1. San a wani taki fu frede Gado èn fu san ede den sma di lobi Yehovah musu abi a frede disi?

KRESTEN lobi Gado èn den e frede en tu. Ma son sma kan aksi densrefi fa yu kan frede wan sma di yu lobi. Frede gi Gado no wani taki dati wi e beifi gi en. A wani taki dati wi abi bigi lespeki gi en. Wi no wani du sani di o meki wi hemel Papa sari noso di o pori wi matifasi nanga en.​—Ps. 111:10; Odo 8:13.

2. San David taki na Psalm 86:11, èn san na tu sani di wi o luku na ini na artikel disi?

² Leisi Psalm 86:11. Te yu e prakseri den wortu na ini a tekst disi, dan yu kan si taki Kownu David ben sabi o prenspari a de fu lespeki Gado. Na ini na artikel disi wi o si san wi kan leri fu a sani di David taki na ini a begi fu en. Wi o luku fosi fu san ede wi musu abi bigi lespeki gi a nen fu Gado. Baka dati wi o luku fa wi kan sori lespeki gi a nen fu Gado na ini ala san wi e du.

3. San Moses ondrofeni èn fa dati yepi en fu tan lespeki a nen fu Gado?

³ Prakseri fa Moses ben e firi di a ben de na tapu Horeb-bergi èn di a si fa a glori fu Yehovah pasa na en fesi. A kan taki disi ben de a moro kefalek sani di wan sma ben  ondrofeni fosi Yesus kon na grontapu! Na a momenti dati Moses yere den wortu disi: „Yehovah, Yehovah, wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den du sondu” (Eks. 33:17-23; 34:5-7). A kan taki te Moses ben kari a nen Yehovah, a ben prakseri a sani disi di a ben ondrofeni. Dati meki wi kan frustan fu san ede Moses ben warskow den Israelsma fu ’lespeki a bigi nen’ fu Yehovah.​—Deut. 28:58.

4. San kan yepi wi fu kon abi moro lespeki gi Yehovah?

⁴ Te wi e gebroiki a nen fu Yehovah, dan wi musu prakseri tu fa Yehovah de. Wi musu prakseri den moi fasi fu en. Yehovah abi furu makti, a koni, ala ten a e du san reti èn a lobi wi. Te wi e prakseri den fasi disi èn den tra fasi fu Yehovah, dan wi o abi moro lespeki gi en.​—Ps. 77:11-15.

5-6. (a) San a nen fu Gado wani taki? (b) Te wi e luku san Eksodes 3:13, 14 nanga Yesaya 64:8 e taki, dan fa Yehovah e du san a abi na prakseri?

⁵ San a nen fu Gado wani taki? Furu sabiman e agri taki a nen fu Yehovah wani taki „A e meki kon tron”. Disi e memre wi taki noti no man tapu Yehovah fu du san a wani. Fa a e du dati?

⁶ Yehovah kan tron iniwan sani di de fanowdu fu meki a wani fu en pasa. (Leisi Eksodes 3:13, 14.) Furu leisi den buku fu wi e gi wi a deki-ati fu prakseri a sani disi fu Yehovah. Boiti dati, Yehovah kan meki sondusma di e dini en tron iniwan sani di de fanowdu fu du a wani fu en. (Leisi Yesaya 64:8.) Noti kan tapu Yehovah fu du san a abi na prakseri.​—Yes. 46:10, 11.

7. San o yepi wi fu kisi moro warderi nanga lespeki gi wi hemel Papa?

⁷ Wi o abi moro warderi gi wi hemel  Papa te wi e prakseri san a du gi wi èn san a e meki wi du. Fu eksempre, te wi e prakseri den moi sani di Gado meki, dan wi e kisi moro lespeki gi en (Ps. 8:3, 4). Te wi e prakseri fa Yehovah yepi wi fu du a wani fu en, dan wi e kisi moro lespeki gi en tu. Iya, a nen Yehovah na wan kefalek nen! Te wi e yere a nen fu Gado, a e meki wi prakseri ala den moi fasi fu en, ala san a du kaba èn ala sani di a o du ete.​—Ps. 89:7, 8.

8. Soleki fa Deuteronomium 32:2, 3 e sori, dan san Yehovah wani taki den anbegiman fu en musu du nanga a nen fu en?

⁸ Syatu fosi den Israelsma go na ini a Pramisi Kondre, Yehovah taigi Moses fu skrifi den wortu fu wan singi (Deut. 31:19). Moses ben musu leri den Israelsma a singi dati. (Leisi Deuteronomium 32:2, 3.) Te wi e prakseri den tu vers disi, dan wi e si krin taki Yehovah wani taki ala sma musu sabi en nen. A no wani taki sma feni taki en nen santa tumusi fu gebroiki en. A ben de wan grani gi den Israelsma taki Moses ben leri den fu Yehovah èn fu a bigi nen fu en! Neleki fa finifini alen bun gi den sani di wi e prani, na so den sani di Moses ben leri den ben tranga den bribi èn den ben gi den deki-ati. Fa wi kan sorgu taki wi e gi sma leri na a fasi disi tu?

9. Fa wi kan yepi fu santa a nen fu Yehovah?

⁹ Te wi e preiki oso fu oso noso na presi pe furu sma de, dan wi kan gebroiki Bijbel fu sori sma a nen fu Yehovah. Wi kan gi sma den moi buku fu wi èn wi kan sori den felem noso tra sani na tapu wi website di e gi grani na Yehovah. Te wi de na wroko, na skoro noso te wi de na pasi e go na wan presi, dan wi kan kisi na okasi fu taki fu wi lobi Gado èn fu den moi fasi fu en. Te wi e fruteri sma fu den moi sani di Yehovah o du gi libisma èn gi grontapu, dan wi e yepi den fu denki heri tra fasi fu en. Te wi e leri sma fa wi lobi Papa de trutru, dan wi e yepi fu santa a nen fu en. Wi e yepi sma fu frustan taki son sani di den leri fu Gado, na lei. Nowan tra sani kan gi sma so furu deki-ati, leki den sani di wi e leri den fu Bijbel.​—Yes. 65:13, 14.

10. Te wi e studeri Bijbel nanga sma, dan fu san ede wi no musu leri den nomo san na den wet fu Gado?

¹⁰ Te wi e studeri Bijbel nanga sma, dan wi wani yepi den fu kon sabi a nen fu Yehovah èn fu gebroiki en. Wi wani yepi den tu fu kon sabi fa Yehovah de. Wi no o man du dati efu wi e leri den nomo san Yehovah lobi èn san a no lobi. Wan Bijbelstudie kan kon sabi den wet fu Gado èn a kan feni taki den bun. Ma a o gi yesi na Yehovah fu di a lobi en? Hori na prakseri taki Eva ben sabi a wet di Gado ben gi en, ma a no ben lobi Gado èn Adam no ben lobi Gado tu (Gen. 3:1-6). Sobun, wi no musu leri sma nomo san na den wet fu Gado.

11. Te wi e leri den Bijbelstudie fu wi san na den wet fu Gado, dan fa wi kan yepi den fu kon lobi Gado tu?

¹¹ Den wet fu Yehovah bun gi wi (Ps. 119:97, 111, 112). Ma den Bijbelstudie fu wi no o denki so efu den no e frustan taki Yehovah gi wi den wet disi fu di a lobi wi. Dati meki a bun fu poti den aksi disi gi den: „Fu san ede yu denki taki Yehovah e aksi den anbegiman fu en fu du a sani disi noso fu no du a sani disi? San dati e  leri wi fu en?” Efu wi e yepi den Bijbelstudie fu wi fu kon sabi Yehovah èn fu kon lobi a nen fu en, dan wi o doro den ati. Den Bijbelstudie fu wi no o lobi den wet fu Gado nomo, ma den o lobi Yehovah tu (Ps. 119:68). A bribi fu den o kon moro tranga èn dati o yepi den fu horidoro te den e kisi hebi tesi.​—1 Kor. 3:12-15.

12. Fa David meki en ati kori en èn san ben de a bakapisi?

¹² Den wortu „mi heri ati” di Kownu David skrifi na ini Psalm 86:11 prenspari tu. Ensrefi ben ondrofeni taki aladi a ben lobi Yehovah, toku en ati ben kori en fu du sani di Yehovah no feni bun. Wan leisi di a ben de na tapu en daki a si fa a frow fu wan tra man ben wasi. San a du na a momenti dati? A ben sabi a wet disi fu Yehovah: „Un no musu angri fu abi a wefi fu wan tra sma” (Eks. 20:17). Toku a tan luku na uma. David en ati ben prati. A ben wani du san Yehovah e aksi fu en, ma a ben wani na uma tu. Aladi David ben lobi Yehovah èn a ben dini en langa ten kaba, toku a du san a sondu skin fu en ben wani. A sondu teige Yehovah. A sani di a du meki Yehovah kisi porinen èn a tyari takru bakapisi kon gi tra sma di no ben du nowan ogri. A tyari takru bakapisi kon tu gi en eigi famiri.​—2 Sam. 11:1-5, 14-17; 12:7-12.

13. Fa wi du sabi taki David ben dini Gado nanga en heri ati baka?

¹³ Yehovah yepi David fu frustan taki a meki wan seryusu fowtu èn David meki muiti fu kon bun baka nanga Yehovah (2 Sam. 12:13; Ps. 51:2-4, 17). David no frigiti sortu problema nanga sari sani ben miti en di a meki en ati kori en fu du sani di no bun. David ben kan taki den wortu na ini Psalm 86:11 na a fasi disi tu: „Gi mi wan ati di no prati.” Yehovah yepi David fu kon abi wan ati di no prati? Iya. Bakaten Yehovah ben taki fu David taki en na wan man di ’dini en nanga en heri ati’.​—1 Kow. 11:4; 15:3.

14. San wi musu aksi wisrefi èn fu san ede?

¹⁴ Na eksempre fu David e gi wi deki-ati, ma a de wan warskow gi wi tu. Awinsi wi e dini Yehovah wan syatu pisi ten noso wi e dini en furu yari kaba, wi musu aksi wisrefi: ’Mi e kakafutu gi Satan di wani kisi mi fu du sani di no bun?’

15. Te wi e frede Gado, dan fa dati o yepi wi fu no luku sani di kan wiki den seksfiri fu wi?

 ¹⁵ Fu eksempre, efu yu si wan sani na telefisi noso na tapu Internet di kan wiki den seksfiri fu yu, san yu o du? A kan makelek fu denki taki yu kan tan luku a fowtow noso a felem fu di a no porno yu e luku. Ma a kan taki Satan e gebroiki a sani disi fu meki wi kon abi wan ati di prati (2 Kor. 2:11). A sani di yu e luku kan de leki wan aksi di wan man e gebroiki fu koti wan udu. A man e poti na aksi na ini na udu èn a e suku fu priti na udu. A e tan naki na aksi na ini na udu teleki na udu priti. Den sani di wi e luku kan de leki na aksi dati. Te wi e tan luku wan sani di gersi leki a no ogri, dan te fu kaba a kan meki wi sondu. Dati meki wi no musu meki nowan doti sani kon na ini wi ati. Wi musu tan dini Yehovah nanga wi heri ati!

16. San wi musu aksi wisrefi te Satan wani kisi wi fu du sani di no bun?

¹⁶ Boiti den sani dati, Satan e gebroiki furu tra sani fu kisi wi fu du sani di no bun. San wi o du? A kan makelek fu denki taki den sortu sani dati no ogri so. Fu eksempre, kande wi e denki: ’Den no o puru mi na ini a gemeente te mi du a sani disi, sobun a no ogri so.’ Ma a denki disi no bun. A moro bun fu aksi wisrefi: ’Satan e gebroiki a tesi disi fu meki mi kisi wan ati di prati? Mi o gi Yehovah porinen efu mi du a sani disi? A sani disi o meki taki mi kon moro krosibei na Gado noso a kan pori mi matifasi nanga en?’ Prakseri den aksi dati. Aksi Yehovah fu yepi yu fu piki den aksi dati sondro fu kori yusrefi (Yak. 1:5). A sani disi o kibri yu. A kan yepi yu fu kakafutu gi tesi neleki Yesus di ben taki: „Gowe fu dya, Satan!”​—Mat. 4:10.

17. Fu san ede a no bun te wi ati prati? Gi wan agersitori.

 ¹⁷ A no bun te wi ati prati. Kon meki wi taki dati den man na ini wan voetbal team no man feni en nanga makandra. Sonwan fu den wani meki nen gi densrefi, wan tu fu den no wani hori densrefi na den regel èn trawan no abi lespeki gi a trainer. So wan team no o wini plèi. Ma wan team di e wroko bun nanga makandra o abi moro bun bakapisi. Wi ati kan de neleki a voetbal team disi. Efu wi e denki neleki fa Yehovah e denki èn efu wi lobi den srefi sani di Yehovah lobi, dan wi ati no o prati. No frigiti taki Satan wani taki wi kon abi wan ati di prati. A wani taki yu du san yu sondu skin wani, na presi fu gi yesi na Yehovah. Ma yu musu tan dini Yehovah nanga yu heri ati (Mat. 22:36-38). Noiti no meki Satan kisi yu!

18. Te yu e luku san skrifi na Mika 4:5, dan san yu o du?

¹⁸ Neleki David wi musu begi Yehovah: „Meki mi sori lespeki gi yu nen nanga mi heri ati.” Du ala san yu man fu du dati. Awinsi sortu bosroiti yu musu teki ibri dei, sori taki yu abi bigi lespeki gi a nen fu Yehovah. Te yu e du dati, dan leki wan Kotoigi fu Yehovah yu o gi grani na en nen (Odo 27:11). Neleki a profeiti Mika, wi alamala o man taki: „Fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati.”​—Mika 4:5.