1. Ndjoka Ndjambe wɔma osakisolande nge, ko lamo wanɛ wakɔpa Yehova oyɛwɔ ladjɛ ndowoka wɔma?

AKRISTO ndjokaka Ndjambe ngandji la ndowokaka wɔma. Le wamɔtshi, akambo ape wasɔ wapasange. Koko, wɔma wɔsɔ wopalekɔ wɔ nyɛtshi wotopa bale. Oyɛwɔ nde wɔma wotshikitanyi. Onto woka Ndjambe wɔma ndɔkɔpaka la ndaakakitshɛka tende l’oloko omɔ. Onto wɔsɔ apakɔpaka nangha n’kambo tshɛ djepa sasangɛ Papa kɛnde ke ladjiko, ladjikɛnde apakɔpɛ ntshita ilongo yɛnde nyande.​—Yee. 111:10; Woongo 8:13.

2. Lá nkilika Yeembo 86:11, ekaso lɔ nge la djamba djɛnɛ?

² Wala Yeembo 86:11. Etepela Davidɛ wɛsɔ wɛnyɛ djɛ, nde ɛnaki ohomba wɔ ndjoka Ndjambe wɔma. Tolende wopo wokokaso nkamba la etepela we lá vɛrse djɛnɛ. Tówanga lɔ la n’shishima donga mɔtshi djoyɛso ladjɛ ndjala l’okitshakitshɛ lá djina djɛ Ndjambe. Meteyi lɔ tɛɛna wop’ɔkɔnge okakaso nyɛnyɛ okitshakitshɛ wɔkɔ la lowiko lɔsɔ lɔ loshi la loshi.

3. Mɔsɛ ndɛnyi nge, ko ladjikɛnge n’kambo n’tshɔ iyokotshɛ djɛ ndjala l’okitshakitshɛ lá djina djɛ Ndjambe?

³ Kokanela wopo wɔ Mɔsɛ ndaawoke wina w’indisama l’oholo wɔ n’ve ko ndɔmbɛna lá nsese la yopasɛ wumo (lotombo) wɔ Yehova. Okanda Étude perspicace ntepelaka ente: ‘Mɔsɛ awaka mbamba kɛnde nyɛna akambo wa n’kekete watɛnama kanga me onto ɔmɔ la tondo kɛ Yeso Kristo ndjɛ la looko.’ Lá wina wɔkɔ, Mɔsɛ okaka etepela wɛsɔ, epa l’ehamu ondjelo ndeke lotepelisa etepela wɛsɔ ante: ‘Yehova, Yehova, Ndjambe kɛ nkɛtshi, lokaná djandji, apokaka nkɛlɛ la nkeke, ambolola tɔɔ  la ngandji kɛ n’kɔmano, edjinge nsɔsɔlɔ, angenyɛke ngandji kɛ n’kɔmano tee nunu dj’anto, ndjipisanyɛka evunga, nkɔmɔ, edjinge ewe.’ (Eposelo 33:17-23; 34:5-7) Mbala imɔtshi ndakanelaki n’kambo djɛ ndɛnyi n’tshɔ wina windalumolaka djina djɛ ‘Yehova.’ Djɛko ndeke topakamɔ djɛ ndjoka djɛ ndambo daambi mɔkɔngɔ, nde ayɛka ndolaka ase Isariyɛlɛ dj’iwɔ ‘ndjoka djina djɛ lumo ntshɔ wɔma.’​—Mvungo K’ɛlɛmbɛ 28:58.

4. Wekeka wakɔnge wa Ndjambe watotshinda djɛ ndɔɔkɔpa?

⁴ Djina djɛ Ndjambe ntɛnyɛka wopo w’onto woyɛnde. Iso ladjɛ nkanelaka lá wekeka wɛnde, entengo nkfulu, balo, sii edjinge ngandji kɛnde. N’kambo n’tshɔ ngototshinda djɛ ndɔɔkɔpa.​—Yee. 77:11-15.

5-6. a) Djina djɛ Ndjambe osakisolande nge? b) Lá nkilika Eposelo 3:13, 14 edjinge Izaya 64:8, wopo wɔkɔnge Yehova ndookotshɛka ɛkɔpa kɛnde?

⁵ Kɛkɔnge kewaso lá nsakiso kɛ djina djɛ Ndjambe? Weeká akambo wa Bible ndjawolaka ambɔ djina ‘Yehova’ nkoka sakisola ente ‘Nde nanghaka djɛ ndjaala.’ Kɛsɔ ntovugolaka djɛ lako ekete kekoka nshimba dj’ɛkɔpa kɛ Ndjambe nanghema. Yehova alekɔ la nkfulu kɛ nangha k’enkfumɔ kindalɔngɔsɔla djɛ nangha.

⁶ Wop’ɔkɔnge Yehova onanghande ɛkɔpa kɛnde? Ntondotondo, nde nyɔmɛlɛ ndjalaka tshɛ kelekɔ djonyi djɛ nkotshɛ alaka wande. (Wala Eposelo 3:13, 14.) Tongokeketshamake djɛ ntɔnɔlaka lá enanghedji kɛnde kɛsɔ. N’kambo dj’epe, Yehova akoka nkamba l’ankambi wɛnde wɛ n’tshamba djɛ djɔ, nde nkoka ndawila anto wa djonyi djɛ ndokambela la nkotshɛ ɛkɔpa kɛnde. (Wala Izaya 64:8.) Topo tope tɔsɔ ndeke ndokotshɛka kɛnɛ kindakane. Lako ekete kooshimba djɛ nkotshɛ okoma wɔnde.​—Iza. 46:10, 11.

7. Wop’ɔkɔnge oyɛso ladjɛ nangha djɛ nfudjɛ djedjɛ djɛso te Papa kɛso kele ládjiko?

⁷ Wop’ɔkɔnge oyɛso ladjɛ nangha djɛ nfudjɛ djedjɛ djɛso te Papa kɛso kele ládjiko? Iso ladjɛ nkanelaka lá kɛnɛ kindananghe la kotɔpɛyɛnde mbamba djɛ nangha. Ndjɔmbɔmba iso nkokaka ntɔnɔlaka l’etongelo kɛnde.  Nghɔsɔ ndeke n’kete djɛ ndatonge ngofudjɛ ngandji la wɔma wɔso tende. (Yee. 8:3, 4) Ntsha tombɔtɔnɔla wopo wotilande anto wa djonyi dj’iso nkotshɛ ɛkɔpa kɛnde, tongoyala l’okitshakitshɛ w’efula tende. Djina ‘Yehova’ n’dekɔ ekekete edjinge wɔma! Djina djɛkɔ ndendamaka la k’enkfumɔ kelendana la l’onto lɔnde, tshɛ kindananghe, la tshɛ kɛ ndongonangha l’estho weyaye.​—Yee. 89:7, 8.

8. La nkilika Mvungo K’ɛlɛmbɛ 32:2, 3, wop’ɔkɔnge Yehova ɔkɔpande djɛ ankambi wande wakambe la djina djɛnde?

⁸ La ntondo kɛ wana w’Isariyɛlɛ ndjingela la Nkɛtɛ yɛ Daka, Yehova alakanyɛka Mɔsɛ etepela welá yeembo. Mɔsɛ koko, ndombolakanyɛ as’Isariyɛlɛ. (Mvu. 31:19) Nyɛnamaka papoo lá etepela wɛ ntondo wɛ yeembo yɛkɔ djɛ, Yehova apakɔpɛ djina djɛnde ndjisama kana koko ndɔsama ekina kemboleka lá ndolumola. (Wala Mvungo K’ɛlɛmbɛ 32:2, 3.) Nde nkɔpaka djɛ n’tongami tshɛ djelekɔ la balo ndolembetela! Ɔsɔngo mpeyi ase Isariyɛlɛ iyawa djɛ ndjekamɛ Mɔsɛ wina wɔ ndashimelaká n’kambo djɛ Yehova edjinge djɛ djina djɛnde djɛ lumo! Olakanyelo wɔsɔ wokembɛka djawo djɛwɔ edjinge apeyɛka oloko wolo, ngete n’vula kɛ vwavwa lá n’kete djɛ yombokona. Okokaso nangha mo dj’olakanyelo wɔso ndjala l’eposelo wɛkɔ ɛmɔ te anto watekameyɛ?

9. Wop’ɔkɔnge okokaso ndjila lɔwɔ djɛ djina djɛ Ndjambe ndjala ekina?

⁹ Wina wopoposanyɛso, iso nkoka n’kamba la Bible djɛ nyɛnyɛ anto djina djɛ Ndjambe. Tolekɔ la enkanda, wa ndapɛyɛ wekoka nkota eloko wɛwɔ, edjinge tokoka ndawɛnyɛ tovideo edjinge n’kete nkina djelekɔ lá sitɛ kɛso djelumɛ Yehova. Ntsha tolekɔ lá olemo, lá nkalasa, lá lɔkɛndo tolekɔ ngo la mbamba kɛ ntepela n’kambo djɛ Ndjambe kɛso endjinge djɛ wekeka wɛnde. Wina woshimelaso anto nonghanyi yɛnde yɛ la n’kambo dj’anto, edjinge djɛ looko, iso ndakotshɛka djɛ n’djisola akambo wɛ yopewaka ntondo la n’kambo djɛ Ndjambe. Wina washimelaso nsɔsɔlɔ kelendana la Papa kɛso ke ládjiko kembolola tɔɔ la ngandji, iso ndjilaka lɔwɔ djɛ djina djɛnde ndjala ekina. Tongawɛnyɛke djɛ akambo amɔtshi wiyombalakanyɛ lá n’kambo djɛnde walekɔ engolo wɛ Satana. Edjinge iso ndaashimelaka elakanyelo ngo wɛmɔkotoko welekɔ la nkfulu kɛ ndalesɛ lá lonyuma la ndaakembɛ.​—Iza. 65:13, 14.

10. Lamo isopakoke nyemala ngo lá ndakanyɛ akano wa Ndjambe toko?

¹⁰ Wina wolakanyɛso onto Bible, iso nkɔpaka djɛ nde ndjewa djina djɛ Ndjambe edjinge ndokeketshɛ djɛ nde nkamba la djina djɛkɔ. Iso nkɔpaka lonkina ndokotshɛ djɛnde ndjewa kɛnɛ kesakisola djina djɛ Ndjambe. Okanelɛ mo, nde angewa wayi wasɔ ntsha toshimela ngo ɛlɛmbɛ l’akano la tɔnkfɔ tee lá Bible toko? Nde angeka djɛ ndjewa olekɔ ɛlɛmbɛ wɛ Ndjambe, edjinge nde nkoka ndɔkɔpa ɛlɛmbɛ wɛkɔ. Ko, nde angoyala la n’tshunamu te Yehova ma ngandji kowokande edjinge lá wopo w’onto woyɛnde? Kookanela: Eva ewaki ɛlɛmbɛ wɛ Ndjambe, koko atoka Onto wilisa ɛlɛmbɛ wɛkɔ ngandji, Adama ngo wop’ɔkɔ. (Ewa. 3:1-6) Ndjɛko ndeke topakoke nyemala ngo lá ndakanyɛ anto akano wa djɔ wa Ndjambe toko.

11. Wina wolakanyɛso ambeki tɔkfɔ la ɛlɛmbɛ welá Bible, okokaso nangha nge dj’iwɔ ndjoka kanga lilisa tɔkfɔ la ɛlɛmbɛ ngandji?

¹¹ Akano, ɛlɛmbɛ la tɔkfɔ tɔ Yehova tolekɔ wɔlɔ edjinge djonyi. (Yee. 119:97, 111, 112) Koko ombeki wɔso wɔ Bible apangawola nghɔsɔ ntsha nde atɛnyi djɛ, tɔkfɔ l’ɛlɛmbɛ welá Bible wɛsɔ, walekɔ lá wɔlɔ wɔso edjinge wɛnyɛ ngandji kɛ Yehova teso. Djɛko ndeke toowopole ente: “Ɛnɛ mo la wopo wotoshimela  Yehova djɛ nangha n’kambo djɛnɛ la m’pa nangha djenyi? N’kambo n’tshɔ ɛnyɛnde nge lá wopo wɔ Ndjambe kelekɔ Yehova?” Ntsha iso ndokotshɛ djɛ nde nkanelaka edjinge nkɔpa djina djɛ Ndjambe djɛ lumo ntshɔ, tongokoka nkota oloko wɔnde. Nde angɔkɔpa, ape ngo ɛlɛmbɛ wele lá Bible toko, koko edjinge Onto wilisa ɛlɛmbɛ wɛkɔ. (Yee. 119:68) Kɛsɔ kengofudjɛ djawo djɛnde la kengookotshɛ djɛnde nkfulumeyɛ ekakasano wookongela.​—1 Kɔ. 3:12-15.

12. Ladjikɛnge lá mbamba kɛmɔtshi, Davidɛ ndotalonga djɛ nama oloko wɔnde onkfumo te Yehova, edjinge k’eyisa ndoposa nge?

¹² Nkfumi Davidɛ akɔpaki mpɛyɛ Yehova oloko wɔnde onkfumɔ. Djɛko ndeke ndɔɔlɔmbɛ ante: ‘Sanghanyɛ oloko wɔmi.’ (Yee. 86:11) Etepela windafune mee Ndjambe wɛsɔ ndola tɔɔ la nsakiso. Lá lowiko lɔnde, Davidɛ ayɛka ndisola ante alekɔ wɔdju djɛ ndjala l’eloko epe. Loshi lɔmɔtshi, aleko la mvulu kela djiko, ndɔmbɛna wadjɛ mpame w’iyetaká Batishɛba ɔka. Wina wɔkɔ, oloko wɔ Davidɛ woyalaka otondo kana koko watɔnaka? Nde ewaki ɔlɛmbɛ wɔ Yehova wɔnɛ: ‘Tonkombolake wadjɛ winako.’ (Eposelo 20:17) Kaanga oyɛwɔ nghɔsɔ, nde akindjɛka ngo ndenda Batishɛba. Oloko wɔnde watɔnaka ndambo lá mposɛ yɛnde ndambo kekina te Yehova. Kaanga ndakɔpaka la ndookaka Yehova wɔma ɛnɔnyi efula, ayaatshikaka la mposɛ yɛnde yɛ lokaki ko ananghaka evunga wɛ n’kekete. Ko ilaka djina djɛ Yehova mbindo. Ngo m’ɔtɛ wɔnde, anto ankina watanangha ovunga edjinge nkfumbo kɛnde, wayɛka ndɛna ndjolo efula.​—2 Samwɛlɛ 11:1-5, 14-17; 12:7-12.

13. Wopo wɔkɔnge ewaso ente Davidɛ ayɛka ndopɛyɛ oloko wonkfumɔ te Yehova?

¹³ Yehova apɛyɛka Davidɛ iluku(dilanyɛ), ko Davidɛ ayɛka ndoyala la losambi lɔ wɔlɔ la Ndjambe. (2 Sa. 12:13; Yee. 51:2-4, 17) Koko atavungɛ lotshinda lotshinda ndjolo iposisa ma ovunga wɔnde, nde awolaka djɛ, nkama ayɛkandonangha ovunga wɔsɔ ndé, nde ayɛka ndawola djɛ oloko wɔnde ndjatɔna. Etepela welekɔ lá Yeembo 86:11 nkoka nkadjimɔma nghɔnɛ: ‘Ɔmpɛyɛ oloko wopatɔna.’ Yehova okaka lɔlɔmbɔ lɔnde? Ee, ladjikɛnde Bible ntepelaka n’kambo djɛ nde etengo ‘mpame kilisa’oloko wɔnde wonkfumo te Yehova Ndjambe.’​—1 Nkfumi yɛ n’kanga 11:4 ; 15:3.

14. Woopó wɔkɔnge woyɛso la djɛ ndaawopola, ko ladjikɛnge?

¹⁴ Ndjɔmbɔmba kɛ Davidɛ ketokeketshɛ, koko, ketotshinda djɛ ntɔnɔla. Wopo wɔ ndananghe ovunga w’ekekete wɔsɔ, alekɔ ndjewo leso lɔɔko kɛnɛ. Toyalaka anto wambokambela Ndjambe ila kana ngo ɛnɔnyi emangha  toko, tokoyawopolá: ‘Lemi hanɛ mpikamaka lá ehemba wɛ satana kangonangha djɛ oloko wɔmi ndjatɔna?’

15. Wopo wɔkɔnge wɔma wokaso Ndjambe okokawɔ ntolama wina woyalaso la ntondo kɛ fɔtɔ la filimɛ yetowetshola mposɛ?

¹⁵ Ndjɔmbɔmba, ntsha ombingela l’Ɛtɛrnɛtɛ kana koko olenda televiziɔ, ko fɔtɔ kɛmɔtshi kekoka mbetshola mposɛ yɛ nyɛtshi kemboposa, onanghɛ mo? Okoka ntepela ente fɔtɔ kɛnɛ kana koko filimɛ kolendami kɛnɛ kepalekɔ kɛnyɛwɔ anto enghanghunya. Ɔsɔ ape wopo ɔmɔtshi wonangha satana djɛ nkakitola oloko wɔko? (2 Kɔ. 2:11) Tɔkɔsa ndjɔmbɔmba kɛ lowolo l’isɔdji, epeko kɛ daambi kokambakawɔ djɛ ndjata ntenyi dj’etamba djɛ n’kekete. Wango wangake la ndjingeyɛ isɔdji yɛnde ta etenyi k’otamba, ko iwɔ ndɔkɔkɔmɛ djɛ ingele otale, ko otamba ndatshɛ la n’tatshi m’pe. Filimɛ yepɛnama ngete yɛnɛ yɛnyɛwɔ anto enghanghunya, koko mbetshɔlaka mposɛ, ikoka ndjala ngete isɔdji yɛ epeko kɛsɔ. Ekete kɛnama ma bango ngete kelekɔ dambi lako nyɛtshi, nkoka mbalakɛkɔ kɛmɔ nkakitola oloko w’onto, djipa nde nama n’kɔmano djɛnde ko nangha ovunga. Djɛko ndeke, tawolake kaanga ikanyi, mposɛ yɛ nyɛtshi ndjingela l’oloko wɔko! Lama oloko wɔko onkfumɔ djɛ wɛ nkindjɛ ndjoka djina djɛ Ndjambe wɔma!

16. Lá ntondo kɛ ohemba, weepó wɛkɔnge woyɛso ladjɛ ndaawopola?

¹⁶ Fɔtɔ la filimɛ yɛpɛnama ngete ilekɔ nyɛtshi oyɛwonde l’eteyi kɛ toopo t’efula tɔ Satana okambande djɛ ntɔkfɛyɛ lá evunga. Iya koko onanghakaso mo lá ntondo kɛ ohemba? Alekɔ wɔdju djɛ ntepela mbala efula ente lemi ntananghe nyɛtshi. Ndjɔmbɔmba, iso nkoka ntepela ente: ‘Ntsha lambonangha n’kambo djɛnɛ wapango nyimɛ ma otshumano, nyɛnamaka djɛ ntananghe ovunga.’ Wopo wɔ tokanyi tɔ nghɔsɔ tolekɔ nyɛtshi edjinge ntɔlaka  tá ndjolo. Toyawopole weepó wɛnɛ: ‘Satana ndombompemba la n’kambo djɛnɛ nde djɛ ntshinda lemi djɛ ndjatola oloko wɔmi? Ntsha lambawola ndjimbama ma mposɛ yɛmi yɛ nyɛtshi, mpóngila djina djɛ Ndjambe mbindo? Ntsha lambonangha nghɔsɔ langowangɔ la Ndjambe ndokoko langoyala imama la nde?’ Tɔnɔla la weepó wenyi edjinge lɔmba balo me Yehova djɛ nkokotshɛ djɛ wɛ nkadjimola lá weepó wɛsɔ la n’kɔmano tshɛ, m’pa ndaadjimba nghɔmɛlɛ. (Djakɔbɔ 1:5) Nangha nghɔsɔ angokokotshɛ djɛ wɛ ndaawomba wɔɔlɔ, edjinge mpikama pikaa lá ehemba, etengo Yeso ndatepela ante: ‘Satana, ombangɔ.’​—Mat. 4:10.

17. Ladjikɛnge oloko wombatɔna iyopalekɔ la djonyi efula? Pɛyɛ ndjɔmbɔmba.

¹⁷ Oloko wombatɔná wopalekɔ la djonyi efula. Tɔkɔsa ndjɔmbɔmba k’ekipɛ kɛ bale. Kɔɔsa djɛ tojuwɛrɛ tɔ l’ekipɛ kɛmɔtshi wapokana lanteyi kɛwɔ iyɔmɛlɛ, wamɔtshi wakɔpa mba djedjɛ nkfumɔ, ankina wapakilika ɛlɛmbɛ la koko ankina watshola wétsha w’etombo. Angoyala wolo dj’ekipɛ kɛsɔ ndjila otshumba! Koko, ekipɛ ketomba l’osanga mbaka mpeyi kɛ ndjila otshumba. Oloko wɔko wokoka ndjala etengo ekipɛ kɛsɔ kembila otshumba, koko ngo tokanyi, nsaki, la mposɛ yɛko inkfumɔ ndɔndjɛma tá olemo wokambelɛ Ndjambe. Tovungɛke ente satana nkɔpaka djɛ oloko wɔko ndjatɔna. Ɔkɔpande nde tokanyi, mposɛ la nsaki yɛko nsamba ‘ndjokana’ iyɔmɛlɛ edjinge nsamba ndjokana la ɛlɛmbɛ wɛ Yehova. Koko djɛ nkambela Yehova wɔlɔ ngo wɛ mba oloko onkfumɔ. (Mat. 22:36-38) Ndjɛko ndeke tɔpɛyɛke Satana mbamba kɛnde nkɔpɛyɛ oloko wombatɔna!

18. La nkilika Mika 4:5, ngombo kaná djɛ nangha nge?

¹⁸ Ngete Davidɛ, lɔmba Yehova ente: ‘Sanghanyɛ oloko wɔmi djɛ lemi ndjoka djina djɛko wɔma.’ Ko, nangha la wolo wɔko tshɛ djɛ wɛ nsɛna lá yopo yɛ nfɔna la lɔlɔmbɔ lɔko te Yehova. Akano wako ankfumɔ, wa n’kekete kana wa daambi wɛnyɛ djɛ wɛ olekɔ la okakitshɛ w’efula lá djina dj’ekina djɛ Ndjambe! Laa ngonghonangha nghɔsɔ, wɛ lolekɔ owakɛ wɔ Yehova, ongolumɛka djina djɛnde. (Woo. 27:11) Ntsha tombonangha nghɔsɔ, tongokoka ntepela isankfumɔ, entengo ɔprɔfɛta Mika: ‘Ntongɔkɛndaka ngo la djina djɛ Ndjambe kɛso Yehova lotshinda lotshinda.’​—Mika 4:5.