1. Kutshina Yehowa akulesha kinyi, na bwakinyi bi na muulo bwa baba boso bamufule?

BENA Kidishitu mbafule Efile Mukulu, na abamutshinaa. Kadi bwa bangi abamona’shi bino mbikutwene. Tatukwete kwisambila moo autshinyishaa nya. Atwisambila moo wipabwao. Bantu be na uno moo, be na kaneemo kakata bw’Efile Mukulu. T’abakumiina kulwishisha Nshaabo e mwiyilu mwanda tabakumiina kulwisha kipwano kyabo n’aye.​—Mis. 111:10; Nki. 8:13.

2. Muyile mayi a Nfumu Daavide e mu Misambo 86:11, mmyanda kinyi ibidi yatukyebe kutaluula?

² Badika Misambo 86:11. Nsaa y’onangushena ku ano mayi, we mulombene kumona’shi Nfumu Daavide baadi mupushe kalolo muulo wa kutshina Efile Mukulu. Tutaleyi mushindo watudi balombene kutumikila mayi ayokyelwe a Daavide. Wa kumpala, atutaluula tubingilo atwitukakula bwa kutshina Efile Mukulu ngofu. Wa kabidi, atutaluula mushindo watudya kulesha’shi atutshinyi eshina dy’Efile Mukulu efuku dyoso.

3. Mwanda kinyi ubaadi ukwashe Moyiise bwadya kushaala na kaneemo kakata bw’eshina dy’Efile Mukulu?

³ Banda kunangushena bibaadi bipushe Moyiise nsaa ibaadi mwiname pa lubwebwe na kumona mu kimonwa ntumbo ya Yehowa ayikidi. Abimweka’shi takubaadi ungi muntu  mumone kimonwa kibino kumpala kwa’shi Yesu afikye pano pa nsenga. Moyiise baadi mupushe mayi ababadi bakule kwi mwikeyilu’shi: ‘Yehowa! Yehowa! Efile sha lusa na kalolo, shyaakwataa nsungu bukidi, muule na kifulo na boolokye sunga bya binyibinyi; ashaala mulamate binunu bya ntandwa, alekyelaa bilema, [bilubilo] na milwisho.’ (Efi. 33:17-23; 34:5-7) Abimweka’shi kyakya kimonwa kibaadi akimufwila mbinangu pabaadi atemuna eshina Yehowa. Nyi bwakinyi kunyima kwa mafuku, Moyiise baadi mudimushe bena Isaleele “bwa kutshina dinw’eshina dya ntumbo.”​—Miy. 28:58.

4. Nkinyi kilombene kwitukwasha bwa kunemeka Yehowa ngofu?

⁴ P’atunangushena pabitale eshina Yehowa, bibuwa twele binangu kwi winyi sha dyadya eshina. Abitungu tutentekyeshe ngikashi yaaye, bu bukome bwaye, binangu byaye, kululama kwaye, na kifulo kyaaye. Kunangushena ku ino ngikashi na ingi nkulombene kwitutakula mu kumunemeka ngofu.​—Mis. 77:11-15.

5-6. (a) Eshina dy’Efile Mukulu adipatuula kinyi? (b) Muyile Efilu 3:13, 14 na Yeeshaya 64:8, Yehowa alombasha mpàngo yaye mu mishindo kinyi?

⁵ Nkinyi kyatwiuku pabitale akipushisha eshina dy’Efile Mukulu? Bantu abataluula myanda ya mu Bible abakumiina n’abo’shi, eshina Yehowa adilesha’shi: “Eyikashaa kyoso kyakumiina kwikala.” Bino abitutentekyesha’shi takwi kintu kilombene kwimika Yehowa bwa kukita kyakyebe, na ekukita bya’shi by’akumiina bikitshikye. Mushindo kinyi?

⁶ Yehowa akitaa bya’shii myanda ikitshikye pa kwiyikasha kyoso akitungu bwa kulombasha mpàngo yaye. (Badika Efilu 3:13, 14.) Mu mikanda yetu, bakwete kwitunyingisha nsaa yooso bwa kunangushena ku uno mushindo wa kukanya wa bumuntu bw’Efile Mukulu. Yehowa mulombene kufwisha bafubi baaye bakutwe kupwidika kyakyebe bwa kumufubila na kulombasha mpàngo yaaye. (Badika Yeeshaya 64:8.) Mu uno mushindo, Yehowa akumbasha mpàngo yaaye. Takwi kintu kilombene kukutshisha mpàngo yaaye bwayidya kulombana nya.​—Yesh. 46:10, 11.

7. Mushindo kinyi watudya kunyisha kwikala na lutumbu bwa Nshetu e mwiyilu?

 ⁷ Twi kunyisha kwikala na lutumbu bwa Nshetu e mwiyilu, pa kunangushena pabitale bintu byadi mukite na byadi mwitupe ngobesha ya kukita. Bu kileshesho, nsaa yatunangushena ku bintu bya kukanya byadi mupangye, atunyisha kutshiina Yehowa bwa midimo yaaye. (Mis. 8:4, 5) Na p’atunangushena ku bitwikashe Yehowa bwatudya kulombasha mpàngo yaaye, atutamisha kaneemo ketu bwaye. Eyendo’shi eshina Yehowa ndya kutshina ngofu! Bino mbitale mushindo wi Nshetu, byooso byadi mukite, na byooso byakakitshi.​—Mis. 89:8, 9.

8. Mukanda wa Miiya Ikituulwe 32:2, 3 aulesha mweneno a Yehowa pabitale eshina dyaaye naminyi?

⁸ Kumpala kwa’shi bena Isaleele batwele mu Nsenga ya Mulayilo, Yehowa balongyeshe Moyiise mayi a loono. (Miy. 31:19) Moyiise namu badi mulongyesha mwilo lwalwa loono. (Badika Miiya Ikituulwe 32:2, 3.) Nsaa yatunangushena pa verse 2 na 3, abimweneka patooka’shi Yehowa takumina’shi eshina dyaaye difwame, bu kwidikasha dikile selele mu mushindo wabashi balombene kwiditeemuna. Akumina’shi eshina dyaaye bediukye kwi bantu booso! Bibaadi mwanda ukile buwa kwi mwilo pa kupusha Moyiise eulongyesha pabitale Yehowa, n’eshina Dyaaye dya ntumbo! Myanda ibaadi Moyiise mwibalongyeshe, ibaadi inyingishe lukumiino lwabo na kwi ba nyingisha mashimba, nka abikalaa mpeshi akwasha mitshi bwashi ikule. Twi balombene kushinkamisha naminyi’shi malongyesha etu e nka byabya?

9. Mushindo kinyi watudya kukwasha mu kutumbisha kw’eshina dy’Efile Mukulu?

⁹ Patudi mu bulungudi bwa ku nshibo na nshibo sunga pa mbalo i bantu bebungi, twi balombene kufubisha Bible etu bwa kulesha bantu’shi Yehowa nyi eshina dy’Efile Mukulu. Twi balombene kwibapa mukanda, kwibalesha ma video, na bintu bi mu site etu abitumbisha Yehowa. Ku mudimo, ku kalasa, sunga patudi mu lwendo, twi balombene kupeta mishindo ya kwisamba na bantu pabitale Efile Mukulu etu mpa na kyadi. Nsaa yatulungula bantu pabitale mpàngo ibuwa ya Yehowa bwa bantu na nsenga, atwibakwasha bwabadya kwikala na mweneno ebuwa pabitale Yehowa. P’atulungula bangi bya binyibinyi pabitale Nshetu a kifulo, atukwasha mu kutumbisha kw’eshina dy’Efile Mukulu. Atukwasha bantu bwabadya kupusha’shi myanda yabadi bebalongyesha pabitale Yehowa ngya madimi. Myanda i mu Bible y’atulongyesha bantu nyi malongyesha e na muulo.​—Yesh. 65:13, 14.

10. Bwakinyi t’abitungu’shi twimene penda pa kulongyesha balongi betu ba Bible miiya y’Efile Mukulu?

¹⁰ Patukwete kulonga Bible na bantu, lukalo lwetu ndwa kukwasha muntu atulongo naaye bwadya kuuka na kufubisha eshina dya Yehowa. Atukumiina dingi kwibakwasha bwabadya kuuka Yehowa kalolo. Twi balombene kukita bino su twemena penda pa kwibalongyesha miiya y’Efile Mukulu, na mayi a kulonda pabitale mwikeelo su? Mulongi ebuwa mulombene kulonga pabitale miiya y’Efile Mukulu, mpa na kwiyisangeela. Anka mulongi mulombene kukookyela Yehowa penda mwanda wa’shi mumufule su? Tentekyesha’shi, Eeva badi auku mwiya w’Efile Mukulu, anka aye na Adame tababaadi bafule Efile Mukulu nya. (Kib. 3:1-6) Byabya t’abitungu twimene penda pa kulongyesha bangi pabitale miiya ilulame y’Efile Mukulu nya.

11. Nsaa yatulongyesha balongi ba Bible pabitale miiya y’Efile Mukulu, mbikunyi byatudya kwibakwasha bwabadya kufula yawa Atushaa miiya?

¹¹ Miiya ya Yehowa ayikalaa buwa. (Mis. 119:97, 111, 112)  Kadi balongi betu ta mbalombeene kunangushena mu wawa mushindo su tambapushe’shi ino miiya ayilesha kifulo kya Yehowa. Byabya, twi kwipusha balongi betu ba Bible’shi: “Bwakinyi Efile Mukulu atekye bafubi baye bwabadya kukita bino sunga kupela kukita byabya? Bino abitulesha kinyi pabitale bu Muntu bwaye?” Su twakwasha balongi betu ba Bible bwabadya kunangushena pabitale Yehowa na bwa kutamisha kifulo kyabo bw’eshina dyaye, paapa atukumu ku mashimba aabo. Balongi betu abafulu kushi penda miiya kadi mpa na winyi Mwiyele. (Mis. 119:68) Lukumiino lwabo alunyingi na atwibakwasha bwabadya kunyingiila bitompwanga abikebafwila.​—1 Kod. 3:12-15.

12. Mbikunyi bibaadi Daavide mukutwe kulama eshimba dimune ungi musuusa, na mbipeta kinyi bibatuukile?

¹² Mwaku wi na muulo ukata mu Misambo 86:11 nguno awamba’shi: “Mpe eshimba dimune.” Nfumu Daavide baadi mufunde ano mayi ku bukwashi bwa kikudi kiselele. Pabaadi na muuwa, bamwene’shi mbibofule bwa’shi eshimba ditakule muntu mu kukita kintu kibubi. Ungi mususa, baadi kwiyilu kwa nshibo yaye, aye nkumona mukashi a muntu kwetumpu meema. Yaya nsaa, Daavide bashele n’eshimba dimune su dibaadi dimutakule ku kingi kintu? Baadi auku kalolo mwiya wa Yehowa awamba’shi: “Tolakilanga mukashy’a muntu-noobe.” (Efi. 20:17) Batungunukile na kubandjila yawa mwana mukashi. Bino bibamufwishiishe mu kwikala na mashimba abidi, dimune adimutumu kwi yawa mwana mukashi Betsabee, dingi namu adimutakula bwadya kusangasha Yehowa. Sunga mbibaadi mufule Yehowa munda mwa mafuku na kumutshina, baadi mulombashe nkalo yaye i bubi. Pamwanda wa byabya, Daavide bakitshine kintu ki bubi. Baadi mukayishe eshina dya Yehowa. Daavide baadi dingi mufwishile bantu bashi na mwanda nkalakashi, mpa na kifuko kyaye.​—2 Sam. 11:1-5, 14-17; 12:7-12.

13. Atuuku naminyi’shi Daavide bapetele dingi eshimba dimune?

¹³ Yehowa baadi munyokye Daavide, na Daavide nkwalusha kipwano kyaye na Yehowa. (2 Sam. 12:13; Mis. 51:4-6, 18) Daavide baadi mutentekyeshe makyenga abaadi mupete nsaa ibaadi mutadiile eshimba dyaye adiabuula. Yehowa baadi mukwashe Daavide bwadya kwikala n’eshimba dimune su? Oolo, mwanda mayi abaadi Yehowa mwakule kunyima, abaadi aalesha’shi Daavide “beekeele . . . mulamate kwi Yehowa, Efile Mukulu aaye.”​—1 Bf. 11:4; 15:3.

14. Ndukonko kinyi alutungu’shi twiyipushe, na bwakinyi?

 ¹⁴ Kileshesho kya Daavide akitunyingisha, anka akitudimusha. Kukita kwaye kwa mulwisho a kudimusha bafubi b’Efile Mukulu lelo uno. Sunga twabanga kufubila Yehowa binobino sunga kubanga kala, abitungu twiyipushe’shi: ‘Nkwete kukambila bitompwanga bya Satana abintakula bwa kwikala na mashimba abidi su?

15. Kutshiina Efile Mukulu akwitukwasha naminyi nsaa yatumono bifwatulo bya bantu be muswa?

¹⁵ Bu kileshesho, su omona kifwatulo ku TV sunga ku Internete kilombene kwibwesha lukalo lwa kutambuka lusandji, we kukita kinyi? We kupwandjikisha’shi kyakya kifwatulo sunga yawa video ta pornografi nya. Anka, nkilombene kwikala bu kintu kyabafubisha kwi Satana bwa’shi wekale na mashimba abidi? (2 Kod. 2:11) Kyakya kifwatulo kikwikala bu ka kyamo kapela akafubisha muntu bwa kutonkola mutshi. Bwa musango wa kumpala kipoko takikamba kumweneka nya. Mwenda kupokola, kipoko akyende na kumweneka. Kutala bifwatulo bya bantu be muswa ku TV sunga ku Internete nkulombene kwikala bu kano ka kyamo su? Kutala bintu bi bino na kumona’shi tabii masaku, nkulombene kutakula muntu mu kukita mulwisho luntuluntu ku meso kwa Yehowa na kukutwa kulama lulamato. Byabya, totweshanga kintu su nkimune kishii buwa mwishimba dyobe! Ekala nka n’eshimba dimune bwa kutshiina eshina dy’Efile Mukulu!

16. Nsaa yatutompibwa bwa kukita kintu ki bubi, nkonko kinyi ayitungu’shi twiyipushe?

¹⁶ Kukatusha kutala bifwatulo bya bantu be muswa, Satana kwete kufubisha ingi mishindo bwa kwitutakula mu kukita milwisho. Nkinyi kyatudya kukita? Twi kupwandjikisha’shi ta mbikambe nka bubi nya. Bu kileshesho, twi kupwandjikisha’shi: ‘Bino ta mbikile bubi mwanda ta mbalombene kuntushila byanka mu  kakongye nya.’ Kunangushena bino kwi bubi bukile. Bibuwa twiyipushe ino nkonko: ‘Satana nyi kwete kufubisha uno muteo bwa kwabuula eshimba dyande su? Su naleka ano malaka ebubi, nasabulusha eshina dy’Efile Mukulu su? Kino kikitshino akinkaka peepi n’Efile Mukulu, su akingisha kula n’aye?’ Nangushena ku ino nkonko. Teka kinangu bwa kwaluula bya binyibinyi ku ino nkonko. (Shak. 1:5) Kukita bino akwitukalwila ngofu. Akukukwasha bwa kusuuka kitompwanga nka bu bibakitshine Yesu nsaa ibakwile’shi: “Katuka, Satana!”​—Mat. 4:10.

17. Bwakinyi kwikala na mashimba abidi takwi na muulo? Tusha kileshesho.

¹⁷ Kwikala na mashimba abidi takwi buwa nya. Pwandikisha’shi bisaka bya maasha bi na bantu bashabepushena munkatshi mwabo. Bangi bakumiine nka’shi abo batumbwe, bangi tabalondo miiya, na bangi namu tabanemeka mukunkushi aabo. Kisaka ki bino ntakilombene kuwina nya. Anka kisaka ki mu buumune nkilombene kuwina. Eshimba dyobe ndilombene kuwina bu kino kisaka nka su binangu byobe, nkalo yobe, na byopusha mbibungye bwa kufubila Yehowa. Tentekyesha’shi, Satana akumiina’shi twikale na mashimba abidi. Akumiina’shi mu binangu byobe, nkalo yobe na byopusha mwikale mpaka pabitale miiya ya Yehowa. Byayba, obe ikala na lukalo lwa kufubila Yehowa n’eshimba dimune. (Mat. 22:36-38) Totadiilanga Satana su nkapela bwa’shi abuule eshimba dyobe!

18. Muyile mayi e mu Mika 4:5, bwaata kitshibilo kya kukita kinyi?

¹⁸ Teka Yehowa nka bu bibatekyele Daavide’shi: “Mpe eshimba dimune byandja kukutshîna.” Kita moobe moso bwa kutumikila luno luteko mu nshalelo obe oso. Efuku dyoso, bitshibilo bywata, bipeela sunga bikata bileshe’shi okwete kutshina eshina Yehowa dya kishila ngofu. Pa kukita bino bu Temwe a Yehowa, otumbisha dino eshina. (Nki. 27:11) Na oso a kwatudi ekala na kitshibilo ki mumune na mutemuki Mika bakwile’shi: “Atwe, atutambuka mwishina dya Yehowa Efile Mukulu eetu bwa looso.”​—Mik. 4:5.