LISAUN ESTUDU 24
“Hametin haʼu-nia laran hodi hamtaʼuk Ita-nia naran”
“Hametin haʼu-nia laran hodi hamtaʼuk Ita-nia naran. Oh Jeová, haʼu-nia Maromak, haʼu hahiʼi Ita ho haʼu-nia laran tomak.”—SAL 86:11, 12.
KNANANUK 7 Jeová mak ami-nia kbiit
IHA LISAUN NEʼE *
1. Hamtaʼuk Maromak katak sá? Tanbasá ema neʼebé hadomi Jeová presiza hamtaʼuk nia?
EMA Kristaun hadomi Maromak no mós hamtaʼuk nia. Ita sei aprende tanbasá importante atu hamtaʼuk Maromak. Maibé hamtaʼuk Maromak katak sá? Ema neʼebé hamtaʼuk Maromak hatudu respeitu neʼebé kleʼan ba nia. Sira lakohi halo sira-nia Aman iha lalehan triste tanba sira lakohi estraga sira-nia relasaun belun ho nia.—Sal 111:10; Prov 8:13.
2. Tuir Liurai David nia liafuan iha Salmo 86:11, ita sei aprende buat rua saida?
2 Lee Salmo 86:11. Bainhira Ita hanoin kona-ba liafuan iha eskritura neʼe, Ita bele haree katak Liurai David komprende tanbasá importante atu hamtaʼuk Maromak. Ita sei aprende oinsá ita bele halo tuir David nia liafuan iha ninia orasaun. Primeiru, ita sei aprende razaun balu tanbasá ita presiza hatudu respeitu kleʼan ba Jeová nia naran. Segundu, ita sei aprende oinsá mak ita bele hatudu respeitu ba Maromak nia naran iha ita-nia moris.
TANBASÁ RESPEITU MAROMAK NIA NARAN?
3. Akontesimentu saida mak ajuda Moisés atu respeitu nafatin Maromak nia naran?
3 Hanoin toʼok oinsá Moisés sente bainhira nia iha fatuk-kuak laran no haree Jeová nia glória liu iha ninia oin. Neʼe mak akontesimentu kmanek neʼebé ema bele haree. Moisés rona liafuan tuirmai neʼe neʼebé karik anju ida mak koʼalia: “Jeová, Jeová, Maromak neʼebé laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos, Maromak neʼebé hatudu domin neʼebé laran-metin ba ema rihun ba rihun, fó perdua ba sala sira no ba hahalok kontra lei no hahalok aat.” (Éx 33:17-23; 34:5-7) Bainhira Moisés uza Maromak nia naran, karik nia hanoin-hetan akontesimentu neʼe. Tan neʼe mak Moisés fó avizu ba povu Izraél atu hamtaʼuk ‘Jeová nia naran neʼebé iha glória boot no kmanek tebes’.—Deut 28:58.
4. Saida mak bele ajuda ita atu respeitu liután Jeová?
4 Bainhira ita hanoin kona-ba Jeová nia naran, ita mós presiza medita kona-ba ninia hahalok sira hanesan kbiit, matenek, justisa no domin. Bainhira ita hanoin kona-ba hahalok sira-neʼe no mós hahalok sira seluk, neʼe sei book ita atu respeitu liután nia.—Sal 77:11-15.
5-6. (a) Maromak nia naran signifika saida? (b) Tuir Éxodo 3:13, 14 no Isaias 64:8, iha dalan saida deʼit mak Jeová kumpre ninia hakarak?
5 Maromak nia naran signifika saida? Matenek-naʼin barak konkorda katak naran Jeová karik signifika “Nia mak halo sai”. Neʼe fó-hanoin ita katak la iha buat ida mak bele hanetik Jeová atu kumpre ninia hakarak. Oinsá?
6 Jeová bele sai buat naran deʼit atu kumpre ninia hakarak. (Lee Éxodo 3:13, 14.) Ita-nia publikasaun sira sempre anima ita atu hanoin kona-ba neʼe. Jeová mós bele halo ninia atan neʼebé la perfeitu atu sai buat neʼebé nia presiza atu serbí nia no kumpre ninia hakarak. (Lee Isaias 64:8.) Liuhusi dalan sira-neʼe mak Jeová kumpre ninia hakarak. La iha buat ida mak bele hanetik nia.—Isa 46:10, 11.
7. Oinsá ita bele hafolin liután ita-nia Aman iha lalehan?
7 Ita bele hafolin liután ita-nia Aman iha lalehan liuhusi medita buat neʼebé nia halo ona no mós buat neʼebé nia ajuda ita atu halo. Porezemplu, bainhira ita medita kona-ba Jeová nia kriasaun furak, ita admira liután buat neʼebé Jeová halo ona. (Sal 8:3, 4) No bainhira ita medita kona-ba buat neʼebé Jeová ajuda ita atu halo hodi kumpre ninia hakarak, neʼe sei book ita atu hatudu respeitu neʼebé kleʼan ba nia. Jeová nia naran mak kmanek duni. Naran neʼe reprezenta ita-nia Aman nia hahalok hotu, buat neʼebé nia halo ona no buat neʼebé nia sei halo iha futuru.—Sal 89:7, 8.
“HAʼU SEI FÓ SAI JEOVÁ NIA NARAN”
Moisés nia hanorin sira fó kmaan ba ema. Nia tau fokus ba Jeová nia naran no ninia hahalok sira (Haree parágrafu 8) *
8. Tuir Deuteronómio 32:2, 3, Jeová hanoin oinsá kona-ba ninia naran?
8 Antes ema Izraél tama ba rai neʼebé Maromak promete, Jeová hanorin knananuk ida ba Moisés. (Deut 31:19) Tuirmai Moisés hanorin fali knananuk neʼe ba povu. (Lee Deuteronómio 32:2, 3.) Bainhira ita medita kona-ba versíkulu 2 no 3, ita sei haree ho klaru katak Jeová lakohi ema atu subar ninia naran, ka haree naran neʼe nuʼudar buat neʼebé lulik atu temi. Nia hakarak anju no ema hotu hatene ninia naran. Ema Izraél hetan priviléjiu boot atu rona Moisés hanorin sira kona-ba Jeová no ninia naran neʼebé kmanek. Hanesan udan halo ai-horis sai buras, Moisés nia hanorin sira hametin sira-nia fiar no anima sira. Oinsá mak ita bele hanorin iha dalan hanesan neʼe?
9. Oinsá ita bele ajuda atu halo santu Jeová nia naran?
9 Bainhira ita haklaken uma ba uma ka iha fatin públiku, ita bele uza ita-nia Bíblia atu hatudu ba ema Maromak nia naran Jeová. Ita bele fahe publikasaun sira, vídeo, no informasaun iha ita-nia website atu fó hahiʼi ba Jeová. Karik ita bele hetan oportunidade atu koʼalia kona-ba Jeová no ninia hahalok sira iha serbisu-fatin, eskola ka durante viajen. Karik ita mós fó sai ba sira kona-ba Jeová nia hakarak ba ita no mundu. Bainhira sira rona buat sira-neʼe, karik sira foin hatene katak Jeová hadomi ita hotu. Bainhira ita fó-hatene lia-loos ba ema seluk kona-ba ita-nia Aman, ita ajuda halo santu ninia naran. Ita ajuda hamoos Jeová nia naran husi lia-bosok neʼebé ema hanorin. Bíblia nia hanorin bele fó kmaan ba ema.—Isa 65:13, 14.
10. Tanbasá la toʼo atu hanorin deʼit kona-ba Maromak nia matadalan no ukun-fuan sira?
10 Bainhira estuda Bíblia ho ema, ita hakarak ajuda sira atu hatene no uza Jeová nia naran. Ita mós hakarak ajuda sira koñese didiʼak Jeová. Ita labele kumpre ida-neʼe se ita hanorin deʼit Maromak nia matadalan no ukun-fuan sira. Ita-nia estudante bele aprende Maromak nia ukun-fuan no admira ukun-fuan sira-neʼe. Maibé karik estudante neʼe sei halo tuir Jeová laʼós tanba domin. Eva hatene Maromak nia ukun-fuan, maibé nia la hadomi Maromak. Adão mós la hadomi Maromak. (Gén 3:1-6) Tan neʼe la toʼo atu hanorin deʼit kona-ba Maromak nia matadalan no ukun-fuan sira.
11. Oinsá ita bele ajuda ita-nia estudante atu hadomi Maromak?
11 Jeová nia ukun-fuan no matadalan sira sempre diʼak ba ita. (Sal 119:97, 111, 112) Maibé karik ita-nia estudante sei la hanoin hanesan neʼe se sira la komprende katak Jeová halo ukun-fuan sira-neʼe tanba hadomi ita. Tan neʼe ita bele husu ita-nia estudante: “Tuir Ita-nia hanoin, tanbasá Maromak husu ninia atan sira atu halo ida-neʼe ka la halo ida-neʼe? Ida-neʼe hanorin saida kona-ba Jeová?” Se ita ajuda ita-nia estudante atu hanoin kona-ba Jeová no haburas domin ba ninia naran, karik neʼe sei book sira-nia laran. Ita-nia estudante sei hafolin Jeová nia ukun-fuan sira no mós hadomi Jeová. (Sal 119:68) Neʼe sei hametin sira-nia fiar no ajuda sira atu tahan susar neʼebé sei mosu.—1 Kor 3:12-15.
ITA SEI LAʼO TUIR JEOVÁ NIA NARAN
David nia laran fahe ba rua (Haree parágrafu 12)
12. Oinsá mak David la hametin ninia laran, no neʼe lori rezultadu saida?
12 Fraze importante neʼebé Liurai David hakerek iha Salmo 86:11 mak “hametin haʼu-nia laran”. Liafuan neʼe bele mós signifika “laran tomak”. Durante David nia moris, nia haree katak la fasil atu serbí Maromak ho laran tomak, ka laran neʼebé kompletu. Loron ida, nia hamriik iha uma-leten no haree mane seluk nia feen hariis hela. Iha tempu neʼebá, David hamtaʼuk Maromak ho laran tomak ka lae? Nia hatene Jeová nia ukun-fuan: “Imi labele kaan imi-nia maluk nia feen.” (Éx 20:17) Maibé David kontinua hateke. Ninia laran fahe ba rua, nia hakarak halo kontente Jeová no iha tempu hanesan hakarak halo sala ho Bat-Seba. Maski David hadomi no hamtaʼuk Jeová ba tempu kleur ona, maibé nia monu ba ninia hakarak sala. Iha situasaun neʼe, David halo buat neʼebé aat. Nia hafoʼer Jeová nia naran. Nia mós lori susar ba ema neʼebé la halo sala, inklui ninia família rasik.—2 Sam 11:1-5, 14-17; 12:7-12.
13. Oinsá mak ita hatene katak David serbí fali Jeová ho laran tomak?
13 Jeová fó dixiplina ba David no David hetan fali relasaun diʼak ho Jeová. (2 Sam 12:13; Sal 51:2-4, 17) David la haluha susar neʼebé mosu tanba nia la hamtaʼuk Maromak ho laran tomak. Ninia liafuan iha Salmo 86:11 mós bele tradús nuʼudar: “Halo haʼu labele [iha] laran [neʼebé fahe ba] rua.” Jeová ajuda David atu serbí fali nia ho laran tomak ka lae? Sin. Tanba iha eskritura seluk Jeová koʼalia kona-ba David nuʼudar mane neʼebé “serbí Maromak ho laran tomak”.—1 Reis 11:4; 15:3.
14. Ita presiza husu pergunta saida ba ita-nia an, no tanbasá?
14 David nia ezemplu kona-ba monu ba sala sériu, anima no mós fó avizu ba Maromak nia atan sira ohin loron. Maski ita foin serbí Jeová ka serbí nia tinan barak ona, ita tenke husu ita-nia an: ‘Haʼu kontra Satanás bainhira nia koko hanetik haʼu atu serbí Jeová ho laran tomak ka lae?’
Satanás sei hakaʼas an atu halo ita-nia laran fahe ba rua. Keta husik nia halo nuneʼe! (Haree parágrafu 15-16) *
15. Oinsá mak hamtaʼuk Maromak bele proteje ita bainhira mosu foto neʼebé hamosu hanoin foʼer?
15 Porezemplu, se Ita haree foto iha televizaun ka internét neʼebé bele book Ita atu iha hanoin foʼer, Ita sei halo saida? Fasil atu hanoin katak foto ka filme neʼe laʼós pornografia. Maibé Satanás bele uza ida-neʼe atu halo Ita-nia laran fahe ba rua ka lae? (2 Kor 2:11) Ita bele kompara foto neʼe ho baliu neʼebé uza atu fera ai. Ulukliu parte neʼebé kroʼat no mihis husi baliu tama ba ai, no tuirmai neʼe tama kleʼan liután toʼo fera ai ba rua. Ita bele kompara foto neʼebé hamosu hanoin foʼer ho parte neʼebé kroʼat no mihis husi baliu. Buat neʼebé kiʼik deʼit no haree ladún perigu, bele book ema ida lalais deʼit atu halo sala hasoru Jeová. Tan neʼe keta husik buat neʼebé foʼer tama iha Ita-nia laran. Kontinua hakaʼas an atu hamtaʼuk Jeová nia naran ho Ita-nia laran tomak.
16. Bainhira ita hasoru tentasaun, ita presiza husu pergunta saida deʼit ba ita-nia an?
16 Satanás mós bele uza dalan oioin hodi tenta ita atu halo sala. Ita sei halo saida? Fasil deʼit atu hanoin katak buat sira-neʼe la sala. Porezemplu, karik ita hanoin: ‘Kongregasaun sei la hasai haʼu se haʼu halo ida-neʼe, entaun neʼe laʼós sala boot.’ Hanoin hanesan neʼe sala. Diʼak liu atu husu ba ita-nia an: ‘Satanás uza tentasaun neʼe atu halo haʼu-nia laran fahe ba rua ka lae? Se haʼu monu ba tentasaun neʼe, haʼu hafoʼer Jeová nia naran ka lae? Neʼe halo haʼu hakbesik ba Maromak ka hadook haʼu husi nia?’ Medita kona-ba pergunta sira-neʼe. No halo orasaun hodi husu matenek atu la lohi ita-nia an bainhira hatán ba pergunta sira-neʼe. (Tgo 1:5) Hodi halo nuneʼe sei proteje ita. Neʼe sei ajuda Ita atu halo desizaun metin hodi la monu ba tentasaun no halo tuir Jesus neʼebé dehan: “Bá dook tiha Satanás!”—Mt 4:10.
17. Tanbasá la diʼak atu iha laran neʼebé fahe ba rua? Fó toʼok ezemplu.
17 La diʼak atu iha laran neʼebé fahe ba rua. Imajina toʼok ekipa ida neʼebé ninia jogadór sira la iha unidade. Jogadór balu hakarak buka glória ba sira-nia an rasik, jogadór seluk lakohi halo tuir kompetisaun nia lei, no jogadór seluk tan la respeitu treinadór. Ekipa hanesan neʼe sei la manán jogu. Maibé ekipa neʼebé iha unidade sei hetan susesu. Ita-nia laran bele sai hanesan ekipa neʼebé hetan susesu se Ita-nia hanoin, hakarak no sentimentu laʼo hamutuk atu serbí Jeová. Satanás hakarak halo Ita-nia laran fahe ba rua hodi hakarak buat neʼebé sala no mós iha tempu hanesan halo tuir Jeová nia ukun-fuan. Maibé Ita tenke serbí Jeová ho laran tomak. (Mt 22:36-38) Keta husik Satanás halo Ita-nia laran fahe ba rua!
18. Hanesan liafuan iha Miqueias 4:5, Ita hakarak halo saida?
18 Halo orasaun ba Jeová hanesan David: “Hametin haʼu-nia laran hodi hamtaʼuk Ita-nia naran.” Hakaʼas an atu moris tuir orasaun neʼe. Loroloron, hakaʼas an atu hatudu liuhusi Ita-nia desizaun hotu katak Ita respeitu tebes Jeová nia naran neʼebé santu. Nuʼudar Testemuña ba Jeová, bainhira Ita halo ida-neʼe, Ita lori glória ba Jeová nia naran. (Prov 27:11) Hanesan profeta Miqueias, ita hotu bele hatete: “Ita sei laʼo tuir Jeová, ita-nia Maromak, tinan ba tinan ba nafatin.”—Miq 4:5.
KNANANUK 41 Rona mai haʼu-nia orasaun
^ par. 5 Iha lisaun neʼe, ita sei aprende kona-ba Liurai David nia orasaun neʼebé hakerek iha Salmo 86:11, 12. Hamtaʼuk Jeová nia naran katak sá? Tanbasá ita tenke hatudu respeitu neʼebé kleʼan ba naran neʼe? Oinsá mak hamtaʼuk Maromak bele ajuda ita atu la monu ba tentasaun?
