1. Oboba bw’okuli byo bici na bulya gurhi obo boba buli bwa bulagirire kwa balya boshi bazigira Yehova?

ABAKRISTU banazigire n’okuyoboha Nnamahanga. Bantu banji banarhanya nk’ezo nderho ziri lubero n’ezi rhwayizire. Rhukengere oku rhurhali rhwaganirira oboba bw’okudirhimanya omuntu,buli nka kula omuntu ayoboha omusoda. Cikone rhwaganirira oboba buli lubero n’obo. Abantu bayoboha Yehova, banakamukenga bwenene n’omurhima goshi. Banacihangane bajire okwabo koshi lyo barhamugomeraga ciru n’ehitya bulya barhalonzizi okuheza obwîra bwabo haguma na naye.​—Enna. 111:10; Mig. 8:13.

2. Lugenda enderho za Daudi ziri omu lwandiko lwa Ennanga 86:11, bintu bihi bibirhi rhwaganirira?

² Osome Ennanga 86:11. Okubiyerekire ezo nderho, wanahika aha wahugûkwa oku Daudi al’ihugûsirwe obulagirire bw’okuyoboha Yehova. Rhuganirirage gurhi rhwakakolesa ezo nderho ziri mw’er’isala lya Daudi. Burhangiriza, rhwaganirira bintu biguma na biguma byakarhushumya rhube n’obukenge okw’izino lya Nnamahanga. Bwakabirhi, rhwaganirira gurhi rhwakayerekana oku rhuli rhwayoboha izino lya Nnamahanga omu kalamo kirhu ka ngasi lusiku.

3. Bici byahikire Musa byamurhabire agendekere ayoboha izino lya Nnamahanga?

³ Rhanya hitya oku Musa aciyumvâgya erhi aba ali omu mwina gw’ibuye n’erhi abona ecibonekerezi c’obukuze bwa Yehova. Mahugûlo maguma gʼecitabu Étude perspicace des Écritures gayerekine oku “eco ciragane cali cidarhi bwenene nantyo nta wundi muntu wakayosire ntyo orhali Yezu Kristu embere aje hanw’igulu.” Nkabaga Musa ayumvirhe enderho zaderhagwa na malahika:  ‘Yehova, Yehova Nnamahanga w’obonjo, ntakunira duba, oyunjula aminja n’obwikubagirwa olemebera obubi.’ (Lu. 33:17-23; 34:5-7) Ngasi mango erhi Musa akakolesize izino lya Yehova, akag’ikengera ako kasanzi. Co cirhumire birhakasomerana okubona Musa abwiraga olubaga lwa Nanamahanga Israheli “murhinye er’izino likulu bwenene.”​—Lush. 28:58.

4. Morhere gahi ga Yehova rhwakakarhanyakwo lyo rhuhikira aha rhwamukenga?

⁴ Erhi rhurhanya okw’izino Yehova, rhunahikire aha rhwamanya bwinja Nnamahanga ohamagalwa kw’er’izino. Rhushinganine rhukakengera amorhere gage, gahiziremo obuzigire, obushinganyanya, obwenge n’emisi. Okurhanya kw’ogo morhere n’agandi manji kwanarhushumya rhukamukenga bwenene.​—Enna. 77:11-15.

5-6. (a) Izino lya Yehova kw’okuderha gurhi? (b) Lugenda Olubungo 3:13, 14 na Izaya 64:8, omu njira nci Yehova ahikirizamwo obulonza bwage?

⁵ Bici rhumanyire lugenda amahugûlo g’izino lya Nnamahanga? Basagasi banji baba bayemire oku izino Yehova liba lihugwire “Ohinduka byoshi alonzize.” Ago mahugûlo garhumanyisize oku nta kantu kakahanza Yehova okuhikiriza obulonza bwage, ciru anajira ebiremwa byage bibuhikirize. Gurhi ajiramwo ntyo?

⁶ Yehova anajira ebremwa byage oku analonzize lyo ahikiriza obulonza bwage. (Osome Olubungo 3:13, 14) Ngasi mango rhunakahabwa omurhima oku rhukarhanya lugenda obo buhashe bunji Nnamahanga ajira. Ciru Yehova anajira omukozi wage orhali mwimana abe byoshi Nnamahanga akalonza lyo ahikiriza obulonza bwage. (Osome Izaya 64:8) Mw’eyo njira mwo Yehova ahikiriza obulonza bwage. Nta cintu cakamuhanza okuhikiriza obulonza bwage.​—Iza. 46:10, 11.

7. Gurhi rhwakajira lyo rhukashagalula n’okukenga Larha wirhu w’omu mpingu ensiku zoshi?

⁷ Rhwanajira obwîra haguma na Larha wirhu w’omu mpingu omukurhanya lugenda ebi ajijîre n’ebindi acihikiriza. Kwa lwiganyo, erhi rhurhanya oku bwinja bw’obulemi,  rhunashagalukire okumanya n’okubona ebintu byoshi Yehova alemîre. (Enna. 8:3, 4) N’erhi rhurhanya lugenda ebi Yehova arhuhashisize okujira, rhunashagalukire okujira obulonza bwage n’okumukenga bwenene. Izino Yehova liba litagatifu. Liba lihizirwemo byoshi ebi Larha wirhu w’omu mpingu alemîre, n’ebi ajira omu nsiku zayisha.​—Enna. 89:7, 8.

8. Bici olwandiko lwa Olushika 32:2, 3 luyigirizize lugenda oku Yehova abona izino lyage?

⁸ Embere aba Israheli baje omu Cihugo c’Amalaganyo, Yehova aha Musa enderho z’olwimbo. (Lush. 31:19) Musa naye, aluyigiriza olubaga. (Osome Olushika 32:2, 3) Erhi rhwakarhanya lugenda omustari gwa 2 n’ogwa 3, rhwanabona oku Yehova arhal’ilonzize izino lyage lihere. Aba alonzize ebiremwa byage byoshi bimanye izino lyage! Lwali lukengwa lunene oku ba Israheli okuyumva Musa ali abayigiriza lugenda Yehova n’izino lyage litagatifu! Gurhi Musa ajijire ly’abayigiriza, ly’azibuhya obuyemere bwabo n’okubarhuliriza nka kula enkuba erhabala omurhi gukule? Bici byakarhuyemeza oku enyigirizo zirhu kozinali nk’ezo za Musa?

9. Bici byakarhurhabala lyo rhucesa izino lya Yehova?

⁹ Nka rhuli omu mahubiri ga nyumpa oku yindi erhi omu mahubiri g’aha abantu bali banji, rhushinganine rhukolese Ebibliya lyo rhuyereka abantu izino lya Nnamahanga, Yehova. Lyo rhurhabala abantu bakuze izino lya Yehova n’okulicesa, rhwanakabaha ebitabu bibashinganine, n’okubayeresa amavideyo n’ebindi bintu biri oku site yirhu y’enternete. Omu mukolo, oku masomo, na ciru akaba rhwabalama, rhwanaba n’obulyo bw’okuganirira abantu okubiyerekire Nnamahanga wirhu w’obuzigire n’amorhere gage. Erhi rhwakakaganirira abantu okubiyerekire omuhigo gw’obuzigire gwa Yehova guyerekire igulu na bene bantu, rhwanabarhabala bamanye Yehova bwinja. Erhi rhwakaganirira abandi okubiyerekire okuli lugenda Larha wirhu w’obuzigire Yehova, rhunabe rhuli rhwarhabala okucesa izino lyage. Rhunarhabale abantu bahugûkwe oku bayigirizibwe enyigirizo z’obunywesi kuli Yehova. Ebirhuyigiriza abantu biri omu Bibiliya, binakabashagalula bwenene.​—Iza. 65:13, 14.

10. Nka rhuli rhwalongoza amafunzo g’Ebibliya, bulya gurhi rhushinganine rujire binji kulusha okuyigiriza amarhegeko ga Yehova?

¹⁰ Erhi rhulongoza amafunzo g’Ebibliya, rhunarhabale abanafunzi birhu bamanye n’okukolesa izino lya Yehova. Ciru kandi, rhunabarhabale bamanye Yehova bwinja. Erhi rhwakakabayigiriza ntya-ntya kone amakanuni ga Yehova n’enyigirizo z’olugenzi lwinja, k’omu ntyo rhwanaderha oku rhubarhabire bamanye Yehova bwinja? Omwanafunzi mwinja ashinganine amanye amarhegeko ga Yehova n’okugazigira. K’omwafunzi anakenga Yehova erhi akaba arhali amubona nka muntu w’okuli? Okengere oku Adamu na Eva bal’imanyire amarhegeko ga Yehova, ci barhakengaga owabahaga ago marhegeko. (Murh. 3:1-6) Cocirhumire, rhushinganine rhujire binji kulusha okuyigiriza kone amarhegeko ga Yehova.

11. Amango rhuli rhwayigiriza omwanafunzi wirhu lugenda amakanuni g’olugenzi ga Nnamahanga, gurhi rhwakamurhabala azigire orhuha ago marhegeko?

¹¹ Okukolesa amarhegeko ga Yehova omu kalamo kuba kwinja ensiku zoshi. (Enna. 119:97, 111, 112) Cikone, omwanafunzi wirhu w’Ebibliya arhakayemera ntyo erhi akaba arhamanyiri obuzigire bushumya Yehova arhuhe ago marhegeko gage. Co cirhumire rhushinganine rhudose omwanafunzi wirhu ntya: “Orhanyize bici biba birhumire Yehova ahanza abakozi bage oku barhajiraga kantu kalebe? Bici ogu mwanzi gukuyigirizize lugenda Yehova?” Erhi rhwakarhabala abanafunzi birhu b’Ebibliya bazigire  Yehova, izino lyage n’okumuyegerera, aho rhwanaba rhuhumire oku murhima gwabo. (Enna. 119:68) Banakula omu buyemere n’okuhash’ilembera mazibu gakabahikira.​—1 Kor. 3:12-15.

12. Bici byarhumaga Daudi abula kuba mwishwekerezi kuli Yehova, na bici oko kwalesire?

¹² Enderho rhwasegeza ziri omu Ennanga 86:11 zidesire nyta: “Oyumanyanye omurhima gwani.” Yehova alongozagya Mwami Daudi oku ayandike ezo nderho. Akalamo ka Daudi kamuyeresire oku kwanaba kulembu okurhakolerha Yehova n’omurima goshi. Lusiku luguma, erhi aba ali acigeregeza aha mwage, alangîra muka Uriya ali ayoga. Ka mw’ako kanga Daudi akolire Yehova n’omurhima goshi erhi nanga? Al’imanyire irhegeko lya Yehova lidesire ntya: “Orhahîraga okachifînja muka mulungu wawe.” (Lu. 20:17) Cikone agendekera amulabiriza. Omurhima gwage gwagabwamo egarhi k’irala ly’okujira eby’enshonyi haguma na Bat-sheba n’okushagalula Yehova. Daudi al’izigire n’okuyoboha Yehova, cikone ahira irala lyage oku nafasi ntanzi. Oko kwarhuma Daudi ajira ebintu bibi. Azinza izino lya Yehova. Alerhera abantu boshi obuhanya, ciru n’abantu b’omu mulala gwage.​—2 Sam. 11:1-5, 14-17; 12:7-12.

13. Bici biyerekine oku Daudi acibir’ikolera Yehova n’omurhima gwage goshi?

¹³ Yehova ahana Daudi, cikone Daudi ayish’igalukira obwîra bwage haguma na Yehova. (2 Sam. 12:13; Enna. 51:2-4, 17) Daudi akag’ikengera ebyabire erhi kubula bubera mwishwekerezi kuli Yehova kurhumire. Endero zage ziri omu lwandiko lwa Ennanga 86:11, zanacib’ihindulwa ntya: “Ontabale nkukolere n’omurima goshi.” Ka Yehova ashuzize kw’er’isala lya Daudi? Neci, bulya Akanwa ka Yehova kadesire oku Daudi ali “cishwekerirekwo” Yehova n’omurhima gwage goshi. ​—1 Bam. 11:4; 15:3.

14. Idoso lihi rhukwanine rhucidose na bulya gurhi?

¹⁴ Olwiganyo lwa Daudi luli lwa kurhuha omurhima n’okurhurhonda. Okuhirimira kwage omu caha buli burhonde kuli rhwê ene. Rhube rhuli bahya erhi bakulu-kulu omw’ikubuliro lya Yehova, rhukwanine rhucidose ntya: ‘Ka nanjire okwani koshi lyo mpagalika amashumi ga Shetani gakarhuma omurhima gwani gwagabulikamwo?’

15. Gurhi oboba bw’okunali bwakarhurhabala rhucilange amango rhuli embere z’efilime erhi nfoto z’okujira eby’enshonyi?

¹⁵ Kwa lwiganyo, erhi wakabona ebizungu-zungu erhi enfoto z’okujira eby’enshonyi, oku televiziyo erhi oku entereneti, gurhi ojira? Kuba  kulembu okurhanya oku nfoto erhi filime erhayerekini n’obwalagale eby’epornografi. Cikoki, kw’oko kurhanya ntyo ka gurhakaba murhego gwa Shetani ly’alonza okugaba omurhima gwirhu? (2 Kor. 2:11) Eyo nfoto yanaba nka murhego mufulike omuntu akolesa ly’arhega kantu kalebe. Orhega omurhego gwa ntyo, anahumbe ehy’omwina, arhogeze mw’ogo murhego, buzinda adukire kw’orhudaka rhusungunu lyo ensimba ali arhega erhayish’igubona. Abalenga bagwasa ebizungu-zungu erhi nfoto oku enternete bashushanyizibwe n’ogo mwina owarhega ensimba ahumba ly’agwasamw’omurhego. Ogo mwina gunabe gurhali gwabonekana, co cakanarhuma ensimba yagwarhwamwo duba-duba. Ntyo kobinali okubiyerekere efilime. Efilime ebonekine oku erhagwerhi bubi boshi-boshi, yanahikira aha yarhangira yaba mbi bunyi-bunyi kuhika aha yarhuheka ebwa caha cakarhuma rhwashereza obwîra bwirhu haguma na Yehova. Co cirhumire orhayemeraga ebintu bibi byaja omu murhima gwawe. Olange omurhima gwawe lyo guyoboha izino lya Yehova!

16. Madoso gahi wakacidosa erhi wakaba oyerekire okuja omu marhangulo?

¹⁶ Aha nyuma n’efilime mbi, Shetani acigwerhe ezindi njira ali akolesa ly’arhushumika rhujire ebibi. Gurhi rhwakajira omu kanga ka ntyo? Kandi kwanaba kulembu okurhanya oku ezo njira zirhali mbi bwenene. Kwa lwiganyo, rhwanahikira ciru aha rhwaderha erhi: “Mashi lero ebi birhakarhuma natengwa, ntakwanini mbe mwishekerezi kulusha olugero.” Cikone entanya za ntyo, zirhali nyinja. Rhukwanine rhucidose aga madoso: “Ka Shetani akolesa ogu murhego lyo agaba obuzigire bwani lugenda Yehova? Erhi nakajira okw’irala lyani linshumisire, ka ntakazinza izino lya Yehova? K’eci cijiro cantabala nyegerere Nnamahanga wani erhi carhuma naba mushombanyi wage? Orhanye bwenene kw’ago madoso.  Osalire ly’ohabwa obwenge bwakakurhabala oshuze kw’ogo madoso buzira bulyalya na buzira kucirheba. (Yak 1:5) Okujira ntyo kwanakulanga. Kwanakurhabala ohagalike amashumi n’oburhwali boshi, nka kula Yezu ajiraga erhi abwîra Shetani ntya: “Rheng’aha, Shetani!”​—Mat. 4:10.

17. Bulya gurhi okuba n’omuhima gugabikîne kurhagwerhi bunguke boshi-boshi? Ohane olwiganyo.

¹⁷ Okuba n’omurhima Mugabemwo kurhagwerhi bunguke boshi-boshi. Orhanye gurhi byakaba erhi akaba abashasi bakabumbu barhali bayumvikana. Baguma bali bajira n’okusharha nk’oku banalonzize. Abandi bali bashekera erhi kuha oloho omukulu wabo obakomereza. K’abashasi ba ntyo banahima amace? Badesire oku ecinyabuguma co ciyirha engwi. E ekipe erhimwo ecinyabuguma egwerhe bulyo bunji bw’okuhima amace kulusha e Ekipe erimwo omulyagane. Omurhima gwawe gwanaba nk’eyo ekipe nyinja erhi akaba entanya zawe, irala lyawe n’oku ociyumva koshi kuyumanine omu kujira obulonza bwa Yehova. Okengere oku Shetani anakalonza okuzimba omurhima gwawe. Alonzize entanya zawe, irala lyawe n’okuciyumva kube lubero n’amarhegeko ga Yehova. Co cirhumire kuli kwa bulagirire ojire oku wakanahasha ly’omurhima gwawe goshi gukolera Yehova. (Mat. 22:36-38) Orhahira okayemera Shetani agaba omurhima gwawe!

18. Lugenda olwandiko lwa Mikeyo 4:5, bici rhukwanine rhuhige?

¹⁸ Oshenge Yehova aka Daudi washengâga ntya: “Oyumanyanye omurhima gwani, gukaz’iyoboha izino lyawe.” Ojire okwawe koshi lyo alama nk’oko er’isala lidesire. Ensiku zoshi, emihigo warhôla ebe minene erhi misungunu, ekayerekana oku oyobohire onabwine okw’izino lya Yehova liba litagatifu. Co cirhumire rhuli Bahamirizi ba Yehova, kuli kwinja rhukarhanya gurhi izino lya Yehova lyaderhwa erhi rhwakajira cijiro cilebe. (Mig. 27:11) Erhi rhwakajira ntyo, rhwanahikira aha rhwaderha ak’omulebi Mikeyo waderhaga ntya: ‘Rhwakaz’ilambagira oku izino lya Yehova Nyamuzinda wirhu ensiku n’amango.’​—Mik. 4:5.