ. 119:​97, 111, 112) Αλλά για τι αγαβέν-λες ανταβά ο τζενέ σο κεράσα-λεν μελέτη, πρέπει  πρώτα τι αγαβέν ότι ο Ιεχωβά ντινάς ανταλά νόμους σόσκε μανγκέλα-αμέν. Οτθάρ, κα μπορίναας τι πουτσάς-λεν: «Σόσκε πακιάσα ότι ο Ντεβέλ μανγκέλα πι υπηρετόνταρ τι κερέν ακαβά ή μα τι κερέν οκουβά; Σο σικαβέλα αμένγκε ανταβά ι Ντεβλέσκε;» Άμα βοηθίνασα ι τζενέν τι κερέν σκέψεις ι Ιεχωβάσκε ντα τι μανγκέν μπαγιά λέσκο μπαρό ναβ, μάλλον κα ερεσάς λένγκε γκίστε. Κα μανγκέν εμ ο νόμοι εμ Οντουλές σο ντέλα-λεν. (Ψαλμ. 119:​68) Κα μπαριόλ λένγκι πίστη ντα κα νταϊντίνεν ο μπαρέ δυσκολίες σο κα αβέν.​—1 Κορ. 3:​12-15.

12. Σαρ τσσιναντάς ο Δαβίδ εκ φαρ τι νταρέλ κατά Ιεχωβά σαρέ πι γκίσαρ, ντα καβά ισινέ ο αποτέλεσμας;

¹² Ο λάφι «κερ-μαν τι νταράβ τι ναβέσταρ σαρέ μι γκίσαρ», σο γραφιντάς ο βασιλιάς Δαβίδ κο εδάφιος Ψαλμός 86:​11, ισί μπουτ σημαντικός. Πι ζωγιάτε, ντικχλάς ότι να ισινέ εύκολος εκ τζενό τι υπηρετίνελ ι Ιεχωβάς σαρέ πι γκίσαρ, ή γιαβέρτουλους σαστέ γκίσαρ. Εκ φαρ, ισινέ κι νταράτσα πι κχερέσκι ντα ντικχλάς ι ρομνιά εκχέ γιαβερέ μουρσέσκι τι τθοβέλ-πες. Αζομάν, νταρέλας κατά Ντεβέλ σαρέ πι γκίσαρ; Τζανέλας ο κανόνας ι Ιεχωβάσκο: «Δεν πρέπει τι μανγκές ι ρομνιά εκχέ γιαβερέ τζενέσκι». (Έξοδ. 20:​17) Όμως, σαρ ντικχίντιβελα, συνεχιντάς τι ντικχέλ. Λέσκο γκι να ισινέ σαστό σόσκε μανγκέλας εμ ι τζουβλιά, τη Βηθ-σαβεέ, εμ τι κερέλ ι Ιεχωβάσκο γκι. Παρόλο σο ο Δαβίδ μανγκέλας ι Ιεχωβάς ντα νταρέλας λέσταρ μπουτ μπρεσά, κερντάς οντουβά σο ντέλας λέσκο γκι. Ιτιρί ανταλέσταρ, ο Δαβίδ κερντάς μερικά μπουτ γκεραλέ πράγματα. Αντάς λατζ κι Ιεχωβάσκο ναβ. Επίσης, κερντάς μπαρό ζιάνι αθώε τζενένγκε, εμ πι φαμιλιάκε.​—2 Σαμ. 11:​1-5, 14-17· 12:​7-12.

13. Σαρ τζανάσα ότι ο Δαβίδ υπηρετιντάς πάλι ι Ιεχωβάς σαρέ πι γκίσαρ;

¹³ Ο Ιεχωβά τσσουντάς γκοντί ι Δαβιδίσκε, ντα βοβ αβιλό πάλι λατσσό αμάλ Λέσκο. (2 Σαμ. 12:​13· Ψαλμ. 51:​2-4, 17) Ο Δαβίδ ντέλας-πες γκοντί ο προβλήματα ντα ι ταλαιπωρία σο τσσιντιντάας κάνα τσσιναντάς τι νταρέλ κατά Ιεχωβά σαρέ πι γκίσαρ. Λέσκο λάφι κο εδάφιος Ψαλμός 86:​11 μπορεί τι βακέρντιβελ αντικάς-ντα: «Ντε-μαν εκ γκι σο νανέ ιλιαντό». Βοηθιντάς ο Ιεχωβά ι Δαβιδίς τι τθερέλ εκ γκι σο ισινέ σαστό, ή γιαβέρσοϊ σο να ισινέ ιλιαντό; Βα, σόσκε ο Λάφι ι Ιεχωβάσκο πιο σοράν βακερέλα ότι ι Δαβιδίσκο «γκι . . . ισινέ σαστό κο γιακχά κι Ιεχωβάσκε λέσκε Ντεβλέσκε».​—1 Βασ. 11:4· 15:3.

14. Σο πρέπει τι πουτσάς-αμέν, ντα σόσκε;

¹⁴ Ο παράδειγμας ι Δαβιδίσκο ντέλα-αμέν ζορ αλλά τζανγκαβέλα-αμέν ντα. Η μπαρί αμαρτία σο κερντάς σικαβέλα ι Ντεβλέσκε υπηρετόνγκε αντιβές ότι πρέπει τι τθερέν πουμαρί γκοντί. Είτε αρχισάλαμ τι υπηρετίνας ι Ιεχωβάς ακανά είτε υπηρετίνασα-λες  μπουτ μπρεσά, πρέπει τι πουτσάς-αμέν: “Τζάβα κόντρα κο Μπενγκ σο μανγκέλα τι κερέλ-μαν τι τσσιναβάβ τι νταράβ κατά Ιεχωβά σαρέ μι γκίσαρ;”

15. Σαρ μπορεί τι αρακχαβέλ-αμέν η νταρ κατά Ντεβέλ άμα κα ντικχάς κάτι σο ανέλα αμαρέ γκοντιάτε λουμνικανέ πράγματα;

¹⁵ Για παράδειγμας, άμα ντικχένα κι τηλεόραση ή κο Ίντερνετ κάτι σο μπορεί τι ανέλ τουμαρέ γκοντιάτε λουμνικανέ πράγματα, σο κερένα; Μπορεί τι αβέλ εύκολος τι σκεφτίνεν ότι οντιά φωτογραφία ή ταινία νανέ πορνογραφία. Αλλά μήπως ανταβά ισί κάτι σο κερέλα ο Μπενγκ για τι κερέλ τουμαρό γκι μα τι αβέλ σαστό; (2 Κορ. 2:​11) Οντιά φωτογραφία μπορίνασα τι βακεράς ότι ισί σαρ εκ τσεκούρι σο χρησιμοποιήνελα εκ τζενό για τι πφανγκέλ εκ μπαρό κας. Κάνα ντέσα πρώτη φαρ ι τσεκουρίσαρ, ο κας να πφανγκιόλα. Αλλά άμα κα ντες μπουτ φαρ, κα πφανγκιόλ. Αντικάς, ανταβά σο ντικχέλα εκ τζενό ντα ντικχίντιβελα ότι να κερέλα λέσκε οντιά στιγμή ζιάνι, μπορεί τι γκερέλ-λες σουγκό αμαρτιέντε σο, άμα κα κερέλ-λεν, λέσκο γκι κα τσσιναβέλ τι αβέλ σαστό. Οντουλέσκε, μα μουκχέν τι τζαλ αντρέ τουμαρέ γκίστε κάτι σο ισί γκεραλό! Μα τσσιναβέν τι κερέν σο νακχέλα τουμαρέ βαστένταρ για τι νταρέν κατά Ιεχωβάσκο ναβ σαρέ τουμαρέ γκίσαρ!

16. Κάνα αβέλα αμένγκε τι κεράς εκ λάθος, καλά ερωτήσεις πρέπει τι κεράς αμαρέ νεαυτόσκε;

¹⁶ Εκτός κατά φωτογραφίες σο ανένα αμαρέ γκοντιάτε λουμνικανέ πράγματα, ο Μπενγκ χρησιμοποιήνελα μπουτ γιαβερά πράγματα για τι κεράς κάτι σο ισί γκεραλό. Σο κεράσα; Ισί εύκολος τι σκεφτίνας ότι οντουλά πράγματα νανέ αζόμ γκεραλέ. Για παράδειγμας, μπορεί τι βακεράς: “Να κα χαβ αποκοπή άμα κα κεράβ-λες, άρα νανέ αζόμ γκεραλό”. Ισί μπαρό λάθος τι σκεφτίνας αντικάς. Ισί πιο λατσσό τι κεράς αμαρέ νεαυτόσκε ερωτήσεις σαρ ακαλά: “Μήπως ο Μπενγκ προσπαθίνελα τι χρησιμοποιήνελ  ανταβά πράγμας για τι κερέλ-μαν μα τι νταράβ κατά Ιεχωβά σαρέ μι γκίσαρ; Άμα κα κεράβ εκ λάθος πράγμας σο μανγκάβα, να κα ανάβ λατζ κο ναβ κι Ιεχωβάσκο; Άμα κα κεράβ-λες ανταβά, κα ανέλ-μαν πιο πασέ μι Ντεβλέστε ή κα λελ-μαν ντουρ λέσταρ;” Τι σκεφτίνεν λατσσές ασακέ ερωτήσεις. Τι προσευχίντιβεν τι τθερέν σοφία για τι ντικχέν ο πράγματα σαρ ισί ντα μα τι χουχαβέν-τουμέν. (Ιακ. 1:5) Ανταβά μπορεί τι αρακχαβέλ-τουμέν μπουτ. Μπορεί τι βοηθίνελ-τουμέν τι τζαν κόντρα κο Μπενγκ, σαρ κερντάς ο Ιησούς κάνα βακερντάς «Νας, Σατανά!»​—Ματθ. 4:10.

17. Σόσκε νανέ λατσσό μα τι αβέλ αμαρό γκι σαστό; Βακερέν εκ παράδειγμας.

¹⁷ Νανέ λατσσό μα τι νταράς κατά Ιεχωβά σαρέ αμαρέ γκίσαρ. Βακερέν ότι ισί εκ ομάδα σο λάκε παίχτες να τζάνα-λεν λατσσές ο εκ ι γιαβερέσαρ. Μερικοί μανγκένα δόξα πουμαρέ νεαυτόσκε, γιαβερά να μανγκένα τι κχελέν αντικάς σαρ βακερένα ο κανόνες ντα γιαβερά να σεβάνενα ιτς ι προπονητής. Εκ ασακί ομάδα ναστί κερδίνελα ούτε εκ αγώνας. Αλλά εκ ενωμέ ομάδα μπορίνελα τι κερδίνελ. Τουμαρό γκι μπορίνελα τι αβέλ σαρ ανταγιά λατσσί ομάδα άμα σαρέ οντουλά σο σκεφτίνενα, σο μανγκένα ντα σο νιωθίνενα τσσίντενα-τουμέν τι υπηρετίνεν ι Ιεχωβάς. Ντεν-τουμέν γκοντί ότι ο Μπενγκ κα μανγκέλας μπουτ τι κερέλ-τουμέν τι τσσιναβέν τι νταρέν κατά Ιεχωβά σαρέ τουμαρέ γκίσαρ. Βοβ μανγκέλα σαρέ οντουλά σο σκεφτίνενα, σο μανγκένα ντα σο νιωθίνενα τι τζαν κόντρα κι Ιεχωβάσκε κανόνες. Για τι υπηρετίνεν όμως ι Ιεχωβάς, πρέπει τι τθερέν σαστό γκι. (Ματθ. 22:​36-38) Ποτές μα μουκχέν ι Μπενγκές τι κερέλ-τουμέν τι τσσιναβέν τι νταρέν κατά Ιεχωβά σαρέ τουμαρέ γκίσαρ!

18. Σο μανγκένα τι κερέν σαρ βακερέλα ο εδάφιος Μιχαίας 4:5;

¹⁸ Τι προσευχίντιβεν κο Ιεχωβά σαρ ο Δαβίδ: «Κερ-μαν τι νταράβ τι ναβέσταρ σαρέ μι γκίσαρ». Τσσουβέν στόχος τι κερέν ο λάφια ανταλέ προσευχιάκε σαρέ τουμαρέ ζωγιάτε. Κάθε ντιβές σο-ντα τραμπίνενα τι κερέν, χουρντό ντα μπαρό, τι μανγκέν τι σικαβέν ότι τθερένα μπαρό σεβασμός ι Ιεχωβάσκε άγιε ναβέσκε. Άμα κα κερέν-λες ανταβά, σαρ Μάρτυρες ι Ιεχωβάσκε, κα δοξάνεν ανταβά ναβ. (Παρ. 27:​11) Ντα σαρέ γιεκ, σαρ ο προφήτης Μιχαίας, κα βακεράς: «Αμέν κα πφιράς για πάντα ι Ιεχωβάσκε ναβέσαρ σο ισί αμαρό Ντεβέλ».​—Μιχ. 4:5.