1. Kuyoowa Leza chaambaanzi alubo nkamboonzi nikuyandikana kuli baabo bamuyanda?

MAKRISTU balamuyanda Leza alubo balamuyoowa. Bamwi balakonzya kubonaanga tazichiti pe kuyanda Leza kumwi katumuyoowa. Pesi aawa tatwaambi kuyoowa nkutubaako kuti twabona chintu chiyoosya. Muchiiyo eechi tulalanga-langa kumwi kuyoowa kusiyene akooku. Bantu bayoowa Leza munzila eeyi balamulemeka. Tabayandi pe kuchita zintu zitamubotezyi nkaambo tabayandi pe kuti bweenzinyina mbubalaabo anguwe bumane.​—Int. 111:10; Tus. 8:13.

2. Kweendelana amajwi aDavida aali muli Intembauzyo 86:11, amba zintu zibili nzitutalange-lange.

² Bala Intembauzyo 86:11. Kuti wayeeyesesya atala amajwi aaya, ulakonzya kubona kuti Mwaami usyomeka Davida wakakubona kakuyandikana kuyoowa Leza. Lino atulange-lange mbutukonzya kubelesya majwi akaambwa aDavida munkombyo yakwe. Tulasaanguna kulanga-langa twaambo tutupa kuti tulemeke zina lyaLeza. Mpawo tulabona kuti nga tulatondeezya biyeni kuti tulalilemeka zina lyaLeza mubuumi bwesu bwabuzuba abuzuba.

3. Kweelede kuti niinzi chakapa kuti Mozesi akkale kalemeka zina lyaLeza?

³ Yeeya atala aMozesi mbaakalimvwa chiindi naakali mumpako yabbwe naakabona bulemu bwaLeza. Kweelede kuti  eechi nchicho chakali chigambyo chipati kwiinda zyoonse zyakachitika Jesu Kristu kaatanasika. Mozesi wakamvwa mungelo kali kwaamba kuti: “Jehova, Jehova, Leza siluse alimwi silweetelelo, uutafwambaani kukalala alimwi uuzwide luyando lutamani akasimpe, uutondezya luyando lutamani kubantu bali zyuulu, uulekelela milandu, nsotoko alimwi azibi.” (Kul. 33:17-23; 34:5-7) Kweelede kuti Mozesi wakali kuziyeeya eezi chiindi naakali kubelesya zina lyakuti Jehova. Zilaantanganana kuti eezi nzizyo zyakapa kuti Mozesi abuzye maIsrayeli kuti bayoowe “zina eeli . . . ililemekwa alimwi liyoosya.”​—Dt. 28:58.

4. Nkuyeeyesesya atala aanzi kupa kuti tulemeke Jehova?

⁴ Chiindi nituyeeya atala aJehova, tweelede kuyeeyesesya atala akuti muntu uuli biyeni. Tweelede kuyeeya buntu bwakwe buswaanizya manguzu, busongo, bululami aluyando. Kuyeeyesesya atala abuntu oobu abumwi kupa kuti tumulemeke.​—Int. 77:11-15.

5-6. (a) Zina lyaLeza lyaambaanzi? (b) Kweendelana alugwalo lwa Kulonga 3:13, 14 alwa Isaya 64:8, munzilaanzi Leza mwazuzikizya makanze aakwe?

⁵ Zina lyaLeza lyaambaanzi? Basyaabusongo biingi balazumina kuti zina lyakuti Jehova lyaamba kuti “Uupa Kuti Kube.” Nzilyaamba zina lyaLeza zitondeezya kuti takwe chintu chikonzya kumukachizya kuti achite nzyayanda. Uzichita biyeni Leza nzyayanda?

⁶ Jehova upa kuti nzyayanda zichitike kwiinda mukuba kufumbwa nchayanda kuti azuzikizye makanze aakwe. (Bala Kulonga 3:13, 14.) Mabbuku eesu akkala katusungwaazya kuti tukkale katuyeeyesesya atala azeezi. Jehova ulakonzya kupa kuti bantu balaachibi babe kufumbwa mbuli mbayanda kuchitila kuti bamubelekele akuti bazuzikizye makanze aakwe. (Bala Isaya 64:8.) Jehova ubelesya nzila eezi kuti kuyanda kwakwe kuchitike. Takwe chikonzya kumukachizya kuti azuzikizye makanze aakwe.​—Is. 46:10, 11.

7. Nga tulachita biyeni kuti tube achiyandisyo chakulumba Taateesu uulikujulu?

 ⁷ Tulakonzya kuba achiyandisyo chakulumba Taateesu uulikujulu kuti twayeeyesesya zintu nzyaakachita anzyaakatugwasya kuti tuchite. Muchikozyano, tulakonzya kugamba kuti twayeeyesesya atala azintu Jehova nzyaakalenga. (Int. 8:3, 4) Alubo tulakonzya kumulemeka Jehova kuti twayeeyesesya atala ambaakatugwasya kuti tuchite zimwi zintu kuti tuzuzikizye makanze aakwe. Nisimpe, zina lyakuti Jehova lilagambya. Liswaanizya mbabede Taata, nzyaakachita anzyayoochita.​—Int. 89:7, 8.

8. Lugwalo lwa Deuteronomo 32:2, 3 lutondeezya kuti Jehova ulibona biyeni zina lyakwe?

⁸ Jehova wakayiisya Mozesi lwiimbo maIsrayeli kali aba afwiifwi kunjila Munyika Yachisyomezyo. (Dt. 31:19) Mpawo Mozesi wakayiisya maIsrayeli lwiimbo oolo. (Bala Deuteronomo 32:2, 3.) Kuti twayeeyesesya atala avesi 2 a 3, tulabona kuti Jehova tayandi pe kuti zina lyakwe lisiswe naakuti libe chintu chitondwa kwaamba. Jehova uyanda kuti zina lyakwe lizibwe abantu boonse. Zyakababotezya maIsrayeli chiindi Mozesi naakabayiisya atala aJehova azina lyakwe lilemekwa. Nzyaakabayiisya Mozesi zyakasimya lusyomo lwabo akubasungwaazya mbuli mvula iiwa mbichaani-mbichaani mbiipa kuti zilyo zikule. Nga tulabayiisya biyeni bantu munzila iili boobu?

9. Nga tulagwasilizya biyeni mukusalazya zina lyaJehova?

⁹ Tulakonzya kubelesya Bbayibbele lyesu kuti tutondeezye bantu zina lyaLeza lyakuti Jehova chiindi nituli kukambawuka antanganana naakuti kung’anda ang’anda. Tulakonzya kubapa mabbuku, kubatondeezya mavidiyo naakuti zimwi zili awebbusayiti yesu zilemeka Jehova. Tuli amweenya wakubuzya bamwi atala aLeza wesu ngutuyanda ambabede chiindi nituli kumulimu, kuchikolo naakuti mulweendo. Tulakonzya kubuzya bamwi atala azintu zibotu Jehova nzyayootuchitila anzyayoochita munyika. Kuti twachita oobo, tulabagwasya kuti babone kuti Jehova ulatuyanda alubo zilakonzya kuba zintu zipya kulimbabo. Chiindi nitubuzya bamwi kasimpe kali atala aTaateesu ulaaluyando, nga tuli kusalazya zina lyakwe. Nga tuli kubagwasya kuti babone kuti nzibakayiisigwa atala aJehova nzyakubeja. Nzitubayiisya zilakonzya kubagwasya akubalemununa.​—Is. 65:13, 14.

10. Nkamboonzi nituteelede kubayiisya milawu yaLeza luzutu bantu mbitwiiyaabo Bbayibbele?

¹⁰ Chiindi nituyiisya bantu mbitwiiyaabo Bbayibbele, tuyanda kubagwasya kuti bazibe zina lyaJehova akuti balibelesye. Alubo tuyanda kubagwasya kuti bamuzibe kabotu Jehova. Nga balamuziba kabotu na Jehova kuti twabayiisya milawu yakwe luzutu? Muntu wiiya kabotu ulakonzya kwiiziba milawu yaLeza akwiiyanda. Pesi sikwiiya ooyo nga ulakonzya na kuswiilila Jehova akaambo kakuti ulamuyanda? Utalubi kuti Adamu aEva bakaliizi milawu yaLeza pesi teebakali kumuyanda amoyo woonse Sikubapa mulawu. (Matl. 3:1-6) Nkinkaako tatweelede kuyiisya bantu milawu yaLeza luzutu pesi tweelede kubayiisya zyiingi.

11. Nga tulabayiisya biyeni bantu milawu yaJehova munzila iipa kuti bamuyande?

¹¹ Milawu yaJehova mibotu alubo ilagwasya. (Int. 119:97, 111, 112) Pesi bantu mbitwiiyaabo Bbayibbele balakonzya kutazibona oobo kunze kwakuti bamvwisisisya kuti Jehova wakatupa milawu eeyi akaambo kakuti ulatuyanda. Tulakonzya kubabuzya kuti:  “Mubonaanga nkamboonzi Leza nayanda kuti bakombi bakwe bachite eezi mpawo baleke eezi? Eezi zitondeezya kuti ulibiyeni?” Kuti twabagwasya kuti bayeeyesesye kuti Leza muntu uuli biyeni akuti bayande zina lyakwe lilemekwa, ziyoopa kuti tubasike aamoyo. Eezi ziyoopa kuti bayande milawu aSikupa milawu yakkona. (Int. 119:68) Alubo lusyomo lwabo luyoosima mpawo bayoolisimya kumasunko aali mbuli mulilo ngibatazooswaanane aawo.​—1 Kor. 3:12-15.

12. Niinzi chakapa kuti Davida abe amyoyo iibili alubo eezi zyakeeta mpinduunzi?

¹² Muli Intembauzyo 86:11 muli majwi aayandikana loko aakuti: “Kondipa kuba amoyo omwe.” Mwaami Davida wakazulwidwa amuuya uusalala kuti alembe majwi aaya. Zintu zyakachitika mubuumi bwakwe zyakamugwasya kubona kuti nkuuba kuba aamyoyo iibili. Limwi zuba wakali kweendeenda ajulu ang’anda yakwe mpawo wakabona mwanakazi wamuntu kali kusamba. Achiindi eecho Davida wakachili aamoyo uumwi na naakuti wakali waba amyoyo iibili? Wakaluuzi mulawu waJehova wakuti: “Utanyonokeli mukaintu wamweenzinyoko.” (Kul. 20:17) Pesi wakayinkilila kunembo kamulangide. Davida wakaba aamyoyo iibili, wakuyanda kubotezya Jehova awakuyanda Bbatishebba. Nikuba kuti Davida wakali waba achiindi kayanda Jehova akumuyoowa, pesi wakazundwa aziyandwa aamubili wakwe. Davida wakazoochita zimwi zintu zibi. Wakasizya zina lyaJehova. Wakeeta mapenzi kubantu batakwe mulandu kuswaanizya abamumpuli yakwe.​—2 Sam. 11:1-5, 14-17; 12:7-12.

13. Tuzizi biyeni kuti Davida wakazooba aamoyo uumwi lubo?

¹³ Jehova wakamulaya Davida mpawo wakazooba abweenzinyina buli kabotu lubo anguwe. (2 Sam. 12:13; Int. 51:2-4, 17) Davida wakali kwaayeeya mapenzi akaba akaambo kakuba aamyoyo iibili. Majwi aakwe ajanika muli Intembauzyo 86:11 alakonzya kwaamba kuti: “Kondigwasya kutegwa nditabi amyoyo yobilo.” Jehova wakamugwasya na Davida kuti abe aamoyo uumwi naakuti atabi aamoyo iibili? Iiyi wakamugwasya, nkaambo Jwi lyaLeza lyaamba Davida kuti ‘moyo wakwe wakamaninina kuli Jehova Leza wakwe.’​—1 Bam. 11:4; 15:3.

14. Nguuli mubuzyo ngutweelede kulibuzya alubo nkamboonzi?

¹⁴ Chikozyano chaDavida chilatusungwaazya akutuchenjezya. Kubisya nkwaakachita Davida ninchenjezyo kubakombi baLeza  mazubaano. Nikuba kuti twaba achiindi chilamfu naakuti chifwiifwi katubelekela Jehova, tweelede kulibuzya kuti, ‘Ndili kuzikaka na nzila zibelesegwa aSaatani kuti andipe kuba aamyoyo iibili?’

15. Kuyoowa Jehova kupa kuti tuchiteenzi chiindi nitwabona mapikicha aapa kuti tube amuzeezo wakoonana?

¹⁵ Nga ulachita biyeni kuti wabona pikicha muTV naakuti aIntaneti iikonzya kupa kuti ube amuzeezo wakoonana? Ulakonzya kuyeeya kuti, pikicha eeyi naakuti muvi eeyi teeponogilafu pe. Pesi eeyi ilakonzya na kuba nzila Saatani njabelesya kupa kuti ube aamyoyo iibili? (2 Kor. 2:11) Pikicha eeyo ilakonzya kukozyanisigwa akaleba (chaankuni) kabelesegwa kukupandula chisamu chipati. Nusaanguna kugonka nga kwanjila kapisi kabosya pesi nwiinkilila kunembo kugonka kaleba nga kabbila mpawo chisamu nga chapanduka. Pikicha eeyo iifenene akapisi kakaleba kabosya. Chintu chibonekaanga nchiniini alubo nchitukonzya kubonaanga tachikonzyi kutuchisa chilakonzya kupa kuti muntu abe aamyoyo iibili, achite chibi chipati akuti aleke kusyomeka kuli Jehova. Nkinkaako utazumizyi zintu zitali kabotu kuti zinjile mumoyo wako. Zumanana kuyoowa zina lyaJehova.

16. Kuti twaswaanana sunko, njiili mibuzyo njitweelede kulibuzya?

¹⁶ Kunze kwamapikicha ayeta muzeezo wakoonana, Saatani ubelesya nzila zisiyene-siyene kayanda kuti uchite zintu zibi. Nga ulachita biyeni? Nkuuba kubonaanga teezibi pe. Muchikozyano, ulakonzya kuyeeya kuti: ‘Eezi tazipi kuti ndigwisigwe mumbungano pe nkinkaako kweelede kuti teechibi pe.’ Muzeezo ooyu tawuli kabotu pe. Tweelede kulibuzya mibuzyo iili mbuli eeyi: ‘Saatani ulikubelesya nzila eeyi na kuti ape kuti ndibe  aamyoyo iibili? Kuti ndazundwa asunko eeli, tazikoopa kuti ndisizye zina lyaJehova na? Eezi zilapa kuti ndiswene afwiifwi na aLeza naakuti ndimutantamuke?’ Yeeyesesya atala amibuzyo iili boobu. Komba kuli Jehova kuti akupe busongo bwakuti ulibuzye choonzyo chiindi nusandula mibuzyo eeyo. (Jak. 1:5) Kuchita oobo kulakonzya kukukwabilila. Kulakonzya kukugwasya kuti uzunde sunko mbuli mbaakachita Jesu naakati: “Kozwa aawa Saatani!”​—Mt. 4:10.

17. Nkamboonzi kuba aamyoyo iibili nikutali kabotu? Amba chikozyano.

¹⁷ Kuba aamyoyo iibili takuli kabotu pe. Atuteedi timu yabbola ilaabantu batajisini pe. Bamwi bayanda kuliyandwiida mpuwo, bamwi tabasaani kweendelana amilawu alubo bamwi tabamulemeki pe kkochi. Timu iliboobu tayiwini pe mumusobaano. Kusiyana atimu eeyi, timu ijisini ilawina. Moyo wako ulaba mbuli timu eeyi iizwidilila kuti nzuyeeya, nzuyanda ambulimvwa kazitakazyanyi mukukomba Jehova. Yeeya kuti Saatani uyanda kuti tube aamyoyo iibili. Uyanda kuti nzuyeeya, nzuyanda ambulimvwa kaziteendelani alubo kazikazyania amilawu yaJehova. Pesi kuti ubelekele Jehova weelede kuba amoyo umwi. (Mt. 22:36-38) Utazumizyi Saatani kuti ape kuti ube aamyoyo iibili.

18. Kweendelana amajwi aali muli Mika 4:5, ukanzide kuchitaanzi?

¹⁸ Komba kuli Jehova mbuli mbaakachita Davida naakati: “Kondipa kuba amoyo omwe kutegwa kandiyoowa zina lyako.” Kanza kupona kweendelana ankombyo eeyo. Buzuba abuzuba, baachoonzyo chakuti zintu nzusala, zipati naakuti ziniini zitondeezya kuti ulalilemeka zina lyaJehova lisalala. Mbuli umwi waBakamboni baJehova, kuti wachita oobo, uyootondeezya kuti upona kweendelana azina eelyo. (Tus. 27:11) Toonse tuyookonzya kwaamba mbuli mbakaamba mupolofita Mikka kuti: “Swebo tunakweenda muzina lyaJehova Leza wesu lyoonse alyoonse mane kukabe kutamani.”​—Mik. 4:5.