1. Ino ty atao hoe tahotsy a Ndranahary, le manino ro mila mana ani-zay ty olo tea ani-Jehovah?

SADY tea a Ndranahary ty Kristiana, noho matahotsy azy. Atao ho raha mifanohitsy raha zay amin’olo sisany. Fe tsy tahotsy mampihorohoro rey volanintsika io. Hiresaky mikasiky tahotsy raiky miavaky tsika. Tena manaja a Ndranahary ty olo mana ani-tahotsy io, sady mieky hoe miavaky vatany Ie. Tsy ta hanao ze hampalahelo ani-Baban-drozy an-danitsy any iny rozy, satria tsy tean-drozy ho simba ty fifandrambesan-drozy aminy.—Sal. 111:10; Ohab. 8:13.

2. Laha hentea ty safàni-Davida amy Salamo 86:11, ino ty raha roe hodinihintsika ato?

² Vakio Salamo 86:11. Lafa eritseretintsika safàni-Davida Mpanjaka reo, le hitantsika hoe tsapany fa tena ilà ty matahotsy a Ndranahary. Ndao horesahintsika hoe ino ty azontsika atao mba hanoriha ani-vavaky nataoni-Davida io. Voalohany, hodinihintsika hoe manino tsika ro tokony hanaja marè ani-Jehovah. Faharoe, hohenteantsika ty fomba hampisehoantsika hoe matahotsy ty anara-Ndranahary tsika amy fiainantsika andavanandro.

3. Ino ty raha niseho nahavy ani-Mosesy hanaja marè ty anara-Ndranahary avao?

³ Mba eritsereto moa ty raha tsapani-Mosesy lafa nitsokonòky tanelanelani-vatolampy rey tao ie. Nihitany hoe nandalo mbeo ty voninahitsini-Jehovah. Mivola ty boky Fandalinana ny Soratra Masina hoe “nahita raha farani-ze nahatseriky Mosesy, sady mbo tsy nisy olo nahita raha manahaky ani-zay talohani-niaviani-Jesosy Kristy tan-tany etoa.” Naharè ani-safà manaraky retoa amy zay Mosesy. Azo inoa fa anjely nivola io hoe:  “Jehovah, Jehovah, Ndranahary mamindra fo noho soa fanahy, tsy mora meloky, atsiky hasoa fanahy feno fitiava sady tena tea fahamarina, manajary hasoa fanahy feno fitiava ho ahi-ty taranaky an’arivony, manenga hadisoa.” (Eks. 33:17-23; 34:5-7) Mety ho nahatiaro ani-raha niseho io avao Mosesy lafa nampiasa ty anarani-Jehovah. Tsy mahatseriky laha nampitandrina ty Israelita ie tafarani-zay mba “hatahotsy ani-anara be voninahitsy noho maeva hatahora iny.”—Deot. 28:58.

4. Ino ty hanampy antsika hanaja marè ani-Jehovah?

⁴ Lafa mieritseritsy mikasiky ty anarani-Jehovah tsika, le soa koa laha mametsivetsy hoe olo manao akory azy tomponi-anara io iny. Tokony hotiarovintsika ty toetsiny, anatini-zay ty heriny, ty fahendreany, ty fanaovany rariny noho ty fitiavany. Ho voatosiky hanaja azy marè tsika lafa mandiniky ani-toetsy reo noho ty toetsiny maro hafa.—Sal. 77:11-15.

5-6. a) Ino ty dikani-anara-Ndranahary? b) Laha hentea ty Eksodosy 3:13, 14 noho Isaia 64:8, ino iaby ty ataoni-Jehovah mba hanjary ty raha ataony?

⁵ Ino ty raha haintsika mikasiky ty dikani-anara-Ndranahary? Maro ty manam-pahaiza maneky fa ty anara hoe Jehovah le midika hoe “Mahavy Azy Hanjary Ie.” Mampitiaro antsika raha zay fa tsy misy afaky manaka ani-Jehovah tsy hanao ze teany hatao, sady vitany ty mampanjary ty raha ataony. Amy fomba akory?

⁶ Azoni-Jehovah atao ty manjary ze raha ilà mba ho tanteraky ty raha teany hatao. (Vakio Eksodosy 3:13, 14.) Ampirisihy tsika matetiky mba hametsivetsy ani-toetsy tena mampiavaky ani-Jehovah io. Azoni-Jehovah atao koa ze hahavy ty mpanompony tsy lavorary hanjary ze raha ilà mba hanompoa azy noho hahavita ty raha teany hatao. (Vakio Isaia 64:8.) Manahaky ani-zay ty anatanterahani-Jehovah ty sitrapony. Tsy misy afaky manaka ani-Jehovah tsy hahavita ze raha teany hatao.—Isa. 46:10, 11.

7. Ino ty azontsika atao mba hitombo ty fankasitrahantsika ani-Babantsika an-danitsy any iny?

⁷ Hitombo ty fankasitrahantsika ani-Babantsika an-danitsy any iny, laha vetsevetsentsika ty raha nataony noho ty raha vitantsika  vokatsini-fanampeany. Mahavy antsika hanaja marè ani-Jehovah, ohatsy, ty fandiniha ani-zavaboary soasoa namboariny rey. Ie ro nahavy ani-raha rey hisy. (Sal. 8:3, 4) Nanao raha koa Jehovah mba hahavy antsika hahavita ty sitrapony. Lafa mametsivetsy ani-raha zay tsika, le vomaiky hanaja marè azy. Tena miavaky vatany ty anarani-Jehovah! Tafilitsy anatiny ao iaby ze mikasiky ani-Babantsika iny, ty raha iaby fa nataony, noho ty raha iaby mbo hataony.—Sal. 89:7, 8.

8. Manao akory ty fahitani-Jehovah ty anarany laha hentea ty Deoteronomia 32:2, 3?

⁸ Lafa hilitsy amy Tany Nampitamany tao ty Israelita, le nampianarini-Jehovah tononkira raiky Mosesy. (Deot. 31:19) Bakeo nampianarini-Mosesy ani-vahoaky reo hira iny. (Vakio Deoteronomia 32:2, 3.) Lafa dinihintsika soa ty andininy faha-2 noho faha-3, le mazava amintsika hoe tsy teani-Jehovah havony ty anarany, satria hoe masy marè ka tsy azo tonony. Teany laha mahay ani-anarany io lafa kila zavaboary manan-tsay! Nampianarini-Mosesy mikasiky ani-Jehovah noho ty anarany be voninahitsy vahoaky rey. Tena tombontsoa bevata ty nijanjy ani-zay! Manahaky fambolea nilatsahan’ora io rozy, satria nanatanjaky noho namelombelo an-drozy ty fampianarani-Mosesy. Ino koa ty azontsika atao mba hanahaky ani-zay ty fampianarantsika?

9. Ino ty azontsika atao mba hanamasina ty anarani-Jehovah?

⁹ Lafa mitory santrano tsika na manompo an-tonda eny, le azontsika atoro baka amy Baibolintsika ao ty anara-Ndranahary hoe Jehovah. Mana boky soasoa noho video manome voninahitsy ani-Jehovah tsika, le eo koa ty raha amy jw.org ao. Azontsika amea an-drozy raha rey na ampanentea an-drozy. Lafa am-piasà na an-dakilasy any tsika, na mandeha lavitsy, le mety hahita hiriky hiresaha mikasiky ani-Ndranahary tena teantsika iny noho ty toetsiny. Ambarantsika amy ze olo tojiky antsika ty raha teani-Jehovah hatao amy tany toy noho ty olombelo, ka atorontsika an-drozy hoe be fitiava Jehovah. Mety ho vaovao biby amin-drozy raha zay. Lafa resahintsika amin’olo ty marina mikasiky ani-Babantsika be fitiava iny, le manamasy ty anarani-Jehovah tsika. Ampeantsika olo rey mba hahay hoe vandy noho fanasarà avao ty raha sisany niren-drozy mikasiky ani-Jehovah. Ze fampianara tena hanatanjaky noho hamelombolo an-drozy ro ameantsika an-drozy.—Isa. 65:13, 14.

10. Manino ro tsy ampy ty hoe mampianatsy mikasiky ty raha taki-Ndranahary noho ty fitsipikiny lafa mampianatsy Baiboly?

¹⁰ Lafa mampianatsy Baiboly tsika, le teantsika hampea ty olo ampianarintsika Baiboly mba hahay noho hampiasa ty anarani-Jehovah. Fe teantsika hampea koa ie mba hahay soa ty tena dikani-anara io. Ho vitantsika va raha zay laha toromariky noho fitsipiky baka amy Ndranahary rey avao ro ampianarintsika azy? Mety hianatsy mikasiky ty lalàna-Ndranahary ty mpianatsy mahay, sady mety ho teany mihintsy raha rey. Fe ty fitiavany ani-Jehovah va ro hanosiky azy hanoriky ty safàny? Ka halino fa nahay ty lalàna-Ndranahary Eva, fe tsy tena nitea ani-azy Mpanome lalàna iny ie, le ho zay koa Adama. (Gen. 3:1-6) Midika raha zay fa tsy ampy laha ty raha taki-Ndranahary noho ty fitsipikiny ara-drariny avao ro ampianarintsika olo.

11. Akory ty azontsika anampea ty olo ampianarintsika mba ho tea ani-azy Mpanome Lalàna iny, lafa mampianatsy mikasiky ty lalàna-Ndranahary noho ty fitsipikiny tsika?

¹¹ Mahasoa antsika avao ty raha takini-Jehovah noho ty fitsipikiny. (Sal. 119:97, 111, 112)  Fe mety tsy hanahaky ani-zay ty fahitani-mpianatsy iny azy, laha tsy hitany hoe ty fitiavani-Jehovah antsika ro nahavy azy nanome ani-lalàna rey. Azontsika atao zany ty manontany ani-mpianatsy iny hoe: “Ka manino tsika ro tea-Ndranahary hanao ani-zay, na sakanany tsy hanao an’io, araky ty hevitsinao? Ndranahary manao akory ie laha zay ro hentea?” Mila ampeantsika ty olo ampianarintsika mba hieritseritsy mikasiky ani-Jehovah, sady ho tena tea ty anarany be voninahitsy. Laha manao ani-zay tsika, le ho afaky hidosiky ty fony. Tsy lalàna rey avao ro ho teany amy zay, fa azy Mpanome Lalàna iny koa. (Sal. 119:68) Hitombo ty finoany, ka hahavita hiaritsy ie ndre hisy raha sarotsy hatrehiny aza amy hoavy.—1 Kor. 3:12-15.

12. Nombia ro nengani-Davida hisy faniria raty ty am-pony ao, le ino ty vokany?

¹² Tena misy dikany bevata koa ty raha nisoratini-Davida Mpanjaka amy Salamo 86:11 hoe “anovo ze hatahorako ty anaranao amy ty foko iaby.” Nihitany tamy fiainany fa mora voazarazara ty fontsika ka tsy mifantoky amy raha soa sasy. Tambony tafon-tranony tao ie ndraik’andro, le nahita ampela mandro. Fa manambaly ampela io. Fa nizarazara va ty foni-Davida tamy zay? Hainy soa ty fitsipikini-Jehovah hoe: “Ka maniry valin’olo.” (Eks. 20:17) Fe mbo nanenty avao ie. Nanomboky nizara ty fony. Sady naniry ani-Batseba ie, noho naniry hampifaly ani-Jehovah. Tea ani-Jehovah noho natahotsy azy avao Davida bakany zay, fe nengany hisy faniria raty ty am-pony ao. Nanao raha farani-ze raty Davida tamy farany. Nanafa-baraka ty anarani-Jehovah ie. Nanimba fiainan’olo tsy manan-tsiny koa Davida, anatini-zay ty fianakaviany.—2 Sam. 11:1-5, 14-17; 12:7-12.

13. Akory ty ahaizantsika fa tsy voazarazara sasy ty foni-Davida?

¹³ Nanarini-Jehovah Davida ka afaky nifandramby soa taminy ndraiky. (2 Sam. 12:13; Sal. 51:2-4, 17) Nitiarovini-Davida ty fahasahirana noho alahelo nahazo azy lafa nengany ho voazarazara ty fony. Azo adika ho zao koa safàny amy Salamo 86:11 ao iny, hoe: “Ameo fo tsy voazarazara aho.” Nampeani-Jehovah va Davida mba tsy ho voazarazara ty fony? Eka. Tafara tatoy le zao ty nivolanini-Safàni-Jehovah mikasiky ani-Davida: “Nivahatsy tanteraky tamy Jehovah Ndranahariny ty fony.”—1 Mpanj. 11:4; 15:3.

14. Ino ty fanontanea tokony ho vetsevetsentsika, le ino ty antony?

¹⁴ Mampahery ty tantarani-Davida, fe mampieritseritsy koa. Anatsy ho ahi-ty mpanompo-Ndranahary henanizao raha iny. Tsy  irintsika mihintsy ty ho tafalatsaky amy fahotà bevata manahaky azy. Ka ndre vo tsiela tsika ro nanompo ani-Jehovah, ndre fa tanatini-tao maro, le mila mametsivetsy tsika hoe: ‘Manohitsy ty ezaky ataoni-Satana mba hampizarazara ty foko va aho?’

15. Manino ro miaro antsika ty fatahora a Ndranahary lafa tsika tojiky sary manaitaitsy faniria raty?

¹⁵ Manao akory, ohatsy, laha mahita sary mety hanaitsy ty filani-nofotsy iha amy tele na amy Internet ao? Ino ty hataonao? Mety ho mora amintsika ty hivola hoe tsy misy sary tiva raha iny. Fe, hay ndre mampiasa ani-raha io Satana mba hampizarazara ty fontsika? (2 Kor. 2:11) Azo ampitovizy amy lelam-pamaky maranitsy io sary rey. Lafa misy olo hamaky hazobe, le lohany kelikely maranitsy iny tse ro atsatokiny. Lafa mihamilentiky anatini-hazo iny lelam-pamaky iny le mizara roe hazo iny. Tsy hitanao va hoe manahaky ani-lohany kelikely maranitsy iny ty sary manaitaitsy mety ho hitantsika? Mety ho kelikely noho tsy mampanino ty fahitan’olo raiky ani-raha iny amy voalohany, fe tsiela avao le ho voazarazara ty fony, ka hanota amy Jehovah ie amy farany. Ka laha zay ie, le ka engà ho tafilitsy am-ponao ao mihintsy ze kila raha tsy maeva! Miezaha marè avao mba hatahoranao ty anarani-Jehovah amy fonao iaby!

16. Ino iaby ty fanontanea tokony hoeritseretinao lafa tojiky fakam-panahy?

¹⁶ Ankoatsini-sary manaitaitsy rey, le misy fakam-panahy maro koa alefani-Satana mba hahavy antsika hanao raha raty. Ino ty ataontsika lafa misy ani-zay? Mora ty mahita fialan-tsiny. Mety hanao ho zao, ohatsy, tsika hoe: ‘Tsy de manahy loatsy io, satria tsy ho voaroaky aho ndre manao an’io.’ Hadisoan-kevitsy bevata raha zay. Fa zao ty fanontanea tokony hoeritseretintsika: ‘Mampiasa ani-fakam-panahy io va Satana mba hampizarazara ty foko? Tsy ho afa-baraka va ty anarani-Jehovah laha maneky ho resini-faniria raty aho? Hihamariny ani-Jehovah Ndranahariko  va aho laha manao ani-zay, sa vomaiky hanalavitsy azy?’ Vetsevetseo ty fanontanea manahaky ani-reo. Mivavaha mba hana fahendrea lafa mamaly azy, fa tsy hamita-bata. (Jak. 1:5) Ho voaaro iha lafa manao ani-zay. Ho tapa-kevitsy hanohitsy fakam-panahy koa iha, ka hivola manahaky ani-Jesosy hoe: “Mandehana any iha Satana!”—Mat. 4:10.

17. Manino ro raty ty hoe mana fo voazarazara? Manomeza ohatsy.

¹⁷ Tsy soa ty hoe mana fo voazarazara. Eritsereto hoe tsy mifanaraky soa ty olo amy ekipy raiky mpanao laboly. Ao ty ta halaza raiky, misy tsy ta hanaraky ty fitsipiky amy fisà iny, le ty ilany tsy manaja ani-mpanazatsy iny. Tsy tamany handresy ty ekipy manahaky ani-zay. Fa laha miharo raiky ty ekipy raiky le azo tamany hoe ho tafavoaky. Hanahaky ani-ekipy tafavoaky io ty fonao, laha tsy voazarazara ty eritseritsinao, ty fanirianao, noho ty fihetseham-ponao sady mifanaraky amy ty fitsipikini-Jehovah. Tiarovo hoe teani-Satana ho voazarazara ty fonao. Avy amy ty itiavany azy, laha mifanohitsy amy fitsipikini-Jehovah ty eritseritsinao, noho ty fanirianao, voho ty fihetseham-po anatinao ao. Kanefa mila manompo ani-Jehovah amy fonao iaby iha. (Mat. 22:36-38) Ka engà hampizarazara ty fonao mihintsy Satana!

18. Tapa-kevitsy hanao ino iha, laha hentea ty Mika 4:5?

¹⁸ Mivavaha amy Jehovah manahaky ani-Davida hoe: “Anovo ze hatahorako ty anaranao amy ty foko iaby.” Miezaha marè mba hanao raha mifanaraky amy vavaky io. Ka ndre bevata ndre kelikely ty fanapahan-kevitsy rambesinao sanandro, le atorò hoe tena atahoranao ty anara masini-Jehovah. Vavolombeloni-Jehovah vatany iha lafa manao ani-zay, satria manome voninahitsy ani-anara io. (Ohab. 27:11) Ho afaky mivola manahaky ani-Mika mpaminany tsika iaby amy zay hoe: “Handeha amy anarani-Jehovah Ndranaharintsika zisiky amy fotoa tsy voafaritsy [tsika], eka, zisiky farany.”—Mika 4:5.